“ইনোভেতরশিং ওইরিবা নখোয়না ‘জয় অনুসন্ধান’গী খোলাউ অসিগী ফ্লেগ বিয়র্রশিংনি”
“নখোয়গী ইনোভেতিব ওইবা ৱাখল্লোন অসিনা মথংগী চহি ২৫দা ভারতপু মকোক থোংবা ওইহনবা ঙম্লগনি”“ভারতকী এস্পিরেস্নেল সোসাইতীনা মথংগী চহি ২৫দা ইনোভেসনগীদমক দ্রাইবিং ফোর্স অমা ওইনা মথৌ তৌরগনি”“ঙসি ভারত্তা তেলেন্ত রিভোল্যুসন চত্থরি”“রিসর্চ অমসুং ইনোভেসন অসি থবক তৌবগী মওংদগী হৌরগা হিংবগী মওং ফাওবদা অহোংবা পুরকপা মথৌ তাই”“ভারতকী ইনোভেসনশিংনা মতম চুপ্পদা খ্বাইদগী কম্পিতিতিব ওইবা, অহোংবা, তুং কোইনা চৎকদবা, সেক্যুর ওইবা অমসুং অচৌবা সোল্যুসনশিং পীদুনা লাকখি”“২১শুবা চহিচাগী ভারতনা মাগী নহারোলশিংদা মপুং ফানা থাজবা থম্বগা লোয়ননা মাংদা চংশিল্লি”নহা ওইরিবা মরূপশিং,
অদোমগুমবা ইনোভেতরশিংগা উনবা, ৱারী ৱাতায় শানবা অসি য়াম্না নুংঙাই। অনৌ-অনৌবা হীরম কয়াদা অদোম্না চঙশিল্লিবা, অদোমগুম্বা নহাশিংনা অদোমগী থৌদাংদা অনৌবা মওং মতৌ উৎলিবা, নশাদা থাজবগা লোয়ননা অদোম্না থবক তৌরিবা অদুনা ঐগুম্বা মীওই কয়াগীদি করিগুম্বা অনৌবা খরদা ওইরবসু তৌহন্নিংবগী অপামবা পোকহল্লি। মওং অমদা অদোম পুক্নিং থৌগৎনফমগী মচাক অমা ওইরি, অদুনা ঐনা ময়ামগী মফমদা নুংঙাইবা ফোঙদোকচরি।
স্মার্ত ইন্দিয়া হেকাথোন, মীয়াম্না শরুক য়াশিনবগী অচৌবা খুদম অমা ওইরে। অদুগা মরূপশিং, হন্দক্কী স্মার্ত ইন্দিয়া হেকাথোন অসিদি মওং কয়াদা য়াম্না মরুওইবা অমা ওইরি। ঙসিদগী নুমিৎ খরনিগী মমাঙদা ঐখোয়না নীংতম্বগী চহি ৭৫ মপুং ফাখ্রে। নীংতম্বগী চহি ১০০ শুরকপদা ঐখোয়গী লৈবাক অসি করি ফীভমদা লৈহনগদগে হায়বসিদা লৈবাকসিনা অচেৎপা ফিরেপ কয়াগা লোয়ননা থবক পায়খৎলি। হায়রিবা ফিরেপশিং অসি ফংনবগী খোঙচৎসিদা অদোমগুম্লবা ইনোভেতর ময়াম্না ফিরাল পায়দুনা চৎলিবনি।
অমৃৎকালগী চহি ২৫গী মতমসিনা অদোমগীদমক তুংগী থাজবা কয়া পুদুনা লাক্লি। থাজবা অমদি ফিরেপশিং অসি অদোমগী করিয়র গ্রোথকসু মরী লৈনরি। লাক্কদৌরিবা চহি ২৫সিদা নহা ময়ামগী মায় পাকপনা ভারতকী মায় পাকপগী খোঙফম লেপকদৌরিবনি। মরম অসিনা ঐনা ময়ামগী মফমদা থাজবা চাউনা থম্লি। হিন্দুস্তান্না অদোমগীদমক চাউথোকচবা পোক্লি। ময়ামগী ইনোভেতিব ওইবা ৱাখল্লোন্না লাক্কদৌরিবা চহি ২৫সিদা ভারতপু মাঙজিল থানা পুখৎকদৌরিবনি। অদোমগী মফমদা ঐনা থম্লিবা থাজবসিগী মরুওইবা মরমসু লৈ।
