নই দিল্লীগী ভারত মন্দপমদা পাঙথোকপা ভারত মোবিলিতী গ্লোবেল এক্সপো ২০২৫ থৌরমদা প্রধান মন্ত্রীনা ফোঙদোকখিবা ৱারোল

The journey of Viksit Bharat is set to be one of unprecedented transformation and exponential growth in the mobility sector: PM

Ease of travel is a top priority for India today: PM

The strength of the Make in India initiative fuels the growth prospects of the country's auto industry: PM

Seven Cs of India's mobility solution-Common, Connected, Convenient, Congestion-free, Charged, Clean, Cutting-edge: PM

Today, India is focusing on the development of Green Technology, EVs, Hydrogen Fuel and Biofuels: PM

India stands as an outstanding destination for every investor looking to shape their future in the mobility sector: PM

কেন্দ্রগী মন্ত্রী মন্দলগী ঐগী খোঙলোয় শ্রীমান নিতীন গরকরী জী, জীতন রাম মাঞ্ঝী জী, মনোহর লাল জী, ঐচ.দি. কুমারস্বামী জী, পীয়ুস গোয়ল জী, হরদীপ সিংহ পুরী জী, লৈবাক কয়াদগী লেঙবিরক্লিবা ওতো ইন্দস্ত্রীগী মীহুৎ পুম্নমক, অতৈ মীথুংশিং, ইবেম্মা অমদি ইবুংঙোশিং‍!

ঐনা মমাঙদা ময়ামগী মরক্তা তিঞ্জখিবা মতমদা, লোকসভা মীখল পংলাপ লাপখিদ্রে‍। মতমদুদা ঐনা ময়ামগী থাজবনা মরম ওইরগা মথঙগী ভারত মোবিলিতীঈ এক্সপোদসু শোয়দনা শরুক য়াবা লাক্কনি হায়খি‍। লৈবাকসিনা অহুম্লক হন্না ঐখোয়দা থৌজাল পীনবিরি, ময়াম পুম্নমক্না ঐবু মফমসিদা অমুক্কা হন্না কৌবিরক্লি, মসিগীদমক ঐনা ময়ামগী তৌবিমল খঙবা উৎচরি‍।

|

মরূপশিং,

হন্দক্কী ভারত মোবিলিতী এক্সপোগী ঙমখৈ য়াম্না পাকথোক চাউথোরকপা অসিদা ঐ য়াম্না নুংঙাই‍। মমাঙ চহিদা একজিবিতর ৮০০ হেনবন শরুক য়াখি, মী লাখ অমা মখায় হেনবা লাকখি, হন্দক ভারত মন্দপমগা লোয়ননা দ্বার্কাগী য়শোভুমি অমদি গ্রেতর নোইদাগী ইন্দিয়া এক্সপো সেন্তরদসু এক্সপো অসি চত্থরি‍। মথঙগী নুমিৎ ৫-৬ নিসিদা মী মশিং য়াম্না লাক্কনি‍। অনৌবা গারী কয়াসু মফমসিদা লোঞ্চ তৌগদৌরি‍। মসিনা তাক্লিবদি ভারত্তা মোবিলিতীগী তুংলমচৎ য়াম্না ফনা লৈ হায়বনি‍। মফমসিদা একজিবিসন খরদা চৎনবা, মখোয়বু য়েংনবা তাঞ্জা ঐহাকসু ফংলি‍। ভারতকী ওতোমোতিব ইন্দস্ত্রী, য়াম্না নীংথিজৈ অদুগা তুংগীদমকশু শেম শাদুনা লৈরে‍। ঐহাক্না ময়াম পুম্নমক্কী মফমদা য়াইফ-পাউজেল পীজরি‍।

মরূপশিং,

ভারতকী ওতো সেক্তরগী চাউখ্রবা থৌরম অসিদা ঐ ঙসি রতন তাতা জী অমসুং ওসামু সুজুকী জীবুসু নীংশিংজগে‍। ভারতকী ওতো সেক্তরগী গ্রোথতা মিদ্দল ক্লাসকী মঙলান মঙফাওনহন্বদা অথোয়বা মীওই অনিসিগী থৌদাং য়াম্না চাউনা য়াওরি‍। রতন তাতা জী অমদি ওসামু সুজুকী জীগী লিগেসীনা ভারতকী মোবিলিতী সেক্তর পুম্ববু মখা তানা পুক্নিং থৌগত্তুনা লৈখিগনি হায়না ঐনা থাজৈ‍।

