শ্রী সরস্বত্যে নমঃ!
ৱা ঙাঙবগী চৎনবীগী চীংলেম্লবা থৌরমসিদা ঐখোয়গী ইরক্তা তিনবিরিবা মহারাস্ত্রগী রাজ্যপাল শ্রী ভগৎ সিংহ কোস্যারী জী, মহারাস্ত্র বিধানসভাগী নেতা খোঙবু শ্রী দেবেন্দ্র ফদনাবিস জী, মহারাস্ত্র লৈঙাক্কী মন্ত্রীঈ শ্রী সুভাস দেসাই জী, ইকায়খুম্নরবা উশা জী, অশা জী, আদিনাথ মঙ্গেসকর জী, মাস্তর দীননাথ, নীংশিং লূপ অসিগী লূপ্লোয় পুম্নমক, ঈশৈ নোংমাইগী তাইবঙগী মরূপশিং, অতৈ শক্নাইরবা মীওইশিং, ইচে ইচল, ইচিন ইনাউ পুম্নমক!
ঙসিগী মরুওইরবা থৌরমসিদা ইকায়খুম্নরবা হৃদয় নাথ মঙ্গেসকর জীসু লাক্কদবনি। অদুবু হৌজিক্তা আদিনাথ জীনা হায়খিবগুম, মশা ঙমদবনা মরম ওইরগা মহাক মফমসিদা লাকপা ঙমদ্রে। ঐনা মহাকপু থুনা মশা ফগৎলকপা ওইরসনু হায়না থৌনিজরি।
মরূপশিং,
ঐ ইশানা ইশাবু মফমসিদা থোইদোক্না চন্নবা মী অমা ওইনা ফাওদে, মরমদি ঈশৈগুমবা অরুবা হীরমসিগী মতাঙদা ঐদি করিসু খঙদে, অদুবু নাৎ-চৎনবীগী মীৎয়েঙদগী য়েংবদা ঈশৈ অসি হীরি কোনবগুমবনি, অমদি পুক্নিংগী ইথিল অমসুনি। ফোঙদোকপা ঙমদবশিংবু ফোঙদোক্লিবা ৱাহৈদুনি। ফোঙদোক্লিবদুদা মতিং অমদি ৱাখলগী ইথিল য়াওরিবা খোঞ্জেলদুনি। ৱাখলদা পুক্নিংগী ইথিল হাপচিন্দুনা শেম্লক্লিবদুবু ঈশৈ কৌই। অদোম করিসু খন্দনা ফম্লি, অদুবু ঈশৈগী শৈহেক অমনা অদোমগী মীত্তা পিরাং শিন্থহনবা ঙমগনি, মসি ঈশৈগী মতিংনি। ঈশৈগী তান্থা অমনা অদোমগী ৱাখল তরংদা তাউহনবা ঙমগনি। ঈশৈনা অদোমগী মফমদা থৌনাগী ইহুল হাপ্পি। ঈশৈনা মমা ওইবীগী মিনুংশিগী ইহুল পোকহনবা ঙম্মি। ঈশৈনা অদোমবু মরৈবাক নীংবগী অমদি থৌদাং য়াবগী পন্দোলদু য়ৌনা পুবা ঙম্মি। ঈশৈগী অসিগুম্লবা মতিং অমসুং মঙমবু ইচে লতাগী শক্লোন্দা ইমিৎমক্না উবা ফংহৌবা ঐখোয় পুম্নমক লাইবক ফরবা ঙাক্তনি। ঐখোয় ইমিৎসিনা মহাকপু উবা ফংহৌরবনি অমদি মঙ্গেসকর শাগৈনা মীরোল মথং মথং থৌদাং অসি য়াদুনা লাক্লি অমদি ঐগীদমক্তদি ৱাখল্লোন অসি ময়ামদগীসু হেল্লি। হৌজিক মরুওইবা ৱাফম খরা হরীস জীনা ফোঙদোকপিখি, অদুবু ইচেগা ঐগা লৈনরিবা মরী করমবা মতমদগী, কয়াম কুইরবনো হায়না খল্লম্লিবনি। অসুম অসুম চৎনা চৎনা ঐনা নীংশিংবদা চহি ৪০ – ৪৫রোম শুরম্লগনি, সুধির ফর্কে জীনা ঐবু শক্তাকপিখিবনি। মতমদুদগী হৌরগা ঙসি ফাওবা ইমুং অসিগী মশিং য়াম্লবা থৌদোক ৱাথোকশিংদা শরুক য়াদুনা লাক্লি। ঐগীদমক্তদি ইচে