ভারত ইমানা য়াইফরে,
ভারত ইমানা য়াইফরে!
তেলঙ্গানাগী রাজ্যপাল, তমিলসাই সৌন্দরাজঞ্জিঈ, কেন্দ্রগী মন্ত্রী মন্দলদা লৈরিবা ঐহাক্কী মরুপ অশ্বিনী বৈস্নবজী, তেলঙ্গানাগী মচারি অমসুং মন্ত্রীপরিশদতা লৈরিবা ঐহাক্কী মরুপ কিশন রেদ্দীজী, মশিং য়াম্না লেংবীরক্লিবা ঐহাক্কী নুংশিরবা ইচিল ইনাওশিং
প্রিয় মহনা, সৌদরা সোইদরী মনুলারা, মী অন্দরিকী না হদয়পুর্বক নমস্কার মুলু। শক্নাইরবা নিংতম-য়াওল্লোই কয়াগী লমদম তেলঙ্গানাবু ঐহাক্না নোল্লুকচরি। ঙসিদি, ঐহাক্না তেলঙ্গানাগী চাউখৎ-থৌরাংগী খোঙজেল হেনগৎহনবগী খুদোংচাবা অমা ফংজরে। তেলঙ্গানাগা আন্ধ্র প্রদেশকা শম্নহনবা বন্দে ভারত এক্সপ্রেস অমসু ঙৈহাক্কী মমাংদা লমথাখ্রে। মসিগুম্বা মতমগা চুনবা ত্রেন অসিনা ভাগ্যলক্ষ্মী মন্দিরগী শহরবু ভগ্বান শ্রী ভেঙ্কতেশ্বর ধাম তিরুপতীগা শম্নহল্লগনি। হায়বদি, বন্দে ভারত এক্সপ্রেস অসিনা লাইনীং, মতমগা চুনবগী মতৌ, তেক্নোলোজী অমসুং তুরিজম্বু শম্নহনগনি হায়বনি। মসিগা লোয়ননা, লুপা করোর 11গী শেনফমগী চাউখৎ থৌরাংগী প্রোজেক্ত কয়া অমসু শঙ্গাবগা লোয়ননা উরেপ উয়ুং তমগনি। হায়রিবশিং অসিদি তেলঙ্গানাগী রেল অমসুং রোদ কন্নেক্তিবিতী, হকশেলগী ইনফ্রাস্ত্রকচরগা মরী লৈনবা প্রোজেক্ত ঙাক্তনি। মসিগুম্বা চাউখৎ থৌরাংগী প্রোজেক্তশিং অসিগীদমক্তা ঐহাক্না মীয়াম্বু থাগৎচরি অমসুং য়াইফ পাউজেলসু পীজরি।
মরুপশিং,
তেলঙ্গানানা তোঙানবা রাজ্য ওইখিবা মতমগা কেন্দ্রদা এন.দি.এ. সরকার লাকখিবা মতমগা হায়রপ মান্নৈ। তেলঙ্গানা শেমখিবদা থৌদাং য়াখিবা মীচম মীয়ামশিংগী মফমদা ঐহাক্না ঙসি অমুক্কা হন্না ইকায় খুম্নবা উৎচরি। মসি মফমসিগী জনতা জনর্ধন্না য়াখিবা থৌদাংদগী ওইথোকপনি। তেলঙ্গানাগী চাউখৎ-থৌরাং, তেলঙ্গানাগী মীয়ামগী চাউখৎ-থৌরাংগী মতাংদা অদোম্না মঙলিবা মঙলানশিংবু মঙফাওনহনবা হায়বসি এন.দি.এ. সরকারনা মশাগী থৌদাংনি খন্না চৎলি। ঐখোয়না সবকা সাথ, সবকা বিকাস, সবকা বিশ্বাস, সবকা প্রয়াসকী মন্ত্রগা লোয়ননা তুংলমচত্তা চঙশিল্লি। মমাংগী চহি 9দা ভারতকী চাউখৎ থৌরাংগী মোদেল অমা ঐখোয়না শেমখিবা অসিগী কান্নবা খুদিংমক তেলঙ্গানাসু ফংফম থোকই। মসিগী খুদম অমদি ঐখোয়গী শহরশিংনা চাউখৎলক্লিবা অসিনি। মমাংগী চহি 9 অসিদা হাইদ্রবাদতা চাউরাক্না কিমি. 