কর্নাতকাগী রাজ্যপাল, শ্রীমান থাৱরচন্দজী গেহলোত, মুখ্য মন্ত্রী, শ্রীমান সিধরামৈয়াজী, কর্নাতকা এসেমব্লীগী ওপোজিসনগী লুচিংবা আর. অশোকজী, বোইং কম্পেনীগী ভারতকী COO, শ্রীমতি স্তেফানী পোপ, ইন্দস্ত্রীগী অতোপ্পা পার্ত্নর, ইবেম্মা অমসুং ইবুংঙোশিং!
ঐহাক্না মীরমদগী লাক্লিবা মীথুংলেন খুদিংবু বেঙ্গালুরুদা অখন্ননা ইকায় খুম্নবগা লোয়ননা তরাম্না ওকচরি। বেঙ্গালুরু অসিদি অপাম্ববু ইন্নোভেসন অমসুং মায় পাকপগা মরী লৈনহনবা ঙম্বা শহরনি। বেঙ্গালুরুনা ভারতকী তেক্কী হীরমদা লৈবা মতিক মগুনগা মালেমগী দিমান্দগা মরী লৈনহল্লিবনি। বোইংগী অনৌবা গ্লোবেল তেক্নোলোজী কেম্পস অসিনা বেঙ্গালুরুগী মসিগুম্বা শক্তাক অসিগী মপাঙ্গল হেন্না কনখৎহনগনি। মসিদি বোইংগী ওইনা অমেরিকাগী মপান্দা লৈবা খ্বাইদগী চাউবা ফেসিলিতে অমা ওইগনি। মরম অদুনা, ফেসিলিতী অসিনা ভারত খক্তা নত্তনা মালেম পুম্বগী এভিএসন মার্কেত্তা অনৌবা পাঙ্গল হাপকনি। অদুবু মরুপশিং, মসিগী ফেসিলিতীগী অসিগী মরু ওইবসি মসি খক্তা নত্তে। মসিনা গ্লোবেল তেক, রিসর্চ অমসুং ইন্নোভেসন, দিজাইন অমসুং দিমান্দবু শাফু পীবদা ভারতনা খোঙফম চেৎলিবা অসিবুসু তাক্কনি। মসিনা মেক ইন্দিয়া, মেক ফোর দি ৱর্ল্দগী পান্দম্বুসু মপাঙ্গল হেন্না লৈহল্লগনি। মালেম্না ভারতকী তেলেন্ততা থম্লিবা থাজবশিংবু কেম্পস অসিনা অমুক্কা হেন্না চেৎশিলহনগনি। ফেসিলিতী অসিদা ভারতনা নোংমদি এয়রক্রাফ ওফ দি ফ্যুচর অমা শোইদনা দিজাইন তৌরগনি হায়বগী ৱাখল্লোনবুসু ঙসিগী নুমিৎ অসিনা শকখঙলি। মরম অদুনা, ঐহাক্না বোইংগী অপুনবা মেনেজমেন্ত তীম, স্তেকহোলদর খুদিংকপু য়াইফ পাউজেল পীবগা লোয়ননা থাগৎপসু ফোংদোক্লি।
মরুপশিং,
ঙসি অসিদি কর্নাতকাগী মীয়ামগী য়াম্না মরু ওইবা নুমিৎ অমনি। হৌখিবা চহিদা, এসিয়াগী খ্বাইদগী চাউবা হেলিকোপ্তর মেন্যুফেকচরিং ফেক্তরী অমা কর্নাতকাদা শাবা লোইশিনখ্রবনি। অদুগা, মসিগুম্বা গ্লোবেল তেক্নোলোজী কেম্পস অমসু লমদম অসিনা ফংলবনি। কর্নাতকানা এভিএসন হব অমা মতৌ করম্বা ওইরক্লিবগে হায়বা থৌওংশিং অসিনা ময়েক শেংনা উৎলি। ঐহাক্না মতাং অসিদা ভারতকী নহাশিংবু অখন্ননা থাগৎপা পাম্মি, মরমদি, ফেসিলিতী অসিনা মখোয়দা এভিএসন সেক্তরদা অনৌবা স্কিল কয়া তম্বগী খুদোংচাবা পীরগনি।
মরুপশিং,
