অসামগী রাজ্যপাল শ্রী গুলাব চান্দ কদারিয়াজী, মুখ্য মন্ত্রী, শ্রী হেমন্তা বিসৱা শর্ম, কেন্দ্রগী মন্ত্রী-মন্দলদা লৈরিবা ঐগী মরুপশিং, লৈবাক্কী হকশেল মন্ত্রী মনসুখ মন্দাবিয়া, দা. ভারতি পাৱর, অসামগী মন্ত্রী কেশব মহন্তাজী, মেদিকেলগী লমদগী মফম অসিদা তিল্লিবা মশক নাইবা মীওইশিং, অতোপ্পা দিগনিতীশিং, তোঙান-তোঙানবা মফমশিংদগী ভিদিও কনফরেন্সকী খুত্থাংদা শরুক য়ারিবা দিগনিতী পুম্নমক, অসামগী ইচিল-ইনাওশিং।
মা কামাখ্যার, এ পোবিত্রো ভুমীর পোরা ওহোমোর হোমুহ, ভাত্রি ভাঙগ্নিলোই, মোর প্রোনাম, ময়াম পুম্নমকপু রোঙ্গালী বীহুগী য়াইফ পাউজেল পীজরি। য়াইফরবা থৌরম অসিদা অসামদা লৈরিবা অৱাং নোংপোক্কী হেল্থ ইনফ্রাস্ত্রকচরনা ঙসি অনৌবা শক্তি অমা ফংখি। ঙসি অৱাং নোংপোক্না মাগী অহানবা এম্স ফংলে। অমসুং অসামদা অনৌবা মেদিকেল কোলেজ ৩ ফংলে। আই.আই.তি. গুৱাহাতিগা লোয়ননা খুৎশম্নদুনা ফমুং ৫০০ থাবা সুপর স্পেসিএলিতী হোস্পিতাল ফোর মোদর্ন রিসর্চকী উরেপ-উয়ুং তমখি। অমসুং আয়ুশ্মান কার্দশিং অসামগী মরুপ লাখ কয়াদা মিসন মোদতা পীখি। অসাম খক্তা নত্তনা অরুনাচল প্রদেশ, নাগালেন্দ, মেঘালয়, মিজোরাম অমসুং মনিপুরদগী মরুপশিংনা অনৌবা এম্সতগী কান্নবা ফংলগনি। হকশেলগী প্রোজেক্তশিং অসিগগীদমক অৱাং নোংপোক্কী ইচিল-ইনাও পুম্নমক্তা নুংঙাইবা ফোঙদোকচরি।
ইচিল-ইনাও,
হৌখিবা চহি ৯দা অৱাং নোংপোক্তা ইনফ্রাস্ত্রকচরগা মরী লৈনবা কন্নেক্তিবিতীগী মরমদা ৱা কয়া শান্নরি। ঙসি অৱাং নোংপোক্তা লাকপা মীওই খুদিংমক্না লম্বী, রেল অমসুং এয়রপোর্তশিংগা মরী লৈনবা থবকশিং উবদা থাগৎতনা তোক্লোই। অদুবু অৱাং নোংপোক্তা অতোপ্পা ইনফ্রাস্ত্রকচরগী থবক অমসু য়াম্না খোঙজেল য়াংনা পাইখৎলি, অমসুং মসি সোসিএল ইনফ্রাস্ত্রকচরনি। মরুপশিং, এজুকেসন অমসুং হেল্থ ফেসিলিতীশিং অমুক্তা ওইখিদ্রিবা মওংদা শেমগৎ-শাগৎলি। মমাং চহিদা দিব্রুগরদা লাকপা মতমদা ঐহাক্না অসামগী জিলা কয়া মরুমদা অমুক্তংদা হোস্পিতাল কয়ামরুমগী উরেপ-উয়ুং তমখি অমসুং শঙ্গাখি। ঙসি ঐহাক্না এম্স অমসুং মেদিকেল কোলেজ ৩ খুৎশিন্নবগী খুদোংচাবা ফংজখি। চহি কয়া অসিদা অসামদা দেন্তেল কোলেজকী ফেসিলিতীসু চাউথোকহনখি। পুম্নমক অসিনা অৱাং নোংপোক্তা রেল-রোদ কন্নেক্তিবিতী চাউখৎহনবদা মতেং আংখি। মরু ওইনা নুপীশিংনা মীরোল্লিঙৈ মতমদা মায়োক্নবা অৱাবা কোকহনখি। মসিনা মমা অমসুং অঙাংগী পুন্সিদা খুদোংথিবা চাউনা হন্থহনখি।
