নমস্কার! নুংশিরবা প্রিভ্যেত মোস্কবা, কমদৌরিবগে?
অদোমগী মীনুংশি, অদোমগী ইকায় খুম্নবা, অদোম্না মতম কাইথোকপীদুনা মফমসিদা লাকপগীদমক্তা ঐহাক্না থাগৎচরি। ঐহাক ইথন্তা লাকপা নত্তে। ঐহাক্কা লোয়ননা য়ামত্লবা পোৎলম কয়া পুদুনা লাক্লিবনি। ঐহাক্না হিন্দুস্তানগী লৈবাক লৈহাওগী মনম পুদুনা লাক্লিবনি। লৈবাক মীয়াম করোর 140গী নুংশিবা পুদুনা লাক্লিবনি। মখোয়গী য়াইফ পাউজেল কয়া পুদুনা লাক্লিবনি। অদুগা, অহুম্লক শুবা ওইনা সরকার পায়রবা তুংদা ইন্দিয়ন দাইস্পোরাগা মোস্কো অসিদা অদোমগা লোয়ননা অহানবা উন্নবসিদা ঐহাক্না নুংঙাইবা ফাওরি।
অদুনা মরুপশিং,
ঙসি অসি জুলাই 9নি অমসুং ঐহাক্না ৱাশক লৌখিবদু থা অমা মপুং ফারে। ঙসিদগী থা অমগী মমাংদা, জুন 9দা ঐহাক্না অহুম্লক শুবা ওইনা ভারতকী প্রধান মন্ত্রী ওইনা ৱাশক লৌখি, নুমিত্তুদা ঐহাক্না করিগুম্বা অমা ৱাশকখি। ঐহাক্কী অহুমশুবা তর্ম অসিদা ঐহাক্না ইশাগী পাঙ্গলবু শরুক অহুম হেনগৎনা থবক তৌগনি হায়বা ফিরেপ লৌখি। সরকারগী পান্দম কয়াদা অহুমশুবা হায়বা মশিং য়াওরিবা অসুশু তান চানবদি নত্তে। সরকার অসিনা মালেমগী খ্বাইদগী অহুমশুবা চাউবা শেন্মিৎলোন ওইবা, লাইরবশিংগী য়ুম করোর অহুম শাবা অমসুং লাক্ষপতি দিদি করোর অহুম শেম্বগী পান্দম থম্লি। ৱাহৈ অসি অদোমগীদি অনৌবশু ওইরম্বা য়াই।
ভারতকী খুঙ্গংশিংদা সেল্ফ হেল্প গ্রুপ কয়া চলায়রি। ঐখোয়না মখোয়গী মপাঙ্গল য়াম্না হাপ্নিংই, মখোয়গী স্কিল দিভেলপমেন্ত তৌবা পাম্মি, মখোয়বু দাইবর্সিফিকেসন তৌবা পাম্মি। ঐহাক্কী অহুমশুবা তর্ম অসিদা খুঙ্গংগী নুপীশিংগী মনুংদগী করোর অহুমদি লাক্ষপতি দিদি ওইহনবা হায়বসি ঐহাক্কী অপাম্বনি। মসিনা হায়বদি, মখোয়গী চহিগী শেন্থোক অসি লাক্ষ অমদগী হেলহনবা হায়বনি, মসিদি য়াম্না চাউবা পান্দম অমনি। অদুবু, অদোমগুম্বা মরুপশিংগী মতেং ফংলবদি খ্বাইদগী চাউবা পান্দম ফাওবা লায়না ফংবা ঙমগনি। অদুগা ভারতনা হৌজিক করিগুম্বা অমা পাংথোক্কে খল্লবদি শোইদনা পাংথোকই হায়বা অদোম্না খঙলবনি। ভারত অসি ঙসিদি মালেমগী অতোপ্পা লৈবাক অমত্তনা ঙমদবা থাগী মফমদা চন্দ্রয়ানবু থাবা ঙম্বা লৈবাক ওইরবনি। মালেমদা দিজিতেল ত্রাঞ্জেক্সনগী খ্বাইদগী থাজবা য়াবা মোদেল পীরিবা লৈবাক অমা ভারতনা ওইরবনি। সোসিএল সেক্তরদা অফবা পোলিসী কয়া শেমদুনা লৈবাক মীয়াম্বু মপাঙ্গল হাপ্লিবা লৈবাক অমা ভারতনা ওইরি। মালেমগী খ্বাইদগী অহুমসুবা চাউবা স্তার্তঅপ ইকোসীস্তেম ভারত্তা লৈরি। ইং 2014দা মীয়াম্না ঐহাক্কী ইফমদা লৈবাক সেবা তৌনবা খুদোংচাবা পীখি। মতমদুদা স্তার্তঅপ খরবুদি লৈরম্মি, অদুবু ঙসিদি লাক্ষকী খুজিংদা লৈরে। ভারত অসি ঙসিদি রেকোর্দ ওইবা মশিংদা পেতেন্ত ফাইল তৌরি। রিসর্চ কয়া ফোঙলি। মসিদি ঐহাক্কী লৈবাক্কী নহাশিংগী মতিক্নি, মখোয়গী পাঙ্গলনি অদুগা মালেম্না হিন্দুস্তানগী নহাশিংগা তেলতেন্ত উবদা লোয়না ঙক্নরবনি।
মরুপশিং,
হৌখিবা চহি 10দা লৈবাক অসিনা চাউখৎ থৌরাংগী মায়কৈদা চৎখিবা খঙজেল অসি অদুক্কী মতিক য়াঙখি, মদু উবদা মালেম্না ঙক্নখ্রবনি। অদুনবু ভারত অসি হোংলক্লি হায়নরিবনি। অদোমশু লাকপা মতমদা মসিমক ফাওবা নত্ত্রো? ভারতকী হোংলবা ফিভম, চাউখৎ থৌরাং অসি ময়েক শেংনা উরবনি। জি-20গুম্বা থৌরম মায় পাক্না পাংথোকপা মতমদা মালেম পুম্বনা ভারত অসি হোংলে হায়না খোঞ্জেল অমত্তদা হায়নরিবনি। ভারতনা শুপ্নগী চহি তরাগী মনুংদা এয়রপোর্ত মশিং শরুক অনি হেনগৎহনখিবা মতমদা মালেম্না ভারত্তা অওনবা লাক্লে হায়নরিবনি। শুপ্নগী চহি তরাগী মনুংদা কিলোমীতর 40দগী হেনবা রেল লাইন ইলেক্ত্রিফিকেসন তৌবা ঙমখিবদা মালেম্না ভারতকী মতিক মপাঙ্গল কনবগী মতৌ উনখিবনি। ভারতনা দিজিতেল পেমেন্তকী অনৌবা রেকোর্দ থমখিবা, এল-ৱান পোইন্ততগী নুমিৎকী ওর্বিত মপুং ফানা কোয়বা মতমদা, মালেমগী খ্বাইদগী ৱাংবা রেল-ব্রিজ শাবা মতমদা, মালেমগী খ্বাইদগী ৱাংবা মীতম শাবা মতমদা মালেম্না ভারত অসি তসেংনা অহোংবা লৈরে হায়নরবনি। অহোংবা অসি মতৌ করম্না লাকপনো? মসিদি লৈবাক মীয়াম করোর 140না মশাগী পাঙ্গলদা থাজবা মতমদা ওইথোক্লিবনি। মালেম শিনবা থুংবদা শন্দোক্তুনা লৈরিবা ভারত মচাশিংগী পাঙ্গলদা থাজবা অমসুং চাউথোকচবা মতমদা ওইথোক্লিবনি। মীয়াম করোর 140না চাউখৎপা ভারত অমা শেম্লসি হায়বগী পান্দমগা লোয়ননা অঙম্বা হোৎনবদগীনি। লৌমী, নহা অমসুং লাইরবা খুদিংনা হোৎনরি।
ঙসিদি, মালেমগী কাচিন কোয়া খুদিংদা ভারত মচা লৈনরি। ভারত ইমা লৈবাক্কী চাউখৎ থৌরাংশিং অসিদা অদোম খুদিংশু চাউথোকচরমগনি। অদোমগী ভারতনা ঙসি করম্বা থাক্তা য়ৌবা ঙম্লে হায়না অদোম্না পোঙনা পাউদম্লগনি। অদোমগী মীরম লৈবাক্কী মরুপশিংগা ৱারী শাবদা ভারতকী চাউখৎ থৌরাং মমুৎ তানা খঙহল্লগনি অমসুং মখোয়শু অদুমক তাদুনা লৈরমগনি। ঐহাক্না হায়রিবা অসি চুম্মি নত্ত্রগা লাল্লি অদোম অমুক্তা ঐঙোন্দা হায়বীরকউ। অদোম মসিমক তৌইকো? মালেম্না অদোমদা য়েংবা মিৎয়েংশু হোংলম্মনি? মসি ঐখোয়গী মীয়াম করোর 140না পাংথোক্তুনা উৎলিবনি। ঙসিদি, মীয়াম করোর 140 অসিনা দিকেদ কয়াদগী মাইয়োক্নদুনা লাক্লবা শিংনবা কয়াগী ৱারোইশিন পুরকপা হায়বসিদা থাজবা থম্নরি। কার্পেৎ মখাদা লোত্তুনা থম্বদু লৈবাক অসিনা হৌজিক পামদ্রে।