লৈবাক্কী সেক্তর খুদিংদা নুপীশিংনা শরুক য়াবগী চাং য়ারিবমখৈ হেনগৎহন্নবা ঐখোয়না লেপ্পা লৈতনা হোৎনরি। অদোম্না ঐখোয়গী পান্দম অমদি মমাংগী চহিদা পাংথোকখিবা G20 সম্মিত্তা উবা ফংলম্লগনি। নুপীনা লুচিংদুনা চাউখৎ থৌরাং পাংথোকপগী মতম অদু ঐখোয়গী লৈবাক অসিদা য়ৌরক্লে হায়না ঐখোয়না মালেমগী মফমদা হায়খিবনি। ঐখোয়না এভিএসন অমসুং এরোস্পেস সেক্তরদা নুপীশিংগী অনৌবা খুদোংচাবা কয়া শেম্নবা খোঙফম চেৎলি। ফাইতর পাইলোত ওইরো, নত্ত্রগা সিভিল এভিএসন ওইরো, ভারতকী নুপীশিংনা ঙসিদি নুপীগী পাইলোতকী হীরমদা লুচিংদুনা চৎলি। ভারতকী অপুনবা পাইলোতকী মনুংদগী চাদা 15না নুপী পাইলোত ওইবসিদা ঐহাক্না চাউথোকচরি। মালেমগী চাংচত্তগী ঐখোয়গী মশিং অসিনা শরুক অহুম হেল্লি হায়বা ৱাফম খঙলকপা মতমদা মসিগী অখন্নবা অসি অদোম্না হেন্না নীংথিজনা খঙবা ঙমগনি। ঙসি হৌদোক্লিবা বোইং সুকনয়া প্রোগ্রাম অসিনা ভারতকী এভিএসন সেক্তরদা নুপীশিংনা শরুক য়াবগী চাং অমুক্কা হেন্না হেনগৎহল্লগনি। খোঙথাং অসিনা অথাপ্পা অমসুং মনুং হঞ্জিনবা মফমশিং অমসুং লাইরবা নুপীমচাশিংগী পাইলোত ওইনীংবগী মঙলানবুসু লায়না মঙফাওনহনবদা তেংবাংগনি। মসিনা লৈবাক্কী সরকারগী স্কুল কয়াদা পাইলোত ওইবগী কেরিয়র কোচিং অমসুং দিভেলপমেন্তকী খুদোংচাবা কয়া হাংদোক্কনি।
মরুপশিং,
হৌখিবা থা খরদা ভারতকী চন্দ্রয়ান্না মালেমগী লৈবাক অমত্তনা য়ৌবা ঙমদবা মফমদা য়ৌখিবগী মতৌ অদোম পুম্নমক্না উন্নখ্রবনি। মসিগী মায় পাকপা অসিনা লৈবাক্কী নহাশিংগী মফমদা সাইন্তিফিক তেম্পরগী ৱাখল্লোনবু থাক য়াম্না ৱাংখৎহনখ্রে। ভারত অসি STEM এজুকেসনগী অচৌবা হব অমসু ওইরিবনি অদুগা ভারত্তা মশিং য়াম্লবা নুপী মহৈরোইশিংনা সাইন্স, তেক্নোলোজী, ইঞ্জিনিয়রিং অমসুং মেথ তম্নরি। ভারত্তা নুপীমচাশিংনা STEMদা থৱাই য়াওবরা, তম্নবরা হায়না ঐহাক্কী মীরম লৈবাক্কী খোঙচৎ অমদা রাজনীতিগী মমিং লৈরবা লুচিংবা অমনা ঐহাক্কী ইফমদা হংখিবা লৈ। ঐখোয়গী লৈবাক্তদি নুপা মহৈরোই মশিংদগী নুপী মহৈরোই মশিংনা STEM তম্মি হায়না ঐহাক্না পাউখুম পীবদা মহাক য়াম্না ঙকখিবনি। ভারতকী নুপীশিংগী মসিগুম্বা পাঙ্গল অসিবু বোইং সুকনয়া প্রোগ্রাম অসিনা কান্নবা য়াম্না পীরগনি। মরুপশিং, এভিএসন মার্কেত অসিদা ভারতনা লৌরিবা শাহৌগী মতাংদা অদোম্না নৈনরে, মসিগী ত্রাজেক্তরীবুসু য়েংদুনা চৎলি। হৌখিবা দিকেদ অমদা ভারতকী এভিএসন মার্কেত অসি মপুং ফানা হোংখ্রে। ঙসিদি, এভিএসন সেক্তরগা মরী লৈনবা স্তেকহোলদর খুদিংদা অনৌবা ইথিল অমা লৈরে। মেন্যুফেকচরিংদগী হৌরগা সর্বিসিং ফাওবা, স্তেকহোলদর খুদিংনা ভারত্তা অনৌবা খুদোংচাবা থিনরি। ঙসিদি ভারতনা মালেমগী খ্বাইদগী অহুমশুবা চাউবা এভিএসন মার্কেত অমা ওইরবনি। দিকেদ অমগী মনুংদা ভারতকী দোমেস্তিক পেসেঞ্জর মশিংনা শরুক অনিগী চাংদগী