খুরুমজরি,
মধ্য প্রদেশকী ইচঙ থৌনা মুখ্য মন্ত্রী দোক্তর মোহন য়াদব জী, হান্নগী লোক সভাগী চেয়রমেন অমদি মতম শাংনা ইন্দোরগী থৌগল তৌবিরম্লবা ঐখোয় পুম্নমক্কী ইচে সুমিত্রা তাই, পার্লিয়ামেন্তকী ঐগী মরূপশিং, অনৌবা বিধান সভাদা মীখল মায় পাক্লক্লবা এম.এল.এ.শিং, অতৈ অথোইবা মীথুংশিং অমদি ঐগী নুংশিজরবা শিন্মী ইচিল ইনাওশিং,
ঙসিগী থৌরম অসি ঐখোয়গী শিন্মী ইচিল ইনাওশিংগী মতম কুইনা নীংজরকপা, মখোয়না মতম শাংনা মঙজরকপা মঙলান অমদি ফিরেপশিংগী মহৈনি। অদুগা ঙসি অসি অতল জীগী মপোক নুমিৎসু তাবসিদা নুংঙাইবসু ফাওই অদুগা অমুক্কা হেন্না নুংঙাইরিবদি ভার্তিয় জনতা পার্তীকী অনৌবা লৈঙাক, অনৌবা মুখ্য মন্ত্রীগী মতমসিদা মধ্য প্রদেশতা ঐনা শরুক য়াজবা অহানবা থৌরম অসি লায়রবা, চাকথুং ফিথুংদ্রবা ঐগী নুংশিরবা শিন্মী ইচিল ইনাওশিংগীদমক্তা পাঙথোকপা থৌরম ওইবা অমদি অসিগুম্বা থৌরম অসিদা ঐনা শরুক য়াবা ফংজবসিনি।
দবল ইঞ্জিনগী লৈঙাক্কী অনৌবা কাঙবু অসিনা ঐখোয়গী শিন্মী ইমুং মনুংশিংগী য়াম্লবা থৌজাল ফংগনি হায়না ঐনা থাজৈ। লায়রবশিংগী থৌজাল অমদি মখোয়গী মীনুংসিদা মতিক কয়া য়াম্না য়াওবগে হায়বা ঐ নীংথিনা খঙই। মধ্য প্রদেশকী অনৌবা কাঙবুসিনা লাক্কদৌরিবা নুমিৎশিংদা অসিগুম্বা পন্দোল কয়া লোম্বা ঙমগনি হায়না ঐনা থাজৈ। হুকুমচন্দ মিলগী শিন্মীশিংগী পেকেজ লাউথোকপা মতমদা ইন্দোরদা হরাও তয়াম্বগী শক্তম অমা উবা ফংই হায়না ঐঙোন্দা পাউদমই। ফিরেপ অসিনা ঐখোয়গী শিন্মী ইচিল ইনাওশিংগী কুমহৈ অরাওগী মথুম মরাং হৌবসু হেনগৎহল্লে।
ঙসি অসি অতল বিহারী বাজপায়ী জীগী মপোক কুমওন নুমিৎ ওইবা, অফবা লৈঙাক্লোনগী নুমিৎ ওইবা মরম্না ঙসিগী থৌরম অসি য়াম্না মরু ওইবা নুমিৎনি। মধ্য প্রদেশকা অতল জীগা লৈনবা মরী পুম্নমক্না খঙনৈ। অফবা লৈঙাক্লোনগী নুমিৎ অসিদা পাঙথোক্লিবা থৌরম অসিগীদমক ঐনা ময়ামগী মফমদা নুংঙাইবা ফোঙদোকচরি, অদোমগীদমক য়াইফ-পাউজেল পীজরি।
ঐগী ইমুং মনুংগী মীওইশিং,
ঙসি অসি চাউরাক্না লুপা করোর চানিরোমগী ওইগদবা চেক খুৎশিন্নরি। নুমিৎ খরনিসিদা শেনফম অসি শিন্মী ইচিল ইনাওশিংগী মফমদা য়ৌরক্লগনি। অদোম্না মসিগীদমক শিংনবা কয়া থেংনদুনা লাক্লে হায়বা ঐ খঙই। অদুবু হৌজিক্তি অদোমগী মাঙদা সনা ফুদোংলবা তুংলমচৎ অমগী চীংখৈ হুল্লক্লি। ইন্দোরগী মীয়াম্না দিসেম্বর ২৫গী নুমিৎ অসিবু শিন্মীশিংগী অচুম্বা ৱায়েল ফংবা নুমিৎ হায়না নীংশিংনহৌরগনি। ঐনা অদোমগী খাঙবা কনবা অমদি হোৎনবা কনববু ইকোক নোঞ্জরি।
মরূপশিং,
