লুপা করোর 860গী মথক্কী চাউখৎ থৌরাংগী প্রোজেক্তশিং হৌদোকখ্রে
“রাজকোত অসি সৌরাস্ত্রগী গ্রোথ ইঞ্জিন অমনি”“ঐহাক্না মতম পুম্বদা রাজকোতকী তোল্লিবা লমন অদু শিংনবা হোৎনরি”ঐখোয়না সুশাসনগী গরেন্তি অমগা লোয়ননা লাকই অমসুং মদু ঐখোয়না ফংহল্লি”“নিও-মিদ্দল ক্লাস অমসুং মিদ্দল ক্লাস অসি সরকারগী অহানবা মীয়েংনি”এয়র সর্ভিসশিং চাউথোকপা হায়বসিনা ভারতকী এভিএসন সেক্তরদা অনৌবা পনখৈ অমা ফংহনবা ঙম্লগনি”“হিংবদা লাইথোকহনবা অমসুং পুন্সি মহিং ফগৎহনবা হায়বসি সরকারগী অহানবা মীৎয়েংশিংগী মরক্তা চল্লি”“ঙসি RERA আইন অসিনা মীওই লাখ কয়াগী শেল মাংবদগী থিংলি”“ঙসিদি ঐখোয়গী য়ুমথংনবা লৈবাকশিংদা ইনফ্লেসন অসি 25-30গী চাংদা হেনগৎলক্লি। অদুবু মসি ভারত্তা থোকত্রি”পুম্নমকপু কমদৌরিবগে? নুংঙাইরিকো?
গুজরাতকী মুখ্য মন্ত্রী, শ্রীমান ভুপেন্দ্র ভাই পতেল, মন্ত্রীমন্দলদা লৈরিবা ঐহাক্কী মরুপ, শ্রী জ্যোতিরাদিত্য সিন্ধিয়াজী, হান্নগী মুখ্য মন্ত্রী, ভাই বিজয় রুপানীজী অমসুং সি.আর. পাতিলজী।
মরুপশিং,
বিজয়নসু ঐহাক্কী ইফমদা হৌজিক্তা হায়রম্মিনি, অদুগা ঐহাক ইশামক্নসু য়েংলম্মিনি। রাজকোত্তা থৌরম অমা পাংথোকপা খুদিংগী ছুতী ওইগেরা ওইরোইরা, নুংথিলগী মতম্বু ওইরবদি মতম অসিদা থৌরম পাংথোক্কে হায়নসু খন্নবা নত্তে। নুমিদাংগী পুং 8কী মতুংদদি পাংথোকপা কাইদবনি, রাজকোত্তদী নুংথিল তুম্বগী হৈনবী অমা লৈবনি। মসি ঐহাক্না চহি কয়াদগী উদুনা লাক্লবনি। অদু ঙসি মতমসিদা লাক্লিবা মীয়াম অসিনা রাজকোতনা রাজকোতকী রেকোর্দ থুগাইরে।
ঙসি অসিদি, রাজকোত খক্তগী নত্তনা অপুনবা সৌরাস্ত্রগী য়াম্না চাউবা নুমিৎ ওইরে। ঐহাক্না থৌরম হৌদ্রিঙৈদা, মহৌশাগী অমাঙ-অতা থোকপগী থৌদোক্না অৱাবা তাহনখ্রবা ইমুংগী অৱাবা মশক খঙদুনা মখোয়গী অৱাবদা ঐহাকসু শরুক য়াজরি। নুমিৎ খরনিগী মমাংদা সাইক্লোন লাকখি, অদুদগী ঈশিং ইচাউনা অমুক্কা হেন্না অৱাবা নংহনখি। মসিগুম্বা ইরাংগী মতমসিদা মীয়াম অমসুং সরকারনা পুন্দুনা শিংনবা অসিগা নীংথিজনা মাইয়োক্নখি। অৱাবা নংলবা ইমুংশিংনা মহৌশাগী পুন্সিদা অথুবা মতমদা হঞ্জিল্লক্নবা ভুপেন্দ্র ভাইগী সরকারনা য়াম্না কন্না হোৎনরি। কেন্দ্র সরকারনসু মসিদা অঙম্বা মতেং পাংলি।
