ইকাই খুম্নরবা স্পীকরজী
রাস্ত্রপতিজীগী ৱারোলদা ঐহাক্না থাগৎচরি ফোঙদোক্নবা তাঞ্জা লৌজবনি। ইকাই খুম্নরবা রাস্ত্রপতিজীনা মহাক্কী ৱারোলদা আত্মনির্ভর ভারতকী মতাংদা অমসুং এস্পিরেস্নেল ইন্দিয়াগী মতাংদা হৌখিবা মতম খরা অসিদা পাইখৎখিবা খোঙথাংশিংগী মতাংদা কুপ্না থম্বীখ্রে। মসিগী মরু ওইবা ৱারোল অসিদা ৱাখল্লোন ফোঙদোকখিবা ইকাই খুম্নরবা মেম্বরশিংদা ঐহাক্না তৌবীমল খঙবা উৎচরি।
ইকাই খুম্নরবা স্পীকরজী,
ঐহাক্না ৱা ঙাংবা হৌদ্রিঙৈদা, ঙরাং থোকখিবা থৌদোক অমগী মতাংদা ৱাহৈ খরা ফোঙদোকচগে। লৈবাক অসিনা ইকাই খুম্নরবা ইচে লতা মাংজরে। অমরোমদনা লৈবাক অসিগী কলচরেল হেরিতেজ অমসুং য়ুনিতীবু মপাঙ্গল কনখৎহনখিবগা লোয়ননা মতম শাংনা লৈবাক অসিবু শুমহৎতুনা লাকখিবা খোঞ্জেল, লৈবাক অসিবু ইথিল পীখিবা, লৈবাক অসিদা নুংশিবনা থলহনখিবা, অমসুং ঈশ্বরগুম্লবা; মহাক্না লোল ৩৬তা ঈশৈ শকখি। মসিমক ভারতকী য়ুনিতী অমসুং ইন্তিগ্রিতীগী ইথিল পীরিবা খুদম অমনি। ঙসি ঐহাক্না ইকাই খুম্নরবা ইচে লতাদা শ্রদ্ধাঞ্জলি কৎচরি।
ইকাই খুম্নরবা স্পীকরজী,
মালেমগী অনিশুবা লাঞ্জাওগী মতুংদা মালেমদা অচৌবা অহোংবা অমা লাকখি হায়বা অসিগী খুদম পুৱারীনা ওইরি। ঐখোয়না হিংলিবা অনৌবা মালেমগী পথাপ অসিদা ঐহাক্না ময়েক শেংনা উবা ফংই মদুদি কোরোনাগী মতম অসিগী মতুংদা মালেমনা য়াম্না খোঙজেল য়াংনা অনৌবা মালেমগী পথাপ, অনৌবা সিস্তেম অমগী মাইকৈদা চংশিল্লি। মসি ঐখোয়না এক ভারত হায়বা শক্লোন অসিগী লোয়ননা খুদোংচাবা অসি লৌহৌগদবা তর্নিং পোইন্ত অমনি। ভারতকী খোঞ্জেলসি মেন তেবলদা মখোল হৌহনবা তাই। ভারতনা মশাবু লুচিংবগী থৌদাং লৌবদা ঙমলোই হায়না হন্থনা লৌবা তৌরোইদবনি। অমসুং মতাং অসিদা আজাদী কা অমৃত মহোৎসব, নীংতম্বা ফংখিবগী চহি ৭৫শুরকপা অসিমক ইথিল পীরিবা থৌরম অমনি। মসিনা পীরিবা ইথিল অসিগী খুদোংচাবা লৌদুনা, অনৌবা ফিরেপশিং লৌদুনা লৈবাক অসিনা নীংখা তম্বগী চহি ১০০ শুদ্রিবা ফাওবা ঐখোয়না মপুং ফাবা মপাঙ্গল, শক্তি অমসুং কত্থোকপগা লোয়ননা থাক অদু য়ৌনবা লৈবাক অসিবু পুদুনা ঐখোয়না য়ৌবা ঙমগনি, মসি ফিরেপ লৌবগী মতমনি।
ইকাই খুম্নরবা স্পীকরজী,
হৌখিবা চহিশিংদা, লৈবাক অসিনা লম কয়াদা ইনফ্রাস্ত্রকচর ফগৎহনবা উবা ফংলি। অমসুং ঐখোয়না অচৌবা থৌনাগা লোয়ননা মাংদা চংশিল্লি। প্রধান মন্ত্রী আৱাজ য়োজনা – লায়রবশিংগী লৈনবা য়ুমশিং পীবা, প্রোগ্রাম অসি মতম শাংনা চৎথদুনা লাক্লি, অদুবু খোঙজেল, পাক-চাউবা, দাইভর্সিতী অসিনা মরম ওইরগা ঙসি লায়রবশিংগী য়ুমশিং ফাওবা লুপা লাখকী মমল হেন্না চংনা শারি। অমসুং নাকল অমরোমদা পক্কাগী য়ুম ফংলিবা লায়রবা মীশক অদু লাখপতিগী কাংলুপতা চনবসু ঙমহল্লি। ঙসি লৈবাক অসিগী খ্বাইদগী লায়রবদগী লায়রবা অদুনা মখোয়গী ময়ুমশিংদা তোইলেৎশিং লৈরে হায়বা তাবদা করম্বা ভারত মচানা চাউথোকপা পোক্লোইদগে, ঙসি লৈবাক অসিগী খুঙ্গংশিং ফাওবা ওপন দেফিকেসনদগী ফ্রী ওইবা ঙম্লে, মসিদা হরাওবা পোক্লোইদবা অসি কনানো? ঐহাক ফমনবগীদমক শেল-শাজরে। ময়াম্বু থাগৎ ৱাহৈ ফোঙদোকচদুনা ঐহাক হৌজগে। হন্না-হন্না থাগৎচরি। অদোমগী মীনংশি-থৌজাল অমর ওইরসনু।
নীংখা তম্লবা মতুং চহি কয়া লৈরগা লায়রবশিংগী য়ুমদা মৈ থানবা ফংবগী নুংঙাইবনা লৈবাক্কী হরাও-নুংঙাইবদা মপাঙ্গল হাপ্পি। ফুঙ্গাগী মৈখুনা মমিৎ থুপ্লগা থবক তৌরিবী ইমাগী, লায়রবা ইমাগী, অমসুং লৈবাক অমদা লৈরিবা য়ুমশিংদা গ্যাস কনেক্সন লৈরবদি মদু স্তেতস সিম্বল ওইরক্লবনি, লৈবাক অদুদা লায়রবগী য়ুমদা গ্যাস কনেক্সন লৈহনবা, মৈখু চেনবা ফুঙ্গা লৈহনদবা ঙম্লবদি মদুদগী ফংবা নুংঙাইবা অদুসু করিগুম্বা মহাও অমনি।
ঙসি লায়রবশিংগী বেঙ্কতা মখোয় মশাগী একাউন্ত লৈরে, ঙসি বেঙ্ক চৎত্রবসু লায়রবনা মখোয়গী তেলিফোন্দগী বেঙ্ক একাউন্ত শীজিন্নবা য়াহল্লে। দাইরেক্ত বেনিফিৎ ত্রান্সফরগী মখাদা সরকারনা মখোয়গী একাউন্তদা হকথেংননা শেনফমশিং য়ৌহল্লি, করিগুম্বা অদোম্না লৈবাক অসিগী নক্না লৈবা, মীয়ামগী মরক্তা হিংলিবা মীশক অমা ওইরবদি পুম্নমক অসি শোইদনা উবা ফংগনি। অদুবু লাইবক থিবা ৱাফম অদুদি মীওই খরদি ২০১৪দা অদুমক পন্দুনা লৈরি অমসুং মসিদগী মখোয় থোকপা ঙমদনা লৈরি। অমসুং মসিগী মহৈনা নখোয়না ৱারিবা, নখোয়বু অদুগুম্বা মেন্তেল স্তেৎ অমদা লৈহল্লি; পুম্নমক অসি লৈবাক অসিগী মীয়াম্না খঙলে। মীওই খরনদি ঙন্না খঙখ্রে, খরনা থেংনা খঙলি অমসুং তুংদা লাক্কদবা মতমশিংদা মীওই খরনসু খঙলগনি। অদোমসু য়েংবীয়ু, অদোম্না য়াম্না শাংনা ঙাংলিবা মতম অদুদা অদোমসু চহি ৫০ মফম অসিদা ফমদুনা লৈবাক অসি পাইরকখি হায়বা কাওরি অমসুং ঙসি ওইরিবা ফীভম অসিগী মরমদি অদোম্না খনবা ঙমদে।
হৌজিক অদোম্না য়েংবীয়ু, নাগালেন্দগী মীয়াম্না কোংগ্রেসকীদমক ১৯৯৮তা অরোইবা ওইনা ভোৎ পীখিবা অদু চহি ২৪ শুরক্লে। ওরিশানা নখোয়দা ১৯৯৫তা ভোৎ পীখি, নখোয়না মফম অদুদা চংবা ফংলক্ত্রিবা অসি চহি ২৭ শুরে। ১৯৯৪দা নখোয়না গোৱাদা এবসলুৎ মেজোরিতী ফংদুনা মাইপাকখি, গোৱানা নখোয়বু য়ারক্তবা চহি ২৮ শুরক্লে। ত্রিপুরাগী মীয়াম্না নখোয়দা অরোইবা ওইনা ভোৎ পীখিবা অদু ১৯৯৮দনি, হায়রিবা অসি চহি ৩৪গী মমাংদনি। য়ু.পি., বিহার অমসুং গুজরাত্তা কোংগ্রেসনা ১৯৮৫তা ভোৎ কাখি, চহি ৩৭কী মমাংদা। অরোইবা ওইনা ৱেস্ত বেঙ্গলদা মফম অদুগী মীয়াম্না নখোয়বু চহি ৫০গী মমাং ১৯৭২দা পামখি। তামিল নাদুগী মীয়াম্নসু…. মসিদা ঐহাক্নসু য়ানীংই, করিগুম্বা নখোয়না দিগ্নিতী ঙাকলম্বা তারবা অমসুং মফম অসি শীজিন্নরমদ্রবদি ফরমগনি।
ইকাই খুম্নরবা স্পীকরজী,
তামিল নাদুনা – নখোয়দা ১৯৬২ হায়বদি চহি ৬০গী মমাংদা খুদোংচাবা পীখি। তেলঙ্গনা শেম্বগী মনাদি লৌবীয়ু অদুবু তেলঙ্গনা শেম্লবা মতুংদসু মফম অদুগী মীয়াম্না নখোয়বু য়াখিদে। ঝার্খন্দ শেমখি, মসি চহি ২০ শুরে অদুবু কোংগ্রেসনা বেক দোরদগী চংনবা হোৎনখি অদুবু মখোয়না কোংগ্রেসপু মপুং ফানা লোইশিনদ্রি।
ইকাই খুম্নরবা স্পীকরজী,
মসি মীখলগী ফলগী মতাংদা হংবা ৱাহং নত্তে। ৱাহং অসি মীয়ামগী অপাম্বশিং, মখোয়গী পুকচেল শেংবা মতৌ অদুগী মতাংদনি। লৈবাক অসিগী মীয়াম্না মখোয়বু করিগীদমক য়াদ্রিবনো অমসুং অসিগুম্বা অচৌবা দেমোক্রেসী অমদা চহি কয়া পাল্লক্লবা ফাওবা য়াদ্রিবা করিগীনো? অমসুং মীয়াম্না অচুম্বা লম্বেলদা চৎপা মতমদা মফম অদুদা অদোম অমুক হন্না চংহনদে। পুম্নমক অসি থোকখ্রবা মতুংদসু… মীখল অমা মাইথিবা নংলে, থা কয়া অসিদা ইকোসিস্তেম অসিনা করি তৌরি ঐখোয়না খঙদে। মাইথিবা নংলবসি অদোমগী নাপল হন্দে নত্ত্রগা অদোমগী ইকোসিস্তেম অসিনা অদোমগী নাপল অদু হলহনবা তৌদে। হন্দক্তি অভিনন্দনজীনা খোলাউ য়াম্না লাওখি..ঐহাক্না তাঞ্জা অসি লৌজরি – অমসুং নাপলগী মতাংদা ঐহাক্না হায়রবদি, মহাক্নসু খুমফম থোকপনি – মহাক্না অয়ুকপু নুংদাংনি হায়রদি খুদক্তা লৌবা,
