ঙসি অসি লোকমান্য তিলক্কী চামাগী অহুম শুবা লৈখিদবগী কুমওন্নি।
লৈবাক অসিগী অথৌবা কয়া পোক্লিবা মহারাস্ত্রগী লমদম অসিবু,
ঐহাক্না ইকাই খুম্নবা উৎচরি।
থৌরম অসিদা ইকাই খুম্নরবা শ্রী শরদ পাৱর, রাজ্যপাল শ্রী রামেশ বাইস, মহারাস্ত্রগী মুখ্য মন্ত্রী শ্রী একনাথ সিন্দে, উপ মুখ্য মন্ত্রী শ্রী দেবেন্দ্র ফদনাবিস, উপ মুখ্য মন্ত্রী শ্রী অজিৎ পাৱর, ত্রাস্ত প্রসিদেন্ত শ্রী দীপক তিলক, হান্নগী মুখ্য মন্ত্রী ঐগী মরুপ শ্রী সুশিল কুমার শিন্দেজী, তিলক ইমুং-মনুংগী ইকাই খুম্নরবা মীওই পুম্নমক অমসুং ইচিল-ইনাওশিংনা শরুক য়াবীরি!
ঙসিগী নুমিৎ অসি ঐঙোন্দা য়াম্না মরু ওই। মফম অসিদা লাকপা ফংজবদা ঐহাক্না নুংঙাইবা পোকই। ঙসি অসি ঐখোয় পুম্নমক্কী ফীদম্নফম ওইরিবা অমসুং ভারতনা চাউথোকচরিবা, বাল গঙ্গাধর তিলক্কী লৈখিদবগী কুমওন তারি। মসিগা লোয়ননা ঙসি অসি অন্নাভৌ সথেজীগী মপোক কুমওনসু তারি। লোকমান্য তিলকজী অসি ঐখোয়গী নীংতম্বা ফংখিবগী পুৱারীদা ঙান্থোইরিবা মীশক অমনি। মসিগা লোয়ননা অন্নভৌনা খুন্নাইদা অওনবা পুরক্নবা শরুক তমখিবা অদু লম্বা লৈতে, অখন্নৈ। ঐহাক্না অথোইবা মীশক অনি অসিগী খুয়া খাদা ইকোক নোন্না ইকাই খুম্নবা উৎচরি।
ঙসি নত্ত্রগা মরু ওইবা নুমিৎ অসিদা ঐহাক্না পুন্যচয়া নত্ত্রগা শেংলবা লমদম, মহারাস্ত্রদা লাকপগী খুদোংচাবা ফংজরি, মসি ঐগী লাইবক ফবনি। শেংলবা লমদম অসি ছত্রপতি শিবাজী মহারাজকী লমদমনি। মসি চাপেকর ইচিল-ইনাওশিংগী শেংলবা লমদমনি। জ্যোতিবা ফুলে, সবিত্রি বাই ফুলেগী ইথিলশিং অমসুং ৱাখল্লোনশিংগা লমদম অসিগা মরী লৈনৈ। মীকুপ খরগী মমাংদা ঐহাক্না দাগদু সেথ মন্দিরদা গঙ্গাপতিজীগী থৌজালশিং নীজখি। মসি পুনে জিলাগী পুৱারীগী য়াম্না পুক্নিং চীংশিন্নীংঙাই ওইবা হীরম অমনি। দাগদু সেথ অসি তিলকজীনা হায়রকপদগী গনেশগী মীতম মীয়াম মাংদা খিনবদা শরুক য়াখিবা অহানবা মীশকনি। লমদম অসিবু ইকাই খুম্নবগা লোয়ননা ঐহাক্না মশক নাইবা মীওই পুম্নমক্তা ইকাই খুম্নবা উৎচরি।
মরুপশিং,
