খুমরুমজরি,
ঐহাক্কী মাংদা ফজরবা মমি অমা উবা ফংলি। মসি য়াম্না চাউই, মতিক লৈ অমসুং য়াম্না ফজৈ। অমসুং ঙসিগী থৌরম অসিদা মসিগী নুংদা লৈরিবা ৱাখল্লোন অদুগা লোয়ননা ঐখোয়গী মীৎমাংদা মঙলান অসি মঙফাওনবা উবা ফংবদা ঐহাক্না মমিং লৈরবা শরৈ অমদগী পরৈ খরা থমজনীংই:
नया प्रात है, नई बात है, नई किरण है, ज्योति नई।
नई उमंगें, नई तरंगे, नई आस है, साँस नई।
उठो धरा के अमर सपूतो, पुनः नया निर्माण करो।
जन-जन के जीवन में फिर से नई स्फूर्ति, नव प्राण भरो।
(মসি অনৌবা অয়ুক অমনি, অনৌবা পোৎশক অমনি, অনৌবা মঙাল অমনি।
অনৌবা আশা, অনৌবা ইনোৎ, অনৌবা মঙাল, অনৌবা শ্বর।
হৌগৎলো, লমদম অসিগী অমর ওইরবা মচাশিং, অনৌবা অমা শেমগৎলসি।
মীপুম খুদিংমক্কী পুন্সিদা অনৌবা শক্তি, অনৌবা পুন্সি য়েনীং চোংহল্লসি।)
ঙসি অথোইবা অমসুং অচৌবা ‘ভারত মন্দপম’ উবদা ভারত মচা খুদিংমক হরাও নুংঙাইবনা অমসুং চাউথোকচবনা থল্লি। ‘ভারত মন্দপম’ অসি ভারতকী তৌবা ঙম্বা অমসুং অনৌবা শক্তি মীৎয়েং তানবা চেপাও অমনি। ‘ভারত মন্দপম’ অসি ভারতকী মতিক ময়াই অমসুং মাগী ৱিলপাৱরগী বিজন অমনি। কোরোনা ভাইরসকী শীংনবনা থল্লবা মতমগী মনুংদা মফম খুদিংমক লেপ্পা মতমদা ঐখোয়গী শিন্মীশিংনা মসি শাবা লোইশিন্নবা অয়ুক নুংঙাই থবক শুখি।
ঐহাক্না ‘ভারত মন্দপম’ শাবগা মরী লৈনবা শিন্মী, ইচিল-ইনাও খুদিংমক্তা থমোয় শেংনা থাগৎপা ফোঙদোকচরি অমসুং য়াইফ-মঙ্গোল পীজরি। ঙসি অয়ুক ঐহাক্না শিন্মীশিং অসি উনবগী খুদোংচাবা ফংখি অমসুং মখোয়বু ইকাই খুম্নবা উৎপা ফংজবা অসি ঐহাক্কী লাইবক ফবনি। ঙসি ভারত পুম্বনা মখোয়না কন্না হোৎনরিবা অসিদা অঙকপা পোক্নখি।
ঐহাক্না কোনুং ওইরিবা দিল্লীগী মীয়াম অমসুং জাতি পুম্বগী মীয়ামবু অনৌবা ইন্তর্নেস্নেল কনভেন্সন সেন্তর – ‘ভারত মন্দপম’ শঙ্গাবদা থমোয় শেংনা নুংঙাইবা ফোঙদোকচরি। ঐহাক্না লৈবাক্কী তোঙান-তোঙানবা মফমশিংদগী লাকপা মীথুংলেন পুম্নমকপু তরাম্না ওকচরি। তেলিবিজন অমসুং সোসিএল মেদিয়াগী খুত্থাংদা য়াওরক্নবা মীওই করোর কয়াদা হায়খ্রে।
মরুপশিং,