ভারত মচা করোর 140না হীরম খুদিংদা পুম্নমক্তগী মকোক থোংনবা শেম শাদুনা ঙসিদি লৈরবনি। লৈবাক্কী শেন্মিৎলোনবু ঐখোয়না কোবিদ মতমদগী হৌনা শিংনবা কয়াগী মরক্তগী পুথোক্লকপদা নত্তনা মালেমগী খ্বাইদগী মপাঙ্গল লৈবা শেন্মিৎলোন ওইহল্লে হায়বসি অদোম খঙলবনি। ঐখোয়না অৱাৎপা ইনফ্রাস্ত্রকচর মেনবতা নত্তনা মালেমগী থাক্তা লৈবা মশক থোকপা থৌওং কয়াশু শেম্লিবনি। ঐখোয়না হকশেলগী সেবা ফগৎহনবতা নত্তনা লৈবাক্কী লাইরবা খুদিংদা লেম্না লাইয়েংবগী খুদোংচাবশু পীরিবনি অমসুং মালেমগী খ্বাইদগী চাউবা হেল্থ এস্যুরেন্স স্কিম, অয়ুশমান ভারত চলায়রি। মসিদি মালেমগী খ্বাইদগী চাউবা স্কিম অমনি। মসি মতৌ করম্না ওইথোক্লিবনো মরুপশিং? মসি কনানা পাংথোক্লিবনো? ঐ অমুক্কা হায়গেকো, লৈবাক মীয়াম করোর 140না। মখোয়না মঙলানশু মঙই, মঙফাওনহনবশু ঙম্মি, মদুগীদমক্তা অমত্তা ওইনা হোৎনৈ। মসিদি ঐখোয়গী মীয়ামগী হোৎনজমন অমসুং থাজবা য়াওদনা ওইথোকপা ঙম্লোই।
মরুপশিং,
ভারত্তা লাক্লিবা অহোংবা অসি শুপ্নগী সীস্তেম অমসুং ইনফ্রাস্ত্রকচরখক্কী নত্তে। লৈবাক্কী মীয়াম খুদিংগী মশাদা থাজবগী মতৌদশু উবা ঙম্লে। অদুগা মায় পাকপগী খ্বাইদগী অহানবা খোঙথাং অসিদি ইশাদা থাজবনি। ইং 2014গী মমাংদা ঐখোয় নীংবা কায়বগী অৱাবদা পন্দুনা লৈরম্লবনি। পেন্দবা, খোইশাওনবনা ঐখোয়বু ফাজিন্দুনা থম্লম্বনি। ঙসিদি লৈবাক্না মশাদা থাজরে। লায়না অমগী অনাবা অনি হোস্পিতালদা লৈরবা, মখোয়বু লাইয়েংবীনবা হৈ-শিংবা দাক্তরশু লৈরবা, অনাবা অমনা অৱাবা পেন্দবনা থনবা অদুগা অনাবা অমনা মশাদা থাজবা মীওই ওইবা মতমদা মশাদা থাজবা অনাবা অদুনা হোস্পিতালদগী নাবা ফদুনা হান্না থোক্লকই। অৱাবা পেন্দবা অনাবা অদুদি অতোপ্পা অমনা থাংনদুনা পুরক্কনি। ঙসিদি লৈবাক অসি মশাদা থাজরে অমসুং মসিনা হিন্দুস্তানগী খ্বাইদগী চাউবা লন্নি।