পুনেদা ঙসি নখোয়দগী ফংলিবা ইকাই খুম্নবা অসি ঐগী পুন্সিগী কাউঙমদ্রবা থৌদোক অমা ওইরি। তিলকজীগা হকথেংননা মরী লৈনবা মফম অমসুং ওর্গনাইজেসনদগী লোকমান্যআ তিলক নেস্নেল এৱার্দ ফংবা অসি ঐহাক্কী ওইনা য়াম্না লাইবক ফবনি। ঐহাক্না হিন্দ স্বারাজ্য সংঘ অমসুং পুম্নমকপু ইকাই খুম্নবা অসি পীবীবগীদমক ঐহাক্না থমোয় শেংনা তৌবীমল খঙবা উৎচরি। অমসুং ঐহাক্না হায়জনীংই মদুদি করিগুম্বা ঐখোয়না মীৎয়েং অসি খজিক্তং থৈদোক্তুনা য়েংলবদি কাশী অমসুং পুনে অনিমক ঐখোয়গী লৈবাক অসিদা অখন্নবা মশক অমা লৈজৈ। মফম অসিদা স্কোলরশিপ অসি লোইবা নাইদে, অমর ওইবা ঙমখ্রে। অমসুং পুনে সিতী স্কোলরশিপকী অনিশুবা মশক ওইবা লমদম অসিদা ইকাই খুম্নবা উৎপীবা অসিদগী হেন্না অথোইবা পুন্সিগী থৌদোক অমা লৈত্রে, মসিনা চাউথোকচবা অমসুং অপেনবা পোকহল্লি। অদুবু মরুপশিং ঐখোয়না এৱার্দ অমা ফংবা মতমদা মসিগা লোয়ননা ঐখোয়গী থৌদাংসু হেনগৎলকই। ঙসি এৱার্দ অসিগা লোয়ননা তিলকজী মমিং য়াওরিবা অসিনা থৌদাং লৌবগী ৱাখল্লোন শরুক কয়া হেনগৎহল্লি। ঐহাক্না লোকমান্য তিলক নেস্নেল এৱার্দ অসি ইরৈবাকচা করোর 140দা কত্থোকচরি। ঐহাক্না ইরৈবাকচাশিংদা থাজবা পীজরি মদুদি ঐহাক্না মখোয়গী শেবা তৌনবা অমসুং মখোয়গী অনীংবা অপাম্বশিং থুংহনবা অঙম্বা থাক্তা হোৎনগনি। এৱার্দ অসিগা লোয়ননা ঐঙোন্দা পীরকপা শেল অসি মমিংদা গঙ্গাধর য়াওবা, গঙ্গাজীদা কত্থোকচরি। ঐহাক্না মনা অসিগী শেনফম অসি নমামি গঙ্গে প্রোজেক্ততা কত্থোক্নবা ৱারেপ লৌজরি।
মরুপশিং,
ভারতকী নীংতম্বা ফংনবা হোৎনবদা লোকমান্য তিলকনা লৌখিবা থৌদাং, মহাক্না শরুক তমখিবা অসি থৌদোক অমসুং ৱাহৈ খরনা ফোঙদোকপা ঙমলোই। তিলকজীগী মতমদা অমসুং মসিগী মতুংদা নীংতম ইহৌগা মরী লৈনবা থৌদোক অমসুং খোঙজং অমা হেক্তদা, মতম অদুদা শরুক য়াখিবা লময়ানবা অমসুং লুচিংবশিং অমা হেক্তদা তিলকজীগী মমি মীপুম খুদিং, মফম খুদিংদা তাই। মরম অসিনা ব্রিতিশ মশামক্না তিলকজীবু ‘দি ফাদর ওফ দি ইন্দিয়ন অনরেস্ত’ হায়না কৌখি। তিলকজীনা ভারতকী নীংতম ইহৌগী মাইকৈ হোংহনখি। ব্রিতিশনা লৈবাক অসি চল্লাইবগী মতিক ময়াই ভারত মচাশিংদা লৈতে হায়না ফোঙদোকখিবা মতমদা লোকমান্য তিলকনা হায়খি – ‘স্বারাজ্য অসি ঐখোয়গী হকনি’। ভারতকী ধর্ম, নাৎ, থাজবশিং অসি চাউখৎতবগী খুদমশিংনি হায়না ব্রিতিশনা লৌখি। অদুবু তিলকজীনা মসি অরানবনি উৎখি। মরম অসিনা ভারতকী মীয়াম্না মাংদা থোরকপা খক্তা নত্তনা লোকমান্যতা তিলকজীদা লোকমান্যগী মীথোন পীখি। দীপকজীনা হায়বীখ্রে মহাত্মা গান্ধী মশামক্না লোকমান্যবু ‘ক্রিএতর ওফ মোদর্ন ইন্দিয়া’ হায়না কৌখি। তিলকজীগী ৱাখল্লোন অসি কয়া য়াম্না পাকচাউবগে, মহাক্না কয়া য়াম্না মীৎয়েং শান্না উবা ঙম্বগে য়েংবীয়ু।
