“ভারত অমসুং শ্রী লঙ্কানা দিপ্লোমেতিক অমসুং শেন্মিৎলোনগী মরীগী অনৌবা খোঙচৎ অমা খোঙশানমিন্নরি”
“ফেরী সর্ভিসনা ঐখোয়গী পুৱারী অমসুং নাৎকী মরী খুদিংমক হিংগৎহল্লগনি”“কন্নেক্তিবিতী হায়বসি শহর অনিবু হেন্না নক্ননা শম্নহনবা খক্তা নত্তে। মসিনা ঐখোয়গী লৈবাক, মীয়াম অমসুং থম্মোইবুসু নক্নহল্লি”“চাউখৎ থৌরাংগীদমক্তা খোঙলোই ওইমিন্নবা হায়বসিনা ভারত-শ্রী লঙ্কা বাইলেতরেল মরীগী খ্বাইদগী মপাঙ্গল লৈবা য়ুম্বীশিংগী মনুংদা অমনি”“ভারতনা তেংবাংদুনা শ্রী লঙ্কাদা প্রোজেক্ত পায়খৎপনা মীয়ামগী পুক্নিং শুমহৎলি”এক্সেলেন্সিজ, ইচিল ইনাও পুম্নমক, খুরুমজরি, অয়ুবোৱন, বন্নকম!
মরূপশিং,
মরুওইখ্রবা তাঞ্জা অসিদা ময়ামগী মরক্তা তিনবা ফংজবা ঐগী লাইবক ফবনি। ঐখোয়না ভারত অমদি স্রী লঙ্কাগী দিপ্লোমেতি্ অমদি শেন্মিৎলোনগী ওইবা মরীগী অনৌবা পন্দুপ অমদা খোঙ থাংজিল্লি। নাগপতিনম অমদি কনকেসন্থুরাই অনিগী মরক্তা হিগী সর্ভিস হৌদোকপা অসি ঐখোয়গী মরী কনখৎহনবগী মরুওইবা পন্দোল অমনি।
মরূপশিং, ভারত অমদি স্রী লঙ্কাকী মরক্তা নাৎ, লল্লোন ইতিক অমদি খুনুংলোনগী ওইবা পুৱারীগী অচেৎপা মরী লৈনৈ। নাগপতিনম অমদি মনাক নকপদা লৈবা ময়োল্লমশিং স্রী লঙ্কা য়াওনা লৈবাক কয়াগা সমুদ্রগী লম্বীদা লল্লোন ইতিক্কী থবক তৌনবগীদমক খঙনরিবনি। পুম্পুহারগী পুৱারী ওইরবা হিথাংফম অসি অরিবা তামিল লাইরিকশিংদা লল্লোন ইতিক্কী মকোন অমা ওইনা পনবিরম্মি। পতিনপলাইন অমদি মনিমেকলাইনচিংবা সঙ্গম মতমগী লাইরিকশিংদা ভারত অমদি স্রী লঙ্কাগী মরক্তা চত্থোক চৎশিন তৌরম্বা হিশিংগী মতাঙদা পল্লম্মি। মমিং লৈবা ৱাকম সুব্রমনিয়া ভার্তিনা মহাক্কী ঈশৈ ‘সিন্ধু নাধিয়িন মিসাই’দা লৈবাক অনিসিবু শম্নরম্বা থোং অমগী মরমদা পল্লম্মি। অদুগা ঙসিগী হিগী সর্ভিস অসিনা হায়রিবা পুৱারীগী অমদি নাৎকী ওইবা মরী অদুবু অমুক হিঙ্গৎহল্লে।
মরূপশিং,
প্রেসিদেন্ত ৱিক্রেমেসিংহেনা হন্দক্তা লাক্লম্বা অদুদা, ঐখোয়না ঐখোয়গী শেন্মিৎলোনগী লমদা খোঙবু ওইমিন্নবগী ভিজন দোকুমেন্ত অমা পুন্না এদোপ্ত তৌমিন্নখি। খোঙবু অসিগী নুংগী ওইবা ৱাখল্লোন্দি কন্নেক্তিবিতীনি। কন্নেক্তিবিতী হায়বসি ময়োল্লম অনিসুবু হেন্না নকশিন্নহনবখক্কী ৱাফম নত্তে। মসিনা ঐখোয়গী লৈবাক অনিবু হেন্না নকশিন্নহল্লি, ঐখোয়গী মীয়ামবু হেন্না নকশিন্নহল্লি অমদি থম্মোয় থম্মোয় নকশিন্নহল্লি। কন্নেক্তিবিতীনা লল্লোন ইতিক, তুরিজম অমদি মীগা মীগগী মরক্তা লৈনরিবা মরীবু হেন্না ফগৎহল্লি। মসিনা লৈবাক অনিমক্কী নহাশিংগী খুদোংচাবসু হেনগৎহল্লি।
মরূপশিং,
২০১৫দা ঐনা স্রী লঙ্কাদা লাক্লম্লবা মতুংদা, ঐখোয়না দিল্লী অমদি কোলোম্বোগী মরক্তা দাইরেক্ত ফ্লাইত হৌদোকখ্রে। তুংদা, ঐখোয়না স্রী লঙ্কাগী কুশিনগরগী ময়োল্লমদা অহানবা ইন্তরনেস্নেল ফ্লাইত তারকখিবদা হরাও তয়াম্বা ফোঙদোকখি। চেন্নাই অমদি জফ্নাগী মরক্তা ২০১৯দা দাইরেক্ত ফ্লাইত হৌখি। হৌজিক অমুক, নাগপতিনম অমদি কনকেসন্থুরাইগী মরক্তা হৌদোক্লিবা হিগী সর্ভিস অসিসু মায়কৈ অসিদা চঙশিল্লিবা অতোপ্পা পন্দোল অমনি।
