“লাইনিং-লাইশোনগী ওইবা চৎনবিগা লোয়ননা, লাইনিংবগী সেন্তরশিংনা সোসিএল কন্সিয়সনেস শন্দোকপদা চাওরবা থৌদাং অমা লৌরি”
“অয়োধ্যা অমসুং লৈবাক শিনবা শিনবা থুংনা রাম নাবমীবু য়াম্না চাউনা পাংথোক্লি”ঈশিং য়োকশিনবা অমসুং মহৌশাগী ওইবা লৌউদা মরুওইবা পীখ্রে“চিঞ্জাক শুনা ফংদবগী চৈনা মপুং ফানা মুথৎপা মথৌ তাই”কোবিদ ভাইরস অসি য়াম্না লৌনম লৈ অমসুং ঐখোয়না মসিদা চেকশিন্দুনা লৈবা মথৌ তারি”উমিয়া ইমানা য়াইফরে!
গুজরাতকী মীয়াম্না য়াবা, মোং হাদবা অমসুং ৱাখল চেৎপা মুখ্য মন্ত্রী, শ্রী ভুপেন্দ্রভাই পতেল, কেন্দ্রগী মন্ত্রী-মন্দলদা লৈরিবা ঐহাক্কী মরুপ, পুরুশোত্তম রুপালা, রাজ্য সরকারগী মন্ত্রী পুম্নমক, ঐহাক্কী পার্লিয়ামেন্তকী মরুপ, অতোপ্পা লেজিসলেচর, পঞ্চায়ত, ম্যুনিসিপালিতীদা মীয়াম্না খনগৎলবা মীয়ামগী মীহুৎ, উমা ধাম ঘতিলাগী প্রসিদেন্ত বালজিভাই ফলদু, অতোপ্পা ওফিসর, লাপ্লবা মফমশিংদগী লাকপীরিবা খুন্নাইগী তোঙান-তোঙানবা মীথুংলেন, মশিং য়াম্না তিনবীরিবা ইমা অমসুং ইচে-ইচলশিং পুম্নমকপু ঐহাক্না ইমা উমিয়াগী ঙসিগী ১৪শুবা হৌদোকপা নুমিৎ অসিদা ঐহাক্না কোক নোঞ্জরি। য়াইফরবা থৌরম অসিদা ঐহাক্না মীপুম খুদিংগী মফমদা য়াইফ পাউজেল পীজরি।
হৌখিবা দিসেম্বরদা ঐহাক্না লাইবক ফদুনা ইমা উমিয়া ধাম মন্দির অমসুং উমিয়া ধাম কেম্পস শঙ্গাবগী খুদোংচাবা ফংজখি। অদুগা, ঘাতিলাগী ঙসিগী য়াইফরবা থৌরম অসিদা ঐহাকপু লাকপীনবা পাউজেল পীরবিরকপদা ঐহাক্না য়াম্না নুংঙাইবা ফাওই। ইশামক্না হকথেংননা লাকপা ওইরম্লবদি য়াম্না নুংঙাইরমগনি, অদুবু হকথেংননা লাকপদি ফংজদরে, অদুবু ঐহাক্না লাপ্লবসু লাপ্না অদোমগা উন্নবদি অদুম য়াই, ঐহাক্কী ওইনদি মদুসু য়াম্না নুংঙাইবা ৱাফম অমনি।
ঙসি অসিদি নবরাত্রীগী মাপনশুবা নুমিৎনি। ইমা সিঘদাত্রীনা অদোম খুদিংগী অনীংবা অপাম্বা থুংহনবা ওইসনু হায়না ঐহাক্না মীয়াম খুদিংদা য়াইফ পাউজেল পীজরি। ঐখোয়গী গির্নার অসিদি লাইনীং লাইশোলগী মফম্নি। গির্নার ধামদা ইমা অম্বা লৈরি। মতৌ অসুম্না, গিরনার্না মহৈ-মশিংগী মফম অমসু ওইরি। অদুগা ভগবান দত্তাত্রেয় লৈরিবা শেংলবা মফম্বুসু ঐহাক্না খুরুমজরি। ঐখোয় মীয়াম পুল্লগা গুজরাতকীদমক্তা ৱাজবা, গুজরাতকী চাউখৎ-থৌরাংগীদমক্তা হোৎনজবা অমসুং মসিগীদমক্তা ঐখোয়না ইশাগী থৌদাং খরা পাংথোক্তুনা লৈবা ঙম্লিবা অসিসু ইমাগী থৌজালদগীনি।
