দিজিতেলনা শক্তি পীরবা নহারোলশিংনা হন্দক্কী চহি তরা অসি ‘ইন্দিয়াগী তেকেদ’ ওইহল্লগনি: পি.এম.
দিজিতেল ইন্দিয়া অসি আত্মানির্ভর ভারতকী খুলায়নি: পি.এম.দিজিতেল ইন্দিয়া হায়বসি য়াম্না থুনা কান্নবা পীবা, মপুং ফানা কান্নবা পীবা অমনি, দিজিতেল ইন্দিয়া হায়বা অসি মিনিমম গবর্নমেন্ত, মেক্সিমম গবর্নান্স হায়বনি: পি.এম.কোরোনাগী মতমদা ভারতনা দিজিতেলগী পাম্বৈ শিজিন্নখিবা অসিনা মালেম পুম্বগী পুক্নিং চিংশিল্লি: পি.এম.লৌমীগী ইমুং কোতি ১০ হেনবা অমগী একাউন্তদা লুপা কোতি লাখ ১.৩৫ দিপোজিৎ তৌখি: পি.এম.দিজিতেল ইন্দিয়ানা ৱান নেসন-ৱান এম.এস.পি.গী ইথিল মংফাওনরী: পি.এম.খুরুমজরি,
কেন্দ্রগী মন্ত্রী-মন্দলদা ঐহাক্কী লৈমিন্নরিবা শ্রী রবি শঙ্কর প্রসাদজী, শ্রী সঞ্জয় ধোত্রেজী, দিজিতেল ইন্দিয়াগী তোঙান-তোঙানবা থৌরাংশিংগা মরী লৈনবা ঐহাক্কী মরুপশিং, ইচিল-ইনাওশিং! দিজিতেল ইন্দিয়া অভিয়ানগী চহি ৬ মপুং ফারকপদা ময়াম পুম্নমকপু ঐহাক্না হন্না-হন্না নুংঙাইবা ফোঙদোকচরি!
ঙসিগী নুমিৎ অসি ভারতকী মতিক-ময়াই, ভারতকী ফীরেপ অমসুং তুংলমচৎকী লোইনাইদ্রবা ওইথোকপশিংদা কত্থোক্লি। ঙসিগী নুমিৎ অসিনা ঐখোয়দা লৈবাক অমগী মওংদা শুপ্নগী চহি ৫-৬ অসিদা ঐখোয়না দিজিতেল স্পেস্তা কয়াম য়াম্না খুমাং চাউশিল্লবগে হায়বা অদু নীংশিংহল্লি।
মরুপশিং,
ভারতপু দিজিতেলগী লম্বীদা খোঙজেল য়াংনা চংশিনহন্দুনা প্রজা খুদিংমক্কী পুন্সিবু লাইথোক হনবা হায়বা অসি অপুনবা লৈবাক্কী মঙলান্নি। মসিবু মঙফাওনবা ঙমহন্নবা ঐখোয়না অয়ুক-নুংথিল খাইদনা হোৎনখি। ঙসি লৈবাক অসিদা নাকল অমরোমদা ইনোভেসনগী অপাম্বা অমা লৈরি অদুগা নাকল অমদনা ইনোভেসনশিং অসি খোঙজেল য়াংনা শিজিন্ননবা অপাম্বসু লৈরি। মরম অসিনা, দিজিতেল ইন্দিয়া অসি ভারতকী ফীরেপনি। দিজিতেল ইন্দিয়া অসি আত্মনির্ভর ভারতকী পাঙথোক্কদবা থৌদাংনি, দিজিতেল ইন্দিয়া অসি ২১শুবা চহিচাগী মপাঙ্গল কনখৎলক্লিবা ভারতকী নুংঙাইবা ফোঙদোকপনি।
মরুপশিং,
মিনিমম গভর্নমেন্ত –মেক্সিমম গভর্নান্সকী প্রিন্সিপল অসি ঙাক্না চৎতুনা সরকার অমসুং মীয়ামগী মরক্তা, সিস্তেম অমসুং খুদোংচাবশিংগী মরক্তা, সমস্যাশিং অমসুং সর্ভিসকী মরক্তা লৈরিবা গেপ হন্থনবা, মখোয়গী মরক্তা লৈরিবা অৱাবশিং কোকহনবদা অমসুং মীচম প্রজাগী খুদোংচাবা হেনগৎহনবা অসি তানফম অসিদা য়াম্না তঙাই ফদবা ওইরি মরম অসিনা দিজিতেল ইন্দিয়া অসি মীচম প্রজাদা খুদোংচাবা ফংহন্নবা অমসুং মখোয়দা শক্তি পীনবা য়াম্না অচৌবা মীদিয়ম অমনি।
