থৌরম অসিদা শরুক য়াবীরিবা ঐহাক্কী কেবিনেৎকী খোঙলোই, নির্মলা সিতারামনজী, পিয়ুশ গোয়লজী, দাঃ হর্শ বর্ধনজী, প্রিন্সিপল সাইন্তিফিক এদভাইজর, বিজয় রাঘবনজী, সি.এস.আই.আর.গী দাইরেক্তর জেনেরেল মন্দেজী, সাইন্তিস্ত, ইন্দস্ত্রী অমসুং এজুকেসন সেক্তরগী ইকায় খুম্নরবা মীওইশিং অমসুং মরুপশিং!
ঙসিগী সি.এস.আই.আর.গী মরু ওইরবা মীফম অসি অচৌবা ইরাং মরক্তা পাংথোক্লি। কোরোনাগী তমথীরবা লাইচৎ অসিনা হন্দক্কী চহি-চা অসিগী মালেমগী খ্বাইদগী চাওবা শিংনবা অমা ওইরি। অদুবু মীওইবা খুন্নাইগী অচৌবা শিংনবা কয়া লৈখিবা মতমদা, সাইন্সনা অফবা তুংগী লম্বী শেমখি হায়বা অসিদি পুৱারীনা খুদম ওইরি। শিংনবশিংগী মরক্তা ৱারোইশিন অমসুং ওইথোকপা য়াবা থৌওং থীদোকপা অমসুং অনৌবা পাঙ্গল লৈহনবা অসিদি সাইন্সকী মহৌশাগী তৌফম থোকপা থৌওংনি। থৌওং অসিমক মালেম অমসুং ভারতকী সাইন্তিস্তশিংনা তৌদুনা লাক্লি অমসুং ঙসিদি, থবকশিং অসি অমুক্কা হন্না পাংথোক্লি। ৱাখল্লোন অমবু থীওরীদা ওন্থোকপা, লেব মনুংদা মসিবু থবক ওইনা চাংয়েং তৌবা অমসুং মদুবু থবক ওইনা পাংথোক্তুনা খুন্নাইদা শিন্নবগী থবকশিং অসিবু ঐখোয়গী সাইন্তিস্তশিংনা হৌখিবা চহি অমা মখায়দগী পাক-চাউনা অমসুং খোঙজেল য়াঙনা পাংথোক্লিবা মওং অসি য়াম্না থাগৎনীংঙাইনি। মীওইবা খুন্নাইবু অশুক য়াম্না চাউরবা শিংনবা অসিদগী কনবা ঙম্নবগীদমক্তা, চহি অমগী মনুংদা ভেক্সিন শাদুনা মীয়ামদা শিন্নবগী চাওরবা থবক অসি পুৱারীদা অহানবা ওইনা পাংথোকপা ওইরমগনি। মমাংগী চহি-চা কয়াদা থেংনখিবদি, অতোপ্পা লৈবাকশিংনা অনৌবা কয়া পুথোকপনি অমসুং ভারতনা মদুগীদমক্তা চহি কয়া ঙাইখিবনি। অদুবু, ঙসিদি, ঐখোয়গী লৈবাক্কী সাইন্তিস্তশিংনা অতোপ্পা লৈবাক্কা মান্ননা অমসুং তেংবাংনদুনা মীওইবা খুন্নাইগী তেংবাংনবা হোৎনরি অমসুং খোঙজেল য়াঙনা হোৎনরি। ঐখোয়গী সাইন্তিস্তশিংনা চহি অমদা “ভারত্তা শাবা কোরোনাগী ভেক্সিন” শারে অমসুং লৈবাক মীয়াম খুদিংদসু ফংহল্লে। ঐখোয়গী সাইন্তিস্তশিংনা চহি অমগী মনুংদা কোবিদ তেস্তিং কিৎ অমসুং তঙাই ফদবা খুৎলায়শিং শেম-শাদুনা