70 শাংবা নেত্রো নেতৱর্ক শেমখি। হাইদ্রবাদ মলতি মোদেল ত্রান্সপোর্ত সীস্তেম – এম.এম.তি.এস. প্রোজেক্ত অসিসু মতম অসিগী মনুংদা খোঙজেল য়াঙনা থবক পায়খৎখি। মফমসিদা এম.এম.তি.এস. সর্ভিস 13সু ঙসিদগী হৌরে। এম.এম.তি.এস.না খোঙজেল য়াঙনা চাউখৎনবগীদমক্তা কেন্দ্র সরকারনা হন্দক চহিগী বজেত্তা তেলঙ্গানাগীদমক্তা লুপা করোর 600 খাক্তুনা থমখ্রে। মসিনা হাইদ্রবাদ-সেকন্দ্রবাদ য়াওনা মনাক নকপা জিলাশিংগী মরুপ লাখ কয়াগী খুদোংচাবা হেনগৎলগনি। মসিনা মরম ওইরগা অনৌবা বিজনেস হব কয়া লৈরগনি, লমদমশিং অসিদা ইনভেস্তমেন্ত লাকপা হৌরগনি।
মরুপশিং,
চহি 100দা অমুকখক থোকপা লাইচৎ অমসুং লৈবাক অনিগী মরক্তা লান শোক্নরিবা অসিনা মরম ওইরগা মালেমগী শেন্মিৎলোনশিংদা য়াম্না থুনা অকা-অকুম কয়া লাক্নরি। মসিগুম্বা ইরাং মরকসিদা মশাগী ইনফ্রাস্ত্রকচরশিংবু মতমগা চুনহনবা ঙম্বগী রেকোর্দ থম্বা লৈবাকশিংগী মরক্তা ভারতসু অমা ওইরি। হন্দক্কী চহিগী বজেত অসিদসু মোদর্ন ইনফ্রাস্ত্রকচরগীদমক্তা লুপা করোর লাখ 10 কাইখ্রবনি। ঙসিগী অনৌবা, 21শুবা চহি চাগী ভারত অসিনা লৈবাক্কী কাচিন কোয়া খুদিংদা মোদর্ন ইনফ্রাস্ত্রকচর শেম্লি। মমাংগী চহি 9দা তেলঙ্গানাগী রেলৱে বজেত্তা চাউরাক্না শরুক 17 হেনগৎখি। অশ্বিনীজীনা হৌজিক্তসু হায়বীখ্রে। মসিনা মরম ওইরগা অনৌবা রেল লাইন শেম্বা, রেল লাইনবু দবল তৌবা, ইলেক্ত্রিফিকেসন তৌবা ওইরো, থবক খুদিংমক রেকোর্দ ওইবা খোঙজেলদা পায়খৎলি। সেকন্দ্রবাদ অমসুং মহবুবনগরগী মরক্কী রেল লাইন দব্লিং তৌবগী থবক ঙসি লোইশিল্লিবা অসিসু হায়রিবা ৱাফম অসিগী খুদম অমনি। মসিনা হাইদ্রবাদ অমসুং বেঙ্গালুরুগী কন্নেক্তিবিতী য়াম্না ফগৎহনগনি। লৈবাক্কী অচৌবা রেলৱে স্তেসন কয়া মোদর্নাইজ তৌবগী থবক পায়খৎলিবা অসিগী কান্নবা তেলঙ্গানাসু ফংলি। সেকন্দ্রবাদ রেলৱে স্তেসন শেমগৎলিবা অসিসু খোঙথাং অসিগী শরুক অমনি।
মরুপশিং,
