“2024 General Election results will be beyond barriers”
“Tide that arose during independence brought passion and sense of togetherness amongst the masses and broke many barriers”“Success of Chandrayaan 3 instills a feeling of pride and self-confidence among every citizen and inspires them to march forward in every sector”“Today, every Indian is brimming with self-confidence”“Jan Dhan bank accounts became a medium to break the mental barriers amongst the poor and reinvigorate their pride and self-respect”“Government has not only transformed lives but also helped the poor in overcoming poverty”“Common citizens feel empowered and encouraged today”“Pace and scale of development of today’s India is a sign of its success”“Abrogation of Article 370 in Jammu & Kashmir has paved the way for progress and peace”“India has made the journey from record scams to record exports”“Be it startups, sports, space or technology, the middle class is moving forward at a fast pace in India's development journey”“Neo-middle class are giving momentum to the consumption growth of the country”“Today, from the poorest of the poor to the world's richest, they have started believing that this is India's time”হিন্দুস্তান তাইম্সকী সোভনা ভরতিয়া জী, অদোমগী কাঙবুগী লুপ্লোয় পুম্নমক, মফমসিদা তিনবিরিবা মীথুং পুম্নমক, ইবেম্মা অমদি ইবুংঙোশিং।
ইহান হানবদা ঐনা ময়ামগী মফমদা ঙাকপিনবা হায়জরি মরমদি ঐ মীখলগী মতাঙদা চৎলুবনা মফমসি য়ৌরকপদা খরা থেঙদোকখ্রে। অদুবু এয়রপোর্ততগী হকথেংননা ময়ামগী নাক্তা লাকচরিবনি। সোভনা জীনা য়াম্না নীংথিনা ঙাংবিখ্রে, হায়বদি ফোঙদোকপিখিবা ৱাফমশিংদু ফজৈ, করিগুম্বা মতমদা পাবসু ফংগনি হায়না থাজৈ। ফরে মদুদা খরা থেঙখ্রে।
মরূপশিং,
ময়াম পুম্নমকপু খুরুমজরি। হিন্দুস্তান তাইম্স লীদর্সিপ সম্মিত্তা অমুক্কা হন্না ঐবু অদোম্না পাউজেল পীবিরক্তুনা শরুক য়াহনবিবগীদমক ঐনা HT গ্রুপপু হন্না হন্না থাগৎচরি। ২০১৪দা ঐখোয়গী লৈঙাক শেমলকপা মতমদা, অমদি ঐখোয়না থৌগল তৌবা হৌরকপা মতমদা, লৈখিবা সম্মিত অসিগী থীমদি রিসেপিং ইন্দিয়া হায়বদি HT Group না ভাররত্তা অহোংবা কয়া অমা লাক্লগনি, Reshape তৌরগনি হায়বা খংলম্মি। ২০১৯ ঐখোয়গী লৈঙাক্না হান্নদগী হেন্না মশিং য়াম্না ফংদুনা অমুক হন্না লাকপদা, মতমদুদা থমখিবা থীমদুনা কন্ভরসেসন ফোর এ বেত্তা তুমোরো ওইখি। অদোম্না HT সম্মিতকী খুত্থাঙদা মালেমগী মফমদা ভারতনা হেন্না ফবা তুংলমচৎ অমগী মায়কৈদা খোঙ থাংজিল্লি হায়বগী পাউজেল পীখি। হৌজিক ইং ২০২৩ সিদা লৈবাকসিদা মথঙ চহিদা পাঙথোক্কদবা মীখলগী মতাঙদা ঙাংনরিবা মরমসিদা, থম্লিবা অদোমগী থীম্না – বীয়োন্দ বেরিয়র্স… অদুগা ঐ মীয়ামগী মরক্তা লৈজবা, হিংজবা মীওই, রাজনিতীগী মীওই ওইরুবনা অমদি মীয়ামগী মীহুৎ ওইরুবনা ঐনা মসিদা পাউজেল অমা উবা ফংই। অয়াম্বা মতমদা ওপিনিয়ন পোল মীখলগী চয়োল খরগী মমাঙদা লাকই অদুগা করি ওইরবা য়াবগে হায়বা তাকই। অদুবু অদোম্না ময়েক শেংনা খঙহনবিরে মদুদি মীয়াম্না হন্দক্তি পল পুম্নমক নমখায়দুনা ঐখোয়দা শৌগৎপিরক্কনি হায়বা। ২০২৪ মীখলগী রিজল্ত বীয়োন্দ বেরিয়র্স ওইরগনি।