লৈবাকপু মরোমদোম লেপচবা ঙমহল্লে। ঐখোয়গী সাইন্তিস্তশিংনা অশুক য়াম্না তেল্লবা মতমদা কোরাগী মাইয়োক্তা লান্থেংনবা ঙম্নবগীদমক্তা অনৌবা কান্নবা হিদাক কয়া পুথোক্লি, ওক্সীজেন শুংববু হেন্না থুগৎহন্নবা লম্বী থিদোকখি। অদোমগী অসিগুম্বা থবকশিং অসিনা লৈবাক অসিবু মহৌশাগা মান্নদবা ইরাং অসিগা লান্থেংনবা ঙমহল্লি। মরক অসিদা, সি.এস.আই.আর.গী সাইন্তিস্তশিংনা তোঙান-তোঙানবা সেক্তরশিংদা কান্নরবা থবক কয়া পাংথোকখি। ঐহাক্না অদোম খুদিংমক, সাইন্তিস্ত, ঐখোয়গী ইন্সতিত্যুৎ, ইন্দস্ত্রীবু লৈবাক পুম্বগী মাইকৈদগী থম্মোই শেংনা থাগৎপা ফোংদোকচরি।
মরূপশিং,
লৈবাক অমা হেক্তদা, করিগুম্বা সাইন্স অমসুং তেক্নোলোজীনা অতিয়া য়ৌনা চাউখৎপা মতমদা, মখোয়গী ইন্দস্ত্রী অমসুং কৈথেলনা মান্ননা কান্নবা ফংবগী ফজরবা মরী লৈ। তেংবাংনবা ওইরো, অমগা অমগগী মরক্তা লৈনবা মরী ওইরো, খুদিংমক ফজনা লৈ। ঐখোয়গী লৈবাক অসিদা সাইন্স, খুন্নাই অমসুং ইন্দস্ত্রীবু মান্নবা থাক্তা লৈহন্নবগীদমক্তা সি.এস.আই.আর.না ইন্সতিত্যুসনশিং শিন্দোক-শিঞ্জিন তৌবগী থৌদাং লৌদুনা মথৌ তৌরি। ঐখোয়গী অসিগুম্লবা ইন্সতিত্যুসন অসিনা হৈ-শিংবা মীওই অমসুং সাইন্তিস্ত কয়া লৈবাক অসিদা পীখ্রবনি। শান্তি স্বরুপ ভত্নাগরগুম্বা শক্নাইরবা সাইন্তিস্ত অসিনা ইন্সতিত্যুসন অসিবু লুচিংলম্মি। ঐহাক্না ঙসি, অদোমগী মরক্তা লাক্লি অমসুং মরম অসিনা, ইন্সতিত্যুৎ অমগী অসিগুম্লবা ফাওরবা পুৱারী লৈরবদি, তুং লমচৎকীদমক্তসু মখোয়গী, মসিগা মান্নবা, চাউরবা থৌদাং লৈ হায়বা ৱাফম অসিদা ঐহাক্না অহেনবা মিৎয়েং চঙলি। ঙসিমকসু, ঐহাক, লৈবাক, মীওইবা খুন্নাই ফাওবনা অদোমগুম্বা সাইন্তিস্ত, তেক্নিসিয়নশিংদগী থাজবা কয়া থম্লি।
মরূপশিং,
সি.এস.আই.আর.গী রিসর্চ সেৎ অমসুং পেতেন্তকী পাঙ্গল চাউরবা ইকোসীস্তেম কয়া অমা লৈ। অদোম্না লৈবাক অসিনা থেংনরিবা শিংনবা কয়াগী ৱারোইশিন পুরক্নবা কন্না হোৎনরি। অদুবু, লৈবাক অসিগী পান্দম অমসুং ২১শুবা চহি চাগী লৈবাক মীয়ামগী মঙলান্দি হৌরকফম ওইরিবা য়ুম্বীদা য়ুম্ফম ওইরে। মরম অদুনা, সি.