ঐহাক্না অসিগুম্বা অমত্তা ওইবগী পাঙ্গলবু মতম পুম্বদা থেংনদুনা লাক্লি। ঙসি অসি ভগবান রামচন্দ্রজীগী প্রাগত্য কুমহৈসু ওইবনিনা অয়োধ্যাদা মসিবু য়াম্না চাউনা পাংথোক্লি, লৈবাক শিনবা থুংবদা পাংথোক্লি অমসুং মসি ঐখোয়গী ওইনা য়াম্না মরু ওইবনি।
অদোমগী নাক্তা লাকপা হায়বসি ঐহাক্কী ওইনা অনৌবা থৌওং নত্তে, ইমা উমিয়াগী খুয়াখাদা চঙজবসু অনৌবা নত্তে। “হৌখিবা চহি ৩৫দগী হৌনা ঐহাক্না অদোমগী নাক্তা লাক্তবা হায়বসি অমুক্তা থোকখিদ্রি। মসিগা মান্ননা, ঐহাক্না ঙসিসু লাক্লি। অদুগা মফম অসিবু শঙ্গাবগীদমক্তা ঐহাক্না ইং ২০০৮দা মফমসিদা লাকপগী খুদোংচাবা ফংখি হায়বসি হৌজিক্তসু কনাগুম্বা অমনা হায়খিবদু ঐহাক খঙই। মসিগী শেংলবা ধাম অসিদি করিগুম্বা অমবু থমোই শেংনা ইকায় খুম্নবগী ময়োল অমা ওইদুনা লাক্লি, অদুবু মফমসিনা খুন্নাইগী ৱাখল তাবগী ময়োল অমসু ওই হায়বসিসু ঐহাক্না হৌজিক খঙলে। লোয়ন-লোয়ননা, মসিনা লমকোইবগী ময়োল অমসু ওইরি। মফমসিদা কা ৬০ হেন্না শাদুনা লৈরি, লুহোংবগী হোল কয়া অমসু লৈ, মীয়ামগী চাউরবা চাফম-থকফম অমসু শারে। ইমা উমিয়াগী মনাইশিং অমসুং খুন্নাইবু ৱাখল তাহনবগী তঙাই ফদবশিং লৈরিবা অসি ইমা উমিয়াগী থৌজালদগী অদোম্না হোৎনবদগী লৈরিবনি। অসিগুম্বা চহি ১৪গী তেল্লবা মতমদা চাউখৎপা ফংলিবা অসিগীদমক্তা ঐহাক্না ত্রস্তী, মফম অসিবু ঙাক শেন্দুনা শেন্নরিবা অমসুং ইমা উমিয়াবু নীংজবশিংবু অমুক্কা হন্না থাগৎচরি।
ঐখোয়গী মুখ্য মন্ত্রীনা হৌজিক থম্মোই শেংনা ৱাফম অমা থম্বীখ্রে। লৈবাক অসি ঐখোয়গী ইমানি, ঐহাক্না করিগুম্বা ইমা উমিয়াগী মনাই অমা ওইবা তারবদি, ঐহাক্না ইমা পৃথিবী অসিদা অশোক-অপন নংহনবগী মরম অমত্তা লৈতে হায়না মহাক্না হায়বীখি। ঐখোয়না ইশাগী য়ুমদা ইমাগী মফমদা মরম লৈতনা হিদাক পীজগদরা? মরম লৈতনা ঈ পীগদরা? ইমাগী অপাম্বগী তঙাই ফদবগী মতুং ইন্না ঐখোয়না পীগদবনি। অদুগা, ঐখোয়নদি ইমা পৃথিবীনা মসি পাম্মি, মদু পাম্মি হায়না পঙখন্দা খল্লে, মসিদবু ইমানা তল্লম্লোইদরা?