ঙসি অসি লৈবাক্কী প্রজা খুদিংমক্কী ওইনা পুৱারী ওইরবা নুমিৎ অমনি মরমদি ঙসি অসি কার্গিল বিজয় দিবস তারি। লৈবাক্কী য়েক্নবশিংগী তমথিরবা মতৌ অদুবু ইমা ভারতকী মচা নুপা অমসুং মচা নুপীশিংগী মতিক ময়াইনা মাইথিবা পীখি। তৌবীমল খঙবা উৎলিবা লৈবাক অমগী মহুৎ শিন্দুনা ঐহাক্না কার্গিল লানশিংদা থৱায়না পোন্থা পীখ্রবা অথৌবশিংদা ঐহাক্না ইকাই খুম্নবা উৎচরি।
মরুপশিং,
পিয়ুশজীনা হৌজিক ফোঙদোকখ্রে মদুদি ‘ভারত মন্দপম’ অসি ভগৱান বাসাবেশ্বরাগী ‘অনুভাবা মন্তপা’না ইথিল পীখি। ‘অনুভাবা মন্তপা’ (মালেমগী অহানবা পার্লিয়ামেন্ত হায়না তোইনা পল্লিবা) অসিনা দিবেৎ, খন্ন-নৈনবা অমসুং ৱাখল্লোনশিং ফোঙদোক্নবগী দেমোক্রেতিক প্লেৎফোর্ম অমা তাক্লি। ঙসি মালেম্না ভারতপু দেমোক্রেসীগী মমা হায়না শকখঙলি। তামিল নাদুগী উথিরামেরুরদা ফংখিবা অরিবা ইনস্ক্রিপ্সনশিংদগী হৌরগা বাইশালিগুম্বা মফমশিংনা ভারতকী অচৌবা দেমোক্রেসী অসি ঐখোয়গী চহিচা কয়াদগী চাউথোকচনীংঙাই ওইদুনা লাকখি।
ঐখোয়না নীংতম্বগী চহি 75 শুরকপগী অমৃত মহোৎসব পালন তৌবা অসিদা ‘ভারত মন্দপম’না ঐখোয়দগী, ভারত মচাশিংদগী ঐখোয়গী দেমোক্রেসীদা পীবা ফজবা খুদোল অমনি। চয়োল খরগী মতুংদা মফম অসিমক্তদা G-20গা মরী লৈনবা ইভেন্তশিং পাঙথোক্কনি হায়রিবা অসিদা মালেমগী মরু ওইবা লৈবাকশিংদগী লুচিংবশিংনা শরুক য়াগনি। ভারতনা পাইখৎলক্লিবা খোঙথাংশিং অমসুং লৈরিবা থাক হৈনগৎলক্কিবা অসি অচৌবা ‘ভারত মন্দপম’ অসিগী খুত্থাংদা মালেম পুম্বনা উবা ফংলগনি।
মরুপশিং,
ঙসিগী অমগা অমগা মরী লৈনবা অমসুং অমনা অমগী মপাল তাংলিবা মালেম অসিদা মালেমগী থাক্তা প্রোগ্রাম অমসুং সম্মিৎ মথং-মথং লেপ্পা লৈতনা পাঙথোক্লি, করিগুম্বা মতমদা লৈবাক অমদা অমসুং অতোপ্পা অমদা পাঙথোক্নরি। মরম অসিনা ভারতনা মরু ওইনা কোনুং দিল্লীদা ইন্তর্নেস্নেল-লেবেল কনভেন্সন সেন্তর অমা থম্বা তঙাই ফদে। হৌজিক লৈরিবা ফেসিলিতীশিং অমসুং হোলশিং অসি হৌখিবা চহিচাদা দিকেদ কয়াগী মমাংদা শাখিবনি, মসিনা 21শুবা চহিচাগী ভারতকী খোঙজেল অসিগা চুনবা ওইদ্রে। ঐখোয়না ভারতকী খোঙজেলগা চুনবা 21শুবা চহিচাগী মথৌ তাবশিং থুংহল্লিবা ফেসিলিতীশিং শাবা মথৌ তাই।
মরম অসিনা মসিগী অচৌবা ক্রিএসন ‘ভারত মন্দপম’ অসি হৌজিক ঐগী ইরৈবাকচাশিং অমসুং নখোয়গী মাংদা লৈররে। ‘ভারত মন্দপম’ অসিনা ভারত অমসুং মপালদগী অচৌবা একজিবিতরশিংদা মতেং পাংলগনি। ‘ভারত মন্দপম’ অসিনা লৈবাক অসিদা কনফরেন্স তুরিজমগী অচৌবা হব অমা ওইরগনি। ‘ভারত মন্দপম’না ঐখোয়গী স্তার্ত-অপশিংগী শক্তি উৎনবা মেদিয়ম অমা ওইরগনি। ‘ভারত মন্দপম’না ঐখোয়গী সিনেমা ইন্দস্ত্রী অমসুং আর্তিস্তশিংগী পর্ফোরমেন্স উৎলগনি।
