মসি ভারতকী শীংথানীংঙাই ওইরবা স্পোর্তিং তেলেন্তপু পালন তৌবনি অমসুং লৈবাক শিনবা থুংবদগী শান্নরোয়শিংগী থৌনা অদু উৎলি: পি.এম.
ভারতকী হোলিস্তিক দিবেলপমেন্তগীদমক ঐখোয়না স্পোর্তস অসি মরু ওইবা দ্রাইবর অমা ওইনা লৌই: পি.এম.ঐখোয়গী শান্নরোয়শিংনা মখোয়গী তৌবা ঙম্বা অদু মপুং ফানা হেনগৎহন্নবা ঐখোয়না মখোয়গীদমক খুদোংচাবা হেন্না-হেন্না ফংহল্লি: পি.এম.ভারতনা 2036 ওলিম্পিক্সকী য়ুম্বু ওইনবা কন্না হোৎনরি: পি.এম.নেস্নেল গেম্স অসি শুপ্নগী স্পোর্তিং ইভেন্ত অমদগী হেল্লি, মসি ‘এক ভারত শ্রেস্থ ভারত’কী ৱাখল্লোন উৎনবা অচৌবা ফম্পাক অমনি, মসি ভারতকী ইনাক খুল্লবা দাইভর্সিতী অমসুং য়ুনিতীগী পালন তৌবনি: পি.এম.ভারত ইমানা য়াইফরে!
লাইরৈপাক উত্তরাখন্দগী গভর্নর গুর্মীত সিংহ জী, নহা ওইরিবা মুখ্য মন্ত্রী পুস্কর ধামি জী, ঐগী মন্ত্রী মন্দলগী খোঙবু অজয় তমতা জী, রক্সা খদসে জী, উত্তরাখন্দ এসেমব্লীগী স্কীকর রিতু খন্দুরি জী, শান্ন-খোৎনবগী মন্ত্রী রেখা অর্য়া জী, কম্মনৱেল্থ গেম্সকী প্রেসিদেন্ত খ্রিস জেনকিন জী, IOA গী প্রেসিদেন্ত পি.তি. উশা জী, MP মহেন্দ্র ভত জী, নেস্নেল গেম্স অসিদা শরুক য়াননবা লৈবাক পুম্বদগী লাকপিরিবা শান্নরোয়শিং, অমসুং অতৈ মীথুংশিং!
ঙসি, লাইরৈপাক অসি নহাশিংগী মতিক ময়াইনা হেন্না অশেংবা মফম ওইহল্লে। বাবা কেদরনাথ, বদ্রিনাথ জী, ইমা গঙ্গাগী থৌজালগা লোয়ননা নেস্নেল গেম্স অসি ঙসি হৌদোক্লি। হন্দক অসি উত্তরাখন্দ শেমখিবা চহি ২৫ মপুং ফারকপনি। নহা ওইরিবা স্তেত অসিদা লৈবাক্কী কাচিন কোয়া শিন থুংবদগী নহা লিশিং কয়ানা মখোয়গী মতিং ফুদোক্নগদৌরি। এক ভারত-শ্রেস্থ ভারতকী ফজরবা শক্তম অমা মফমসিদা উবা ফংলি। হন্দকসু নেস্নেল গেম্সতা ইন্দিজিনস মশান্না কয়া য়াওরি। হন্দক্কী নেস্নেল গেম্স অসি মওং অমদা গ্রীন গেম্স অমসু ওইরি। মসিদা অকোয়বগী ফীভমগা চুনবা পোৎলম কয়া শীজিন্নরি। নেস্নেল গেম্স অসিদা ফংলিবা মেদল অমদি ত্রোফী পুম্নমক ই-ৱেস্তনা শেম্বা ঙাক্তনি। মেদল ফংলবা শান্নরোয়শিংগী মমিংদা মফমসিদা উ পাম্বী অমমসু থাগনি। মসি য়াম্না ফবা থৌশিল অমনি। ঐনা শান্নরোয় পুম্নমক্কী মফমদা মখোয়গী খ্বায়দগী ফজবা পর্ফোর্মেন্স পীননবা পাউজেল পীজরি। ঐনা ধামি জী অমদি মাগী তীম পুম্বা, উত্তরাখন্দগী মীওই পুম্নমক্কী মফমদা নুংঙাইবা ফোঙদোকচরি।