এস.আই.আর.গুম্বা অতৈগা মান্নদবা ইন্সতিত্যুসন অসিগী পান্দমসু মহৌশাদগী তোঙাল্লে। ঙসিদি, ভারতনা লৌউ-শিংউদগী এস্ত্রোনোমী ফাওবা, দিজাজতর মেনেজমেন্ততগী হৌদুনা দিফেন্স তেক্নোলোজী ফাওবা অমসুং ভেক্সিন্দগী হৌদুনা ভর্চুএল রিএলিতী ফাওবা, বাইওতেক্নোলোজীদগী বেত্তরী তেক্নোলোজী ফাওবা, হীরম খুদিংদা মরোমদোম লেপচবা অমসুং মপাঙ্গল লৈবা পাম্মি। ঙসিদি ভারতনা, তুং কোইনা চাউখৎকদবা অমসুং অশেংবা ইনর্জীগী লমদা মালেমদা লম্বী তাক্লি। ঐখোয়না ঙসিদি, ভারতনা সোফৱেয়রদগী সেতিলাইৎ ফাওবদা, অতোপ্পা লৈবাকশিংদা ফাওবা তেংবাংদুনা মখোয়গী চাউখৎপগী খোঙজেল য়াঙখৎহল্লি, মালেম চাউখৎপগী মরু ওইবা ইঞ্জিন অমগী থৌদাংসু লৌরি। মরম অদুনা, ঐখোয়গী পান্দম অসিসু তুংদা লাক্কদবা মতমদগী খোঙ্কাপ অনি হেন্না থম্বগী মথৌ তারে। হৌজিক্কী দিকেদ অসিগা লোয়ননা লাক্কদৌরিবা দিকেদশিংগী তঙাই ফদবশিং থেংননবা হৌজিক্তগী হৌনা শেম শাবা তারে। খুদোংচাদবশিংগী ৱারোইশিন পুরকপগী মতাংদসু, হৌজিক ঐখোয়গী মাংদা কোরোনাগুম্বা লাইচৎ থেংনরি, অদুনা অসিগুম্বা খুদোংচাদবা কয়া অমা তুংগী মতমদা লোত্তুনা লৈরম্বসু য়াই। খুদম ওইনা হায়রবদা, মালেমগী অখঙ-অহৈ কয়ানা অইং-অশা হোংবগী মতাংদা থোকহন্নীংদবা থৌদোক থোক্লকপা য়াবগী ৱাফম কয়া তত্তনা ফোংদোক্নরি। ঐখোয়গী সাইন্তিস্ত অমসুং ইন্সতিত্যুসনশিংনা সাইন্সতা য়ুম্ফম ওইদুনা মসিগা থেংনবা ঙম্নবা হৌজিক্তগী থৌরাং তৌদুনা লৈগদবনি। কার্বোন কেপচরদগী ইনর্জী তুংশিন্দুনা থম্বা অমসুং গ্রীন হাইদ্রোজেন তেক্নোলোজী ফাওবগী সেক্তরশিংদা ঐখোয়না খ্বাইদগী মমাংদা লৈদুনা লমজিংবা ঙম্নবা হোৎনগদবনি।
মরূপশিং,
ঙসিসু, অদোম খুদিংমক্না ইন্দস্ত্রীগা তেংবাংনবগী মরী অসিবু হেন্না ফগৎহন্নবা হোৎনবগী মতাংদা অহেনবা মিৎয়েং চঙলি। অদুবু ঐহাক্না হায়খিবগুম্না, সি.এস.আই.আর.গী থৌদাং অসিদি মসিদগীসু খোঙ্কাপ অনি হেল্লিবনি। অদোম্না ইন্দস্ত্রীগা লোয়ননা, খুন্নাইগসু লোয়নদুনা চৎমিন্নবা তাবনি। ঐহাক্না মমাংগী চহিদা পীরম্বা পাউতাক অদুবু সি.এস.আই.আর.