কেন্দ্রগী কেবিনেত্তা ঐগা থবক তৌমিন্নরিবা, শ্রীমতি নির্মলা সিতারামন জি, শ্রী রাও ইন্দরজিত সিং, পঙ্কজ চৌধরী জী, শ্রী ভগৱত কৃষ্ণরাও কারদ জী, অতোপ্পা দিগ্নিতরীশিং, তিনবীরিবা ইবেম্মা অমসুং ইবুংঙোশিং!
হৌখিবা চহি কয়াদা, ফাইনান্স অমসুং কোর্পোরেত এফিয়র্স মন্ত্রালয়না মতম চানা চপ চাবা ৱারেপ লৌদুনা মখোয় মশাগী ওইবা লিগেসী অমা শেমখি, য়াম্না শিংথানিংঙাই ওইবা খোংচৎ অমা চৎলকখি। নখোয় পুম্নমক মসিগী লিগেসী অসিগী শরুক অমনি। লৈবাক অসিগী মীচম প্রজাশিংগী পুনশিবু লাইহনববু ওইরো, নত্রগা লৈবাক অসিগী ইকোনোমী অসিবু ফগৎহনববু ওইরো, ঐখোয়গী মরুপ-মপাং কয়া অমনা হৌখিবা চহি ৭৫ অসিদা য়াম্না চাউবা কন্ত্রিব্যুশন তৌরমখি।
আইকোনিক ৱিক অসি, হৌখিবা মতমশিংদা অসিগুম্না হোৎনখিবা খুদিংমকপু অমুক হন্না নিংশিংবগী খুদোংচাবা অমনি। নিংতম্বগী অমৃতকাল অসিদা ঐখোয়গী হৌখিবা মতম কয়াদগী পুক্নিং থৌগত্তুনা হেন্না হেন্না চাওখৎনবা হোৎনবা হায়বসি, মসিগী মায়কৈদা য়াম্না ফবা খোংথাং অমনি। ঙসি লুপাগী য়াম্না শিংথানিংঙাই ওইরবা খোংচৎ অদুবুসু মফম অসিদা উৎখ্রে, মসিগী খোংচৎ অসিগা মরি লৈনবা দিজিতেল একজিবিসনসু হৌখ্রে, অমসুং নিখাতম্বগী অমৃত মাহোতসবকীদমক্তা খৎথোক্লবা অনৌবা শেলয়েক অমসু থাদোকখ্রে।
মসিগী অনৌবা শেলয়েক অসিনা মীয়ামদা মতম পুম্বদা অমৃতকালগী পান্দমবু নিংশিংহনগনি, লৈবাক অসিগী চাওখৎনবগী লম্বিদা শরুক য়ানবগীদমক শৌগৎকনি। লাক্লিবা চেয়োল অসিদা অদোমগী দিপার্তমেন্ত অসিনা মখল মথেলগী প্রোগ্রাম শিনগদৌরি। মসিগী অফবা থবক অসিগা মরী লৈনবা দিপার্তমেন্ত অমসুং য়ুনিৎশিংদা ঐহাক্কী মায়কৈদগী য়াইফ পাউজেল পীরি।
মরুপশিং,
নিংতম্বগী অমৃত মহোৎসব অসি চহি ৭৫ খকতগী নত্তে, নিংতম্বা ভারতকী মঙ মঙখিবা নিংতম লান্মিশিংগী মঙশিং অদু সেলেব্রেত তৌবা, মঙশিং অদু মপুং ফাহনবা অমসুং মঙশিং অদুদা অনৌবা থৌগল হাপকৎপা অমসুং অনৌবা ৱাখললোনগা লোইননা মাং চৎপগী মীৎকুপনি। নিংতম্বগী লান অসিদা শরুক য়াবা মীওই খুদিংমক্না লান অসিবু অনৌবা মায়কৈ অমা পীখি অমসুং অনৌবা পাঙ্গল অমা হাপকৎখি।