কেন্দ্র সরকারনা তেলঙ্গানাদা রেলগা লোয়ননা হাইৱে নেতৱর্কপুসু খোঙজেল য়াঙনা শেমগৎলি। ঙসিমকসু মফমসিদা হাইৱে প্রোজেক্ত মরিগী উরেপ উয়ুং তমখি। লুপা করোর 2300 চঙগদবা অকলকোৎ-কুর্নুল সেক্সন ওইরো, লুপা করোর 1300 চঙগদবা মহবুবনগর-চিঞ্চোলী সেক্সন ওইরো, লুপা করোর 900গী কলৱাকুর্তী-কোল্লাপুর হাইৱেগী থবক ওইরো, লুপা করোর 2700গী খমম-দেবরাপেল্লে সেক্সনগী থবক ওইরো, কেন্দ্র সরকারনা তেলঙ্গানাদা মোদর্ন নেস্নেল হাইৱে শেম্নবা থবক মশাগী অপুনবা পাঙ্গল থাদদুনা পায়খৎলি। কেন্দ্র সরকারনা লেপ্তনা হোৎনবদগী নেস্নেল হাইৱেগী অশাংবা অসি হান্নগী শরুক অনি ওইখ্রে। ইং 2014দা তেলঙ্গানা শেমখিবা মতমদা, মফমসিগী নেস্নেল হাইৱে অসি শুপ্নগী কিমি. 2500গী ময়াদা ওইরম্মি। ঙসিদি, মফমসিগী নেস্নেল হাইৱেগী অশাংবসি অসি য়াম্না হেনগত্তুনা কিমি. লিশিং মঙা য়ৌরে। তেলঙ্গানাগী নেস্নেল হাইৱে শাবগীদমক্তা কেন্দ্রনা চহিশিং অসিদা চাউরাক্না লুপা করোর লিশিং 35গী চাংদা চাদিং তৌখি। হৌজিক্কী ওইনসু, তেলঙ্গানাদা লুপা করোর লিশিং 60গী রোদ প্রোজেক্তকী থবক চত্থরি। মসিগী মনুংদা গেমচেঞ্জর ওইরিবা হাইদ্রবাদ রিং রোদ প্রোজেক্তসু মনুং চল্লি।
মরুপশিং,
কেন্দ্রনা তেলঙ্গানাদা ইন্দস্ত্রী অমসুং লৌউ-শিংউগী চাউখৎ থৌরাংগী হীরম অনিমক্তা অহেনবা মিৎয়েং থম্লি। তেক্সতাইল হায়বসি লৌমী অমসুং শিন্মী অনিমক্না থবক শুবা য়াবা অদুগুম্বা মখলগী ইন্দস্ত্রী অমনি। ঐখোয়গী সরকারনা লৈবাক শিনবা থুংবদা মেগা তেক্সতাইল পার্ক 7 শানবা ৱারেপ লৌখ্রে। মসিগী মরক্তগী তেক্সতাইল পার্ক অমদি তেলঙ্গানাদা শাগনি। মসিনা নহাশিংদা থবক য়াম্না পীগনি। কেন্দ্রনা তেলঙ্গানাদা থবক পীবগী মথক্তা এজুকেসন অমসুং হেল্থকী লমদসু শেল য়াম্নবা থাদরি। তেলঙ্গানাদা মশাগী এমস অমা পীবগী লাইবক ফবসু ঐখোয়গী সরকারনা ফংজরে। এমস বিবীনগরগা মরী লৈনবা অতোপ্পা খুদোংচাবা কয়াগী থবকসু ঙসিদগী হৌরগনি। ঙসিগী প্রোজেক্তশিং অসিনা তেলঙ্গানাদা ইজ ওফ লিবিং, ইজ ওফ ত্রাভেল অমসুং ইজ ওফ দুইং বিজনেস অহুম্মক খুমাং চাউশিনহল্লগনি।
অদুবু মরুপশিং,