মরুপশিং,
দিজিতেল ইন্দিয়ানা মসি করম্না ওইথোকহনখিবগে হায়বগী অচৌবা খুদম অসি –দিজি লোকরনি। স্কুলগী সর্তিফিকেৎশিং, কোলেজকী দিগ্রী, দ্রাইবিং লাইসেন্স, পাসপোর্ত, আধার নত্ত্রগা অতৈ চে-চাংশিং চেকশিন্না থম্বা অসি মতম চুপ্পদা অচৌবা অৱাবা অমা ওইদুনা লাক্লি। কয়ারক হন্না ঈচাও, য়ুহার হাবা, সুনামি, করিগুম্বদা মৈ-হৌ লাংপোক থোকপদা মীয়ামগা মরি লৈনবা মরু ওইবা শক্তাকচেশিং অমাং অতা থোকই। অদুবু হৌজিক্তি ১০শুবা, ১২শুবা, কোলেজ, য়ুনিভর্সিতীগী মার্কশিৎতগী হৌরগা পুম্নমক অসি লায়না দিজিলোকরদা হকথেংননা থমজিনবা য়ারে। হৌজিক কোরোনাগী তানফম অসিদা সহর কয়াগী কোলেজনা এদমিসন তৌনবা স্কুল সর্তিফিকেৎশিংগী ভেরিফিকেসন অসি দিজি-লোকরগী মতেংনা তৌরি।
মরুপশিং,
দ্রাইবিং লাইসেন্স লৌবা, বর্থ সর্তিফিকেৎ লৌবা, মৈগী বিল থিবা, ঈশিংগী বিল থিবা, ইনকম তেক্স রিতর্ন তৌবা, অসিগুম্বা থবক কয়া অসিগী প্রোসেসশিং হৌজিক দিজিতেল ইন্দিয়াগী মতেংনা য়াম্না লায়রে অমসুং খোঙজেল য়াংশিল্লে। অমসুং খুঙ্গংশিংদা, অদোমগী অনকপা লৈবা সি.এস.সি.দা পুম্নমক অসি তৌরি। দিজিতেল ইন্দিয়ানা লায়রবশিংদা রসনসু অরায়বা মওংদা য়ৌহল্লি।
ৱন নেসন,ৱন রেসন কার্দকী ফীরেপ অসি দিজিতেল ইন্দিয়াগী শক্তিনা থুংহনবা ঙমহল্লিবনি। অদোমনা হৌজিক অতোপ্পা রাজ্য অমা চৎপদা অনৌবা রেসন কার্দ শেম্বগী মথৌ তাররোই। লৈবাক পুম্বদা রেসন কার্দ অমা খক্তা চৎনরগনি। মসিগী খ্বাইদগী চাউবা কান্নবা অসি অতৈ রাজ্যশিংদা থবক শুবা চৎলিবা শিম্মীগী ইমুং-মনুংশিংদা পীরি। ঐহাক্না হৌজিক্তা অসিগুম্বা মরুপ অমগা ৱারী শান্নজৈ।
হন্দক্তা ইকাই খুম্নরবা সুপ্রিম কোর্তনা মসিগা মরী লৈননা য়াম্না মরু ওইবা ৱারেপ অমা পীবিখি। রাজ্য খরনা ৱারেপ অসি য়াদবা য়াওখি। অদুবু সুপ্রিম কোর্তনা রাজ্যশিং অদুদা ৱন নেসন ৱন রেসন কার্দ অসি খুদক্তা ইমপ্লিমেন্ত তৌগদবনি হায়না খঙহনখি। সুপ্রিম কোর্তনা য়াথং পীবা তাখি। মখোয়দা স্কিম অসি ইমপ্লিমেন্ত তৌনবা খঙহনখি। ঐহাক্না সুপ্রিম কোর্তপু ৱারেপ অসিগীদমক থাগৎপা ফোঙদোকচরি, মরমদি মসি লায়বশিংগীদমক্তনি, শিন্মীশিংগীদমক্তনি। মসি ময়ুম থাদোক্তুনা অতোপ্পা মফমদা থবক শুবা চৎলিবা মীওইশিংগীনি। করিগুম্বা ৱাখল তারবদি অসিগুম্বা থবক অসি খুদক্তা পাইখৎফম থোকপনি।