কনাগুম্বনা সত্যাগ্রহগী লম্বিদা চৎখি, কনগুম্বনা কুৎলাই পায়বগী লম্বিদা চংশিনখি, কনাগুম্বনা মখোয়গী ৱাখললোনগী থাজবা অমসুং স্পিরিচুৱেলিতী খনখি, কনগুম্বনা ইন্তেলেক্চুএল ওইনা নিংতম্বগী লান অসিদা মখোয়গী কোলোমগী শক্তি শিজিন্নদুনা মৈরা চুখৎনবা হোৎনখি। কনাগুম্বনা কোর্ততা কেস শোক্নদুনা লৈবাক অসিবু নিংতম্নবা হোৎনবদা শরুক য়াখি। অদুনা লৈবাক অসিগী মীওই খুদিংমক্না নিংতম্বগী চহি ৭৫ শুবা কুমহৈ অসিদা মখোয়-মখোয়গী থাক্তা, অঙম-অঙম্বা মতেং পাংদুনা লৈবাক অসিগী চাওখৎপগী লম্বিদা মতেং পাংগদবনি।
নখোয়সু য়েংবিয়ু, করিগুম্বা ঐখোয়না লৈবাক অমা ওইনা য়েংলবদি, ভারতনা হৌখিবা চহি নিপাল অসিদা তোঙান তোঙানবা হিরম কয়াদা লেপতনা অনৌ-অনৌবা খোংথাং কয়া পাইখত্তুনা লাক্লি। মসিগী মতম অসিদা নৌনা শরুক য়ারক্লিবা মীওই পুম্নমক্না, লৈবাক অসিগী চাউখৎ-থৌরাংগী লম্বিদা অনৌবা ঈনোৎ অমা হাপ্পীরি, লৈবাক অসিগী লায়রবা মীওই খুদিংমকপুসু চাউখৎনবা মতেং পাংলি।
স্বচ্ছ ভারত অভিয়ান্না লায়রবাশিংবু ইকাই-খুম্নবগা লোইননা মমল লৈনা হিংবগী তাঞ্জা অদু পীরি। পক্কাগী য়ুম, মৈ, গ্যাস, ঈশিং, শেল চংদনা লায়েংবগুম্বা ফংলিবা খুদোংচাবা কয়ানা ঐখোয়গী লায়রবাশিংনা মাই থাংগৎতুনা চৎপা ঙম্লি অমসুং ঐখোয়গী নাগরিকশিংগী মশানা মশাবু থাজবা অদুদা অনৌবা পাঙ্গল থৌনা হাপ্পীরি।
ফ্রী রেসন স্কীম অসিনা কোরোনা মতমদা লৈবাকচা করোর ৮০ হেনবগী অরাম খৌরাংবগী অকিবা অদু কোকহনখি। ঐখোয়না লৈবাক অসিগী মীশিং তংখাই অমা হেন্না মসিদা য়াওহনখি, হায়রিবশিং অসি ফোর্মেল সীস্তেমদগী ইন্থোক্তুনা থম্লবশিং অমসুং মিসন মোদতা লৈবাক অসিগী চাউখৎ-থৌরাংদা য়াওহনদবশিং অদুবুনি। অসিগুম্বা ফাইনান্সিয়েল ইনক্লুজনগী য়াম্না চাউরবা থবক অসি অসিগুম্বা য়াম্না তেনবা মতম অসিগী মনুংদা মালেম অসিগী মফম অমত্তদা থোকখিদ্রি। অমসুং খ্বাইদগী হেন্না ঐখোয়না লৈবাক অসিগী মীশিংগী মরক্তা মখোয়গী মঙলানশিং অদুবু মঙফাওনহন্নবা অনৌবা থৌনা অমা উবা ফংখি।
মরুপশিং,
পীপল সেন্ত্রিক গোবর্নেন্স অমসুং অফবা গোবর্নেন্স অসি নিংতম্লবা মতুং দিকেদ তরেতকী মতুংদা পুরকপা অসিগুম্বা য়াম্না চাউবা অওংবা অসিগী ময়াইদা লৈ। মতম অমদা লৈবাক অসিগী পোলিশিশিং অমসুং দিসিজনশিং অদু গোবর্নমেন্ত-সেন্ত্রিক ওইরম্মি। স্কীম অমগী খুদোংচাবা অমা লৌনবা সরকারদা তক্নবা হায়জবা হায়বসি মীচম প্রজাশিংগী মথৌদাং ওইরম্মি। অসিগুম্বা সীস্তেম