ইচিল ইনাওশিং,
রাজকোতনা হীরম খুদিংদা মাং থানা চৎপগী মতৌ ঐখোয়না মমাংগী চহি খরদা উখ্রে। রাজকোতকী শক্তাক অসি হৌজিক্তি সৌরাস্ত্রগী গ্রোথ ইঞ্জিন অমা হায়নসু ওইরে। মফমসিদা হীরম খুদিংমক লৈ। ইন্দস্ত্রী, ব্যুজিনেস, সংস্কৃতী, চাবা-থকপা পুম্নমক লৈ। অদুবু অৱাৎপা অমদি লৈবগুম্না ফাওই, অদোম্নসু ঐঙোন্দা হঞ্জিন-হঞ্জিন্না হায়রি। মদু ঙসিদি মঙফাওনরে।
নৌনা শাখিবা এয়রপোর্ত্তা ঐহাক্না মতম খরগী মমাংদা লৈবা মতমদা, অদোম্না ইশাগী মঙলান মঙফাওনবগী নুংঙাইবা অদু ঐহাকসু ফাওখি। রাজকোতনা ঐঙোন্দা য়াম্না তম্বীখি হায়না ঐনা মতম পুম্বদা হায়দুনা লাক্লি। ঐহাকপু অহানবা ওইনা এম.এল.এ. ওইহনখি। ঐহাক্কী রাজনীতিগী খোঙচৎপু রাজকোতনা লম্থাবীখি। মরম অদুনা, ঐহাক্না রাজকোতকী মফমদা মতম পুম্বদা লমন তোন্দুনা লৈরগনি। লমন অসিবু শিংদুনা চৎপা হায়বসিনা ঐহাক্না মতম পুম্বদা হোৎনবগী থৌওং অমা ওইরি।
ঙসিদি, রাজকোতনা অনৌবা অমসুং চাউরবা ইন্তর্নেস্নেল এয়রপোর্ত অমা ফংলে। হৌজিক্তি, লৈবাক অমসুং মালেমগী অতোপ্পা শহর কয়াগা রাজকোতকা হকথেংননা ফ্লাইতকী খুত্থাংদা শম্নবগী ৱাফম ওইথোক্লগনি। এয়রপোর্ত অসিদগী চত্থোক-চৎশিন তৌবদা হেন্না নুংঙাইবদি নুংঙাইরগনি, লোয়ননা লমদম অসিগী ইন্দস্ত্রীসু য়াম্না চাউখৎলগনি। ঐহাক্না মুখ্য মন্ত্রী ওইবগী অঙনবা মতমদা এক্সপেরিএন্স য়াম্না লৈরমদে, মতমদুদা ঐহাক্না মফমসি অপীকপা জাপান অমা ওইরক্লি হায়খিবনি, মদুদা মীওই কয়ানা ঐহাকপু করেম্নখি। অদুবু ঙসিদি, মদুগী ৱাহৈদুমক অশেংবা ওইরে।
মরুপশিং,
মফমসিগী লৌমীশিংনা মখোয়গী হেঞ্জাং-নাপী, উহৈ-ৱাহৈশিংবু লৈবাক অমসুং মালেমগী মন্দিশিংদা থাবদা য়াম্না লায়রগনি। মসিনা হায়বদি, রাজকোতনা এয়রপোর্ত অমখক নত্তনা, অপুনবা লমদম অসিদা চাউখৎপগী মঙাল ফংহনবা ঙম্বা, মশা পালহনবা ঙম্বা পাৱরহাউস অমা ফংলবনি।
মরুপশিং,