করিগুম্বা অদোম্না য়াদ্রবদি অয়ুক্কী মতমদা অদোম্না মাস্ক উপকনি। করিগুম্বা মথৌ তারবদি অচুম্বা অদুসু খরা খজিক শেমদোক্কনি।
মহাক্না মশানা খঙজরিবা অসিদা নাপল কাই, মঙোন্দা মীংশেল পীরুনু। মহাক্না মীংশেল অদু থুগাইগনি।
ইকাই খুম্নরবা স্পীকরজী,
আজাদী কা অমৃত মহোৎসব, নীংতম্বগী চহি ৭৫ শুরকপা অসিদা ঙাই লৈবাক অসিনা আজাদী কা অমৃত মহোৎসব পালন তৌরি অমসুং লৈবাক অসিনা অমৃত কালতা চংশিল্লি। মসিগী নীংতম ইহৌ অসিদা শরুক তমখিবা মীওই পুম্নমক, দলদা য়াওবা নত্ত্রগা য়াওদবা…মখোয়বু অমুক হন্না নীংশিংনবা অমসুং মখোয়গী মঙলানশিং অদুবু নীংশিংদুনা মদুদগী ইথিল খরা লৌহৌনবা খুদোংচাবা অমনি।
ইকাই খুম্নরবা স্পীকরজী,
ঐখোয় অসি কলচরনা, মহৌশানা, পথাপনা অমসুং ঙসিদগী নত্তনা চহিচা কয়াদগী দেমোক্রেসী ঙাক্তুনা লাক্লবা মীওই ঙাক্তনি। অদুবু ক্রিতিসিজম হায়বা অসি ভাইব্রেন্ত দেমোক্রেসী অমগী ফজরবা মশক অমনি অদুবু সুপরস্তিসন অসিদি দেমোক্রেসীবু মশক থীহল্লিবা অমনি। পুন্না হোৎনদুনা, মসিগী থৌনা লিংজেল অসিগী লোয়ননা ভারতনা ফংখিবা পুম্নমক অসি ফরমগনি, ৱাখল চাউথোক্না তরাম্না ওক্লমগনি, মসি তরাম্না ওক্লমগনি। মসিবু থাগৎপগী ঈশৈ শক্লমগনি।
হৌখিবা চহি অসি অসিদা মালেম পুম্বদা লৈরিবা মীওইবা খুন্নাইনা চহি চামাদা থোকপা খ্বাইদগী চাউবা মালেমগী লাইচৎকী খুদোংথিবা মাইয়োক্নরি। ভারতকী হৌখিবদা য়ুম্ফম ওইরগা ভারতপু খঙনবা হোৎনরিবশিংনা অশুক চাউরবা লৈবা অসিনা, য়ামখ্রবা মীশিং অসিনা, দাইভর্সিতী অসিনা, মসিগী হৈনবী অসিনা, মসিগী মওং-মতৌ অসিনা ….ভারতনা মসিগী অচৌবা লান অসি মায়োক্নবা ঙম্লোই হায়না অকিবা ফাওনখি। ভারতনা মসিদগী মশাবু কনবা ঙমলোই…হায়না মখোয়না খনখি। অদুবু ঙসি করি ফীভমদা লৈরি…ভারত্তা শাজবা কোভেক্সিন, কোবিদ ভেক্সিনশিং অসিনা মালেমদা খ্বাইদগী ইফেক্তিব ওইরি। ঙসি ভারতনা অহানবা দোজ কাপ্পদা চাদা ১০০কী তার্গেৎ য়ৌশিল্লক্লি। অমসুং চাদা ৮০না অনিশুবা দোজ কাপখ্রে।
ইকাই খুম্নরবা স্পীকরজী,
কোরোনা অসি মালেমগী লাইচৎ অমনি অদুবু মসি পার্তী পোলিতিক্স তৌবদসু শীজিন্নরি, মসি মীওইবা খুন্নাইগী অফবরা?
ইকাই খুম্নরবা স্পীকরজী,
কোরোনাগী মতম অসিদা কোংগ্রেসনা মখোয়গী পনখৈ লান্থোরকখি।
ইকাই খুম্নরবা স্পীকরজী,
লৈবাক অসিনা লোকদাউন তৌরিঙৈ অহানবা ৱেবকী মনুংদা, দবল্যু.ঐচ.ও.না মালেম পুম্বদা লৈরিবা মীয়ামদা পাউতাক পীরিঙৈ মতমদা, হেল্থ এক্সপর্ত পুম্নমক্না অদোম্না লৈরিবা মফম অদুদা লৈনবা হায়খি, পাউজেল অসি মালেম শিনবা থুংনা পীখি, মরমদি করিগুম্বা মীওই অমনা মফম অমদগী অমদা চৎলবদি, করিগুম্বা মহাক অদু কোরোনা নারম্বা তারবদি, মহাক্না কোরোনা অদুসু পুদুনা চৎকনি। মতম অদুদা কোংগ্রেসকী মীওইশিংনা করি তৌখি, মুম্বাইগী রেলৱে স্তেসন্দা লেপতুনা মুম্বাইদা লৈরিবা শিন্মীশিংদা মুম্বাই থাদোক্তুনা চৎনবা থৌগৎখি, মখোয়দা তিকেৎশিং পীখি, মীয়ামদা তিকেৎ লেম্না পীবনা মখোয়দা চৎনবা ইথিল পীখি। মহারাস্ত্রদা ঐখোয়দা পীরিবা পোৎলুম অসি হন্থনবা নখোয় উত্তর প্রদেশতগী লাকপনি, বিহারদগী লাকপনি অদুনা চৎলো। চৎলো মফম অদুদা কোরোনা শন্দোকউরো। মসিগী অচৌবা পাপ অসি নখোয়না লংশিনখি। অচৌবা খুদোংথিবগী ফীভম অমা নখোয়না ওইহনখি। নখোয়না ঐখোয়গী শিন্মী ইচিল-ইনাওশিংবু অৱাবা কয়া মায়োক্নহনখি।
অমসুং ইকাই খুম্নরবা স্পীকরজী,
মতম অদুদা দিল্লীদা অদুগুম্ব সরকার অমা লৈরমখি, হৌজিকসু লৈরি। সরকার অদুনা জীপদা মাইক হাপতুনা, সিল্লী স্লমশিংদা গারী থৌজন্দুনা মীয়ামদা খুদোংথিবা অসি য়াম্না তমথি হায়না খুঙ্গংদা, য়ুমদা চৎনবা হায়খি। অমসুং দিল্লীদগী চৎনবা বসশিং পীখি… মসি লমখাংদা তোকখি অমসুং মীওই পুম্নমক্তা খুদোংথিবা থোকহনখি। অমসুং মসিনা মরম ওইরগা য়ু.পি.দা, উত্তরাখন্দদা, পঞ্জাবতা, কোরোনাগী ফীভম হেনজিল্লমদবা অদু, অসুক থিন্না শাথিরমদবা অদু মসিনা মরম ওইদুনা কোরোনাগী ফীভম লুশিনহনখি।
ইকাই খুম্নরবা স্পীকরজী,
মসি করম্বা মখলগী রাজনিতীনো? মীওইবা খুন্নাইদা অৱাবা তারিবা মতমদা তৌরিবা রাজনিতীগী মখল অসি করিনো? অসিগুম্বা দলগী রাকনিতী অসি মতম শাংনা করম্না চৎকনি?
ইকাই খুম্নরবা স্পীকরজী,
ঐহাক খক্তা নত্তনা, লৈবাক পুম্বনা কোংগ্রেসনা তৌখিবা অদুদা অঙকপা পোকখি। চহি অনি লৈবাক অসিনা চহি চামদা থোকপা অচৌবা খুদোংথিবা অসি মায়োক্নদুনা লাকখি। মীওই খরনা তৌরিবা মওং অসিনা লৈবাক অসি অসুম খলহনখি। মসি নখোয়গীদি লৈবাক নত্তবরা? লৈবাক অসিগী মীয়াম অসি নখোয়গীদি নত্তবরা? মখোয়গী অৱা-নুংঙাইবা অসি নখোয়গী য়াওদবরা? অসিগুম্বা অচৌবা খুদোংথিবা অমা থোকপদা মতমদা রাজনিতী দল লয়াগী লুচিংবশিংনা য়েংদুনা লৈখি, মীয়ামগী লুচিংবনি হায়না মশাবু খঞ্জবা রাজনিতী দলশিংগী লুচিংবা কয়ানা মীয়ামদা ইচিল-ইনাওশিং কোরোনা অসি অচৌবা খুদোংথিবা অমনি, মসি মালেমগী লাইচৎনি…অদোম মাস্ক উপ্পীয়ু, খুৎশা হম্বীয়ু, ফুৎ অনিগী অরাপ্পা থম্বী হায়না মীয়ামদা হায়খিবা, মীয়ামদা অপীল তৌখিবা লুচিংবা কয়া লৈখিবগে… মখ।ওয়না করিগুম্বা লৈবাক অসিগী মীয়ামদা অসুম্না হায়রম্বা থোক্লবদি মসিদা বি.জে.পি. সরকারগী কান্নবা অসি করিনো? মসিদা মোদীগী কান্নবা অসি করিনো? অসিগুম্বা অচৌবা খুদোংথিবা অমদসু মখোয়না অসিগুম্বা অফবা থবক অসি তৌখিদে।
ইকাই খুম্নরবা স্পীকরজী,
মীওই খরা লৈখি, মখোয়না কোরোনা ভাইরসনা মোদীবু শোইদনা মাইথিবা পীগনি হায়না ঙাইখি। মতম শাংনা ঙাইখি অমসুং কোরোনানা অদোমগী খঙবা ঙম্বগী চাং অদুগী অচৌবা চাংয়েং অমসু তৌখি। নুমিৎ খুদিংগী নখোয়না অতোপ্পপু ইকাইবা পীনবা মহাত্মা গান্ধীগী মমিং পনখি। মহাত্মা গান্ধীগী স্বাদেশিগী মতাংদা ঐখোয়না ৱাফম ফোঙদোক্কে তৌবদা হঞ্জিন-হঞ্জিন ঐখোয়দা থিংখি। করিগুম্বা মোদীনা ‘ভোকেল ফোর লোকেল’ হায়খ্রবদি মোদীনা হায়খ্রে অদুনা ৱাহৈ অদু শীজিন্নগনি হায়খি। অদুবু অদোম্না লৈবাক অসিবু আত্মনির্ভর ওইহনবা পামদব্রা? করিগুম্বা ঐখোয়না মহাত্মা গান্ধীগী ৱাখল্লোনশিংগী মতাংদা ফোঙদোক্লবদি, ভারত্তা কেম্পেন অসি চত্থবদা মসিবু মপাঙ্গল কনখৎহনবদা অদোম্না করি শরুক তম্বগে? মহাক্না চৎলম্বা অদু মতুং ইল্লু। মহাত্মা গান্ধীগী স্বাদেশিগী ৱারেপ অসি হেনগৎহল্লু, মসি লৈবাক্কীদমক অফবা ওইগনি। নত্ত্রগনা মহাত্মা গান্ধী মঙলানশিং অদু মঙফাওনহনবা অদোম্না পামদবা ওইরম্বসু য়াই।
ইকাই খুম্নরবা স্পীকরজী,