হৌজিক মতমদা ঐহাক্না অৱাং, খা অমসুং অৱাং নোংপোক, লৈবাক্কী মফম অমা হেক্তদা চৎপদা অনৌবা লাইনা উবা ফংলি। হৌখিবা চহি ৯দা ঐহাক্না চাউখৎ-থৌরাংগী মরমদা খন্নবা মতমদা মীওই খরনা চাউনীংখি। দিকেদ কয়া লৈবাক অসিদা মখোয়না শাসন তৌখি অদুগা মখোয়না করিগীদমক মনা ফংদ্রিবনো হায়খি? মনা ফংবা পাম্বা মীওইশিংনা লৈবাক অসিদা চাউনা অমাংবা থোকহনখি। মমাংদা লৈরম্বশিংনা মনা ফংবা পাম্বনা অৱাং নোংপোক্কা লপথোক্নখি। ঐখোয়না শেবাগী ৱাখল্লোনগা লোয়ননা থবক তৌখি মরম অসিনা অৱাং নোংপোক্তা লাপ্নবগী ৱাখল লৈহন্দে।
অৱাং নোংপোক্কী মীয়ামনা মখোয় মশানা চাউখৎ-থৌরাংগী লম্বীদা চংশিল্লিবা অসিদা ঐহাক্না নুংঙাইবা পোকই। অৱাং নোংপোক্কী চাউখৎ-থৌরাংগা লোয়ননা ভারতকী চাউখৎ-থৌরাংঈ মন্ত্রগা মাংদা চংশিল্লি। চাউখৎ-থৌরাংগী অনৌবা ইহৌ আসিদা কেন্দ্র সরকারনা মরুপ ওইনা, মনাই ওইনা, খোংলোই ওইনা রাজ্য পুম্নমক্কা থবক তৌরি। ঙসিগী থৌরম অসি মসিগী শং-শং উরিবা খুদম অমনি।
মরুপশিং,
দিকেদ কয়া অসিদা ঐখোয়গী অৱাং নোংপোক্না শীংনবা কয়া মায়োক্নখি। নেপোতিজম, রিজনেলিজম, করেপ্সন অমসুং তংদু লৈতাদবনা সেক্তর অমদা খুদুম চনবগী রাজনিতী লৈরবা মতমদা চাউখৎ-থৌরাং পাইখৎপা ওইথোক্তে। অমসুং মসিমক ঐখোয়গী হেল্থকিয়র সিস্তেমদা থোকখি। দিল্লীদা লৈরিবা এম্স অসি ৫০গী মতমদা শারমখিবনি। লৈবাক্কী কাচিন কোয়া খুদিংমক্তগী মীয়াম্না দিল্লীগী এম্সতা লায়েংনবা লাক্নখি। অদুবু দিকেদ কয়া কনাগুম্বা মীওই অমত্তনা লৈবাক্কী অতোপ্পা মফমশিংদসধ এম্স হাংলক্কনি খল্লুদে। অতলজীনা সরকার পাইবা মতমদা মহাক্না মসি অহানবা ওইনা হৌদোক্লমখি। মহাক্কী সরকার লোইখ্রবা মতুংদা পুম্নমক লেপখি। হাংদোকখ্রবা এম্সতা ফাওবা ফীভম শোক্না লৈরমখি। ২০১৪গী মতুংদা ঐখোয়না খুদোংচাবা পুম্নমক কোকহনখি। ঐখোয়না মমাং চহিদা অনৌবা এম্স ১৫ শাবগী ধবক হৌখি। ফেসিলিতীশিং অসিদা লায়েংনবা অমসুং মহৈ তম্নবা খুদোংচাবশিং লৈখি। ঐখোয়গী সরকারনা লৌখিবা ফীরেপকী এম্স গুৱাহাতি অসি খুদম অমনি। অসামগী মীয়ামগী মীনুংশিনা ঐহাকপু মফম অসিদা হঞ্জিন-হঞ্জিন চীংশিনবীরি। নখোয়গী মীনুংশিংনা উরেপ উয়ুং তম্নবা অমসুং শঙ্গানবা ঐহাকপু মফম অসিদা লাকহল্লি।
মরুপশিং,