ঐহাক্না থাজবা অমা লৈ, অদোমশু ভারতনা হন্দক্তা তি-ত্বেন্তী ৱর্ল্দ কপ্তা মায় পাকপদা মফমসিদা হরাওবা ফোংদোক্লমগনি। ফোংদোকইকো? চাউথোকচবা ফাওখিকো? মায় পাকপগী তসেংবা ৱারী অমদি মায় পাক্নবা চৎখিবা খোঙচৎশু ওইরিবনি। ঙসিগী নহা অমসুং নহা ওইরিবা ভারতনা অরোইবা বোল ফাওবা মায়থীরনি খন্দে। মসিগুম্না মায়থীগনি খন্দবা মীওইনা মায় পাকপনি। ৱাখল্লোন অসি ক্রিকেত খক্তদা অখন্নবা নত্তে, অতোপ্পা মশান্নশিংদশু উবা ফংলবনি। হৌখিবা চহিশিংদা পাংথোকখিবা মালেমগী তুর্নামেন্ত খুদিংদা ভারতকী শান্নরোইশিংনা পুৱারী ওইরবা থৌওং কয়া উৎখ্রবনি। হন্দক্কী পেরিস ওলিম্পিক্স অসিদশু ভারতকী মায়কৈদগী অরিংবা তীম অমা থাগনি। মখোয় পুম্নমক্না মশাগী লৈজবী থাদুনা শান্নগনি, অদোমশু মসি য়েংবীয়ু। ভারতকী নহাগী পাঙ্গলনা মশাদা থাজরিবা অসিনা ভারতকী তসেংবা লন্নি। মসিগী পাঙ্গল অসিমক্না ভারতপু 21শুবা চহি চাগী অনৌবা অমসুং অৱাংবা থাক্তা পুবগী খ্বাইদগী কনবা পাঙ্গল ওইগদৌরিবনি।
মরুপশিং,
অদোম্না মীখলগী মতৌশু উরম্লগনি, মীখল করম্না পাংথোকখি হায়বা তিভিদা উরম্লগনি। কনা করি তৌরি, কনানা করি হায়রি লোয়না খঙলমগনি।
মরুপশিং,
ভারতনা মমাংগী চহি 10দা পুরকখিবা চাউখৎ থৌরাং অদুদি শুপ্নগী ত্রেলর অমনি হায়না ঐহাক্না মীখল ময়াদা হায়খিবনি। মতুংগী চহি 10 অসিদা খোঙজেল হেন্না চাউখৎলকখিগনি। সেমিকন্দক্তরদগী ইলেক্ত্রোনিক্স মেন্যুফেকচরিং ফাওবা, গ্রীন হাইদ্রোজেন্দগী ইলেক্ত্রিক গারী ফাওবা, মালেমগী থাক্তা লৈবা ইনফ্রাস্ত্রকচর, ভারতকী অনৌবা খোঙজেল অসিনা মালেমগী চাউখৎপগী খোঙচত্তা অনৌবা অমসুং পুৱারী ওইরবা তাঙ্কক অমা হৌদোক্লগনি। মালেমগী শেন্মিৎলোনগী শাহৌদা ভারতনা চাদা 15 গী শরুক তম্লিবনি। তুংগী মতমদা, মসিগী চাং অসি য়াম্না হেনগৎলকখিগনি। গ্লোবেল পোভর্তীদগী হৌরগা ক্লাইমেত চেলেঞ্জ ফাওবা, শিংনবা খুদিংমক্কা মাইয়োক্নবদা ভারতনা খ্বাইদগী মমাং থারিবনি, থাগনি, অদুগা ঐহাক্কী ওইনদি দি.এন.এ. ফাওবদা শিংনববু শিংনবগী পোৎলম য়াওরবনি।
মরুপশিং,
লৈবাক মীয়াম মরক্তা লাপ্নবগী ৱাখল্লোন লৈরক্তবা, লুচিংবগী ৱাখল্লোন অদুমক মীয়াম্না খল্লকপা মতমদা ইথিল য়াম্না লাকই। মসিমক ঐহাক্না উরি অমসুং মসিদা ঐহাক্না য়াম্না নুংঙাইবা ফাওরি।
মরুপশিং,
মালেমগী য়াইফ য়ুম্বালগীদমক্তা ভারত অমসুং রসিয়ানা লেংগোন্নদুনা চৎমিন্নরিবা অসিদা ঐহাক্না নুংঙাইবা ফাওই। ঙসি মফমসিদা তিল্লিবা মীওই খুদিংনা ভারত অমসুং রসিয়াগী মরীবু অনৌবা থাক্তা পুখৎলিবনি। অদোম্না ইশাগী হোৎনজমন অমসুং পুকচেল শেংবগী মতৌদা খুন্নাইদা ইশাগী থৌদাং য়ারিবনি।
মরুপশিং,