‘ভারত মন্দপম’না ঐখোয়গী আর্তিসেনশিং অমসুং ক্রাফমেনগী হোৎনবা কনবা মতৌ অদু উৎনবা মরু ওইবা ফম্পাক অমা ওইরগনি, মসিনা আত্মনির্ভর ভারত অমসুং ভোকেল ফোর লোকেল কেম্পেনশিংদা শরুক তম্লগনি। অমরোমদা ‘ভারত মন্দপম’না ইকনোমীদগী ইকোলোজী অমসুং ত্রেদতগী তেক্নোলোজী ফাওবগী খোঙথাং মখল কয়া মরুমগীদমক অচৌবা ফম্পাক অমা ওইরগনি।
মরুপশিং,
‘ভারত মন্দপম’গুম্বা ফেসিলিতীশিং শাবা অসি দিকেদ কয়াগী মমাংদা তৌরমগদবনি। অদুবু ঐহাক্না থাজৈ থবক কয়া ঐহাক্না পাঙথোকউ হায়না তম্বীরমখি। অমসুং ঐহাক্না উবা ফংই মদুদি লৈবাক অমা হেক্তনা ওলিম্পিক সম্মিৎ নত্ত্রগা অচৌবা ইভেন্ত অমা পাঙথোকপা মতমদা মাগী মশক অসি মালেমগী থাক্তা শীংথানীংঙাই ওইনা অহোংবা লাকই। মালেমদা অসিগুম্বা থৌরমশিংগী মরু ওইবা অসি চাউনা হেনগৎলক্লি অমসুং লৈবাক্কী প্রোফাইল অসি য়াম্না মরু ওই। অসিগুম্বা ইস্তাব্লিশমেন্তশিংনা নাকল অমা নত্ত্রগা অমদা মগুন হাপ্পী।
অদুবু লৈবাক অসিদা তোঙানবা ৱাখল্লোন চেনবা মীওইশিংসু লৈ। ঐখোয়দা ফত্তবা ৱাখল খনবা মীগী অৱাৎপা লৈতে। প্রোজেক্ত অসি শাবদা অপনবা পীনবা ফত্তবা ৱাখল চেনবা মীওইশিংনা কয়ারক হোৎনখি। মখোয়না আইনগী ওইনা লাঞ্জং কয়াদা চাউনা অকাইবা কয়া থোকহল্লি। অদুম ওইনমক অচুম্বা লৈবা মফমদদি ঈশ্বরসু লৈ। অদুবু হৌজিক মসিগী ফজবা মফম অসি নখোয়গী মীৎমাংদা লৈরে।
তশেংবদি মীওই খরনা অফবা থবক তৌবদা অপনবা পীনীংবা অমসুং য়েৎনীংবা মীওই খরা লৈ। নখোয়না খঙলমগনি মদুদি ‘কর্তাব্যা পথ’কী থবক চত্থবা মতমদা করম্বা মখলগী ৱারীশিং শন্দোক্লি, করিনা ব্রেকিং ন্যুজ (তেলিবিজন্দা) ওইরি অমসুং পাউচেগী অহানবা লমাই ওইখি! কোর্তশিংদা কেস কয়ামরুম পুখৎলকখি। অদুবু হৌজিক ‘কর্তাব্য পথ’ অসি শাখ্রে, য়ানীংলমদবা মীওইশিংনসু মসি পোজিতিব দিবেলপমেন্ত অমনি, লৈবাক্কী ইকাই খুম্নবা হেনগৎহল্লি য়াজরি। ঐহাক্না থাজৈ মদুদি মতম খরগী মতুংদা ‘ভারত মন্দপম’ য়ানীংলমদবা মীওইশিংনসু মখোয়গী থমোয়দা মসি মরু ওই হায়না য়াজরক্কনি, মফম অসিদা লাক্তুনা লেকচরশিং পীরবা নত্ত্রগা মফম অসিদা পাঙথোকপা থৌরমশিংদা শরুক য়ারবা য়ানা লৈ।
