“লৈবাক অসিদা বন্দে ভারত ত্রেনশিংগী মোদর্নাইজেশন তৌবা অমসুং মশিং হেনগৎলকপা অসিগা লোইননা লৈবাক অসিনা ভিক্সিত ভারতকী পান্দম অদুগী মাইকৈ তম্না খোং থাংজিল্লি”
“খা ভারতকী রাজ্যশিংনা খোংজেল য়াংনা চাউখৎলকপা অসিনা ভিক্সিত ভারতকী পান্দম অদু শোইদনা মাইপাকহল্লগনি”“নেস্নেল কেপিতল রিজন (NCR) অসি অনৌবা ত্রেনশিং, এক্সপ্রেসৱেশিংগী নেতৱার্ক অমসুং এয়র সর্বিসশিংনা পাকথোক-চাউথোরকপগা লোইননা লৈবাক অসিগী ইনফ্রাস্ত্রকচরদা অহোংবা অমা পুরক্নবা PM গতিশক্তিগী ভিজন অদুগী খুদম অমা ওইরক্লি”“বন্দে ভারত অসি ভারতকী রেলৱেজকী মোদর্নাইজেশনগী অনৌবা শক্লোন অমনি”কেন্দ্র সরকারদা লৈরিবা ঐহাক্কী মরুপ, অশ্বিনী বৈশ্নবজী, উত্তর প্রদেশকী রাজ্যপাল আনন্দিবেন পতেলজী, তমিল নাদুগী রাজ্যপাল আর্য়ন রবী, কর্নাতকাগী রাজ্যপাল থাৱরচান্দ গেহলোত, য়ু.পি.গী মুখ্য মন্ত্রী য়োগী অদিত্যনাথ, কেন্দ্র মন্ত্রী মন্দলগী ঐহাক্কী অতোপ্পা মরুপশিং, রাজ্যশিংগী উপ মুখ্য মন্ত্রীশিং, এম.পি., লৈবাক্কী তোঙান-তোঙানবা মফমদগী থৌরম অসিদা পুল্লিবা মীয়ামগী অতোপ্পা মীহুৎশিং অমদি ইবেম্মা অমদি ইবুংঙোশিং!
ঙসিগী মতমসিদা অৱাংদগী খা মায়কৈ ফাওবনা ভারতকী চাউখৎ থৌরাংগী খোঙচত্তা অনৌবা তাঙ্কক অমা হাপচিল্লি। ঙসিদগী মদুরাই-বেঙ্গালুরু, চেন্নৈ-নগরকোইল অমসুং মীরত-লখনৌগী মরক্তা বন্দে ভারত ত্রেনগী সর্বিস হৌরে। ভারতকী ত্রেনশিং পাকথোক চাউথোকহল্লিবা, মোদর্ন ওইহল্লিবা, খোঙজেল য়াঙহল্লিবা অসিনা ঐখোয়গী লৈবাক অসিবু 'বিক্সিত ভারত' অমা ওইহনবগী পান্দমগী মায়কৈদা খোংজেল য়াংনা চংশিল্লি। ঙসি হৌদোকখিবা বন্দে ভারত ত্রেন অহুম অসিনা লৈবাক অসিগী মরুওইবা শহরশিং অমসুং পুৱারী ওইরবা মফমশিংগা শম্নহল্লে। লাইশঙগী কোনুং শহর হায়নরিবা মদুরাই অসি হৌজিক্তি আই.তি. সিতী বেঙ্গালুরুগা বন্দে ভারতনা হকথেংননা শম্নহল্লে। কুম্মৈশিং অমসুং ৱিকেনদতা মদুরাই অমসুং বেঙ্গলোরগী মরক্তা চৎথোক-চৎশিন তৌবদা বন্দে ভারত ত্রেননা য়াম্না লাইথোকহল্লগনি। মসিগা লোইননা, বন্দে ভারত ত্রেন অসি লাইনীংবা চৎপশিংগীদমক্তসু য়াম্না কান্নগনি। চেন্নৈদগী নগরকোইল ফাওবগী লম্বী অসিদগী ভারতকী মহৈরোইশিং, লৌমীশিং অমসুং আই.