“মালেমগী লাইচৎশিং থেংনদ্রিঙৈ মমাংদসু ভারতকী হেল্থকী বিজন অসি য়ুনিভর্সেল ওইখি”
“ভারতকী পান্দম অসি ফিজিকেল, মেন্তেল অমসুং সোসিএল ৱেল-বিংনা ওইরি” “কলচর, ক্লাইমেৎ অমসুং সোসিএল দাইনামিক্সতা ভারতকী অচৌবা দাইভর্সিতী লৈ”“তশেংবা চাউখৎপা হায়বা অসি পিপল-সেন্ত্রিক ওই। মেদিকেল সাইন্সতা কয়া য়াম্না খুমাং চাউশিল্লবসু লাস্ত মাইলদা লৈরিবা অরোইবা মীশক অদুদা এক্সেস শোইদনা ফংহনগদবনি”“য়োগ অমসুং মেদিতেসন অসি অরিবা মতমগী ভারতনা অনৌবা মালেমদা পীবা খুদোলনি মসিনা হৌজিক মালেমগী ইহৌশিং ওইরকখি”“ভারতকী ত্রেদিস্নেল হেল্থকিয়র সিস্তেমশিংদা ৱাখল ৱাবা অমসুং পুন্সি মহিংগী ওইবা লাইনাশিংগী পাউখুম কয়া য়াওরি”“ভারতকী পান্দম অসি হেল্থকিয়রবু এক্সেসিবল অমসুং এফোর্দেবল ওইহনবা অসি ঐখোয়গী প্রজাশিং খক্তা নত্তনা মালেম পুম্বগী ওইগদবনি”মালেমগী লৈবাক কয়া, নোংচুপ এসিয়া, SAARC, ASEAN অমসুং অফ্রিকাগী লমদমগী হকশেল মন্ত্রী, এক্সেলেন্সীশিং। ঐহাক্না অদোম পুম্নমকপু ভারত্তা তরাম্না ওক্লি। ঐহাক্কী মন্ত্রী মন্দলগী মরুপ অমসুং ভারতকী হেল্থকেয়র ইন্দস্ত্রীশিংগী মীহুৎশিংবু নমস্কার!
মরুপশিং,
ভারতকী স্কৃপচর অমদা অসুম্না হায়ঃ
সর্ব ভবন্তু সুখিন, সর্বে সন্তু নিরাময়া।
সর্ব ভদ্রানি পশ্যন্তু, মা কছিত দুখ ভাগভেত।।
মসিনা হায়বদিঃ মীপুম খুদিং নুংঙাইনা লৈবা ওইসনু, মীপুম খুদিং লাইনা অমত্তা নাদনা লৈবা ওইসনু, মীপুম খুদিংদা অফবতা থোকপা ওইসনু অমসুং কনা অমত্তনা অৱাবা ৱাখল খন্দবা ওইসনু। মসিদি পুম্নমকপু উবা মিৎয়েং অমনি। মালেমগী লাইচৎ লৈত্রিঙৈগী চহি লিশিং কয়াগী মমাংদা ভারতকী হকশেলগী মিৎয়েং অসি য়ুনিভর্সেল ওইরম্মি। ঐখোয়না ঙসি ৱান আর্থ, ৱান হেল্থ হায়রিবা অসিসু চপ মান্নবা মওংদা থবক ওইনা পাংথোকপনি। মখা তারকপদা, ঐখোয়গী মিৎয়েং অসি শুপ্নগী মীওইবা খক্কী নত্তে। মসিনা ইকোসীস্তেম অপুনবা অসিবু কোল্লি। পাম্বীদগী শা-ঙা ফাওবা, লৈহাওদগী তুরেল ফাওবা, ঐখোয়গী অকোয়বদা লৈরিবা খুদিংনা হকশেল ফরবা মতমদা ঐখোয়না হকশেল ফগদৌরিবনি।
মরুপশিং,
লাইনা নাদবা হায়বসিনা হকশেল ফবনি হায়বসি পুম্নমক্কী ৱাখল্লোনি। অদুবু, ভারতকী অফবা হকশেলগী মিৎয়েং অসিদি শুপ্নগী লাইনাদা লোইশিন্দে। লাইনা নাদবা হায়বসিদি হকচাং নুংঙাইনা লৈবগী থাক অমখক্নি। ঐখোয়গী পান্দমদি মীপুম খুদিংনা হকচাং নুংঙাইনা অমসুং নুংঙাই য়াইফনা হিংবনি। ঐখোয়গী পান্দম অসিদি হকচাং, ৱাখল অমসুং খুন্নাইনা নুংঙাই য়াইফনা লৈবনি।
মরুপশিং,