মরুপশিং,
মচেৎ-মচেৎ খনবা অমসুং থবক তৌরগা লৈবাক নত্ত্রগা খুন্নাই অমত্তা চাউখৎপা ঙমলোই। ঙসি, কনভেন্সন সেন্তর, ‘ভারত মন্দপম’ অসিনা মীৎয়েং শান্না য়েংদুনা হোলিস্তিক ওইবা মওংদা ঐখোয়গী সরকারনা করম্না থবক তৌবগে হায়বগী শাখি অমসু ওইরি। ঙসি ভারতনা লৈবাক 160 হেনবগী ই-কনফরেন্স বিজাশিং পীদুনা মীয়াম্না অসিগুম্বা সেন্তরশিং অসিদা লাকপদা লাইথোকহল্লি অমসুং ভারত অমদি মপালদগী অচৌবা কম্পনীশিংবু তরাম্না ওক্লি। মসি মফম অসি শেম্বা খক্তগী ৱাফম নত্তে; মসিদা অপুনবা সপ্লাই চেন, সিস্তেমশিং অমসুং শিল-লাংবশিং য়াওরি।
2014দা দিল্লী এয়রপোর্তগী কেপাসিতী অসি চহিদা পেসেঞ্জর করোর 5 হেন্দল তৌবা ঙমখি। ঙসি মসি চহিদা পেসেঞ্জর করোর 7.5 হেন্না হেন্দল তৌবা ঙমদুনা হেনগৎহনখ্রে। তর্মিনেল 2 অমসুং ফোর্থ রনৱেসু মথৌ তৌবা হৌখ্রে। গ্রেতর নোইদাগী জেৱরদা ইন্তর্নেস্নেল এয়রপোর্ত মথৌ তৌবা হৌখিবগা লোয়ননা মসিনা হেন্না শাহৌ পীরগনি। হৌখিবা চহি খরা অসিদা দিল্লী-NCRগী হোতেল ইন্দস্ত্রীসু চাউনা পাকথোক চাউথোকপা উবা ফংখি। মসিগী ৱাহন্থোক্তি ঐখোয়না পোরম নীংথিনা য়াৎপা মওং অমদা কনফরেন্স তুরিজমগীদমক মপুং ফাবা ইকোসিস্তেম অমা শেম্নবা অকনবা খোঙথাংশিং লৌখৎলে হায়বনি।
মরুপশিং,
চাউখৎ থৌরাংশিং অসিগী মথক্তা কোনুং সহর ওইরিবা দিল্লীদা কনস্ত্রক্সন প্রোজেক্তশিং অসি পাইখৎপনা লৈবাক অসিবু চাউথোকচবা পোকহনবদা শরুক তম্মি। লৈবাক্কী অনৌবা পার্লিয়ামেন্ত অসি উরবা মতুংদা ঙক ৱাংনা হাইগৎতুনা চৎলোইদবা ভারত মচা অমত্তা লৈতে। ঙসি দিল্লীদা নেস্নেল ৱার মেমোরিএল, পুলিস মেমোরিএল অমসুং বাবা সাহেব অম্বেদকর মেমোরিএল লৈরে। কর্তাব্য পথকী অকোইবদা লৈরিবা মফমশিং অসি মতমগা চুনবা সরকারগী লোইশঙশিং অমসুং ফেসিলিতীশিং শাগৎলকপগা লোয়ননা খোঙজেল য়াংনা চাউখৎলকপা উবা ফংলি। ঐখোয়গী ৱার্ক কলচর লোয়ননা ৱার্ক এনভাইর্নমেন্তদা অহোংবা পুরকপসু মথৌ তাই।
প্রধান মন্ত্রী সংগ্রালয়না অনৌবা মীরোলদা লৈবাক্কী মমাংগী প্রধান মন্ত্রী পুম্নমক্কী মরমদা খঙহৌনবা খুদোংচাবা অমা পীবা ঐখোয়না উবা ফংখ্রে। অথুবদা দিল্লীদা অমসুং নখোয় অমদি মালেমগীদমক নুংঙাইবা পাও অমা পুরক্লগনি, মালেমগী খ্বাইদগী চাউবা অমসুং ঐহাক্না মালেমগী খ্বাইদগী চাউবা হায়রিবা অসি মালেমগী খ্বাইদগী চাউবা ম্যুজিয়ম য়ুগে য়ুগীন ভারত শারগনি।
