খুরুমজরি!
কোন্নীচীৱা।
কেম চো
জেন গার্দেন অমসুং কাইজেন একাদেমী শঙ্গাবগী থৌরম অসি ভারত-জপানগী মরী অসিদা মথন্তা লাকচবা থৌওং অমসুং হান্নগা মান্নদবা অনৌবা অওনবা পুরক্নবা খুদম অমা ওইরি। জপানিজ জেন গার্দেন অমসুং কাইজেন একাদেমী লিংখৎপা অসিনা ভারত অমসুং জপানগী মরক্তা লৈনরিবা মরী হেন্না চেৎশিলহল্লগনি, ঐখোয়গী প্রজাশিংবু হেন্না নকশিন্নহল্লগনি হায়না ঐহাক্না থাজৈ। মরু ওইনা ঐহাক্না হ্যোগো প্রি-ফেকচরগী লীদর, ঐহাক্কী নুংশিরবা মরূপ গভর্নর শ্রীমান ইদোক তোশিজোবু নুংঙাইবা ফোঙদোকচনীংঙি। গভর্নর ইদো মশামক ২০১৭দা অহমদাবাদতা লাকখি। মহাক অমসুং হ্যোগো ইন্তরনেস্নেল এসোসিএসন অসি অহমদাবাদতা জেন গার্দেন অমসুং কাইজেন একাদেমী শেমগৎপদা মরু ওইবা থৌদাং লৌখি। ঐহাক্না গুজরাতলৌ ইন্দো-জপান ফ্রেন্দশিপ এসোসিএসনগী মরূপশিংদসু নুংঙাইবা ফোঙদোকচরি। মখোয়না ভারত-জপানগী মরীশিংদা থৌগৎনবা শীংথনীংঙাই ওইবা থবক লেপ্তনা পাইখৎখি। জপান ইনফোর্মেসন অমসুং স্তদী সেন্তর অসিসু মসিগী খুদম অমনি।
মরূপশিং,
ভারত অমসুং জপান্না মপানগী ওইবা চাউখৎ-থৌরাংদা অমসুং খুমাং চাউশিনহনবদা মীৎয়েং চংলিবা অসুম্না ঐখোয়না মনুংগী ওইবা শন্তি পুরকপগা অমসুং চাউখৎ-থৌরাংবুসু মরু ওইবা লৌখি। জাপানিজ জেন গার্দেন অসি শন্তিগীদমক হোৎনরিবা অমদি পুকচেল শেংবা মতৌ অসিগী নীংথিজরবা খুদম অমনি। ভারতকী মীয়াম্না চহি কয়া অসিদা য়োগ অমসুং স্পিরিচ্যুএলিতীগী খুত্থাংদা শন্তি, ঈং-তপ্পা অমসুং অচম্বা মতৌ অসিবু খঙ-হৈজিনখিবা অদুমক মফম অসিদা উবা ফংলগনি। অমরোমদনা জপানগী ‘জেন’ হায়বা অসি ভারত্তা ‘ধ্যান’ হায়বা অদুনি। মসি বুদ্ধনা মালেমদা পীরমখিবা ধ্যান অদুনি। ‘কাইজেন’গী মতাং অসিগী ওইনদি, মসি হৌজিক ঐখোয়না পাম্লিবশিং ফংহন্নবা, ঐখোয়না মাংদা মখা তানা চংশিন্নবা হোৎনরিবা অসিদা পীরিবা থৌনা অদুগী খুদম অমনি।
নখোয় অয়াম্বনা কাইজেনগী লিতরেল মীনিং অসি ‘ইমপ্রুবমেন্ত’ হায়বনি হায়বা খংলে অদুবু মসিগী নুংগী ওইবা ৱাহন্থোক অসি য়াম্না চাউই। মসিনা ইমপ্রুবমেন্ত খক্তা নত্তনা লেপ্তনা ইমপ্রুবমেন্ত লাক্নবা মাইকৈদা মীৎয়েং থম্লি।