ঙসি মফমসিদা, সোনী য়োজনাগী মখাদা তোঙান-তোঙানবা প্রোজেক্ত কয়া মীয়ামদা খুৎশিন্নরে। প্রোজেক্তশিং অসি লোইশিনবদগী সৌরাস্ত্রগী খুঙ্গং দর্জন কয়ানা ইরিগেসন অমসুং থক্নবা ঈশিংগী খুদোংচাবা ফংলগনি। মসিদা নত্তনা, রাজকোতকী চাউখৎ থৌরাংগা মরী লৈনবা প্রোজেক্ত কয়া অমসু মীয়ামদা খুৎশিন্নবগী খুদোংচাবসু ঙসি মফমসিদগী ফংজরে। ঐহাক্না প্রোজেক্তশিং অসিগীদমক্তা মীয়াম পুম্নকপু থাগৎলি।
মরুপশিং,
মমাংগী চহি 9সিদা কেন্দ্র সরকারনা খুন্নাইগী কাঙলুপ অমসুং লমদম খুদিংগী মীয়ামগী পুন্সি মহিং লাইহন্নবা থবক পাংথোক্লি। ঐখোয়না অফবা গবর্নেন্স অমসুং নীংথিনা লৈঙাকপগী গেরেন্তী পীদুনা লাক্লি। ঐখোয়না ঙসিদি গেরেন্তীশিং অসিবু অশেংবা ওইবগী মতৌ উবা ফংলি। ঐখোয়না লাইরবা, মাইনোরিতী, শোত্থরবা, ত্রাইবেলগী পুন্সি মহিং হেন্না ফগৎহন্নবা লেপ্তনা হোৎনদুনা লাক্লি।
ঐখোয়গী সরকারগী হোৎনজমন্দগী লৈবাক্কী লাইরবা মশিং খোঙজেল থুনা হন্থরক্লি। হন্দক্তা থোকখিবা রিপোর্ত অমনা ঐখোয়গী সরকারগী চহি 5তা মীওই করোর 13.5না লাইরবগী খয়াত্তগী মনিং তমখি হায়না পল্লি। মসিনা হায়বদি, লাইরবগী খয়াত্তগী থোক্লক্তুনা নিও-মিদ্দল ক্লাস হায়বা অনৌবা কাঙলুপ অমা থোরক্লে হায়বনি। মরম অদুনা, ঐখোয়গী সরকারগী প্রাইওরিতীশিংদা মিদ্দল ক্লাসসু য়াওরি, নিও-মিদ্দল ক্লাসসু য়াওরি।
মরুপশিং,
ইং 2014গী মমাংদা মিদ্দল ক্লাসশিংনা য়াম্না তোয়না ৱাকৎপসি করি মতাংদনো হায়বা অমুক্তা নীশিংবিয়ু। মীয়াম্না হায়নরম্মি। কন্নেক্তিবিতীসু কয়া য়াম্না ফত্ত্রিবনো, চত্থোক-চৎশিন্দা ঐখোয়গী মতম কয়া য়াম্না মাঙই। মীরম লৈবাক্তগী লাকপা মীগী ৱারী তাবা, মীরমগী ফিল্ম য়েংবদা, তি.ভি.দা মীরম লৈবাক উবদা, ঐখোয়গী লৈবাক্তা মসিগুম্না করম্বা মতমদা ওইরক্কদগে হায়না খন্নরম্মি। মখোয়গী সোরোক, এয়রপোর্ত কুম্বসি ঐখোয়গীদা করম্বা মতমদা লৈরক্কনি খন্নরম্মি। স্কুল-কোলেজ চৎপদা, কারবার তৌবদা অৱাবগী অৱাবা ঙাক্তা থেংনরম্মি। লৈবাক্কী কন্নেক্তিবিতী ফিভমসি মসিমক্নি। ঐখোয়না মমাংগী চহি 9সিদা মসিগী শিংনবা অসি লৈহন্দনবা হোৎনখি। 2014দা শুপ্নগী শহর 4দা মেত্রো লৈরম্মি। ঙসিদি, লৈবাক্কী শহর 20 হেনবদা মেত্রো নেতৱর্ক য়ৌরে। লৈবাক্কী তোঙান-তোঙানবা রুত 25দা বন্দে ভারত ত্রেন চেল্লি। 2014দা লৈবাক অসিদা চাউরাক্না এয়রপোর্ত 70গী ময়াদা লৈরম্মি। ঙসিদি, মশিং অসি শরুক অনি হেন্না হেনগৎলে।