মরুপশিং,
দিজিতেল ইন্দিয়ানা ইন্দিয়ানা আত্মনির্ভর ভারতকী ফীরেপ অসি মপাঙ্গল কন্না মাংদা পুরি। দিজিতেল ইন্দিয়ানা মীওই কয়াবু সিস্তেমগা কন্নেক্ত তৌরি। ঐহাক্না হৌজিক বেনিফিসরী খরগা ৱারী শাজখ্রে। মহাক্না দিজিতেল সোল্যুসনশিংনা মহাক্কী পুন্সিদা করম্না অওনবা পুরকপগী হায়না শিয়র তৌবদা চাউথোকচবা অমসুং অপেনবা পোকখি।
স্ত্রীৎ ভেন্দরশিংনা করম্বা মতমদা মখোয়না বেঙ্কিং সিস্তেমদা য়াওগনি অমসুং মখোয়না বেঙ্কতগী লায়না অমসুং হোংনা লোনশিং ফংগনি হায়না খল্লম্বগে। অদুবু ঙসিদি মসি স্বনিধি য়োজনাগী মতেংনা মসি ওইথোকহল্লি। খুঙ্গংদা য়ুম অমসুং লমদা মরী লৈনবা খৎনা চৈনবা অমসুং খুদোংথিবা থোকপা য়াগী অকিবগী মতাংদা পাউশিং তোইনা তারম্মি। অদুবু হৌজিক্তি স্বামিৎবা স্কিমগী মখাদা খুঙ্গংগী লমশিং দ্রোন মেপিং তৌরি। দিজিতেল মীদিয়মগী খুত্থাংদা খুঞ্জাশিংনা মখোয়গী য়ুমশিংগী লিগেল সেক্যুরিতীগী চে-চাং ফংলে। ওনলাইন এজুকেসনদগী হৌরগা হীদাক-লাংথক ফাওভা প্লেৎফোর্মশিং ঙসি দিবেলপ তৌরিবা অসিনা লৈবাক অসিগী প্রজা করোর কয়াদা কান্নবা ফংহল্লি।
মরুপশিং,
দিজিতেল ইন্দিয়ানা অরাপ-অরাপ্পা মফমশিংদা হকশেলগী খুদোংচাবশিং ফংহনবদা মরু ওইবা থৌদাং অমা লৌরি। মীকুপ খরগী মমাংদা বিহারদগী মরুপ অমনা অৱাবা মতম অসিদা য়ুমদা ফম-ফম্না মহাক্কী মবোক্কী হকচাং ই-সঞ্জীবনিনা করম্না য়েংখি হায়বা পাউদমখ্রে। মীপুম খুদিংমক্তা হকশেলগী খুদোংচাবশিং ফংহনগদবনি, মতম চানা অফবা খুদোংচাবা ফংহনগদবনি, মসি ঐখোয়গী পান্দমনি। মসিগীদমক নেস্নেল দিজিতেল হেল্থ মিসনগী মখাদা কান্নরবা প্লেৎফোর্ম অমা শেম্নবা থবক চত্থরি।
কোরোনাগী তানফম অসিদা ভারতনা শেম্বা দিজিতেল সোল্যুসন অসি ঙসি মালেম পুম্বনা ৱারী শান্ননবা অমসুং পুক্নিং চীংশিন্নীংঙাই ওইবা হীরম অমা ওইরি। মালেমগী ওইনা খ্বাইদগী চাউবা কন্তেক্ত ত্রেসিং এপকী মনুংদা অমা ওইরিবা আরোগ্য সেতু কোরোনাগী লাইচৎ লাকশিনবদা মতেং য়াম্না ওইখি। তীকা থাদোকপগীদমক লৈরিবা ভারতকী কোৱিন এপ অসিদসু লৈবাক কয়ানা মীৎয়েং চংনরক্লি। ভেক্সিনেসনগী থৌওংগীদমক অসিগুম্বা মোনিতরিং তুল অমা লৈবা হায়বা অসি ঐখোয়গী তেক্নিকেলগী ওইবা হৈশিংবা অদুগী খুদম অমনি।