তি. প্রোফেস্নেলশিংসু কান্নবা ফংলগনি। বন্দে ভারত এক্সপ্রেসকী খুদোংচাবা ফংলিবা মফমশিং অসিদা তুরিস্তশিংগী মশিং হেনগৎলক্লি। তুরিস্ত মশিং হেনগৎলকপা হায়বদি ললোন-ইতিক তৌবা মীওইশিং, দুকান ফম্লিবশিংগী শেন্থোক হেনগৎলকপা হায়বনি। ঐখোয়গী মফম অসিদা অনৌবা থবক ফংবগী খুদোংচাবশিংসু লৈরি। ত্রেনশিং অসিগীদমক্তা লৈবাক মীয়াম্বু ঐনা থাগৎপা ফোংদোকচরি।
মরুপশিং,
চাউখৎলবা ভারতকী পান্দম অসি মপুং ফাহন্নবগীদমক খাগী রাজ্যশিং অসি য়াম্না থুনা চাউখৎপা হায়বসি য়াম্না মরু ওই। ভারতকী খা থংবা শরুক অসি মপুং ফানা শিজিন্নদ্রিবা তেলেন্ত, মপুং ফানা শিজিন্নদ্রিবা রিসোর্স অমসুং মপুং ফানা লৌদ্রিবা খুদোংচাবশিংগী লমদম অমনি । মরম অদুনা, তমিল নাদু অমসুং কর্নাতকা য়াওনা অপুনবা খাগী চাউখৎ-থৌরাং অসি ঐখোয়গী সরকারগী মরুওইবা পীবা হীরম অমনি। হৌখিবা চহি 10 অসিদা রাজ্যশিং অসিদা চঙশিল্লিবা রেলৱেজকী চাউখৎ থৌরাংগী খোঙচৎ অসিনা মসিগী খুদম অমনি। চহি অসিগী বজেৎতা ঐখোয়না তমিল নাদুদা রেলৱেজকীদমক লুপা করোর 6000 হেন্না পীরি। মসি বজেৎ 2014গা চাংদম্নবদা শরুক তরেৎ হেনখ্রে। তমিল নাদুদা বন্দে ভারত ত্রেন 6 হান্ননা চৎথরি। হায়রিবা ত্রেন অনি অসিগা লোইননা হায়রিবা মশিং অসি হৌজিক 8 ওইগনি। অসিগুম্বা মওংদা, কর্নাতকাগীদমকসু চহি অসিদা চাউরাক্না করোর 7,000গী বজেৎ লেপখ্রে। মসিগী বজেৎ অসিসু 2014গী চাংদগী শরুক 9 হেন্না হেল্লি। ঙসি, বন্দে ভারত ত্রেনগী জোইন 8না কর্নাতকা শিনবা থুংনা শম্নহল্লে।
মরুপশিং,
মমাংগী মতমদগী শরুক কয়া হেন্না চাউবা বজেৎ অসিনা তমিল নাদু, কর্নাতকা য়াওনা খা ভারতকী রাজ্যশিংদা রেল লম্বীগী খুদোংচাবা হেনগৎহনখ্রে। রাজ্যশিং অসিদা রেলৱে ত্রেকশিং অসি ফগৎলক্লি, রেলৱে ত্রেকশিংগী ইলেক্ত্রিফিকেসন তৌরক্লি... রেলৱে স্তেসন কয়াবু মোদর্নাইজ তৌবগী থবক পায়খৎলি। মসিনা মীয়ামগী পুন্সি মহিংদা নুংঙাইবা হেনগৎহনখ্রে অমসুং ইজ ওফ দুইং বিজিনেসতা মতেং পাংলি।
মরুপশিং,