ময়াম অসিগা লোয়ননা, ঐখোয়না শিংনবা কয়া অমা লাকপসু উরে। ইমা পৃথিবীবু কনবা হায়বসি য়াম্না চাউবা খোঙথাং অমা ওইরে। মমাংগী মতমদা ঈশিংগী অৱাবা মাইয়োক্নবা পুন্সি লৈখ্রে। ইকং থোকপা হায়বসিনা মতম পুম্বদা ৱাবগী হীরম ওইদুনা লাক্লি। অদুবু, ঐখোয়না চেকদাম, ঈশিং য়োকশিনবা, পর দ্রোপ মোর ক্রোপ, দ্রিপ ইরিগেসনগী খোঙথাং পায়খৎপা, সাউনী স্কিম পায়খৎখিবদগী ঈশিংগী মতাংদা মশক থোক্না হোৎনখি।
ঐহাক্না মুখ্য মন্ত্রী ওইরিঙৈ মতমদা, ঐখোয়গী লমদমসিদা ঈশিংগীদমক্তা চাদিং য়াম্না তৌবা তাই অমসুং য়াম্না হোৎনবগী মথৌ তাই হায়না ঐহাক্না অতোপ্পা রাজ্যশিংগী মুখ্য মন্ত্রীশিংগা ৱারী শাখি। ঐখোয়গী সরকারগী অয়াম্বা মতমদা ঈশিং ফংহনবগী থবক্তা অহেনবা মিৎয়েং চঙনখি। রাজ্যশিংনা মসিগী শিংনবা অসিগী মতাংদা নীংথিনা খঙদবনা মখোয়না অঙকপা ফাওনরম্মি। ঐখোয়না জন-আন্দোলন হৌদোকখিবদগী শিংনবা অসিদগী তপ্না-তপ্না মপান থোক্লকপা ঙমখি। জন আন্দোলন অসি মীয়ামগী কান্ননবগীদমক্তা তৌখিবনি। অদুগা হৌজিক্তি, মীয়াম্না ঈশিংগী মতাংদা খঙলে। অদুগা ঈশিং য়োকশিনবগী মতাংদা ঐখোয়না খঙশিন্নদনা লৈফম থোক্তে হায়না খল্লি। মসিদি নোং তাদ্রিঙৈগী মমাংদা পাংথোক্কদবা থবক্নি। পুখ্রিশিংবু হেন্না লুহনগদবনি, ইরম-নালাশিংবু শেংদোক্কদবনি, অসিগুম্বা থবকশিং হেন্না পাংথোক্লিবমখৈ ঐখোয়না ঈশিং হেন্না য়োকশিনবা ঙমগনি। মতৌ অসুম্না, ঐখোয়না কেমিকেলদগী করম্না লাপথোক্কদগে হায়না হৌজিক খনবা য়ারবনি। নত্ত্রবদি, ইমা পৃথিবীনা ইমা পেল্লে, নোই চৎখ্রো, ঐহাক নখোয়গী সেবা তৌবা ঙম্লরোই হায়না নোংমদি শোইদনা হায়রক্লগনি। মতমদুদদি, ঐখোয়না হুমাং কয়া য়াম্না তারবসু, অতাঙবা মরু কয়া হুল্লবসু, মনা-মশিং অমত্তা হৌররোই। ঐখোয়গী ইমা পৃথিবীবু কনফম থোক্লবনি। মরম অদুনা, নেচরেল ফার্মিংবু শৌগৎপা মীওই অমবু রাজ্যপাল ওইনা ফংবসি গুজরাতকী লাইবক ফবনি। মহাক্না গুজরাতকী তালুকা খুদিংদা চত্তুনা নেচরেল ফার্মিংগী মতাংদা লৌমীশিংগী কনফরেন্স কয়া পাংথোক্লি হায়বা ঐহাক্না খঙবা ঙম্লে। লৌমী লাখ কয়ানা নেচরেল ফার্মিংগী মাইকৈদা চঙশিনবা হৌরে অমসুং মখোয়না নেচরেল ফার্মিংবু য়াজবদা মশাদা চাউথোকচবা ফাওই হায়না রুপালাজীনা পাউদম্বদা ঐহাক্না নুংঙাইবা ফাওই। ফার্মিং