এভিএসনগী সেবা পাকথোক চাউথোরকপদগী ভারতকী এয়রলাইন সেক্তরবু মালেমদা অনৌবা অৱাংবা থাক অমদা থমখি। ঙসিদি, ভারতকী কম্পেনীশিংনা লুপা করোর লাক্ষ কয়াগী এরোপ্লেন লীরি। সাইকল, স্কুতর, কার অনৌবা অমা লৈবদা মদুগী মতাংদা ৱারী শান্নবনি। ঙসিদি ভারতনা এরোপ্লেন লিশিংগী অমগী ওর্দর বুক তৌখ্রে। লাক্কদৌরিবা মতমশিংদা এরোপ্লেন লিশিং অনি অমগা বুক তৌবগী ওইথোকপসু লৈরি। গুজরাত মীখল মতমদা, গুজরাত্তা এরোপ্লেন শাবা হৌরক্কদবা মতমদু লাপ্ত্রে হায়না ঐহাক্না হায়বখিবদু অদোম নীংশিংলিবরা খঙদে, ঐহাক্তি নীংশিংলি। গুজরাতনা মাইকৈ অসিদা খোঙজেল য়াম্না চঙশিল্লি।
ইচিল ইনাওশিং,
পুন্সিহিংবদা লাইবা, পুন্সি মহিংগী মগুন, মসিদি ঐখোয়গী সরকারগী মকোক থোংবা প্রাইওরিতীশিংগী মনুংদগী অমনি। মমাংগী মতমদা, লৈবাক মীয়াম্না মখল খুদিংগী শিংনবা মাইয়োক্নরম্মি। মসি ঐখোয়না কাওবা য়াদে। মৈ-ঈশিংগী বিল থীবদসু লাইন্দা লেপ্পা, হোস্পিতালদা লাইয়েংবগীসু অশাংবা লাইন্দা লেপ্পা, ইন্স্যুরেন্স নত্ত্রগা পেন্সনগী কান্নবা লৌবগীসু খুদোংচাবা য়াম্না থেংনরম্মি, তেক্স রিতর্ন ফাইল তৌবগীসু চপ মান্নৈ। বেঙ্ক চত্তুনা থবক অমা তৌরুগে হায়রবদি, মতম অমসুং ইনর্জী য়াম্না মাঙনবনি। ঙসিদি, অদোমগী বেঙ্ক অদোমগী মোবাইল ফোন্দা লাক্লে। অকোনবা ওইনা বেঙ্কতা করি নুমিত্তা চৎলুবগে হায়বা মীওই কয়া অমদি নীংশিংলম্লরোই। চৎপগী মথৌ তাদ্রবনি।
মরুপশিং,
মিদ্দল ক্লাসশিংগী মনাক্তা মশাগী য়ুম লৈজবা হায়বগী মতাংদা মমাংগী সরকারদি করিমত্তা খন্নরমদে। ঐখোয়না মসিগীদমক্তা ৱাজদুনা লাইরবশিংগী ময়ুম লৈজবগী মঙলান মঙফাওনহনখি। পি.এম. অৱাস য়োজনাগী মখাদা মিদ্দল ক্লাস ইমুংশিংদা ময়ুম শাবগী মশক থোকপা সবসিদী পীখি। মসিগী মখাদা, চহিদা লুপা লাক্ষ 18 ফাওবগী শেন্থোক লাকপা ইমুংশিংদা তেংবাং পীখি। হৌজিক ফাওবগী ওইনা, লৈবাক্কী মিদ্দল ক্লাস ইমুং লাক্ষ 6 হেনবদা মসিগী খুদোংচাবা অসি ফংহনখ্রবনি। গুজরাতকী মফমসিদসু, ইমুং লিশিং 60 হেনবনা কেন্দ্র সরকারগী মসিগুম্বা স্কিম অসিগী কান্নবা ফংনখ্রে।