মরূপশিং,
সনা হায়বসি মৈ ইক্ল-ইক্লগা শেংবা হেল্লকই হায়বা ঐখোয়না তানরে। ঐখোয়নসু শান্নরোয়শিংনা মখোয়গী মতিং হেন্না ফুদোকচবা অমদি ফগৎহনবা ঙম্নবা খুদোংচাবা হেন্না হেন্না শেমগৎলি। ঙসি চহি চুপ্পা তুর্নামেন্ত কয়া পাঙথোক্লি। খেলো ইন্দিয়া সেরিজতা তুর্নামেন্ত অনৌবা কয়া হাপচিল্লি। খেলো ইন্দিয়া য়ুথ গেম্সনা মরম ওইরগা, নহা ওইরিবা শান্নরোয়শিংনা মাঙদা চঙশিন্নবা তাঞ্জা ফংলি। য়ুনিভর্সিতী গেম্সনা য়ুনিভর্সিতীগী মহৈরোয়শিংগী মফমদা অনৌবা খুদোংচাবা কয়া পীরি। খেলো ইন্দিয়া পেরা গেম্সতা পেরা শান্নরোয়শিংনা উৎলিবা পর্ফোর্মেন্সনা অনৌবা পন্দোল কয়া ফংবা ঙম্লি। নুমিৎ খরনিগী মমাঙদা, ১৫শুবা খেলো ইন্দিয়া ৱিন্তর গেম্স লদাখতা হৌখ্রে। মমাঙ চহিদা ঐখোয়না বীচ গেম্স পাঙথোকখি।
অদুগা মরূপশিং,
অসিগুম্বা থবক থৌরমশিং অসি লৈঙাকখক্তনা পায়খৎপা নত্তে। ঙসি BJP MP চা কয়ানা মখোয় মখোয়গী মফমশিংদা অনৌবা হৈথোই শিংথোইবা শান্নরোয়শিং পুথোক্নবা MP স্পোর্তস কম্পিতিসসন পাঙথোক্নরি। ঐহাকসু কাসিগী MP অমদি। করিগুম্বা ঐগী পার্লিয়ামেন্তরী কন্সতিত্যুএন্সীগী মতাঙদা হায়রগদি, চহি খুদিংগী কাসি পার্লিয়ামেন্তরী কন্সতিত্যুএন্সীগী নহা লাখ ২.৫ রোম্না MP স্পোর্তস কম্পিতিসন্দা শরুক য়াদুনা মখোয়গী হৈ-শিংবা উত্থোক্নবা তাঞ্জা ফংলি। থমজনিংলিবা ৱাফমদি, লৈরাংশিংনা থারুক খুদিং লৈশাৎ তমবা, শান্ন-খোৎনবগী ফজরবা লৈগী নাচোম অমা লৈবাকসিদা শেম্লি অমদি তুর্মানেন্তশিং লেপ্পা লৈতনা পাঙথোক্লি হায়বসিনি।
মরূপশিং,
ঐখোয়না শান্ন-খোৎনববু ভারত্তা মায়কৈ শুনা চাওখৎপা পুরক্নবা পাম্বৈ অমা ওইনা লৌই। লৈবাক অমনা শান্ন-খোৎনবদা মাঙদা চঙশিল্লক্লবা মতমদা, লৈবাক অদিগী ক্রেদিবিলিতী, লৈবাক অদুগী প্রোফাইলসু হেনগৎলক্কদৌরিবনি। মরম অদুনা, ঙসি শান্ন-খোৎনববু চাওখৎপা ভারতকা মরী লৈনহল্লিবনি। ঐখোয়না মসিবু ভারতকী নহাশিংগী মশানা মশাদা থাজবগা মরী লৈনহল্লিবনি। ঙসি, ভারতনা মালেমগী অহুমশুবা খ্বায়দগী চাউবা শেন্মিৎলোনগী মায়কৈদা চঙশৎল্লি, মসিদা শান্ন-খোৎনবনা শেন্মিৎলোনগী মরুওইবা শরুক অমা ওইনবা ঐখোয়না হোৎনরি। শান্ন-খোৎনবদা