কেন্দ্র সরকারগী হোৎনজমন কয়া অসিগী মরক্তা, ঐহাক্না য়াম্না নুংঙাইতবা ৱাফম অমদি লৈরি। কেন্দ্রগী প্রোজেক্তশিংদা রাজ্য সরকারনা থোইদোক্না শৌগত্তবনা প্রোজেক্ত খুদিংবু তপথহল্লি। মসিনা তেলঙ্গানাগী মীয়াম, অদোম মীয়ামদা খুদোংচাদবা লৈহল্লি। চাউখৎ থৌরাংগী থবক থৌরম খুদিংদা অয়েৎপা অমত্তা লৈতনবা হোৎনবীয়ু, চাউখৎ থৌরাংদা খোঙজেল হাপসি হায়না ঐহাক্না রাজ্য সরকারগী মফমদা হায়জরি।
ইচিল ইনাওশিং,
ঙসিগী অনৌবা ভারত অসিদা লৈবাক মীয়ামগী অনিংবা অপাম্বা খুদিং ফংহন্নবা ঐখোয়গী সরকারনা অহেনবা মিৎয়েং চঙলি। ঐখোয়না মসিগীদমক্তা অহিং নুংথিল খঙদনা থবক তৌরি। অদুবু, খুজোপ খরগী মীওই খরদি মসিগুম্বা থৌওংশিং অসিদা য়াম্না শাওনিংলি। মসিগুম্বা মীয়াম অসিনা শাগৈ নাতৈ, খুরা মাম্মা অমসুং শেঞ্জা থুমজাগী চৎনবীবু ঙসি ফাওবা শৌগৎলি, য়োক্তুনা থম্লি। থম্মোই শেংনা থবক তৌজবা মীওইশিংদা মখোয়না ৱারৌই। মীয়ামগী অপাম্বা, খুন্নাইগী য়াইফবা হায়বসিগা মখোয়গী অপাম্বগা মরী অমত্তা লৈনদে। মখোয়দি মশাগী নুংঙাবখক খল্লি। প্রোজেক্ত, ইনভেস্তমেন্ত খুদিংদা মশাগী নত্ত্রগা মখোয়গী ইমুংগী কান্নবখক য়েংই। তেলঙ্গানানা মসিগুম্বা মীওইশিংদগী য়াম্না চেকশিন্না লৈবগী মথৌ তাই।
ইচিল ইনাওশিং,
শেঞ্জা থুমজা অমসুং শাগৈ নাতৈ য়োকখৎপা হায়বসি অমনা অমদগী করিশু খেন্নদে। খুরা মাম্মগী চৎনবী লৈবা মফমদা শেঞ্জা থুমজা লৈবনি। শাগৈ নাতৈ, ইচা-ইশুগী মন্ত্র অসিনা মসিগুম্বা থৌওংশিংবু শেন্নদুনা থম্বনি। শাগৈ নাতৈগী চৎনবী অসিনা খুদোংচাবা খুদিংবু লাকশিন্দুনা থম্বা পাম্মি। মখোয়গী কন্ত্রোলগী মাইয়োক্তা মীওই অমা লৈরকপা হায়বসি মখোয়না য়াম্না পামদবনি। ঐহাক খুদম অমা পীজগে। সরকারনা দাইরেক্ত বেনেফিত ত্রান্সফর হৌদোকখি, ঙসিদি লৌমী, কারবার পীক্না তৌবশিংগী মফমদা মখোয়গী বেঙ্ক একাউন্তশিংদা শেলগী তেংবাং হকথেংননা ফংনরে। ঐখোয়গী লৈবাক পুম্বগী দিজিতেল পেমেন্তকী খুদোংচাবা হেনগৎহল্লে।
মসি মমাংদা করিগী ওইথোক্লমদ্রিবা করিগীনো? শাগৈ নাতৈগী খনবা মীওইশিংনা অপুনবা সীস্তেমদা খুদুম চনবা পাম্বগী নত্তে। বেনিফিশরী অমনা ফংবা খুদোংচাবা খুদিংমক মশাগী ওইনা থমজিনবা পাম্বগীনি। মসিগী মরম অহুম লৈ। অমা, মখোয়গী ইমুং মনুংনা অদুমক নুংঙাইনা লৈনিংবা। অনি, শেঞ্জা থুমজাগী শেলশিং মখোয়গী শাগৈদা অদুম লাকহনবা পাম্বা। অহুম, লাইরবশিংগীদমক্তা থাদবা শেলশিংবু মখোয়গী শেঞ্জা থুমজাগী ইকোসীস্তেম মনুংদা য়েন্থোকপা পাম্বা।