ভারতনা মশাগী G20গী খোঙচৎপু ‘ৱান আর্থ, ৱান ফেমিলী, ৱান ফ্যুচর’গী থীমগা লোয়ননা হৌখি। পান্দম অসি ফংনবা হোৎনবদা নিংহন্নবা নাইদবা মালেমগী ওইবা হেল্থকেয়রগী পথাপ অমগী মরু ওইবা ঐখোয়না খঙই। মেদিকেল ভেল্যু ত্রাভেল অমসুং হেল্থী ৱর্কফোর্স মোবিলিতীবু হকশেল ফবা গ্রহ অমগীদমক্তা য়াম্না মরু ওই হায়না উই। ৱান আর্থ ৱান হেল্থ এদভান্তেজ হেল্থকেয়র ইন্দিয়া 2023 অসিদি মাইকৈ অসিদা থাংজিনবা মরু ওইবা খোঙথাং অমনি। ঙসিগী মীফম অসিদা ভারতকী G20 প্রসিদেন্সীগী থীমগী মমি তারি। লৈবাক কয়াগী মীওই চা কয়ানা শরুক য়ারি। পব্লিক অমসুং প্রাইভেত সেক্তর, প্রোফেস্নেল অমসুং একাদমিক দোমেন্দগী স্তেকহোলদর কয়া লাক্লিবা অসি য়াম্না নুংঙাই। ঙসিগী মীফম অসিনা মালেম অসি ইমুং মনুং অমনি হায়বা ভারতকী ‘বাসুদৈবা কুতুম্বাকম’গী ফিলোসোফীগী খুদম অমা ওইরি।
মরুপশিং,
হোলিস্তিক হেল্থকেয়রগী মতাংদা লাকপা মতমদা ভারতকী মরু ওইবা মপাঙ্গল য়াম্না লৈ। ঐখোয়গী নাক্তা তেলেন্ত লৈ। ঐখোয়গী নাক্তা তেক্নোলোজী লৈ। ঐখোয়গী নাক্তা ত্রেক রেকোর্দ লৈ। ঐখোয়গী নাক্তা চৎনবী লৈ। মরুপশিং, তেলেন্তকী মতাংদা অমুক লাকপা মতমদা, মালেম্না ভারতকী দাক্তরশিংগী তৌবা ঙম্বগী মতিকশিং উরে। ঐখোয়গী দাক্তরশিং অসি মখোয়গী হৈ-শিংবা অমসুং ৱাখল চেৎপগীদমক্তা ভারত অমসুং মীরমদা পাক শন্না ইকায় খুম্নৈ। মান্নবা মতৌ ওইনা নর্স অমসুং কেয়রগিভরশিংসু মমিং চৎলি। ভারতকী প্রোফেস্নেলশিংগী হৈ-শিংবদগী কান্নবা ফংগদবা হকশেলগী পথাপ কয়া মালেম শিনবা থুংবদা লৈ। ভারতকী নাৎ, অইং-অশা অমসুং খুন্নাইগী চৎনবীদা দাইভর্সিতী কয়া লৈ। ভারত্তা ত্রেন তৌরবা হেল্থকেয়র প্রোফেস্নেলশিংদা তোঙান-তোঙানবা এক্সপেরিএন্স কয়া লৈ। মসিনা মরম ওইদুনা ফিভম অমা হেক্তগা চুনহনবা ঙমগদবা স্কিল কয়া লৈহল্লি। মসিনা মরম ওইদুনা, ভারতকী হেল্থকেয়র তেলেন্ততা মালেম্না থাজবা থম্লিবনি।
মরুপশিং,
চহি চাম্মদা অমুকখক থোকপা লাইচৎনা মালেমদা অশেংবা ৱাফম কয়া অমা খঙহল্লে। অমগা অমগা নক্নবা মফম অসিদা ঙমখৈনা হকশেলগী শিংনবা কন্থোকপা ঙাকথোকপা ঙমদে হায়বা উৎলে। ইরাং থোক্লকপা মতমদা মালেমগী খাথংবা শরুকশিংনা অৱাবা কয়া য়াম্না থেংনখি অমসুং রিসোর্স পীদবগী মতৌ ফাওবা ঐখোয়না উরে। তসেংবা চাউখৎপা হায়বসিদি মীয়ামদা য়ুম্ফম ওইবনি। মেদিকেল সাইন্সতা কয়া য়াম্না চাউখৎলবসু, খ্বাইদগী অকোনবদা লৈবা মীওই অদুগী মফমদসু খুদোংচাবা ফংহনগদবনি। হেল্থকেয়র দোমেন্দা থাজবা য়াবা খোঙলোই অমা লৈবগী মরু ওইবা অদু লৈবাক অসিনা মসিগুম্বা মতম অসিদা খঙবা ঙমখি। ভারতনা লৈবাক কয়াগী খোঙলোই ওইখিবা অমসুং হিদাক অমসুং ভেক্সিন পীদুনা থৱাই কনবগী অথোইবা থবক পাংথোকপা ঙমখিবা অসিদা চাউথোকচবা পোকই। ঐখোয়গী মতিক লৈরবা সাইন্স অমসুং তেক্নোলোজী সেক্তরনা ভারত্তা শাবা ভেক্সিন পুথোকখি। ঐখোয়না মালেমগী কোবিদ-19গী তীকা থাবগী থৌওং খ্বাইদগী পাক শন্না অমসুং য়াঙনা পাংথোকপা লৈবাক ওইখি। ঐখোয়না লৈবাক 100 হেনবদা কোবিদ-19 বেক্সিন দোজ মিলিয়ন 300 থাখি। মসিনা ঐখোয়গী তৌবা ঙম্বগী মতিক অমসুং খোঙফম চেৎপগী মতৌ উৎলি। ঐখোয়না মশাগী মীয়ামগী অফবা হকশেল লৈহন্নিংবা লৈবাক খুদিংগী খ্বাইদগী থাজবা মরুপ ওইখিগনি।