য়াওরিবসি শান্নরোয়শিংখক্তা নত্তে, মসিগী মরুমদা মপুং ফাবা ইকোসিস্তেম অমা লৈরি। মসিদা কোচ, ত্রেনর, ন্যুত্রিসন অমসুং ফিতনেসকী লমদা থবক তৌরিবা মীওইশিং, দোক্তর, খুৎশু খুৎলায় কয়া য়াওরি। মসিনা সর্ভিস অমসুং মেনুফেকচরিং অনিমক্কী স্কোপ লৈরি। ভারতনা মালেম পুম্বগী শান্নরোয়শিংনা শীজিন্নবা তোঙান তোঙানবা শান্ন-খোৎনবগী খুৎশু খুৎলায়শিংগী ক্বালিতী লৈবা মেনুফেকচরর অমা ওইরক্লি। মীরত মফমসিদগী পংলাপ লাপত্রে। মফমদুদা শান্ন-খোৎনবগী খুৎশু-খুৎলায় পুথোকপা ফেক্তরী মচা অমদি অচৌবা লিশিং ৩৫ হেন্না লৈ। মখোয়দা মীওই লাখ অহুম হেন্না থবক তৌরি। ঙসি লৈবাকসিনা হায়রিবা ইকোসিস্তেম অসি লৈবাক্কী কাচিন কোয়া থউংনা শেমগৎনবা থবক পায়খৎলি।
মরূপশিং,
মতম খরগী মমাঙদা, ঐহাক্না দিল্লীদা ঐগী য়ুমদা ওলিম্পিক তীমগা উনবগী তাঞ্জা অমা ফংখি। ৱারী ৱাতায় শানবা অদুদা মরূপ অমনা ইফমদা PM গী অনৌবা ৱাহন্থোক অমা পীখি। লৈবাকসিগী শান্নরোয়শিংনা ঐবু PM নৎত্রগা প্রধান মন্ত্রী ওইনা লৌদে, মখোয়গী পরম মিত্র ওইনা লৌই হায়না মহাক্না হায়খি। অসিগুম্না অদোম্না ইফমদা থম্লিবা থাজবা অসিনা ঐঙোন্দা থৌনা হাপ্লি। ঐহাক্না অদোমদা, অদোমগী হৈ-শিংবা অমদি মতিংদা মপুং ফানা থাজবা থম্লি। ঐখোয়না অদোমগী মতিং হেনগৎহন্নবা অমদি অদোমগী মশান্নশিংগী ফীভম ফগৎহন্নবা ঙমজবী থাদুনা হোৎনরি। হৌখিবা চহি ১০সিদা য়েংবিয়ু, ঐখোয়না অদোমগী হৈথোই-শিংথোইবদা লেপ্পা লৈতনা মীৎয়েঙ থম্লি। চহি ১০ গী মমাঙদা লৈরম্বা শান্ন-খোৎনবগী বজেত্তগী ঙসিনা শরুক অহুম হেন্না হেনগৎলে। TOPS স্কীমগী মখাদা, লৈবাকসিগী শান্নরোয় দজন কয়াগী মফমদা লুপা করোর চা কয়া থাদরি। খেলো ইন্দিয়া প্রোগ্রামগী মখাদা, লৈবাক শিনবা থুংনা মতমসিগী ওইবা স্পোর্তস ইনফ্রাস্ত্রকচর শেমগৎলি। ঙইই, শান্ন-খোৎনববু স্কুলশিংদা ফাওবা মপুং ওইনা হাপ্নরক্লি। লৈবাকসিগী অহানবা স্পোর্তস য়ুনিভর্সিতীসু মনিপুরদা শাগৎলি।
মরূপশিং,
লৈঙাক্না হোৎনরিবশিং অসিগী মহৈ ঐখোয়না লৈমায়দা উরি, মেদল তেলীদা উরি। ঙসি ভারতকী শান্নরোয়শিংনা মালেমগী মশান্ন খুদিংদা ফিরাল হাইরি। ঐখোয়গী শান্নরোয়শিংনা ওলিম্পিক্স অমদি পেরালিম্পিক্সতা নীংথিজনা পর্ফোর্ম তৌরি। উত্তরাখন্দদগী শান্নরোয় কয়াসু মেদল ফংখি। ঙসি মফমসিদা মেদল ফংখ্রবা শান্নরোয় কয়া অদোমগী পুক্নিং থৌগৎনবা লাক্লিবা অসিদা ঐ নুংঙাইবা ফাওই।