মরূপশিং,
‘রিসেপিং ইন্দিয়া’ দগী ‘বীয়োন্দ বেরিয়র্স’ ফাওবগী ভারতকী খোঙচৎনা লাক্কদৌরিবা মশেক মঙাল চাউরবা তুংলমচৎকী য়ুম্ফম থোল্লি। য়ুম্ফম অসিদা চাওখৎপা ভারত শেমগৎকদৌরিবনি, মপাঙ্গল কনবা অমদি নুংঙাই য়াইফবা ভারত অমা শেমগৎকদৌরিবনি। মতম শাংনা, ভারত অমদি ঐখোয় ভারত মচাশিংবু য়াম্লবা পলশিং থেংনবা তারম্মি। ঐখোয়না থেংনরকখিবা মীনাই নাইথাংগী শাংলবা মতমনা ভারতপু অফা অপুন কয়ানা থনবা লমদম ওইহল্লম্মি। নীংতম ঈহৌগী মতমদা হৌরকখিবা ঈথক ইপোম, পোকখিবা ইহুল, অমত্তা ওইবগী ইথিল পোকখিবশিংদুনা অসিগুম্বা অফা অপুন কয়া নমখায়খি। নীংতম্লবা মতুংদা হায়রিবা খোঙজেল অদু লেপ্তনা মাঙদা চঙশিনখিগনি হায়না খল্লম্মি, অদুবু লাইবক থিবদি অদুম্না ওইরকখিদে। মখল কয়াগী অফা অপুন্না ঐখোয়গী লৈবাকসিদা পুনখি, থাজরম্বা খোঙজেল অদুদা মাঙদা চঙশিনবা ঙমখিদে। অচৌবা পল অমা হায়রগদি ৱাখলগী পলনা ওইরম্মি। পল খরদি অশেঙবা ওইরম্মি। পল খরনা ৱাখলনা শাগৎপা ওইরম্মি, অদুগা খরনা হেঞ্জিন্না খঞ্জিনবা ওইরম্মি, পাকথোক চাউথোকহন্দুনা ঐখোয়গী মাঙদা অচৌবা পল অমগুম থম্লম্মি। ২০১৪গী মতুংদগীনি ভারতনা লেপ্পা লৈতনা অফা অপুনশিংদুবু থুগাইনবগীদমক হোৎনরকখিবা। ঐখোয়না পল কয়া অমা লান্থোক্লক্লে খনবদা ঐ নুংঙাইব ফাওই অদুগা হৌজিক ঐখোয়না ‘বীয়োন্দ বেরিয়র্স’কী মরমদা ৱারী শান্নরি। ঙসিদি ভারতনা পল খুদিংমক নমখায়দুনা থাগী লৈমায়দা, কনামত্তন য়ৌবা ঙমদ্রিবা মফমদুদা য়ৌরে। ঙসি ভারতনা শিংনবা খুদিংমক লান্থোক্তুনা দিজিতেল ত্রাঞ্জেক্সন্দা অহানবা মফম কল্লে। ঙসি ভারতনা অফা অপুন খুদিংদগী থোরক্তুনা মোবাইল মেনুফেকচরিংদা মাঙজিল থারি। ঙসি ভারতনা স্তার্তঅপকী তাইবঙদা মকোক থোংবা অহুমসুবা মফম কল্লি। ঙসি ভারতনা মালেমদা খ্বায়দগী চাউবা স্কিল্দ পুল মফমসিদা শেম্লি। ঙসি ভারতনা G20 নচিংবা থৌরমশিং পাঙথোকপদা লানঙম ফিরাল থেৎলি। ঙসি ভারতনা মাগী অফা অপুন পুম্নমক্তগী মনিং তমদুনা মাঙদা চঙশিল্লি। অদুগা অদোমসু তাবিরম্লগনি – থৱানমিচাকশিংগী ৱাংমদা অতৈ তেংবানবশিংসু লৈরি। ভারতনা হৌজিক লৈরিবা ফীভমসিদা লেপকদবা নত্তে।
মরূপশিং,
ঐনা হৌজিক হায়খিবগুম, খ্বায়দগী চাউবা পলদি ঐখোয়গী ৱাখল্লোন্না ওইরম্মি, মেন্তেল বেরিয়রশিংনা ওইরম্মি। হায়রিবা ৱাখল্লোন অসিনা মরম ওইরগা ঐখোয়না ৱাফম কয়া তাবা ফংখি। লৈবাক অসিদা করিসু ওইথোক্লরোই… লৈবাকসিদা অহোংবা করিমত্তা পুরকপা ঙম্লরোই… অমদি মফমসিদদি অসুম্না লোইনা তৌনৈ… করিগুম্বা থেঙনা লাক্লবসু ভারতকী পুঙনি হায়না চাওথোকচবগা লোয়ননা হায়নৈ। শেঞ্জা থুমজাগী মতাঙদসু, মদুদি করিসু তৌবা ঙম্লরোই সাহব, মসিদি লৈঙাক্কীনি…অদুগা থৌদোক খরদি লৈবাক পুম্বদা ৱাখলগী পল নমখায়রগা মপান থোরক্নবা পুক্নিং থৌগৎপসু য়াওই। গান্ধী জীনা দান্দী খোঙচৎ চৎখিবা থুম খুজোক অমগীদমক্তনি, অদুবু লৈবাক পুম্বা হৌরকখি, ঐখোয় নীং তম্বা ফংবা ঙমগনি হায়বগী ৱাখল্লোন মীয়ামগী পুক্নিংদা পোকহনখি। হন্দক চন্দ্রয়ান মায় পাকখিবনা মীওই করোর ১৪০মক খুদক্তা সাইন্তিস্ত ওইহনখিদে, এস্ত্রোনোৎ ওইহনখিদে। অদুবু লৈবাক পুম্বদা মশানা মশাবু থাজবগী ফীভম অমা শেমখি হায়বা ঙসিসু ঐখোয়না খঙবা ঙম্মি। মদুদগি করি থোরকখি – ঐখোয় তৌবা ঙম্মি, ঐখোয় সেক্তর খুদিংদা মাঙদা চঙশিনবা ঙম্মি হায়বা ৱাখল্লোন লাকখি। ঙসি ভারত মচা পুম্বগী মফমদা অচেৎপা থৌনানা থল্লি। লু-নানবগী হীরমদা অদোমসু নীংশিংবিরমগনি। লাল কীলাদগী পি.