“লৈবাক অসিদা ইনফ্রাস্ত্রকচর চাউখৎহন্নবগী হৌজিক লৈরিবা খোঙজেল অমসুং পাক-চাউবা অসি ভারতমচা করোর 140গী অনিংবশিংগা চপ চানরে”
“বন্দে ভারতনা লৈবাক অসিগী মফম খুদিং শম্নগদবা নুমিৎ অদু পংকুই কুইদ্রে”“G20 মাইপাকপা অসিনা ভারতকী গনতন্ত্র, মীওই কাংলুপশিং অমসুং খেন্নবশিংগী থৌনা অদু উৎথোক্লে”“লৈবাক অসিগী হৌজিক অমসুং তুংগী দরকার ওইবশিংগীদমক মতম অমতদা ভারতনা থবক তৌরি”“মতুং তারকপদা অমৃত ভারত স্তেসনশিংনা অনৌবা ভারতকী মশক তাক্লগনি”“হৌজিক রেলৱে স্তেসনশিংগী মপোক নুমিৎ থৌরম পাংথোকপগী চৎনবী মখা তানা পাংথোক-চাউথোক্লগনি অমসুং মসিদা মীওইশিং হেন্না শরুক য়ারগনি”“পেসেঞ্জরশিং চৎথোক-চৎশিন লাইহন্নবা অমসুং নুংঙাইবা অমা ফংহন্নবা রেলৱেগী ইমপ্লোয়ি খুদিংমক লেপ্তনা পুক্নিং চঙনা থবক তৌগদবনি”“ভারত রেলৱেগী থাক খুদিংমক্তা অমসুং খুন্নাইদা অহোংবা পুরক্লিবা অসিনা চাউখৎলবা ভারত অমগী মাইকৈদা থাংজিনবা মরুওইবা খোঙথাং অমা ওইরগনি হায়না ঐনা থাজৈ”পুম্নমকপু খুরুমজরি!
থৌরম অসিদা শরুক য়াবীরিবা তোঙান-তোঙানবা রাজ্যশিংগী গবর্নরশিং, তোঙান-তোঙানবা রাজ্যশিংগী মুখ্য মন্ত্রীশিং, ঐহাক্কী কেন্দ্রগী কেবিনেতকী মেম্বরশিং, রাজ্যশিংগী মন্ত্রীশিং, এম.পি., এম.এল.এ., অতৈ মীয়ামগী মীহুৎশিং অমসুং ঐহাক্কী ইমুং মনুংশিং, মীকুপ অসি লৈবাক অসিদা অনৌবা লম্বী থোং পাকথোক চাউথোকপগী মতাংদা মমাংদা অমুক্তা লৈখিদ্রিবা খুদোংচাবা অমনি। অসিগুম্বা ইনফ্রাস্ত্রকচর চাউখৎপগী খোঙজেল অমসুং চাউবগী চাং অসি ভারত মচা করোর ১৪০গী মঙলানগা শম্নদুনা চৎলি। অমসুং মসিমক্নি ভারতনা ঙসি পাম্লিবসু। মসিনি নহা কয়া, ওন্ত্রপ্রিনর কয়া, নুপী কয়া, শিনফম পায়নরিবা, লল্লোন ইতীক তৌবা, অমসুং অনৌবা ভারতকী থবক কয়া পায়রিবা মীওই কয়াগী মঙলানসু। ঙসি অসুম্না বন্দে ভারত ত্রেন মাপল অমুক্তদা লমথারিবসিসু মায়কৈ অসিদা চঙশিনবগী খুদম অমনি। ঙসিদি রাজস্থান, গুজরাত, বিহার, ঝার্খন্দ, নোংচুপ বেঙ্গল, ওরিশা, তমিল নাদু, আন্ধ্র প্রদেশ, তেলঙ্গনা, কর্নাতাকা অমসুং কেরলাগী মীয়াম্না বন্দে ভারত এক্সপ্রেসকী খুদোংচাবা অমুক্তদা ফংলে। ঙসি হৌদোক্লিবা ত্রেনশিং অসি মমাংগীশিংদগী হেন্না নৌই অমসুং নুংঙাইবা হেল্লি। হায়রিবা বন্দে ভারত ত্রেনশিং অসিনা অনৌবা থৌনা, অনৌবা ইথিল অমসুং অনৌবা ভারতকী অনৌবা মঙলানগী খুদম্নি। বন্দে ভারতপু পাম্নবগী ইনোৎ অসি লেপ্পা লৈতনা হেনগৎলকপা উবসি ঐহাক অদুক্কী মতীক হরাওবা ফাওই। মসিনা হৌজিক ফাওবদা পেসেঞ্জর মিলিয়ন ১১ হেন্না পুখ্রে অমসুং মশীং অসি নোংম-নোংমগী হেনগৎলক্লি।