অসিদদি চাদিংসু য়াম্না হন্থৈ হায়বসিসু অচুম্বনি। অদুগা হৌজিক্তি, মুখ্য মন্ত্রী মশানসু হায়রবনিনা, মহাক্কী অপাম্বা থুংহনবা হায়বসি ঐখোয় খুদিংগী থৌদাং ওইরবনি। গুজরাতকী খুঙ্গং খুদিংগী লৌমীশিংনা নেচরেল ফার্মিংগীদমক্তা মাং থানা থোকপীরক্লো। ঐহাক অমসুং কেশুভাইনা ঈশিংগী মতাংদা হোৎনরম্বা অদুগা মান্ননা ভুপেন্দ্রভাইনা ইমা পৃথিবীগীদমক্তা পাংথোক্লি।
ইমা পৃথিবী কন্নবগীদমক্তা মহাক্না হোৎনরিবসিদা গুজরাতকী মীয়াম খুদিংনা শরুক য়াবীয়ু। অদুগা, অদোম্না করিগুম্বা অমা পাংথোক্কে খল্লবদি, অদোম্না তুং হন্দুনা খক য়েংদে হায়বসিসু ঐহাক্না খঙলবনি। ঐহাক্না উনঝাদা বেতি বচাওগী মতাংদা ৱাখিবদু নীংশিংলি। ইমা উমিয়াগী তীর্থ অমা লৈহনবা অমসুং নুপীমচা মশিং হন্থরকপদা ঐহাক্না ৱাখিবনি। অদুদগীদি, ঐহাক্না ইমা উমিয়াগী খুয়াখাদা চঙজদুনা খুন্নাইগী মীওই কয়াবু অমত্তা ওইনা পুন্সিন্দুনা নুপীমচাশিংবু কল্লসি হায়না ৱাশকহনখি। ইমা উমিয়া, খোদল ধাম অমসুং গুজরাত অপুনবগী মীয়াম্না ৱাফম অসিবু লুনা লৌখিবদা ঐহাক্না নুংঙাইবা ফাওখি। নুপীমচাশিংবু কন্নবগীদমক্তা মমাগী পুক্নুংদা লৈরিঙৈদা হাৎপা থিংবগী মতাংদা গুজরাত্তা এৱিয়র্নেস চাউনা লৈরকখি। গুজরাতকী নুপীমচাশিংনা মশক থোকপা থৌওং কয়া পাংথোকপা ঐখোয়না ঙসিদি উরে। ঐখোয়গী মহেশানাগী মচানুপীশিং, নাম্ম-শোইবশিংনা ওলিম্পিক্সতা চত্তুনা ভারতকী মশক তাক্লগা হল্লকখি। হন্দক্কী ওলিম্পিক্সতা চৎখিবা শান্নরোইশিংগী মরক্তা গুজরাতকী মাচনুপী ৬ য়াওখি। কনানবু মসিদা চাউথোকচরোইদৌরিবনো? ঐখোয়না ইমা উমিয়াগী অশেংবা মনাই ওইবদগী ফংবা পাঙ্গলগী মতেংনা ঐখোয়না মাংজিল থানা চৎপা ঙম্লিবনি হায়না ঐহাক্না থাজবা থম্মি। ঐখোয়না নেচরেল ফার্মিংদা অহেনবা মিৎয়েং চঙলিঙৈ, ভুপেন্দ্রভাইগী মতেং পাংলিবমখৈ, ঐখোয়গী লৈহাও ইমানা অশং-অমানগা লোয়ননা চাউখৎপা ঙমগনি। গুজরাত লৈশাৎ তম্লগনি। ঙসিদি গুজরাতনা চাউখৎলি, অদুগা লৈশাৎসু তম্লগনি।
