সিবামোগা এয়রপোর্ত শঙ্গাখ্রে
রেলৱে প্রোজেক্ত অনি অমদি লম্বী শেম্বগী প্রোজেক্ত কয়া উরেপ উয়ুং তমখ্রেমল্তি-ভিলেজ স্কিমশিং শঙ্গাখ্রে অমদি উরেপ উয়ুং তমখ্রেস্মার্ত সিতী প্রোজেক্ত ৪৪ শঙ্গাখ্রে"মসি শুপ্নতগী এয়রপোর্ত অমখক নত্তে নহারোলশিংগী মঙলানশিংগী খোঙহৌফম ওইগদৌরিবা কেম্পেন অমনি""কর্নাতকাগী চাওখৎ লম্বী রেলৱে, রোদৱে, এয়রৱে অমদি আইৱেশিংনা শেম্বনি""সিবামোগাগী এয়রপোর্ত অসি ভারত্তা নোংথক্কী লম্বীদা চৎনিংবগী লাংতক্নবা খ্বায়দগী ৱাংলিবা মতম অমদা শঙ্গারি""ঙসিগী এয়র ইন্দিয়া মায় পাকপগী অনৌবা পন্দোল কয়া লান্না পাইরিবা অনৌবা ভারতকী মতিক অমা ওইনা শকখঙনরি"অফবা লম্বী থোংগা লোয়ননা ইনফ্রাস্ত্রকচরনা লমদম পুম্বসিদা থবক পীননবগী অনৌবা খুদোংচাবশিং শেমগৎলক্কনি""দবল ইঞ্জিন লৈঙাক অসি খুঙ্গং, লায়রবা, ঐখোয়গী ইমা অমদি ইচে ইচলশিংগীদমক্তনি"কর্নাতকা দা,
এল্লা সহোদরা সহোদরীয়ারিগে, নন্না নমস্কারাগলু!
সিরিগন্নদম গেলগে, সিরিগন্নদম বালগে
জয় ভারত জননীয় তনুজাতে!
জয়া হে কর্নাতকা মাতে!
এক ভারত শ্রেস্থ ভারতকীদমক কত্থোকখিবা রাস্ত্রকবি কুবেম্পুগী লমদম অসিবু ঐহাক্না ইকাই খুম্নবা উৎচরি। ঙসি ঐহাক্না কর্নাতকাগী চাউখৎ-থৌরাংগা মরী লৈনবা লুপা করোর লিশিং কয়াগী প্রোজেক্তশিং শঙ্গাবা অমসুং উরেপ-উয়ুং তম্বগী খুদোংচাবা অমুক হন্না ফংজখি।
এয়রপোর্ত লৈজরে। মতম শাংনা দিমান্দ তৌদুনা লাকপা অসি ঙসিদি থুংহনবা ঙম্লে। শিমোগ্গা এয়রপোর্ত অসি য়াম্না চাউনা, য়াম্না ফজনা শাখি। এয়রপোর্ত অসিদা কর্নাতকাগী ত্রেদিসন অমসুং তেক্নোলোজীগী অপুনবা শক্তম অমা উবা ফংখি। অমসুং মসি শুপ্নগী এয়রপোর্ত অমা ওইবতা নত্তনা লমদম অসিগী নহারোলশিংগী মঙলানশিংদা অনৌবা ইনোৎ অমা হাপ্নবা কেম্পেন অমসু ওইরি। ঙসি লম্বী অমদি রেলগা মরী লৈনবা প্রোজেক্ত কয়াগী উরেপ-উয়ুং তমখি। য়ুম খুদিংমক্তা তোতি ঈশিং ফংহন্নবা প্রোজেক্তসু পাইখৎপা হৌরি। চাউখৎ-থৌরাংগী অসিগুম্বা প্রোজেক্ত খুদিংমক্কীদমক ঐহাক্না শিমোগ্গা অমসুং অকোইবদা লৈরিবা মফমশিংগী মীয়ামদা নুংঙাইবা ফোঙদোকচরি।
মরুপশিং,