মরুপশিং ,
ঙসি মালেম পুম্বনা ভারত্তা মীৎয়েং থম্নরক্লি। ঙসি ভারতনা অমুক্তা খল্লুদবা, কনাগুম্বা অমনা খনবা ঙম্বগী ৱাংমদা লৈবা কয়া ফংবা ঙম্লি। চাউখৎনবা অমসুং খুমাং চাউশিন্নবা ঐখোয়না অচৌবা পান্দমশিংগীদমক অচৌবা ৱাখল অমসুং পান্দম থম্বা তাই। মরম অসিনা ভারতনা ‘থিং বিগ, দ্রীম বিগ, এক্ত বিগ’কী ৱাখল্লোনগা লোয়ননা মাংদা খোঙজেল য়াংনা চংশিল্লি। হায়নবা লৈ, ‘অতিয়া পক্না ৱাংবা’। ঐখোয়না হেন্না চাউবা, হেন্না ফবা অমসুং মমাংদগী হেন্না খোঙজেল য়াংবা মওংদা চংশিল্লি।
ভারতকী ইনফ্রাস্ত্রকচর অসি নোংপোক্তগী নোংচুপ, অৱাংদগী খা তম্না অওনবা পুরক্লি। মালেমগী খ্বাইদগী চাউবা সোলর ৱিন্দ পার্ক ভারত্তা শারি। ভারতনা ঙসি মালেমগী খ্বাইদগী ৱাংবা রেল ব্রিজ লৈবগীদমক চাউথোকচবা পোক্লি। ঙসি ভারত্তা ফীৎ 10,000 হেনবগী অলতিত্যুদ অমদা মালেমগী খ্বাইদগী শাংবা তন্নেল শারি। মালেমগী খ্বাইদগী ৱাংবা মোতোরেবল রোদ ভারত্তা লৈ। ভারত্তা মালেমগী খ্বাইদগী চাউবা ক্রিকেৎ স্তেদিয়ম লৈ। ভারত্তা মালেমগী খ্বাইদগী ৱাংবা মীতম লৈ। মসিগী মথক্তা ভারত্তা এসিয়াগী অনিশুবা খ্বাইদগী চাউবা রেল-রোদ ব্রিজসু লৈরি। ভারত অসি পাকচাউনা গ্রীন হাইদ্রোজেন্দা থবক কন্না পাইখৎলিবা লৈবাকশিংগী মনুংদা চল্লি।
মরুপশিং,
ঙসি জাতি পুম্বনা ঐখোয়গী সরকারগী হৌজিক লৈরিবা তর্মগী ফলশিং অমসুং মমাংগী তর্মদা মাইপাকখিবশিং উবা ফংলি। লৈবাক্কী থাজবা অসি হৌজিক মরা চেৎলি মরম অসিনা ভারতকী চাউখৎ থৌরাংগী খোঙচৎ অপনবা লৈররোই। নখোয়না খঙই মদুদি ঐখোয়গী অহানবা তর্মগী অহৌবদা ভারত অসি মালেমগী ইকনোমীগী 10শুবা রেঙ্কতা লৈরমখি। মীয়াম্না অহানবা তর্মদা ঐহাক্না থৌদাং কয়া পীনবীদুনা থজবা থম্বা মতমদা ঐখোয়না নম্বর তেনদা লৈরমখি। অনিশুবা তর্মদা ঙসি ভারতনা মালেমগী মঙাশুবা খ্বাইদগী চাউবা ইকনোমী ওইবা ঙমখি। অমসুং ঐহাক্না মসি হায়জরিবা অসি ত্রেক রেকোর্দতা য়ুম্ফম ওইরগনি শুপ্নগী ৱাহৈনা পংহায় হায়বা নত্তে।