কোরোনাগী মালেমগী পুম্বগী লাইচৎ অসিনা মরম ওইরগা থোরক্লিবা ফীভম অসি ভারতনা মতৌ করম্না মায়োক্নখিবগে হায়বগী মতাংদা অহৌবা নুমিত্তগী কনাগুম্বা অমত্তনা ফোঙদোক্তে হায়বা হাউস অসিনা শাখি ওইরি। ঐখোয়না করি হায়খি হায়বা ঐহাক্না খঙদে। মশা মথন্থা লেপচবা ঙম্নবা ভারতনা শেন্মীৎলোনগী প্লান্নিং কমদৌনা তৌরি, হায়বগী মতাংদা করি হায়খ্রবগে? অচৌবা পন্দিৎশিংনা অদোমগী ইকোসিস্তেম পুম্বা শরুক য়ারি হায়বা খংলে। ঐখোয়না খংজবা মতুং ইন্না, ইশ্বরনা খংজনবা পীবা মগুনগী মতুং ইন্না, অদুবু ঐখোয়গী খন্থবগী পাঙ্গল অদুদি খংজবা অদুদগী চাউবা হেল্লি। অদুগা খন্থবদগী হেন্না দিদিকেসন তৌরবদি, লৈবাক অসিদা অমসুং মালেমদা খুৎশিন্নবগী শক্তি অদু ফংগনি। অদুগা মদু ঐখোয়না পাংথোকখ্রে। অসি ঐখোয়না চৎলিবা লম্বেল অসি, মালেমদা ইকনোমিক ৱর্ল্দদা লৈরিবা হৈ-শিংলবা খুদিংমক্না ভারতনা কোরোনাগী মতম অসিদা চৎলিবা লম্বেল অসি অচুম্বা লম্বেল হায়না য়েৎনবা লৈতনা য়ারি।
ইকাই খুম্নরবা স্পীকরজী,
মসিগী কোরোনাগী মতম অসিদা ফাওবা ঐখোয়গী লৌমীশিংনা রেকোর্দ ওইনা পুথোক্লি, সরকারনা রেকোর্দ ওইনা লৈশিল্লি। লৈবাক কয়ামরুমদা চীঞ্জাক্কী ৱাথোকশিং থোকপা থেংনখ্রে অমসুং লায়নানা মরম ওইরগা শিখিবা মীওই মশিংগা চরা হেনবনা মরম ওইরগা শিখিবা মশিংগা মান্নৈ হায়বা চহি চামাগী মমাংদা থোখিবা থৌদোক অমগী রিপোর্তকী মতাংদা অদোম্না খংবীরম্লগনি। অদুবু লৈবাক অসিনা কনাগুম্বা অমত্তা চরা হেলহল্লগা শিহন্নবা হোৎনদে। ইরৈবাকমচা করোর ৮০ হেনবদা লেম্না চেং পীবগী থবক ঙসিসু পাইখৎলি।
ইকাই খুম্নরবা স্পীকরজী,
ঐখোয়গী অপুনবা এক্সপোর্ত অসি পুৱারী ওইরবা খ্বাইদগী ৱাংবা থাক্তা লৈরে। অদুগা মসিসু কোরোনাগী মতম মনুংদনি। লৌউ-শিংউগী এক্সপোর্তশিং অসি পুৱারী ওইবা মওংদা খ্বাইদগী মকোক্তা লৈখ্রে। সোফৱেয়র এক্সপোর্তশিং অনৌবা পনখৈ অমদা চংশিল্লি। মোবাইল ফোনগী এক্সপোর্ত অসি অঙকপা ফংনা হেনগৎলি। দিফেন্স এক্সপোর্ত, অতোপ্পা এক্সপোর্তশিংনা অৱাবা মায়োক্নরি।
ইকাই খুম্নরবা স্পীকরজী,
মখোয়গী পার্তীগী এম.পী. অমনা খন্ন-নৈনবা অসি হৌদোরকখিবনি অমসুং মসিদগী হৌজিক্কী ফাগী জুগাই অসি চত্থরিবনি। অদুগা ঐহাক্না ঐহাক্কী রুমগী স্ক্রিন্দগী ঐখোয়গী মন্ত্রীশিং থোকখিবা উরম্মি।
ইকাই খুম্নরবা স্পীকরজী,
অদোম, অদোম, অদোম, খুদিংমক্না নখোয়গী সি.আর. ফগৎনবা হোৎনগদবনি। অদোমগী সি.আর. অসু ঐহাক্না পাংথোকখিবা অদুনা মরম ওইরগা ফবা ঙম্লম্লগনি হায়না ঐহাক্না থাজৈ। রিজিস্তর তৌগদবা মীওইশিং অদুনা মসিগী থবক অসি মমাংদা পাইখৎলমগদনি, অদোম্না করিগীদমক্তা হেন্না ৱারিবনো? কনাগুম্বা অমত্তনা অদোমবু সেসন অসিদগী তান্থোক্লোই, ঐহাকপু থাজবীয়ু? কনাগুম্বা অমত্তনা অদোমবু সেসন অসিদগী তান্থোক্লোই, ঐহাক্না থাজবা পীরি। মরুপশিং মসিনি মফম অসিদা অদোম্না সাফরিবসি।
ইকাই খুম্নরবা স্পীকরজী,
ঙসিদি ভারত্তা এফ.দি.আই. অমসুং এফ.দি.আই.গী রেকোর্দ ওইনা ইনবেস্তমেন্ত তৌবা ঙম্লে। ঙসিদি রিন্যুএবল ইনর্জীগী লমদা মকোকথোংবা মালেমগী লৈবাক মঙাগী মনুংদা ভারতনা মকোক্তা লৈবা ঙম্লে।
ইকাই খুম্নরবা স্পীকরজী,
মসি পুম্নমক অসি ওইথোকপা ঙম্বগী মরমদি কোরোনাগী মতমদা অচৌবা খুদোংচাদবা অমা মায়োক্নরবসু ঐখোয়না ঐখোয়গী ইথৌদাংশিং পাংথোক্তুনা, হায়রিবা খুদোংচাদবা মতম অসিগী মনুংদা লৈবাক অসিদা অওনবা পুরকপা অদুনা ঙমখিবনি। অদুগা মসিগী অওনবশিং অসিগী ফলনা হৌজিক ওইরিবা ফিভম অসিদা য়ৌরকপা ঙম্লিবনি।
ইকাই খুম্নরবা স্পীকরজী,
এম.এস.এম.ই.শিং য়াওনা ইন্দস্ত্রী খুদিংমক্তা মথৌ তাবা মতেং পীখ্রে। ঐখোয়না আত্মনির্ভর ভারতকী মিসন অদু মাই পাক্নবা অঙম্বা থাক্তা হোৎনরি। হায়রিবা এচিফমেন্ত খুদিংমক অসি ঙসি ফাওবদা লৈরিবা মালেমগী শেন্মীৎলোনগী তংদু লৈতাদবা ফীভম অদুগী মনুংদা লৈবাক অসিনা পুরকপা ঙমখিবনি। সপ্লাই চেন খুদিংমক কাইথখি। লোজিস্তিক সপ্পোর্ততা অৱাবা মায়োক্নরে। মালেমদা লৈরিবা সপ্লাই চেন অসিনা মরম ওইরগা কেমিকেল ফর্তিলাইজরদা অচৌবা খুদোংথীবা অমা মায়োক্নখি অমসুং ভারতনা ইম্পোর্তশিংদা দিপেন্দ তৌরি। লৈবাক অসিদা শেন্মীৎলোনগী ওইবা অচৌবা বর্দন অমা মায়োক্নখি। মসিগী খুদোংচাদবশিং অসি মালেম পুম্বদা মায়োক্নখি অদুবু ভারতনা লৌমীশিংদা মসিগী অৱাবা অসি মায়োক্নহনখিদে। ভারত, লৈবাক অসিনা খুদোংচাদবা খুদিংমক মায়োক্নবদা থৌদাং লৌখি অমসুং লৌমীশিংদা শরুক য়াহনখিদে। ভারতনা লেপ্পা লৈতনা আরশিং সপ্লাই তৌখি। কোরোনাগী অৱাবা মতম মনুংদা অপীকপা লৌমীশিংগী মতেং পানবা
ইকাই খুম্নরবা স্পীকরজী,
ঐখোয়না লাইরবা কোকহনবা পাম্লবদি, ঐখোয়না ঐখোয়গী অপীকপা লৌমীশিং অসি মপাঙ্গল কনখৎহনবা মথৌ তাই। করিগুম্বা খুঙ্গংগী শেন্মীৎলোন অসি মপাঙ্গল কনখৎহনবা পাম্লবদি, ঐখোয়গী অপীকপা লৌমীশিং অসি মপাঙ্গল কনখৎহনবা মথৌ তাই। করিগুম্বা ঐখোয়গী অপীকপা লৌমীশিং অসি মপাঙ্গল কনখৎহল্লবা, অপীকপা লমশিং অদু হেক্তর অনিগী ওইহল্লবা, মসিগী মথক্তা মহাক্না মোদর্নাইজ তৌনবা হোৎনরবা, অনৌবশিং তম্নবা হোৎনরবা অমসুং করিগুম্বা মহাক্কী থৌনা অদু লাক্লবদি লৈবাক্কী শেন্মীৎলোনদসু থৌনা অমা লাক্কনি। মরম অদুনা মোদর্নিতীগীদমক অপীকপা লৌমীশিংদা মীৎয়েং চংবা হায়বসি ঐহাক্কী অপাম্বনি। অদুবু অপীকপা লৌমীশিংবু থৌশাদবা, অপীকপা লৌমীশিংগী অৱাবা অদুবু মশক খংদবা, মখোয়না লৌমীশিংগী মিংদা রাজনিতী তৌবগী হক অমত্তা লৈতে।
ইকাই খুম্নরবা স্পীকরজী,
ঐখোয়না মসি খংবা মথৌ তাই, চহি করোর ১০০গী মীনাই নাইথাংগী ৱাখল্লোন অদু কনাগুম্বা মীওই খরদি নীংখা তম্লবা চহি ৭৫গী মতুং ফাওবদা হোংবা ঙমদ্রি। মীনাই নাইথাংগী ৱাখল্লোন অসি লৈবাক অমহেক্তগী চাউখৎ থৌরাংদা অচৌবা খুদোংচাদবা অমনি।
অদুবু ইকাই খুম্নরবা স্পীকরজী,
ঙসিদি ঐহাক্না লৈবাক অসিগী মমি অমা উরি। ঙসি ফাওবদা মীনাই নাইথাংগী ৱাখল্লোনদা হিংবা অদুগুম্বা কম্ম্যুনিতী অমা, ক্লাস অমা লৈরি। ঙসি ফাওবদা ১৯শুবা চহিচাগী ৱাখল্লোন অদুদা থবক তৌরিবা, অমসুং ২০শুবা চহিচাগী লোশিং অদু চপ মান্নরি হায়না খনবা লৈরি।
ইকাই খুম্নরবা স্পীকরজী,
মীনাই নাইথাংগী ৱাখল্লোন, মসিগী ১৯শুবা চহিচাগী পুন্সি মহিং, ২০শুবা চহিচাগী লোশিং, অসিনা ২১শুবা চহিচাগী অপাম্বশিং অদু থুংহনবা ঙম্লোই। ২১শুবা চহিচাদা চুশিন্ননবা অহোংবা পুরকপা হাববসি য়াম্না মরুওইবা অমা ওইরি।
ইকাই খুম্নরবা স্পীকরজী,
