The commissioning of three frontline naval combatants underscores India's unwavering commitment to building a robust and self-reliant defence sector: PM
A significant step towards empowering the Indian Navy of the 21st century: PMToday's India is emerging as a major maritime power in the world:PMToday, India is recognised as a reliable and responsible partner globally, especially in the Global South: PMIndia has emerged as the First Responder across the entire Indian Ocean Region: PMBe it land, water, air, the deep sea or infinite space, India is safeguarding its interests everywhere: PMমহারাস্ত্রগী রাজ্যপাল সি.পি. রাধাকৃষ্ণন জী, মহারাস্ত্রগী মীয়াম্না য়াবা মুখ্যমন্ত্রী, দেবেন্দ্র ফদ্নাবীস জী, মন্ত্রী মন্দলগী ঐগী অথোইবা মরূপ শ্রীমান রাজনাথ সিংহ জী, সঞ্জয় সেথ জী, মহারাস্ত্রগী মুখ্যমন্ত্রী অমদি ঐগী ইরক্তা উপ মুখ্য মন্ত্রীসু তিল্লিরি, উপ মুখ্য মন্ত্রী শ্রীমান একনাথ সিন্দে জী, অজীত পৱার জী, CDS, CNS, নেভীকী মরূপ মপাঙ পুম্নমক, মঝগাও দোকয়ার্দতা থবক তৌবিরিবা মরূপ পুম্নমক, অতৈ লেঙশিনবিরিবশিং, ইবেম্মা অমদি ইবুংঙোশিং।
জনুৱারী ১৫ অসি আর্মী দে হায়না পাঙথোকই। লৈবাক্কী ঙাকশেলগীদমক মপুন্সি কত্থোকখিবা মশিং লাকঙমদ্রবা থৌনা ফবশিংগী মফমদা ইকোক নোঞ্জরি, ইমা ভারতীগী ঙাকশেলদা পুক্নিং লুপ্পিরিবা থৌনা ফরবা ফরবীশিংগী মফমদা নুমিৎ অসিগীদমক নুংঙাইবা ফোঙদোকচরি।
মরূপশিং,
ঙসি অসি ভারতকী সমুদ্রগী হেরিতেজ, নেভীগী চাউথোকচনিংঙাই ওইরবা পুৱারী অমদি আত্মনিরভর ভারত অভিয়ানগী ওইনা য়াম্না মরুওইবা নুমিৎ অমনি। শত্রপতি সিবাজী মহারাজনা ভারত্তা ঈশিং লান্মীগী অনৌবা মশক লেপ্লম্মি, অনৌবা মীৎয়েঙ থম্বিরম্মি। ঙসি মহাক্কী শেংলবা লৈহাও অসিদা, ২১শুবা চহিচাগী নেভীবু মপাঙ্গল কলহন্নবগী লমদা ঐখোয়না অচৌবা খোঙথাঙ অমা লৌখৎলি। দেস্ত্রোয়র অমা, ফ্রিগেত অমা, অমদি সবমেরিন অমা পুন্না অমুক্তদা কম্মিসন তৌমিন্নবা অসি অহান্বনি। অদুগা খ্বায়দগী চাউথোকচনিংঙাই ওইবা ৱাফমদি ফ্রন্তলাইন প্লেতফোর্ম অহুম্মক অসি মেদ ইন ইন্দিয়ানি। ঐনা ভারতকী ঈশিং লান্মী, মখোয়গী য়াইফনবা থবক থৌরমদা লৈবিরিবা খোঙলোয় পুম্নমক, ইঞ্জিনিয়রশিং, শিন্মীশিং অমদি লৈবাক পুম্বগী মফমদা নুংঙাইবা ফোঙদোকচরি।