ঐনা মতম পুম্বদা হায়বা ৱাফম অমা হায়রগদি ঐগী ইফমদা খ্বায়দগী চাউবা ফুরুপ মরিখক লৈ। ঐনা উরিবা ফুরুপ মরি অদুদি – লায়রবা, নহা, নুপী অমদি লৌমী ইচিল ইনাওশিংনি। মধ্য প্রদেশকী লৈঙাক্না লায়রবশিংগী পুন্সিদা অহোংবা পুরক্নবগীদমক মরুওইবা খোঙথাংশিং লৌখৎলি। লায়রবশিংগী থৌগল, শিন্মীশিংগী ইকায়খুম্নবা অমদি চাকথুং ফিথুংদ্রবশিংবু য়োকখৎপিবনা ঐখোয়গী মরুওইবা থৌরাংনি। লৈবাকসিগী শিন্মীশিং মপাঙ্গল কলহন্নবা অমদি চাওখৎপা ভারত অমা পুরকপদা মরুওইবা থৌদাং য়াহন্নবা ঐখোয়না হোৎনরি।
ইমুং মনুংগী মীওইশিং,
লু-নানবা অমদি অথুম অহাওগীদমক মমিং চৎপা ইন্দোরনা হীরক কয়াদা মাঙজিল থারি। ইন্দোর চাওখৎপদা মফমসিগী ফিরোলশিংগী মরুওইবা থৌদাং লৈখি। মফমসিদা চহি ১০০ শুরবা মহারাজা তুকোজীরাউ ক্লোথ মার্কেৎকী পুৱারীগী ওইবা শক্তম ময়াম পুম্নমক খঙবিরবা ঙাক্তনি। ময়োল্লমসিগী অহানবা কত্তন মিল হোলকর শাগৈনা লিংখৎখিবনি। মালৱাগী ফি ব্রিতেন অমদি য়ুরোপকী লৈবাক কয়া য়ৌনখি অমদি মফমদুদা ফিজোলশিং শানখিবনি। ইন্দোরগী কৈথেলনা ফিগী মমল লেপ্লম্বা মতম অমা লৈরম্মি। ইন্দোরদা পুথোকপা ফিগী দিমান্দ লৈবাক কয়াদা লৈরম্মি। মফমসি ফিগী মিলনা থবক পীবগী অচৌবা মফম অমা ওইরকখি। হায়রিবা মিলশিং অসিদা থবক শুরিবা শিন্মী কয়াদি অতোপ্পা স্তেতশিংদগী লাক্তুনা মফমসিদা খুন্দাখিবনি। মতমদু ইন্দোরগা মাঞ্চেস্তরগা চাংদম্নখিবা মতম্নি। অদুবু মতম হোংলকপা অমদি হান্নগী লৈঙাক্কী থৌরাংগী মাঙজবা মহৈ ইন্দোরনা ফংখি।
দবল ইঞ্জিনগী লৈঙাক্না, ইন্দোরগী অদুগুম্বা হান্নগী মিংচৎ অদু অমুক হন্না পুরক্নবা থৌরাং পায়খৎলি। ভোপাল-ইন্দোরগী মরক্তা ইনভেস্তমেন্ত কোরিদোর অমা শেমগৎলি। ইন্দোর-পীথমপুর ইকনমিক কোরিদোর অমদি মল্তি মোদেল লোজিস্তিক পার্ক, বিক্রম উদ্যোগপুরীগী মেদিকেল দিভাইস পার্ক, অনকপগী ধার দিস্ত্রিক্তকী ভৌসোলাদা শেমগৎলিবা পি.এম. মিত্র পার্ক অসিনচিংবা প্রোজেক্তশিং অসিদা লৈঙাকনা লুপা করোর লিশিং কয়াগী শেনফম থাদরি। মখোয়শিংসিদা মফমসিদা থবক লিশিং কয়া পীনবগী মতিং লৈগনি। চাওখৎ থৌরাংগী প্রোজেক্তশিং অসিনা মফমসিগী শেন্মিৎলোনবু খোঙজেল য়াঙনা মাঙদা পুখৎকনি।
মরূপশিং,
এম.পি. অসি মফমসিগী মহৌশাগী ফজবা অমদি পুৱারীগী শাগোন্নবা নাৎকী লনশিং অসিগীদমক চাউনা মমিং চৎলি। ইন্দোর য়াওনা এম.পি.গী ময়োল্লম কয়ানা চাওখৎপা অমদি মহৌশা অনিগী মরক্তা চপ চাবা খল অমা থম্বগী অথোয়বা খুদমশিং ওইরি। ইন্দোরদা এসিয়াগী খ্বায়দগী চাউবা গোবর্ধন প্লান্ত লিংখৎলি। ইলেক্ত্রোনিক ভারীশিং য়োখৎনবগীদমক মফমসিদা ই-চার্জিং ইনফ্রাস্ত্রকচর কয়া খোঙজেল য়াঙনা শেমগৎলি।