লতা শুরগী লাইরেম্বীগী মথক্তা ঐগী ইচেনি হায়বদা ঐনা চাউথোকচবা পোকই। মীরোল কয়াগী মিনুংসু অমদি ইথিলগী খুদোল পীবিরম্বী ইচে লতাগী মফমদগী মতম পুমবদা মচে অমগী মিনুংসি ফংখি, পুন্সিদা মসিদগী হেন্না লাইবক ফবা করিবু লৈরমগদগে। চহি কয়াগী মতুংদা ইচে য়াওদবা রাখিগী কুমহৈ অহানবা ওইনা লাক্লগনি। মনা মথুম পীদুনা ইকায়খুম্নবগী থৌরমশিংদা, হৌজিক্তা হরীস জীনা হায়খিবগুম, মনা লৌবনচিংবা থৌরমদগী ঐ মতম খরা লাপ্না লৈরুরবনি, ঐ ইশানা হৈনবা ঙমদে। অদুবু ইচে লতাগুমবা ইচে অমগী মিংদা পীবা মনা ওইরবদি, মদু ঐগীদমক্তা মহাক্কী মফমদা লৈখিবা মিনুংসি, মঙ্গেসকর শাগৈনা ঐগী ইফমদা লৈরিবা হক অদুনা মরম ওইরগা মওং অমদি মসি ঐগী তৌফম থোকপা থৌদাং অমা ওইহল্লি। মসি অদুগুম্বা মিনুংসিদুগী মরম্ননি। অদুগা আদিনাথ জীনা পাউজেল পীরকপা মতমদা ঐনা ঐগী করি থৌরম লৈরি, ঐ কয়াম চিল্লি হায়বা করিমত্তা য়েংদনা য়াখি। মদুদা য়াদবা হায়বসি ঐগীদমক্তা ওইথোক্তবা অমনি। ঐনা মনা অসিবু লৈবাক মীয়ামদা কত্থোকচরি। ইচে লতা মীয়ামগী ওইরমবগুম মহাক্কী মিংদা পীরক্লিবা মনা অসিসু মীয়ামগীনি। ইচে লতাগী ঐগা হেক হেক ৱারী শানরম্মি। মহাক্না মাগী পাউজেল অমসুং য়াইফরোল হেক হেক থারক্লম্মি। ঐখোয় পুম্নমক্কী কান্নগদবা ঐনসু কাউবা ঙমদবা মহাক্কী ৱাফম অমা লৈ, ঐ মহাকপু য়াম্না ইকায় খুম্নৈ, অদুবু মহাক্না করি হায়রম্মি, মহাক্না মতম পুম্নমক্তা হায়রমবা ৱাফমদি – “মীওইবনা কয়াম চাউরবগে হায়বসি মাগী থবক্না তাকই, চহিনা তাক্তে। লৈবাক্কীদমক থবক তৌরিবমখৈ চাউবা হেনগৎলক্কদৌরিবনি।” মায় পাকপগী পন্দোলদা অসিগুম্বা ৱাখল্লোন চেনবা মীওই অসি অথোইবনি। ইচে লতা চহিদগী ঐঙোন্দগী হল্লি অদুগা থবক্তসু হেল্লি।
ঐখোয় পুম্নমক্না ইচে লতাগা লোয়নখিবা মতমদা ঐখোয় পুম্নমক্না খঙই মদুদি মহাক পুকচেল চমবগী অথোইবা শক্লোন্নি। ইচে লতানা ঈশৈগী তাইবঙদা ফংলিবা মফম অসিনা মীয়াম্না মহাকপু সরস্বতীগী শক্লোনগুম লৌনৈ। মহাক্কী খোঞ্জেলনা চাউরাক্না চহি ৪০রোম ঈশৈগী তাইবঙদা পান্দুনা লৈরম্মি। গ্রোমোফোন্দগী হৌরগা কেসেত, অদুদগী সি.দি., দি.ভি.