মরূপশিং,
ঙসিগী থৌরম অসি ঐখোয়গী চাউথোকচনিংঙাইই ওইরবা তুংলমচত্তা ওইরকপা য়াবশিংগা মরী লৈনৈ। অশাংবা সমুদ্রগী খোঙচৎ, কম্মর্স, নেভেল দিফেন্স, সিপ ইন্দস্ত্রী, হায়রিবশিং অসিদা ঐখোয়গী মপাঙ্গল কল্লবা পুৱারী লৈজৈ। ইশগী পুৱারীদগী পুক্নিং থৌগৎনফম ওইরগা, ঙসিগী ভারতনা মালেমগী অচৌবা মেরীতাইম পৱার ওইরক্লি। ঙসি লোঞ্চ তৌরিবা প্লেতফোর্ম অসিদসু মসিগী মমি তারি। হৌজিকক ঐখোয়গী নিলগিরি অসি চোল শাগৈগী লৈরম্বা সমুদ্রগী মতিক্তা কত্থোকপনি। সুরত ৱারসিপ অসিনা গুজরাতপু হিথাংফমশিংগী মতেঙনা নোংচুপ এসিয়াগা শম্নহল্লম্বা মতম অদু নীংশিংহল্লি। জহাজ অনি অসিগা লোয়ননা ঙসি বাঘসীর সবমেরিনসু কম্মিসন তৌরি। চহি খরগী মমাঙদা ঐহাক অহান্বা ওইনা P75 ক্লাসকী অহান্বা সবমেরিন, কোলাবরী কম্মিসন তৌবদসু শরুক য়ানবা তাঞ্জা ফংখি। ঙসি ঐনা ক্লাস অসিগী তরুশুবা সবমেরিন বাঘসীরবু কম্মিসন তৌনবগী খুদোংচাবা অমুক ফংলি। অনৌবা ফ্রন্তিয়র প্লেতফোর্মশিং অসি ঙাকশেল অমদি খুমাঙ চাওশিনবগী অনৌবা খুদম্নি।
মরূপশিং,
ঙসি ভারত মালেম পুম্বদা অমদি মরুওইবা মালেমগী খাথংবা শরুক্তা থাজবা য়াবা অমদি থৌদাং চাউবা খোঙলোয় অমগী শক্লোন্দা মশক খঙনরি। ভারত খন্ন-নৈনদুনতা লৈবা নত্তে, ভারতনা চাওখৎপা পুরকপগী ৱাখল্লোন্দা থবক তৌবনি। ভারতনা মতম পুম্বদা ওপন, সিক্যুর, ইনক্লুজিব, অমদি প্রোস্পেরস ওইবা ইন্দো-পেসিফিক রীজন পুরক্নবা ৱাফম থমদুনতা লাক্লি। মরম অসিনা সমুদ্রগা শম্নবা লৈবাকশিংগী চাওখৎপগী ৱাফম হৌদোক্নরকপদা, ভারত সাগর হায়রিবা লাইৱা অসি পুথোকখি। সাগর হায়বগী ৱাহন্থোক্তি – সিক্যুরিতী এন্দ গ্রোথ ফোর ওল ইন দি রিজন হায়বনি, ঐখোয়না সাগরগী ভিজনগা লোয়ননা মাঙদা চঙশিল্লি, ভারতকী মাঙদা G-20 গী প্রেসিদেন্সী পায়নবা ৱাফম লাকপা মতমদা, মালেমসিদা ঐখোয়না – ৱন ৱর্থ ৱন ফেমিলী ৱন ফ্যুচর হায়বা লাইৱা অসি পীখি। মালেমসিনা কোরোনাগী লান্থেংনবদা অৱাবা মায়োক্নরবা মতমদা, ভারতনা ৱন আর্থ ৱন হেল্থকী মীৎয়েঙ পুথোকখি। ঐখোয়না মালেম পুম্ববু ঐখোয়গী ইমুংগুম্না খন্দুনা চঙশিল্লি, ঐখোয়না সবকা সাথ, সবকা বিকাস হায়বা ৱাখল্লোনসিদা থাজবা থম্বা মীওইশিংনি। মরম অসিনা ঐখোয়না মফম পুম্বগী ঙাকশেলগী ৱাফমসু ভারত মশাগী থৌদাংগুম্না লৌই।
মরূপশিং,