মঙসি অসি অতোপ্পা মরম অমগীদমক্তা য়াম্না অখন্নবা ওইরি। ঙসি কর্নাতকাগী মীয়াম্না য়ারবা লুচিংবা বি.এস. য়েদীয়ুরপ্পাজীগী মপোক নুমিৎসু তারি। মহাকপু পুন্সি নুংশাংনবা ঐহাক্না য়াইফ পাউজেল পীজরি। মহাক্না লায়রবা, লৌমীশিংগী য়াইফনবা মহাক্কী পুন্সি কত্থোকখি। কর্নাতকাগী বিধান সভাদা মমাংগী চয়োলদা য়েদীয়ুরপ্পানা পীখিবা ৱারোল অদু মীয়ামদা ইথিল পীনীংঙাই ওইখি। য়েদীয়ুরপ্পাজগী ৱারোল অসিনা ফনা মাইপাক্লবসু নোংলুকপা মতৌ ঙাক্না চৎকদবনি, ঐখোয়গী তুংগী মীরোলশিংগীদমক্তসু ঐখোয় পুম্নমক্তা মহাক্কী পুন্সিনা ইথিল পীগনি।
মরুপশিং,
নখোয় পুম্নমক্তা ঐহাক্না ৱাফম অমা হায়জনীংই, হায়য়ুরা? করিগুম্বা অদোমগী মোবাইল ফোন লৈরবদি মোবাইল ফোন অদু পুথোকপীয়ু অমসুং য়েদীয়ুরপ্পাজীবু ইকাই খুম্নবা উৎপা ওইনা ফ্লাশলাইৎ থানবীয়ু। য়াম্না নুংঙাইজরে। ইমা ভারতনা য়াইফরে। বি.জে.পি. সরকারগী মনুংদা কর্নাতকাগী চাউখৎ থৌরাংগী খোঙচৎ অসিদা ঐহাক্না য়েংলুবা মতমদা ঐহাক্না মসি খঙবা ঙম্মি: কর্নাতকা অভিবৃদ্ধিয়া সাদা, মেলে! ই স্থাবু, প্রগতিয়া পথাদা মেলে।
হৌজিক চহি খরা অসিদা কর্নাতকানা গ্রোথ লৈনা চাউখৎ-থৌরাং পুরকখি। মসিগী গ্রোথ অসি চাউখৎপগী লম্বেলদা চংশিল্লি। মসি প্রগতি পথ, রেলৱেজ, রোদৱেজ, এয়রৱেজ অমসুং আইৱেজ হায়বদি দিজিতেল কন্নেক্তিবিতীগীনি।
মরুপশিং,
ঐখোয় পুম্নমক্না মদুদি গারী নত্ত্রগা সরকার ওইরবসু দবল ইঞ্জিন শীজিন্নরবা মতমদা মাগী খোঙজেল শরুক কয়া হেনগৎলকই। কর্নাতকাগী চাউখৎপগী খোঙজেল অসি দবল ইঞ্জিন্না চল্লাইরি অদুবু মসি হেন্না খোঙজেল য়াংলি। বি.জে.পি.গী দবল ইঞ্জিন সরকারনা অচৌবা অহোংবা অমা পুরকখি। মমাংদা কর্নাতকাগী চাউখৎ থৌরাংগীদমক খন্নবা মতমদা মসি অচৌবা সহরশিংগী মতাংদা খক্তা ওইরমখি। অদুবু দবল ইঞ্জিন সরকারনা খুঙ্গংশিংদা, কর্নাতকাগী তায়র-২ অমসুং তায়র-৩গী সহরশিংদা চাউখৎ-থৌরাং য়ৌহন্নবা লেপ্পা লৈতনা হোৎনরি। শিমোগ্গাগী চাউখৎ-থৌরাং অসি মসিগী ৱাখল্লোন অসিগী ফলনি।
ইচিল-ইনাওশিং,
অমদা শঙ্গারি। হন্দক্তা এয়র ইন্দিয়ানা মালেমগী খ্বায়দগী চাউবা পেসেঞ্জর এয়রক্রাফ্ত লৈনবা দীল লোইশিনখ্রে। ২০১৪গী মমাঙদা কংগ্রেসকী লৈঙাক মতমদা, এয়র ইন্দিয়া অসি অফবা অমা ওইনা লৌনরমদে অমদি মসিবু মতম পুম্বদা স্কাম অমদি শেল মাঙবা বিজিনেস মোদেল অমা ওইনা লৌনরম্মী। ঙসিগী এয়র ইন্দিয়াগী মতাঙদা পল্লদুনা, প্রধান মন্ত্রীনা ঙসিদি মসিবু মায় পাকপগী পন্দোল কয়া লান্না পাইদুনা চৎলিবা অনৌবা ভারতকী মতিক অমা ওইনা খঙনরি