মরুপশিং,
কোরোনাগী মতম অসিদা ঐখোয়না দিজিতেল ইন্দিয়ানা করম্না ঐখোয়গী থবক অসি লায়থোকহনবগে হায়বা ঐখোয়না খঙলকখি। ঙসি মীওই খরনা চীংদগী মখোয়গী থবক তোরি, মীওই খরনা খুঙ্গংদা লৈবা হোম স্তেদগী থবক তৌবগে হায়বা ঐখোয়না উবা ফংলে। খনদুনা অমুক্তা য়েংবিয়ু করিগুম্বা দিজিতেল ওইনা কন্নেক্ত তৌরমদবা তারবদি কোরোনাগী মতম অসিদা করম্বা ফীভম ওইরমগনি? মীওই খরনা দিজিতেল ইন্দিয়া অসি লায়রবশিংগা খক্তা কন্নেক্ত তৌনবা হোৎনবা ওইনা উরি। অদুবু অভিয়ান অসিনা মিদল ক্লাস অমসুং নহারোক কয়াগী পুন্সিশিংদা অওনবসু পুরকখ্রে।
অমসুং হৌজিক্কী মিলেনিএল অসিদা করিগুম্বা মসিগী মালেম অসি ওইরমদ্রবা, তেক্নোলোজী লৈরমদ্রবা অদু ওইরবদি করি ওইরমগনি? অহোংবা স্মার্তফোনশিং, অহোংবা ইন্তরনেৎ অমসুং অহোংবা দেতা য়াওদনা ঐখোয়গী নুংতিগী তৌগদবা থবক অসি ঙমখৈ লৈতনা ৱারমগনি। মরম অসিনা ঐহাকপু হায়য়ু হায়রগনি, দিজিতেল ইন্দিয়া হায়বদি পুম্নমক্কী খুদোংচাবা, পুম্নমক্কী কান্নবা, পুম্নমক শরুক য়াবা হায়বনি। দিজিতেল ইন্দিয়া হায়বদি মীপুম খুদিংমক্না সরকারগী সিস্তেম এক্সেস তৌবা ঙমহনবনি। দিজিতেল ইন্দিয়া হায়বদি মনুং-মপান ফাওনা উবা, খেৎনবা লৈতবা সিস্তেম অমসুং শেঞ্জা-থুমজা তৌদবা হায়বনি। দিজিতেল ইন্দিয়া হায়বদি মতম, থবক অমসুং শেল তুংশিনবনি। দিজিতেল ইন্দিয়া হায়বদি থুনা কান্নবা ফংবা, মপুং ফানা কান্নবা ফংবা হায়বনি। দিজিতেল ইন্দিয়া হায়বদি মিনিমম গভর্নমেন্ত, মেক্সিম গভর্নান্স হায়বনি।
মরুপশিং,
দিজিতেল ইন্দিয়া অভিয়ানগী অখন্নবা মওং মতৌ অমা হায়রগনি মসিনা ইনফ্রাস্ত্রকচরগী স্কেল অমসুং স্পীদ অনিমক্তা মীৎয়েং চংলি। লৈবাক অসিগী খুঙ্গশিংদা কম্মন সর্ভিস সেন্তর লাখ অনি মখাইগী ময়ানা য়াম্না ৱানা থোক্কনি হায়রম্বা মফমশিংদা ইন্তরনেৎ য়ৌহনখি। ভারত-নেৎ য়োজনাগী মখাদা খুঙ্গং অমদগী খুঙ্গং অমদা ব্রোদবেন্দ ইন্তরনেৎ ফংহন্নবা মিসন মোদতা থবক পাইখৎলি।