মরুপশিং,
অথৌবা লুচিংবা অমা হায়বা অসি মশাবু অচৌবা পান্দম অমগীদমক কত্থোকপা খক্তা নত্তনা পান্দম অদু ফংনবা ইন্সতিত্যুসন অমসুং সিস্তেমশিং শেম্বা অদুবুনি। মসিগীদমক ঐখোয়না মীপুম খুদিংমক্কা লোয়ননা মাংদা চংশিনবা তাই, ঐখোয়না মীপুম খুদিংমক্কী থাজবা অসি মাংদা পুদুনা চৎপা তাই। ঐখোয়না গুন পুম্নমক অসি লোকমান্য তিলক্কী পুন্সিদা উবা ফংখি। ব্রিতিশনা মহাকপু জেলদা থম্বদা মহাকপু ওৎপী-নৈবীখি। মহাক্না নীংতম্বগীদমক কত্থোকখি। মসিগা ইরোইননা মহাক্না অপুনবগী শক্তি, শরুক য়াবা অমসুং তেংবাং পীনবগী অচৌবা খুদমশিং থম্লমখি। মহাক্কী থাজবা, লালা লাজপৎ রাই অমসুং বিপিন চন্দ্র পালগা মান্নবা মহাক্কী মতৌ অসি ভারতকী নীংতম ইহৌগী মরু ওইবা পান্দুপ ওইখি। ঙসিসু মসিগী মরমদা নৈনবদা মখোয় অহুমগী মমিং অসি ত্রিনিতী অমা ওইনা , লাল-বাল-পাল হায়না নীংশিংনরি। তিলকজীনা মতম অদুদ নীংতম্বগী খোলাও খনখৎহনবদা জর্নেলিজম অমসুং পাউচেগী মরু ওইবা অদু খঙখি। ইংলিশ লোলদা তিলকজীনা চয়োলগী ওইবা ‘দি মরাথা’ ফোঙবা হৌখি হায়না শরদ রাওনা ফোঙদোকখ্রে। পুন্না গোপাল গনেশ অগর্কার অমসুং বিষ্ণুশাস্ত্রি চিপলুঙ্করজীনা মরাথিদা ‘কেসরি’ পাউচে হৌদোকখি। চহি 140 হেন্না কেসরি অনৱারত অসি মহারাস্ত্রদা ফোঙখি, মসিবু মীওই কয়ানা পাখি। মসি তিলকজীনা শক্তি লৈনা থোনখিবা য়ুম্ফম অমদা শেমখিবা ইন্সতিত্যুসন অমনি তাক্লি।
মরুপশিং,
লোকমান্য তিলকনা চৎনবী লোয়ননা ইন্সতিত্যুসনশিংবু য়োকখৎখি। মহাক্না খুন্নাইবু পুনশিন্নবা সর্বজনিক গনপতি মহোৎসবকী য়ুম্ফম থোনখি। মহাক্না ছত্রপতি শিবাজী মহারাজকী থৌনা অমসুং ৱাখল্লোনগী শক্তিনা খুন্নাইবু থলহন্নবা শিব জয়েন্তি পাঙথোকপা হৌখি। থৌরমশিং অসিনা ভারতপু নাৎকী ওইবা মরীনা অমত্তা ওইনা পুনশিন্নবা কেম্পেন অমসু চত্থখি, অমসুং পর্ন স্বারাজকী মপুং ফাবা ৱাখল্লোন অমসু য়াওহনখি। মসি ভারতকী সোসিএল সিস্তেমগী অখন্নবা মগুন ওইখি। ভারতনা মতম চুপ্পদা অসিগুম্বা লুচিংবশিং, নীংতম্বা ফংনবা হোৎনবা অসিগুম্বা অচৌবা পান্দমশিংগীদমক মায়োক্নরিবা মীওইশিং পোকপীখি, অমসুং খুন্নাইদা চত্থবা ফত্তবশিংগী মায়োক্তা অনৌবা মায়োল অমা উৎখি। ঙসিগী নহা ওইরিবা মীরোলগীদমক মসি অচৌবা পরা অমনি।