ঙসি ঐনা জলুদ সোলার ইনর্জী প্লান্ত ভর্চুএল ওইনা উরেপ উয়ুং তম্বগী তাঞ্জা ফংখি। প্লান্ত অসিনা থা খুদিংগী লুপা করোর ৪গী মৈগী বিল হন্থহনগনি। থা খুদিংগী লুপা করোর ৪ হন্থহনগদৌরিবনি। প্লান্ত অসিগীদমক গ্রীন বোন্দ থাদুনা মীয়াম্না মসিদা শেল থাদরি হায়বা তাবদা ঐ নুংঙাইবা ফাওই। গ্রীন বোন্দ থাবগী থৌরাং অসিনা মহৌশাগী ফীভম ঙাক শেনবদা লৈবাকসিগী মীয়ামশিংসু শরুক য়াহন্নবগী পাম্বৈ অমা ওইরগনি।
ঐগী ইমুং মনুংগী মীওইশিং,
মীখল মতমদা ঐখোয়না লৌখিবা ফিরেপ, ঐখোয়না পীখিবা থাজবা, পুম্নমকশিং অদু ফংহন্নবগীদমক স্তেত লৈঙাক্না খোঙজেল য়াঙনা থবক পায়খৎলি। বেনিফিসরী খুদিংদা লৈঙাক্কী থৌরাংশিংগী কান্নবা ফংহন্নবা পায়খৎলিবা বিক্সিত ভারত সংকল্প য়াত্রা অসিনা এম.পি.দসু কাচিন কোয়া শিনবা থুংনা চৎলি। মীখলনা মরম ওইরগা এম.পি.দা খোঙচৎ অসি খরা থেঙথনা হৌদোকখি। অদুবু উজ্জৈন্দগী লমথাখিবা নুমিৎ খরখক্কী মনুংদা মসিগা মরী লৈনবা থৌরম ৬০০ হেন্না পাঙথোকখ্রে।
মীওই লাখ কয়ানা খোঙচৎ অসিদগী হকথেংননা কান্নবা ফংলি। ঐনা এম.পি.গী মীয়ামগী মফমদা হায়জনিংবদি, মোদীগী গরেন্তীগী গারী অদোমগী মফমদা য়ৌরকপা মতমদা, অদোম্না মদুগী কান্নবা মপুং ফানা লৌবিয়ু, ময়াম পুম্নমক্না মফমদুদা চৎপিয়ু হায়বসিনি। কনাগুম্বা অমত্তবু লৈঙাক্কী থৌরাংশিংগী কান্নবা ফংবদগী চিত্থহন্দনবা ঐখোয়না হোৎনরি।
মোদীগী গরেন্তীদা থাজবা ফোঙদোক্তুনা মেজোরিতী পীরকখিবা মধ্য প্রদেশকী মীয়ামগী মফমদা ঐনা অমুক্কা হন্না তৌবিমল খঙবা উৎচরি। ময়াম পুম্নমক্কী মফমদা ঐনা হন্না হন্না য়াইফ-পাউজেল পীজরি। অদুগা ঐবু লায়রবশিংগা মরী লৈনবা থৌরমদা, শিন্মীশিংগী মরী লৈনবা থৌরমদা ঙসি স্তেত লৈঙাক্না শরুক য়াবা ফংহনবিরি, ঐগী পুন্সিদা অসিগুম্বা মীৎকুপশিং অসিনা মতম পুম্বদা থৌনা হাপ্তুনা লাক্লি। মসিগীদমক ঐনা ইন্দোরগী মীয়াম্না, মধ্য প্রদেশ লৈঙাকপু অমদি ঐখোয় পুম্নমকপু থৌজানবিনবা মশিং য়াম্না শরুক য়াবিরিবা ঐগী নুংশিজরবা শি্মী ইচিল ইনাওশিং অমদি মখোয়গী ঙকশমদা লৈ পরেংশিং হুকপা উরুবদা মতম কয়া ঙাইরক্লবা মতুংদা য়াইফবা পুংফম অদু লাক্লে হায়না পুক্নিংদা ফাওই। অদোমগী মায়থোঙদা তারিবা হরাও নুংঙাইবগী মমি, অদোমগী ঙকশমদা হুক্লিবা লৈ পরেংশিংগী মনম্না ঐখোয়দা খুন্নাইগীদমক করিগুম্বা অফবা খরদং ওইরবসু তৌরম্নবা থৌনা হাপ্লি। ঐনা ময়ামগী মফমদা য়াইফ-পাউজেল পীজরি।
থাগৎচরি !