মরূপশিং,
হোকীগী ঙল্লিঙৈগী মায় পাকপগী মতম অদু হঞ্জিল্লক্লি। নুমিৎ খরনিগী মমাঙদা, ঐখোয়গী খো-খো তীম্না ৱর্ল্দ কপ থোইখি। ঐখোয়গী গুকেস দি না ৱর্ল্দ চেস চেম্পিয়নসিপ তাইতল লৌরকপদা মালেম অসিনা ঙক্নখি। কোনেরু হম্পীনা নুপীগী ৱর্ল্দ রেপিদ চেস চেম্পিয়ন ওইখি, মায় পাকপা অসিনা ভারত্তা শান্ন-খোৎনবা অসি শুপ্নতগী এক্সত্রা-করিকুলর এক্তিবিতী অমা ওইদ্রে হায়বা উৎলি। হৌজিক্তি ঐখোয়গী নহাশিংনা শান্ন-খোৎনববু মরুওইবা করিয়র অমা ওইনা লৌনরে।
মরূপশিং,
ঐখোয়গী শান্নরোয়শিংনা পান্দম তম্না মতম পুম্বদা মাঙদা চঙশিনবগুম্না, ঐখোয়গী লৈবাকসিনসু অচৌবা ফিরেপশিংগা লোয়ননা মাঙদা চঙশিল্লি। ভারতনা ২০৩৬ ওলিম্পিক্স য়ুম্বু ওইনবা কন্না হোৎনরিবা অদোম পম্নমক্না খঙনরে। ওলিম্পিক্স ভারত্তা পাঙথোকপা মতমদা, মসিনা ভারতকী শান্না-খোৎনববু অনৌবা পন্দোল তম্না পুগনি। ওলিম্পিক্স অসি শান্ন-খোৎনবগী থৌরম অমখক্তা নত্তনা, ওলিম্পিক্স পাঙথোক্লিবা লৈবাক অমা হেক্তদা সেক্তর কয়াদা চাউনা কান্নবা পী। ওলিম্পিক্সকীদমক শেম-শাখিবা স্পোর্তস ইনফ্রাস্ত্রকচরনসু মীওই কয়াদা থবক পী। তুংদা শান্নরোয়শিংগীদমক হেন্না ফবা ফেসিলিতীশিং শেমগৎলি। ওলিম্পিক্স পাঙথোক্লিবা সহর খুদিংদা অনৌবা কন্নেক্তিবিতী ইনফ্রাস্ত্রকচরশিং শেমগৎলি। মসিনা কন্সত্রক্সনগা মরী লৈনবা ইন্দস্ত্রী মপাঙ্গল কনখৎহল্লি, অমদি ত্রান্সপোর্তকা মরী লৈনবা সেক্তর খুমাঙ চাওশিনহল্লি। অদুগা খ্বায়দগী চাউনা কান্নবা ফংলিবনা লৈবাক অদুগী তুরিজম্নি। মালেম পুম্বদগী মীওইশিংনা ওলিম্পিক্সতা শরুক য়ানবা অমদি মীৎয়েঙ তানবা লাকপা মতম্না অনৌবা হোতেল কয়া শাগৎলি। মসিনা লৈবাক পুম্বদা কান্নহল্লি। মতৌ অসুম্না নেস্নেল গেম্স লাইরৈপাক্কুম্লবা উত্তরাখন্দদা পাঙথোক্লি। লৈবাক্কী অতোপ্পা মফমশিংদগী মীৎয়েঙ তাবা লাক্লিবা মীওইশিংনা উত্তরাখন্দগী অতৈ মফমশিংদসু চৎনগনি। মসিনা তাক্লিবদি শান্ন-খোৎনবগী থৌরম অমনা শান্নরোয়শিংদা কান্নবা পীবখক নত্তনা সেক্তর কয়াগী শেন্মিৎলোনসু মসিনা মরম ওইরগা চাওখৎহল্লি।।
মরূপশিং,