দি., অদুগা পেনদ্রাইব, ওন্লাইন ম্যুজিক অমসুং এপ ফাওবা ঈশৈ অমসুং মালেমগী অচৌবা খোঙচৎ কয়া লতা জীগা লোয়ননা চৎমিন্নখিবনি। সিনেমাগী মীরোল ৪-৫দা মহাক্না মাগী খোঞ্জেল পীরমখিবনি। ভারত রত্নগুমবা খ্বাইদগী অথোইবা ইকায়খুম্নবা লৈবাক্না মহাক্কী মফমদা পীখি অমদি লৈবাকসিনসু চাউথোকচখি। মালেম পুমবনা মহাকপু সুরগী লাইরেম্বী ওইনা লৌনরম্মি। অদুবু মহাক মশানদি মশাবু সুরগী লাইরেম্বী নত্তে, সুরগী তুংইনবীনি হায়না খঞ্জখি। ঐখোয়না মীওই কয়াদগী তাবা ৱাফমদি মহাক্না ঈশৈ অমা হেক্তগী রেকোর্দিংগীদমক চৎপা মতমদা মহাক্কী চপ্পল মপান্দা লৌথোক্তুনা থম্লমগনি। মাগী মফমদা ঈশৈবু নীংজবা অমদি তাইবং মপুবু নীংজবা অনিমক চপ মান্নৈ।
মরূপশিং,
আদিশঙ্করগী ৱাঙুলোন ঐখোয়না তাদুনা খঙনবা হোৎনবদা করিগুম্বদসু ঐখোয় ৱাখলনা লামবা ফংদবা য়াওই। অদুবু ঐনা আদিশঙ্করগী ৱাঙুলোনগী মরমদা খন্নবা হোৎনরুবদা মদুবু অরায়বা লোন্দাদা ফোঙদোক্কে হায়রবদি মহাক্কী ৱারোলশিংগী খুদম পীবদা তাইবং মপুগী খোঞ্জেল য়াওদ্রগদি মপুং ফাদে। তাইবং মপুগী মফমদা খোঞ্জেল লৈ। খোঞ্জেল লৈবা মফমদুদা মপুং ফাবনি। ঈশৈনা ঐখোয়গী পুক্নিংনি, ঐখোয়গী নুংগী ৱাখলদা ইথিল পীবনি। মদুগী হৌরকফম লতা জীগুমবা শেংলবা মীওইদগী ওইরবদি, অদুগুম্বা অশেংবা অমদি ৱাখল্লোন অদু ঈশৈদুদা তিনশিনখি। মহাক্কী শক্লোনগী শরুক অসি ঐখোয় পুম্নমক্কী ওইনা, মরুওইনা নহা মীরোলশিংগীদমক্তা পুক্নিং থৌগৎনিংঙাইনি।
মরূপশিং,
লতা জীগী তাইবঙ খোঙচৎ লৈবাকসিনা নীংতমবগী অমৃৎ মহোৎসব পাঙথোক্লিঙৈ মনুংদা লোমখিবনি। মহাক্না নীংতমদ্রিঙৈ মমাঙদগী ভারতকীদমক্তা খোঞ্জেল থোকখিবনি অদুগা হৌখিবা চহি ৭৫সিদা লৈবাকসিনা চৎখিবা খোঙচৎ মহাক্কা লোয়নদুনা চৎখিবনি। মনা অসিদা লতাজীগী মপাবুং দীননাথ মঙ্গেসকর জীগী মমিংসু য়াওরে। মঙ্গেসকর শাগৈনা লৈবাক্কীদমক লৌখিবা থৌদাংগীদমক্তা লৈবাকসিগী মী্য়াম্না মখোয়গী লমন তোল্লবনি। ঈশৈগী লোয়ননা লৈবাক নীংবগী ইথিল ইচে লতাদা লৈখিবদুগী হৌরকফমদি মহাক্কী মপাবুংনি। নীংতম ইহৌ মতমদা সিম্লাদা ব্রিতিশ ভাইসরোইগী থৌরম অমদা বির সাবরকরনা ইবা ঈশৈ শকখি। ব্রিতিশ ভাইসরোইগী মমাঙদা অসুম্না তৌবা ঙমখিবসি দীননাথ জীখক্তনি অমদি ঈশৈ ওইনা শকখিবনি। মদুগী ৱাখল্লোন্দা ইহৌসু হৌখি অমদি বির সাবরকরনা ঈশৈ অদু অংগ্রেজী লৈঙাকপু শিংনদুনা ইখিবনি। অদুগুম্বা থৌনা, অদুগুম্বা লৈবাক নীংবগী ইহুল দীননাথ জীনা মহাক্কী ইমুংগী লন ওইনা থম্লম্মি। লতা জীনা মতম অমদা হায়রম্মি মদুদি মহাক অহানবদা খুন্নাইগী থৌগল তৌবগী লমদা চঙবা