ঐহাক্কী ৱাখলদা অতোপ্পা ৱাফম অমসু লৈরি। ঐখোয়গী গুজরাতকী অঙাশিংনা মচি ওইবা চিঞ্জাক ফংদবা হায়বসি অফবা নত্তে। ইমানা য়ুমদা মসি চাশিল্লু হায়, অদুবু মখোয়না চাদে। লাইরবদি নত্তে, অদুবু চাবগী হৈনবীনা মরম ওইরগা মচি ওইবা চিঞ্জাক চাবা ৱাৎপনি। মচানুপীনা এনেমিয়া নারে, অদুগা চহি ২৪/২৫দা য়ুম্বাল্লে, মসিদবু মহাক্কী পুক্নুংগী অঙাংনা করম্না চাওগদৌরিবনো? মমানা মপাঙ্গল কন্দ্রবদা মচানা করম্না মপাঙ্গল কনগনি। মরম অদুনা, হকশেল ফবগী মতাংদা নুপীশিংনা হেন্না খনফম থোকই, অদুগা অপুনবগী ওইনা, অঙাংগী মশা-মউ ফবগী মতাংদা খনফম থোকই।
উমিয়াগী মনাই খুদিংনা খুঙ্গংশিংদা চত্তুনা মখোয়না থেংনবা অঙাং মঙা-তরা, খুন্নাই অমা হেক্তগী ওইরবসু, অদুবু মচি ওইবা চিঞ্জাক ফংহনবগী থৌওং পাংথোকপা য়াই হায়না ঐহাক্না খল্লি। মখোয়না করিমগুম্বা মশা-মউ ফরবদি, মখোয়গী ইমুংসু হকশেল ফগনি। অদোম্না পাতোতসব পাংথোক্লি, ঈ-দান তৌবগী থৌরমসু ঙসি পাংথোক্লি। অদোম্না করিগুম্বা অমা পাংথোকপা য়াই। উমিয়া ত্রস্তকী খুত্থাংদা খুঙ্গং খুঙ্গংগী ওইবা মশা-মউ ফবা অঙাংগী চাংয়েংনবা পাংথোকপীয়ু। চহি অনি, অহুম, মরিগী অঙাং খুদিং য়াওহনবীয়ু অদুগা খ্বাইদগী মশা-মউ ফবদুদা মনা পীবীয়ু। ফিভম কয়া অমদা অহোংবা লাক্কনি। অপীকপা থবক্নি, অদুবু নীংথিজনা পাংথোকপা য়াগনি।
মফমসিদা লুহোংবগী হোল কয়া অমসু শারে হায়না ঐহাক্কী ইফমদা পাউদমলক্লি। থা তরানিথোই চুপ্পা লুহোংবা য়াওবা নত্তে। অদুনা মফম অসি করিদা শিজিন্নগনি? ঐখোয়না মফমসিদা কোচিং ক্লাস পাংথোকপা য়াই। লাইরবা অঙাংশিংনা মফমশিংদা লাকপা অদুগা খুন্নাইগী মীওইশিংনা লাইরিক তাকপীবা য়াই। পুং অমা, অনিগী ওইরবসু, মফম অসি কান্নবা মওংদা শিজিন্নবা য়াগনি। মতৌ অসুম্না, মফম অসিবুসু য়োগগী মফম ওইহনবসু য়াগনি। অয়ুক খুদিংদা ইমা উমিয়াবু খুরুমজবসু ফংলগনি, পুং কয়া চঙনা মফমসিদা কান্নবা থৌরম কয়া পাংথোক্তুনা মফম অসিবুসু কান্ননা শিজিন্নবা য়াগনি। মফম অসিবু নীংথিজনা শিজিন্নরবা তুংদা খুন্নাইগী ৱাখল্লোন শাগৎপদা তেংবাংবা য়াগনি। ঐখোয়না মসিগীদমক্তা হোৎনফম থোকই।
হৌজিক্কী মতমসিদি নীংতম্বগী চহি ৭৫ ফাবগী মতম্নি, ঐখোয়গী ওইনা নাকল অমদা য়াম্না মরু ওইবা তাঞ্জা অমনি। ইং ২০৪৭তা লৈবাক্না নীংতম্বগী চহি ১০০ মপুং ফাবগী নুংঙাইবা ফোংদোক্কনি, মতমদুদা ঐখোয়, ঐখোয়গী খুন্নাইনা করম্বা থাক্তা লৈগনি? ঐখোয়গী খুঙ্গং অমসুং লৈবাক্না কদাইদা য়ৌগনি? অসিগুম্বা ৱাখল্লোন অসি লৈবাক মীয়াম খুদিংদা লৈহনফম থোকই। নীংতম্বগী অমৃত মহোৎসবনা অসিগুম্বা ৱাখল্লোন