হেন্না হেনগৎখ্রে। মসিদা উরানগুম্বা খোঙথাংনা অচৌবা থৌদাং য়াখি। মথংগী চহি খরগী মনুংদা, দোমেস্তিক পেসেঞ্জর মশিং অসি অমুক্কসু হেন্না হেনগৎলগনি। অশুক য়াম্না চাউবা দিমান্দশিং য়েংলুরবা মতুংদা, ঐখোয়গী এয়রলাইনশিংনা অনৌবা এয়রলাইন কয়া লৈনবা ওর্দর তৌনখ্রবনি। মসিনা হায়বদি, ভারতনা মালেমগী এভিএসন মার্কেত্তা অনৌবা শক্তি পীগদৌরি হায়বনি।
মরুপশিং, ঐখোয়না ঙসিদি ভারতকী এভিএসন সেক্তরগীদমক্তা থৱাই য়াওবগী মতৌনা থল্লি। অদুবু, চহি 10 অসিগী মনুংদা করি থৌদোক থোকখিবদগী ভারতনা মালেমগী এভিএসন সেক্তরদা অশুক য়াম্না মাঙজিল থাবা ঙম্লিবনো? মসিগী মরমদি, ঙসিগী ভারতনা মশাগী মীয়ামশিংগী অপাম্বা অমসুং পুন্সি মহিংবু নুংঙাইহনবা হায়বা ৱাফম্বু খ্বাইদগী অহেনবা মিৎয়েং চঙবা হীরম্নি খন্দুনা থবক তৌবগীনি। এয়র কন্নেক্তিবিতী ফত্তবনা ঐখোয়না অচৌবা শিংনবা কয়া মাইয়োক্নরম্বগী মতম অমা লৈরম্মি। মসিমক্না মরম ওইদুনা, ঐখোয়গী তৌবা ঙম্বগী মতিক অমসুং থবক তৌবদা করিগুম্বা অহোংবা অমত্তা পুরকপা ঙমখিদে। অদুনা, ঐখোয়না কন্নেক্তিবিতী ইনফ্রাস্ত্রকচরদা ইনভেস্তমেন্ত তৌববু খ্বাইদগী অৱাংবা প্রাইওরিতী পীখি। ঙসিদি, ভারতনা মালেমগী খ্বাইদগী নীংথিনা কন্নেক্ত তৌবা মার্কেতশিংগী মরক্তা অমা ওইবা ঙম্লে। ইং 2014দা ভারত্তা চাউরাক্না এয়রপোর্ত 70মুক লৈরম্মি। ঙসিদি, লৈবাক্কী ওপরেস্নেল ওইবা এয়রপোর্ত মশিং অসি চাউরাক্না 150 ওইরে। ঐখোয়না অনৌবা এয়রপোর্ত শাবতা নত্তনা ঐখোয়গী লৈজরিবা এয়রপোর্তশিংগী ইফিসিএন্সীবুসু শরুক কয়া থোক্না হেনগৎহনখি।
মরুপশিং,
ভারতকী এয়রপোর্ত কেপাসিতী হেনগৎলকপদগী এয়র কার্গোগী সেক্তরদা খোঙজেল য়াঙনা অহোংবা লাক্লে। মসিদগী, ভারতকী মনুং হঞ্জিনবা অমসুং অথাপ্পা মফমগী পোত্থোক কয়ানা মালেমগী কৈথেলদা য়ৌবা ঙম্লে, লাইহল্লে। খোঙজেল য়াঙনা চাউখৎলক্লিবা এভিএসন সেক্তর অসিনা ভারতকী মপুং ওইবা গ্রোথ অমসুং থবক পীবগী মতৌদা য়াম্না চাউনা তেংবাংলি।
মরুপশিং,
ঐখোয়গী এভিএসন সেক্তরনা মখা তানা শাহৌ লৌনবা অমসুং খোঙজেল য়াঙনা শাহৌ লৌবা ঙমহন্নবগীদমক্তা ভারতনা পোলিসীগী থাক্তা লেপ্তনা থবক তৌরি। এভিএসন ফুএলদা থম্বা তেক্সপু য়ারিবমখৈ হন্থহন্নবা ঐখোয়না রাজ্য সরকারশিংদা য়াম্না কন্না হায়রি। এয়রক্রাফ লীজ তৌবগী থৌওংবুসু হেন্না লাইথোকহন্নবা ঐখোয়না খোঙফম চেৎলি। এয়রকারফ লীজ তৌবা অমসুং ফাইনান্সিংগী মতাংদা মীরমগী মখা পোল্লিবা অসিবু য়ারিবমখৈ হন্থহন্নবা ঐখোয়না কন্না হোৎনরি। মরম অদুনা, ইন্তর্নেস্নেল ফাইনেন্সিএল সর্ভিসেস সেন্তর ওথোরিতী অমা ঐখোয়না গফ সিতীদা হাংদোকখ্রে। মসিনা লৈবাক পুম্বগী এভিএসন সেক্তরদা কান্নবা পীগনি।
