হর হর মহাদেব!
উত্তর প্রদেসকী চীফ মিনিস্তর শ্রী অদিত্যনাথ জি, উত্তর প্রদেস সরকারগী অতোপ্পা মিনিস্তরশিং, মীয়ামগী মীহুৎশিং, থৌরম অসিদা শরুক য়ারিবা শান্নবগা মরী লৈনবা শক্নাইরবশিং অমসুং কাসিগী ঐগী নুংশিরবা ইমুং-মনুংগী মীওইশিং।
ঙসি অমুক হন্না বরানসতা লাক্নবা খুদোংচাবা অমা ফংলে। বরানাসতা লাকপগী নুংঙাইবা ফোঙদোকপদা লোইবা ঙম্লোই। অমুক হন্না হায়জরি… ঔম নমাহ পার্বতি পাতায়ে, হর-হর মহাদেব! ভারতনা থাগী সিবশক্তি য়ৌবা থা অমা মপুংফারকপা নুমিত্তা ঙসি ঐ কাসিদা লাক্লে। সিবশক্তি হায়বদি হৌখিবা থাগী তাং ২৩দা ঐখোয়গী চন্দ্রয়ান্না তাখিবা মফম অদুনি। সিবশক্তিগী মফম অমা থাদা লৈরে। সিব শক্তিগী অনিশুবা মফমদি ঐগী কাসিনি। ঙসি, সিব শক্তিগী মফম অসিদগী, সিব শক্তিগী মফম অদুদা ভারত মাইপাকপগীদমক ঐনা অমুক হন্না ভারত থাগৎচরি।
ঐগী নুংশিরবা ইমুং-মনুংগী মীওইশিং,
ঐখোয়না পুল্লিবা মফম অসি শেংলবা মফম অমনি। মাতা বিন্ধ্যবাসিনি অমসুং কাসি সহর অনি শম্নবগী লেপফম অমনি। মফম অসিদগী খর চৎলগা, ভারতকী গনতন্ত্রগী শক্নাইরবা মীওই অমা অমসুং হান্নগী য়ুনিয়ন মিনিস্তর রাজনারায়ন জিগী খুঙ্গং মোতি কোত লৈরে। ঐনা মফম অসিদগী ইকায়খুম্নরবা রাজনারায়ন জি অমসুং মহাক্কী পোক্নফমদা কোক নোঞ্জরি।
ঐগী নুংশিরবা ইমুং-মনুংগী মীওইশিং,
ঙসি কাসিদা ইন্তরনেসনেল ক্রিকেত স্তদিয়ম অমা উরেপ-উয়ুং তম্লে। স্তদিয়ম অসিনা বরানাসীগী নহারোলশিং খক নত্তনা নোংপোক ভারতকী নহারোলশিংগী য়াইফবা ওইরগনি। স্তদিয়ম অসি লোইরকপদা মীওই লিশিং ৩০ হেন্না মেতচশিং য়েংবা য়ারগনি। স্তদিয়ম অসিগী ফোতো উবদা কাসিগী মীওই খুদিংমক অঙকপা পোক্কনি। স্তদিয়ম অসি মহাদেবগী দিজাইন্দা শাবনি অমসুং মহাদেবদা কৎথোক্লে। অনকপা মফমশিংগী নহা ওইরিবা শান্নরোয়শিং মালেম থাক্কী স্তদিয়মদা ত্রেনিং তৌবগী খুদোংচাবা ফংলগনি। মসিনা কাসিদা য়াম্না কান্নগনি।
ঐগী নুংশিরবা ইমুং-মনুংগী মীওইশিং,