এম.না লু-নানবগী ৱা ঙাংবাো তোইলেৎকী ৱা ঙাংবা ফম অদুগী ইকায়খুম্নবগী মায়োক্তনি হায়না মীওই খরনা হায়নখি। সেনিতরী পেদনচিংবা ৱাহৈশিং অসি মীয়াম্না, মরুওইনা নুপাশিংনা হায়নবা হঙ্গোইনবা ৱাহৈ ওইরম্মি। ঐনা লাল কীলাদগী ৱাফম অসি হৌদোকখি। অদুগা মদুদগী ৱাখল্লোন হোংদোকপা হৌনরকখি। ঙসি লু-নানবা হায়বসি মীয়ামগী ঈহৌ ওইরে। অদোমসু নীংশিংবিয়ু, খাদীবু কনানসু পাম্নরমদে। ঐখোয়গুম্বা নেতাশিংগী ৱাফমখক্তা ওইরম্মি, মীখল মতমদা কুর্তা অশাঙবা অমা শেৎলগা লাকপদুখক ওইনরম্মি। অদুবু হৌখিবা চহি ১০ অসিদা খাদী য়োনবগী চাং শরুক অহুম হেন্না হেনগৎলে।
মরূপশিং,
জনধন বেঙ্ক একাউন্তকী মায় পাকপা লৈবাক মীয়াম্না খঙই। অদুবু ঐখোয়না থৌরাং অসি পুরকপদা, অখঙ অহৈ খরনা একাউন্তশিং অসি হাংদোক্লিবা অসি মাঙ তাক্নবনি, লায়রবশিংনা মদুদা শেল অমত্তসু হাপ্পিরোই হায়নখি। লৈখিবা ৱাফমদি শেল খক্তগী ৱাফম নত্তে। ৱাখলগী পল নমখায়নবনি, ৱাখল্লোন হোংদোক্নবনি। মখোয়না লায়রবশিংগী ইকায়খুম্নবা, মখোয়গী মশাবু থাক ৱাংনা থাঙ্গৎচবগী মতৌবু কৈদৌঙৈদসু খঙবা ঙমদে, জনধন য়োজনানা লায়রবশিংবু মীৎকপ থোকহনখিবা মখোয়না খঙদে। মখোয়দা বেঙ্ক ফাওবা চৎনবগী মথৌনা ফাওবা লৈজরমদে, মখোয়দা কিবা ফাওরম্মি। মখোয়গী মফমদদি বেঙ্ক একাউন্ত অমা লৈবা হায়বসি ইনাকখুনবশিংগী ৱাফম ওইরম্মি। অদুগা বেঙ্কনা মখোয়গী য়ুমদা লাকপা মতমদা, মখোয়দা থাজবা অমা পোকহনখি, মশাবু থাক ৱাংনা থাঙ্গৎচবা ঙমহনখি, মখোয়গী পুক্নিং ৱাখলদা অনৌবা ময়োল চোংলকখি। ঙসি মখোয়না ইকায়খুম্নবগা লোয়ননা মখোয়গী ফুরিৎখাউদগী রুপে কার্দ লৌধোক্লি, রুপে কার্দ শীজিন্নরি। অদুগা ঐখোয়দি খঙই, ঙসিদগী চহি ৫-১০গী মমাঙদা অচৌবা হোতেলশিংদা অচৌ অশাং মীওইশিংনা চা থকপা তৌবা মতমদা মখোয়গী মরক্তা অথোই অহেন তান্নরম্মি, মখোয়না ৱাল্লেৎ লৌথোরকপা মতমদা মদুদা কার্দ ১৫-২০ য়াউবা উৎপা পাম্নরম্মি, কার্দ উত্থোকপা ফেসন অমা ওইনরম্মি, কার্দকী মশিংনা মখোয়গী স্তেতস উৎনরম্মি। মোদীনা মদুবু লায়রবশিংগী ফুরিৎখাউদ হাপখি। মদুনা পুক্নিংগী পল নমখায়হনখি।
মরূপশিং,
ঙসিদি লায়রবশিংগী পুক্নিংদা ইনাকখুনবশিংগী মফমদা লৈরম্বা অদু মখোয়গী মনাক্তসু লৈরে হায়বা ৱাখল ফাওরে। ৱাখল্লোন অসিনা থৌনা হাপ্তুনা মহৈ কয়া পুরকখি। AC কাদা মশিং অমদি নেরেতিবকী তাইবংদা লৈরম্বা মীওইশিং, লায়রবশিংগী খুন্নাই শেন্মিৎলোন্দা মপাঙ্গল হাপ্লকখিববু কৈদৌঙৈদসু খঙবা ঙম্লরোইদবনি। অদুবু ঐদি লায়রবা ইমুংদগী লাকখিবনি, লায়রবা হায়বদু করিনো হায়বা খঙলগা লাক্লবনি, মরম অসিনা ঐনা খঙই মদুদি লৈঙাক্কী অসিগুম্বা থৌরাংশিংনা পল পুম্নমক নমখায়বগী থবক তৌরি। ৱাখল্লোন্দা হোংলক্লিবা অসি লৈবাক্কী মনুংদখক্তা নত্তে, মপান্দসুনি। মমাঙদা তেরোরিস্ত লান্দা তৌরকপদা, ঐখোয়গী লৈঙাক্না মালেমগী মফমদা ঐখোয়গী মতেঙ পাংবিয়ু হায়জরম্মি, শেলগী তেংবাং হেনগৎহন্নবা কোয়চৎ চৎপা তারম্মি। তেরোরিস্তশিংবু থিংবিয়ু হায়জরম্মি। ঐখোয়গী লৈঙাক্তা তেরোরিস্ত লান্দা