ঐখোয়না অহোবশিং রিজেক্ত তৌখিবা অদুনা করি ফল পুরকখ্রে? মেনন্দ চান্দ কয়ামরুমগী মতুংদা, চহি কয়াগী মতুংদা, ফ্রৈত কোরিদোরগী প্লান্নিং তৌখি। ২০০৬তা প্লান্নিং তৌখিবদগী ২০০৬তগী ২০১৪ ফাওবগী ফিভম অদু য়েংশি। মসিগী খোংজেল অসি ২০১৪গী মতুংদা য়াংখৎলকখি। ৭০ অদুৱাইদা হৌখিবা য়ু.পি.গী সরয়ু কেনেল অসি হৌজিক মসিগী কোস্ত শরুক ১০০ হেনগৎলে। ঐখোয়না লাক্লবা মতুংদা, মদুগী থবক অদু ঐখোয়না লোইশিনখি। মসিগী ৱাখল্লোন অসি করম্বা মখলগীনো? য়ু.পি.গী অর্জুন দাম অসি ২০০৯দা শাবা হৌখি। ২০১৭ ফাওবদা চাদিংগী শরুক অহুম থোকপগী অমা লোইশিনখি। ঐখোয়না মদু অতেনবা মতম অমগী মনুংদা লোইশিনখি। কোংগ্রেসতা শক্তি কয়ামরু লৈরম্মি, মতম কুইনা চহি কয়া শক্তি পাইদুনা লৈরম্মি, মখোয়না চার তাম অসি ওল ৱেদর রোদ অমা ওইনা শেমগৎলম্বা য়াই অদুবু শেমগৎলমদে। ৱাতরৱে, মালেম পুম্বনা ৱাতরৱেগী মতাংদা খংই, ৱাতরৱেবু রিজেক্ত তৌখিবা লৈবাক অমখক হায়রগদি ঐখোয়গী লৈবাক অসিনা ওইরি। ঙসিদি ঐখোয়গী সরকারনা ৱাতরৱেদা থবক পাইখৎলি। গোরাখপুরদা লৈরিবা ফেক্তরী অসি মমাংগী থৌশিলদগী লোন্দুনা লৈরম্মি, গোরাখপুরগী ফর্তিলাইজর ফেক্তরী অসি ঐখোয়গী থৌশিলদগী হাংদোক্লে।
ইকাই খুম্নরবা স্পীকরজী,
মসিগী মীওইশিং অসি মীয়ামগা লোয়ননা লৈতে, মসিনা মরম ওইরগা মখোয়না ফাইল অদু সাইন তৌরিবনি, মফম অদুদা কনা লৈরি, মখোয়বু উনবা কনা লাক্কনি হায়বা ৱাখল্লোন্দা মখোয়বু ঙাইদুনা হিংই। অদোমগীদি ফাইলনা পুম্নমক্নি, ইরৈবাকচা করোর ১৩০গী কান্নবনা ঐখোয়গীদি মরুওই। অদোম্না ফাইলদা ৱাখল তৌদুনা লৈরে, ঐখোয়না পুন্সি মহিং হোংদোক্নবা য়াম্না কন্না হোৎনরি। ঙসিদি মদুগী ফল ওইনা হোলিস্তিক এপ্রোচ অমগা লোয়ননা প্রধান মন্ত্রীগী গতী শক্তি মাস্তর প্লান অসি মচেৎশিংদা নত্তনা, থবক অদুগী শরুক তঙ্খাই অমা লাক্লে, মফম অদুদা লম্বী শেমগৎলে, অদুগা ইলেক্তিসিয়ন লাক্লগা অমুক তৌখাইরে। অদুদি ফরে অদুবু ঈশিংগী কাংবু অমুক লাক্লগা তৌখাইরে। মসিগী খুদোংথিবা ময়াম অসিদগী মপান থোরক্লগা, ঐখোয়না জিলাগী থাক্তা গতি শক্তি মাস্তর প্লানগী থবক পাইখৎলি। মসিগা মান্ননা ঐখোয়গী লৈবাক্কী থোইদোক হেন্দোকপা অসি য়েংলগা, ঐখোয়না মল্তিমোদেল ত্রান্সপোর্ত সিস্তেমদা অচৌবা মীয়েং চংলি অমসুং মদুদা য়ুমফম ওইরগা ঐখোয়না কন্নেক্তিবিতীদা মীৎয়েং চংলি। নীংখা তম্লবা মতুংদা করিগুম্বা মফম অমদা খোঙজেল য়াংনা খুঙ্গংগী লম্বিশিং শেমগৎলবদি মদু হায়রিবা মসিগী চহি মঙা অসিগী মনুংদা শেম্বনি।
ইকাই খুম্নরবা স্পীকরজী,
নেস্নেল হাইৱেশিং শেমগৎলি। রেলৱে লাইনশিং ইলেক্ত্রিফাই তৌখ্রে। ঙসিদি লৈবাক অসিনা অনৌবা এয়রপোর্তশিং, হেলিকোপ্তরশিং অমসুং ৱাতরদ্রোনশিংগী নেতৱর্ক অমা শেমগৎলি। লৈবাক অসিগী খুঙ্গং লাখ ৬ হেনবদা ওপ্তিকেল ফাইবর নেতৱর্ক্কী থবকশিং পাইখৎলি।
ইকাই খুম্নরবা স্পীকরজী,
মসিগী থবক পুম্নমক অসিদি মীয়ামদা থবক ফংহনবা থৌওংনি। মসিগুম্বা থৌওং অসিদগী য়াম্লবা থবকশিং ফংহল্লি। লৈবাক্না ঙসিদি মতমগা চুনবা ইনফ্রাস্ত্রকচরগী মথৌ তারি অমসুং মমাংদা পাংথোক্লমদবগুম্না ইনভেস্তমেন্ত কয়া অমসু হৌজিক পাংথোক্লি অমসুং মসিদগীসু থবক কয়া অমা ফংহল্লি, চাউখৎ-থৌরাংগী খোঙজেল য়াঙহনবগা লোয়ননা লৈবাকপুসু চাউখৎহল্লি। মরম অদুনা, লৈবাক অসিনা মাইকৈ অসিদা থবক পায়খৎলি।
ইকাই খুম্নরবা স্পীকরজী,
শেন্মিৎলোন চাউখৎলিঙৈ থবক ফংবগী খুদোংচাবসু হেনগনি। অদুনা, ঐখোয়না পান্দম অসিগা লোয়ননা মমাংগী চহি ৭তা হায়রিবা হীরমশিং অসিদা মিৎয়েং চঙদুনা লাকখি। মসিগী মহৈদি ঐখোয়গী আত্মানির্ভর ভারতকী খোঙজং অসিনি। মেন্যুফেকচরিং নত্ত্রগা সর্ভিস সেক্তর ওইরো, সেক্তর খুদিংগী ঐখোয়গী পোত্থোক পুথোকপগী চাং হেনগৎলি। আত্মানির্ভর ভারত অভিয়ানগী খুত্থাংদগী ঐখোয়না ঙসিদি গ্লোবেল ভেল্যু চেনগী শরুক অমা ওইরি। মসিমক্না ঐখোয়গী ভারতকী নীংথিরবা খুদম অমা ওইরি। ঐখোয়না খ্বাইদগী হেন্না মিৎয়েং চঙলিবসি এম.এস.এম.ই. অমসুং তেক্সতাইলগুম্বা লেবর সেক্তরদনি। এম.এস.এম.ই.গী চাউরবা পথাপ অমসুং মসিগী ৱাহন্থোক্তা শেমদোকপা পুরক্তুনা ঐখোয়না মখোয়দা চাউরবা খুদোংচাবা অমা ফংহল্লি। ঐখোয়গী অপীকপা ইন্দস্ত্রীশিংবু তেক্ত-কায়দনা থম্নবগীদমক্তা, সরকারনা কোরোনাগী ইরাং মরক্তা এম.এস.এম.ই.শিংগীদমক্তা লুপা করোর লাখ ৩গী অখন্নবা স্কিম অমসু হৌদোকখি অমসুং ঐখোয়গী এম.এস.এম.ই. সেক্তরনা মসিদগী কান্নবা য়াম্না ফংখি। মসিগী মতাংদা এস.বি.আই.না পাক চাউবা স্তদী অমা পাংথোকখি। মখোয়গী স্তদীগী মতুং ইন্না, এম.এস.এম.ই. লাখ ১৩না স্কিম অসিগী মতেংদগী মুৎহৌদ্রে, থবক করোর ১.৫ কলহৌরে অমসুং এম.এস.এম.ই. লোন চাউরাকপা ১৪%বু এন.পি.এ. তাবদগী কলহৌরে হায়না ফোংদোকখি।
ইকাই খুম্নরবা স্পীকরজী,
ফিল্দদা চৎপা মেম্বরশিংনা মসিগী মহৈ উবা ফংগনি। ওপোজিসনগী মীওই কয়া অমনসু স্কিম অসিনা তসেংনা কান্নবা ফংহল্লে হায়না ঐহাক্কী ইফমদা ইরকখি। অসিগুম্বা লুরবা তাঞ্জা অসিদা এম.এস.এম.ই. সেক্তরদা চাউরবা মতেং পাংখিবনি।
ইকাই খুম্নরবা স্পীকরজী,
মতৌ অসুম্না, মুদ্রা য়োজনাসু য়াম্না মায় পাকখি, ঐখোয়গী ইমা, ইচে-ইচল কয়া অমা সেক্তর অসিদা চঙলকখি। মীওই লাখ কয়া অমনা গেরেন্তী য়াওদনা বেঙ্কতগী লোন লৌদুনা মশানা মশাবু থবক পীজনবা মাংজিল থানা থোক্লকখি, মশাবু থবক পীজবতা নত্তনা অতোপ্পা মীওই খরদসু থবক পীনখি। স্বনিধি য়োজনানা, ঐখোয়না মমাংদা খল্লমদবা স্ত্রীত ভেন্দরশিংবু নীংতম্বা ফংলবা মতুংদা অহানবা ওইনা বেঙ্কতগী লোন ফংহনখি অমসুং ঙসিদি, স্ত্রীত ভেন্দর্শিংনা দিজিতেল ত্রাঞ্জেক্সন পাংথোক্লি অমসুং শিন্মী মিলিয়ন কয়ানা কান্নবা ফংলি। ঐখোয়গী লাইরবা শিন্মীশিংগীদমক্তা লুপা করোর লাখ ২ হেন্না থাদখি। আত্মানির্ভর ভারত রোজগার য়োজনাগী মখাদা বেনিফিশরী লিশিং কয়াগী বেঙ্ক একাউন্ততা ঐখোয়না হকথেংননা শেল থাখি।
ইকাই খুম্নরবা স্পীকরজী,
ইন্দস্ত্রীবু খুমাং চাউশিলহন্নবা অফবা ইনফ্রাস্ত্রকচরগী মথৌ তাই। পি.এম. গতিশক্তি মাস্তর প্লান্না ঐখোয়গী লোজিস্তিক্স কোস্তপু য়াম্না হন্থহল্লগনি। মসিনা মরম ওইরগা লৈবাক অসিদা পোত্থোক কয়া মমল হোঙনা ফংহনগনি অমসুং এক্সপোর্ত তৌবা মীওইশিংনসু মালেমগা চাংয়েংনবা ঙম্লগনি। মরম অদুনা পি.এম. গতিশক্তি প্লান অসিনা লাক্কদৌরিবা মতমশিংদা কান্নবা য়াম্না পীগনি।
ইকাই খুম্নরবা স্পীকরজী,
সরকারনা অচৌবা খোঙথাং অমসু পায়খৎলি। অনৌবা সেক্তর কয়াবু ওন্তোপ্রিনরশিংগীদমক্তা হাংদোক্লে। আত্মানির্ভর ভারত য়োজনাগী মখাদা স্পেস, দিফেন্স, দ্রোন, মাইনিংবু প্রাইভেত সেক্তরশিংদা হাংদোক্তুনা লৈবাক চাউখৎপদা মখোয়বুসু শরুক য়াহন্নবা খুদোংচাবা পীরি। লৈবাক অসিদা ওন্তোপ্রিনরশিংগী চুনবা ফিভম অমা লৈহন্নবা অচম্বা তেক্স সীস্তেম হৌদোকপা, দিপার্তমেন্ত কয়ানা মসি চঙগনি, মদু পুরকউ হায়বনচিংবা কমপ্লাইএন্স কয়া অমা লৌথোকপগী খোঙথাং পায়খৎলে। রাজ্যশিংনসু মসিগুম্বা কমপ্লাইএন্স কয়া কোইথী থিদোক্তুনা মুত্থৎনবা ঐহাক্না খঙহনঞ্জরি। মসিনা মরম ওইরগা লৈবাক মীয়াম য়াম্না ৱারে হায়বসিসু অদোম্না খঙহন্নীংই। ঙসিদি, লৈবাক অসিদগী অসিগুম্বা অপনবা কয়া অমা লৌথোক্লি। দোমেস্তিক ইন্দস্ত্রীশিংদা থাক মান্নবা খুদোংচাবা পীনবগীদমক্তা খোঙথাং কয়া অমা মথং মথং পায়খৎলক্লি।