মোদীনা ঙসিদি শেঞ্জা থুমজাগী অশেংবা মরা অসিদা লান্দারে, য়ান্থৎলে। তেলঙ্গানাগী ইচিল ইনাওশিংনা ঐঙোন্দা মসিগী পাউখুম পীগদরা? অদোম পাউখুম পীগদরা? শেঞ্জা থুমজাগী মাইয়োক্তা ঐখোয়না লেপফম থোকই নত্ত্রগা থোক্তে? লৈবাকপু শেঞ্জা থুমজাদগী মনিং তমহনগদরা নত্ত্রগা তমহল্লোইদবরা? শেঞ্জা থুমজা কয়া য়াম্না চাউনা তৌবা ওইরো, আইনগী থবক পায়খৎফম থোকই নত্ত্রগা থোক্তে? মরম অদুনা, মখোয়গুম্বা মীয়াম অসি পাখৎলিবনি, খোইশাওনরিবনিনা করিনো খঙদবা থবক পায়খৎলিবনি। নুমিৎ খরনিগী মমাংদা, মখোয়গুম্বা রাজনিতী তৌবা মীওই খরদি মখোয়গী শেঞ্জা থুমজাগী ৱারোল শেবাক ফাক্ত্রিঙৈদা মখোয়বু ঙাকথোকপীনবা কোর্ত য়ৌখ্রবনি। কোর্তকী মনাক্তা চৎলুরে, মদুদসু কোর্তনা মখোয়গী অপাম্বা য়াখিদ্রে।
ইচিল ইনাওশিং,
সবকা সাথ, সবকা বিকাসকী ৱাখল্লোনগা লোয়ননা থবক তৌবা মতমদা, গনতন্ত্রনা তসেংবা ৱাহন্থোক্কী মতুং ইন্না মপাঙ্গল কনবা হেল্লক্কনি, মতমদুদা শোত্থরবশিংনা মান্নবা খুদোংচাবা ফংলক্কনি। মসিমক বাবাসাহেব অম্বেদকরজগীগী অপাম্বনি। মসিমক সংবিধানগী অপাম্বনি। ইং 2014দা কেন্দ্র সরকার অসি শাগৈ নাতৈগী চৎনবীদগী মনিং তম্বা ফংখিবা মতমদা, মদুগী করি মহৈ ফংখি হায়বা লৈবাক পুম্বনা উবা ফংলে। মমাংগী চহি 9 অসিদা লৈবাক্কী ইমা, ইচে, ইচল, করোর 11না মশাগী ময়ুম, অমাংশঙ ফংজখি। মসিগী মনুংদগী তেলঙ্গানাগী ইমুং লাখ 30 হেনবসু খুদোংচাবা অসি ফংখি। মমাংগী চহি 9 অসিদা লৈবাক্কী ইচল-ইচানুপী করোর 9 হেনবনা উজ্বালাগী খুত্থাংদা লেম্না গ্যাস কন্নেক্সন ফংখি। মসিদসু তেলঙ্গানাগী লাইরবা ইমুং লাখ 11 হেনবনা খুদোংচাবা অসি ফংখিবনি।
মরুপশিং,