ঙসিদি ক্রিকেতনা ভারতকা মালেমগা শম্নহল্লে। মালেমগী অনৌবা লৈবাক কয়া ক্রিকেত শান্নবা হৌরক্লে। তুংদা ক্রিকেত মেতচ মশিংশু হেনগৎলক্লগনি। ক্রিকেত মেতচ মশিং হেনগৎলকপদা অনৌবা স্তদিয়মশু দরকার ওইরক্কনি। বরানাসীগী ক্রিকেত স্তদিয়ম অসিনা মসিগী দরকার ওইবা অসি ফংহনবা ঙমগনি, মসি নোংপোক ভারত শীনবা থুংবগী অরংবা থৱান্মিচাক অমা ওইরগনি। মসি উত্তর প্রদেসকী অহানবা স্তদিয়ম ওইরগনি অমসুং মসি শাবদা বি.সি.সি.আইনা য়াম্না চাউনা মতেং পাংগনি। কাসিগী এম.পি ওইনা ঐনা ময়াম পুম্নমক থাগৎপা ফোঙদোকচরি।
ঐগী নুংশিরবা ইমুং-মনুংগী মীওইশিং,
অচৌবা স্তদিয়ম অসিনা শান্নবা খক নত্তনা মফম অসিগী শেন্মিৎলোন্দা কান্নবা অমা পীরগনি। শান্ন-খোৎনবগী অচৌবা মফমশিং শেমগৎপা মতমদা, শান্নবগী অচৌবা থৌরমশিং পাংথোক্কনি। অচৌবা থৌরমশিং পাংথোকপা মতমদা, ভাবকশিং অমসুং শান্নরোয়শিং মশিং য়াম্না লাক্কনি। মসিদা হোতেল হাংলিবশিং, অপীকপা অমসুং অচৌবা অচা-অথক য়োনফমশিং, রিক্সো-ওতো-তেক্সি থৌরিবশিং অমসুং ঐখোয়গী হিহোনবশিং ফাওবা কান্নবা ফংলগনি। অচৌবা স্তদিয়ম অসিনা মরম ওইদুনা, স্পোর্তস কোচিংগী অনৌবা সেন্তরশিং হাংদোক্লগনি অমসুং স্পোর্তস মেনেজমেন্তগী অনৌবা খুদোংচাবশিং ফংলগনি। ঐখোয়গী বরানাসকী নহারোলশিং শান্নবগী অনৌবা স্তার্দঅপশিংগী ৱাখল খনবা য়ারগনি। ফিজিওথেরাপী য়াওনা শান্নবগা মরী লৈনবা কোর্সশিং হৌরগনি অমসুং বরানাসীদা অচৌবা শান্নবগী উদোগ অমা শেমগৎলগনি।
ঐগী নুংশিরবা ইমুং-মনুংগী মীওইশিং,
মখোয়গী মচাশিং মতম চুপ্পা শান্নদুনা লৈবগী মমা-মপাশিংনা মচাশিং চৈবগী মতম অমা লৈরম্মী। হৌজিক খুন্নাইগী ৱাখল্লোল হোংলে। অঙাংশিং খক্তনা থৱায় য়াওবতা নত্তনা, হৌজিক শান্নবগী মতাংদা মমা-মপাশিংশু থৱায় য়াওরে। শান্নবা খক্তনা নুংঙাইবা ঙমগনি হায়বা হৌজিক লৈবাক অসিদা খন্নরে।
মরুপশিং,
হৌখিবা থা ১-২গী মমাঙদা, ঐনা মধ্য প্রদেসকী ত্রাইবেল খুঙ্গং অমা সাহদোলদা চৎখি অমসুং মফম অদুনা ঐনা নহারোল কয়াগা উনবগী খুদোংচাবা অমা ফংখি অমসুং মখোয়গী ৱারোলশিং তাখি। মসিগী খুঙ্গং অসি ঐখোয়গী মিনি ব্রাজিলনি, কমদৌনা মিনি ব্রাজিল ওইরকপগে হায়না ঐনা হংখি, ঐখোয়গী ইমুং খুদিংদা ফুতবোল শান্নরোয় অমমম লৈ হায়না খুমখি অমসুং মখোয়গী ইমুংদা মীরোল