ইকাই খুম্নরবা স্পীকরজী,
সরকারনা অপাম্বা খুদিং পীগনি, অদোম্না সরকারগী মখা পোন্দুনা অদুমক লৈগদবনি, অদোমগী অপাম্বা কনানসু থুংহনবা ঙম্লোই, পুম্নমক সরকারনা তৌগনি হায়বগী ৱাখল্লোন অসিদগী লৈবাক অসিনা ঙসিদি মপান থোক্লক্লে। ঐখোয়না ইগো য়াম্না লৈমনখিবনা ঐখোয়গী তৌবা ঙম্বগী মতিক্তা অকায়বা কয়া পীরি। নহারোলশিংনা মঙলিবা মঙলান কয়ানা মরম ওইরগা, মখোয়না অনৌবা ৱাখল্লোন খনবা হৌরক্লে। সরকারনা হীরম খুদিংমক পাংথোক্কনি হায়বদু লৈরক্ত্রে। লৈবাক মীয়ামগী পাঙ্গল অসি য়াম্না ঙম্বনি। অসিগুম্বা পাঙ্গল অসিবু ঐখোয়না অৱাবা তাবা মতমদা পুন্সিন্না শিজিন্নরবদি, অফবা মহৈ ফংগনি। ইং ২০১৪গী মমাংদা লৈবাক অসিদা শুপ্নগী স্তার্ত-অপ ৫০০ খক লৈরম্মি হায়বা অদোম্না খঙবীয়ু। নহারোলশিংদা খুদোংচাবা পীবা হৌখিবদগী করি মহৈ ফংলে? চহি ৭ অসিদা স্তার্ত-অপ ৭০০০না মথৌ তৌরক্লে। মসি ঐখোয়গী নহারোলশিংগী মপাঙ্গলনি। মসিদগী য়ুনিকোর্ন কয়া অমসু ওইরক্লি অমসুং য়ুনিকোর্ন অমগী ভেল্যুনা লুপা করোর কয়া ওইরি।
ইকাই খুম্নরবা স্পীকরজী,
অদুগা, য়াম্না অতেনবা মতমগী মনুংদা ভারতকী য়ুনিকোর্ন মশিংনা সেঞ্চুরী য়ৌনবা মাং থানা চঙশিল্লিবা অসি য়াম্না চাউবা ৱাফম অমনি। করোর লিশিং কয়াগী কম্পেনী অমা শেম্বা হায়বসি মমাংদদি দিকেদ চঙলম্মি। ঙসিদি, ঐখোয়গী নহারোলশিংগী মপাঙ্গল, সরকারনা শেম্বা থৌশিল থৌরাংনা মরম ওইরগা, চহি অমা অনিগী মনুংদা করোর লিশিং কয়াগী কারবার তৌবসি উবা ফংলে।
ইকাই খুম্নরবা স্পীকরজী,
ঐখোয়না স্তার্ত-অপ য়ুনিকোর্নগী হীরমদা মালেমগী খ্বাইদগী মকোক থোংবা অহুমগী মনুং চনবা ঙম্লে। মসিদবু চাউথোকচদবা ভারত মচা লৈরম্লোইদবগে? অদুগা মসিগুম্বা মতমসিদা, মীওই খরনা সরকারগী মাইয়োক্তা ৱা ঙাংবগী হৈনবী লৈরি। অয়ুক অঙনবদগী হৌরে। অদুগা ঐখোয়গী ইকায় খুম্ননীংঙাই ওইরবশিংনসু নখোয়না মোদি, মোদি হায়না তৌদুনা লৈরে হায়বা ঐহাক্না ঙসি উরে। মসি নত্ত্রো অদোম্না হায়রম্বদো? মীয়াম্না মোদি মোদি হায়নরি, অদোমসু হায়বা য়াওরি। অয়ুক্তগী অদুম হৌখ্রবনি ৱা ঙাংবা। অদোম্না মোদি য়াওদনা মিৎকুপ অমা ফাওবা হিংবা ঙমদ্রবনি। মোদিদি অদোম্বগী পুন্সিগী শক্তিনি।
ইকাই খুম্নরবা স্পীকরজী,
মীওই খরদি লৈবাক্কী নহারোল, লৈবাক্কী ওন্তোপ্রিনর, লৈবাক্কী ফরবা ক্রিএতরশিংবু কীহনবা য়াম্না পাম্মি। মখোয়বু কিহনবদা য়াম্না নুংঙাইবা ফাওই। মখোয়বু হন্থনা হুনবদা য়াম্না নুংঙাইবা ফাওই। অদুবু, লৈবাক্কী নহারোলশিংনা মখোয়গী মৱা তাদে, মরম অদুনা, লৈবাক অসিনা চাউখৎলিবনি, মাংজিন থানা তুংলমচৎকীদমক্তা চঙশিল্লিবনি।
ইকাই খুম্নরবা স্পীকরজী,
ঙসি লৈরিবা য়ুনিকোর্নশিং অসিগী মনুংদগী খরা অমদি মলতিনেস্নেল কম্পেনী ওইবগী মতিক লৈ। অদুবু কংগ্রেসকী মনুংদা মীওই খরা লৈ, মখোয়না ঐখোয়গী ওন্তোপ্রিনরশিংগী মরমদা ঙাংবদু তাবদা য়াম্না অঙকপা ফাওগনি। মখোয়না ঐখোয়গী ওন্তোপ্রিনরশিংবু কোরোনা ভাইরসকী ভেরিএন্তনি হায়রি। মখোয় অসিবু কোরোনা ভাইরসকী ভেরিএন্তনি হায়রিবসিবু করিনোবা? ঐহাক্না হায়রিবসি করিনো, কনাগীদমক্তা হায়রিবনো? অদোমগী মরমক্তা ফম্লিবা মীওই অমত্তনা মসিদা তৌরিবসি করিনো অমুক্তা হায়বীয়ু? পার্তীদা শোকএ, কংগ্রেস পার্তীদা শোকএ।
ইকাই খুম্নরবা স্পীকরজী,
পুৱারীদগী তমজদবা মীওইশিংদো, পুৱারীদা অদুমক মাঙখিবনি।
ইকাই খুম্নরবা স্পীকরজী,
ঐনা হায়রিবসিগী মরম লৈ, ৬০দগী ৮০ ফাওবগী দিকেদকী মতাংদনি, মখোয়গী মরু ওইবা মীওই খুদিংমক মতমসিগী মনুংদা চল্লি অমসুং মসিদা মখোয়না লৈবাকপু লুচিংবগী মতাংদনি। মতমসিদি কংগ্রেসকী মতম্নি, কংগ্রেসনা লৈঙাকপনি, মখোয়গা পুন্দুনা নুংঙাইবা কয়া ফংখিবশিংনা নেহরুজী অমসুং ইন্দিরাজীগী সরকারগী মরমদা করি হায়নৈ? মখোয়দি তাতা-বির্লাগী সরকারনি, মসিগী সরকার অসিদি তাতা-বির্লানা চলায়বনি। ৬০দগী ৮০ ফাওবগী দিকেদ অসিদা মসিমক হায়নরম্মিবনি, নেহরুগীদমক্তা অসুম্না হায়নরম্মিবনি, ইন্দিরাজীগীদমক্তা হায়নরম্মিবনি। অদুগা অদোম্না মখোয়গা পুনবদগী মখোয়গী হৈনবীসু অমুক লৌহৌরে। অদোমসু মখোয়গী ৱাঙাং ঙাংলে। অদোম্না লৈখা য়াম্না তারে হায়বসি ঐহাক্না উবা ফংলে, অদোম অসি পনচিং বেগ ওনখ্রে, অদুবু অদোমগী হৈনবীদি অদুমক হন্দ্রি। মখোয়না হাউস মনুংদা মসিগুম্বা ৱা ঙাংবগী মথৌনা লৈ, মপান্দবুদি অদুমক ঙাংলিবনি, তুমিন্না ঙৈহাক্তা লৈবা নত্তে। মখোয়না মেক ইন ইন্দিয়া হায়বসি কৈদৌনুংদা লৈরোই হায়, অদুগা মসিদা মখোয়না নুংঙাইবসু ফাওরে। ভারতকীদমক্তা অসিগুম্বা খনবা করম্না ঙম্লিবনো? মেক ইন ইন্দিয়া লৈরোই হায়না করম্না খল্লিবনো? ঐহাক্না মসিবু ওইথোকহনগনি হায়বসিদা অদোম্না নুংঙাইতবনি হায়বসি তসেংনা হাইয়ুদনা। লৈবাকপু করিগীদমক্তা চৈরিবনো? মেক ইন ইন্দিয়া লৈরোই হায়না লৈবাক্কী মাইয়োক্তা করিগীদমক্তা হায়রিবনো? মেক ইন ইন্দিয়াবু করেম্নখি। অদুবু, লৈবাক্কী নহারোলশিংগী পাঙ্গলনা, লৈবাক্কী ওন্তোপ্রিনরশিংনা থবক ওইনা পাংথোক্লে। করেম্নবগী হীরমদি অদোম্না ওইহৌরে। মেক ইন ইন্দিয়ানা মায় পাকপদা অদোমগী মফমদা কয়া য়াম্না নুংঙাইতবা ফাওই হায়বা ঐহাক্না ফজনা খঙলিবনি।
ইকাই খুম্নরবা স্পীকরজী,
মীওই খরনা মেক ইন ইন্দিয়াদা মীওই খরনা য়ানীংদ্রিবসি ঐহাক্না খঙই। মেক ইন ইন্দিয়া হায়বদি কম্মিসন লৈহন্দবা, শেঞ্জা থুমজাগী লম্বী ককপা, মশাগী শেনগাও থন্নবা হোৎনবগী থৌওং লোইশিনবা হায়বনি। মরম অদুনা মেক ইন ইন্দিয়াগী মাইয়োক্তা লৈয়ু। ভারতকী মীয়ামগী নুংঙাই য়াইফবগীদমক্তা খন্দবগী পাপ, লৈবাক অসিগী অপীকপা ওন্তোপ্রিনরশিংবু উশিত্তবা, লৈবাক্কী নহাবু উশিত্তবা, লৈবাক্কী ইন্নোভেসনগী মতিকপু উশিত্তবনি।
ইকাই খুম্নরবা স্পীকরজী,
অসিগুম্বা অফবা খনবা ঙমদবগী মওং, লৈবাক অসিদা অৱাবগী ফিভম লৈহনবা অসিনা মশাবুসু ৱাগনি, নুংঙাইবা ঙম্লোই। মরম অদুনা, লৈবাকপু মমায় পাকহন্দনবা হোৎনরিবশিংগী মাইয়োক্তা ঙসিদি লৈবাক্কী নহারোলশিংনা মিৎকপ থোক্লে। মখোয়না লোয়না খঙলে।
ইকাই খুম্নরবা স্পীকরজী,