তারকপদা ঐখোয়না থৌদাং য়াদুনা মালেম পুম্বদা ইশাবু ঙাকথোকচনবা ৱাফম থমখি। ভারতনা পায়খৎলকখিবা থবক অসিনা মালেমগী ৱাখল্লোন হোংদোকখি। চহি ১০গী মমাঙদা মালেম্না ভারত অসি ক্লাইমেৎ এক্সনগী পান্দমদা খোঙলৌ পল্লৌবা অমা ওইনা উনরম্মি, নেগেতিব ওইনা লৌনরম্মি। অদুবু ঙসিদি ভারতনা মালেমগী ক্লাইমেৎ এক্সনগী পান্দমশিংবু লমজিংলি, ঐখোয়গী তার্গেৎ মতমগী মমাঙদা ফংদুনা উৎলি। ঙসি ৱাখল্লোন হোংদোকপগী মমি ঐখোয়না শান্ন-খোৎনবগী লমদসু উবা ফংলি। মীয়াম্না শান্নরোয়শিংদা শান্নববুদি শান্নরে করিয়রগী মতাঙদদি করি তৌগদৌরি, থবক করম্বা মতমদা তৌগদৌরি হায়না হংনরম্মি। লৈঙাক্নসু শান্নরোয়শিংবু তাইবঙ মপুগী থৌজালদা থাদোকপিরম্মি। মখোয়দা শেলগী তেঙবাং চাউনা পাংবসু তৌরমদে অদুগা শান্ন-খোৎনবগী মচাক মথুমদসু পুক্নিং চঙলমদে। ঐখোয়গী লৈঙাক্না হায়রিবা পল অসিদু লৌথোকখি। ঙসিদি তুর্নামেন্ত অমগী মতুংদা অমদা শরুক য়াদুনা মফমসিদা মেদলগী নোং চুররে।
মরূপশিং,
ভারত্তা হৈথোই শিংথোইবা মীওইশিংগী অৱাৎপা লৈতে, রিসোর্সকী অৱাৎপা লৈতে। ঐখোয়গী ইমাঙদা য়াম্না চাউবা অমদি তশেং তশেংবা পল অমা তাদুনা লৈরম্মি – মদুদি লায়রবগী পলনি। লায়রবা হায়বসি খোল্লাউ লাউবনা কোকহনগদবা নত্তে, পাম্বৈ পুথোক্তুনা কোকহনগদবনি, খুজিল থৌরাং অমদি লীচৎনা কোকহনগদবনি। মফমসিদা মমাঙগী লৈঙাকশিংগী মফমদা লৈরম্বা ৱাখল্লোন্না লায়রবশিংবু খুন্নাইদা অমদি শেন্মিৎলোনগী লমদা মাঙদা চঙশিনবা ঙমহল্লমদে। লায়রবশিংগী মফমদা লায়রববু থেংননবা অমদি মায় পাক্না থেংননবা মতিং চাউনা লৈ হায়বা ঐ খঙই। ঐখোয়না মদুবু ঙাক্লৌ পীবিবা তাই, মখোয়দা তঙায় ফদবা খুদোংচাবশিং ফংহনবিবা তাই, মখোয়দা মপাঙ্গল হাপ্পিবা তাই। মরম অসিনা ঐখোয়গী লৈঙাক্না হায়রিবা খুরৌশিং অসিবু লৌথোক্নবগীদমক, লায়রবশিংবু মপাঙ্গল হাপ্লগা, মখোয়গী থবকপু ঐখোয়না খ্বায়দগী মরুওইবা মীৎয়েঙ থমখি। ঐখোয়না মীয়ামগী পুন্সিদা অহোংবা পুরকপদা নত্তনা লায়রবগী কোমদগী কাখৎলক্নবগী মতেঙসু পাংলি। মসিগী মহৈ ঙসি লৈবাকসিনা ময়েক শেংনা উবা ফংলি। হৌজিক্তসু সোভনা জীনা হায়খিবগুম শুপ্নতগী চহি ৫দা মীওই করোর ১৩ লায়রবগী পনখৈ ৱাংমদগী থোরকখ্রে। মসিনা তাকপদি ঐখোয় তৌবা ঙমগনি, মীওই করোর ১৩না লায়রবগী পল নমখায়দুনা থোরক্লগা লৈবাক্কী নিও মিদ্দল ক্লাসতা য়াওরক্লে।
মরূপশিং,
ভারতকী চাওখৎপগী লম্বীদা য়াম্না চাউবা পল অমগসু লৈরি, মদুদি ইমুং মনুংগী অমদি শাগৈ নাতৈগী ওইবা ফম অসিনি। মরুওইবা ইমুং খরগা মরী লৈনবা নৎত্রগা মপাঙ্গল য়াম্না লৈবা মীওইশিংগা খঙনবা মীওইশিংখক্তনা লায়না মাঙদা চঙশিনবা ঙম্মি। লৈবাকসিগী মীচম মীয়ামদি কনানসু থৌশাবিদে। শান্ন-খোৎনবদা ওইরবসু, রাজনিতীদা ওইরবসু, নৎত্রগা অতৈ হীরমশিংদা ওইরবসু, লৈবাক্কী মীচম মীয়াম্না মখোয় অচৌবা ইমুং অমগা মরী লৈনদ্রবদি মখোয়দা মায় পাকপগী থাজবা য়াম্না নেম্লম্মি। অদুবু, অদোম্না হৌখিবা চহি খরসিদা উবিরম্লগনি মদুদি হায়রিবা হীরমশিং অসিদা লৈবাকসিগী মীচম মীয়ামসু হৌজিক্তি মপাঙ্গল হাপ্পা, পুক্নিং থৌগৎপগী ইথিল লাকপা হৌরে। হৌজিক্তি মখোয়দা মপাঙ্গল কনবা মীওই অমগী মনাক্তা কোইইন ইন্নরুনবগী, মখোয়গী মতেঙ লৌরুনবগী ৱাখল ৱাবা লৈনদ্রে। ঙরাংগী মীথানবিদ্রবা হীরোশিংনা ঙসি লৈবাকশিংগী হীরোশিং ওইররে!