ইচিল-ইনাওশিং,
লোকমান্য তিলকনা নীংতম ইহৌ নত্ত্রগা জাতি শেমগৎপগী মিসন ওইরবসু তুংলমচৎকী থৌদাং অসি নহারোলশিংদা লৈ হায়বা খঙখি। মহাক্না ভারতকী তুংলমচৎকীদমক মহৈ হৈবা অমসুং তৌবা ঙম্বা নহারোল শেম্বা পামখি। ঐখোয়না বীর সর্বারকরগা মরী লৈনবা থৌদোক অমদা নহারোলগী তেলেন্ত মশক খঙদোক্নবা লোকমান্যদা অথৌবা বিজন অমা লৈখিবগী খুদম থেংনৈ। মতম অদুদা সর্বারকর অসি অঙাং ওইরি। তিলকজীনা মহাক্কী মতিক-ময়াই খঙখি। মহাক্না সর্বারকরবু মীরমদা চৎতুনা মহৈ তম্বা পামখি অমসুং মতুংদা হল্লক্তুনা নীংতম্বগীদমক থবক তৌবা পামখি। ব্রিতেন্দা শ্যামজী কৃষ্ণ ভর্মনা অসিগুম্বা নহাদা খুদোংচাবশিং পীনবা স্কোলরশিপ অনি পীরমখি – স্কোলরশিপ অমনা ছত্রপতি শিবাজী স্কোলরশিপ অমসুং অতোপ্পা অমনা – মহারনা প্রতাপ স্কোলরশিপ! তিলকজীনা শ্যামজী কৃষ্ণ ভর্মদা বীর সর্বারকর রিকম্মেন্দ তৌখি। মসিগী খুদোংচাবা লৌদুনা মহাক্না লন্দনদা বেরিস্তর ওইখি। তিলকজীনা অসিগুম্বা নহা কয়া শেমখি। ন্যু ইংলিশ স্কুল, দেক্কান এজুকেসন সোসাইতী অমসুং ফর্গুসন কোলেজগুম্বা ইন্সতিত্যুসনশিং পুনেদা লিংখৎখিবা অসি মহাক্কী বিজনগী শরুক্নি। অসিগুম্বা নহা কয়ানা ইন্সতিত্যুসনশিং অসিদগী হৌদুনা তিলকজীগী মিসন মাংদা পুখি, জাতি শেমখৎপদা থৌদাং লৌখি। সিস্তেম শেমগৎপদগী ইন্সতিত্যুসন শেমগৎপা ফাওবা, ইন্সতিত্যুসন শেমগৎপদগী মীওই শেমগৎপা ফাওবা, মীওই শেমগৎপদগী জাতি শেমগৎপা ফাওবা মসিগী বিজন অসি জাতিগী তুংলমচৎকী রোদমেপ অমগুম্বনি। লৈবাকনা ঙসি রোদমেপ অসি মপুং ফানা তুংইল্লি।
মরুপশিং,
তিলকজী অসি ভারত পুম্বগী মমিং লৈরবা লুচিংবা অমা ওইরবসু মহাক্না পুনে অমসুং মহারাস্ত্রগী মীয়ামগীদমক অখন্নবা মফম অমা পীখি। গুজরাতকী মীয়ামসু মহাক্কা মসিগা মান্নবা মরী লৈনখি। ঙসি অখন্নবা থৌরম অসিদা ঐহাক্না ৱাফমশিং অদু নীংশিংলি। নীংতম ইহৌ মনুংদা মহাক্না থা অমা মখাই অহমদাবাদকী সবরমতি জেলদা লৈখি। মসিগী মতুংদা তিলকজীনা 1916তা অহমদাবাদতা লাকখি অমসুং মতম অদুদা ব্রিতিশনা চাউনা নমথদুনা থমখিবা অদুদা মীওই লিশিং 40 হেনবনা তিলকজীবু ওক্নবা অমসুং মহাক্না ঙাংবা তানবা অহমদাবাদতা লাকখি তাবদা নখোয়না নুংঙাইবা পোক্কনি। অমসুং নুংঙাইবা ৱাফম অমনা মদুদা সরদার বল্লভভাই পতেলসু মহাক্না ঙাংবা অদু তানবা ভাবোকশিংগী মরক্তা য়াওখি। সরদার সাহিবকী ৱাখলদা মহাক্কী ৱারোল অদুনা অখন্নবা মমি অমা তাহনখি।