মরুপশিং,
কেন্দ্রদা হান্নগী সরকার পাল্লিঙৈদা, য়ুমগী নমাদা মীনম্বগী থবক তৌই হায়না তাবা ফংলম্মি। চহি কয়া কয়া হৌখ্রবা ফাওবদা য়ুমদা চঙবা ফংনরমদে। য়েংশিনবীনবা কনা অমত্তা লৈরমদে, হংফম অমত্তা লৈরমদে। মীয়ামগী খুদোংচানবগীদমক্তা মতিক চাবা অমসুং মরী লৈনবা আইন শেম্লিবা অসিদি ঐখোয়গী সরকারনি। আইন অসিনা মরম ওইদুনা মীচম মীয়ামগী শেল কনবা ঙমখি।
মরুপশিং,
লৈবাক্কী চাউখৎ থৌরাংনা অসুক য়াম্না খুমাং চাউশিল্লকপা অসিদা নুংঙাইতবা মীওই খরদি লৈরমগনি। মখোয়দি লৈবাক মীয়াম্বু ৱাহল্লগা নুংঙাইবা ফাওবনি। লৈবাক মীয়ামগী অপাম্বা অমসুং খুদোংচাবগী মতাংদা মখোয়দি করিসু নাচুংদে। লৈবাক মীয়ামগী অপাম্বা অসুম ফংলক্লিবা অসি উবদা মখোয়দি মবুক্নিং থীৎলবনি।
শেঞ্জা থুমজা তৌবা অমসুং শাগৈ-নাতৈগী মীওইশিং অসিনা মসিনা মরম ওইরগা মশাগী ‘জমাত’কী মিং ফাওবা ওন্থোকখিবা অদোম্না উরবনি। মায়থোংদি হান্নগুদুমক্নি, পাপ অমসুং থৌওং খুদিংমক হান্নগীদুনি, অদুবু ‘জমাত’কী মমিংদি হোংদোক্লে। মিদ্দল ক্লাসনা করিগুম্বা খরা হোঙনা ফংবা মতমদা, লৌমীশিংদা অচুম্বা মমল করিগী পীদ্রিবনো হায়না মখোয়না ৱাকৎকনি। লৌমীশিংনা শেল হেন্না হেক ফংলগনা, পোৎ তাংবা হেনগৎলে হেক্তা হায়গনি। মায়থোং অনি লৈবগী মসিগুম্বা থৌওং অসিমক মখোয়গী রাজনীতিনি।
পোৎ তাংবগী মতাংদা মখোয়গী ত্রেক রেকোর্দ করিনো হায়বা অমুক্তা য়েংশি। মখোয়না সরকার পাইরিঙৈদা, লৈবাক্কী ইনফ্লেসন্না চাদা 10 ফাওবা য়ৌখিবনি। ঐখোয়গী সরকারনা মসিবু লাকশিল্লমদ্রবদি, ভারতকী ইনফ্লেসন্না ঙসিদি অতিয়া শোকপা ফংলম্লগনি। লৈবাক অসিদা হান্নগী সরকারনা হৌজিকসু পাল্লম্লবদি, শঙ্গোম লিতরদা লুপা 300, হৱাই কিলোদা লুপা 500 য়ৌরম্লগনি। অঙাংশিংগী স্কুল ফীদগী চত্থোক চৎশিনগী ভারানা শরুক অনিদগী হেল্লম্লগনি।