পুরকহনবা য়াগনি, মসিদগী খুন্নাইগী কান্নবা ওইগনি। অসিগুম্বা মতৌ পাংথোকপা মতমদা ঐখোয়গী হৌরক্লিবা চারোন শুরোনগী কান্নবা ওইগনি। মরম অদুনা, ঐহাক্কী ৱাখলদা অপীকপা ৱাফম অমা লাক্লি। নীংতম্বগী চহি ৭৫ ফারবনিনা, জিলা খুদিংদা অমৃত পাৎ ৭৫ শাবা য়াই। হান্নগী পাৎশিংবুনা হেন্না লুহন্দুনা চাওথোকহনবগা লোয়ননা হেন্না ফজহনবা য়াই। জিলা অমদা পাৎ ৭৫ লৈবা, অদোমসু অমুক্তা খনথবীয়ু। চহি ২৫গী মতুংদা নীংতম্বগী চহি ১০০গী থৌরম পাংথোকপা মতমদা, মতমদুগী চারোন শুরোন্না মখোয়গী খুঙ্গংগী মীয়াম্না লৈবাক্না নীংতম্বগী চহি ৭৫ ফাবা মতমদা পাৎশিং অসি শেমখিবনি হায়জবা য়ারগনি। খুঙ্গং অমদা পাৎপু লৈরবদি, খুঙ্গংদুগী মপাঙ্গল হাপ্পি। ঈশিং লৈরবা মতমদতা পাতিদারনা পানিদার ওইবনি। অদুনা, মসিগী পাৎ ৭৫গী খোঙথাং অসি ঐখোয়না ইয়া উমিয়াগা লোয়ননা পায়খৎপা য়াই। মসি য়াম্না চাউবা থবক নত্তে, ঐখোয়না চেক দাম লাখ কয়া শাখ্রিবদুনি, মদুগুম্বা মীওইনি ঐখোয়সি। মসিনা কয়া য়াম্না চাউবা সেবা ওইগনি, অদোম অমুক্তা খন্থবীয়ু। ঐখোয়না থবক অসি ওগস্ত ১৫, ২০২৩গী মমাংদা লোইশিনসি। মসিদি খুন্নাইদা ইথিল পীবা থৌওং ওইগনি। ঐহাক্না হায়নীংবদি, ওগস্ত ১৫ খুদিংদা খুঙ্গংগী অহল লমনশিংবু কৌদুনা পাৎ মপান্দা মচু অহুমগী ফিরাল পায়হনবগী থৌরমসু পাংথোকসি। মসিদা ঐখোয়গুম্বা নেতাদি কৌবীগনু। খুঙ্গংগী অহল-লমনশিংবু কৌদুনা ফিরাল চিংখৎপগী থৌরম পাংথোকপীয়ু।
ঙসি অসি ভগবান রামচন্দ্রজীগী মপোক নুমিৎনি। ঐখোয়না মহাকপু নীংশিংবা মতমদা ঐখোয়না শাবারীবু নীংশিংই, কেৱদ নীংশিংই, নিশাদ রাজাবু নীংশিংই। খুন্নাইগী অসিগুম্বা অপীকপা মীওই মশক খঙবা অসিনা শ্রী রাম হায়বদি মখোয়সিনি হায়বা ঐখোয়দা খনহল্লি। মসিনা তাকপদি, খুন্নাইগী শোত্থরবা মীওইশিংবু ঙাক-শেনবীবা মীওইশিংবু তুংগী মতমদা মীয়াম্না মখোয়গী থম্মোইনুংদা থমদুনা ইকায় খুম্নৈ হায়বনি। ইমা উমিয়াবু নীংজবা মীওইশিংনা শোত্থরবা মীওইশিংবু মখোয়গী মীনি হায়না খল্লি। ভগবান রাম্না শোত্থরবশিংগী মনাক্তা লৈখিবা অমসুং মখোয়গী য়াইফনবগীদমক্তা হিংখিবা অদুনা মহাকপু ঈশ্বর অমসুং পুর্না পুরুশোত্তম হায়না কৌনরিবনি। ইমা উমিয়াগী মনাইশিংনসু মশাবুসু মাংজিল থানা চৎপদা নত্তনা অতোপ্পশিংসু তুংদা লৈহৌহন্দনবা