ভারতকী এভিএসন মার্কেৎ অসি মালেম শিনবা থুংনা ঙসিদি শন্দোক্লি। লাক্কদৌরিবা মতম খরসিদা লৈবাকসিদা এয়রক্রাফ্ত লিশিং কয়া মথৌ তারক্কদৌরি অমদি নহা লিশিং কয়াগী মথৌসু তারক্কদৌরি । ঙসি ঐখোয়না এয়রক্রাফ্তশিং অসি মপান্দগী পুশিল্লক্লবসু, ভারত্তা শাজবা পেসেঞ্জর এরোপ্লেনশিংদা লৈবাকসিগী মীয়াম্না তোংবা ফংলক্কদবা মতমদু কুইদ্রে। এভিএসন সেক্তরদা থবক্কী খুদোংচাবা কয়া পীরি।
মরুপশিং,
ভারত্তা এয়র ত্রেবেল পাকথোক চাউথোক্লিবা অসি বি.জে.পি. লৈঙাক্কী পোলিসি অমসুং ৱারেপশিংননি। ২০১৪গী মমাংদা লৈবাক্কী অচৌবা সহরশিংদা খক্তা এয়রপোর্তশিং শানবা মীৎয়েং চংলমখি। কোংগ্রেসকী ৱাখল্লোন্দা অপীকপা সহরশিং এয়র কন্নেক্তিবিতীনা ফাওনহনগদবনি হায়না খনখিদে। ঐখোয়না ফীভম অসিদা অহোংবা পুরক্নবা ৱারেপ লৌখি। ২০১৪ ফাওবদা, লৈবাকসিনা নীং তম্লকপা মতুংগী অহানবগী দেকেদ ৭ অসিদা এয়রপোর্ত ৭৪ লৈরম্মী অদুগা হৌখিবা চহি ৯সিদা এয়রপোর্ত ৭৪ অমা হাপচিন্দুনা অপীকপা ময়োল্লমশিংসু শম্নহল্লে। লৈবাক অসিগী অপীকপা সহরশিংদা মশাগী মতমগা চুনবা এয়রপোর্তশিং লৈরে। বি.জে.পি লৈঙাক্না লায়রবগীদমক থবক তৌখি। হৱাই চপ্পল তোংবা মীচম মীয়ামসু হৱাই জহাজ তোংবা ঙমহনগদবনি হায়বা মহাক্কী মঙলান মঙফাওনহন্নবা অতাবা মমলগী নোংথক্কী খোঙচৎ ফংহন্নবা উরান স্কিম হৌদোকখি। মসি শিমোগ্গা এয়রপোর্তনা ঙসি উবা ফংলি।
মরুপশিং,
অনৌবা এয়রপোর্ত অসিনা মহৌশা, নাৎ অমদি লৌউ-শিংউগী মফম ওইরিবা সিবামোগাদা চাওখৎপগী অনৌবা থোঙ কয়া হাংদোরক্কদৌরি। সিবমোগ্গা অসি ৱেস্তর্ন ঘাৎ অমদি অশং অমানগী মকোল, ৱাইল্দলাইফ সেংচুএরীশিং, তুরেলশিং, মমিং চৎলবা জোগ ঈশিংচাইবী অমদি এলিফেন্ত কেম্প, সিম্হা ধামূগী নোংশাগী সফারী অমদি অগুম্বেগী চীংশিং পরেংগীদমক মমিং চৎলিবা মলেনাদু রীজনগী থোঙজিন্নি। গঙ্গাদা ইরুপত্রিবা অমদি তুঙ্গভদ্র তুরেলগী ঈশিং থকত্রিবা মীওই অদুদি মপুন্সি অদু মপুং ফাদ্রিবনি।
মরুপশিং,
ঐখোয়না নাৎকী মরমদা ৱারী শাবা মতমদা শিবমোগ্গাগী কোইথুম্নরবা ঈশিংনা রাস্ত্রকবি কুবেম্পুগী ৱাহৈশিং হেন্না খোইথুম্নহনখি। মালেমগী সংস্কৃত খুঙ্গং মত্তুর জিলা অসিদা লৈ। অমসুং মসি মফম অসিদগী পংলাপ লাপতে। দেবি সিগনদুরু চৌদেশ্বারি, শ্রিকোতে অঞ্জানেয়া, শ্রী শ্রীধারা স্বামীজীগী আশ্রম অসিগুম্বা লাইফমশং অসি শিবমোগ্গাদা লৈ। শিবমোগ্গাগী ইসুরু খুঙ্গং, ব্রিতিশকী মায়োক্তা খোন্থাং য়ৈখিবা স্লোগান “য়েসুরু বিত্তরু-ইসুরু বিদেবু”না ঐখোয় পুম্নমক্তা ইথিল পীখি।