মরূপশিং,
ভারত্তা চহি কয়া মতমগা চুনবা ইনফ্রাস্ত্রকচর ৱাৎপনা ঐখোয়গী চাওখৎ লম্বীদা অচৌবা অমদি তশেং তশেংবা পল অমগুম লৈরি। ঐখোয়না মসিগী পাম্বৈ পুথোক্লে, ভারত্তা মালেমগী খ্বায়দগী চাউবা ইনফ্রাস্ত্রকচর বিল্দিং দ্রাইব হৌরে। ঙসি লৈবাকসিদা তুংলমচৎকা চুনবা মচাক মথুম শেমগৎ শাগৎলি। ঐনা ময়ামগী মফমদা, ভারতকী খোজেল অমদি পাক চাউবগী মতঙদা ৱাখলনা লামশিনবা লায়গদবা খুদম খরা পীজগে। ইং ২০১৩-১৪তা নোংমদা কিলোমিতর ১২গী হায়ৱে শেম্লম্মি। মতমদু ঐনা মীয়ামগী থৌগল তৌবা হৌদ্রিঙৈগী মমাঙগী ৱাফম্নি। ২০২২-২৩দা ঐখোয়না চাউরাক্না নোংমদা কিলোমিতর ৩০গী চাংদা হায়ৱে শেম্লি। ২০১৪দা লৈবাকসিগী ময়োল্লম ৫ দা মেত্রোগী কন্নেক্তিবিতী লৈরম্মি। ২০২৩দা লৈবাসিগী ময়োল্লম ২০দা মেত্রো রেল কন্নেক্তিবিতী লৈরে। ২০১৪দা লৈবাকসিদা মথৌ তৌবা এয়রপোর্ত চাউরাক্না ৭০ রোম লৈরম্মি। ২০২৩দা মসিগী মশিং চাউরাক্না ১৫০ রোম শুরে, হায়বদি শরুক অনি হেনগৎলে। ২০১৪দা লৈবাকসিদা মেদিকেল কলেজ চাউরাক্না ৩৮০ রোম লৈরম্মি। ২০২৩দা মশিং মেদিকেল কলেজ ৭০০ হেন্না লৈরে। ২০১৪দা গ্রাম পঞ্চায়তশিংদা শুপ্নতগী কিলোমিতর ৩৫০ ফাওবখক্তদা ওপ্তিকেলফাইবর ফংলম্মি। ২০২৩দা ঐখোয়না চাউরাক্না কিলোমিতর লাখ ৬ লোম তিংদুনা গ্রাম পঞ্চায়তশিংবু শম্নহল্লে। ২০১৪দা খুঙ্গং চাদা ৫৫ খক পি.এম. গ্রাম সরক য়োজনানা য়ৌরমমি। ঐখোয়না কিলোমিতর লাখ ৪ হেনবগী লম্বী শেমদুনা মশিং অসি চাদা ৯৯ য়ৌহল্লে। ২০১৪ ফাওবদা, ভারত্তা চাউরাক্না কিলোমিতর লিশিং ২০ লোমগী রেল লম্বীশিং ইলেক্ত্রিফিকেসন তৌরম্মি। মুন্না তাবিয়ু। চহি ৭০দা শুপ্নতগী রেল লাইন কিলোমিতর লিশিং ২০খক্তদা ইলেক্ত্রিফিকেসন তৌরম্মি। অদুগা ঐখোয়গী লৈঙাক্না চহি ১০দা কিলোমিতর লিশিং ৪০গী ময়াগী রেল লম্বী ইলেক্ত্রিফিকেসন তৌরি। মসিনি ঙসিগী ভারতকী খোঙজেল, পাক চাউবা অমদি ভারতকী মায় পাকপগী মতৌ।
মরূপশিং,
হৌখিবা চহিশিংদা লৈবাকসিনা মীৎয়েঙদা লৈবা মাল্লমপা পল খরদগীসু লান্থোরক্লে। ৱাফম অমদি মফমসিদা খুজিল থৌরাং য়াৎলিবা মীওইশিং, ঐখোয়গী রাজনিতীগী অখঙ অহৈশিংগী ৱাখল্লোন্নি। মখোয়গী ৱাখলদা অফবা শেন্মিৎলোন, অফবা রাজনিতী হায়বসি ওইথোক্লোই হায়বা খল্লম্মি। লৈঙাক কয়ানসু অসুম্না লৌনরম্মি অমদি মদুনা মরম ওইরগা লৈবাক্কী রাজনিতি অমদি শেন্মিৎলোন অনিগী মতাঙদা খুদোংচাবদা থোক্তুনা লৈরম্মি। অদুবু ঐখোয়না অফবা শেন্মিৎলোন অমদি অফবা রাজনিতিবু পুনশিন্দুনা উৎলে। ঙসিদি অফবা শেন্মিৎলোনসু, অফবা রাজনিতিসু লৈরে হায়বা পুম্নমক্না য়ানরে। ঐখোয়গী হেন্না ফবা শেন্মিৎলোনগী খুজিল