ঙসি মালেম অসিনা ২১শুবা চহিচা অসিদা ভারতকী চহিচানি হায়নরি। অদুগা বাবা কেদরনাথকী মনাক্তা লাক্লবা মতুংদা দেকেদ অসি উত্তরাখন্দগীনি হায়বা ৱাহৈ অসি ঐগী ইচিন্দগী, ঐগী থম্মোয়নুংদগী খঙহৌদনা থোকখি। উত্তরাখন্দনা খোঙজেল য়াঙনা মাঙদা চঙশিল্লকপদা ঐ নুংঙাই। ঙরাংখক্তনি উত্তরাখন্দনা য়ুনিফোর্ম সিভিল কোদ চৎনবা স্তেত অমা ওইখিবা। ঐনা মসিবু করিগুম্বদসু সেকুলার সিভিল কোদ হায়না কৌই। য়ুনিফোর্ম সিভিল কোদনা ঐখোয়গী ইচানুপীশিং, ইমাশিং, অমদি ইচে ইচলশিংগী ইকায়খুম্ননিংঙাই ওইবা পুন্সি অমগী য়ুম্ফম ওইগদৌরিবনি। য়ুনিফোর্ম সিভিল কোদনা দিমোক্রেসীগী ৱাখল্লোন মপাঙ্গল কনখৎহনগনি, সংবিধানগী ৱাখল্লোন কনখৎহনগনি। অদুগা ঙসি ঐনা শান্ন-খোৎনবগী থৌরম অসিদা শরুক য়ারবা অসিনা ঐগী ইফমদা ময়ামদা মরী অমা শম্নবগুম ফাওই। স্পোর্তসমেনসিপ্না অনেম অৱাং খায়বগী ৱাখল্লোন্দগী লাপ্না লৈহল্লি, মায় পাকপা খুদিং, মেদল খুদিংগী মরুমদা লৈরিবা লাইৱাদুদি – সবকা প্রয়াস হায়বসিনি। শান্ন-খোৎনবনা ঐখোয়গী তীম স্পিরিত্তা শান্ননবা পুক্নিং থৌগৎলি। হায়রিবা ৱাখল্লোন অদুমক য়ুনিফোর্ম সিভিল কোদতা য়াওরি। কনাগুম্বা অমত্তবু হন্থনা য়েংবা লৈররোই, পুম্নমক চপ মান্নরগনি। ঐনা উত্তরাখন্দগী BJP লৈঙাকপা পুৱারী ওইরবা খোঙথাং অসিগীদমক নুংঙাইবা ফোঙদোকচরি।
মরূপশিং,
উত্তরাখন্দদা অহানবা ওইনা অসিগুম্বা লৈবাক্কী থাক্কী থৌরম অমা চাউনা পাঙথোক্লি। মসিমক অচৌবা ৱাফম অমনি। মসিনা মফমসিদা থবক পীনবগী খুদোংচাবা হেন্না ফংহল্লগনি, মফমসিগী নহা কয়াদা থবক ফংহনগনি। উত্তরাখন্দনা মাগী চাওখৎনবা অনৌবা লম্বী কয়া য়াৎপা তাই। হৌজিক্তি উত্তরাখন্দগী শেন্মিৎলোন্না চার ধাম য়াত্রাখক্তদা তাংলরোই। ঙসি লৈঙাক অসিনা ফেসিলিতী মশিং হেনগৎহন্দুনা য়াত্রাশিং অসিনা মীয়ামগী পুক্নিং চিংশিনবা লেপ্তনা হেনগৎহল্লি। লাই খুরুম্বা লাকপা মীওইশিংগী মশিংসু থারুক খুদিংগী অনৌবা রেকোর্দ থম্লি। অদুবু মসিনা মপুং ফাবদি ওইদে। উত্তরাখন্দদা নিংথমথাগী মতমগী লাই খুরুম্বগী খোঙচৎশিংসু পাঙথোক্নবা পুক্নিং থৌগৎপা চঙই। মায়কৈ অসিদসু উত্তরাখন্দদা অনৌবা খোঙথাঙ খরা লৌখৎলকপদা ঐ নুংঙাইবা ফাওই।
মরূপশিং,