ঙসি ঐহাক্না জাতিদা থাজবা পীরি মদুদি অহুমশুবা তর্মদ ভারতনা মালেমগী মকোক থোংবা ইকনোমী অহুমগী মনুংদা চল্লগনি। চুম্মি, ঐগী মরুপশিং, অহুমশুবা তর্মদা ভারতনা মকোক থোংবা ইকনোমী অহুমদা চন্দুনা চাউথোকচবা পোকহল্লগনি অমসুং মসি মোদীগী গরেন্তীনি। ঐহাক্না প্রজাশিংদা থাজবা পীরি মদুদি 2024 মীখলশিংগী মতুংদা ঐখোয়গী অহুমশুবা তর্মদা লৈবাক্কী চাউখৎপা হেন্না খোঙজেল য়াংবা উবা ফংগনি। ঐহাক্কী অহুমশুবা তর্মদা নখোয়না নখোয়গী মঙলানশিং নখোয়গী মীৎমাংদা মঙফাওনবা উবা ফংগনি।
মরুপশিং,
ঙসিদি, ভারতনা অনৌবা চাউখৎ থৌরাংগী ইহৌ অমা হৌরি। হৌখিবা চহি মাপল অসিদা ভারত্তা মতমগা চুনরবা ইনফ্রাস্ত্রকচরশিং শেমগৎনবা চাউরাকনা করোর লাখ 34 ইনবেস্ত তৌখ্রে। চৎলিবা চহি অসিদা কেপিতেল এক্সপেন্দিচরগী ওইনা করোর লাখ 10 থাদখ্রে। অনৌবা এয়রপোর্ত, এক্সপ্রেসৱে, রেলৱে রুতশিং, থোঙশি, হোস্পিতালশিং শেমগৎপগী খোঙজেল অসি ভারত্তা অঙকপা ফংনা ফগৎলি।
হৌখিবা চহি 70 অসিদা অদুগা মসি ঐহাক্না কনাগুম্বা অমত্তগী মায়োক্তা ফোঙদোকচবা নত্তে অদুম ওইনমক হৌখিবা থৌদোক অসি খংজিন্নবা রিফরেন্স খরদি য়াম্না মরুওই। মরম অদুনা ঐহাক্না রিফরেন্সতা য়ুম্ফম ওইরগা ফোঙদোকচরি। হৌখিবা চহি 70 অসিদা ভারত্তা রেলৱে লাইনগী চাউরাক্না কিলোমীতর 20,000 খক্তা ইলেক্ত্রিফাই তৌরম্মি। অদুম ওইনমক হৌখিবা চহি মাপন অসিদা ভারত্তা চাউরাক্না কিমোমীতর 40,000গী রেলৱে কাইন ইলেক্ত্রিফাই তৌখ্রে। 2014গী মমাংদা থা খুদিংগী ঐখোবগী লৈবাক অসিদা মেত্রো লাইনগী মীতর 600 কিলোমীতর নত্তবীদা শেমলম্মি। ঙসিদি ভারতনা থা খুদিংগী অনৌবা মেত্রো লাইনগী কিলোমীতর 6 হাপচিল্লি।
2014 গী মমাংদা লৈবাক অসিদা খুঙ্গংগী লম্বী কিলোমীতর লাখ 4দগী তানা লৈরম্মি। ঙসিদি লৈবাক অসিগী খুঙ্গংগী লম্বী কিলোমীতর লাখ 7.5 হেন্না লৈরে। 2014গী মমাংদা লৈবাক অসিগী এয়রপোর্ত 70 খক্তা লৈরম্মি। ঙসিদি ভারত্তা এয়রপোর্তকি মশিং অসি 150দা হেনগৎখ্রে। 2014গী মমাংদা সিতি গ্যাস দিস্ত্রিব্যুসন সিস্তেম অসি সহর 60 খক্তদা লৈরম্মি। হৌজিক্তি সিতি গ্যাস দিস্ত্রিব্যুসন সিস্তেম অসি লৈবাক অসিগী সহর 600তা ফংহল্লে।
মরুপশিং,