মরূপশিং,

ঙসি ভারত অসি অনিংবা অপাম্বা কয়ানা ঈমায় চোল্লি, নহাগী মতিংসু মপুং ফানা লৈরি‍। হায়রিবা অনিংবা অপাম্বশিং অসি ঐখোয়না ভারতকী ওতোমোতিব ইন্দস্ত্রীদা উবা ফংই‍। হৌখিবা চহিদা ভারতকী ওতো ইন্দস্ত্রীনা চাউরাক্না চাদা ১২ গী গ্রোথকা লোয়ননা মাঙদা চঙশিনখি‍। মেক ইন ইন্দিয়া, মেক ফোর দি ৱর্ল্দগী লাইৱাগা লোয়ননা চত্তুনা হৌজিক্তি এক্সপোর্তসু হেনগৎলক্লে‍। ভারত্তা চহি অমদা য়োল্লিবা গারী মশিং অসি কনাগুম্বা লৈবাক খরগী অপুনবা মীশিংদগীসু হেল্লিবনি‍। চহিদা চাউরাক্না গারী লাখ অনি মখায়রোম য়োল্লিবা অসিনা ভারতকী দিমান্দ লেপ্পা লৈতনা হেনগৎলক্লি হায়বা উৎলি‍। মোবিলিতীগী তুংলমচৎকী ৱাফম খন্নরকপদা ভারত্তা করিগীদমক থাজবা কয়া থম্লিবনো হায়বসু মসিনা উৎলি‍।

|

মরূপশিং,

ভারত ঙসি মালেমগী মঙাশুবা খ্বায়দগী চাউবা শেন্মিৎলোন ওইরি‍। অদুগা পেসেঞ্জর ভেহিকল মার্কেতকী মশক মওংদা য়েংলবসু, ঐখোয় মালেমগী ৩শুবা মফম কল্লি‍। ভারতনা মালেমগী মকোক থোংবা শেন্মিৎলোন অহুমগী মনুং চল্লকপা মতমদা ঐখোয়গী ওতো মার্কেত করি ফীভমদা কাখৎলক্কনি হায়বা অদোম খন্দুনা য়েংবিয়ু‍। চাওখৎপা ভারতকী খোঙচৎসি মোবিলিতী সেক্তরগী ত্রান্সফোর্মেসনগীসু শরুক কয়া হেন্না কান্নগদবা খোঙচৎ ওইগদৌরিবনি‍। ভারতকী মোবিলিতীগী তুংলমচৎপু থৌদুনা পুরিবা মরম কয়ামরুম লৈ‍। খুদম ওইনা ভারতকী খ্বায়দগী য়াম্না মহা মীশিং, মিদ্দল ক্লাসকী পাকথোক চাউথোরক্লিবা ঙমখৈ, খোঙজেল য়াঙ্খৎলক্লিবা অর্বানাইজেসন, ভারত্তা শেমগৎলিবা মতমগা চুনরবা ইনফ্রাস্ত্রকচর, মেক ইন ইন্দিয়ানা ফংহল্লিবা এফোর্দেবল গারী, হায়রিবা মরম কয়াসিনা ভারতকী ওতো সেক্তরগী গ্রোথ থদুনা পুরি, অনৌবা পাঙ্গল হাপ্লি‍।