পাম্লম্মি। লতা জীনা ঈশৈবু মহাক্কী লাইনিং ওইরম্মি, অদুবু লৈবাক নুংশিবা অমদি লৈবাক্কী থৌগল তৌনিংবগী ইহুল মহাক্কী ঈশৈগী খুত্থাঙদগীসু ফংলম্মি। শত্রপতি সিবাসি মহারাজকী মরমদা বির সাবরকরনা ইরমবা ঈশৈ – ‘হিন্দু নরসিংহ’ ওইরবসু নৎত্রগা অথোইবা গুরু রামদাস জীগী ৱারোল ওইরবসু লতা জীনা সিবকল্য়ান জীগী রেকোর্দিংগী খুত্থাঙদা মখোয়বু অমর ওইহল্লম্মি। “এ মেরে ৱতন কে লোগো” অমসুং “জয় হিন্দি কি সেনা” লৈবাক মীয়াম পুম্বগী চীনবালদা মতম চুপ্পা লৈহৌরগবদা শৈরোলশিংনি। মহাক্কী পুন্সিগা লোয়নদুনা লৈরবা অসিগুম্বা কয়ানি। ইচে লতা অমসুং মহাক্কী ইমুং মনুংগী থৌদাংবু অমৃৎ মহোৎসবসিদা মীয়ামগী মফমদা পুদুনা চৎপা হায়বসি ঐখোয়গী থৌদাংনি।
মরূপশিং,
ঙসি লৈবাকসিনা ‘এক ভারত, শ্রেস্থ ভারত’কী থাজবগা লোয়ননা মাঙদা চঙশিল্লি। লতা জী ‘এক ভারত, শ্রেস্থ ভারত’কী মফোঙদোক্কুমবনি। অদোমসু য়েংবিয়ু, মহাক্না লৈবাকসিগী লোন ৩০ হেনবগী ঈশৈ লিশিং কয়া শকখ্রে। হিন্দী, মরাথি, সংস্কৃৎ ওইরবসু নৎত্রগা অতৈ লোনশিংদসু লতাজীগী খোঞ্জেল য়াওখ্রবনি। মহাক স্তেত খুদিংগী, মফম খুদিংগী মীয়ামগী পুক্নিংদা লৈরিবনি। ভারত মচা ওইবগা লোয়ননা ঈশৈবু কমদৌনা অমর ওইনা থমগদগে হায়বা মহাক্না খুদম ওইনা উৎলম্লে। মহাক্না ভগবদ গীতাসু শক্লম্মি অদুগা তুল্সি, মীরা, সন্ত জ্ঞানেস্বর অমসুং নরসি মেহতাগী ঈশৈশিংসু খুন্নাইগী পুক্নিংদা ইনশিল্লম্মি। রামচরিত মানসকী শৈরোলশিংদগী হৌরগা বাপুগী নুংশিরবা ভজনবৈষ্ণবজন তো তেরে কহিয়ে’ ফাওবা লতাজীগী খোঞ্জেলনা নৌনা হিংগৎহনবনি। মহাক্না তিরুপতি দেবস্থানমগী ঈশৈ অমসুং মন্ত্রশিংগী সেত রেকোর্দ অমা তৌরম্মি, মদু ঙসিসু অয়ুক খুদিং খোংলি। হায়জনিংলিবদি নাত্তগী হৌরগা লাইনিং ফাওবা, নোংপোক্তগী হৌরগা নোংচুপ ফাওবা, অৱাংদগী খা ফাওবা, লতা জীগী সুরনা লৈবাক পুমবা পরেং অমদা লেংশিল্লম্মি। মালেমগী ওইনসু মহাক ভারতকী নাৎকী রাজদুত ওইরম্মি। অসুম্না মহাক্কী পুন্সি হিংলম্মি। পুনেদা মহাক্না মহাক্কী তাঞ্জবা শেনফম অমসুং মরূপশিংগী মতেঙগা লোয়ননা মাস্তর দীননাথ মঙ্গেসকর হোস্পিতাল লিংখৎলমদুনা ঙসিসু লায়রবশিংগী থৌগল তৌরি অমদি লৈবাকসিদা মী খরখক্তমক খঙলমগনি মদুদি কোরোনাগী মতমদা লায়রবশিংগীদমক থবক তৌখিবা লায়েংশঙ খরগী মনুংদা পুনেগী মঙ্গেস্কর হোস্পিতালসু অমনি।