মরূপশিং,
হন্দক্কী ওগস্ত ১৫দা ঐনা লাল কিলাদগী ভারত্তা চাউরবা এস্পিরেস্নেল সোসাইতী অমা ঙসি উরক্লি, মঙফাওনরক্লি হায়বা ৱাফম থমখি। অমৃৎকাল অসিদা হায়রিবা এস্পিরেস্নেল সোসাইতী অসিনা থৌদুনা চৎলিবা শাফু অমগী মওংদা থবক তৌরক্কনি। মসিদা থাজবা, মসিদা নীংজবা অমদি মসিগা মরী লৈনবা শিংনবশিংনা অদোমগীদমক অনৌবা খুদোংচাবা কয়া পুদুনা লাক্কনি।
মরূপশিং,
অদোম পুম্নমক্না মহৈ মশিং তমবা হৌরকপদা চহি ৬০-৭০গী মতমদা গ্রীন রিভোলুসন থোকখি হায়বসি থেংনরক্লমগনি। ভারতকী লৌমীশিংনা অপুনবগী থৌনা উত্তুনা ঐখোয়বু চান-থক্নবা চেঙ-হৱাইগী লমদা ইরোমদোম লেপচবা ঙমহল্লমখি। অদুবু হৌখৎবা চহি ৭-৮সিদা লৈবাকসিনা অনৌবা য়াওল অমগী মথঙদা অমা পুরক্তুনা মাঙদা খোঙলৈ থুনা চঙশিনবা অদোম্না উম্লগনি।
ভারত্তা ঙসিদি ইনফ্রাস্ত্রকচর রিভোলুসন লৈরে। ভারত্তা ঙসি হেল্থ সেক্তর রিভোলুসন লাক্লি। ভারত্তা ঙসি দিজিতেল রিভোলুসন লাক্লি। ভারত্তা ঙসি তেক্নোলোজী রিভোলুসন লাক্লি। ভারত্তা ঙসি তেলেন্ত রিভোলুসন লাক্লি। লৌউ শিংউগী লমদম ওইরবসু, মহৈ মশিংগী লমদা ওইরবসু, দিফেন্স সেক্তরদা ওইরবসু ঙসি লৈবাকসিগী খোঙজেল সেক্তর খুদিংদা মতমগা চুনবা ওইহনবা ঙম্লি। সেক্তর পুম্নমকপু মরোমদোম লেপচবা ঙমহন্নবগীদমক হোৎনরি। মরম অসিনা অদোমগুমবা নহাশিংগীদমক ভারত্তা নুমিৎ খুদিংগী অনৌবা খুদোংচাবা কয়া থোরক্লি।
দ্রোন তেক্নোলোজী, তেলি-কন্সল্তেসন, দিজিতেল ইন্সতিত্যুসন, ভর্চুএল সোলুসন্স পুম্নমক অসিদা সর্ভিসতগী হৌরগা মেনুফেকচরিং ফাওবদা অদোমগী খুদোংচাবা কয়া লৈরি। অদোমগুমবা নহাশিংনা লৌউ-শিংউ অমসুং হকশেলগী সেক্তরদা দ্রোন তেক্নোলোজী শীজিন্নবগী থৌওং য়োকখৎনবা অনৌ-অনৌবা সোলুসনশিংদা থবক তৌবা য়াই। ঈথৈ লৌখোং শীজিন্নবগী মওং, ঈথৈ লৌখোংগী নেতৱর্কপু ঐখোয়না কমদৌনা স্মার্ত ওইহনগদগে হায়বা হীরমসিদা খুদোংচাবা কয়া লৈরি।
মরূপশিং,
ঙসি লৈবাকসিগী খুঙ্গঙ খুঙ্গঙদা ওপ্তিকেল ফাইবর তিংবগী থবক খোঙজেল য়াঙনা চৎলি। হৌজিক ভারত্তা ৫জি হৌদোকপগী থবক পায়খৎলিবা অদোমসু উরম্লগনি। চৎলিবা চহি তরাসিগী লোইশিল্লকপদা ঐখোয়না ৬জি হৌদোক্নবা থৌরাং তৌরি। গেমিং অমসুং এন্তরতেন্মেন্ততসু ভারতকী সোলুসনশিং লৈঙাক অসিনা কন্না য়োকখৎলি। হায়রিবা অনৌবা সেক্তরশিং অসিদা লৈঙাকসিনা খোঙ থাংজিল্লিবা মওং, মসিদা পুক্নিং থৌগৎলিবা অসিগী কান্নবা অদোমগুম্বা নহা কয়ানা লৌফম থোকই।