থৌরাংনা লৈবাকসিদা খুমাঙ চাওশিনবগী অনৌবা লম্বীশিং হাংদোরক্লি। মসিনা খুন্নাইগী কাঙলুপ খুদিংগী পুন্সিদা অহোংবা পুরক্লি অমদি হায়রিবা মীওইশিংসিনা ঐখোয়দা মশিং য়াম্না মায় পাকহন্নবগীদমক পাল্লিবা লৈঙাক্কীদমক ভোৎ পীরক্লি। GST ওইরবসু, বেঙ্কিং ক্রাইসিসকী পাম্বৈ ওইরবসু, কোবিদ লাংফমদগী নান্থোরক্নবগী শেমখিবা কাঙলোনবু ওইরবসু, ঐখোয়না মতম পুম্বদা হায়রিবা লৈবাকসিদা লোং তর্ম সোলুসন পীগদবা কাঙলোনশিং খনখি, অমদি মীয়ামদা লোং তর্মদা কান্নবা ফংহনখি।
মরূপশিং,
ৱুমেন্স রিজর্বেসন বিল অসি ৱাখলনা শাগৎপা পলগী খুদম অমনি। দেকেদ কয়া পন্দুনা লৈরুরবা মতুংদা বিল অসি কৈদৌঙৈদসু পাস তৌবা ঙম্লরোই হায়না লৌনরম্মি। অদুবু হৌজিক্তি পল অসি ঐখোয়না লান্থোক্লে। নারীশক্তি বন্দন অধিনিয়ম ঙসিদি অশেঙবা ওইরে।
মরূপশিং,
অদোমগা ৱারী শাবদা, হৌরকপদা ঐনা অতোপ্পা ৱাফম অমসু থমখি, কা হেঞ্জিন্না খনবা বলগী মতাঙদা পনখি। ঐখোয়গী লৈবাকসিদা লৈরিবা পল খরা, পরৈ চেনবা ৱাফম খরদি লৈঙাক্না মরম ওইরগা অমদি পন্দিতশিংনা মরম ওইরগা, খন্ন-নৈনবা মীওইশিংনা মরম ওইরগা ঐখোয়গী রাজনিতীগী কান্ননবগী লমদা অয়েৎ অপন থোকহল্লম্বা খরা লৈরম্মি, মখোয়বু কয়া য়াম্না চাউথোকহল্লমবগে হায়ববু, খুদম ওইনা জম্মু কাস্মিরদগী আর্তিকল ৩৭০ লৌথোক্নবগী ৱাফম লাকপা খুদিং ৱাফম কয়া মাঙদা চোংথোরকখি। নাকল অমদা সাইকোলোজিস্তশিংনা অসুম্না তৌরবদি অতিয়া অসি কেল্লক্লগদবগুম ফোঙদোক্লম্মি। অদুবু ৩৭০ মুত্থৎখিবনা মফম পুম্বসিদা নুংঙাই য়াইফবা, ইং তপ্পা অমদি চাওখৎপগী অনৌবা লম্বীশিং হাংদোক্লি। লাল চৌক্তা উরিবা শক্তম্না মতৌ করম্না জম্মু-কাস্মিরগী ফীভম ফগৎলক্লি হায়বা উৎলি। ঙসি মফমদুদা তেরোরিজম লৈত্রে, তুরিজম লেপ্পা লৈতনা হেনগৎলক্লে। জমমু-কাস্মির চাওখৎপগী অনৌবা পন্দোল লোমহন্নবগীদমক ঐখোয়না খোঙফম চেৎনা লেপ্লি।
মরূপশিং,
মফমসিদা তিনবিরিবা মী কয়া অমদি মীদিয়াগী লমদগীনি। ঐখোয়দা ব্রেকিং নিউজ য়ৌহনবা মীদিয়াগী মশিং য়াম্না য়াম্মি। মরক মরক্তা ব্রেকিং নিউজ পুরকপগী মচত্তি ফৈ, অদুবু মতৌ করম্না ব্রেকিং নিউজ ওইরক্লিবনো অমদি হৌজিক করি ওইরিবগে হায়বদুসু নৈনবিবা মথৌ তাই। ২০১৩ দগী ২০২৩ ফাওবগী মরক্তা দেকেদ অমখক্কী খেন্নবা লৈরবসু মতমসিদি হোংলক্লিবা মতৌসিদি মালেম অমদি অতিয়াগী থাক্তা খেন্নৈ। ২০১৩দা শেন্মিৎলোনগী মতাঙদা কভর তৌরম্বা মীওইশিংদি মতৌ করম্না রেতিং এজেন্সীশিংনা, ভারতকী GDP গী গ্রোথ ফোর্কাস্তপু মখাদা কুমথরকপগী ৱাফম ফোঙদোকপিরম্বা নীংশিংবিরমগনি। অদুবু ২০২৩দা মপুং ফানা তাইওন্নবা ওইরে। মালেমগী লূপশিং অমদি