ভারত অসি খুমাং চাউশিল্লি অমসুং মাংলোমদা চংশিল্লি, অরিবা শিংনবশিং কোকহল্লি অমসুং মতম পুম্বগী ওইবা সোলুসনশিং থিরি। তোঙান তোঙানবা ইসু কয়ামরুমগী অরোইবা সোলুসন থিবদা মীৎয়েং চংলি। মসিগী এপ্রোচ অসিগী খুদম অমদি পি.এম. গতি শক্তি নেস্নেল প্লান অসিনি। ইন্দস্ত্রীগী মরুপশিং মফম অসিদা ফম্লি অমসুং ঐহাক্না পোর্তেল অসি এক্সপ্লোর তৌবীনবা খংহনজরি। রেলৱেজ, লম্বী, স্কুল, হোস্পিতালগুম্বা ফিজিকেল ইনফ্রাস্ত্রকচর অমসুং সোসিএল ইনফ্রাস্ত্রকচর পি.এম. গতি শক্তি নেস্নেল মাস্তর প্লান অসি গেম চেঞ্জর অমা ওইগদৌরি। মসিনা লৈবাক অসিগী শেল অমসুং মতম্বু নীংথিজনা শিজিন্ননবা তোঙান তোঙানবা লেয়র 1600 হেনবদগী দিজিতেল প্লেতফোর্মশিংদা দেতাশিং ইন্তিগ্রেতেদ তৌরি।
মরুপশিং,
ঙসিদি ভারতকী অচৌবা খুদোংচাবা অমা মাংদা তাদুনা লৈরে। ঐহাক্না ঙসিদগী চহি 100গী মমাংগী চহিচা অদুগী মতাংদা হায়বদি, ভারতনা মমাংগী চহিচাগী অহুমশুবা দিকেদতা নীতম ইহৌ হৌরিঙৈ মতমগী মতাংদা ফোঙদোকচগে। ঐহাক্না পুম্নমকপু হৌখিবা চহিচাগী অহুমশুবা দিকেদ হাববদি 1923-1930 অসিগী মতাংদনি অমসুং মসি ভারতকী নীংতম ইহৌগী মতাংদা য়াম্না মরুওইবা মতম অমনি। মসিগা চপ মান্ননা 21শুবা চহিচা অসিগী অহুমশুবা দিকেদ অসি য়াম্না মরুওই।
হৌখিবা চহিচাগী অহুমশুবা দিকেদতা খোঞ্জেল অমনা নিনখি; মদুগী পান্দমদি ‘স্বারাজ’ (মশানা লৈঙাকপা) ফংনবনি। ঙসি ঐখোয়গী পান্দমদি নুংঙাই য়াইফবা ভারত অমা, চাউখৎলবা ভারত অমা শেম্বনি। মদুগী অহুমশুবা দিকেদ অদুগী মনুংদা লৈবাক অসিনা নীংতম্বগী খোঙজং চংশিনখি অমসুং নীংতম্বগী খোলাউ কয়ানা ভারতকী মফম শিনবা থুংনা নিনখি। স্বারাজ ইহৌগী ইচেল খুদিংমক রিভোলুসন নত্রগা নন-কোওপরেতিবগী লম্বেলনা থনখি। মসিগী ফল ওইনা লৈবক অসিনা চহি 25গী মনুংদা নীংতম্বা ফংখি অমসুং ঐখোয়গী নীংতম্বগী মাংলান অদু মংফাওনহনখি। চৎলিবা চহিচা অসিগী অহুমশুবা দিকেদ অসিদা মথংগী চহি 25গী ওইনা ঐখোয়গী অনৌবা পান্দমশিং লৈরি। নুংঙাই য়াইফবা ভারত অমা অমসুং চাউখৎলবা ভারত অমগী মংলানগা লোয়ননা ঐখোয়না মসিগী খোংচৎ অসিদা খোঙ থাংজিনখিবনি। ঐখোয়না ভারত অসি অনৌবা পনখৈ অমদা পুনবা অমসুং নীংতম লান্মীশিংনা মংজরম্বা মংলানশিং ফংনবা পান্দম থম্লি।