মরূপশিং,
ঙসি নীংতমবগী অমৃৎ মহোৎসব অসিদা লৈবাকসিনা মাগী হৌখিবা মতমবু নীংশিংলি, অমদি লৈবাকসিগী তুংগীদমক অনৌবা খোঙফমশিং লৌরি। ঐখোয় মালেমগী খ্বাইদগী চাউবা স্তার্তঅপ ইকোসিস্তেমশিংগী মরক্তা অমনি। ঙসি ভারতনা হীরম খুদিংদা মরোমদোম লেপচবা ঙম্নবগী মায়কৈদা খোঙ থাংজিল্লি, চাউখোৎ খোঙচৎ ঐখোয়গী থৌরাংশিংগী শরুক ওইরি। অদুবু চাওখৎপগী মতাঙদা লৈরিবা ভারতকী নুংগী ওইবা মীৎয়েঙ মতম পুম্নমক্তা খেন্নৈ। ঐখোয়গীদমক্তদি চাওখৎপগী ৱাহন্থোক্তি – ‘সবকা সাথ, সবকা বিকাস, সবকা বিস্বাস অমসুং সবকা প্রয়াস’ হায়বসিনি। পুম্নমক্কা লোয়ননা পুম্নমক্কী চাওখৎপা পুরকপগী ৱাখল্লোনসিদা ‘বসুধৈব কুতুম্বকম’গী ৱাখল্লোনসু য়াওরি। মালেম পুমবগী চাওখৎপা, মীওইবা খুন্নাই পুম্বগী য়াইফবা হায়বসি পাঙ্গলখক্তনা ফংবা ঙমদে। মসিগীদমক্তা মীওইবগী মমল খঙবা মথৌ তাই। মসিগীদমক্তা থৱায়গী ওইবা ৱাখল্লোন মতৌ তাই। মরম অসিনা, ঙসি ভারতনা মালেমদা য়োগ অমসুং অয়ুর্বেদদগী হৌরগা অকোয়বগী খল ঙাকপনচিংবা হীরমশিংদা মায়কৈ তাক্লি। ভারতকী অসিগুম্বা থৌদাংশিংগী মরক্তা ঐখোয়গী ঈশৈ-নোংমাইসু শরুক অমনি হায়না ঐনা লৌই। মসিগী থৌদাং অদোমগী খুত্তা লৈ। ঐখোয়না অসিগুম্লবা ঐখোয়গী লন অসিবু অদুগুম্বা মমলদুগা লোয়ননা হিংহন্দুনা থমগদবনি, অমদি মাঙদা চঙশিন্দুনা মালেমদা ইং-তপ্পা পুরক্নবগী পাম্বৈ অমা ওইহনবা হায়বসি ঐখোয় পুম্নমক্কী থৌদাংনি। ঐনা মপুং ফানা থাজৈ মদুদি, ঈশৈগী তাইবঙগা লোয়নরিবা অদোম পুম্নমক্না থৌদাং অসিবু অকিবা লৈতনা য়াবিরক্কনি অমদি অনৌবা ভারত অমগী মায়কৈ তাক্লগনি। হায়রিবা থাজবসিগা লোয়ননা ঐনা ময়াম পুম্নমকপু থম্মোয়নুংদগী থাগৎচরি। ইচেগী মিংদা লান্থোকপা মনা অসিগীদমক ঐবু খনবিরকপগীদমক্তা মঙ্গেসকর শাগৈবুসু থম্মোয়নুংদগী থাগৎচরি। অদুবু হরীস জীনা শকখঙচে পাথোকপা মতমদা ঐ কয়ারক হন্না পাবা মথৌ তাগনি অমদি পারগা নোত শেমবা মথৌ তাগনি হায়না খল্লম্লিবনি। হৌজিক ঐনা করি করি ফংনবা তানবা মথৌ তাখিগনি, ঐঙোন্দা করি করি ৱাৎলি, মদুবু ঐনা কমদৌনা মপুং ফাহনগনি হায়বা খল্লম্লিবনি। ইচেগী থৌজাল অমসুং মঙ্গেস্কর শাগৈগী মিনুংসিনা ঐঙোন্দা লৈরমবা অৱাৎপশিং ঙসিগী শকখঙচে অসিগী খুত্থাঙদা পুথোকপিরক্লি। ঐনা হায়রিবা অৱাৎপশিং অদু মপুং ফাহন্নবা হোৎনগনি।
হন্না হন্না থাগৎচরি!
খুরুমজরি!