ইচিল-ইনাওশিং,
মহৌশা অমসুং নাৎকী মথক্তা শিবমোগ্গাগী লৌউ-শিংউ অসিসু পাকচাউই। মসি লৈবাক্কী খ্বাইদগী লৈহাও চেনবা মফম অমনি। চা, ক্বামরু, মরু মরাংদগী উহৈ অমদি মনা মশিং মখল কয়ামরুম ঐখোয়গী শিবমোগ্গাদা ফংই। শিবমোগ্গাগী মহৌশা, নাৎ অমসুং লৌউ-শিংউ অসি চাউখৎহন্নবা য়াম্না মথৌ তাই। কন্নেক্তিবিতী, অফবা কন্নেক্তিবিতীগীদমক মথৌ তাই। দবল ইঞ্জিন সরকারনা মসিগী মথৌ তাবা অসি থুংহল্লি।
এয়রপোর্ত শাবগা লোয়ননা মফম অসিগী মীয়ামদা কান্নবা পীবা খক্তা নত্তনা ভারত অমসুং মপানদগী লাকপা লমকোইবশিংনা মফম অসিদা লাকপদা খুদোংচাহল্লগনি। লমকোইবশিংনা লাকপা মতমদা মখোয়গা লোয়ননা দোলর অমদি পাউন্দ কয়া লোইনরক্কনি অমসুং নাকল অমরোমদা মসিনা থবক্কী খুদোংচাবশিং পীগনি। খুদোংচাবা অমদি তুরিজমগী মথক্তা রেল কন্নেক্তিবিতী ফগৎলবা মতমদা লৌমীশিংনা ফাওবা অনৌবা মার্কেৎ ফংবা ঙমগনি। লৌমীশিংনা অতাবা মমলদা লৈবাক শিনবা থুংবদা মখোয়গী মহৈ-মরোং ফংহনবা ঙমগনি।
মরুপশিং,
সিবামোগ্গা – সিকারিপুর – রনেবেন্নুর নিউ লাইন অসি লোইশিল্লক্লবা মতমদা শিবমোগ্গাগী মথক্তা হবেরি অমদি দেবাঙ্গেরে দিস্ত্রিক্তশিংদসু কান্নবা পীগনি। মরু ওইনা লম্বী পরিং অসিদা লম্বী লান্থোক লানশিন অমত্তা লৈহন্দবনা রেল লম্বী অসি শাফবা ওইহন্দুনা খোঙজেল য়াঙবা ত্রেনশিং অপনবা লৈতনা চেলহনগনি। ঙাইহাকখক্তমক খাম্ফমগী স্তেসন ওইরম্বা কাতাগঙ্গুর স্তেসনগী কেপাসিতী অনৌবা কোচিং তর্মিনেল অমা শাগৎলবা মতুংদা হেনগৎলগনি। মফম অসিদা হৌজিক রেলৱে লম্বী ৪, প্লেৎফোর্ম ৩ অমদি রেলৱে কোচিং দিপো অমা শেমগৎলি। মসিগা লোয়ননা অনৌবা ত্রেনশিংনা মফম অসিদগী লাইবক্কী অতোপ্পা মফমশিংদা চেল্লগনি। এয়র অমদি রেল ত্রান্সপোর্তকী মথক্তা লম্বীশিং অসি ফগৎহল্লবা মতমদা নহারোলশিংদা হেন্না কান্নবা পীগনি। সিবামোগ্গা অসি লমদম অসিগী মহৈ মশিংগী মকোন অমনি, কন্নেক্তিবিতী হেনগৎহনগদৌরিবা অসিনা মনাক নকপা মফমশিংদগী মহৈরোয়শিংবু সিবামোগাদা লাকপদা লায়হল্লগনি। মসিনা লমদম অসিদা বিজিনেস অমদি ইন্দস্ত্রীগী অনৌবা থোঙ কয়া হাংদোক্লগনি। অফবা কন্নেক্তিবিতীগা লোয়নবা ইনফ্রাস্ত্রকচরনা লমদম পুম্বসিদা থবক পীনবগী অনৌবা খুদোংচাবশিং শেমগৎলক্কদৌরিবনি।