মরুপশিং,
লৈবাক অসিগী তোঙান-তোঙানবা রাজ্য অমসুং য়ুনিয়ন তেরিতোরীশিংদগী মীয়াম্না হৌজিক ফাওবদা বন্দে ভারত ত্রেন ২৫গী খুদোংচাবা ফংখ্রে। মসিদা অহেনবা ওইনা বন্দে ভারত এক্সপ্রেস মাপল হাপচিল্লগনি। বন্দে ভারতনা লৈবাক অসিগী মফম খুদিংদা য়ৌদুনা শম্নগদবা মতম অদু লাপত্রে। বন্দে ভারত এক্সপ্রেসনা মসিগী থৌদাং মপুং ফানা পায়খৎলিবসি অদুক্কী মতীক হরাওবা পোকই। হায়রিবা ত্রেনশিং অসিনা খোঙচৎকী মতম হন্থহনবা পাম্বা মীওইশিংদদি অদুক্কী মতীক মরু ওইরে। হায়রিবা ত্রেনশিং অসি অতোপ্পা শহর অমদা থবক মতম খরা লোইশিল্লম্লগা অমুক হল্লকপা পাম্বা মীওইশিংগীদি য়াম্না তঙাইফদবা ওইরে। বন্দে ভারত ত্রেনশিং অসিনা তুরিজম অমসুং শেন্মিৎলোনগী থবক থৌরমশিং য়াম্না হেনগৎহল্লে। বন্দে ভারত এক্সপ্রেস য়ৌবা মফমশিংদা তুরিস্ত লাকপগী মশীংসু হেনগৎলি। লমকোইবগী মশীং হেনগৎলিবা অসিনা তাক্লিবসি লল্লোন ইতীক অমসুং দুকান্দারশিংগী শেন্থোক হেনগৎলে তাক্লিবনি। মসিনা মফমশিং অসিদা অনৌবা থবক্কী খুদোংচাবসু পীরি।
ঐগী ইমুং মনুংশিং,
ভারত্তা ঙসি উরিবা থাজবগী ইথিল অসি চহি কয়াগী মমাংদা শেম্লম্বা নত্তে। ঙসিদি, ভারত মচা খুদিংমক্না অসিগুম্বা অনৌবা ভারতকী মায় পাকপশিং অসিদা চাউথোকপা পোকচরি। চন্দ্রয়ান-৩গী মায় পাকপনা ইচম চম্বা মীওই অমগী থাজবা অতিয়া পক্না ৱাংহনলি। অদিত্য এল-১ থাগৎপনা করিগুম্বা পুক্নিংনবু শেংলবদি য়ৌবদা ফংবা ৱাগদবা পান্দম অদুফাওবা ফংবা ঙম্মি হায়বসি হেন্না চেৎশিলহনখি। জি-২০ মীফম মায় পাকখিবনা ভারতকী লৈজরিবা গনতন্ত্রগী অঙকপা শক্তি, লম অমসুং পাক চাউরবা মান্নদবা কয়াদা থাজবা হেনগৎহনখি। ঙসিদি, ভারতকী অতৈ লৈবাকশিংগা ৱারী শানবগী হৈশিংবসু মালেম পুম্বনা ৱারীনরি। ঐখোয়গী নুপীশিংনা লুচিংবা চাউখৎপগী মঙলান অসিবু মালেম পুম্বনা শীংথানরি। মঙলান অসিগী মায়কৈদা চঙশিল্লদুনা, লৈঙাক অসিনা নারি শক্তি বন্দন এক্ত পার্লিয়ামেন্ততা পুথোকখ্রে। নারি শক্তি বন্দন এক্ত লাকপগা লোইননা, নুপীশিংনা হীরম কয়াদা লৌরিবা থৌদাং অমসুং মখোয়গী হেনগৎলক্লিবা থৌদাংগী মতাংদা খন্ন-নৈনখি। ঙসিদি, রেলৱে স্তেসন কয়া অমা নুপী ইমপ্লোইয়ীশিং খক্তনফাওবা চলাইরে। ঐহাক্না অসিগুম্বা থৌরাং অসিগীদমক রেলৱেবু থাগৎপা ফোংদোকচরি, নারি শক্তি বন্দন এক্তকীদমক লৈবাক অসিগী নুপীশিংবু হরাও তয়াম্বা ফোংদোকচরি।