মমাংগী সরকারগী পোলিসীশিংনা মরম ওইদুনা দোক্তর অমসুং অতোপ্পা মেদিকেল প্রোফেস্নেলশিংগী অৱাৎপা চাউনা লৈখি। অৱাৎপা অসিনা ভারতকী ক্বালিতী হেল্থ সর্ভিসেসকী মাংদা অচৌবা পল অমা ওইখি। মরম অসিনা হৌখিবা চহি ৯দা ঐখোয়গী সরকারনা মেদিকেল ইনফ্রাস্ত্রকচর অমসুং মেদিকেল প্রোফেস্নেলশিং চাউনা হেনগৎহন্নবা থবক তৌখি। ২০১৪গী মমাং চহি ১০ অসিদা মেদিকেল কোলেজ ১৫০ রোম শাখি। হৌখিবা চহি ৯দা ঐখোয়গী সরকারনা অনৌবা মেদিকেল কোলেজ ৩০০রোম শাখি। হৌখিবা চহি ৯দা লৈবাক অসিদা এম.বি.বি.এস.কী সীৎ শরুক অসি হেনগৎহনখি। হৌখিবা চহি ৯দা লৈবাক্কী মেদিকেলগী পি.জি.সীৎশিংগী মশিং চাদা ১১০ হেনগৎহনখি। ঐখোয়না মেদিকেল এজুকেসন পাকথোক চাউথোক্নবা নেস্নেল মেদিকেল কম্মিসন লিংখৎখি। ঐখোয়না শোত্থরবা ইমুংগী অঙাংশিংনা দোক্তর ওইবগী খুদোংচাবা ফংনবা রিজর্বেসন থমখি। মনুং হঞ্জিনবা মফমশিংদা লৈবা অঙাংশিংনা দোক্তর ওইবা ফংলে। চহি অসিগী বজেৎতা নর্জিং কোলেজ ১৫০ হেন্না শানবা লাউথোকখি। অৱাং নোংপোক্কী মতমদা ঙাংবা তারবদি মেদিকেল কোলেজশীং অসি হৌখিবা চহি ৯দা শরুক অনি হেনগৎহনখি। হৌজিক মেদিকেল কোলেজ কয়া শারি।
ইচিল-ইনাওশিং,
ঙসি ঐখোয়না ভারতকী হেল্থ সেক্তরদা থবক কয়া তৌরি মরমদি ইরৈবাকচাশিংনা ২০১৪দা তংদু লৈতাবা অমসুং মপাঙ্গল কনবা সরকার অমা শেমখি। বি.জে.পি. সরকারগী পোলিসী, অপাম্বা অমসুং পুকচেল শেংবা মতৌ অসি ওইজবা থীবা নত্তে, ঐখোয়গী পোলিসীশিং অসি লৈবাক্কী, ইরৈবাকচাশিংগী অপাম্বগী মতুং ইন্না লেপখি। মরম অসিনা ঐখোয়না ভোৎ বেঙ্ককী মহুৎ লৈবাক্কী মীয়ামগী অৱাবদনা হেন্না মীৎয়েং চংখি।
মরুপশিং,
লায়েংনবগীদমক শেল লৈতবগী লায়রবশিংনা কয়া ৱাবগে ঐহাক্না খঙই। মরম অসিনা ঐখোয়গী সরকারনা আয়ুশ্মান য়োজনা হৌদোকখি মসিনা লুপা লাখ ৫ ফাওবগী লেম্না লায়েং ফংহনখি। ঐহাক্না খঙই লায়রবা অমসুং মিদল ক্লাসকী মীওইশিংনা অতাংবা হীদাক্কীদমক খনবদা অৱাবা ওই। মরম অসিনা ঐখোয়গী সরকানা হীদাক-লাংথকশিং অহোঙবা মমলদা ফংহন্নবা জন ঔশাধি কেন্দ্র ৯০০০ হেন্না হাংদোক্লে। স্তেন্তশিং অমসুং নি ইমপ্লান্তকী মমল য়াম্না হন্থরে অমসুং জিলা খুদিংমক্তা লেম্না দাইলাইসিস পাংথোক্নবা সেন্তরশিং লৈরে। ৱেলনেস সেন্তর লাখ ১.৫ হেনবনা ঙল্লিঙৈদা লাই ওং খঙদোক্নবা মরুওইবা তেস্তশিংগী খুদোংচাবা ফংহল্লে। প্রধান মন্ত্রী তি.বি মুক্তা অভিয়ান্না লায়রবশিং অমসুং লৈবাক অসিগী মরুওইবা মেদিকেলগী শিংনবা অমা কোকহল্লে। লু-নান্না লৈবা, য়োগা অমসুং অয়ুর্বেদানা হকচাং ফনা লৈবা অমসুং লায়নাশিং নাদ্রিঙৈদা ঙাকথোকপা হেনগৎহল্লে।