অহুমগী জাতি থাক্কী ফুতবোল শান্নরোয়শিং লৈ হায়না মীওই খরনা ঐঙোন্দা হায়খি। শান্নরোয় অমনা পোথারবা মতুংদা, মফম অসিদা মহাক্কী পুন্সি কৎথোকখি। ঐখোয়গী চহিগী থৌরম অমা পাংথোকপদা, অদোমনা য়ুমদা কনা অমতা থিবা ফংলোই হায়না মখোয়না ফোঙদোকখি। মফম অসিদা খুঙ্গং চা কয়া লৈরি অমসুং মীওই লাখ কয়া শান্নবুংশিংদা নুমিৎ কয়ানি লৈরি। মসিগী চৎনবী অসি উবদা অমসুং তাবদা লৈবাক অসিগী অফবা তুংলমচৎ অমা ঐনা থাজৈ। কাসিগী এম.পি ওইনা, ঐনা মফম অসিদা অহোংবা কয়া লাকপা উরে। মফম অসিদা এম.পি স্পোর্তস কম্পিতিসন পাংথোকপদা থৱায় য়াওনা শরুক য়াখিবগী পাউ ঐনা ফংলে। শান্নবগী লমদা কাসিগী নহারোলশিং মখোয়গী মিংচৎ পুরকপা হায়বসি ঐগী অনিংবনি। মরম অদুনা বরানাসীগী নহারোলশিংদা অৱাংবা থাক্কী শান্নবগী খুদোংচাবশিং ফংহনবা হায়বসি ঐখোয়গী থবক্নি। মসিগীদমক, অনৌবা স্তদিয়ম অমসুং সিগ্রা স্তদিয়মগীদমক লুপা করোর ৪০০ থাদরে। সিগ্রা স্তদিয়মদা শান্নবগী খুদোংচাবা মফম ৫০ হেন্না শেমগৎলে। হকচাংগী ফিবমদা মীমান্নদ্রবশিংগী য়েংদুনা শাবা লৈবাক অসিগী অহানবা মল্তি-লেবেল স্পোর্তস কমপ্লেক্স স্তদিয়ম অসিনা ওইরগনি। মসি কাসিগী মীয়ামদা অথুবা মতমদা কৎথোক্লগনি। বাদালাপুরদা সিন্থেতিক ত্রেক অমা, সিন্থেতিক বাস্কেতবোল কোর্ত অমা লৈরগনি।
ঐগী ইমুং-মনুংগী মীওইশিং,
ঙসি শান্নবদা ভারতনা মাইপাক্লিবা অসি লৈবাক অসিগী ৱাখল্লোন্দা অহোংবা লাকপদগী ওইরকপনি। নহারোলশিংগী হকচা ফবা অমুং থবক ফংবা অমসুং নহারোলশিংগী শীনফমগা শান্নবগা ঐখোয়না মরী লৈনহল্লে। চহি ৯গী মমাঙগা চাংদম্নবদা, চহি অসিদা শান্নবগী বজেত শরুক অহুম হেনগৎলে। হৌখিবা চহিগা চাংদম্নবদা খেলো ইন্দিয়া প্রোগ্রামগী বজেত চাদা ৭০ হেনগৎলে। ঙসিদি সরকারনা ঐখোয়গী শান্নরোয়শিংগা তিম মেম্বর অমা ওইনা স্কুলদগী ওলেম্পিক পোদিয়ম ফাওবা চৎমিন্নরে। খেলো ইন্দিয়াগী মখাদা, লৈবাক শীনবা থুংনা স্কুলশিংদগী হৌরগা য়ুনিভর্সিতিশিং ফাওবা শান্নবগী চাংদম্নবশিং পাংথোক্লে।