মরূপশিং,
ঐহাক্না মুখ্য মন্ত্রী ওইবা মতম অদুগা ইকুই কুইদনা গুজরাত্তা অহানবা ওইনা কাইজেনগী মতাংদা য়াম্না কন্না থবক পাইখৎপা হৌখি। ঐখোয়না কাইজেনবু কুপ্না নৈনখি, মদু ইমপ্লিমেন্ত তৌখি অমসুং অহানবা ওইনা ২০০৪দা এদমিনিস্ত্রেতিব ত্রেনিং তৌবদা কাইজেনদা মীৎয়েং হেন্না থমখি। মতুংদা মথংগী চহি ২০০৫তা গুজরাত্তা তোপ সিবিল সর্বেন্তকা লোইননা চিন্তা শিবির লৈখি অদুনা মীপুম খুদিংমক্তা ঐখোয়না কাইজেনগী ত্রেনিং পীখি। মতুংদা ঐখোয়না গুজরাতকী এজুকেসন সিস্তেম, সরকারগী লোইশঙ কয়াদা পুশিনখি। ঐহাক্না কন্তিন্যুস ইমপ্রুবমেন্তগী মতাংদা থমখিবা ৱাফম অদুসু মসিদা মখা চত্থখি। ঐখোয়না সরকারগী লোইশঙশিংদগী কান্নদবা পোৎলম ত্রক থন্না লৌথোকখি, প্রোসেসশিং নৌনা শেমদোকখি, পুম্নমক লাইথোকহনখি।
মসিগা মান্নবা মওংদা হেল্থ দিপার্তমেন্তদা কাইজেনআ ইথিল পীদুনা চাউনা অওনবা পুরকখি। কাইজেনগী মোদেলদা দোক্তর, নর্স, হোস্পিতাল স্তাফ লিশিং কয়া ত্রেন তৌখি। ঐখোয়না তোঙান তোঙানবা দিপার্তমেন্তশিংদা ফিজিকেল ৱর্কশোপতা থবক তৌখি, প্রোসেস্তা থবক তৌখি, মীয়ামবু শরুক য়াহনখি, মখোয়বু মসিগা মরী লৈনহনখি। পুম্নমক অসিনা লৈঙাক্তা অফবা শাফু চাউনা পীখি।
মরূপশিং,
ঐখোয় পুম্নমক্না খুমাং চাউশিনবদা গভর্নান্স য়াম্না মরু ওই। মীওই অমগী চাউখৎ-থৌরাং ওইগরে, ইন্সতিত্যুসনগী চাউখৎ-থৌরাং, খুন্নাই নত্ত্রগা লৈবাক্কী চাউখৎ-থৌরাংগী ৱাফম ওইরবসু গভর্নান্স হায়বা অসি য়াম্না মরু ওইবা ফেক্তর অমনি। অমসুং ঐহাক্না গুজরাত্তগী দিল্লীদা লাকপা মতমদা ঐহাক্না কাইজেনদগী ফংখিবা এক্সপরিয়েন্স অদু ঐহাক্কা লোইননা পুরকখি। ঐখোয়না মসি পি.এম.ও. অমসুং কেন্দ্র সরকারগী অতৈ দিপার্তমেন্তশিংদসু হৌখি। মসিনা মরম ওইরগা প্রোসেস হেন্না লাইথোক্লবসু ঐখোয়না ওফিসকী মফম কয়া ওপ্তিমাইজ তৌখি। ঙসিসু কাইজেন অসি কেন্দ্র সরকারগী অনৌবা দিপার্তমেন্ত, ইন্সতিত্যুসনশিং অমসুং স্কিম কয়াদা শিজিন্নরি।
মরূপশিং,