অদুবু মরুপশিং, লাইচৎ থোক্লবসু, রসিয়া য়ুক্রেনগী লান তৌজরবসু, ইফ্লেসনবু লাকশিনবা ঙম্লিবসি ঐখোয়গী সরকারনি। ঙসি, ঐখোয়গী য়ুম্লোন্নবা লৈবাকশিংদা ইনফ্লেসনগী চাংনা চাদা 25-30 দা হেনগৎলি। অদুবু, মসি ভারত্তদি থোক্তে। ঐখোয়না থৱাই হকচাং য়াওনা ইনফ্লেসন লাকশিন্নবা হোৎনরি। মতুংদসু অদুমক হোৎনগনি।
ইচিল ইনাওশিং,
লাইরবশিংগী চাদিং কন্নবা, মিদ্দল ক্লাসকী চাদিং কন্নবা, ঐখোয়গী সরকারনা হোৎনফম থোকপা খুদিংমক হোৎনরি। চহি 9গী মমাংদা, চহিদা লুপা লাক্ষ 2 লাকপা মীওইশিংনা তেক্স থীবা তারম্মিবসি অদোম নীংশিংলমগনি। ঙসিদি, শেন্থোক্না লুপা লাক্ষ 7 ওইরবসু, তেক্স কয়া য়াম্না থীরিবগে? জিরো। লুপা লাক্ষ তরেৎকী শেন্থোক্তা তেক্স অমত্তা থীহন্দ্রবনি। মসিদগী, শহরদা লৈবা মিদ্দল ক্লাসকী ইমুংশিংগী চহি খুদিংগী লুপা লিশিং কয়া কনবা ঙম্লি। ঐখোয়না অপীকপা শেন্দোইদা অচৌবা লোন ফংহল্লি। হন্দক্কী চহিসিদা, EPFOদা 7.45%গী শেন্দোই হায়না লেপখ্রবনি।
মরুপশিং,
ঐখোয়গী সরকারগী পোলিসীনা অদোমগী শেল কয়া য়াম্না কল্লি হায়বগী খুদমদি অদোমগী মোবাইল ফোনসু ওইরি। মসিদা অদোম্না থোইদোক্না খঞ্জিল্লম্লোই। ঙসিদি। লাইরবা ওইগেরা ইনাক খুনবা ওইগেরা পুম্নমক্কে নাক্তা মোবাইল ফোন লৈ। ঙসিদি লৈবাক মীয়াম খুদিংনা থা খুদিংগী চাউরাক্না 20 GB দেতা শিজিন্নৈ। 2014দা 1 GB দেতাগীদমক্তা অদোম্না লুপা 300 পীরম্মি। হান্নগী সরকারদু ঙসি ফাওবা পাল্লম্লবদি, অদোম্না থা খুদিংগী লুপা লিশিং 6কী মোবাইল বিল থীবা তারমগনি। অদুবুন ঙসিদি 20 GBগীদমক্তা লুপা মরি মঙাদগী হেন্না থীবা নত্তে। হয়বদি, ঙসি মীয়ামগী মোবাইলগী বিলদা থাদা লুপা লিশিং 5মুক্তি কল্লে হায়বনি।
মরুপশিং,
সেনিয়র সিতিজন লৈবা ইমুং, হল ওইরবা ইমা-পাবুং লৈবা ইমুংশিং, পুপু বোবোক ওইরো নত্ত্রগা অনাবা অমা য়াওবা ওইরো, হিদাক লাংথক চাং নাইনা লৈবগে মথৌ তারমগনি। মসিদসু ঐখোয়গী সরকারগী স্কিমশিংনা শেল কনবা ঙমহল্লি। হান্নদি, মমল য়াম্না ৱাংনা পীদুনা কৈথেলদগী হিদাক লৈরম্বনি। অৱাবা