ঙসি মীরত-লখনৌ লম্বীদা বন্দে ভারত ত্রেনগী খুত্থাংদা য়ু.পি. অমসুং মরু ওইনা নোংচুপ য়ু.পি.গী মফমশিংদগী লাকপা মীয়ামদা নুংঙাইবা পাউ অমা ফংলে। মীরত অমসুং নোংচুপ থংবা য়ু.পি. ঙসিদি লমদম অসিনা চাউখৎপগী অনৌবা খোংজেলগী শাক্ষী ওইরক্লি। মীরত অসি আর.আর.তি.এস.কী খুত্থাংদা রাজধানী দিল্লীগা শম্নরি। অমরোমদা বন্দে ভারতকী রাজধানী লখনৌগী অরাপ্পা হন্থরে। অনৌবা ত্রেনশিং, এক্সপ্রেসৱেজশিংগী নেৎৱর্ক, এয়র সর্ভিসশিং পাকথোক চাউথোকহনবা.... পি.এম. গতিশক্তিগী ভিজননা করম্না লৈবাক অসিগী ইনফ্রাস্ত্রকচরদা অহোংবা পুরক্কনি হায়বগী খুদম অসিদি এন.সি.আর.না ঙসি ওইরে।
মরুপশিং,
বন্দে ভারত অসি ভারতকী অনৌবা রেলৱেজগী অনৌবা মশক অমনি। ঙসি শহর খুদিংমক্তা, লম্বী খুদিংমক্তা বন্দে ভারতকী দিমান্দ লৈরে। হাই স্পীদ ত্রেনশিং লাকপনা মীয়ামদা মখোয়গী ললোন-ইতিক অমসুং থবক ফংহন্নবা, মখোয়গী মঙলানশিং পাকথোক চাউথোকহন্নবা থাজবা পোকহল্লি। ঙসিদি লৈবাক শীনবা থুংনা বন্দে ভারত রেল সর্বিস 102 মথৌ তৌরি। হৌজিক ফাওবদা মীওই করোর অহুমদগী হেনবনা হায়রিবা ত্রেনশিং অসিদা চৎখ্রে। মশিং অসি ভারতকী ত্রেনগী মায় পাকপগী খুদম্নি। মসি আশা লৈবা ভারতকী আশা অমসুং মঙলানগী মশক অমসু ওইরি।
মরুপশিং,
মোদর্ন রেল ইনফ্রাস্ত্রকচর অসি চাউখৎপা ভারতকী ভিজনগী মপাঙ্গল কনবা য়ুম্বী অমনি। রেল লাইনশিং দবল তৌবা, রেল লাইনশিং ইলেক্ত্রিফিকেসন তৌবা, অনৌবা ত্রেনশিং পুথোকপা, অনৌবা লম্বীশিং শেমগৎপগী থবকশিং অসি খোঙজেল য়াংনা পায়খৎলি। চহি অসিগী বজেৎতা রেলৱেজদা লুপা লাখ 2.5 হেন্না বজেৎ পীখ্রে। ঐখোয়না ইন্দিয়ন রেলৱেজবু মসিগী অরিবা ইমেজ অসিদগী লৌথোক্নবা হায়তেক সর্ভিসশিংগা শম্নহল্লি। ঙসি, বন্দে ভারতকা লোয়ননা অমৃত ভারত ত্রেনশিংসু পাকথোক চাউথোক্লি। য়াম্না থুনা বন্দে ভারতকী স্লিপর ভর্জনসু লাক্কদৌরি। মহানগরশিংদা লৈরিবা মীওইশিংগী খুদোংচাবগীদমক্তা নমো ভারত ত্রেন চৎথরি। অমসুং সহরশিংগী মনুংদা ত্রাফিক্কী খুদোংচাদবশিং কোকহন্নবা অথুবা মতমদা বন্দে মেত্রোসু হৌরগনি।
মরুপশিং,