মরুপশিং,
ভারতনা হেল্থকেয়রদা য়েংবা মিৎয়েং অসি চহি লিশিং কয়াদগী হোলিস্তিক ওইদুনা লাক্লি। ঐখোয়গী নাক্তা প্রিভেন্তিব অমসুং প্রোমোতিব হেল্থ অনিমক্কী নিংথীরবা চৎনবী লৈজৈ। য়োগ অমসুং ধ্যান তৌবগুম্বা পথাপ অসি হৌজিক্তি মালেমগী ইহৌ ওইরে। মখোয় অসিদি অরিবা ভারতকী মালেমদা তম্বা খুদোলনি। মান্নবা মতৌ ওইনা, ঐখোয়গী আয়ুর্বেদগী পথাপ অসিসু হকচাং নুংঙাইনা লৈবগী মপুং ফাবা হীরম অমনি। মসিনা হকচাং অমসুং ৱাখল অনিমকপু নুংঙাইনা লৈহল্লি। স্ত্রেস অমসুং পুন্সি মহিংদগী লাকপা লাইনাগী ৱারোইশিন অমা মালেম্না কন্না থিরি। ভারতকী নাৎকী ওইবা হেল্থকেয়রগী পথাপ্তা পাউখুম কয়া য়াওরি। মিল্লেতসু শরুক অমা ওইরিবা ভারতকী নাৎকী চিঞ্জাক অসিনা ফুদ সেক্যুরিতী অমসুং ন্যুত্রিসন্দা তেংবাংবা ঙমগনি।
মরুপশিং,
তেলেন্ত, তেক্নোলোজী, ত্রেক রেকোর্দ অমসুং ত্রেদিসনগী মথক্তা, ভারতকী নাক্তা অহোঙবা অমসুং লায়না ফংবা হেল্থকেয়রগী পথাপ লৈরি। মসি ঐখোয়গী য়ুমশিংদা উবা ফংবনি। সরকারনা শেল থাদবা মালেমগী খ্বাইদগী চাউবা হেল্থ ইন্স্যুরেন্স কভরেজ অসি ভারত্তা লৈ। আয়ুশমান ভারত ইনিসিএতিবনা মীওই মিলিয়ন 500 হেন্না কোন্দুনা লেম্না লাইয়েংলি। মীওই মিলিয়ন 40না শেল অমসুং চে-চাং চঙদনা মসিগী কান্নবা ফংনখ্রবনি। মসিনা ঐখোয়গী মীয়ামগী চাউরাকপা বিলিয়ন দোল্লর 7 কনবা ঙমখি।
মরুপশিং,
হেল্থকেয়রগী শিংনবশিংদা মালেম্না মাইয়োক্নরিবা অসিবুসু তোঙান্না থম্বা য়ারোই। হৌজিক অসিদি পুনশিনবগী মতম্নি। মসিমক ঐখোয়গী G20 প্রসিদেন্সীগী মিৎয়েং চঙবা হীরম অমনি। ঐখোয়গী পান্দমদি হেল্থকেয়রবু ঐখোয়গী লৈবাক্কী মীয়াম খক্তগী নত্তনা মালেম পুম্বগী মীয়ামগী এসেসিবল অমসুং এফোর্দেবল ওইহনবনি। খেন্নবা লৈবা খুদিংবু লৌথোকপা হায়বসি ভারতকী অহানবা মিৎয়েং চঙবা হীরম্নি। মতেং ফংদবা মীওইশিংদা তেংবাংবা হায়বসি ঐখোয়গী লাইনিংনি। ঙসিগী মীফম অসিনা মাইকৈ অসিদা লৈরিবা মালেমগী পার্ত্নরশিপকী মপাঙ্গল হেনগৎহনগনি হায়বগী থাজবা থম্মি। ঐখোয়গী ‘ৱান আর্থ- ৱান হেল্থ’কী কম্মন এজেন্দা অসিদা অদোমগা খোঙলোই ওইনিংই। ৱাহৈশিং অসিগা লোয়ননা, ঐহাক্না পুম্নমকপু অমুক্কা হন্না তরাম্না ওকচরি অমসুং কান্নবা ৱারী কয়া শান্নগনি হায়বগী থাজবা থমজরি। পুম্নমকপু থাগৎচরি!