রেতিং এজেন্সীশিংনা হৌজিক্তা ঐখোয়গী গ্রোথ ফোর্কাস্ততা মথক্তা কারকপগী ৱাফম ফোঙদোক্লি। ২০১৩দা বেঙ্কিং সেক্তরগী ফীভম চাদবগী পাউ লাক্লম্মি। অদুবু হৌজিক ২০২৩ অসিদদি ঐখোয়গী বেঙ্কশিং মখোয়গী খ্বায়াদগী য়াম্বা শেন্দোংগী পর্ফোর্মেন্স উৎলি। ২০১৩দা লৈবাকসিদা অগস্তা ৱেস্তলেন্দ হেলিকোপ্তর ৱাথোক্কী পাউ শন্দোক্লম্মি। অদুবু ২০২৩দা পাউচে অমদি পাউ চেনেলশিংদা ভারতকী দিফেন্স এক্সপোর্তকী রেকোর্দ ৱাংনা লৈবগী পাউ য়াওরি। ২০১৩-১৪গা য়েংনবদা শরুক ২০ হেন্না ফীভম ফগৎলকপা উরি। রেকোর্দ ওইবা স্কামশিংদগী রেকোর্দ ওইবা এক্সপোর্ত ফাওবগী শাংলবা লম্বী অসি লাক্লিবনি।
মরূপশিং,
২০১৩দা শেলথুমগী ফীভম ফত্তবনা মরম ওইরগা মিদ্দল ক্লাসকী মঙলানশিং কায়নরে হায়বা হেদলাইন পীবা নেস্নেল অমদি ইন্তরনেস্নেল চেফোঙ কয়া অদোম্না উবা ফংবিরমগনি। অদুবু মরুপশিং, ২০২৩দা কনানা অহোংবা পুরকপগে? শান্ন-খোৎনবদা ওইরবসু, স্তার্তঅপ, স্পেস নৎত্রগা তেক্নোলোজীদা ওইরমসু লৈবাক্কী মিদল ক্লাসনা চাওখৎপগী খোঙচৎ খুদিংদা খ্বায়দগী মাঙজিল থানা লেপ্পা ঐখোয়না উরি। হৌখিবা চহি খরসিদা ভারতকী মিদল ক্লাসনা খোঙজেল য়াঙনা চেনখৎলক্লি। মখোয়গী শেন্থোক, মখোয়গী মশিং হেনগৎলক্লে। ২০১৩-১৪দা চাউরাক্না মীওই করোর ৪ রোম ইনকম তেক্স রিতর্ন ফাইল তৌরম্মি। ২০১২-২৪দা মশিং অসি শরুক অনিরোম হেনগত্তুনা মীওই করোর ৭ মখায় হেনবনা ইনকম তেক্স রিতর্ন ফাইল তৌরি। তেক্স ইনফোর্মেসনগা মরী লৈনবা স্তদীশিংনা ২০১৪দা মীন ইনকম লুপা লাখ মরি মখায়গী মখাদা লৈরম্বা অদু ২০২৩দা লুপা লাখ ১৩ য়ৌরে হায়না উৎলি। মসিনা তাক্লিবদি, ভারতকী মীয়াম লৱর ইনকম গ্রুপ্তগী হাইয়র ইনকম গ্রুপ্তা চঙশিল্লক্লি হায়বসিনি। হিন্দুস্তান তাইম্সনা হৌখিবা নুমিৎ খরনিসিদা ফোঙখিবা আর্তিকল অমদা ইনকম তেক্স দেতাগা মরী লৈনবা নুংঙাইরবা অচুম্বা ৱাফম কয়া ফোঙখিবা ঐ নীংশিংলি। য়াম্না পুক্নিং চিংশিনবা মশিং অমদি চহিদা লুপা লাখ ৫ মখায়দগী হৌরগা লুপা লাখ ২৫ ফাওবগী মনুংদা তলব ফংবশিংগী মতাঙদনি। ইং ২০১১-১২দা হায়রিবা সেলরী ব্রেকেৎ অসিদা শেল তানবা অপুনবা ইনকম পুনশিল্লগা য়েংবদা মশিং অসি চাউরাক্না লুপা করোর লাখ অহুম য়ৌফাত্তবনি। হায়বদি মতমদুদা ভারত্তা লুপা লাখ মঙা মখায়দগী লুপা লাখ কুনমঙা ফাওবগী মনুংদা তলব ফংবা মীওইশিংগী তলব পুনশিল্লগা শুপ্নতগী লুপা করোর লাখ অহুম য়ৌফাত্তনা লৈরম্মি। ২০২১ ফাওবদা মশিং অসি হেনগৎলক্তুনা লুপা করোর লাখ ১৪ মখশয় য়ৌরে। মসিনা তাকপদি শরুক ৫ রোম হেনগৎলে হায়বনি। মসিগী মরম অনি ময়েক শেংনা লৈ। লুপা লাখ মঙা মখায়দগী