না ইন্দুনা মীয়ামগা ৱারী শাদুনা মখোয়গী পাউতাক লৌবগী থবক হৌখিবা অসিদা ঐহাক্না য়াম্না নুংঙাইবা ফাওই। লৈবাক্কী অপাম্ববু খ্বাইদগী মরু ওইনা থমদুনা অদোম্না হোৎনরিবা অসিনা লৈবাক মীয়াম করোর-করোরগী তুংগী পুন্সিদা অহোংবা পুরক্লগনি। খুদম ওইনা হায়রবদা, ইং ২০১৬তা লৈবাক অসিনা এরোমা মিসন হৌদোকখি, অমসুং মসিদা সি.এস.আই.আর.না মরু ওইবা থৌদাং লৌখি। ঙসিদি, লৈবাক অসিগী লৌমী লিশিং কয়ানা ফ্লোরিকলচরগী খুত্থাংদগী মশাগী মপুন্সিদা অহোংবা কয়া পুরক্নরি। ঐখোয় ভারত মচাশিংনা চহি কয়াদগী চাকখুমদা শিজিন্নদুনা লাক্লিবা হিঙগুম্বা পোৎলম অসিগী মতাংদা ভারতনা মতম পুম্বদা মীরমদা মীপাল তাংদুনা লাকখি। সি.এস.আই.আর.না হীরম অসিগী মতাংদা তেংবাংখি, হৌজিক্তি লৈবাক মনুংমক্তদা হিঙ পুথোকপা হৌরে। অসিগুম্বা থৌওং কয়া অমা অদোমগী লেবতগী অসেংবা ওইখ্রে, পুথোকখ্রে। সরকার খক্তা নত্তনা মন্ত্রালয়না ফাওবা নীংথিনা খঙদবা অচৌবা থবক কয়া অমা অদোম্না পাংথোকখ্রে অমসুং মখোয়না খঙলকপা মতমদা, য়াম্না ঙকপা ফাওবসু য়াওরিবনি। মরম অদুনা, অদোম্না পাংথোকপা অসিগুম্বা থৌওং কয়া অসিগী মতাংদা মীয়ামদসু খঙহনগদবনি হায়না ঐহাক্না অদোমদা হায়জনীংই। সি.এস.আই.আর.গী রিসর্চ, অদোমগী থবকশিংগী মতাংদা মীওই অমত্তনা খঙনীংদুনা থিবগী অমসুং করিগুম্বা, মখোয়না পাম্বা তারবদি, মদুগী শরুক ফাওবা ওইবা য়াবগী মতাংদা অদোম্না করিগুম্বা খরা শোইদনা পাংথোকফম থোকই। মসিনা মরম ওইদুনা, অদোমগী থবক অমসুং পোত্থোকশিংবুসু মীয়াম্না শৌগৎকনি অমসুং খুন্নাই অমসুং ইন্দস্ত্রীদা সাইন্তিফিক ওইবা থৌওং লৈবসু হেনগৎকনি।
মরূপশিং,
ঙসিদি, লৈবাক অসিনা নিং-তম্বগী ৭৫শুবা চহি ফারকপগী মতম অসি লাক্কদৌরে, য়াম্না থুনা য়ৌরক্কদৌরে। অদুনা, ঐখোয়না নিং-তম্বগী চহি ৭৫ অসিবু ৱাখল্লোন্দা থমদুনা, ময়েক লাবা পান্দমগা লোয়নবা অকক্নবা মতমগী ফ্রেমৱর্ক অমগী মখা পোন্না, তুংগী থৌরাং য়াত্তুনা নীংথিনা শেম্লবা লম্বীদা তুংলমচৎকীদমক্তা চৎপা মতমদা মসিনা ঐখোয়গী থবক তৌবগী চৎনবী হোংদোকপদা য়াম্না তেংবাংগনি। কোরোনাগী ইরাং অসিনা ঐখোয়গী খোঙজেলবু খরা তপথহল্লবসু, আত্মানির্ভর ভারত, মথৌনা হাপ্লবা ভারত অমা ওইহনবগী পান্দম ফংনবা খোঙফম চেৎপদি হনবা লৈতনা লেংদনা লৈরি। ঐখোয়গী এম.