অমদা, সরকার অমসুং এদমিনিস্ত্রেশন অনিমক অসিগী মথৌদাং অদু মাংথরে। হান্নদি লাইরবা মহৈরোই অমনা মহাক্কী লাইরিক-লাইশু তম্নবগীদমক্তা শেলগী ওইবা মতেং তঙাইফদনা মথৌ তাবনা মরম ওইরগা মহাক্কী ইমুং-মনুংশিং, মরী-মতাশিং নত্রগা মরুপশিংদগী নমদুনা মতেং লৌবগী মথৌ তারম্মি। সরকারগী স্কীমশিং অদুদা প্রোসেস কয়া অমা য়াওই অমসুং মহাক্না মদুগী মতেং ফংনবা হোৎনবা হায়বসি য়াম্না লুনা থোক্কনি অমসুং য়াম্না ৱাবা অমা ওইগনি ।
অসিগুম্না, করিগুম্বা এন্তরপ্রেনর নত্রগা বিজনেসমেন অমনা লোনগী মথৌ তাংরবদি, মহাকসু দিপার্তমেন্ত কয়া অমদা হঞ্জিন-হঞ্জিন্না চৎপগী মথৌ তাগনি অমসুং প্রোসিজর কয়া অমা তৌগনি। অনম্বা মতমদা মহাক্না ই-পাউ মপুং ফাদবনা মরম ওইরগা মন্ত্রালয়গী ৱেবসাইত অদু এক্সেস তৌবা ঙমদে। অসিগুম্বা থৌদোক অসিদা, মহৈরোই ওইগেরা নত্রগা বিজনেসমেন ওইগেরা, মহাক্না মহাক্কী মঙলান অদু ময়াই থিগাংদা থাদোক্লগনি অমসুং মদুবু মঙফাওনহন্নবা খোংথাং অমত্তা পাইখৎলরোই।
লৈবাক অসিনা মমাংদা গোবরমেন্ত-সেন্ত্রিক ওইবা গোবর্নেন্সকী অৱাবা কয়া মায়োক্নখি। অদুবু ঙসিদি ২১শুবা চহি চাগী ভারত অসিনা প্রপল-সেন্ত্রিক গোবর্নেন্সকী অপ্রোচ অসিগা লোইননা মাংদা চৎখৎলি। প্রজাশিংননি ঐখোববু মখোয়গী সার্বিসশিংগীদমক্তা মফম অসিদা ঐখোয়বু থাগৎলক্লিবা অসি। মরম অদুনা মতিক চাবা মীওই খুদিমক্তা য়ৌহন্নবা অমসুং মখোয়গীদমক্তা মপুং ফানা কান্নবা ফংহন্নবা, প্রজা মীয়ামদা শন্দোকপা হায়বসি ঐখোয়াগী খ্বাদগী মরু ওইবা থবক্নি অমসুং থৌদাংনি।
তোঙান-তোঙানবা মন্ত্রালয়শিংগী তোঙান-তোঙানবা ৱেবসাইতশিংদা চংদুনা য়েংবগী মহুত্তা, মহাক্কী প্রোব্লেমশিং অদুগী সোল্যুশনগীদমক্তা ভারত সরকারগী পোর্তল অমগী এক্সেস ফংবনা হেন্না ফগনি। ঙসি ‘জন সমর্থ’ পোর্তল অসি ৱাখলদা মসিগী পান্দম অসিগা লোইননা হৌদোকখিবনি। হৌজিক্তি ভারত সরকারগি ক্রেদিৎ লিঙ্ক তৌবা স্কীমশিং পুম্নমক অদু তোঙান-তোঙান মাইক্রো সাইতশিংদা ফংলরোই অদুবু মফম অমত্তদা ফংলগনি।
জন সমর্থ পোর্তল অসিনা মহৈরোইশিং, এন্ত্রপ্রেনরশিং, ত্রেদরশিং, বিজনেসমেনশিং অমসুং লৌমীশিংগী পুনশী অদু লাইহনবদা নত্তনা মখোয়গী মঙলানশিং অদুবু মঙফাওনহনবদা মতেং পাংগনি। হৌজিক্তি মহৈরোইশিংনা মখোয়দা খ্বাইদগী হেন্না কান্নগদবা সরকারগী শ্কীমশিং অদুগী মতাংদা ই-পাউশিং য়াম্না লাইনা ফংবা ঙম্লে। অসিগুম্না, ঐখোয়গী নহাশিংনা মখোয়না পাম্লিবা অসি মুদ্র লোনলা নত্রগা স্তার্ত-অপ ইন্দিয়া লোনলা হায়বদু মখোয়না কন্দোকপা ঙম্লগনি।