মরূপশিং,

ওতো ইন্দস্ত্রী চাওখৎনবগীদমক মথৌ তাবা অমদি অনিংবা অপাম্বা হায়বসি য়াম্না মরু ওই‍। অদুগা হায়রিআ অনি অসি ঙসি ভারত্তা মশক মচু থোক্না লৈরি‍।‍ লাক্কদৌরিবা দেকেদ কয়া ফাওবা ভারতনা মালেমগী নহা মশিং খ্বায়দগী য়াম্বা লৈবাক ওইদুনা লৈখিগনি‍। হায়রিবা নহাশিং অসি অদোমগী খ্বায়দগী চাউবা কস্তমরনি‍। অসুক য়ামখ্রবা নহা মশিং অসিনা দিমান্দ কয়া য়াম্না তৌরক্কনি হায়বসি অদোম মপুং ফানা খঙবিরবা ঙাক্তনি‍। অদোমগী অতোপ্পা অচৌবা কস্তমর হায়রগদি ভারতকী মিদ্দল ক্লাস অসিনি‍। হৌখিবা চহি ১০ সিদা ভারত মচা করোর ২৫ লায়রবগী পনখৈনুংদগী ৱাংমা লান্থোকখ্রে‍। হায়রিবা নিও মিদ্দল ক্লাস অসিনা মখোয়গী অহান্বা গারী লৈনরি‍। খুমাঙ অসুম অসুম চাওশিল্লকপগা লোয়ননা মখোয়না মখোয়গী গারীশিংসু অপগ্রেদ তৌরক্কনি‍। অদুগা মসিগী কান্নবা ওতো সেক্তরদা মপুং ফানা ফংগদৌরিবনি‍।

|

মরূপশিং,

মতম অমদা ভারত্তা গারী লৈনদবগী মরম অমদি লম্বী ফত্তবা, লম্বী পাক্তবনা ওইরম্মি‍। হৌজিক্তি ফীভম অসি হোংলে‍। ইজ ওফ ত্রাভেল ঙসি ভারতকী খ্বায়দগী মরুওইবা মীৎয়েঙ থম্লিবা ৱাফম অমা ওইরি‍। মমাঙ চহিগী বজেত্তা ইনফ্রাস্ত্রকচর শেমগৎনবা লুপা করোর লাখ ১১ হেন্না হাপখি‍। ঙসি ভারত্তা মল্তিলেন হায়ৱে, এক্সপ্রেসৱেগী নেতৱর্ক লৈরে‍। পি.এম. গতিশক্তি নেস্নেল মাস্তর প্লান্না মল্তিমোদল কন্নেক্তিবিতীদা খোঙজেল হাপ্লি‍। মসিনা লোজিস্তিক কোস্ত হন্থহল্লি‍। নেস্নেল লোজিস্তিক্স পোলিসীনা মরম ওইরগা ভারতনা মালেমগী খ্বায়দগী কম্পিতিতিব ওইবা লোজিস্তিক্স কোস্ত লৈবা লৈবাক ওইরি‍। হোৎনরিবা কয়াসিনা মরম ওইরগা ওতো ইন্দস্ত্রীগী ওইথোকপা য়াবা কয়াগী অনৌবা থোঙ কয়া হাংদোক্লি‍। লৈবাকসিদা গারী দিমান্দ হেনগৎলকপগী মরুমদা মসিসু মরম অমনি‍।

মরূপশিং,

ঙসি অফবা ইনফ্রাস্ত্রকচরগা লোয়ননা অনৌবা তেক্নোলোজীসু ইন্তিগ্রেত তৌরি‍। ফাস্তেগনা ভারত্তা গারী থৌবগী এক্সপিরিএন্স ফনা নীংথিনা লায়থোকহল্লে‍। নেস্নেল কমন মোবিলিতী কার্দনা ভারত্তা অপন্বা লৈতবা খোঙচৎ পুরক্নবা হোৎনবদা থৌনা হাপ্লি‍। হৌজিক ঐখোয় স্মার্ত মোবিলিতীগী মায়কৈদা খোঙ থাংজিল্লি‍। কন্নেক্তেদ ভেহিকল্স, ওতোনোমস দ্রাইভিংগী মায়কৈদা ভারতনা খোঙজেল য়াঙনা থবক পায়খৎলি‍।