থৌরম অসিগা মরী লৈনবা ঐখোয়গী জপানদগী লাকপা মীথুংলেনশিংনা ঐহাক ইশামক্না জপানগা কয়াম য়াম্না মরী থমখি হায়বা খংলমগনি। জপানগী মীয়ামগী মীনুংশি, জপানগী মীয়ামগী থবক শুবগী মওং, মখোয়গী স্কিল, মখোয়গী দিস্সিপ্লিন পুম্নমক অসিনা ইথিল পীদুনা লাক্লি। অমসুং মসিনা মরম ওইরগা ঐহাক্না – গুজরাত্তা মিনি-জপান অমা শেমগৎপা পাম্মি হায়না ফোঙদোকপা মতমদা মসিগী মরুমদা লৈরিবা ৱাখল্লোন অদুদি জপানগী মীওইশিংনা গুজারত্তা লাকপা মতমদা মখোয়দা চপ মান্নবা মীনুংশি, চপ মান্নবা অমত্তা ওইবগী ৱাখল্লো অদু ফাওহনগদবনি হায়বা অসিনি। ভাইব্রেন্ত গুজরাত সম্মিৎ হেক হৌবদগী জপান্না পার্তনর কন্ত্রী অমা ওইনা য়াওদুনা লাকখি হায়বা ঐহাক্না নীংশিংলি। ঙসিসু ভাইব্রেন্ত গুজরাত সম্মিৎতা শরুক য়াবা লাকখিবা খ্বাইদগী অচৌবা দেলিগেসনশিংগী মনুংদা অমদি জপান্না ওইরি। অমসুং জপান্না গুজরাতকী লৈপাক লৈহাওদা, মফম অসিগী মীয়ামদা ফাওহল্লিবা থাজবা অসি উরুবদা ঐখোয় পুম্নমক্না অপেনবা পোকখি।
ঙসি গুজরাত্তা জপানগী কম্পনী অমদগী হেন্না থবক তৌরি। মখোয়গী মশিং অসি ১৩৫ হেল্লি হায়না ঐঙোন্দা তাকপিরকই। ওতোমোবাইলদগী হৌরগা বেঙ্কিং ফাওবা, কনস্ত্রক্সনদগী হৌরগা ফার্মা ফাওবা, সেক্তর খুদিংমক্তগী জপানগী কম্পনীশিংগী ওইবা গুজরাত্তা বেস লৈ। সুজুকী মোতর্স, হোন্দা মোতরসাইকল, মিৎসুবিশি, তোয়োতা, হিতাচী ওইরবসু অসিগুম্বা কম্পনী কয়া গুজারত্তা মেন্যুফেকচরিং তৌরি। অমসুং অফবা ৱাফম অমনা হায়রিবা কম্পনীশিং অসিনা গুজারতকী নহাশিংগী স্কিল দিবেলপমেন্ত তৌবদা য়াম্না মতেং পাংলি। গুজরাত্তা লৈবা জপান-ইন্দয়া ইন্সতিত্যুত ফোর মেন্যুফেকচরিং অহুমনা চহি খুদিংগী নহা কয়াদা স্কিল ত্রেনিং ফংহল্লি। কম্পনী কয়াগা গুজরাতকী তেক্নিকেল য়ুনিভর্সিতীশিং অমসুং আই.তি.আই.শিংগা তাই-অপ তৌরি।
মরূপশিং,
জপান অমসুং গুজরাতকী মরক্তা লৈনরিবা অসি অসিগী মতাংদা হায়গদবা য়াম্না লৈ অমদি মতম ওইনা লোইখ্রগনি। মসিগী মরী অসি নুংশি-চান্নবা, মীনুংশিং অমসুং অমনা অমগী পুক্নিং ৱাখল খংবা, অমনা অমগী মথৌ তাবশিং খংবা অসিনা চেৎশিনহনখিবনি। গুজরাতনা জপানবু মতম চুপ্পদা মরু ওইনা লৌখি। হৌজিক