অদুগা মরুপশিং, অদোম্না ৱাফম অমসু নীংশিংগদবনি। মালেমসিদা ভারতকুম্না খুদোংচাদবা কয়া থেংনরিবা মীশিং য়াম্না লৈ। অদুবু মফমদুদা হায়রিবা খুদোংচাদবশিং কোকহন্নবা ইনোভেসন অমসুং স্তার্ত অপশিংগী খুদোংচাবা অকক্ননা লৈ। ভারতকী ইনোভেসন্না মালেমগী খ্বাইদগী হিদান্নবা, মমল হোঙবা, তুং কোইনা চৎকদবা, সিক্যুর ওইবা অমদি পাক চাউনা পায়খৎপা পাম্বৈ ওইরি। মরম অসিনা মালেমসিনা ভারত্তা, অদোমগুম্বা নহাশিংদা থাজবা থম্লি।
মরূপশিং,
ঙসিগী থৌরম অসিদা মহৈ মশিংগী তাইবংগী মশক নাইরবা মীওই অমদি পোলিসী মেকর কয়া শরুক য়াররি। ভারত্তা ইনোভেসনগী থৌওং খুমাঙ চাওশিলহন্নবগীদমক খুন্নাইগী মতেং অমসুং ইন্সতিত্যুসনশিংগী মতেং হায়রিবা ৱাফমশিংদা ঐখোয় লেপ্পা নাইদনা পুক্নিং লুপশিনবা মথৌ তাই। ইনোভেসন অমসুং এন্তরপ্রাইজকী লমদা খুন্নাই অসিদা অহোংবা কয়া লাকপা ঐখোয়না উরি। ঐখোয়না করিয়র শেম্নবগী চৎনদুনা লাক্লবা থৌওংশিংগী মথক্তা অনৌবা হীরমশিংদসু খোঙ থাংজিনবগী মতৌ উরক্লি। হায়বদি খুন্নাইসিদা ইনোভেসনবু শিন্ফম অমা ওইনা মীয়াম্না য়াবা হেনগৎলক্লি। ফীভম অসিদা ঐখোয়না অনৌবা ৱাখল্লোন অমসুং ওরিজিনে, থিঙ্কিংবুসু কোনশিনবা তাই, ইকায়খুম্নবিবা তাই। রিসর্চ অমসুং ইনোভেসনবু থবক তৌবগী মওংদগী পুন্সি মহিংগী মচৎ অমা ওইহনবা তাই।
মরূপশিং,
রিসর্চ অমসুং ইনোভেসনগী মায়কৈদা ইন্সতিত্যুসনশিংগী মতেং হেনগৎহন্নবগীদমক লৈঙাক্না লেপ্পা নাইদনা থবকা পায়খৎলি। অনৌবা লৈবাক্কী মহৈ মশিংগী চৎন-কাঙলোন্দা ইনোভেসনগী মপাঙ্গল কল্লবা য়ুম্ফম অমা শেম্নবগী রোদমেপ য়াওরি। অতল ইন্ক্যুবেসন মিসনগী মখাদা লিংখৎলিবা অতল তিঙ্করিং লেপশিংনা মহৈশঙশিংদা ইনোভেসনগী অনৌবা মীরোল অমা শেম্লি। লৈবাকসিদা হৌজিক ফাওবদা স্তার্ত অপ ৫০০ হেনববু মতেঙ পীখ্রবা আই-ক্রিএৎকুম্বা লুপশিংসু মায় পাক্না থবক পায়খৎলি।
মরূপশিং,
২১শুবা চহিচাগী ঙসিগী ভারতনা লমদমসিগী নহাশিংগী মফমদা মপুং ফানা থাজবা থমদুনা মাঙদা চঙশিল্লি। মসিগী মহৈনা ঙসি ইনোভেসন ইন্দেক্সতা ভারতকী রেঙ্কিং কাখৎলক্লি। হৌখিবা চহি ৮সিদা পেতেন্তকী মশিং শরুক ৭ থোক্না হেনগৎলক্লে। য়ুনিকোর্নগী মশিংসু ১০০ হেল্লে। লৈঙাক্কী মফমদখক্তা প্রোব্লেমশিংগী পাম্বৈ লৈগনি হায়বসিদা ঐখোয়না থাজবা থমদে। অদোমসু য়েংবিয়ু, লৈঙাক্কী লৈরিবা প্রোব্লেমশিংগী ঐখোয়না নহাশিংনা পাম্বৈ পুথোকপিয়ু হায়না ঐনা লৈঙাক অসিবু অদোমগী নাক্তা পুদুনা লাক্লি, অদুগা অদোম্নসু পুথোক্লি। অদোমগী থৌনা ঐ নীংথিনা খঙই। ঙসিগী নহা মীরোলসিনা হেন্না খোঙজেল য়াঙনা স্মার্ত সোলুসনগা লোয়ননা মাঙদা চঙশিল্লি।