মরূপশিং,

ভারতকী ওতো ইন্দস্ত্রী চাওখৎনবগী ওইথোকপা কয়া লৈরিবসিদা মেক ইন ইন্দিয়া মপাঙ্গল কন্না লৈবনা চাউনা পাঙ্গল হাপ্লি‍। মেক ইন ইন্দিয়া স্কীমদা PLI স্কীমশিংনা অনৌবা খোঙজেল হাপ্লি‍। PLI স্কীম্না লুপা করোর লাখ অনি মখায় হেন্না য়োনবদা মতেঙ পাংলি‍। স্কীম অসিনা সেক্তর অসিদা দাইরেক্ত জোব লাখ অমা মখায় পীরি‍। অদোমসু খঙবিরমগনি, অদোম্না অসোমগী সেক্তরদা জোব শোয়দনা পীবিরমগনি, মসিনা অতোপ্পা সেক্তরদা মল্তিপ্লাইয়র ইফেক্তসু পীরি‍। ঐখোয়গী MSME শিংনা ওতো পার্ত মশিং য়াম্না পীরি‍। ওতো সেক্তর চাওখৎলকপগা লোয়ননা MSME, লোজিস্তিক্স, তুর অমদি ত্রান্সপোর্ত হায়রিবা সেক্তরশিং অসিদসু অনৌবা জোপশিং পীবা হেনগৎলক্লি‍।

|

মরূপশিং,

ভারত লৈঙাক্না ওতো সেক্তরদা থাক খুদিংদা ঙাক্লৌ পীরি‍। হৌখিবা দেকেদ অমসিদা ইন্দস্ত্রী অসিদা FDI, তেক্নোলোজী ত্রান্সফর অমদি গ্লোবেল পার্ত্নরসিপকী অনৌবা লম্বী য়াৎলি‍। হৌখিবা চহি ৪ সিদা সেক্তর অসিদা দোলর বিলিয়ন কুনথ্রাতরুক হেনবগী ফোরেন দাইরেক্ত ইনভেস্তমেন্ত লাকখি‍। লাক্কদৌরিবা চহিশিংসিদা মসি শরুক কয়া থোক্না হেনগৎলক্কদৌরি‍। ঐখোয়না হোৎনরিবসি ভারত্তা ওতো মেনুফেকচরিংগা মরী লৈনবা মপুং ফাবা ইকোসিস্তেম অমা শেমগৎপনি‍।

মরূপশিং,

ঐ নীংশিংলি, ঐনা মোবিলিতীগা মরী লৈনবা থৌরম অমদা Seven-Cs গী ৱাফম হৌদোকখি‍। ঐখোয়গী মোবিলিতী সোলুসন অসি কম্মন, কন্নেক্তেদ, কনভিনিএন্ত, কঞ্জেসন-ফ্রী, চার্জ্দ, ক্লীন, কত্তিং-এদ্জ ওইহন্নবা ৱাখল্লোন্নি‍। গ্রীন মোবিলিতীদা ঐখোয়না থম্লিবা মীৎয়েঙ অসি ভিজন অসিগী শরুক অমনি‍। ঙসি ঐখোয়না ইকোনোমী অমদি ইকোলোজী অনিমক্তা ঙাক্লৌ পীবা মোবিলিতী সিস্তেম অমা পুরক্নবা থবক পায়খৎলি‍। ফোসিল ফ্যুল ইম্পোর্ত তৌরকপগী চাং হন্থহন্নবা সিস্তেম অমা শেমগৎনবা থবক পায়খৎলি‍। মরম অসিনা গ্রীন তেক্নোলোজী, EV, হায়দ্রোজেন ফ্যুল, বাইওফ্যুল অসিনচিংবা তেক্নোলোজী শেমগৎপদা ঐখোয়না মরুওইবা মীৎয়েঙ থম্লি‍। নেস্নেল ইলেক্ত্রিক মোবিলিতী মিসন অমদি গ্রীন হায়দ্রোজেন মিসন্নচিংবা থৌশিলশিং মীৎয়েঙ অসিগী পরিংদা পায়খৎখিবনি‍।