মরুপশিং,
অসিগুম্বা অচেৎপা থাজবগী লংদাই অসিদা, অমৃতকালগী ভারতনা অপুনবা ওইনা হৌজিক্কী অমসুং তুংগী তঙাইফদবশিংদা থবক কয়া পায়খৎলি। পি.এম. গতিশক্তি নেসনেল মাস্তর প্লানসু ইনফ্রাস্ত্রকচরশিং থৌরাং তৌনবা অমসুং থবক্তা পায়খৎপদা স্তেকহোল্দর খুদিংমক্তগী মতেং পাংননবা শেমখ্রে। অনৌবা লোজিস্তিক্স পোলিসী অমা লৈবাক অসিদা পোৎচৈ পুথোক পুশিন তৌবদা মমল হন্থনবা অমসুং মপান্দা পুথোকপগী অচঙবা শেল হন্থনবা হৌদোকখ্রে। লৈবাক অসিদা লৈরিবা চথোক চৎশিনগী পাম্বৈ অমনা অতোপ্পশিংদা অমগা অমগা শৌগৎমিন্ননবা মলতি মোদেল ওইবা শম্নবগী মওং অমা শাগৎনবা হোৎনরি। হায়রিবা থৌরাংশিং অসিগী অচৌবা পন্থুংদি ভারতকী প্রজা মীয়ামগী চত্থোক চৎশিন ফগৎহনবা অমসুং তাঙলবা মতম মাঙবা হন্থহনবা হায়বসিনি। হায়রিবা বন্দে ভারত ত্রেনশিং অসিনা হায়রিবা ইথিল অসিগী মায়থোং ওইরি।
মরুপশিং,
ইন্দিয়ন রেলৱেনা লৈবাক অসিগী লাইরবশিং অমসুং মিদল ক্লাসশিংগী খ্বাইদগী থাজনিংঙাই ওইবা চত্থোক চৎশিনগী পাম্বৈ ওইরি। ঐখোয়গী লমদম অসিদা ত্রেন্দা চৎলিবা মীওই মশীং অসি অতৈ লৈবাক্কী মীয়ামগুম্না য়ামদে। ঙল্লিঙৈ মতমদা ইন্দিয়ন রেলৱেবু অনৌবা মায়কৈদা পুখৎনবা হোৎনবীরমদবা হায়বসি য়াম্না লাইবক থীবা অমনি। অদুমওইনমক, ঐখোয়গী অনৌবা লৈঙাক অসিনা ইন্দিয়ন রেলৱেজপু হিংগৎহন্নবা থবক কয়া অমা পায়খৎলে। লৈঙাক অসিনা মমাংদা তৌখিদ্রিবা মওংদা রেলৱে বজেৎ হেনগৎখ্রে। ররেলৱেগী বজেত অসি মমাংদা লৈরম্বদগী শরুক নিপাল হেন্না হেনগৎলে। রেলৱে লাইন অনি পুবা, মৈ থানবা, অনৌবা ত্রেন থাবা, অনৌবা লম্বী শেম্বনচিংবা থবকশিং অসি খোঙজেল য়াঙনা পায়খৎলি।
মরুপশিং,
করিগুম্বা ত্রেনশিং অসিনা ইন্দিয়ন রেলৱে তোংলিবা মীওইশিংগী য়ুম ওইরম্বা তারবদি, ঐখোয়গী রেলৱে স্তেসনশিং অসিনা মতম খরগী য়ুম ওইরমগনি। মীনাই নাইথাংগী মতমদগী হৌদুনা চহি ৭৫শুরবা নীংতম্লবা মতুং অসি ফাওবদা অহোংবা লৈত্রিবা রেলৱে স্তেসন কয়া অমা লৈ হায়বা ঐহাক্না খঙই। ভারত চাউখৎপা হায়বসিদা রেলৱে স্তেসনশিং অসিবুসু চাউখৎহনবা চঙই। মসিবু ৱাখলদা থম্লদুনা, ভারত্তা লৈরিবা রেলৱে স্তেসনশিং অসিবু অনৌবা মওংদা শেমগৎনবা ইহান হানবা ওইনা কেম্পেন অমা হৌদোকখ্রে। ঙসিদি, ফুত ওভর বৃদজ অমসুং এস্কালেতর কয়া মশীং থীঙমদনা লৈবাক অসিদা রেলৱে তোংদুনা চৎলিবা মীয়ামগী নুংঙাইনবগীদমক শারে। নুমিৎ খরনিগী মমাংদা, লৈবাক অসিগী মরুওইবা স্তেসন ৫০০ হেনবদা নৌনা শেমগৎ শাগৎপগী থবকশিং পায়খৎপা হৌখ্রে। অনৌবা স্তেসনশিং অসিবু অমৃত ভারত স্তেসন হায়না কৌগনি। হায়রিবা স্তেসনশিং অসিনা লাক্কদবা নুমিৎশিংদা অনৌবা ভারতকী মশক ওইগনি।