মসিগী ৱারেপ অসি থুংহন্নবা ভারতকী নাগরিক খুদিংমক, ভারত মচা করোর 140না অয়ুক নুমিদাং খাইদনা মতেং পাংগদবনি। ঐহাক্না থেংনরকপগী মতুং ইন্না ঐহাক্না মাইপাকপা অমগী মতুংদা মাইপাকপা অমা থেংনরে। ঐহাক্না লৈবাক অসিগী মপাঙ্গল খংলে, মসিগী তৌবা ঙম্বশিং খংলে অমসুং মসিদা য়ুম্ফম ওইরগা ঐহাক্না থাজবা অমগা লোয়ননা হায়রি, মসিগী ভারত মন্দপম অসিদা লেপতুনা অমসুং মসিগী তৌবা ঙম্বা ভারতকী মীয়াম অসিগী মমাংদা ভারতনা চাউখৎলবা লৈবাক অমা ওইবা ঙমগনি মসি শোইদনা ওইথোক্কনি। ভারতনা লাইরবা মুত্থৎপা ঙমগনি, শোইদনা মুত্থৎপা ঙঞগনি। মসিগী থাজবা অসিগী মরুমদা লৈরিবা হৌরকফম অদু ঙসি ঐহাক্না নখোয়গী বফমদা ফোঙদোকচরি।
নিতি আয়োগকী রিপোর্তকী মতুং ইন্না হৌখিবা চহি মঙাখক অসিদা ভারত্তা মীওই মীওই করোর 13.5 হেনবনা লাইরবগী পনখৈদগী লান্থোকপা ঙমখ্রে। মসিগী মথক্তা মালেমগী এজেন্সীশিং ভারত্তা লাইরবশিং মতম খরগী মনুংদা মুথৎক্রগনি হায়না ফোঙদোক্লি। মসসিনা তাকপদি হৌখিবা চহি মাপন অসিদা লৈবাক অসিনা পাইখৎখিবা থৌশিল অমসুং লৌখিবা ৱারেপশিং অসি অচুম্বা মাইকৈদা চৎলি হায়বনি।
মরুপশিং,
পুকচেল শেংবা ৱাখল্লোন অমসুং অচুম্বা থৌশিলশিংনা লৈবাক অসিনা চাউখৎপা পুরক্কনি। ঐখোয়না G-20 অসি সহর নত্রগা মফম অমখক্তদা পাংথোক্তে। ঐখোয়না G-20 মীফমশিং অসি লৈবাক অসিগী সহর 50 হেনবদা পাংথোকখি। ঐখোয়না ভারতকী তোঙান তোঙানবা চৎন-লোনচৎশিং অদু মসিগী খুত্থাংদা উৎখি। ঐখোয়না মালেমদা ভারতকী কলচরেল পাৱর করিনো, ভারতকী হেরিতেজ করিনো হায়বা উৎখি”
ঙসিদি মালেম পুম্বদগী মীয়াম্না ভারত্তা থৌরম অসি শরুক য়াবা লাক্লি। G-20 মীফমশিংগী সহর কয়ামরুমদা পাংথোকপা অসিনা অনৌবা ফেসিলিতী কয়ামরুম শারে অমসুং অরিবা ফেসিলিতীশিং অসি নৌনা শেমগৎতুনা লৈবাক অমসুং লৈবাক অসিগী মীয়ামদা কান্নবা ফংহল্লে। মসি অফবা লৈঙাক শাসন অমগী অচৌবা খুদম অমনি। ঐখোয়না নেসন ফর্স্ত, সিতিজন ফর্স্ত হায়বগী ৱাখল্লোন্দা ভারত অসি চাউখৎলবা লৈবাক অমা ওইহল্লগনি।
মরুপশিং,
মসিগী মরুওইবা থৌরম অসিদা মখোয় পুম্নমক্না লাক্লিবা অসি নখোয়গী থমোইদা চেৎনা থম্লিবা ভারতকী মংলানশিং অদু মংফাওননবনি। অমুক্কা হন্না ঐহাক্না দিল্লীগী মীয়াম অমসুং লৈবাক অসিগী মীয়াম্বু ‘ভারত মন্দপমগুম্বা’ মসিগী শীংথানীংঙাই ওইরবা ফেসিলিতী অসিগীদমক থাগৎপা ফোঙদোকচরি। মশিং য়াম্না তিল্লিবা মীয়াম্বু ঐহাক্না পুকচেল শেংনা থাগৎপা ফোঙদোকচরি অমসুং ঐহাক্না পুম্নমকপু য়াইফ-মঙ্গল পীজরি।
থাগৎচরি!