ভারত রসিয়াগী মরী অসিদা অখন্নবা থৌদাং লৌরিবা অসিদি ঐহাক্কী নুংশিরবা মরুপ রাস্ত্রপতি পুতিংগী লুচিং পুরেল অসিনি। মসিবু ঐহাক্না থাগতচনীংই। মরী অসিবু দিকেদ অনি মপাঙ্গল লেঙদনা লৈহনবগী শীংথানিংঙাই ওইরবা থৌদাং মহাক্না পায়খৎখিবনি। মমাংগী চহি তরাদা ঐহাক্না রসিয়াদা তরুক্লক লাকখি। খোঙচৎশিং অসিদা ঐখোয় অনি 17 লক উন্নখি। উন্নবা খুদিংনা থাজবা অমসুং ইকায় খুম্নবা হেনগৎহনখি। ঐখোয়গী মহৈরোইশিংনা লান্দা পনখিবা মতমদা রাস্ত্রপতি পুতিন্না মখোয়বু ভারত্তা অমুক থিল্লকপদা তেংবাংখি। মসিগীদমক্তা ঐহাক্না রাস্ত্রপতি পুতিন অমসুং রসিয়াগী মীয়াম্বু থাগৎচরি।
মরুপশিং,
ঐখোয়গী মশিং য়াম্লবা নহা কয়া রসিয়াদা মহৈ তম্বা হৌজিক্কান য়াম্না চৎনরি। ঐখোয়গী তোঙান-তোঙানবা রাজ্যশিংগী মশাগী লুপ লৈনৈ হায়বশু ঐহাক তারে। মসিনা মরম ওইরগা রাজ্য খুদিংগী চাকচা-য়ুথক, ফিজেৎ-চাজেৎ, লোল অমসুং ঈশৈ নোংমাইগী দাইবর্সিতীশু লৈহল্লি। অদোমশু দিৱালীদগী হৌরগা হোলি ফাওবা য়াম্না চাউনা পাংথোক্লমগনি। ভারতকী নীংতম্বা নুমিৎশু মফমসিদা য়াম্না হরাও তয়াম্না পাংথোকই। হন্দক্কী ওগস্ত 15 অসিনা খ্বাইদগী অমুক হেন্না চাউনা পাংথোক্কনি হায়না ঐনা থাজবা থম্লিবনি। মমাংগী থাদা তাখিবা মালেমগী য়োগ নুমিত্তা মফমসিদা মীয়াম মশিং য়াম্বনা শরুক য়াদুনা থৌরম পাংথোকখি। লমদমসিগী রসীয়ন মরুপশিংশু ঐখোয়গী কুহ্মৈশিংদা অদোমগী হরাও তয়াম্বগা চপ মান্ননা শরুক য়াই তাবদা ঐহাক য়াম্না নুংঙাইবা ফাওই। মসিগুম্বা মীওই মশেলগী মরক্তা লৈনরিবা মরী অসিদি সরকারগী থাক্তগী য়াম্না হেন্না ৱাংলে, মসিনা পাঙ্গল অমশু ওইরিবনি।
মরুপশিং,
মসিগুম্বা পোজিতিবিতীগী মরকসিদা নুংঙাইবা পাউ অমা তমজগে। কজান অমসুং য়িকাতেরিন্দা অনৌবা কন্স্যুলেত অনি হাংবগী ৱারেপ লৌখ্রে। মসিনা চত্থোক-চৎশিন অমসুং কারবারদা য়াম্না তেংবাংগনি।
মরুপশিং,
ঐখোয়গী মরী অসিগী খুদম অমদি অস্ত্রাখান্দা লৈরিবা ইন্দিয়া হাউসশু অমা ওইরিবনি। 17শুবা চহি চাদগী গুজরাতী ব্যুজিনেসমেনশিংনা মফমসিদা খুন্দা লৈতাদুনা লৈরকখি। ঐহাক্না গুজরাৎকী মুখ্য মন্ত্রী নৌনা ওইখিবা মতমদা মফমসিদা চৎখি। নোর্থ-সাউথ ত্রান্সপোর্ত কোরিদোরদগী অহানবা কন্সাইনমেন্তশু মফম অসিদা চহি অনিগী মমাংদা য়ৌখি। কোরিদোর অসিনা মুম্বাই অমসুং অস্ত্রাখানগী হিথাংফম শহর অসিগা শম্নহল্লি। ঐখোয়না হৌজিক চেন্নৈ-ব্লাদিবোস্তোক ইস্তর্ন মেরিন কোরিদোরগী থবকশু পায়খৎলি। ঐখোয় লৈবাক অনিনা গঙ্গা-ভোলগা দাইলোগ ওফ সিবিলাইজেসন্দগী অমনা অমবু নৌনা অমুক শকখঙনরিবনি।
মরুপশিং,