মতুংদা সরদার পতেলনা অহমদাবাদ ম্যুনিসিপালিতীগী প্রসিদেন্ত ওইরকখি। অমসুং মতম অদুদা অহমদাবাদতা তিলকজীগী মীতম অমা খিন্নবা মখোয়না ৱারেপ লৌখি। অমসুং মহাক্না মীতম অদু খিনবা খক্তা নত্তনা সরদার সাহেবকী ইরম মেনগী মশক অদু মহাক্কী ৱারেপ অসিদা মমি তাখি। সরদার সাহেবা বিক্তোরিয়া গার্দেন অসি খনখি! ব্রিতিশনা 1897দা অহমদাবাদতা মহারানি বিক্তোরিয়াগী দাইমন্দ জুবিলী পালন তৌনবা বিক্তোরিয়া গার্দেন শাখি। হায়বদি সরদার পতেলনা অথোইবা লময়ানবা লোকমান্য তিলকগুম্বা মীশক অমগী মীতম ব্রিতিশ মহারানিগী মমিং লৌদুনা থোনবা পার্ক অমদা খিন্নবা ৱারেপ লৌখি। অমসুং মতম অদুদা সরদার সাহেবতা মসিগী মায়োক্তা প্রিসর কয়া লাক্লবসু মহাকপু খাম্বা ঙমখিদে। অদুবু সরদারদি সরদার ওইনা লৈখি, সরদারনা হায়খি মদুদি মহাক্কী ফম থাদোক্লবসু মফম অসিদা মীতম অসি খিনগনি। অমসুং মীতম অসি শাদুনা মহাত্মা গান্ধীনা 1929দা মাইখুম হাংদোকখি। অহমদাবাদতা লৈরিঙৈদা ঐহাক্না শেংলবা মফম অদু কয়ারক চৎপগী খুদোংচাবা ফংখি অমসুং তিলকজীগী মীতমদা ইকাই খুম্নবা উৎখি। মসি ফজরবা মীতম অমনি, মসিদা তিলকজীনা পোথাদুনা ফমদুনা লৈ। মহাক্না নীংতম্বা ভারত অমগী তুংলমচৎ অমদা য়েংবগুম্না তৌই। মীখা পোল্লিঙৈ মতমদা ফাওবা সরদার সাহেবনা লৈবাক্কী মপারীগীদমক ব্রিতিশ লৈঙাকপু শীংনখি। অমসুং ঙসিগী ফীভম অসি য়েংবীয়ু। ঙসি ঐখোয়না লম্বী অমগী মমিং অসি মীরমগী লোইলম শন্দোকপা মীওই অমদগী ভারত মচা বিভুতি অমদা ওন্থোকপা মতমদা মীওই খরনা লাও খোঙলি, মখোয়না তম্বা য়াদ্রি।
মরুপশিং,
লোকমান্য তিলক্কী পুন্সিদগী ঐখোয়না তমশিনবা য়াবা কয়া অমা লৈ। লোকমান্য তিলক অসি গীতাদা থাজবা থমখিবা মীশক অমনি। মহাক্না গীতাগী কর্ম য়োগ ঙাক্না চৎখি। মহাকপু থীংনবা ব্রিতিশনা মহাকপু ভারত্তগী লাপ্না মন্দলেদা জেলদা থমখি। অদুবু মফম অদুদসু তিলকনা গীতাবু মখা তানা নৈনখি। ‘গীতা রহস্যা’গী খুত্থাংদা মহাক্না শীংনবা খুদিংমক মায়োক য়ানবা লৈবাক অসিদা কর্ময়োগ লাইনা খঙহনখি, মখোয়দা কর্মগী শক্তি খঙহনখি।
মরুপশিং,