মরূপশিং,

হৌখিবা চহি খরসিদা ইলেক্ত্রিক মোবিলিতীগী মতাঙদা ভারতনা খোঙজেল য়াঙনা মাঙদা চঙশিল্লি‍। হৌখিবা দেকেদ অসিদা ইলেক্ত্রিক ভেহিগল য়োনবগী চাং শরুক চাত্রুক নিফু, ৬৪০ রোম হেনগৎলে‍। চহি তরাগী মমাঙদা চহিদা ইলেক্ত্রিক ভেহিকল ২৬০০ রোমদমক য়োল্লম্বা অদু ২০২৪ দদি, ভারী লাখ ১৬, লিশিং ৮০ হেন্না য়োনখি‍। হায়বদি চহি ১০গী মমাঙদা য়োল্লমবা ইলেক্ত্রিক ভেহিকলগী চাংদু ঙসিই নোংমদা শরুক অনিগী চাংদা য়োল্লি‍। দেকেদ অসিদা ভারতকী ইলেকত্রিক ভেহিকল মশিং শরুক ৮ হেনগৎলক্কনি হায়না পারি‍। মসিনা তাকপদি সেগমেন্ত অসিদা অদোম্না তৌবা য়াবা য়াম্না লৈ হায়বনি‍।

|

মরূপশিং,

লৈবাকসিদা ইলেক্ত্রিক মোবিলিতী হেনগৎহন্নবগীদমক লৈঙাক্না লেপ্পা লৈতনা পোলিসী দিসিজনশিং লৌরি, ইন্দস্ত্রীদা ঙাক্লৌ পীরি‍। চহি ৫ গী মমাঙদা ফেম-২ স্কীম হৌদোকখি‍। মসিগী মখাদা লুপা করোর লিশিং ৮ হেনবগী ইন্সেন্তিব ফংহনখ্রে‍। মসিগী চাংসিদা, ইলেক্ত্রিক ভেহিকল লৈবগী সবসিদী পীরি, চার্জিং ইনফ্রাস্ত্রকচর শেমগৎলি‍। মসিনা EV লাখ ১৬ হেনবদা মতেঙ ফংহল্লি, মসিগী মনুংদা গারী লিশিং ৫ হেনবদি ইলেক্ত্রিক বসনি‍। মফমসিদা, দিল্লীদসু ভারত লৈঙাক্না পীবা ইলেক্ত্রিক বস ১২০০ হেন্না চেল্লি‍। ঐখোয়গী অহুমশুবা তর্মদা পি.এম. ই-দ্রাইব স্কীম হৌদোকখি‍। মসিগী মখাদা, তু-হ্বীলর, থ্রী-হ্বীলর, ই-এম্বুলেন্স, ই-ত্রক্নচিংবা EV লাখ ২৮ লোম লৈবদা মতেঙ পাংগনি‍। ইলেক্ত্রিব বস লিশিং ১৪ রোমসু লৈগদৌরি‍। লৈবাক পুম্বদা তোঙান তোঙানবা গারীশিংগী ফাস্ত চার্জর লিশিং ৭০ রোমসু খিনগনি‍। অহুমশুবা তর্ম অসিদা, পি.এম. ই-বস সর্ভিসসু হৌগদৌরি‍। মসিগী মখাদা লৈবাকসিগী অপীকপা ময়োল্লমশিংদা ই-বস লিশিং কুন্থ্রা নিপান চেলহন্নবা কেন্দ্র লৈঙাক্না মতেঙ পাংগনি‍। লৈঙাক্না EV মেনুফেকচরিংগীদমক ইন্দস্ত্রীদা লেপ্পা লৈতনা মতেঙ পাংলি‍। EV কার মেনুফেকচরিংদা ভারত্তা চঙলকপা পাম্বা গ্লোবেল ইনভেস্তরশিংগীদমক্তসু ভারত লৈঙাক্না লম্বী য়াৎকনি‍। ভারত্তা ক্বালিতী লৈবা EV মেনুফেকচরিং ইকোসিস্তেম চাওখৎহনবদা, ভেল্যু চেন শেমগৎপদা মতেঙ পাংগনি‍।