গ্লোবেল সিক্যুরিতী, ইকনমিক্স অমদি জিওপোলিতিক্স দাইনামিক্সকী মায়কৈ তাকপদা ভারতকুম্বা মেরিতাইম লৈবাকশিংগী থৌদাং য়াম্না চাউরক্কদৌরি। শেন্মিৎলোন চাওখৎপা অমদি ইনর্জী সিক্যুরিতী পুরকপদা ঙমখৈগী ঈশিং ঙাক শেন্বা, ফ্রীদম ওফ নেভিগেসন লৈহন্বা, অমদি ত্রেদকী সপ্লাই লাইন অমসুং সমুদ্রগী লম্বীশিং খুদোংথিবা নংলোইদবা মওংদা থম্বা মরুওই। ঐখোয়না তেরোরিজম, খুৎশু খুৎলায় অমদি দ্রগ্স লোন্না পুথোক পুশিন তৌবদগী লমদম পুম্বসু ঙাকশেন্দুনা থমগদবনি। মরম অসিনা সমুদ্রবু শাফবা অমদি নুংঙাই য়াইফবা ওইহন্বা ওইহন্বদা ঐখোয়না মালেমগী খোঙবু ওইবা, ঐখোয়গী লোজিস্তিক ইফিসিএন্সী হেনগৎহন্বা অমদি সিপ্পিং ইন্দস্ত্রীকী লমদা থবক পায়খৎপা মরুওই। ঐখোয়না র্যার মিনরেল, ফিস স্তোক্নচিংবা সমুদ্রগী মচাক মথুমশিং লান্না শীজিন্নবা থিংবদা অমদি মসিবু মেনেজ তৌবগী কেপাসিতী হেনগৎহনগদবনি। ঐখোয়না অনৌবা সিপ্পিং লম্বীশিং অমসুং কম্ম্যুনিকেসনগী সী লেনশিং থিজিন্বদা শেল থাদগদবনি। ভারতনা ঙসি মায়কৈ অসিদা হন্বা লৈতনা চঙশিল্লিবা অসিদা ঐ নুংঙাইবা ফাওই। ভারতনা ইন্দিয়ন ওসীন রিজন পুম্বদা ফর্স্ত রেস্পোন্দর ওইনা মাঙজিল থারক্লি। হৌখিবা থা খরসিদা ঐখোয়গী ঈশিং লান্মীনা মীওই চা কয়াগী পুন্সি কনখ্রে, লুপা করোর কয়াগী নেস্নেল অমদি ইন্তরনেস্নেল কার্গো ঙাক শেন্দুনা লাকখি। মসিনা মালেমসিনা ভারত্তা থাজবা থম্বা হেনগৎলক্লি, ময়াম পুম্নমক্না মরম ওইরগা হেনগৎলক্লিবনি, অমদি মরম অসিনা ঐনা ঙসি ময়াম পুম্নমক্কী মফমদা ইকায়খুম্নবা উৎচরি। ভারতকী ঈশিং লান্মী, কোস্ত গার্দতসু থাজবা লেপ্পা লৈতনা হেনগৎলক্লি। ঙসি ময়ামসু উবিরি, অসিয়ন ওইরবসু, ওস্ত্রেলিয়া ওইরবসু, গল্ফ ওইরবসু, নৎত্রগা অফ্রিকা লৈবাকশিং ওইরবসু, পুম্নমক্কা ঙসি ভারতকা লৈনরিবা শেন্মিৎলোনগী তেংবাংনবগী মরী লেপ্পা লৈতনা ফগৎলক্লি। অচেৎপা মরী অসিদা ইন্দিয়ন ওসীন রিজন্দা ভারতনা লৈরিবা অসিদা ভারতনা লৌরিবা থৌদাং য়াম্না চাউই। মরম অসিনা ঙসিগী থৌরম অসি লান্মীখক্তগী নত্তনা শেন্মিৎলোনগী মীৎয়েঙদসু চপ চানা মরু ওই।
মরূপশিং,
২১শুবা চহিচাগী ভারতকী লান্মীগী মপাঙ্গল য়াম্না কল্লে, মতমগা চুনবসু ওইরে, মসি লৈবাক্কী অথোয়বশিংগী মরক্তা অমনি। ঈশিংদা ওইরবসু কংফালদা ওইরবসু, নোংথক্তা ওইরবসু নৎত্রগা সমুদ্র ঈরোন্নুংদা ওইরবসু নৎত্রগা মপান নাইদ্রবা তরংদা ওইরবসু মফম খুদিংদা ভারতনা মশাগী কান্ননবা থবক পায়খৎলি। মরম অসিনা লেপ্পা লৈতনা রিফোর্মশিং তৌদুনা লাক্লি। চীফ ওফ দিফেন্স স্তাফকী ফম অসিগুম্বা রিফোর্ম অমনি। ঐখোয়গী লান্মীশিং মতিং মপুং ফানা লৈহন্নবা, থিএতর কম্মান্দকী লমদসু ভারতনা খুমাঙ য়াম্না চাওশিল্লে।