খন্থবীয়ু। মতমদুদা ঐখোয়না মাংজিল থানা তুংলমচৎকীদমক্তা চঙশিনবদা অচুম্বা ওইগনি, নত্ত্রবদি মনিংদা লৈহৌবশিংনা মাংজিল থানা চঙশিনবশিংবুসু মনিংদা চিংথগনি। মদু ওইরবদি, ঐখোয়না হেন্না কন্না হোৎনবগী মথৌ তারক্কনি। মরম অদুনা, ঐখোয়না মাংজিল থানা চঙশিনবতা নত্তনা মতুংদা লৈহৌবশিংবুসু মাং থানা পুখৎপীগদবনি, মতমদুদা ঐখোয় পুম্নমক্না তুংলমচৎকীদমক্তা তসেংনা চঙশিনবা ঙমগনি।
নীংতম্বগী অমৃত মহোৎসব, ভগবান রামগী ঙসিগী প্রগতী মহোৎসব অমসুং ইমা উমিয়াগী পাতোতসব অমসুং অসুক য়াম্বা মীয়াম তিল্লিবা অমসুং ঐখোয়না চাউখৎপগী মাইকৈদা চঙশিনবদা লৈবা পাম্লিবা খোঙজেল য়েংলদুনা হায়জনীংবদি, কোরোনাগী ইরাং লাকখ্রে, হৌজিক্তি চৎখ্রে হায়না ঐখোয়না খনগদবা নত্তে, মসিগী কেস খরা হৌজিকসু অদুমক লৈরি। মসিগী লাইনা অসিদি য়াম্না নম্থাক তৌবা হৈবনি। মসিগা মাইয়োক্নবা ঙম্নবা ঐখোয়না ভেক্সিন দোজ করোর ১৮৫ কাপখি। মালেম্না মসি তাবদা অঙকপা ফাওনরিবনি। মসি ঐখোয়না করম্না মায় পাকখিবনো – অদোম মীয়াম অমসুং খুন্নাইগী তেংবাংবদগী। মরম অদুনা, ঐখোয়না এৱিয়র্নেস চাউনা পুরক্লিবনি। হৌজিক, স্বচ্ছতা অভিয়ান, য়াম্না চম্বনি, করিগীদমক্তা মসিবু ঐখোয়গী মহৌশাগী চৎনরোল ওইবা য়ারোইদৌরিবনো? প্লাস্তিক শিজিন্নররোই, করিগীদমক্তা মসিবু ঐখোয়গী মহৌশাগী চৎনরোল ওইবা য়ারোইদৌরিবনো? ঐখোয়না সিঙ্গল য়ুজ প্লাস্তিক শিজিন্নররোইসি। শনবু ঐখোয়না লাই লাৎলি। ইমা উমিয়াগী মনাই ওইরবদি, শা-শনবু ঐখোয়না নোল্লুকই। মখোয়না প্লাস্তিক চারবদি, ইমাগী মনাই ওইনা মদু অচুম্বা নত্তে। অসিগুম্বা ৱাফমশিংবু ইন্দুনা অদোম্না তুংলমচৎকীদমক্তা চৎলবদি, অদোম্না খুন্নাইগী থবক্কা খুৎশম্ননা চৎলি হায়না ঐহাক্না নুংঙাইবা ফাওগনি। পাতোতসবকা লোয়ননা পুজা তৌবা, লাই নীংবা, করিগুম্বা অমবু থম্মোই শেংনা ইকায় খুম্নবা হায়বসি অদুমক ওইথোকপনি। মসিদগীসু হেন্দোক্তুনা, ঐখোয়না নহারোল ময়ামগা লোয়ননা ঈ-দান্নচিংবা কয়া অমা পাংথোক্লি। মসিদা ঐহাক্না য়াইফ পাউজেল পীজরি। অদোমগী নাক্তা লৈতনা লাপ্না লৈবা ওইরবসু, মফমসিদা লাকপগী খুদোংচাবা ফংজরে, মসি ঐহাক্কীদি য়াম্না নুংঙাইবা ৱাফম অমনি।
অদোম খ্বাই খীবিকপু থাগৎচরি। ইমা উমিয়াগী খুয়াখাদা কোক নোঞ্জরি।
থাগৎচরি।