পি.এম.-দবল্যু.এ.এন.আই. স্কিমগী মখাদা ব্রোদবেন্দ ৱাই-ফাই ইন্তরনেৎ অহোংবা মমলদা ফংহন্নবা লৈবাক শিনবা থুংবদা এক্সেস পোইন্তশিং শেমগৎলি। মসিনা নহা ওইরিবা মরুপশিংদা ওনলাইন একুজেসনগী খুদোংচাবশিং ফংহনবদা, মরু ওইনা লায়রবা ইমুং-মনুংগী অঙাংশিংদা মতেং ওইরগনি। হৌজিক লৈবাক অসিদা অহোংবা তেব্লেৎশিং অমসুং অতৈ দিজিতেল দিভাইসশিং শান্নবসু হোৎনরি। মসিগীদমকপি.এল.আই. স্কিমগী খুদোংচাবা লৈয়াক অসিগী অমসুং মালেমগী ইলেক্ত্রোনিক কম্পনীশিংদা পীরি।
মরুপশিং,
ঙসি ভারতনা থৌনা লৈনা মালেমগী মাংজিল থারিবা দিজিতেল ইকনোমীশিংগী মরক্তা মাংজিল থাবা অমা ওইবা ঙম্বা অসি ভারত মচা খুদিংমক্কী ওইনা চাউথোকচনীংঙাই ওইবা ৱাফম অমা ওইরি। হৌখিবা চহি ৬-৭ অসিদা তোঙান তোঙানবা স্কিমশিংগী মখাদা মীয়ামগী বেঙ্ক একাউন্তশিংদা লুপা করোর লাখ ১৭রোম হকথেংননা ত্রান্সফর তৌখ্রে। কোরোনাগী তানফমদা দিজিতেল ইন্দিয়াগী থৌরাংনা লৈবাক অসিবু কয়া য়াম্না মতেং ওইখি হায়বা ঐখোয় পুম্নমক্না উখ্রে। মতম অদুদা অচৌ-অচৌবা লৈবাকশিংনা লোকদাউন্না মরম ওইদুনা মখোয়গী প্রজাশিংদা তেংবাং য়ৌহনবা ঙমদনা লৈরিঙৈ মতমদা ভারতনা লুপা করোর লিশিং কয়া মীয়ামগী বেঙ্ক একাউন্তশিংদা হকথেংননা থাখি। কোরোনাগী চহি অমা মখাই অসিদা ভারতনা তোঙান তোঙানবা স্কিমশিংগী মখাদা দি.বি.তি.গী খুত্থাংদা মীয়ামগী বেঙ্ক একাউন্তশিংদা লুপা করোর লাখ ৭রোম হাপখি। ভারত্তা ঙসি শুপ্নগী ভিম য়ু.পি.আই. ত্রাঞ্জেক্সনশিংদত থা খুদিংগী লুপা করোর লাখ ৫রোম ওইরি।
মরুপশিং,
লৌমীশিংগী পুন্সিদসু দিজিতেল ইন্দিয়ানা অমুক্তা ওইখিদ্রিবা মওংদা অওনবা অমা পুরকখ্রে। পি.এম. কিসান সম্মান নিধিগী মখাদা লৌমীগী ইমুং-মনুং করোর ১০দগী হেনবদা লুপা করোর লাখ ১.৩৫ হকথেংননা বেঙ্ক একাউন্তদা হাপখি। দিজিতেল ইন্দিয়ানা ৱন নেসন, ৱন MSP গী মঙলান অদুসু মঙফাওনবা ঙমহনখি। চই অসিদা রেকোর্দ ওইনা গেহু লৈখিবগী লুপা করোর ৮৫,০০০রোম লৌমীশিংগী বেঙ্ক একাউন্তদা হকথেংননা চংহনখি। হৌজিক ফাওবদা লৈবাক অসিগী লৌমীশিংনা ই-নাম পোর্তেলগী খুত্থাংদা লুপা করোর লাখ ১.৩৫গী পীথোক-পীশিন তৌখ্রে।
মরুপশিং,