মরুপশিং,
ঙসি ঐখোয়না সরকারগী স্কিমশিং অসিগী মাইপাকপা উবা মতমদা ঐহাক্না ইশাবু ঈশ্বর অমদি মীয়াম্না থৌজাল পীবীদুনা লায়রবগী শেবা তৌবা ফংজরে হায়না ফাওই। আয়ুশ্মান ভারত-প্রধান মন্ত্রী জন আরোগ্য য়োজনান ঙসি লৈবাক্কী লায়রবা মীওই করোর কয়াগী অচৌবা সপ্পোর্ত তৌরি। হৌখিবা চহি খর অসিদা আয়ুশ্মান ভারত স্কিমনা লুপা করোর ৮০,০০০ চাদিং তৌদুনা লায়রবশিং কনবা ঙমখি। জন ঔশাধি কেন্দ্রশিংনা মরম ওইদুনা লায়রবা অমসুং মিদল ক্লাসকী মীওইশিংনা লুপা করোর ২০,০০০ তুংশিনবা ঙমজখি। স্তেন্ত অমসুং নী ইমপ্লান্তশিংদা চংবা শেল হন্থরকপনা মরম ওইদুনা লায়রবা অমসুং মিদল ক্লাসকী মীওইশিংনা চহি খুদিংগী লুপা করোর ১৩,০০০ তুংশিনবা ঙমখি। লেম্না দাইলাসিস তৌবগী খুদোংচাবা ফংবগা লোয়ননা লায়রবা কীদনী পেসেন্তশিংনা লুপা করোর ৫০০ হেন্না চাদিং তৌগদবদগী কনবা ঙমখি। ঙসি আয়ুশ্মান ভারত কার্দশিং অসামগী মীওই করোর অমা হেনবদা পীখি। অসামগী মীয়াম্না কেম্পেন অসিদগী কান্নবা ফংজরে।
মরুপশিং,
লৈবাক্কী কাচিন-কোয়াদা ঐখোয়গী সরকারগী স্কিমশিংগী বেনিফিসরীশিংগা উনবা ফংখি। মসিদা ঐখোয়গী ইমা অমসুং ইচে-ইচলশিং, ইচানুপা-নুপীশিংনা শরুক য়াখি। মখোয়না হায়খি মমাংগী সরকারশিং অমসুং হৌজিক পাল্লিবা সরকারগী মতমদা লৈরিবা হেল্থ ফেসিলিতীশিংগী চাউনা খেন্নবা লৈরে। অদোম অমসুং ঐহাক্না খঙই মদুদি হকশেল অমসুং লায়েংগী মতাংদা লাকপা মতমদা ঐখোয়গী নুপীশিং অসি অয়াম্বনা শোত্থনা লৈ। ঐখোয়গী ইমা-ইচেশিংনা মখোয়গী লায়েংগীদমক শেল চাদিং তৌদুনা ইমুংগী মীদা অৱাবা পীবা পামখিদে। লৈবাক্কী নুপী করোর কয়াগী হকশেল অসি রিসোর্স লৈতবা অমসুং শেলগী অৱাৎপা লৈবনা মরম ওইদুনা চৈথেং পীখি।
ঐখোবগী বি.জে.পি.