হেকাথোন অসি পাঙথোকপগী মরুমদা পান্দম অমসু লৈ মদুদি লৈঙাক্না পাম্লিবা পাম্বৈশিং অসি মফমসিদা লৈবাক শিনব থুংবদগী লাক্লিবা ঐগী নহা মরূপশিংনা লৈরিবা প্রোব্লেমশিং অসিবু নৈনদুনা, মসিগী মরমশিং খঙজিন্দুনা মসি কোকহন্নবা লম্বী থিদোক্নবা, পাম্বৈ পুথোক্নবনি। মহৈরোয়, লৈঙাক অমসুং লনাই লূপশিংগী মরক্তা খুৎশম্ননা চৎমিন্নবগী ইহুল, পুম্নমক্না হোৎনমিন্নবগী ৱাখল্লোন্না চাওখৎপা ভারত শেম্লকপদা মরুওই।
মরূপশিং,
অদোম্না হায়রিবা ৱাফমশিং অসিবু পুক্নিংদা থমদুনা ইনোভেসনগী মৈরী অসিবু মতম পুম্বদা চাকহন্দুনা থমগনি হায়না ঐনা মপুং ফানা থাজৈ। অদোম্না কন্না হোৎনবা অমদি থৌওংশিংদা মতম পুম্নমক্তা লৈঙাক্কী মায়কৈদগী হনবা নাইদবা মতেং ফংগনি হায়না ঐনা থাজবা পীজরি। লৈঙাকসিনা খোঙফম খুদিংদা অদোমগা লোয়ননা লেপ্লি।
ঐনা অমুক্কা হন্না নহা ময়ামবু... তশেংবদি অদোমগী মফমদা হায়নিংবা কয়া লৈরমগনি। অদোম্না পুং কয়া ৱাখল থাদরি। অদোমগী ৱাফমশিং তাবা হায়বসি ঐগীদমক্তসু ৱাফম কয়া তমহৌনবা খঙহৌনবগী মরম অমা ওইরিবনি। অদোমগী মরক্তগী ময়াম অমগী মফমদা ৱাখল্লোন কয়া লৈরমগনি। ঐনা পুম্নমকপু তাবা ফংদ্রে। শম্লপ্পা মওংদা নহা খরখক্কা ৱারী ৱাতায় শানবা ফংই। ৱারী শানবা ফংহৌদ্রবশিংসু ময়ামদগী তাবা নত্তে, মখোয়না হোৎনরিবদু অৱাৎপা লৈবা নত্তে। অদুগা ঐনা অদোমগী মফমদা থাজবা পীরি, মদুদি ঐনা দিপার্তমেন্তকী খুত্থাঙদগী ব্রীফিং লৌগনি। অদোম্না তৌরিবা থবকশিংবু খঙননবা ঐনা হোৎনগনি। মতম শাংনা ফংলম্লবদি অদোমগসু ৱারী ৱাতায় শানবা ফংলমগদবনি। ৱারী শানবা ফংহৌদ্রবা ময়ামদুগী থবকসু চপ চানা মরু ওইরিবনি।
ঐনা অমুক্কা হন্না নহা পুম্নমক্কী মফমদা থম্মোয়নুংদগী নুংঙাইবা ফোঙদোকচরি। লৈঙাক্কী থবক্তা লৈঙাক্কা লোয়ননা চৎমিন্নদুনা মীয়ামগী য়াইফনবগীদমক চঙশিল্লিবা খোঙজঙ অসিদা লেপ্পা লৈতনা মাঙদা চঙশিনবা ঙমহনবিয়ু হায়বসিনা ঐগী নীংজবনি, ময়ামগী মফমদা য়াইফ-পাউজেল পীজরি।
হন্না হন্না থাগৎচরি !