ৱন নেসন, ৱন কার্দ হায়বদি লৈবাক শিনবা থুংনা ত্রান্সপোর্ত অমসুং অতৈ ফেসিলিতীশিংগী পেমেন্ত তৌনবা অমত্তা ঙাইরবা মীদিয়ম অসিনা চাউনা খুদোংচানা ওইরগনি। ফাস্ততেগ লাকপগা লোইননা লৈবাক পুম্বদা ত্রান্সপোর্তেসন অসি লায়থোকহল্লে, হংদোকহল্লে অমসুং মতমসু মাংহনদবা ঙম্লে। মসিগা মান্ননা জি.এস.তি., ইৱে বিলশিংগী সিস্তেমগা লোইননা লৈবাক অসিগী লালোন-ইতিক তৌবগী কান্নবশিং অমসুং ত্রান্সপরেন্সী অনিমক লৈহল্লি। শুপ্নগী ঙরাংদা জি.এস.তি.না চহি মরি মপুং ফারি। কোরোনাগী মতম ওইরবদু হৌখিবা থা নিপান অসিদা জি.এস.তি.গী রিভেন্যু অসি লেপ্তনা করোর লাখ অমা হেনখি। ঙসি রেজিস্তর তৌরবা ওন্তপ্রিনোর করোর অমগা লাখ ২৮ হেনবনা মসিগী খুদোংচাবা লৌরি। মসিগা ইরোইননা গভর্নমেন্ত ই–মার্কেৎপ্লেস হায়বদি জি.ই.এম.দগী সরকারগী লৈশিনবগী থবক অসি ত্রান্সপরেন্সী লৈবা হেনগৎলকখি অমসুং অপিকপা লালোন ইতিক তৌবশিংদা খুদোংচাবা পীখি।
মরুপশিং,
দিকেদ অসিনা দিজিতেল তেক্নোলোজীদা ভারতনা তৌবা ঙম্বশিং অদু চাউনা হেনগৎহল্লগনি, গ্লোবেল দিজিতেল ইকনোমীদা ভারতকী শিয়র য়াম্না চাউনা হেনগৎহল্লগনি। মরম অসিনা অচৌ-অচৌবা অখং-অহৈশিংনা দিকেদ অসিবু ‘ইন্দিয়াগী তেকেদ’ ওইনা উরিবনি। মথংগী চহি খরা অসিদা ভারতকী তেক্নোলোজী কম্পনী কয়ানা য়ুনিকোর্ন ক্লব য়াওরবা য়াই হায়না পান্নরি। দেতা অমসুং দেমোগ্রাফিক দিবিদেন্তকী অপুনবা শক্তিনা ঐখোয়দা অচৌবা খুদোংচাবা অমা পীবা ঙম্মি হায়বা মসিনা উৎলি।
মরুপশিং,
৫জিনা মালেম পুম্বগী ওইনা পুন্সিগী হীরম খুদিংদা অচৌবা অহোংবা অমা পুরক্লগনি। ভারতনসু মসিগীদমক শেম শারি ঙসি মালেমনা ইন্দস্ত্রী ৪.০গী মরমদা ৱারী শানরিবা মতম অসিদা ভারতনা মসিগী অচৌবা পার্তনর অমা ওইরি। ভারতনা দেতা পাৱর-হাউস অমা ওইনা লৌরিবা থৌদাং অসি খংঙি। মরম অসিনা দেতা প্রোতেক্সনগীদমক মথৌ তাবা হীরম খুদিংমক্তা থবক মখা তানা পাইখৎলি। নুমিৎ খরনিগী মমাংদা সাইবর সেক্যুরিতীগা মরী লৈনবা মালেমগী রেঙ্কিং অমা পীখি। ভারত অসি লৈবাক ১৮০ হেনবগী আই.তি.য়ু.-গ্লোবেল সাইবর সেক্যুরিতী ইন্দেক্সকী মকোক থোংবা লৈবাক ১০গী মনুংদা চল্লি। চহি অমগী মমাংদা ঐখোয়না ৪৭শুবা মফমদা লৈরম্বনি।
মরুপশিং,
ঐহাক্না ভারতকী নহারোলশিংদা, মখোয়গী তৌবা ঙম্বদা চেৎনা থাজবা থম্মি। ঐখোয়গী নহারোলশিংনা দিজিতেল এম্পাৱরমেন্ত অসি অনৌবা পন্দোম অমদা পুখৎনবা মখা তানা হোৎনগনি হায়না ঐহাক্না থাজৈ। ঐখোয়না পুন্না হোৎনমিন্নবা তাই। ঐখোয়না দিকেদ অসি ‘ভারতকী তেকেদ’ ওইহনবদা মাই পাকপা ঙমগনি লোইননা য়াইফ-পাউজেল অসিগী লোইননা ঐহাক্না পুম্নমক্তা য়াইফ মঙ্গোল অমুক হন্না পীজরি!