না লমজিংবা সরকারনা হৌদোকখিবা স্কিমশিংদগী ঐখোয়গী ইমা অমদি ইচলশিংনা নুপীগী হকশেলদা চাউনা কান্নবা পীখি। স্বচ্ছ ভারত অভিয়ানগী মখাদা তোইলেৎ করোর কয়া শাদুনা নুপীশিংবু লায়না কয়াদগী কনবা ঙমখি। উজ্জ্বলা স্কিমগী মখাদা গ্যাস কন্নেক্সন পীদুনা নুপীশিংবু মৈখুদগী কোকহনখি। নুপী করোর কয়ানা জল জীবন মিসনগী মখাদা য়ুমথোং খুদিংমক্তা ঈশিং ফংহনজদুনা ঈশিংনা থোকহনবা লাইনাশিংদগী কনবা ঙমখি। মিসন ইন্দ্রধনুশনা লেম্না তীকা থাদোক্তুনা তমথীবা লাইনাশিংদগী নুপী করোর কয়া কনবা ঙমখি। আয়ুশ্মান ভারত য়োজনানা নুপীশিংদা লুপা লাখ ৫ ফাওবগী লেম্না লায়েং ফংহনখি। প্রধান মন্ত্রী মাত্রু ভন্দনা য়োজনানা মীরোনবী নুপীশিংদা শেলগী মতেং পীখি। রাস্ত্রিয় পোশন অভিয়ান্না নুপীশিংদা মচি ওইবা চীঞ্জাক পীদুনা মতেং পাংখি।
মরুপশিং,
২১শুবা চহিচাগী দরকার ওইবশিংগী মতুংইন্না ঐখোয়গী সরকারনা ভারতকী হকশেলগী থবকশিং মতমগা চুনবা মওংদা শেমগৎলে। অয়ুস্মান ভারত দিজিতেল হেল্থ মিসন অমসুং দিজিতেল হেল্থ আই.দিনা ক্লিক অমদা মীয়ামগী হকশেলগী রেকোর্দশিং শেম্লগনি অমসুং হোস্পিতালগী থবকশিং ফগৎলগনি। হৌজিক ফাওবদা হেল্থ আই.দি করোর ৩৮ শেমখ্রে অমসুং হকশেলগী খুদোংচাবা ফংবা মফম লাখ ২ হেন্না অমসুং হকশেলগী লমদা থবক তৌরিবা মীওই লাখ ১.৫ হেন্না ভেরিফাইদ তৌরে। ই-সঞ্জিবানি পাম্না হেনগৎলক্তুনা স্কিম অসিগী মখাদা ই-কন্সলতেসন করোর ১০ হেন্না পাংথোকখ্রে।
ইচিল-ইনাওশিং,
ভারতকী অনা-লায়য়েংগী থবক্তা অহোঙবা পুরকপগী খ্বাইদগী চাউবা মরমদি সবকা প্রয়াস(মীওই খুদিংমক্কী হোৎনবা)নি। কোরোনাভাইরসকী লাইচৎ মনুংদা সবকা প্রায়াসকী থৌনাগা লোয়ন্না লাইচৎ থেংনখি অমসুং মালেমদা খ্বাইদগী থুবা,চাউবা অমসুং মপুংফাবা কোবিদ তিকা থাবগী খোঙজং অদুগীদমক মালেম শীনবা থুংনা থাগৎনখি। লৈবাক অসিগী খ্বাইদগী মনুং হুঞ্জিবা মফমশিং ফাওবদা অতেনবা মতমগী মনুংদা অসা ৱার্করশিং, অঙ্গনৱাদি ৱার্করশিং, প্রাইমারি হেল্থ কিয়ার ৱার্করশিং অমসুং ফার্মাসিউতিকেল সেক্তরনা ভারতনা শাবা তিকাশিং ফংহনখি। সবকা প্রায়াস(মীওই খুদিংমক্কী হোৎনবা) অমসুং সবকা বিশ্বাস(মীওই খুদিংমক্কী থাজবা) লৈরবা মতমদা অসিগুম্বা অচৌবা থবক অসি মাইপাকপা ঙম্মী। সবকা প্রায়াসকী থৌনাগা লোয়ন্না মাঙলোমদা চঙশিন্নবা অমসুং মশা ফবা ভারত, নুংঙাই-য়াইফবা ভারতকী পান্দম অনৌবা থাকশিংদা পুখৎনবা মীয়াম্না মীয়ামদা হায়জরি। ঐহাক্না অমুক হন্না অসামগী মীয়ামদা এম্স অমসুং মেদিকেল কোলেজশিংগীদমক নুংঙাইবা ফোঙদোকচরি। ঐহাকপু থৌজাল পীবীনবা মশিং য়াম্না লাকখিবা মীওইশিংদা ঐহাক্না থাগৎপা ফোঙদোকচরি। মসিগা লোয়ননা ঐহাক্কী ৱারোল লোইশিনজরি।