মরূপশিং,
হৌখিবা চহি ১০ সিদা ভারতকী লান্মী শঙলুপ অহুম্না আত্মনিরভর্তাগী লাইৱা শাগোন্নদুনা অসি য়াম্না পুক্নিং থৌগৎনিংঙাইনি। লাংফমগী মতমদা অতোপ্পা লৈবাক্তা ভারতনা তাংবা হেক য়ারিবমখৈ হন্থহন্বগী মরুওইবা ৱাফম খঙলদুনা ময়াম পুম্নমক্না থবক অসি মাঙদা পুখৎখি, মীৎয়েঙ চঙখি। ঐখোয়গী লান্মীশিংনা মপান লৈবাকশিংদগী লৌররোইদবা মচাক মথুম অমদি পোৎলম লিশিং ৫ হেন্বগী লিস্ত শেম্লকখি। ভারতকী লান্মীনা ভারত্তা পুথোকচবা খুৎশু-খুৎলায় অমদি মচাক মথুমশিংগা লোয়ননা মাঙদা চঙশিল্লকপা মতমদা মখোয়দা তোপ তোপ্পা মশাদা থাজবা অমা ফাওহল্লি। হৌখিবা চহি ১০ সিদা, কর্নাতকাদা লৈবাক্কী খ্বায়দগী চাউবা হেলিকোপ্তর পুথোক্নবা ফেক্তরী শাবা হৌগৎখি। লান্মীশিংগী ত্রান্সপোর্ত এয়রক্রাফ্ত পুথোক্নবা ফেক্তরী শাবা হৌগৎখি। তেজস ফাইতর প্লেন্না ভারতকী মতিক অতিয়া পক্না ৱাংহনখি। য়ুপী অমদি তামিলনাদুদা শেমগৎলিবা দিফেন্স কোরিদোরশিংনা দিফেন্স প্রদক্সন্দা হেন্না খোঙজেল হাপকদৌরি। ঐখোয়গী নেভীনসু মেক ইন ইন্দিয়া অভিয়ানবু য়াম্না কন্না পুক্নিং থৌগৎপা উবদা ঐ নুংঙাইবা ফাওই। মসিদা মঝগাও দোকয়ার্দতা লৈবিরিবা মরূপ পুম্নমক্কী অচৌবা থৌদাং লৈ। হৌখিবা চহি ১০ সিদা নেভীদা জহাজ ৩৩ অমদি সবমেরিন ০৭ হাপচিনখ্রে। নেভেল ভেসেল ৪০ সিগী মনুংদা ৩৯ দি ভারতকী সিপয়ার্দশিংদা শাবনি। মখোয়গী মনুংদা ঐখোয়গী ভত্য-বিরাত INS বিক্রান্ত এয়রক্রাফ্ত কেরিয়র, অমদি INS অরিহন্ত অমদি INS অরিঘাতনচিংবা ন্যুক্লিয়র সবমেরিনশিংসু য়াওরি। মেক ইন ইন্দিয়াদা অসুম্না খোঙজেল হাপ্পগীদমক ঐখোয়গী লান্মী শঙলুপ অহুম্মক্কী মফমদা নুংঙাইবা ফোঙদোকচরি। ঙসি ভারতকী দিফেন্স প্রদক্সন লুপা করোর লাখ ময়া য়ৌরক্লে। ঐখোয়না লৈবাক ১০০ হেন্বদা দিফেন্স ইকুইপমেন্ত এক্সপোর্ত তৌরি। অদোমগী মতেঙগা লোয়ননা ঙসি ভারতনা মাগী দিফেন্স সেক্তরদা খোঙজেল য়াঙনা চাওখৎপা পুরকপা ঙমগনি হায়না ঐনা থাজৈ।
মরূপশিং,