ইচিল-ইনাওশিং,
ঙসি শিবমোগ্গা অমসুং লমদম অসিগী ইমা অমদি ইচেইচলশিংগীদমক পুন্সি নুংঙাইহন্নবা অচৌবা কেম্পেন অমা পাইখৎলি। কেম্পেন অসি য়ুম খুদিংমক্তা তোতি ঈশিং পীনবনি। সিবমোগ্গাদা ইমুং লাখ ৩ লৈ। জল জীবন মিসন হৌদ্রিঙৈ মমাংদা শুপ্নতগী ইমুং লিশিং ৯০ খক্তনা তোতিগী ঈশিং ফংলম্মি। হৌজিক্তি দবল ইঞ্জিন লৈঙাক অসিনা ইমুং লাখ ১.৫দা তোতিগী ঈশিং ফংহল্লে অমদি পুম্নমক কোনশিন্নবা থবকশিং পায়খৎলি। হৌখিবা চহি ৩.৫দা ইমুং লাখ ৪০দা তোতিগী ঈশিং ফংহনখ্রে।
মরুপশিং,
বি.জে.পি. সরকার অসি খুঙ্গং, লাইরবা অমসুং লৌমীশিংগী সরকারনি। বি.জে.পি. সরকারনা লায়রবগী য়াইফনবা থবক তৌই। বি.জে.পি. সরকারনা ইমা অমদি ইচে-ইচলশিংদা মশানা মশাবু ইকাই খুম্নবা অমসুং শক্তি পীনবা অমসুং নুপীশিংদা খুদোংচাবশিং পীনবা লম্বীদা চংশিল্লি। মরম অসিনা ঐখোয়না ইচে-ইচলশিংনা মায়োক্নরিবা সমস্যা খুদিংমক কোকহন্নবা হোৎনখি। তোইলেৎ, চাকশঙগী গ্যাস কন্নেক্সন নত্ত্রগা তোতি ঈশিং ওইরবসু মসিগী অৱাৎপনা ঐখোয়গী ইচে-ইচলশিংদা খুদোংচাদবা থোকহল্লি। ঙসি ঐখোয়না সমস্যাশিং অসি কোকহল্লি। জল জীবন মিসনগা লোয়ননা দবল ইঞ্জিন সরকারনা য়ুম খুদিংমক্তা ঈশিং পীনবা খোঙথাংশিং লৌখৎলি।
মরুপশিং,
মতম অসি ভারতকী অমৃৎ কালনি, চাওখৎপা ভারত অমা শেম্নবগী মতম্নি হায়বা ৱাফমসি কর্নাতকাগী মীয়াম্না মমুৎ তানা খঙই। নীংতম্বা ভারতকী পুৱারীদা অসিগুম্বা খুদোংচাবা তাঞ্জাম অমা থোঙজিন্দা লেপ্লরিবা অমদি ভারতকী খোঞ্জেল মালেম পুম্বদা তারিবা অসি অহানবনি। মালেম পুম্বদগী ইনভেস্তরশিংনা ভারত্তা শেল থাদবা পাম্লি অমদি মসিনা কর্নাতকা অমদি মফমসিগী নহাশিংদা কান্নহল্লি। মরম অসিনা কর্নাতকানা দবল ইঞ্জিন সরকার হঞ্জিন-হঞ্জিন লাকহন্নবা খুদোংচাবশিং পীনবা ৱারেপ লৌখি।
ঐহাক্না থাজবা পীরি মদুদি কর্নাতকাগী চাউখৎ থৌরাংগী কেম্পেন অসি হৌজিক খোঙজেল য়াংহনগনি। ঐখোয়না পুন্না চৎমিন্নবা তাই। ঐখোয়না কর্নাতকাগী মীয়াম, শিবমোগ্গাগী মীয়ামগী মঙলানশিং থুংহন্নবা পুন্না মাঙদা চঙশিনমিন্নবা তাই। ঐহাক্না অমুক হন্না পুম্নমক্তা চাউখৎ-থৌরাংগী প্রোজেক্তশিং অসিগীদমক নুংঙাইবা ফোঙদোকচরি। পুম্নমক্তা ঐহাক্না য়াইফ মঙ্গোল পীজরি! ঐহাক্কা লোয়ননা হায়বীয়ু – ভারত মাতা কী জয়! ভারত মাতা কী জয়! ভারত মাতা কী জয়!
থাগৎচরি!