ঙসি ঐহাক্না লৈবাক অসিগী হৌরক্লিবা মীরোলবু বাল গঙ্গাধর তিলকজীগী গুনগী অতোপ্পা হীরম অমগী মতাংদা মীৎয়েং চীংশিনবা পাম্মি। তিলকজী অসি মীয়ামদা মশাবু থাজবা পোক্নবগী ৱাখল্লোন চেলহনবা ঙম্বা অথোইবা গুন অমা চেল্লি, অমসুং মখোয়দা মহাক্না থৌনানা থলহনখি। মমাংগী চহিচাদা ভারতকী মীয়ামদা মীখা পোনবগী য়োৎলিং অসি থদৎপা ঙমলোই হায়না খন্নখিবা মতমদা তিলকজীনা মীয়ামদা নীংতম্বা ফংগনি হায়বগী থাজবা পোকহনখি। ঐখোয়গী পুৱারীদা মহাক্না থাজবা থমখি। মহাক্না ঐখোয়গী নাৎতা থাজবা থমখি। মহাক্না মহাক্কী মীয়ামদা থাজবা থমখি। মহাক্না ঐখোয়গী শিন্মীশিং, ওন্তপ্রিনোরশিংদা থাজবা থমখি, মহাক্না ভারতকী মতিক-ময়াইদা থাজবা থমখি। ভারত্তা লাকপা মতমদা মীয়াম্না মফম অসি অসুম্না তৌরি, করিগুম্বা অমত্তা ওইথোক্লরোই হায়খি। অদুবু তিলকজীনা মসিগী হন্থনা য়েংবগী ৱাখল্লোন অসি মাংহনখি, লৈবাক অসিবু মাগী মতিক-ময়াইদা থাজবা পোকহনখি।
মরুপশিং,
থাজদবা লৈবা ফীভম অমদা লৈবাক্কী চাউখৎ-থৌরাং ওইথোক্লোই। ঙরাং পুনেদগী নুপা, শ্রী মনোজ পোচৎনা ঐঙোন্দা ত্বিত তৌরকপা উই। চহি 10গী মমাংদা পুনেদা ঐহাক্না চৎখিবা অদু ঐঙোন্দা মহাক্না নীংশিংহনখি। মতম অদুদা তিলকজীনা লিংখৎলমখিবা ফর্গুসন কোলেজতা ঐহাক্না মতম অদুদা ভারত্তা লৈরিবা ত্রস্ত দেফিসিৎকী মতমদা ৱা ঙাংখি। হৌজিক মনোজজীনা ঐংওন্দা ত্রস্ত দেফিসিৎতগী ত্রস্ত সর্প্লস ফাওবা লাকপগী লৈবাক্কী খোঙচৎকী মতাংদা ৱা ঙাংনবা হায়রকখি! মরুওইবা হীরম অসি পুখৎপীরকপগীদমক মনোজজীবু ঐহাক্না তৌবীমল খঙবা উৎচরি।
ইচিল-ইনাওশিং,
ঙসি ভারত্তা পোলিসীদসু ত্রস্ত সর্প্লস ময়েক শেংনা উবা ফংলে অমসুং মসি ইরৈবাকচাশিংনা কন্না হোৎনবা অসিদসু মমি তারি। হৌখিবা চহি 9দা ভারতকী মীয়াম্না অচৌবা অহোংবশিংগী য়ুম্ফম থোনখি, মখোয়না অচৌবা অহোংবশিং উৎখি। পুম্নমক অসিগী মতুংদা ভারতনা মালেমগী 5শুবা খ্বাইদগী চাউবা ইকনোমী করম্না ওইরকখি? ভারতকী মীয়াম্না মসি ওইথোকপা ঙম্মি হায়না উৎখি। ঙসি লৈবাক অসিনা লম খুদিংমক্তা মশাগী মীপাল তাংলি, মাগী প্রজাগী মীপাল তাংলি। কোরোনাগী মতমদা ভারতনা মাগী বিজ্ঞানিকশিংদা থাজবা থমখি অমসুং মখোয়না মেদ ইন ইন্দিয়া ভেক্সিন পুথোকখি অমসুং মসি ঙম্মি উৎখি। অমসুং পুনেনা মসিদা অচৌবা থৌদাং অমা লৌখি। ঐখোয়না মীপাল তাংদবা ভারতকী মরমদা ঙাংনরি মরমদি ঐখোয়না ভারতনা মসি তৌবা ঙম্বগীনি।