মেক ইন ইন্দিয়ানা ভারতকী লান্মীশিংগী মতিক হেনগৎহনবগা লোয়ননা শেন্মিৎলোনগী চাওখৎনবগী অনৌবা থোঙসু হাংদোক্লি। খুদম অমা হায়রগদি সিপ বিল্দিং ইকোসিস্তেম অসিনি। তিনবিরিবা ময়াম মরক্তগী মীওই কয়া অমদি খঙবিরমগনি, সিপ বিলদিংদা শেল ফনা য়াম্না থাদরবসু মদুগী শরুক অনি থোক্না শেন্মিৎলোন্দা কান্নবা পীরক্কনি হায়না অখঙ অহৈশিংনা হায়নরিবদুনি। হায়বদি, করিগুম্বা ঐখোয়না সিপ বিল্দিংদা লুপা ১ থাদরবদি, মদুনা শেন্মিৎলোন্দা লুপা অমগা পৈশা ৮২ রোম কারক্কনি। অদোমসু খনবিয়ু, হৌজিক লৈবাকসিদা অচৌবা জহাজ ৬০ শেমগৎ শাগৎপগী থবক পায়খৎলি। মখোয়গী ভেল্যু লুপা করোর লাখ অমা মখায়রোম্নি। হায়বদি শেল ময়াম অসি থাদরিবসিনা শেন্মিৎলোন্দা চাউরাক্না লুপা করোর লাখ ৩ দি কারক্কদৌরিবনি। অদুগা থবক পীবগী মতাঙদদি শরুক ৬ থোক্না মল্তিপ্লাইয়র ইফেক্ত লৈ। জহাজশিংগী পোৎলম অয়াম্বা, হিথাংফম অয়াম্বা, লৈবাকসিগী MSME শিংনা মপু ওইবনি। মরম অসিনা জহাজ অমা শাবদা শিন্মী ২০০০না থবক তৌরবদি, অতোপ্পা নাকলদা সপ্লাইয়র ওইরিবা MSME অদুদা চাউরাক্না মীওই লিশিং ১২ রোম থবক পীরি হায়বনি।
মরূপশিং,
ঙসি ভারতনা মালেমগী অহুমশুবা খ্বায়দগী চাউবা শেন্মিৎলোন ওইরক্নবগী লমদা খোঙজেল য়াঙনা চঙশিল্লি। ঐখোয়গী মেনুফেকচরিং, ঐখোয়গী এক্সপোর্তিং কেপাসিতীসু লেপ্তনা হেনগৎলক্লি। লাক্কদৌরিবা চহিশিংসিদা অনৌবা জহাজ, অনৌবা কন্তেনর চা কয়াগী মথৌ তারক্কদৌরি। মরম অসিনা পোর্ত লেন্দ দিভেলপমেন্তগী মোদেল অসিনা ঐখোয়গী শেন্মিৎলোন্দা খোঙজেল হাপকদৌরি, মীওই লিশিং কয়াদা থবক পীনবা অনৌবা খুদোংচাবশিং পুরক্কদৌরি।
মরূপশিং,
হীরম অসিদা থবক পীবগী চাং কয়া য়াম্না হেনগৎপগে হায়বদুগী খুদম অমা হায়রগদি সী-ফোর্সসকী মশিং অসিনি। ২০১৪ দা ভারত্তা সী-ফোর্সকী মশিং লাখ খরা হেন্না লৈরম্মি। ঙসিদি শরুক অনিরোম হেনগৎলক্,তুনা লাখ ৩ লোম শুরে। ঙসি ভারতকী সী-ফোর্সস মশিং মালেমগী মকোক থোংবা মঙাগী মনুং চল্লে।
মরূপশিং,
ঐখোয়গী লৈঙাক্কী অহুমশুবা তর্ম অচৌবা ফিরেপ কয়াগা লোয়ননা হৌরকখি। খোঙজেল য়াঙনা ঐখোয়না অনৌবা কাঙলোনশিং শেমখি, লৈবাক্কী মথৌ তাবা য়েংলগা অনৌবা থবকশিং পায়খৎখি। লৈবাক্কী কাচিন কোয়া থুংনা চাওখৎপা পুরকপা হায়বা পান্দমসিগা লোয়ননা চৎপগা লোয়ননা পোর্ত সেক্তর অসিসু মসিগী শরুক অমনি। ঐখোয়গী অহুমশুবা তর্মগী মমাঙদা লৌখিবা অচৌবা ফিরেপশিংগী মনুংদা, মহারাস্ত্রগী ৱাধৱন হিথাংফমগী অয়াবা পীরম্বা অসিনি। লুপা করোর লিশিং হুম্ফুতরামঙাগী শেনফম চাদিং তৌদুনা মতমগা চুনরবা হিথাংফম অসি শেমগৎপা হৌখি। মসিনসু মহারাস্ত্রদা থবক পীবগী অনৌবা খুদোংচাবা লিশিং কয়া পুরকখি।