মমাংগী সরকার পায়রম্বশিংনা লৈবাকপু চহি ৫০ পায়রমখি। মেক ইন ইন্দিয়াগী মতাংদা মখোয়গী করি ৱাখল্লোন লৈ? দিফেন্স সেক্তর খক্তবু য়েংবদা ঐখোয়না হীরম খুদিংমক খঙবা ঙম্মি। মখোয়না করি তৌই, করিগীদমক্তা তৌই অমসুং কনাগীদমক্তা তৌবগে হায়বা নীংথিনা উবা ঙম্মি। মমাংগী চহিশিংদা অনৌবা খুৎলায় লৈনবা হোৎনদুনা লাকই। চহি কায়দগী হোৎনদুনা লাকই। অদুগা লৈরগে হায়না ৱারেপ লৌবা মতমদদি পোত্থোকশিং অদু লিরম্লে। মসিদা লৈবাক্কী করি কান্নবনো অমুক্তা হায়বীয়ু। মতমগা চুনদবা ওইরে, অদুগা ঐখোয়না মদুগী শেল অমুক পীরিবনি। ঐখোয়না অসিগুম্বা থৌওং কয়াবু লাইথোকহল্লে। চহি কয়াদগী পন্দুনা লাক্লবা দিফেন্সকী শিংনবশিংবু ঐখোয়না লোইশিন্নবা হোৎনরি। ঐখোয়না মমাংগী মতমদা, মতমগা চুনবা অনৌবা প্লেৎফোর্মগীদমক্তা অতোপ্পা লৈবাক্কী মখা পোল্লম্মি। তঙাই ফদবা লৈরবনিনা, হাথু হাথু তৌদুনা লৈরে। মসিসু পুরকউ, মদুসু পুরকউ। কনামত্তনা করিসু হংদে, অদুম লৈরে। স্পেয়র পার্ত ফাওবগীসু মীরম লৈবাক্কী মখা পোল্লম্মি। মীরমগী মখা পোল্লগা লৈবাক অসিনা তেক্ত কায়দনা লৈগদৌবা নত্তে। ঐখোয়গী ওইবা তোপ তোপ্পা খুদোংচাবা লৈফম থোকই, ইশাগী ওইবা খুদোংচাবা লৈফম থোকই। দিফেন্স সেক্তরদা মরোমদোম লেপচবা ঙম্বা হায়বসি লৈবাক্কী ওইনা য়াম্না অচৌবা থবক অমনি। নহারোলশিংনা মশাগী কেরিয়র ওইনা সেক্তর অসিবু খল্লু হায়না ঐহাক্না ঙসি হায়জনীংই। ঐখোয়না পাঙ্গল লৈনা লেপ্পা ঙমগনি।
ইকাই খুম্নরবা স্পীকরজী,
হন্দক্কী বজেৎ অসিদসু, ঐখোয়না ভারত্তা দিফেন্সকী পোত্থোক কয়া শাগনি। ভারতকী কম্পেনীশিং খক্তগী লৈগনি হায়না বজেত্তসু পল্লিবনি। মীরমদগী পুশিল্লকপগী লম্বী কক্নবা ঐখোয়না থৌরাং য়াৎলি। ঐখোয়গী লান্মীশিংগী তঙাই ফদবশিং পীবগী মহুত্তা দিফেন্সকী পোত্থোক কয়া এক্সপোর্ত তৌনবা পান্দমসু ঐখোয়না থম্লি। ৱারেপ অসি ঐখোয়না পাংথোকপা ঙমগনি হায়না থাজবসু থম্মি। দিফেন্সকী দীলদা, মমাংগী মতমদা, অঙম্বা কয়ানা অফবা পোত্থোক কয়া লৈরম্মি হায়বা ঐহাক্না খঙই। হৌজিক্তি, মোদীনা মসিবু শিংনরি। মরম অদুনা, মোদীদা শাওবা হায়বসিদি মহৌশানি। অদুগা মখোয়গী অশাওবসি অদুমসু উৎলিবনি।
ইকাই খুম্নরবা স্পীকরজী,
ওপোজিসনগী মরুপ খরনা পোৎ তাঙবগী মতাংদসু ৱাফম পুখৎলকখি। কংগ্রেসনা লুচিংবা য়ু.পি.এ.গী সরকার লৈরিঙৈদা অদোম্না মসিগী মতাংদা খল্লম্লবদি লৈবাক্কীসু কান্নবা ওইরমগনি। মসিগী অৱাবসি মতমদুদসু লৈফম থোকপনি। অদোম্না কাওরবা মাল্লে, ঐহাক্না অমুক্তা নীংশিংজগে। কংগ্রেস সরকারগী অকোনবা চহি মঙাদা, অয়াম্বা মতমদা দবল দিজিৎকী চাংদা পোৎ তাঙবগী অৱাবা কয়া মাইয়োক্নখি। ঐখোয়না লাক্ত্রিঙৈদা মসিগুম্বা ফিভম লৈরম্মি। কংগ্রেসকী থৌওংদি অসুম্না তৌরম্মি মদুদি মখোয় মশাগী সরকার ফাওবনা হীরম অসিদি মখোয়গী তৌবা ঙম্বগী ৱাংমদা লৈরে হায়না ফাওবা খল্লম্মি। ইং ২০১১দা মতমদুগী শেল-থুম মন্ত্রীনা য়াম্না ইকায়বা খঙদনা লৈবাক মীয়ামদা পোৎ তাঙলিবা অসি অলাদিনগী মেজিক্কী থাউমৈনা হন্থহল্লকনি হায়বা খল্লনু ফাওবা হায়খ্রবনি। মসি অদোমগী নেতাশিংগী মায়থীবনি। শেন্মিৎলোনগী মতাংদা পাউ চেদা ৱারোল কয়া ইরিবা ঐখোয়গী চিদম্বরমজীনা সরকারদা লৈরিঙৈদা করি হায়বগে, মতমদুগী নেতাশিংনা করি হায়বগে। মখোয়না ইং ২০১২দা অসুম্না হায়খি, লুপা ১৫ পীবা ঈশিংগী বোতল অমসুং লুপা ২০ পীবা আইসক্রীম লৈবদদি মীয়াম্না করিমত্তা খন্দে, চেঙ-গেহুগী মমল খরা হেনগৎপদনা খাঙবা ঙমদে। অসিগুম্বা লৈবাক্কী থৌদাং খঙদবা ৱারোল অসি অদোমগী নেতাগী ৱাফম্নি। মসিদি য়াম্না পাখৎনীংঙাইনি।
ইকাই খুম্নরবা স্পীকরজী,
পোৎ তাঙবা হায়বসি মীচম মীয়ামগা হকথেংননা মরী লৈনবা হীরম অমনি। অদুগা ঐখোয়গী সরকার, এন.দি.এ. সরকারনা অহানবা নুমিত্তগী মিৎকুপ নাহুম শিংনা লৈদুনা অমসুং মীয়ামগী অপাম্বা খঙদুনা হীরম অসিবু য়াম্না কুপ্না নৈনদুনা ৱারোইশিন পুথোক্না হোৎনখিবনি। মরম অদুনা, ঐখোয়গী সরকারনা পোৎ তাঙবা লাকশিনবগী ৱাফম্বু শেল থুমগী পোলিসীগী মরু ওইবা পান্দম ওইনা থম্লি।
ইকাই খুম্নরবা স্পীকরজী,
চহি ১০০গী মনুংদা থোকপা চাউরবা লাইচৎ অসিগী মনুংদসু পোৎ তাঙবগী চাং অমসুং তঙাই ফদনা চঙবা পোৎলমশিংগী মমলনা অতিয়া য়ৌনা ৱাংবা থিংনবা কন্না হোৎনদুনা লাকখি। ইকাই খুম্নরবা স্পীকরজী, মীচম মীয়ামগী ওইনা, মরু ওইনা লাইরবশিংগীদমক্তা, তঙাই ফদবা পোৎলমশিংগী মমলনা অতিয়া য়ৌদনবা, মসিনা লাক্ন-ফানবা ঙম্বগী ৱাংমদা চৎখকিদনবা, পোৎ-চৈ মমল কা হেন্না হেনগৎপগী থৌওংবু লাকশিন্নবা ঐখোয়না কয়া য়াম্না হোৎনখি হায়বসিদি ফিগরশিংনা তাক্লি। পোৎ তাঙবগী চাংনা কংগ্রেসকী মতমদা ইং ২০১৪দা ১০%গী চাং য়ৌদুনা দবল দিজিৎ য়ৌরম্বা মতমদা, মসিনা ২০১৪দগী ২০২০ ফাওবগী মনুংদা ৫%কী চাংদগী হেন্না তাথখি। কোরোনা লৈজরবসু, হন্দক্কী চহিসিদা মসিগী চাংনা ৫.২% ওইখি অমসুং মসিদসু ফুদ ইনফ্লেসনগী চাংনা ৩%দগী হেন্না তানা লৈখি। অদোমগী মতমগী মালেমগী ইরাংদা তাইশিন্নদুনা অদোম্না নান্থোকখি। নেহরুজীনা শক্তি পাইরিঙৈদা অসিগুম্বা পোৎ তাঙবগী মতাংদা লাল কিলাদগী করি হায়খিবগে হায়বদু ঐহাক্না অদোমগী মফমদা অমুক্তং থমজনীংই। লৈবাক্কী অহানবা প্রধান মন্ত্রী, পন্দিৎ নেহরুনা লাক কিলাদগী করি হায়খিবগে। অদোম্না ঐহাক্না পন্দিৎ নেহরুগী মমিং পনবসি পাম্লম্লোই। অদুবু, ঐহাক্না হঞ্জিন-হঞ্জিন্না হায়গনি। ঙসিদি, নেহরুজী খক্তনি। ঙসিদি নুংঙাইবীয়ু। অদোমগী নেতানা য়াম্না নুংঙাইরে হায়গদোইনে।
ইকাই খুম্নরবা স্পীকরজী,
পন্দিৎ নেহরুনা লাল কিলাদগী গ্লোবেলাইজেসন য়াম্না লৈতবা মতমদুদা হায়খিবনি। মতমদুদা গ্লোবেলাইজেসন হায়বসি মমিংদা ফাওবা লৈরম্বা নত্তে। নেহরুজীনা লাল কিলাবু লৈবাক মীয়ামদা খুৎশিন্নরদুনা করিগুম্বা মতমদা কোরিয়দা শোক্নরিবা লান্না ঐখোয়দা ইথিল পী হায়না হায়খিবনি। মসিনা মরম ওইরগা পোৎ চৈগী মমল হেনগৎলেয়ে। মসিনি নেহরুজী, ভারতকী অহানবা প্রধান মন্ত্রী হায়রিবসে। কোরিয়াগী লান্না করিগুম্বা মতমদা ঐখোয়গী লৈবাক্তা অকায়বা পী হায়রিয়ে। মসিনা মরম ওইরগা পোৎ চৈগী মমল হেনগৎলিবনেয়ে অদুগা ঐখোয়না লাকশিনবগী ৱাংমদা য়ৌখিবনি হায়রিয়ে। লৈবাক্কী অহানবা প্রধান মন্ত্রীনা লৈবাক মীয়াম মাঙদা মখুৎ থাংগৎখ্রে। ঙম্লরোই হায়খ্রে। মখা তানা করি হায়খি, অদোমগী কান্নবনি তাবীয়ু। অমেরিকাদা করিগুম্বা অমা থোকপদসু, লৈবাক অসিগী পোৎ চৈগী মমলদা ইথিল ফংঙি হায়রি। অমুক্তা খন্থবীয়ু, পোৎ তাঙবগী শিংনবা অসি অদুক্কী মতিক মতমদুদা লুখ্রে, নেহরুজী ফাওবা লাল কিলাদা মখুৎ থাংগৎখ্রে। অদুগা ৱাফম অসি হায়খিবনি।
ইকাই খুম্নরবা স্পীকরজী,
ঙসিসু কংগ্রেসনা লৈবাক্কী সরকার পায়রম্লবদি, লৈবাক্কী মরাইবক অসি মসিমক ওইরমগনি। লৈবাক অসি হৌজিক্তি কলহৌরে। অদোম্না সরকার পায়রম্লবদি, পোৎ তাঙবসিবু কোরোনাদা তাইশিন্নরগা অদুম নান্থোকখ্রগনি। অদুবু, ঐখোয়না মীয়ামগী অপাম্ববু নীংথিনা খন্দুনা হীরম অসিগী মরু ওইববু খঙদুনা, মসিগী ৱারোইশিন পুরক্নবগীদমক্তা অঙম্বা পাঙ্গলগা লোয়ননা থবক তৌরি। ঙসিগী মালেমসিদা অমেরিকা অমসুং ও.ই.সি.দি. লৈবাকশিংদা পোৎ তাঙবগী চাং অসি ৭% ওইরিবনি, চাউরাক্না ৭%। অদুবু স্পীকরজী, ঐখোয়দা অতোপ্পদা মরাল শিরগা চেনখিগদবা মীওই নত্তে। ঐখোয়দি ইথৌদাং খঙনা অমসুং পুকশেল শেংনা হোৎনদুনা লৈবাক মীয়ামগা পুন্না লেপমিন্নবা মীওইশিংনি।