উত্তরাখন্দ অসি মওং অমদা ঐগীদি অনিশুবা য়ুম্নি। ঐ ইশামকসু নিংথমথাগী লাই খুরুম্বগী খোঙচত্তা শরুক য়ানিংই। ঐনা লৈবাকসিগী নহাশিংগী মফমদা নিংথমথাগী মতমদা উত্তরাখন্দদা শোয়দনা চৎনবা ৱাফম থমগনি। মতম অদুদা লাই খুরুম্বা লাকপা মীশিং পাক্না য়াম্লমদে। মফমসিদা অদোম্না তৌবা য়াবা এদভেঞ্চরগী থৌওং কয়া লৈ। শান্নরোয় ময়াম্না নেস্নেল গেম্স মতুংদা শুকশোয় শোয়দনা থিদোকপিয়ু অদুগা য়ারগদি, নুমিৎ খরা হেন্না লাইরৈপাক অসিগী মীওক মীচানগী মহাও লৌবিয়ু।
মরূপশিং,
ময়াম পুম্নমক অদোম অদোমগী স্তেতশিংগী মহুৎ শিল্লগা লাক্লিবা ঙাক্তনি। লাক্কদৌরিবা নুমিৎ খরনিসিদা অদোম্না অকনবা লম্বা পানগদৌরি। নেস্নেল রেকোর্দ কয়া থুগাইগনি, অদুবু ঐনা ময়ামগী মফমদা হায়জবিংবা ৱাফম অমদি লৈরি। নেস্নেল গেম্স অসি শান্ন-খোৎনবগী অথোই অহেন তান্নবা অমখক্তা নত্তে, মসি এক ভারত শ্রেস্থ ভারতকী অকনবা ফম্পাক অমসুনি। মসি ভারতকী খেন্নবা শক্তমবু হরাও তয়াম্না পাঙথোকমিন্ননবা থৌরম অমসুনি। অদোমগী মেদলশিংনা ভারতকী লিংজেল মান্নবা অমদি মথক থোংবা মতৌ উত্থোকহন্নবা হোৎনগদবনি। অদোম্না মফমসিদগী হনখিবদা লৈবাকসিগী তোঙান তোঙানবা স্তেতশিংগী লোল, চীঞ্জাক, ঈশৈ নোংমাইগী মরমদা লৌশিং হেন্না তানশিল্লগা হন্বিখো। লু-নানবগী মতাঙদসু ঐনা হায়জনিংবা অমসু লৈরি। লাইরৈপাক অসিগী মীয়ামগী হোৎনজমলনা মরম ওইরগা, উত্তরাখন্দনা প্লাস্তিক ফ্রী ওইহন্নবা মায়কৈদা কন্না হোৎনদুনা মাঙদা চঙশিল্লি। প্লাস্তিক ফ্রী উত্তরাখন্দগী ফিরেপ অসি অদোমগী মতেঙ য়াওদনা ফংবা ঙমগদবা নত্তে। কেম্পেন অসিবু মায় পাকহন্নবা থৌদাং লৌবিয়ু।
মরূপশিং,
ময়াম পুম্নমক হকচাঙ তিঞ্জং কায়জঙদনা লৈবগী মরুওইবা খঙবিরে। মরম অদুননি ঙসি ঐনা য়াম্না মরুওইবা শিংনবা অমগী মতাঙদা ৱাফম খরা থমজনিংলিবা। স্তেতিস্তিক্সকী মতুং ইন্না লৈবাকসিদা মশা নোয়বগী চাং হেনগৎলক্লি হায়রি। লৈবাক মীয়ামগী চহি কাঙলুপ খুদিং, নহাশিং ফাওবা মসিগী ফীভম অসিনা শোকহল্লি। মসি নুংনাংনিংঙাই ওইবা ৱাফম অমসুনি মরমদি মশা নোয়বনা দাইবেতিস, থম্মোয়গী লায়নানচিংবগী খুদোংথিবা হেনগৎহল্লি। ঙসি লৈবাকসিনা ফিত ইন্দিয়া মুভমেন্তকী খুত্থাঙদা তিঞ্জং কায়জঙদনা অমদি মশা মউ ফনা লৈবগী মরমদা খঙবা হেনগৎলকপদা ঐ অপেনবা ফাওই। নেস্নেল গেম্স অসিনা হকচাঙ লেঙ ওৎপা থবক থৌওং, লীচৎ শাজৎ অমদি