মরুপশিং,
হৌজিক অসি মতম ওইরবনি, হৌজিক অসি মতম ওইরবনি হায়না ঐহাক্না লাল কিলাদা হায়খিবনি। বোইং অমসুং মালেমগী অতোপ্পা কম্পেনীশিংগী ওইনসু হৌজিক অসি মতম চারবনি। ভারতকী খোঙজেল য়াঙবা শাহৌ অসিগা মখোয়গী শাহৌগা পুনশিন্নবগী মতম অসি হৌজিক ওইরবনি। মথংগী চহি 25তা ভারতপু চাউখৎপা লৈবাক অমা ওইহনবা হায়বসি লৈবাক মীয়াম করোর 140গী পান্দম ওইরবনি। ঐখোয়না মমাংগী চহি 9দা লৈবাক্কী লাইরবা করোর 25পু লাইরবগী খয়াত্তগী মনিং তমহনখি। হায়রিবা ভারত মচা করোর কয়া অসিনা নিও-মিদ্দল ক্লাস অমা ওইরক্লবনি। ঙসিগী ভারতকী ইনকম গ্রুপ্তা অপৱার্দ মোবিলিতীগী মতৌ উবা ফংলবনি। ভারতকী তুরিজম সেক্তরসু খোঙজেল য়াঙনা পাকথোক চাউথোরক্লি। মসিনা হায়বদি, অদোমগীদমক্তা খুদোংচাবা কয়া অমা হাংদোক্লে হায়বনি। ফিভম অসিগী কান্নবশিং অদোম্না খ্বাইদগী থুনা লৌনবা হোৎবীয়ু।
মরুপশিং,
ভারত্তা মসিগুম্বা খুদোংচাবা কয়া লৈরক্লিবা অসিদা, ঐখোয়না এয়রক্রাফ মেন্যুফেকচরিং ইকোসীস্তেম অমা খোঙজেল য়াঙনা শেমগৎপগী মথৌ তারবনি। ভারত্তা MSMEগী মপাঙ্গল লৈবা নেতৱর্ক অমা লৈ। ভারত্তা চাউরবা তেলেন্ত পুল অমা লৈ। ভারত্তা তংদু লৈতাবা সরকার অমা লৈ। ভারত্তা মেক ইন ইন্দিয়া অসি লেপ্তনা চত্থরি। ভারতকী মেক ইন ইন্দিয়া খোঙথাংবু হেন্না খুমাং চাউশিলহন্নবা পোলিসী এপ্রোচ লৈ। মরম অদুনা, সেক্তর খুদিংগী মায় পাকপগী ফিভম অমা লৈরবনি। ভারত্তা মপুং ফানা দিজাইন তৌদুনা শাবা অহানবা বোইং অমগীদমক্তা য়াম্না ঙাইবগী মথৌ তাররোই হায়না ঐহাক্না খল্লি। অমুক্তা তাবীয়ুকো, ভারত্তা মপুং ওইনা দিজাইন তৌবা অমসুং শাবা বোইং এয়রক্রাফ! ভারতকী মিৎয়েং শানবা অমসুং অদোমগী থাজবা – অনি অসিনা মপাঙ্গল লৈবা পার্ত্নরশিপ অমা ওইরক্কনি হায়না ঐহাক্না চেৎনা থাজবা থম্মি। মসিগুম্বা অনৌবা ফেসিলিতী অসিগীদমক্তা ঐহাক্না পুম্নমকপু অমুক্কা হন্না থাগৎচরি। অদুগা অখন্নবা ৱাফম অমনা, অদোম্না দিব্যাং ইচিল ইনাওশিংগীদমক্তা পাংথোক্লিবা থবকশিংবুসু ঐহাক্না য়াম্না থাগৎচরি। ঐহাক্না উন্নখিবা মীওই অমসুং মখোয়না ঐহাক্কী ইফমদা ৱারী শাবগী মতৌদা ঐহাক্না করিগুম্বা এরেঞ্জমেন্ত অমখক উদে, মসিদা থৱাই য়াওবগী ইথিল অমা ফাওই। বোইং তীমগী খোঙফম চেৎলিবা মতৌ অসি য়াওদ্রগদি, হায়রিবা থৱাই য়াওবগী মতৌ অসি উবা ঙম্লোই। অদুনা, ঐহাক্না বোইং তীম্বু মসিগীদমক্তা অখন্ননা থাগৎচরি। পুম্নমকপু অমুক্কা হন্না থাগৎচরি।