শাগৈ নাতৈগী চৎনবীনা তেলঙ্গানা য়াওনা লৈবাক্কী লাইরবা মরুপ করোর কয়াগী রাশন ফাওবা মৎপীখি। ঐখোয়গী সরকারনা লাইরবা করোর 80 হেনবগী মফমদা লেম্না রাশন পীবগী থবক পায়খৎলি। মসিনা তেলঙ্গানাগী লাইরবা লাখ কয়াগী মফমদসু য়াম্না তেংবাংলি। ঐখোয়গী সরকারগী থৌশিল থৌরাংনা মরম ওইরগা তেলঙ্গানাগী লাইরবা মরুপশিংদা লাখ 5 ফাওবগী শেনফমগী লেম্না লাইয়েংবগী খুদোংচাবা পীরি। তেলঙ্গানাগী লাইরবা ইমুং করোর 1গী জন ধন একাউন্ত অহানবা ওইনা হাংখ্রে। তেলঙ্গানাগী ওন্তোপ্রিনর লাখ অমগা মখায়না গেরেন্তী য়াওদনা মুদ্রগী লোন ফংনখি। মফমসিগী স্ত্রীত ভেন্দরশিংনা পুন্সিগী অহানবা ওইনা লোন ফংনখি। তেলঙ্গানাগী লাখ 40 হেনবা অপীকপা লৌমীশিংনা পি.এম. সম্মান নিধীগী মখাদা চাউরাক্না করোর লাখ 9গী শেনফমশিং ফংনখ্রে। মখোয় অসি মমাংদা মিৎয়েং অমুক্তা চঙবীখিদ্রিবা মীওই কাঙলুপশিংনি।
মরুপশিং,
মীওই খরা থেম্নবা অমসুং পেলহন্নবা থবক তৌবগী মহুত্তা মীয়ামগী অনিংবা অপাম্বা থুংহনবগী মাইকৈদা থবক পায়খৎপা হৌরকপা মতমদা, খুন্নাইদা অচুম্বা ৱায়েল পীবগী থবক হৌরকই। ঙসিদি, লৈবাক অসিদা তেলঙ্গানা য়াওনা মীয়ামগী অপাম্বা থুংহনবগী লম্বীদা চৎপা পাম্লে, সবকা প্রয়াসপু হেন্না পাকথোক চাউথোকহনবা পাম্লে। তেলঙ্গানানা ঙসি ফংলিবা প্রোজেক্তশিং অসিসু মীয়ামগী অপাম্বা পীবগী ৱাখল্লোন্না ইথিল পীদুনা ফংলিবনি, মসিদি সবকা বিকাস্তা কত্থোক্লবনি। নিংতম্বগী অমৃত কাল অসিদা চাউখৎপা ভারত অমা ওইনবগীদমক্তা তেলঙ্গানানা খোঙজেল য়াঙনা চাউখৎপগী মথৌ য়াম্না তাই। লাক্কদৌরিবা চহি 25 অসিসু তেলঙ্গানাগী ওইনা য়াম্না মরু ওইরি। তেলঙ্গানানা মীওই খরগী মবুক্নিং পেলহনবা অমসুং শেঞ্জা থুমজাগী পাঙ্গল খুদিংদগী চেকশিন্না লৈবগী মথৌ য়াম্না তারি, মসিনা তেলঙ্গানাগী তুংগী মতমগী লাইবক লেপকনি। ঐখোয়না তেলঙ্গানাগী চাউখৎ থৌরাংগী মঙলান খুদিংবু অমত্তা ওইনা হোৎনদুনা ফংহনগদবনি। ঐহাক্না ঙসিগী প্রোজেক্তশিং অসিগীদমক্তা অদোম মরুপ অমসুং ইচিল ইনাওশিংবু থাগৎচরি। অদোম অশুক য়াম্বনা লাকপীদুনা তেলঙ্গানাগী চাউখৎ থৌরাংগীদমক্তা ঐখোয়গী ইফমদা থৌজাল পীবিবসি ঐহাক্কী লাইবক ফবনি। ঐহাক্না অদোম্বু মতম পুম্বদা ইকায় খুম্নজদুনা লৈগনি।
ভারত ইমানা য়াইফরে হায়না অমুক্তা লাওবীয়ু,
ভারত ইমানা য়াইফরে,
ভারত ইমানা য়াইফরে।
পুম্নমকপু হন্না হন্না থাগৎচরি।