কয়াসু মসিদা মাইয়োক্নরমগনি। অদুবু, মসিগুম্বা অৱাবা ৱাখললৈহন্দনবা ঐখোয়গী সরকারনা জন ঔশধী কেন্দ্র হাংদুনা হিদাক হোঙনা ফংহল্লি। মসিনসু, লাইরবা অমসুং মিদ্দল ক্লাসকী ইমুংশিংদা চাউরাক্না লুপা করোর লিশিং 20 তিংবদগী কনখ্রবনি। লাইরবগী অপাম্বা খঙবা সরকার, মিদ্দল ক্লাসকী খোঞ্জেল তাবা সরকার অসিনা মীচম মীয়ামগী পুন্সি মহিং নুংঙাইহন্নবগীদমক্তা খোঙথাং অমগী মতুংদা অমা পায়খৎলি।
ইচিল ইনাওশিং,
মফমসিদা, গুজরাত অমসুং সৌরাস্ত্রগী চাউখৎ থৌরাংগীদমক্তা ঐখোয়গী সরকারনা পুকচেল শেংনা হোৎনরি। ঈশিংগী অৱাবা অসি করিনো হায়বসিদি গুজরাত অমসুং সৌরাস্ত্রদগী হেন্না কনানা খঙগনি? সৌনি য়োজনাগী মমাংদা করি ফিভম লৈরম্মি অদুগা মসিগী মতুংদা করি অহোংবা লাক্লে? মসি ঐখোয়গী সৌরাস্ত্রনা উৎলি। সৌরাস্ত্রদা দাম দর্জন কয়া, চেকদাম লিশিং কয়ানা ঙসিদি ঈশিংগী রিসোর্স ওইরে। হর ঘর জল স্কিমগী মখাদা গুজরাতকী ইমুং করোর কয়াদা তোতি ঈশিং য়ৌরে।
মরুপশিং,
মমাংগী চহি 9 অসিদা খোঙথাং কয়া মথং মথং পায়খৎলক্লিবা, মীচম মীয়ামগী সেবা তৌদুনা মখোয়গী তঙাই ফদবা খুদিংমক পীরিবা অসি ঐখোয়গী লৈঙাকপগী মোদেলনি। মোদেল অসিদা লৈবাক্কী মীওই কাঙলুপ খুদিংগী অপাম্ববু ফংহল্লি। চাউখৎপা ভারত অমা পুরক্নবা মসিনা ঐখোয়গী পাম্বৈনি, লম্বীনি। লম্বী অসিদা চত্তুনা ঐখোয়না অমৃতকালগী ৱাশক খুদিংমক ফংবা ঙমগদৌরিবনি।
রাজকোত্তগী মশিং য়াম্লবা অদোম্না লাকপীবা, অদোম্না খুদিংনা অনৌবা ইন্তর্নেস্নেল এয়রপোর্ত অমা ফংলিবা, অদুগা অতোপ্পা প্রোজেক্ত কয়া অমগী শক্তম অমসু উরে, ঐহাক্কী সৌরাস্ত্র অমসুং গুজরাতকী রাজকোতকী মীয়াম্না মসিগী খুদোংচাবা কয়া অসি ফংলিবনি। মসিগীদমক্তা ঐহাক্না পুম্নমকপু থাগৎচরি। য়াইফ পাউজেল কয়া অমসু পীজরি। অদুগা, ভুপেন্দ্র ভাইগী সরকারনা অদোমগী অনিংবা অপাম্বা খুদিংমক লোয়না মঙফাওনহনগনি হায়বসি ঐহাক্কী থাজবনি।
ঐহাক্না ঙসিগী ইকায় খুম্নবা, ঐহাকপু তরাম্না ওকপীবা অসিগীদমক্তা পুম্নমকপু অমুক্কা হন্না থম্মোই শেংনা থাগৎচরি।
হন্না হন্না থাগৎচরি!