মরূপশিং,
মতম শাংনা ঙমখৈ অমদি সমুদ্র খোঙবান পরিংগা মরী লৈনবা কন্নেক্তিবিতী ইনফ্রাস্ত্রকচরদা পুক্নিং ইচঙ চঙদনা লৈরকখি। হৌখিবা চহি তরাসিদা মসিগী মতাঙদা অকন্বা থবকশিং পায়খৎখি। নুমিৎ নিনিগী মমাঙদা ঐহাক জম্মু-কাস্মিরগী সোনমর্গ তনেল মীয়ামদা কত্থোক্নবা তাঞ্জা ফংখি। মসিনা কার্গিল, লদাখনচিংবা ঐখোয়গী ঙমখৈ নক্না লৈবা মফমশিংদা য়ৌবদা য়াম্না লায়হনগনি, কান্নবা পুরক্কনি। মমাঙ চহিদা অরুনাচল প্রদেশতা সেলা তনেল মীয়ামদা কত্থোকখি। মসিনা LAC ফাওবা ঐখোয়গী লান্মীশিং য়ৌহনবদা কোমহল্লি। ঙসি সিঙ্কুন লা তনেল অমদি জোজিলা তনেলনচিংবা মশিং য়াম্লবা মরুওইবা ইনফ্রাস্ত্রকচরশিংগী থবক খোঙজেল য়াঙনা পায়খৎলি। ভারতমালা পরিয়োজনানা ঙমখৈগী মফমদা নীংথিরবা নেস্নেল হায়ৱেশিংগী নেতৱর্ক শেমগৎলি। ভাইব্রেন্ত ভিলেজ প্রোগ্রাম্না ঙসি ঙমখৈগী খুঙ্গংশিংদা চাউখৎপা পুরকপদা মরুওইবা থৌদাং লৌরি। হৌখিবা দেকেদ অসিদা অরাপ অরাপ্পদা লৈবা ঈথৎশিংদসু ঐখোয়না মীৎয়েঙ চঙখি। মী তাদবা ঈথৎশিংদসু চাং নাইনা য়েংশিনখি, মসিদসু নত্তনা অদুগুম্বা ঈথৎশিংদুগী অনৌবা শক্তমশু শেমগৎখি, মখোয়দা অনৌবা মমিংশিং থোনখি। মসিদসু নত্তনা হিন্দ মহাসাগরদা সমুদ্রগী ঈমায়দা লৈরিবা সীমাউন্তশিংগী মমিংসু থোল্লি। মমাঙ চহিদা ভারতনা হৌদোকপা ৱাফমদা মালেমগী লুপশিংনা অসিগুম্বা মফম মঙাগী মমিং থোনখি। হিন্দ মহাসাগরদা অসোক সীমাউন্ত, হর্সবর্ধন সীমাউন্ত, রাজা রাজা চোল সীমাউন্ত, কল্পতরু রীজ অমদি চন্দ্রগুপ্ত রীজ ভারতকী চাউথোকচনিংঙাইশিংনি।
মরূপশিং,
তুংলমচত্তা মপান নাইদ্রবা তরং অমদি দীপ সী অনিমক কয়া য়াম্না মরু ওইবগে হায়বা ঐখোয় পুম্নমক খঙই।১ মরম অসিনা ঙসি স্পেস অমসুং দীপ সী হায়রিবা মফম অনিসিদা ভারতনা মাগী মতিং ফুদোক্লি। ঐখোয়গী সমুদ্রয়ান প্রোজেক্তনা য়সাইন্তিস্তশিংবু মীতর লিশিং ৬ লুবা, লৈবাক অমত্তনা য়ৌশিনবা ঙমদ্রিবা সমুদ্রগী ঈরোন্নুংদা পুদুনা চৎকদৌরি। মসিনা তাকপদি তুংলমচৎকী ওইবা থবক থৌরমশিং পায়খৎপদা ঐখোয়গী লৈঙাক্না করিগুম্বা অমত্তা তৌদনা তোক্লোই।
মরূপশিং,