|

মরূপশিং,

গ্লোবেল ৱার্মিং, ক্লাইমেতকী শিংনবশিং লাকশিন্নবা ঐখোয়না সোলার পৱারবু, অল্তরনেতিব ফ্যুলবু লেপ্পা লৈতনা প্রমোত তৌবা মথৌ তাই‍। ভারতনা মাগী G-20 প্রেসিদেন্সী মতমদা গ্রীন ফ্যুচরদা মরুওইবা ৱাফম থমখি‍। ঙসি ভারত্তা EV গা লোয়ননা সোলার পৱারগী মতাঙদসু অৱাংবা থাক্তা থবক পায়খৎলি‍। পি.এম. সুর্য়ঘর-মুফ্ত বিজলী স্কীমগী মখাদা রুফতোপ সোলারগী অচৌবা মিসন অমা পায়খৎলি‍। মসিদসু সেক্তর অসিদা বেত্তরীগী, স্তোরেজ সিস্তেমগী দিমান্দ লেপ্পা লৈতনা হেনগৎলক্কদৌরি‍। লৈঙাক্না এদভান্স কেমিস্ত্রী সেল বেত্তরী স্তোরেজকী লমদা পুক্নিং থৌগৎনবগীদমক লুপা করোর লিশিং ১৮গী PLI স্কীম হৌদোক্লে‍। মসিনা তাকপদি, সেক্তর অসিদা শেল চাউনা থাদনবা চপ চারবা মতম্নি‍। ঐনা লৈবাকসিগী নহা ময়ামগী মফমদা ইনর্জী স্তোরেজ সেক্তরদা স্তার্ত-অপশিং লিংখৎনবা ৱাফমসু থমজরি‍। ঐখোয়না ভারত্তা ফংবা মচাকশিংনা বেত্তরী শাবা য়াবা, স্তোরেজ সিস্তেম পুথোকপা য়াবা ইনোভেসনশিংদা থবক তৌগদবনি‍। মসিগীদমক লৈবাকসিদা থবক ফনা য়াম্না পায়খৎলি, অদুবু মসি মিসন মোদতা মাঙদা পুখৎপগী তঙায় ফদবা লৈ‍।

মরূপশিং,

কেন্দ্র লৈঙাক্কী ইন্তেন্ত অমদি কম্মিতমেন্ত ময়েক শেংনা লৈ‍। অনৌবা পোলিসী শেম্বদা ওইরবসু নৎত্রগা রিফোর্ম পুরকপদা ওইরবসু, ঐখোয়না লেপ্পা লৈতনা হোৎনরি‍। হৌজিক অদোম্না মসিবু মাঙদা পুখৎকদবনি, মসিগী কান্নবা লৌগদবনি‍। হৌজিক ভেহিকল স্ক্রেপ্পিং পোলিসীদা য়েংবিয়ু‍। লৈরিবা মেনুফেকচরর পুম্নমক্কী মফমদা ঐনা হায়জনিংবদি পোলিসী অসিগী কান্নবা লৌবিয়ু হায়বসিনি‍। অদোম্না অদোমগী কম্পেনীদা অদোমগী ওইবা ইন্সেন্তিব স্কীম অমা হৌদোকপসু য়াই‍। অদুগুম্বা স্কীম অদুনা মীয়াম্না মখোয়গী অরিবা গারী পুরকপগী চাং য়াম্না হেনগৎহনগনি‍। অসুম্না পুক্নিং থৌদোকপা য়াম্না মরুওই‍। মসিনা লৈবাক্কী এনভাইরনমেন্তকী লমদা তৌবা অচৌবা থৌগল অমা ওইগদৌরিবনি‍।

মরূপশিং,

ওতোমোতিব ইন্দস্ত্রী অসি, ইনোভেসন অমদি তেক্নোলোজীনা ইন্দুনা পুবনি‍। ইনোভেসন, তেক, স্কিল নৎত্রগা দিমান্দ ওইরবসু, লাক্কদৌরিবা মতম অসি নোংপোক লমদমগীনি, এসিয়াগীনি, ভারতকীনি‍। মোবিলিতীদা মশাগী তুংলমচৎ উবা সেক্তর খুদিংংমক্কী ওইনা ভারত অসি শেল থাদনবগী, চপ চারবা লমথুংফম অমনি‍। ঐনা ময়াম পুম্নমক্কী মফমদা অমুক্কা হন্না থাজবা পীজরি মদুদি লৈঙাক্না মায়কৈ খুদিংদা অদোমগী মতেঙ পাংগনি‍। অদোম্না মেক ইন ইন্দিয়া, মেক ফোর দি ৱর্ল্দগী ৱাখল্লোন পরিংদা মায়কৈ অসিদা খোঙ থাংজিনবিয়ু‍। ময়াম পুম্নমকপু অমুক্কা হন্না য়াইফ-পাউজেল পীজরি‍।

থাগৎচরি‍।