ইকাই খুম্নরবা স্পীকরজী,
ঙসিগী হাউস অসিদা লাইরবা মুত্থৎনবা হোৎনবগী মতাংদা মশিং কয়া অমা পীনখ্রে অদুবু করিগুম্বা অমদি কাওবগুম্লে। লৈবাক অসিগী লাইরবশিং অসি তৌবীমল খঙদবদি নত্তে। সরকারনা মখোয়গীদমক্তা হোৎনবীরগা সরকার অদুমকপু সরকারদগী ইন্থুগদবা মীওইদি নত্তে। মসি ঐখোয়গী লাইরবশিংগী ৱাখল্লোন্দা য়াওদে। অদোম্না ঙসিগী নুমিৎ উবা ফংলিবা অসিদি অদোম্না লাইরবশিংবু খুদুম মনুংদা লাকশিন্দুনা থমগনি খনবদুননি। অদুবু লাইরবশিং হৌজিক্তি মিকপ থোক্লে, লাইরবশিংনা অদোম্বু মশক খঙলে। হৌজিক্কানগী লাইরবশিংসে য়াম্না খঙলবনি, অদুনবু মখোয়না অদোম্বু সিৎ ৪৪ খক্তা ফংহল্লিবনি। সিৎ ৪৪দা অদুমক লেপহনখ্রবনি। কংগ্রেসনা ইং ১৯৭১দা লাইরবা মুত্থৎসি হায়বা খোল্লাও লাওদুনা মীখলদা মায় পাক্তুনা লাক্লি। চহি ৪০গী মনুংদা ফাওবা লাইরবা মুত্ত্রে, অদুবু কংগ্রেস সরকারনা অনৌবা ৱাহন্থোক ওইনা পীরে।
ইকাই খুম্নরবা স্পীকরজী,
স্পীকরজী, লৈবাক্কী নহারোলশিংনা অসিগুম্বা ৱাফমশিং খঙবগী মথৌ য়াম্না তাই। মখোয়না চরাংনবা হৌরক্লবদি, মখোয়গী অশোকপদু য়াম্না লুরে হায়বা তাক্লবনি। মখোয় অসি অৱাবদা তারে হায়বা মখোয়না খঙই। মীওই খরনা তৌশিন্নরগা চেনখি, অদুগা অৱাবনা মখোয়না নংহৌই।
ইকাই খুম্নরবা স্পীকরজী,
চহি ৪০গী মতুংদা লাইরবদি হন্দ্রে, অদুবু লাইরবশিংবুদি কংগ্রেসনা তান্থোকপীরে। কংগ্রেসনা করি তৌই, ইকাই খুম্নরবা স্পীকরজী, কংগ্রেসনা লাইরবগী ৱাহন্থোক ওন্থোক্লে। ইং ২০১৩দা মখোয়না চেবাং অমদা করিগুম্বা খরা তৌদুনা, লৈবাক অসিগী লাইরবা করোর ১৭পু ইনাক খুলহনখ্রে। মসি করম্না ওইখি, মসিগী অচুম্বসি লৈবাক্কী নহারোলশিংনা খঙফম থোকই। ঐহাক্না অদোমগী মফমদা খুদম অমা থমজগে – ঐখোয়গী লৈবাক্কী রেলৱেদা ফর্স্ত ক্লাস, সেকন্দ ক্লাস অমসুং থর্দ ক্লাস লৈরম্মি অদোম্না খঙবীকো। থোঙগী হেক নাকন্দা সেকেন্দ ক্লাস্তা অনি ই, অদুগা থর্দ ক্লাস্তনা অহুম ই। মসিগী থর্দ ক্লাসকী ৱারোল অসি ফজদে হায়দুনা মখোয়না মসিবু লৌথোকখি। মসি মখোয়গী থৌওংনি অমসুং মখোয়না লাইরবা লৈত্রে হায়না খল্লি। মখোয়না অখঙবা খুদিংমক লৌথোকখ্রে অদুগা করোর ১৭পু মশিং থীবা য়াওররোই হায়খি। মতৌ অসুম্না মখীয়না মশিং মায় পাক্না শেমদোকখি।
ইকাই খুম্নরবা স্পীকরজী,
মখোয়না মফমসিদা তোঙানবা হীরম খরা পুথোক্নবা হোৎনরি। ঐহাক্না মসি করিগীনো খঙনবা য়াম্না কন্না হোৎনরি। মসিবু খঙবা মী য়াওবরা খঙদে, অদুবু ঐহাক্না অসিগুম্বা মীওই অমা ফাওবদি থেংনদ্রি। অদুবু মসিবু খঙবা মীওইশিংনা ঐঙোন্দা তাকপীদুনা ঐহাকসু খঙনবা শেম শারি। হায়বীরকউ। ইকাই খুম্নরবা স্পীকরজী, হাউস অসিদা লৈবাক্কী মতাংদা ৱারী শারি। মসিগী ৱাফম অসি য়াম্না ঙক্নীংঙাইনি। ঐহাক্না ৱাফম অমা ফোংদোক্ত্রিঙৈদা করিগুম্বা অমা হায়জগে। মসি ঐহাক্না কোৎ তৌজগে।
“বঙ্গালী, মরাথী, গুজরাতী, তমিল, আন্ধ্র, ওরিয়া, অসামী, কন্নর, মলায়লী, সিন্ধী, পঞ্জাবী, পথান, কশ্মিরী, রাজপুত অমসুং হিন্দুস্তানী লোল লোনবা মীয়াম কয়া অসিনা তোঙান-তোঙানবা মফম কন্দুনা লৈবসি য়াম্না ঙক্নীংঙাইনি। মখোয়না য়াম্লবা চহি কয়াগী মনুংদা মশাগী শক্তাকসু শেম্লি। অদু ওইরবসু, মখোয়গী অফবা অমসুং ফত্তবশিং অসি অমত্তা ওইনা মান্নৈ। মসিগী ই-পাউ অসি অরিবা লাইরিকশিংদগী খঙবা ঙম্মি। মখোয়না শাংলবা মতমসিদা ভারত মচা ওইনা হিংদুনা লাকখি অমসুং ভারতকী অমত্তা ওইবা ৱাখল্লোন চেন্দুনা লাকখি”।
স্পীকরজী,
ভারতমচাশিং অসিগী তোঙানবা মগুনবু তাক্লদুনা হায়রিবা কোতেসন অসিদা ৱাহৈ অনিদি মিৎয়েং চঙফম থোকই - ‘লৈবাক্কী অরিবা লাইরিকশিং’ অমসুং মসি নেহরুজীনা হায়রম্বনি। ৱাফম অসি নেহরুজীনা ‘ভারত এক খোজ’ হায়বা মহাক্কী লাইরিক অদুদা ইরম্বনি। ঐখোয়গী লৈবাক্কী হেরিতেজ অসি অমখক্তনি। ঐখোয়গী মওং-মতৌ অমসুং ৱাখল খনবগী থৌওং অমত্তনি। লৈবাক লৈত্রগবু মসি লৈগদরা। ঐখোয়গী সংবিধান্দা ‘রাস্ত্র’ হায়বা ৱাহৈ য়াওদে হায়দুনা হাউস অসিবু উশিত্ত্রবনি। ঐখোয়গী সংবিধানগী প্রিএম্বলদা ইরিবা ‘রাস্ত্র’ হায়বসিবু পাদ্রবদি, মসি কমদৌনা লৈগনি। কংগ্রেসনা অসুম্না তৌরিবা করিগীনো? ঐহাক্না মসিগী মতাংদা শন্দোক্না তাক্কনি।
ইকাই খুম্নরবা স্পীকরজী,
‘রাস্ত্র’ হায়বসি সরকারগী শক্তি নত্ত্রগা পথাপ অমা নত্তে। ইকাই খুম্নরবা স্পীকরজী, ঐখোয়গী ওইনদি ‘রাস্ত্র’ হায়বসি পুন্সিগী থৱাইনি। লৈবাক মীয়াম্না চহি লিশিং কয়াদগী মসিগা মরী লৈনদুনা লাক্লি অমসুং লৈনদুনা লৈগনি। ঐখোয়গী মফমসিগী বিষ্ণু পুরানশিংদা হায়রম্বনি, পার্তীগী মীওই অমত্তনা ইরম্বা নত্তে। বিষ্ণু পুরান্দা অসুম্না হায়রম্মি-
উত্তরম য়শ সমৃদক্সয় হিমাৱরে চরু দক্সিনম
বর্সতত ভারতম নাম ভারত য়ত্র সন্তিত
মসিনা হায়বদি, সমুদ্রগী অৱাংদা অমসুং হিমালয়গী খাদা লৈবা লৈবাক অদুবু ভারত কৌই অমসুং মহাক্কী মচাশিংবুনা ভারত মচা কৌই হায়বনি। বিষ্ণু পুরানগী শ্লোক অসি কংগ্রেসকী মীওইশিংনা য়ানীংদ্রবদি, ঐহাক্না কোৎ অমগা হায়নজীংই। মসিগী মরমদি, অদোম্না ৱাফম খরদা হৈনদবা ওইনগীনি। ঐহাক্না হায়রি, “পুঙফম অমা পুৱারীদা য়াম্না তাঙনা লাকই। ঐখোয়না অরিবদগী থোক্লক্তুনা অনৌবা অমদা খোঙদাবা মতমদা লাকই। য়ুগ অমা লোইদুনা অমসুং মতম কুইনদগী নমথদুনা লৈরুরবা লৈবাক মীয়াম্না মনীং তম্বা মতমদা লাকই”। মসিসু নেহরুজীনা হায়রম্বনি। নেহরুজীনা হায়রিবা অসিবু করম্বা লৈবাক্কী ৱারীনো।
ইকায় খুম্ননীংঙাই ওইরবা স্পীকরজী
মফমসিদা তমিলগী অনীঙবা অপাম্বশিংবু মৈ হৌহন্নবা কন্না হোৎনরি। কংগ্রেসকী রাজনিতীগী চৎনবীদি ঐখোয়না ব্রিতিশকী মতমদগী উবা ফংখ্রবনি, “থুয়াগয়রগা মপু ওইবা, খোয়দোক্নরগা মপু ওইবা”। অদুবু, ঙসিদি, ঐহাক্না তমিল লোলগী মহাকবী অমসুং নীংতম লান্মী, ইকায় খুম্ননীংঙাই ওইরবা সুব্রমনিয়ম ভারতীজীনা ইবীরম্বা ৱারোল খরা অমুক্কা হন্না হায়জবা পাম্মি। মসিদা অশোইবা য়াওরবসু ঙাকপীগনি। মহাক্না অসুম্না তাকপীরম্মি-
মনুম ইময়ে মলে য়েঙ্গল মলে, পনরুম উপনিক নুলেঙ্গল দুলে
পার্মিসে য়েদরু নিলইদ পোলে, পোনেরো ভারত নাদেঙ্গন নারে
পোদরু ওম ইতে ইম্মকিলেরে
মসিনা হায়বদি, ঐখোয়না ঐখোয়গী মায় পাকপগী মতাংদা পুন্না ঈশৈ শকমিন্নগনি, মসিনি ঐখোয়গী লৈবাক অমসুং মালেমসিদা ঐখোয়দগী হেনবা কনা লৈরি, মসিনি ভারত লৈবাক, ঐখোয়গী ভারত লৈবাক। মসিমক সুব্রমনিয়ম ভারতীজীগী শৈরেংগী ৱাহন্থোক। মসিমক মহাক্কী অপাম্বনি অমসুং মসিগীদমক্তা ঐহাক্না তমিল মীয়াম খুদিংগী মফমদা কোক নোঞ্জরি।