লৈবাক অসিগী নহাশিং অমসুং ময়াই-ওইরপ তৌবা ইমুংশিংনা এন্দ-তু-এন্দ দিলিভরিগীদমক্তা জন সমর্থকী মওংদা প্লেতফোর্ম অমা লৈরে। হেন্না লাইবা অমসুং য়ামদবা প্রোসিজরশিংগা লোইননা, লোনশীং লোনবগীদমক্তা মী হেন্না-হেন্না থোরকপা হায়বসি মঔশানি। মসিগী পোর্তল অসিনা মশানা মশাবু থবক পীজবা অমসুং বেনিফিসরীশিংদা সরকারগী স্কীমশিং অসিবু য়ৌহনবদা য়াম্না মরু ওইবা লৌগদৌরিবনি। ঐহাক্না মরু ওইনা লৈবাক অসিগী নহাশিংবু জন সমর্থ পোর্তলগীদমক্তা নুংঙাইবা ফোংদোক্লি।
ঙসিদি বেঙ্কিং সেক্তর অচৌ-অচৌবা মীওইশিংশু মসিগী থৌরম অসিদা শরুক বারি। নহাশিংনা লোনশিং লৌবদা হেন্না লাইনবা অমসুং জন সমর্থ পোর্তল অসিবু মাইপাকপা অমা ওইহন্নবা ঐহাক্না বেঙ্কর পুম্নমক্তা য়ারিবমখৈ মখোয়না মসিদা শরুক য়াবা অদু হেনগৎননবা হায়রি।
মরুপশিং,
করিগুম্বা রিফোর্ম অমগী পান্দম অসি ময়েক শেংলবদি অমসুং মদুবু থবক ওইনা পাইখৎপগী মতাংদা য়াম্না লুবা অমসুং মরু ওইবা ওইরবদি মদুগী অফবা ফল শোইদনা পুরক্কনি। হৌখিবা চহি নিপাল অসিদা পুরকখিবা অওনবশিং অদুদা ৈখোয়গী লৈবাক অসিগী নহাশিংনা মখোয়গী মতিক অদু উৎথোক্নবা মখোয়দা হেন্না মরু ওইবা পীখি।
ঐখোয়গী নহাশিংনা য়াম্না লাইনা মখোয়গী অপাম্বা কমপনী হাংদোকপা ঙম্নবা, মখোয়গী এন্তরপ্রাইজশিং অদু য়াম্না লাইনা লিংখৎনবা অমসুং য়াম্না লাইনা চলাইনবা মসিগী মাইকৈদা হেন্না মরু ওইবা পীখ্রে। মরম অদুনা কমপআলিন্স ৩০,০০০দগীসু এন্না হন্থহন্দুনা, লো ১৫০০ হেন্না মুথৎতুনা , কমপনীজ এক্তকী প্রোভিজন ময়াম অমা দিক্রিমিনেলাইজ তৌদুনা, ঐখোয়না ভারতকী কমপনীশিংনা চাউখৎপদা নত্তনা অনৌবা অৱাংবা ফংনবা ঐখোয়না শোইদনবা হোৎনখি।
মরুপশিং,
অওনবা পুরকপগা লোইননা ঐখোয়না লাইথোকহনবদা মীৎয়েংশু থমখি। জি.এস.তি.না হৌজক্তি কেন্দ্র অমসুং রাজ্যশিংদা লৈরিবা তেক্সশিংগী ৱেব অদুগী মহুৎ শিনখ্রে। লৈবাক অসিনশু মসিগী লাইথোকহনবা অসিগী ফল অদুবুসু ুবা ফংলে। হৌজিক্তি থা খুদিংগী জি.এস.তি. কলেক্সন তৌবদা লুপা করোর লাখ অমা লানবা হায়বসি মহৌশাগী মতৌ ওইরক্লে। ঐখোয়না ই.এফ.পি.ও. রেজিস্ত্রেশনশিংগী মশিংদা লেপ্পা লৈতনা হেনগৎলকপসু উবা ফংলে।রিফোর্মশিং অমসুং সিমপ্লিফিকেশনদগী হে্নদোরক্তুনা ঐকোয়না হৌজিক্তি এসেসিবল সীস্তেম অমা শাগৎলি।