ঐখোয়গী শহরশিং অসি রেলৱে স্তেসনশিংগা শকখঙনরি। অমৃত ভারত স্তেসন স্কিমনা স্তেসনশিংবুসু মপাঙ্গল কনখৎহল্লি, সহরশিংদা অনৌবা মশক অমসু ফংহল্লি। ঙসিদি লৈবাক অসিগী রেলৱেজ স্তেসন 1300 হেন্না রেনোবেৎ তৌরি। ঙসিদি লৈবাক অসিদা মফম মফমদা এয়রপোর্তশিংগুম্না রেলৱে স্তেসনশিংসু শেমগৎলক্লি। অপীকপা স্তেসনশিং অসিসু মতমগা চুনবা অফবা থাক্কী ফেসিলিতীশিংগা শম্নহল্লি। মসিনা ইজ ওফ ত্রাভেলসু হেনগৎহল্লি।
মরুপশিং,
রেলৱেজ, রোদৱেজ, ৱাতরৱেজ অসিনচিংবা কনেক্তিবিতীগী ইনফ্রাস্ত্রকচর মপাঙ্গল কল্লবা মতমদা লৈবাক অসি মপাঙ্গল কল্লি। মসিনা লৈবাক অসিগী মীচম প্রজাদা কান্নবা ফংহল্লি, লৈবাক অসিগী লায়রবশিং অমসুং মিদ্দল ক্লাসশিংদা কান্নবা ফংহল্লি। ঙসিদি লৈবাক অসিনা ভারতনা অনৌবা ইনফ্রাস্ত্রকচর শেমগৎলকপগা লোয়ননা লাইরবশিং অমসুং মিদ্দল ক্লাসশিংবু মপাঙ্গল কনখৎহল্লি। মখোয়গীদমক্তা থবক ফংহন্নবগী খুদোংচাবশিং ফংহল্লি। ইনফ্রাস্ত্রকচর পাকথোক চাউথোকহনবনা খুঙ্গংশিংদা অনৌবা খুদোংচাবশিং ফংহল্লে। অহোঙবা দেতা অমসুং দিজিতেল ইনফ্রাস্ত্রকচরনা মরম ওইদুনা খুঙ্গংশিংদা অনৌবা ওইথোকপা য়াবশিং শেমগৎলি। হোস্পিতাল, অমাংশঙ, অমসুং রেকোর্দ মশিং য়াম্লবা য়ুমশিং শেমগৎপা মতমদা, খ্বাইদগী লাইরবশিংনসু লৈবাক অসিগী চাউখৎপগী কান্নবা ফংলি। কোলেজ, য়ুনিভর্সিতী অমসুং ইন্দস্ত্রীগুম্বা ইনফ্রাস্ত্রকচর হেনগৎলকপা মতমদা, মসিনা নহারোলশিংগী চাউখৎপগী ওইথোকপা হেনগৎহল্লি। অসিগুম্বা থৌওং কয়া অসিনা মরম ওইদুনা হৌখিবা চহি 10দা মীওই করোর 25না লাইরবগী খয়াত্তগী মপান থোকখি।
মরুপশিং,
হৌখিবা চহিশিংদা রেলৱেজনা মখোয়গী কন্না হোৎনবনা চহী কয়াগী মমাংদগী লৈরক্লবা শিংনবশিং কোকহন্নবগী আশা পুখৎলক্লি। অদুবু, হৌজিক ঐখোয়না মসিগী মাইকৈ অসিদা য়াম্না শাংবা লম্বী অমা চৎকদবনি। ইন্দিয়ন রেলৱেজনা লায়রবশিং, ময়াই ওইবা কাংলুপকী মীপুম খুদিংমক্কীদমক নুংঙাইবা খোঙচৎকী গেরেন্তী ওইদ্রিবা ফাওবা ঐখোয়না লেপ্লোই। লৈবাক অসিদা লৈরিবা ইনফ্রাস্ত্রকচর অসি চাউখৎহনবনা লাইরবা মুত্থৎপদা অচৌবা থৌদাং লৌগনি হায়না ঐনা থাজৈ। অনৌবা বন্দে ভারত অহুম অসিগীদমক তমিল নাদু, কর্নাতকা অমসুং উত্তর প্রদেশকী মীয়ামদা ঐনা অমুক্কা হন্না নুংঙাইবা ফোংদোকচরি। অদোম পুম্নমক্তা য়াইফ-পাউজেল পীজরি।