ঐখোয়গী সি.দি.এস. রাৱৎনা খাগী লমদমদা থোকখিবা হেলিকোপ্তর পোকখায়বগী থৌদোক অমদা লৈখিদবা অমসুং মহাক্কী হকচাংবু এয়রপোর্ত্তা পুরকপগী লম্বীদা লাকপদা ঐহাক্কী তমিল ইচিল ইনাও লাখ কয়ানা লম্বীদা পরেং পরেং লেপ্তুনা ঙাইরমখি। মখোয়না মহাক্কী হকচাংবু ঙাইনদুনা লৈরমখি অমসুং মহাক্কী হকচাংনা মখোয়গী মমাং ফাওদুনা চৎখিবা মতমদা তমিল মীয়াম্না চাউথোকচবগা লোয়ননা মখুৎ থাংগৎনরদুনা মমিত্তা পিরাং শিন্থরগা বীর মনক্কম, বীর মনক্কম লাওনখি। মসি ঐহাক্কী লৈবাক্নি। অদুবু অসিগুম্বা ৱাফম অসিবু কংগ্রেসনা মতম পুম্বদা পামখিদে। তোঙান্না খাইদোকপগী ৱাখল্লোন অসি মখোয়গী দি.এন.এ.দা চুখ্রবনি। ব্রিতিশতি হনখ্রে, অদুবু “খাইদোক্নরগা মপু ওইবা”গী থৌওংদি মখোয়না মশাগী লমচৎ ওইনা খনখ্রে। মরম অদুনা, ঙসিদি কংগ্রেস অসি মচেৎ মচেৎ তারবা গেংগী লুচিংবা ওইরে।
ইকাই খুম্নরবা স্পীকরজী,
ঐখোয়বু গনতন্ত্রগী থৌওংনা খাম্বা ঙমদ্রবনিনা, কাঙলম চাদবা থবক্না ঐখোয়বু খাম্নবা হোৎনরি। অদুবু, মসিদসু মখোয়না কৈদৌনুংদা মায় পাক্লোই।
ইকাই খুম্নরবা স্পীকরজী,
অদোমগী গেম প্লান ওইনীংবা অমা হেক্তা ওইসনু, ইকাই খুম্নরবা স্পীকরজী, অসিগুম্বা মীওই কয়া লাকখ্রে অমসুং চৎখ্রে। মশাগী কান্নবা কয়া হোৎনখিবা ঙাক্তনি, অদুবু লৈবাক অসিদি ওমোরনি, মসিদা করিমত্তনা অকায়বা পীবা ঙম্লোই। অসুম্না হোৎনখিবা অমসুং হোৎনগে খন্না থোক্লকপশিংনা মাঙজগদবতনি। লৈবাক অসি অমত্তা ওইরম্মি, অমত্তা ওইরি অমসুং অমত্তা ওইনা অদুমক লৈগনি। মসিগী থাজবা অসিগা লোয়ননা ঐখোয়না তুং লমচৎকীদমক্তা চৎকদবনি।
ইকাই খুম্নরবা স্পীকরজী,
মফমসিদদি, ইশাগী থৌদাংগী ৱারী শাবদসু নুংঙাইতবা ফাওনরে। লৈবাক্কী প্রধান মন্ত্রীনা ইশাগী থৌদাংগী ৱারী শাই হায়না ঙাংনবসু য়াওরি। ইশাগী থৌদাংগী ৱারীনি শারিবসি। ফত্তবা নত্ত্রগা চয়েৎনবা ৱাফম হৌদোক্লগা নখোয়না মীয়ামগী মিৎয়েংদা লৈনবা হোৎনরি। ইশাগী থৌদাংগী ৱারীনা কংগ্রেস্তা হৌজিক নুংঙাইহন্দ্রিবা অসিদা ঐহাক্তি অঙকপা ফাওরিবনি।
ইকাই খুম্নরবা স্পীকরজী,
মোদীজীনা নেহরুগী মমিং শিজিন্নদে হায়না অদোম্না হায়বদো, ঙসিদি অদোমগী অপাম্বা থুংহল্লগে, অদোমগী অরাম খৌরাংবা কোকহল্লগে। ইশাগী থৌদাংগী মতাংদা নেহরুজীনা করি হায়রম্বগে হায়বদু ঐহাক্না অমুক্তা পাউদমজগে।
ইকাই খুম্নরবা স্পীকরজী,
লৈবাক্কী অহানবা প্রধান মন্ত্রী, পন্দিৎ নেহরুজীনা অসুম্না হায়রম্মি, “মনীংতম্বা ভারতনি হায়না ঐহাক্না অদোমগী মফমদা অমুক্কা হন্না হায়রি। নীংতম্বা ভারতকী মপোক কুমওন ঐখোয়না পাংথোক্লি, অদুবু নীংতম্বগী লোয়ননা ইশাগী থৌদাং খঙবগী মথৌ তাই অমসুং ইশাগী থৌদাং হায়বদি ইশাগী তৌফম থোকপা ইথৌ হায়বনি”। মসিবু অদোম্না খঙনীংলবদি, ঐহাক তাকচগে। ইশাগী থৌদাংবু অতোপ্পা ৱাহৈদা ইশাগী ইথৌ হায়বনি। মসি নেহরুনা হায়বীরম্বনি। মহাক্না হায়রম্বা চপ চানা অমুল হায়জগে, “মনীংতম্বা ভারতনি হায়না ঐহাক্না অদোমগী মফমদা অমুক্কা হন্না হায়রি। নীংতম্বা ভারতকী মপোক কুমওন ঐখোয়না পাংথোক্লি, অদুবু নীংতম্বগী লোয়ননা ইশাগী থৌদাং খঙবগী মথৌ তাই। থৌদাং, ইশাগী ইথৌ অসি সরকার খক্তগী নত্তে, মনীংতম্বা মীওই খুদিংগীনি। অদুগা, নখোয়না মসি খঙদবা তারবা, অদু ওইরবদি অদোম্না নীংতম্বগী মগুন ঙাক্ত্রে অমসুং অদোম্না নীংতম্ববু কনবা ঙম্লরোই”। মসিমক লৈবাক্কী অহানবা প্রধান মন্ত্রীনা থৌদাংগী মতাংদা হায়রম্বনি, অদুবু অদোম্না মসি কাওরে।
ইকাই খুম্নরবা স্পীকরজী,
ঐহাক্না হাউসকী মতম য়াম্না লৌবা পামজদে, মখোয় অসি ৱারে। ইকাই খুম্নরবা স্পীকরজী, ঐখোয়গী মফমসিদা হায়নবা অমা লৈ -
শন্সঃ কনশঃ শ্রৈৱ বিদ্যামর্থ চ সাধয়েৎ।
শনে নস্তে কৃতো বিদ্যা কনে নস্তে কৃতো ধনম।।
মসিনা হায়বদি, বিদ্যা হায়বসি লৌশিংগীদমক্তদি মিৎকুপ খুদিংমক মমল য়াম্মি। লন-থুমগী রিসোর্সকীদমক্তা পোৎলম খুদিংগী মথৌ তাই। মতম মাঙহল্লবা লৌশিং তানগদবা নত্তে, মতম কয়া অমা মাঙহনখ্রবা, অপীকপা রিসোর্স অমবু নীংথিনা শিজিন্নদ্রবা, অদু ওইরবদি রিসোর্স খুদিংমক অরেম্বা তাগনি। ঐহাক্না কংগ্রেস অমসুং মখোয়গী শৌগৎপশিংগী মফমদা হায়নীংবদি, অদোম্না পুৱারী ওইরবা অসিগুম্বা মতম অসিবু মাঙহল্লবরা হায়না অদোম মশেল মরক্তা অমুক্তা মুন্না খন্থবীয়ু। ঐহাক্কী ইফমদা চৈনবা, ঐহাকপু চাং তাহন্নবা, ঐহাক্কী দলবু মমায় থীনবা অদোম্না পাংথোকপা য়াবা য়াম্না লৈ। তুংদসু অদুম হোৎনবীয়ু, খুদোংচাবা অমত্তা ৱাৎলোই। অদুবু, নীংতম্বগী অমৃত মতম অসিদি, চহি ৭৫গী মতম অসিদি ভারতকী চাউখৎ-থৌরাংগীদমক্তা কত্থোক্কদবা মতম্নি। ঐহাক্না মফমসিদা ফম্লিবা ওপীজিসনগী মরুপ খুদিংমক্তা অমসুং হাউস অসিগী খুত্থাংদগী লৈবাক মীয়াম খুদিংদা অমৃত মহোৎসবকী মতম অসিদা হায়জরি, অদোম পুম্নমক শরুক য়াবীদুনা নীংতম্বগী অসিগুম্বা অমৃতকী মতম অসিবু অনৌবা ৱারেপ অমগা লোয়ননা মরোমদোম লেপচবা ঙম্বা ভারত অমগী মাইকৈদা অমত্তা ওইনা চঙশিনমিন্নরসি। মমাংগী চহি ৭৫দা ৱাৎহৌবশিংবু মেনখৎনবা অমসুং লাক্কদৌরিবা ইং ২০৪৭কী চহি চা অসিবু শেমদ্রিঙৈদা, লৈবাক অসিবু শেমদুনা অনৌবা ৱারেপকা লোয়ননা পুদুনা চৎনবা হোৎনসি। লৈবাক্কী চাউখৎনবগীদমক্তা ঐখোয় পুন্না থবক তৌমিন্নগদবনি। রাজনিতীনা মশাগী মফমদা, ঐখোয়গী দলগী ৱাখল্লোন্দগী লৈবাক্কী ৱাখল্লোনা হেন্না ৱাংনা থমদুনা চৎসি। মীখলগী ফম্বাক্তা তৌগদবশিং তৌবীয়ু, অদুবু লৈবাক্কী খন্দুনা মাং থানা থোকপীরকউ। ঐহাক্না মসিগী থাজবা থম্মি। নীংতম্বগী চহি ১০০ ফাবা মতমদা, হাউস্তসু অসুম্না মীয়াম কয়া অমা ফমগনি, মপাঙ্গল লৈবা য়ুম্বী অমগা লোয়ননা অসুক য়াম্না নুংঙাই য়াইফরবা থাক অমদা য়ৌহল্লকখিবা চহি কয়াগী খোঙচৎকী মতাংদা মখোয়না শোইদনা খন্নগনি অমসুং মখোয়না মদুবু মখা তানা অমুক পুদুনা চৎপগী ৱাখল লৈগনি। ঐখোয়না ফংলিবা মতম অসিবু মতৌ করম্না মশক নাইহনগদগে হায়না ঐখোয়না খনগদবনি। ঐখোয়গী ভারতকী সনাগী য়ুগ অমা শেম্নবা ঐখোয়না খঞ্জানবা তৌররোইসি। মীয়াম পুন্না মসিগীদমক্তা অমুক্তা হোৎনমিন্নসি।
ইকাই খুম্নরবা স্পীকরজী,
ঐহাক্না রাস্ত্রপতিগী ৱারোলগী মোসন ওফ থেঙ্কসপু অমুক্কা হন্না শৌগৎলি। অদুগা হাউস অসিদা ৱারী শাবদা য়াওরিবা ইকায় খুম্ননীংঙাই ওইরবা পার্লিয়ামেন্তরিয়ন খুদিংবুসু অমুক্কা হন্না থাগৎপা ফোংদোক্লদুনা, অৱাই অখুম কয়া তৌনখ্রবসু অদোম্না হীরম কয়াগী মতাংদা কুপথনা ৱা ঙাংবগী খুদোংচাবা পীবগীদমক্তা অমুক্কা হন্না থাগৎচরি। মীয়াম্বু হন্না হন্না থাগৎচরি।