খল চুনবা পুন্সি কয়া য়াম্না মরু ওইবগে হায়বা তম্বিরি। ঙসি ঐনা লৈবাক মীয়ামগী মফমদা ৱাফম অনিখক্তা পুক্নিং লুপ্নবা ৱাফমসু থমজনিংই। ৱাফম অনি অসি হকচাঙ শাজেল অমদি দাইতকা মরী লৈনৈ। নুমিৎ খুদিং, মতম খরা কাইথোকপিদুনা হকচাঙ শাজেল তৌবিয়ু। ৱাকিং চৎপদগী হৌরগা শাজেল শান্নবা ফাওবদা তৌবা য়াবশিং তৌবিয়ু। অনিশুবদা, অদোমগী দাইত্তা পুক্নিং চঙবিয়ু। অদোম্না খল চুননা মচি ওইবা চীঞ্জাক চাবিগবনি।
অতোপ্পা অমসু তৌবা য়াই। অদোমগী চীঞ্জাক্তা হকচাঙদা শোক্নিংঙাই ওইবা মহাও অমদি থাউ হন্থহনবিয়ু। হৌজিক ঐখোয়গী য়ুমদা থাগী হৌরকপা মতমদা রাসন লাকই। হৌজিকসু অদোমগী য়ুমদা থা খুদিংগী অচাথাউ লিতর অনি-অনি পুশিল্লবদি মদু য়ামদ্রবদা চাদা ১০ গী চাংদা হন্থহনবিয়ু। ঐখোয়না নুমিৎ খুদিং শীজিন্নরিবা থাউগী চাং চাদা ১০ হন্থহনবিয়ু। ঐখোয়না ইশা নোয়হন্দনবা লম্বী থিবা তাই। অসিগুম্বা অপিক অপিকপা খোঙথাঙশিং লৌখৎপনা অদোমগী হকশেলদা চাউনা অহোংবা পুরকপা ঙম্মি। মসিমক্নি ঐখোয়গী অহল লমনশিংনা তৌনরম্লিবা। মখোয়না তগৎ তগৎ তেকপা চীঞ্জাক, মহৌশাগী ওইবা পোত্থোকশিং, অমদি খল চুনবা চাক্লুক চানরম্মি। হকচাঙ ফবখক্তনা মশা ফবা পুক্নিং অমদি মশা ফবা লৈবাক পুরকপা ঙম্মি। ঐনা স্তেত লৈঙাকশিং, মহৈশঙশিং, ওফিসশিং অমদি মীয়ামগী লুচিংবশিংগী মফমদা হীরমসিদা মীয়ামদা পাক শন্না খঙহন্নবা ৱাফম থমজগে, হীরমসিদা ময়াম পুম্নমক মমুৎ তানা খঙবিরবা ঙাক্তনি। ঐনা ময়ামগী মফমদা মচি ওইবা চীঞ্জাক্কী মরমদা লেপ্পা লৈতনা পাউ শন্দোকপিনবা ৱাফম থমজরি। খোল্লাউ অসিগা লোয়ননা ঐখোয় পুন্না ‘ফিত ইন্দিয়া’ অমা শেম্মিন্নরসি।
মরূপশিং,
ঙসি নেস্নেল গেম্স অসি হৌদোকপসি ঐগী থৌদাং ওইরবসু ঐনা মসি ময়ামসু শরুক য়ামিন্নদুনা পাঙথোকপা পাম্মি। অদুনা গেম্স অসি হৌদোক্নবা ময়াম্না অদোমগী মোবাইলগী ফ্লাস লাইত থানবিরকউ। ময়াম পুম্নমক অদোমগী মোবাইলগী ফ্লাস লাইত থান্বিয়ু। মীপুম খুদিংমক্কী মোবাইল ফ্লাস লাইত থানবিগদবনি, মীপুম খুদিংমক্না মোবাইল ফ্লাস লাইত থানবিগদবনি। ময়াম পুম্নমক্কা লোয়ননা, ঐহাক্না ৩৮শুবা নেস্নেল গেম্স অসি হৌদোক্লে হায়না লাউথোকচরি। অমুক্কা হন্না ময়াম পুম্নমক্কী মফমদা য়াইফ-পাউজেল পীজরি।
ময়ামবু থাগৎচরি !