ঐহাক্না মফমসিদা ইং 2015দা লাকখিবা মতমদা 21শুবা চহি চা অসিদি ভারতকী ওইগনি হায়খিবনি। মতমদুদা ঐহাক্না হায়বনি, হৌজিক্না মালেম্না হায়রি। মালেমগী অখঙ অহৈ কয়ানা হীরম অসিগী মতাংদা হৌজিক য়েৎনদ্রে। পুম্নমক্না ৱাফম অসিবু য়ারবনি। ঙসিদি মালেম্না ভারতপু মালেমগী মরুপ হায়না খঙনরি। ভারতকী তৌবা ঙম্বগী মতিক হেনগৎলক্লিবা অসিনা মালেমগী তংদু লৈতাবা অমসুং নুংঙাই য়াইফবগী ফিভমদা তেংবাংগনি থাজনরি। নৌনা ওইরক্লিবা মলতিপোলর ৱর্ল্দ ওর্দর অসিদা ভারতপু মপাঙ্গল লৈবা য়ুম্বীনি হায়না খন্নরি। ভারতনা শান্তি, দাইলোগ অমসুং দিপ্লোমেসীগী ৱারী শাবদা মালেম পুম্বনা তানরি। মালেমদা খুদোংথীবা অমা হেক থোকপদা ভারতনা খ্বাইদগী হান্না য়ৌরিবনি। অদুগা, মালেমগী থাজবা ঙাক্নবা ভারতনা করিমত্তা লেম্না থাদে। মতম শাংবদগী হৌনা মালেম অসিদা ইনফ্লুএন্স ওরিএন্তেদ গ্লোবেল ওর্দর অমা উবা ফংলম্মি। ঙসিগী মালেম অসিদা মথৌ তারিবা অসিদি ইনফ্লুএন্স নত্তে, কনফ্লুএন্সনি। অপুনববু লাইনীং ওইনা লৌবা ভারত্তগী হেন্না মসিগুম্বা ৱাফম অসি কনানা মুন্না খঙগনি?
মরুপশিং,
অদোম খুদিংমক অসি রসিয়াদা লৈবা ভারতকী এম্বেসেদর ওইরিবনি। মিসন মনিংদা ফম্লিবশিংনা রাজদুৎনি অদুগা মিসন মপান্দা লৈরিবশিংনা রাস্ত্রদুৎনি। অদোম্না মতৌ অসিগুম্না লৈবাক অনিগী মরীদা তেংবাংদুনা লৈবীয়ু।
মরুপশিং,
ভারত্তা চহি হুম্ফুগী মতুংদা সরকার অমবু অহুম্লক শুবা ওইনা থংন-থংননা খনবা হায়বসি য়াম্না চাউবা ৱাফম অমনি। অদুবু, মীখল অসিদা মীপুম খুদিংগী মিৎয়েং অসি মোদীদা লৈখিবনা মরু ওইবা থৌদোক খরদা মীয়ামগী পুক্নিং চঙলুদ্রে। হন্দক্কী মীখল অসিগা চপ মান্নবা মতমদা রাজ্য মরিগী মীখলশু পাংথোকখি। অরুনাচল প্রদেশ, সিক্কিম, আন্ধ্র, ওরিশাগী রাজ্য মরিসিদা ঐখোয়না মপুং ফানা মেজোরিতী ফংখি। অদুগা হৌজিক্না, মহাপ্রভু জগন্নাথকী য়াত্রা পাংথোক্লি। ওরিশানা অচৌবা ইহৌ অমা পুরকখ্রে অদুনা ঐহাক ঙসি ওরিশাগী স্কার্ফ য়ান্দুয়া লাক্লিবনি।
মরুপশিং,
অদোম পুম্নমকপু মহাপ্রভু জগন্নাথনা থৌজানবীবা ওইসনু, হকশেল ফনা লৈবীয়ু হায়বা পাউজেল অসিগা লোয়ননা ঐহাক্না পুম্নমকপু থাগৎচরি। ঐহাক্না অমুক্কা হন্না লাওমিন্নসি –
ভারত ইমানা য়াইফরে !
ভারত ইমানা য়াইফরে !
ভারত ইমানা য়াইফরে !
ভারত ইমানা য়াইফরে !
ভারত ইমানা য়াইফরে !
ভারত ইমানা য়াইফরে !
The two leaders acknowledge the deep people-to-people ties between India and Canada