এস.এম.ই.দগী হৌদুনা অনৌ-অনৌবা স্তার্ত-অপশিংগী মফমদা লৌউ-শিংউদগী হৌদুনা এজুকেসন সেক্তর ফাওবগী সেক্তর খুদিংদা মশিং থীঙমদ্রবা খুদোংচাবা অমসুং তৌবা য়াবা কয়া অমা লৈরি। মসিগী খুদোংচাবশিং অসিবু থবক্তা ওন্থোকপগী থৌদাংদি অদোম খুদিংনা লৌগদবনি, লৈবাক্কা পুন্দুনা মঙলানশিং অসিবু মঙফাওনহনগদবনি। ঐখোয়গী সাইন্তিস্ত অমসুং ইন্দস্ত্রীশিংনা কোবিদ ইরাংগী মনুংদা লৌখিবা থৌদাং পুম্নমক্কী মায়-পাকপশিং অসিবু ঐখোয়না সেক্তর খুদিংদা অমুক্কা হন্না পাংথোক্কদবনি। অদোমগী হৈ-শিংবা অমসুং অদোমগী ইন্সতিত্যুসনগী চৎনবী অমসুং হোৎনবা কনবগী মতৌ অসিনা লৈবাক অসিনা অনৌবা পামদম কয়া অমা চৎলিবা খোঙজেল অসিদা ফংহনবদা তেংবাংগনি অমসুং লৈবাক মচা করোর ১৩০ হেনবগী অনিংবা-অপাম্বসু থুংহনবা ঙমগনি হায়বগী ঐহাক্না থাজবা থম্লি। ঐহাক্না অদোম খুদিংগী অনিংবা-অপাম্বা তাবগী খুদোংচাবা ফংলি, অদোম্না কান্নবা অমসুং চুনবা ৱাফম কয়া অমা থম্বীরি, অদোম্না থেংনরকপশিংদা য়ুম্ফম ওইদুনা তম্বীরি। হীরমশিং অসিবু য়েংশিনবগী থৌদাং লৌরিবা মীওইশিংনা অদোম্না থম্বীরক্লিবা পাউতাকশিং, অপাম্বশিংগা মরী লৈনবা থবকশিংবু মতম চঙদনা অথুবা মতমদা লোইশিন্নবা হোৎহন্নীংই। মতম অমত্তদা থবক খুদিংমক অসিবু মিসন মোদতা খোঙজেল য়াঙনা লোইশিন্নবা হোৎনহন্নীংই। মসিগী মরমদি, ঐহাক্না মতম কয়া অমা কাইথোক্লগা অদোমগা ফম্মিন্নরিবনিনা কান্নবা ৱাখল্লোন অমসুং পাউতাক লাকপা অসিদি মহৌশানি অমসুং ফম্বাক অসিদগী থোক্লক্লিবা শেংলবা অমসুং কান্নরবা ৱাফমশিং অসিবু ইন্সতিত্যুসনশিংনা শিন-লাঙবগী খুত্থাংদা মতম নাইনা অপগ্রেদ তৌদুনা শেমদোক্লবা মতুংদা মীওই খুদিংদা য়ৌহনবগী থবক অসিসু ঐখোয়না পাংথোক্কদবনি। ঐহাক্না অদোম খুদিংবু হন্না-হন্না থাগৎচরি অমসুং য়াইফ-পাউজেল অসিগা লোয়ননা অদোমগী তেক্ত-কায়দবা অমসুং হকচাং ফনা লৈবগী থৌজাল নিজরি। অদোম্বু অমুক্কা হন্না থাগৎচরি। খুরুমজরি।