ঐহাক্কী ইমুং মনুংশিং,
রেলৱে স্তেসন অদুনা ওইনিংবা অমা ওইজসনু, মদুগী লিংখৎখিবগী নুমিৎ অমা লৈগনি, মপোক নুমিৎ হায়বসি শোইদনা লৈনরি। রেলৱেনা হৌজিক্তি রেলৱে স্তেসনশিংগী মপোক নুমিত পালন তৌবা হৌরকপদা অদুক্কী মতীক হরাওবা পোকই। হন্দক্তা নৌনা, তমিল নাদুগী কোইম্বেতোরদা লৈবা স্তেসন কয়া, মুম্বাই অমসুং পুনেগী ছত্ত্রপতি শিবাজি তর্মিনসনা মখোয়গী লিংখৎখিবা নুমিৎ পালন তৌনখি। কোইম্বেতোরগী রেলৱে স্তেসনশিং অসিনা মাংজৌননা মীয়ামদা শেবা তৌরকপগী চহি ১৫০ মপুং ফাখ্রে। অসিগুম্বা মায় পাকপা অসিগীদমক মীয়াম্না চাউথোকচবা হায়বসি মহৌশানি। হৌজিক্তি, রেলৱে স্তেসনশিংগী মপোক নুমিৎ পালন তৌবগী চৎনবী অসি হেন্না পাকথোক চাউথোকহল্লগনি অমসুং মসিদা মীওই কয়া অমসু হেনগৎহল্লগনি।
ঐহাক্কী ইমুং মনুংশিং,
অমৃতকাল অসিদা, লৈবাক অসিনা এক ভারত শ্রেস্থা ভারতকী মঙলান্দা অচেৎপা পান্দমগা লোইননা চঙশিল্লি। লৈবাক অসিনা নীংতম্বগী চহি ১০০ শুরকপা মতমদা ২০৪৭ ফাওবদা, চাউখৎপা ভারত অমগী পান্দম ফংনবা হোৎনবা মতমদা রাজ্য খুদিংমক্কী চাউখৎপা, মীপুম খুদিংমক্কী চাউখৎপগী পান্দম ফংবা চপ মান্ননা মরুওই। মমাংগী লৈঙাকশিংগী মতমদা, মন্ত্রী মন্দল শেম্বা মতমদা, খ্বাইদগী ঙাংনবা সমশ্যা অসি কনানা রেলৱে মন্ত্রী ওইগদগে হায়বসিনি। রেলৱে মন্ত্রী অদুগী রাজ্য অদুনা ত্রেন মশীং য়াম্না চেনগনি হায়না পান্নরম্মি। মতমদুদা অনৌবা ত্রেন কয়া অমা লাউথোকখি অদুবু ত্রেক্তা য়ৌরকপদি ঙমখিদে। ওসিগুম্বা মশাগীতা খনবা ৱাখল্লোনশিং অসিনা রেলৱে খক্তদা নত্তনা লৈবাক অসিদসু অকায়বা কয়া পীবি। লৈবা অসিগী মীয়াম্না অৱাবা মাইয়োক্নৈ। লৈবাক অসিনা রাজ্য অমহেক্তবু হুন্দোক্লম্বগী অৱাবদু অমুক হন্না পীররোই। ঐখোয়না 'সবকা সাথ সবকা বিকাস' হায়বা খোলাও অসিগা লোইননা মাঙদা চঙশিনগনি।
ঐগী ইমুং মনুং,