মশিং য়াম্লবা ঐখোয়গী ইচানুপীশিং শান্নবগী থৌরমশিংদা শরুক য়ারে। খোঙথাং খুদিংমক্তা সরকারনা পাংবা য়াবা মতেং পাংলি। ওলেম্পিক পোদিয়ম স্কিম অসি অসিগুম্বা থবক অমনি। থৌরম অসিগী মখাদা, লৈবাক অসিগী মকোক থোংবা শান্নরোয়শিংদা চানবা অমসুং ত্রেনিংগী চহি চুপ্পা সরকারনা লুপা লাখ কয়াগী মতেং পীরি। ঐখোয়না মসিগী মহৈ মালেম থাক্কী চাংদম্নবা খুদিংমক্তা উবা ফংলে। হন্দক ভারতনা ৱার্ল্দ য়ুনিভর্সিতি গেমসতা পুৱারি শেম্লে। হায়রিবা গেম অসিদা হৌখিবা চহি কয়াদা ফংখিবা মেদলশিংদগী মশিং য়াম্না হেন্না চহি অসিদা ঐখোয়গী অঙাংশিংনা মেদলশিং ফংলে। এসিয়ান গেমস শরুক য়ারিবা ভারতকী শান্নরোয়শিংদা ঐগী য়াইফ-পাউজেল পীজরি।
মরুপশিং,
লৈবাক অসিগী মফম খুদিংমক্না শান্নবদা হৈথোই-শিংথোইবা মীওই কয়া লৈরি। মখোয় থিদোকপা অমসুং মখোয় হেন্না মশক থোকহনবা হায়বসি য়াম্না মরুওই। ঙসিদগী খ্বাইদগী পীকপা খুঙ্গংদগী হৌরকপা নহারোলনা লৈবাক শীনবা থুংগী মিংচৎ পুরক্লে। ঐখোয়গী অপীকপা সহরশিংদা লৈরিবা শান্নরোয়শিংগী মগুন কয়া য়াম্না লৈবগে হায়বা মসিনা উৎলে। খেলো ইন্দিয়া কেম্পেন্না মরম ওইদুনা, ঙসিদি চহি য়াম্না নৌরিঙৈদগী লৈবাক অসিগী কাচিন-কোয়া খুদিংমক্তা লৈবা হৈথোই-শিংথোইবা শান্নরোয়শিং মশক খঙদোক্লে। শান্নরোয়শিং মশক খঙদোক্নবা অমসুং মখোয় মালেম থাক্কী শান্নরোয়শিং ওইনা শেমগৎনবা সরকারনা থবক খুদিংমক পায়খৎলে।
ঐগী ইমুং-মনুংগী মীওইশিং,
শান্নরোয়শিং ফগৎনবা অফবা কোচশিং অমসুং অফবা কোচিং চপ মান্ননা মরুওই। মফম অসিগী শক্নাইরবা শান্নরোয়শিংনা মসিগী মরুওইবা অদু পল্লি। মরম অদুনা, শান্নরোয়শিংদা অফবা কোচিং ফংহন্নবা সরকারনা থবক পায়খৎলি। অচৌবা কম্পিতিসনশিংদা শরুক য়াখ্রবা অমসুং জাতি অমসুং ইন্তরনেসনেলগী থাক্তা শান্নরুরবা শান্নরোয়শিং কোচ ওইনা থবক তৌনবা পুক্নিং থৌগৎলে। হৌখিবা চহি খরদা লৈবাক অসিগী শান্নরোয়শিং তোঙান-তোঙানবা মশান্নশিংদা শরুক য়ারে।
মরুপশিং,