জি.ই.এম. পোর্তলনা মরম ওইরগা এন্তরপ্রেনরশিং অমসুং এন্তরপ্রাইজশিংগীদমক্তা মখোয়গী পোত্থোকশিং অদু সরকারদা য়োনবদা য়াম্না লাইহল্লে। মসিদসু লৈবগী মশিং অসি লুপা করোর লাখ অমা হেনখ্রে। ইনভেস্ত ইন্দিয়া পোর্তলদা লৈবাক অসিদা ইনভেস্তমেন্তকীদমক্তা ওইথোকপা য়াবশিংগা মরী লৈনবা ই-পাউশিং পুম্নমক লৈ।
ঙসি তোঙান-তোঙানবা ক্লিয়রেন্সশিংগীদমক্তা সিঙ্গল ৱিন্দো ক্লিয়রেন্স পোর্তল অমা লৈরে। মসিগী জন সমর্থ পোর্তল অসিনা লৈবাক অসিগী নহাশিং অমসুং স্তার্ত অপশিং য়াম্না কান্নহল্লগনি। ঙসি করিগুম্বা ঐখোয়না রিফোর্ম, সিমপজলিফিকেশন অমসুং ইজকা লোইননা মাং লোমদা চৎখৎলবদি, অনৌবা থাক্কী ফেসিলিতীশিং ফংবা ঙম্মি। মসি ঐখোয়না ঐখোয়গী লৈবাকচাশিংদা মতম অসিগী অনৌবা ফেসিলিতিশিং পীনবা, মখোয়গীদমক্তা নৌনা ওনবা অমসুং অনৌবা ফিরেপশিং মাইপাকপা ঙম্নবা হোৎনবা হায়বসি ঐখোয় পুম্নমক্কী থৌদাংনি।
মরুপশিং,
হৌখিবা চহি নিপাল অসিদা, ঐখোয়না উৎথোকখ্রে মদুদি করিগুম্বা চারতনা করিগুম্বা খরা তৌনবগী অচেৎপা ফিরেপ লৈরবদি, মদুনা মালেম পুম্বগী ওইনা অনৌবা আশা অমা ওইরকই। ঙসিদি মালেম অসিনা ঐখোয়গী মাইকৈদা আশা অমগা লোইননা অমসুং থাজবা অমগা লোইননা য়েংলক্লি, হায়রিবা অসি অচৌবা কঞ্জুমর মার্কেত খক্তা নত্তনা মতিক লৈবা, অহোংবা পুরক্কদবা, ক্রিয়েতিব ওইবা অমসুং ইনোভেতিব পোইবা ইকোসীস্তেম অমা ওইনা য়েংলি। মালেম অসিগী অয়াম্বা শরুক অমনা মখোয়গী অৱাবশিং অদুবু কোকহনগনি হায়না থাজবা থম্লি। হায়রিবা অসি ওইথোকপা য়ারিবগী মরমদি ঐখোয়না হৌখিবা চহি নিপাল অসিদা ইচম চমজবা ভারতমচাশিংগী লৌশিংদা থাজবা থমখি। ঐখোয়না মীয়াম্বু গ্রোথতা ইন্তেলিজেন্ত পার্তিসিপেন্ত অমা ওইনা পুক্নিং থৌগৎলি।