ঙসিদি, ঐহাক্কী হোৎনবা কনবা রেলৱেগী ইমপ্লোইয়ীশিংদা করিগুম্বা অমা হায়জনিংই। কনাগুম্বা অমনা শহর অমদা খোঙচৎ অমদগী হল্লকপা নৎত্রা অরাপ্পা মফম অমদগী হল্লকপা মতমদা, ইহান হানবদা মখোয়দা হংলিবসি খোঙচৎ অদুবু কমদৌরকপগে হায়না হংনৈ। মীওই অদুনা খোঙচৎ অদুদা থেংনরকপদু খক্তা নত্তনা ময়ুম থাদোকপদগীনা পন্থুংফম অদু য়ৌবা ফাওবগী ৱারী তমগনি। মহাক্না রেলৱে স্তেসনশিংদা কয়া য়াম্না হোংলবগে হায়বদু তাক্কনি, কয়া য়াম্না হেন্না ওর্গনাইজ ওইরবগে হায়বদু তাক্কনি। মহাক্না থেংনরকপশিংদা তি.তি. অদুগী লমচৎ, মহাক্কী মখুত্তা চেগী মহুত্তা তেব্লেত ওইনা পায়রম্বা, সেক্যুরিতীগী অহোংবা, চান-থক্নবগী মগুনশিং পুম্নমক য়াওগনি। মরম অসিনা, রেলৱেগী ইমপ্লোইয়ী ওইরিবা অদোম অদোম্না পেসেঞ্জরশিংদা নুংঙাইবা খোঙচৎ অমা ওইহন্নবগীদমক ইজ ওব ত্রাভেলগীদমক মতম চুপ্পদা খনগদবনি। অমসুং হৌজিক্কী মতম অসিদদি, অদোম্না অফবা থৌদোক্কী মতাংদা তাবা মতমদা, মদুনা নখোয়দা নুংঙাইবা পীরি। অমসুং ঐহাক্না অদুগুম্না পুকচেল লেপ্পা ইমপ্লোইয়ীশিংগীদমক থৱাই হকচাং য়াওনা নুংঙাইবা ফোংদোকচরি।
ঐগী ইমুং মনুংশিং,
ইন্দিয়ন রেলৱেনা চঙশিল্লক্লিবা অনৌবা লু নানবগী খোঙথাংশিং অসি লৈবাক অসিগী মীপুম খুদিংমক্না উনরে খঙনরে। ঐখোয়গী স্তেসন, ঐখোয়গী রেনশিং অসি হান্নদগী হেন্না লু নানলে। অদোম্না গান্ধী জয়ন্তিসু লাকদবা কুইদ্রে খঙনরে। গান্ধীজিনা লু নানববু কয়াগী মতীক পামজরম্মি হায়বসি ঐখোয় পুম্নমক্না খঙনরে। ঐখোয়না লু নানবগীদমক হোৎনরিবা পুম্নমক গান্ধীজিবু ইকাই খুম্নজরিবনি। মসিগা মান্ননা ঙসিদগী হৌদুনা নুমিৎ খরনিগী মতুংদা ওক্তোবর ১গী অয়ুক পুং ১০দা, লু নানবগী অচৌবা থৌরম অমা পাঙথোক্কনি। মসি লৈবাক অসিগী কাচিন কোইয়া শীনবা থুংনা মীয়াম্না লুচিংদুনা পাঙথোক্কনি। ঐহাক্না মীপুম খুদিংগী মফমদা লু নানবগী কেম্পেন অসিবু শোইদনমক্কী শরুক য়াবীনবা আপিল তৌরি। তাং অমা অয়ুক পুং ১০, শোইদনমক্কী। গান্ধী জয়ন্তি নুমিত অসিদা, মীপুম খুদিংমক্না খাদি অমসুং লমদম অসিগী পোৎথোক লৈবগী চৎনবীগী লাইৱা হঞ্জিনবীগদবনি। ওক্তোবর ২না গান্ধী জয়ন্তিনি অমসুং ওক্তোবর ৩১না সরদার ভল্লবভাই পতেলগী মপোক নুমিৎনি। মওং অমদদি, থা অসিমদি, ঐখোয়না খাদি লৈনবা, হেন্দলুম লৈনবা, হেন্দিক্রাফ লৈনবা হোৎনগদবনি। ঐখোয়না মতম পুম্বদা লোকেলগীদমক ভোকেল ওইনবা হোৎনগদবনি।
মরুপশিং,
ইন্দিয়ন রেলৱে অমসুং খুন্নাইগী থাক খুদিংদা লাক্লিবা অহোংবশিং অসিনা চাউখৎপা ভারত অমা ওইনবগী মায়কৈদা য়াম্না মরুওইবা খোঙথাং অমা ওইরগনি।
ঐহাক্না অমুক্কা হন্না লৈবাক অসিগী মীপুম খুদিংদা অনৌবা বন্দে ভারত ত্রেনশিংগীদমক য়াইফ পাউজেল পীজরি।
পুম্নমকপু থাগৎচরি।