খুঙ্গং খুদিংমক্তা সরকারনা শেমগৎলিবা অনৌবা শান্নবগী ইনফ্রাস্ত্রকচরশিংনা খুঙ্গংশিং অমসুং অপীকপা সহরশিংদা অনৌবা খুদোংচাবশিং পীরগনি। হান্নদি, অফবা স্তদিয়মশিং অচৌবা সহরশিং হায়বদি দিল্লি-মুম্বাই-কোলকাতা-চেন্নাইগুম্বা খক্তদা লৈরমখি। হায়রিবা খুদোংচাবশিং অসি লৈবাক অসিগী মফম খুদিংদা লৈরিবা শান্নরোয়শিংদা ফংহন্নবা থবকশিং পায়খৎলে। খেলো ইন্দিয়া প্রোগ্রামগী মখাদা শেমগৎপা শান্নবগী ইনফ্রাস্ত্রকচরশিংগী কান্নবা ঐখোয়গী ইচানুপীশিংনা ফংবদা ঐ হরাওই। শান্ননবা অমসুং ত্রেনিং তৌনবা ইচানুপীশিংনা লাপ্না চৎপা অদু হৌজিক হন্থরগনি।
মরুপশিং,
অনৌবা ইজুকেসন পোলিসিদা, শান্নবা অসি সাইন্স, কম্মর্স নত্ত্রগা অতোপ্পা সবজেকশিংগা চপ মান্নবা কাংলুপ্তা থম্লে। হান্নদি শান্নবা অসি অহেনবা থবক্নি হায়না লৌনরম্মী, অদু হৌজিক লৌনদ্রে। হৌজিক শান্নবা অসি স্কুলশিংদা সবজেক অমা ওইনা তমগদবনি হায়না ৱারেপ লৌরে। ঐখোয়গী লৈবাক অসিনা অহানবা ওইনা মনিপুরদা নেসনেল স্পোর্তস য়ুনিভর্সিতি লিংখৎলে। য়ু.পি মথন্তদা শান্নবগী খুদোংচাবশিং শেমগৎনবা লুপা করোর কয়া চাদিং তৌরে। গোরাখপুরদা স্পোর্তস কলেজ পাকথোক-চাউথোকহনবা, মেরুত্তা মেজর ধ্যন চান্দ স্পোর্তস য়ুনিভর্সিতি শাগৎপা য়াওনা ঐখোয়গী শান্নরোয়শিংগী অনৌবা স্পোর্তস সেন্তর কয়া শেমগৎলে।
মরুপশিং,
লৈবাক অমা চাউখৎহনবদা শান্নবগী খুদোংচাবশিং পাকথোক-চাউথোকহনবা অসি য়াম্না মরুওই। মসি শান্নবা খক্তগী নত্তনা লৈবাক অসিগী মিংচৎগীদমক য়াম্না মরুওই। অচৌবা মালেমগী শান্নবগী থৌরমশিং পাংথোকপগীদমক ঐখোয় অয়াম্বনা মালেমগী সহর অয়াম্না খঙনরি। ঐখোয়শু ভারত্তা অসিগুম্বা সেন্তর কয়া শাগদবনি অমসুং মালেমগী শান্নবগী থৌরমশিং পাংথোক্কদবনি। ঙসি উরেপ-উয়ুং তম্লিবা স্তদিয়ম অসি শান্নবদা ঐখোয়না থম্লিবা মীৎয়েং অদু উবা ফংলগনি। মসিগী স্তদিয়ম অসি ভারতকী তুংলমচৎকী অচৌবা খুদম অমা ওইরগনি। চাউখৎ-থৌরাংগী থবক খুদিংমক্তা ঐগী কাসিনা লেপক্কনি হায়না ঐনা থাজৈ। অদোমগী মতেং য়াওদনা, কাসিদা থবক অমতা পাংথোকপা ঙম্লোই। অদোমগী থৌজালগা লোয়ননা, ঐখোয়না মখা তানা কাসি অমুক হন্না চাউখৎনবা অনৌবা পন্দুবশিং ইবা ঙমগনি। ক্রিকত স্তদিয়ম উরেপ-উয়ুং তম্বা অসিদা ঐনা অমুক হন্না কাসি অমসুং নোংপোক ভারতকী মীয়াম থাগৎচরি।
হর হর মহাদেব! অদোম থাগৎচরি।