ঐখোয়না লৈবাক অসিগী মীশিংদা মপুং ফানা থাজৈ মদুদি অফবা গোবর্নেন্সকীদমক্তা পুরক্কদবা তেক্নোলোজী অমহেক্তা ওইগেরা, লৈবাক অসিগী মীয়াম্না মদুবু লৌশিনগনি অমসুং থাগৎকনি। মীয়াম্না থাজবা অদুগী ফল অদু মালেম অসিগী খ্বাইদগী ফবা দিজিতেল ত্রান্সেক্সন প্লেতফোর্ম য়ু.পি.আই. হাববদি য়ুনিফাইদ পেমেন্ত ইন্তরফেজ অসিগী মওংদা মীয়ামগী মাংদা লৈরে। ঙসিদি স্ত্রীত ভেন্দরশিং অমসুং অথাপ্পা খুঙ্গংশিদা লৈবা লৈবাকচাশিংদগীনা সহরশিং লোকেলিতীশিংনা লুপা লাখ ১০-২০ ফাাওগী ত্রান্সেক্সনশিং য়াম্না কোম্না পাংথোক্লি।
ঐখোয়না ভারতকী নহাশিংগী মরক্তা ইন্নোভেশন অমসুং এন্ত্রপ্রেনরশীপকীদক্তা ফাওরিবা অনিংবা-অপাম্বা অদুদা ঐখোয়নসু য়াম্না থাজৈ। স্তার্ত-অপ ইন্দিয়াগী প্লেতফোর্ম অদু লৈবাক অসিগী নহাশিংগী মরক্তা ফুমজিন্দুনা লৈরিবা পুক্নিং-হকচাং লুপ্না ফাওরিবা অপাম্বা অনিংবা অদুগীদমক্তা লম্বি পীনবগীদমক্তা শেমখিবনি। ঙসিদি লৈবাক অসিদা চাউরাক্না স্তার্ত-অপ ৭০,০০০ মুক লৈরে অমসুং নুমিৎ খুদিংগী মসিদা অনৌবা মেম্বরশিং দর্জন কয়া অমা হাপচিল্লক্লি।
মরুপশিং,
ঙসি লৈবাক অসিনা ফংবা ঙম্লিবা পুম্নমক অসিদা ইশানা ইশাবু থাজবা অমসুং ময়াম পুম্নমক্না হৌৎনরিবশিং অদুগী য়াম্না চাউরবা থৌদাং লৈ। লৈবাকচাশিংনা আত্মানির্ভর ভারত কেমপেনদগী, ভোকল ফোর লোকলগুম্বা কেমপেনশিংদগী পুক্নিংগী ঈথিলগা মরী লৈনবা মওংদা চুংশিন্নখ্রে। মসিদা নখোয় পুম্নমক্কী, ফাইনান্স অমসুং কোর্পোরেত এফিয়র্স মন্ত্রালয়না লৌরিবা থৌদাং অসি য়াম্না হেনগৎখ্রে। হৌজিক্তি ঐখোয়না স্কীমশিং অসিগী সেচুরেশন ফাওবা য়াম্না য়াংনা য়ৌবগী মথৌ তাই।
ঐখোয়না ফাইনান্সিয়েল ইনক্লুজনগী প্লেতফোর্মশিং শেমখ্রে, হৌজিক্তি ঐখোয়না মসি শিজিন্নবগী মতাংদা ময়ামদা খঙহনবা হেনগৎহনগদবনি। ভারতকীদমক্তা শেমখিবা ফাইনান্সিয়েল সোল্যুসনশিং অদু হৌজিক্তি মালেম অসিগী অতোপ্পা লৈবাক্কী নাগরিকশিংদসু মখোয়গী সোল্যুশন পীনবা মসিগী মতাংদা হোৎনগদবনি।
ঐখোয়গী বেঙ্ক, ঐখোয়গী করেন্সী অসি ইন্তর্নেস্নেল সপ্লাই চেনগী, ইন্তর্নেস্নেল ত্রেদকী য়াম্না পাক-চাউবা শরুক অমা করম্না ওইহনগনি, মসিগী মতাংদা মীৎয়েং চংবসু তঙাইফদে। নিংতম্বগী অমৃতকাল অসিদা হেন্না ফবা ফাইনান্সিয়েল অমসুং কোর্পোরেত গোবর্নেন্সপু নখোয়না লেপ্তনা থৌগৎকনি হায়না ঐহাক্না থাজৈ। ঙসিগী থৌরম অসিগীদমক্তা মফম ৭৫দা শরুক য়ারিবা ঐগা থবক তৌমিন্নরিবা ঐগী মরুপশিং মখোয় পুম্নমকপু য়াইফ পাউজেল পীরদুনা ঐহাক্না ঐগী স্পীচ অসিবু লোইশিনজরি।
হন্না-হন্না থাগৎচরি!