জেত্রোনা অহমদাবাদ বিজিনেস সপ্পোর্ত সেন্তর হাংদোরকপা অসিদা মতম অমত্তদা কম্পনী মঙাদা প্লগ এন্দ প্লে ৱর্ক-স্পেস ফেসিলিতী পীবগী খুদোংচাবা লৈরে। জপানগী কম্পনী অয়াম্বনা মসিগী কান্নবা লৌরি। ঐহাক্না হৌখিবা মতমশিং অদুবু হন্না-হন্না নীংশিংলুবদা গুজরাতকী মীয়াম্না অপিক-অপিকপা ৱাফমশিংদা মীৎয়েং চংখি হায়না ঐহাক্না ফাওজৈ। ঐহাক্না মুখ্য মন্ত্রী ওইরিঙৈদাজপানগী দেলিগেসনগা ৱারী শান্নরিঙৈদা খঙহৌদনা ইনফোর্মেল ওইনা ৱাফম অমা থোরকখিবা অদু ঐহাক্না নীংশিংলি। ৱাফম অদু য়াম্না পুক্নিং চীংশিন্নীংঙাই ওইখি। জপানগী মীয়াম্না গোল্ফ শান্নবা য়াম্না পামজৈ অদুবু গুজরাত্তা গোল্ফ কোর্স লৈখীদে। মীফম অসিগী মতুংদা গুজরাত্তা গোল্ফ কোর্সশং থম্নবা অখন্নবা থৌরাংশিং পাইখৎখি। ঙসি গুজরাত্তা গোল্ফ কোর্স কয়া লৈরকপা অসিদা ঐহাক্না নুংঙাইবা পোকই। রেস্তোরেন্ত কয়াদসু অখন্নবা জপানিজকী ফুদ ফংহল্লি। হায়বদি গুজরাত্তা জপানগী মীয়াম্না লাপদা মখোয়না য়ুমদা লৈবগুম্না ফাওনবা হোৎনবা খোঙথাং অমনি। ঙসি গুজরাতকী প্রোফেস্নেলগী লমদা জপানগী মরোল লাইনা ঙাংবা মীওই কয়া লৈরে। রাজ্য অসিগী য়ুনিভর্সিতী অমদা জপানিজ তম্নবা কোর্স অমা হৌরগনি হায়নসু ঐঙোন্দা খঙহনবিরকই, মসি অফবা অহৌবা অমনি।
ঐহাক্না গুজরাত্তা জপানিজ স্কুলগী সিস্তেমগী মোদেল অমা থম্বা পাম্মি।
ঐহাক্না জপানগী স্কুলগী সিস্তেম, মখোয়না মোদর্নিতী অমসুং মোরেল ভেল্যুশিংদা মীৎয়েং থম্লিবা অসি য়াম্না পামজৈ। জপানগী তাইমৈ স্কুলা চৎপগী খুদোংচাবা অমা ঐহাক্না ফংখি অমসুং মফম অদুদা লেনখিবা মীকুপ খরা অদু নীংশিংদুনা লৈহৌরগদবা মীকুপশিং ওইরি। স্কুল অদুগী মহৈরোইশিংগা ৱারী শাবা অদু ঙসিসু ঐহাক্কী ওইনা খ্বাইদগী মমল য়াম্লবা মীকুপ অমা ওইরি।
মরূপশিং,