২১শুবা চহিচাগী ভারতনা মশাদা চপ চানা থাজবা থমদুনা মাঙদা চঙশিল্লি, মসিগীদমক ঐখোয় মীনায় নাইথাংগী ৱাখল্লোন্দগী নীংতম্বা য়াম্না মরু ওই। অদুগা ঐখোয়না ঈশিং লান্মীনা মসিদা থবক ওইনা তৌদুনা উৎলি। ঈশিং লান্মীনা মাগী মতিক শত্রবতি শিবাজী মহারাজকী চাউথোকচনিংঙাই ওইরবা পারী পুরীগা মরী শম্নহল্লি। নেভীনা এদমিরেল রেঙ্ককী এপোলেতসসু শত্রপতি শিবাজী মহারাজকী মতমগী মওং মতৌদা অমুক হন্না শেমদোক শাদোক্লি। মেক ইন ইন্দিয়াগী স্কীম, ভারতকী মরোমদোম লেপচনবা পায়খৎলিবা থৌরাংশিং অসিনসু মীনায় নাইথাংগী ৱাখল্লোন্দগী মনিং তম্নবা পুক্নিং থৌগৎলি। ময়াম পুম্নমক্না মতৌ অসুম্না লৈবাক অসিবু চাউথোকচনিংঙাই ওইবা মীৎকুপশিংতনা থলহন্দুনা লৈগনি, ভারতপু চাওখৎপা লৈবাক ওইহনবদা মতেঙ ওইগদবা থবক খুদিংমক ঐখোয় পুন্না পাঙথোকমিন্নগনি হায়না ঐনা থাজৈ। ঐখোয়গী থৌদাংশিং খেন্নবদি য়াই, অদুবু পুম্নমক্কী পান্দমদি অমখক্তনি – চাওখৎপা ভারত হায়বসিনি। ঙসি লৈবাকসিনা ফংলিবা অনৌবা ফ্রন্তিয়র প্লেতফোর্মশিং অসিনা ঐখোয়না হোৎনরিবশিংসিদা পাঙ্গল হাপকনি।
অদুগা মরূপশিং,
ফাগী জুগায়গী ৱাফম খরসু শাসি, ঐনা খনবদা ঐনা শরুক য়ারুবা লান্মীগী ওইবা থৌরম পুম্নমক্তা, অমদি চান-থক্নবগী খ্বায়দগী মওং তানা শেম শাবদি নেভীগীনি। মসিদা ঙসি সুরতসু য়াওরে, অদুগা ঐখোয় পুম্নমক হেক হেক হায়নবা ৱাফম অমা খঙবিরমগনি, য়াম্না শীজিন্নবা পাউরৌনি, অদুগা ঐনা কেপ্তেন গৌরবগী মফমদা ৱাফম অসি খরা মুন্না তাবিয়ু, পাউরৌ অদুদি – সুরতনা পোক্লকপা অদুগা কাসীনা শীখিবা, হায়বদি সুরতকী চাক্লুক অদু কয়া য়াম্না মতিক লৈবগে হায়ববু পুম্নমক্তগী অথোয়বা ওই, অদুগা হৌজিক সুরত লোঞ্চ তৌবসিদা কেপ্তেন সন্দীপ্না সুরতকী চীঞ্জাক ময়ামদা পীজগনি হায়না থাজৈ।
মরূপশিং,
মসি য়াম্না অথোয়বা পুংফম্নি, লৈবাক পুম্বনা ময়ামগী মফমদা য়াইফ-পাউজেল পীনরক্লি, লৈবাক পুম্বনা চাউথোকচবা ফাওরি, অমদি মরম অসিনা অনৌবা থাজবা অমগা লোয়ননা, অনৌবা মঙলান অমদি থৌনাগা লোয়ননা, অনৌবা ফিরেপকা লোয়ননা চাওখৎপা ভারতকী ফিরেপ মপুং ফাহন্নবা ঐখোয় মপুং ফানা পুন্না হোৎনমিন্নসি। ঙসিগী মীৎকুপ অসিদা মরুওইবা খোঙথাঙ অহুম, খোঙহৌ অহুমসিগীদমক পুম্নমক্কী মফমদা নুংঙাইবা ফোঙদোকচরি, মতাঙসিদা ঐগী ৱারোল তেনশিঞ্জগে। ময়াম পুম্নমক্কী মফমদা য়াইফ-পাউজেল পীজরি। খোঞ্জেল হৌনা ঐগা লোয়ননা লাউবিয়ু –
ভারত ইমানা য়াইফরে।
অতৈদা নৎত্রবসু থৌরমসিদদি খোঞ্জেল খ্বায়দগী হৌহন্নিংই।
ভারত ইমানা য়াইফরে।
ভারত ইমানা য়াইফরে।
ভারত ইমানা য়াইফরে।
ভারত ইমানা য়াইফরে।
হন্না-হন্না থাগৎচরি।