মরূপশিং,
কন্নেক্তিবিতীগী লমদা লৈরিবা ঐখোয়গী মীৎয়েঙ ত্রান্সপোর্ত সেক্তরগী ৱাংমদনি। ভারত অমদি স্রী লঙ্কানা ফিন-তেক অমদি ইনর্জীনচিংবা তোঙান তোঙানবা হীরমশিংদা নক্ননা খুৎশম্ননা চৎমিন্নরি। দিজিতেল পেমেন্ত মীয়ামগী ঈহৌ অমা ওইরে অমদি ভারতকী য়ু.পি.আই.না মরম ওইরগা ভারত্তা পুন্সিগী লম্বী অমা ওইরে। ঐখোয়না য়ু.পি.আই. অমদি লঙ্কা পে শম্নহন্দুনা ফিন-তেক সেক্তর কন্নেক্তিবিতীদা থবক তৌমিন্নরি। ঐখোয়গী চাওখৎ খোঙচৎ মথৌ হাপ্নবগীদমক লৈবাক অনিসিদা ইনর্জী সিক্যুরিতীনা মরুওইবা ওইরি। ঐখোয়না ইনর্জসী সিক্যুরিতী অমদি রিলাইএবিলিতী হেনগৎহন্নবগীদমক ঐখোয়গী ইনর্জী গ্রিদ শম্নহল্লি।
মরূপশিং,
খোঙজেল অমদি চাওখৎপগীদমক খোঙবু ওইমিন্নবনা ঐখোয়গী নাকল অনিগী ওইবা মরীগী মপাঙ্গল কল্লবা য়ুম্বী ওইরি। ঐখোয়গী মীৎয়েঙদি চাওখৎপপু মীপুম খুদিংদা য়ৌহন্দুনা, কনাগুম্বা অমত্তবু চিত্তহৌহন্দবা হায়বসিনি। হায়রিবা মীৎয়েঙ অসিগী পরিংদা, ভারতকী মতেঙগা লোয়ননা স্রী লঙ্কাদা পায়খৎলিবা প্রোজক্তশিংনা মীয়ামগী পুন্সিদা ইথিল পীরি। য়ুম-কৈ শাবা, ঈশিং, হকশেল অমদি পুন্সি হিংবগী তেংবাং পীবগা মরী লৈনবা তোঙান তোঙানবা প্রোজেক্তশিং অৱাংথংবা প্রোভিন্সতা লোইশিল্লে। কনকেসন্থুরাই হিথাংফমগী ফীভম ফগৎহনবদা ঐখোয়না মতেং পাংবদা ঐহাক হরাওই। খা অমদি অৱাং শম্নহল্লিবা রেলৱে লাইনশিং হান্নগী ফীভমদা মথৌ তৌহনবা; মমিং লৈরবা জফ্না কল্চরেল সেন্তর শেমগৎ শাগৎপা; স্রী লঙ্কা শিনবা থুংনা ইমর্জেন্সী এম্বুলেন্স সর্ভিস হৌদোকপা; নৎত্রগা দিক ওয়াদা মল্তি-স্পিসিএল্তী লায়েংশঙ লিংখৎপবু ওইরবসু, ঐখোয়না সবকা সাথ, সবকা বিকাস, সবকা বিস্বাস অমদি সবকা প্রয়াসকী পরিংদা থবক পায়খৎলি।
মরূপশিং,
ময়ামসু খঙবিরি ভারতনা হন্দক্তা জি২০ মীফম পাঙথোকখি। বসুদেব কুতুম্বকমগী ঐখোয়গী মীৎয়েঙবু মালেমগী ফুরুপশিংনা তরাম্না ওকখি। মীৎয়েঙ অসিগী শরুক অমদি ঐখোয়গী য়ুমলোন্নববু মাঙদা থমদুনা খোঙজেল অমদি নুংঙাই য়াইফমিন্নবা পুরকপনি। জি২০ মীফম মনুংদা, ইন্দিয়া-মিদ্দল ইস্ত-য়ুরোপ ইকনমিক কোরিদোর হৌদোকখি। মসি মফম পুম্বসিদা অচৌবা শেন্মিৎলোনগী ইথিল পীগদবা মরুওইবা কন্নেক্তিবিতী কোরিদোর অমনি। ঐখোয়না লৈবাক অনিগী মরক্তা মল্দি-মোদেল কন্নেক্তিবিতী মপাঙ্গল কনখৎহনবগা লোয়ননা স্রী লঙ্কাগী মীয়ামসু মসিদগী কান্নবা ফংগনি। ঐনা প্রেসিদেন্ত, লৈঙাক অমদি স্রী লঙ্কাগী মীয়ামবু ঙসি হিগী সর্ভিস অসি মায় পাক্না হৌদোকপগীদমক থাগৎচরি। ঙসি হৌদোক্লিবা অসিগা লোয়ননা, ঐখোয়না রামেস্বরম অমদি তলাইমন্নরগী মরক্তা লৈরম্বা হিগী সর্ভিসসু অমুক মখা চত্থনবা থবক পায়খৎকনি।
মরূপশিং,
ভারতনা নাকল অনিগী মীয়ামগী কান্ননবগীদমক ঐখোয়গী নাকল অনিগী ওইবা মরীবু হেন্না কনখৎহন্নবা স্রী লঙ্কাগা লোয়ননা য়াম্না নক্ননা থবক তৌমিন্ননবা খোঙফম চেৎনা লেপ্লি। ময়ামবু থাগৎচরি!