ঐখোয়দা চহি কয়াগী লিরবা চৎনবীগী মরীশিংদা চাউনা থাজবা অমসুং তুংলমচৎকী অমত্তা ওইনা মঙলান অমসু লৈ! মসিদা য়ুম্ফম ওইরগা হৌখিবা চহি কয়া অসিদা ঐখোয়না ঐখোয়গী স্পেসিএল স্ত্রেতেজিক এন্দ গ্লোবেল পার্তনরশিপবু লেপ্তনা মপাঙ্গল কনখৎহল্লি। মসিগীদমক ঐখোয়না জপান-প্লসকীদমক পি.এম.ও.দা অখন্নবা থৌরাং অমসু তৌরি। হান্নগী জপানগী প্রধান মন্ত্রী ওইরম্বা অমসুং ঐহাক্কী মরূপ শিঞ্জো অবেনা গুজরাত্তা লাক্লম্বা মতমদা ভারত-জপানগী মরী অসিদা অনৌবা ইনোৎ অমা হাপখি। বুল্লেৎ ত্রেনগী প্রোজেক্ত পাইখৎপা হৌবদা মহাক্না য়াম্না হরাওখি। ঙসিসু মহাক্কা ৱারী শাবা মতমদা মহাক্না গুজরাত্তা লাক্লম্বা অদু শোইদনা নীংশিংলি। জপানগী হৌজিক ওইরিবা প্রধান মন্ত্রী শ্রীমান য়োশিহিদে সুগা অসি য়াম্না লোইনবা নুংঙাইবা মীওই অমসু ওইরি। পি.এম. সুগা অমসুং ঐহাক্না কোবিদ লাইচৎকী মতম অসিদা ভারত অমসুং জপানগী মরূপ ওইবগী মরী অসি ঐখোয়গী পার্তনরশিপ, গ্লোবেল স্তেবিলিতী অমসুং খুমাং চাউশিনহনবদা হেন্না হেনগৎলক্লি হায়না থাজবা থম্লি। ঙসি ঐখোয়না মালেমগী ওইবা শীংনবা কয়া মায়োক্নরিবা মতম অসিদা ঐখোয়গী মরূপ ওইবগী মরী, ঐখোয়গী মরী অসি নোংমা নোংমগী হেন্না চেৎশিনহনবা তাই, মসি হৌজিক্কী য়াম্না তঙাই ফদবা অমনি। অমসুং কাইজেন একাদেমীগুম্বা খোঙথাং অসি মসিবু উৎলিবা নীংথিজরবা খুদম অমনি।
ঐহাক্না পামজবদি কাইজেন একাদেমীনা ভারত্তা জপানগী ৱর্ক-কলচর অদু পুরকপা অমসুং জপান অমসুং ভারতকী মরক্তা বিজিনেসকী ওইবা ইন্তরেক্সনশিং হেনগৎহনবনি। মাইকৈ অসিদা হান্নদগী পাইখৎলিবা থবকশিংদা অনৌবা ইনোৎ হাপ্পা তাই। গুজরাত য়ুনিভর্সিতী অমসুং ওসাকাগী ওতেমান গাকুইন য়ুনিভর্সিতীগী মরক্তা লৈরিবা ইন্দো-জপান স্তুদেন্ত এক্সচেঞ্জ প্রোগ্রামগুম্বা প্রোগ্রাম অসিনসু হৌখিবা চহি মঙা অসিদা ঐখোবগী মরী অসি চেৎশিনহল্লি। মসি মখা তানা হেনগৎহনবা য়াগনি। অসিগুম্বা পার্তনরশিপ অসি লৈবাক অনি অমসুং ইন্সতিত্যুসন অনিগী মরক্তা লৈহনবা য়াগনি।
ঐখোয়না হোৎনরিবশিং অসিনা মাইকৈ অসিদা মখা তানা খুমাং চাউশিনগনি অমুং ভারত-জপান পুন্না অনৌবা চাউখৎ-থৌরাংগী অনৌবা পন্দোম লোম্বা ঙমগনি হায়না ঐহাক্না থাজৈ। ঙসি প্রোগ্রাম অসিগী খুত্থাংদা ঐহাক্না জপান, জপানগী মীয়াম অমসুং তোকিয়ো ওলিম্পিক্স পাঙথোক্লিবশিংদা ঐহাক্কী য়াইফ-পাউজেল পীজরি।
ময়াম পুম্নমকপু হন্না-হন্না থাগৎচরি!