লৈবাক্কী মীচম প্রজাশিংদা ঐখোয়না গরেন্তী য়াওদনা মুদ্রা লোন পীরি মরমদি ঐখোয়না মখোয়গী পুকচেল শেংবা অমসুং থৌদাং লৈবা মতৌ অদুদা থাজবা থম্মি। মমাংদা মীচম প্রজানা অপীপা থবকশিংগীদমক্তসু ৱাখল ৱান্নরম্মি। ঙসি অয়াম্বা থবক অসি মোবাইলদা ক্লিক অমদা তৌবা য়াহল্লি। ঙসি সরকারনা চে-চাংশিং এতেস্ত তৌনবা নখোয় নশাগী খুৎয়েক্কী মীপাল তাংলি। মসিনা মরম ওইদুনা লৈবাক অসিদা অহোংবা ফীভম অমা পুরকপা ঙম্লে, অফবা ফীভম অমা শেম্লি। অমসুং ঐখোয়না লৈবাক অসিগী মীয়াম্না মপুং ফানা থাজবগা লোয়ননা লৈবাক চাউখৎহন্নবগী মখোয়না হোৎনবা উবা ফংলি। মসিগী মীয়ামগী থাজবা অসিনা স্বচ্ছ ভারত অভিয়ানবু মীয়ামগী ইহৌদা ওন্থোকপা ঙমহনখি। মীয়ামগী থাজবা অসিনা বাতি বচাও-বেতি পরাও কেম্পেনবু মীয়ামগী ইহৌদা ওন্থোকখি। লাল কিলাদগী ঐহাক্না গ্যাস সবসিদী থাদোকপা য়াবশিং অদুনা থাদোক্কদবনি হায়খিবা অদুদগী মীওই লাখ কয়ানা গ্যাস সবসিদী থাদোকখি। মতম খরগী মমাংদা লৈবাক কয়াদা সর্ভে অমা চত্থখি। সর্ভে অসিনা উৎখি মদুদি মাগী প্রজাশিংনা মখোয়গী সরকারদা খ্বাইদগী থাজবা থম্বা লৈবাক্কী মমিং অদু ভারতনি। মসিগী হোংলক্লিবা মীয়ামগী ৱাখল্লোন, মীয়াম্না থাজবা হেনগৎলক্লিবা অসিনা ভারতকী মীয়ামগী চাউখৎনবগী মেদিয়ম ওইরক্লি।
মরুপশিং,
ঙসি নীংতম্বা ফংবগী চহি 75গী মতুংদা লৈবাক অসিনা মাগী অমৃত কাল অসি থৌদাং অমা ওইনা উন্নরি। ইরৈবাকচাশিংনা ঐখোয়গী ইশাগী থাক্তা লৈবাক্কী মঙলানশিং অমসুং ফিরেপশিং খঙনবা থবক তৌরি। মরম অসিনা ঙসি মালেমনা ভারতপু তুংলমচৎ ওইনা উরি। ঙসিগী ঐখোয়গী খোঙথাংশিং অসিনা অপুনবা মীওইবা খুন্নাইগী থাজবা ওইরক্লি। লোকমান্যগী থৱায়না ঙসি মফম অমা হেক্তদা লৈরবসু মহাক্না ঐখোয়বু য়েংলি, ঐখোয়দা থৌজালশিং পীনবীরি। মহাক্কী থৌজালশিংগা লোয়ননা, মহাক্কী ৱাখল্লোনশিংগী শক্তিগা লোয়ননা ঐখোয়না শক্তি লৈবা অমসুং চাউখৎপা ভারত অমগী মঙলান অসি শোইদনা মঙফাওনবা ঙম্লগনি। ঐহাক্না থাজৈ হিন্দ স্বারাজ্য সংহ অসিনা মাংদা মখা তানা থোরক্তুনা তিলক্কী ৱাখল্লোনশিংগা লোয়ননা মীয়ামবু কন্নেক্ত তৌবদা মরু ওইবা থৌদাং অমা লৌগি। ঐহাক্না ইকাই খুম্নবা অসি পীবীবগীদমক ময়ামদা তৌবীমল খঙবা উৎচরি। লমদম অসিবু ইকাই খুম্নবা উৎচরি, ৱাখল্লোনা অসি মাংদা পুখৎলিবা মীপুম খুদিংমক্তা ইকাই খুম্নবা উৎচরি। মসিদা ঐহাক্কী ৱারোল পীবা লোইশিনজরি। হন্না-হন্না থাগৎচরি!