লুপা লাখ ২৫ ফাওবগী তলব ফংবা মীশিং য়াম্না হেনগৎলে অমদি ব্রেকেৎ অসিদা মীশিংগী তলব য়াম্না হেনগৎলে হায়বনি। অদুগা ঐনা ময়ামদা নীংশিংজনিংবা ৱাফম অমদি, হায়রিবা এনালাইসিস অসি তলব ওইনা লাকপা শেন্থোকখক্তদা য়ুম্ফম ওইবনি। করিগুম্বা মসিদা বিজিনেসকী শেন্থোক, য়ুমগী লনথুমদগী লাকপা শেনফম, অতৈ ইনভেস্তমেন্ততগী লাকপা শেন্থোক হায়রিবশিং অসি তিনশিল্লবদি মশিং অসি য়াম্না হেনগৎলক্কনি।
মরূপশিং,
ভারত্তা মশিং হেনগৎলক্লিবা মিদল ক্লাস অমদি হন্থরক্লিবা লায়রবা অনিসিনা য়াম্না চাউবা শেন্মিৎলোনগী সাইকল অমগী য়ুম্ফম ওইরি। লায়রবগী পনখৈগী ৱাংমদা থোরক্লিবা, নিও মিদল ক্লাসকী শরুক ওইরক্লিবা মীওইশিং অসিনা লৈবাকসিগী কঞ্জুম্পসন গ্রোথতা খোঙজেল হাপ্নবা অচৌবা ফোর্স অমা ওইরক্লি। হায়রিবা দিমান্দ অসিবু পীননবগী থৌদাং ঐখোয়গী মিদল ক্লাসকী মীওইশিংনা লৌরি। করিগুম্বা লায়রবা মীওই অমনা খোঙউপ লৈগে খল্লবদি মিদল ক্লাসকী দুকান্দগী লৈগনি, মসিগী ৱাহন্থোক্তি মসিনা মিদল ক্লাসকী শেন্থোক হেনগৎহল্লি, লায়রবশিংগী পুন্সিদা অহোংবা লাকই। অসিগুম্বা অচৌবা সাইকল অমগী মতমদা ঙসি ভারতনা চৎলি। হায়বদি লৈবাকসিদা হন্থরক্লিবা লায়রবা মশিংসিনা মিদল ক্লাসশিংদা কান্নবা পীরি। লায়রবা অমদি মিদল ক্লাসকী মীওইশিংগী হোৎনবা কনবা মতৌসিনা ঙসি লৈবাকসিদা চাওখৎপা পুরক্নবগী মতিক হাপ্লি। মখোয়গী মতিক্না ভারতনা শেন্মিৎলোনগী লমদা ১০ শুবা মফম কল্লম্বদগী ৫ শুবা খ্বায়দগী চাউবা শেন্মিৎলোন ওইরক্লি। অদুগা হায়রিবা থৌনা অসিনা হৌজিক ঐখোয়গী অহুমশুবা তর্মদা ভারতপু মালেমগী মকোক থোংবা শেন্মিৎলোন ৩গী মনুং চলহনগদৌরিবনি।
মরূপশিং,
অমঢৎ কাল অসিদা লৈবাকসিনা ২০৪৭ ফাওবদা চাওখৎপা ভারত ওইহন্নবা থবক পায়খৎলি। পল খুদিংমক নমখায়দুনা ঐখোয় ঐখোয়গী পান্দম ফংবদা মায় পাক্কনি হায়না ঐনা থাজৈ। ঙসি লায়রবদগী লায়রবা মীওইশিংদগী হৌরগা মালেমগী খ্বায়দগী ইনাক খুল্লবা ইন্ভেস্তরশিং ফাওবনা হৌজিক অসি ভারতকী মতম্নি – This is Bharat’s Time হায়না লৌনরক্লি। ভারত মচা খুদিংগী মশান মশাবু থাজবনা ঐখোয়গী খ্বায়দগী চাউবা পাঙ্গল ওইরি। মসিগী থৌনান ঐখোয়না পল খুদিংবু লানবা ঙমগনি। অদুগা ২০৪৭দা মফমসিদা তিনবিরিবা মীওইশিংগী মরক্তা কনা কনা লৈখিগদগে হায়বদি খঙদে অদুবু ২০৪৭দা হিন্দুস্তান তাইম্স লীদর্সিপ সম্মিত পাঙথোকপা মতমদা, মদুগী থীম Developed Nation, What Next ওইগনি হায়বসিমদি ঐ থাজবা অমগা লোয়ননা হায়বা ঙম্মি। অমুক্কা হন্না, সম্মিত অসিগীদমক ময়াম পুম্নমক্কী মফমদা য়াইফ-পাউজেল পীজরি। হন্না হন্না থাগৎচরি।
