“সরদার পতেল পুৱারীগী মশক নাইবা মীওই অমা ওইবতা নত্তনা ইরৈবাকচা খুদিংমক্কী থমোয়দা মফম কনদুনা লৈরি”
“ভারত মচা করোর ১৩০ হেনবনা লৈরিবা মালেমগী লৈমাই অসি ঐখোয়গী আত্মা, ঐখোয়গী মঙলানশিং, ঐখোয়গী অনীংবশিংগী মরু ওইবা শরুক অমনি,”“সরদার পতেলনা মপাঙ্গল কনবা, অমত্তা ওইবা, চেকশিনবা অমসুং মীৎনা শিংবা ভারত অমা ওইহনবা পাম্লমখি”“সরদার পতেলনা পীরম্বা ইথিলনা ভারতপু মপালগী অমদি মনুংগী ওইবা মখল পুম্নমক্কী শিংনবশিং মপুং ফানা মায়োক্নবা ঙম্লহল্লি”“লৈবাক অসিগী ফিরেপ অমদি ঈশিং, নোংথক, কংফাল অমসুং শুন্দ্রংগী মতিক ময়াই অমুক্তা ওইখিদ্রিবা মওংদা পুথোক্লি অমসুং লৈবাক অসিনা আত্মনির্ভারত্তগী অনৌবা পান্দম ফংনবা লম্বীদা চংশিনবা হৌখ্রে”“মসিগী ‘নীংতম্বগী অমৃতকাল’ অসি অমুক্তা ওইখিদ্রিবা মওংদা চাউখৎপা পুরকপনি, অরুবা পান্দমশিং ফংবা ঙম্বনি অমসুং সরদার সাহেবনা মঙজরম্বা ভারতকী মঙলান অদু মঙফাওনহনবনি”“করিগুম্বা সরকারগা লোয়ননা মীয়ামগী ‘গতিশক্তি’সু শীজিন্নরবদি ওইথোকপা ঙমলোইদবা অমত্তা লৈতে”খুরুমজরি!
রাস্ত্রিয়া এক্তা দিৱসনা লাকপদা ইরৈবাকচা পুম্নমক্তা য়াইফ পাউজেল পীজরি! এক ভারত, শ্রেস্থ ভারতকীদমক মহাক্কী পুন্সিগী মীকুম খুদিংমক কত্থোক্লমখিবা অদুগুম্বা জাতিগী অথৌবা সরদার বল্লভ ভাই পতেলবু ঙসি লৈবাক অসিনা ইকাই খুম্নবা উৎলি।
সরদার পতেলজী অসি পুৱারীগী মশক নাইবা মীশক অমা ওইবতা নত্তনা ইরৈবাকচা খুদিংমক্কী থমোয়দা মফম কনদুনা লৈরি। ঙসি, অমত্তা ওইবগী পাউজেল অসিবু মাংদা পুদুনা চৎলিবা ঐখোয়গী থৱায় য়াওবা মরুপশিং অসিনা অমত্তা ওইবগী ৱাখল্লোন অসিগীদমক কত্থোকপগী খুদম অমা ওইরি। লৈবাক অসিগী কাচিন-কোয়া খুদিংদা লৈরিবা রাস্ত্রিয়া এক্তা পরেদশিং অমসুং স্তেচ্যু ওফ য়ুনিতীদা পাঙথোক্লিবা থৌরমশিং অসিদা ৱাখল্লোন অসি উবা ফংলি।
মরুপশিং,
ভারত অসি শুপ্নগী জিওগ্রাফিকেল য়ুনিতী অমা লৈবতা নত্তনা অফবা ৱাখল্লোনশিং, লৌশিং অমদি সভ্যতা অমসুং চৎনবীগী অফবা মওং-মতৌশিং মপুং ফংনা চেনবা লৈবাক অমসু ওইরি। ভারত মচা করোর ১৩০ হেনবনা লৈরিবা মালেমগী লৈমাই অসি ঐখোয়গী আত্মা, ঐখোয়গী মঙলানশিং, ঐখোয়গী অনীংবশিংগী মরু ওইবা শরুক অমনি। চহি কয়াদগী লৈরক্লবা ভারতকী খুন্নাই অমদি চৎনবীশিং অসি শেমগৎলকখিবা দেমোক্রেসীগী মপাঙ্গল কনবা য়ুম্ফম অসি ‘এক ভারত’কী ৱাখল্লোন অসিনা মপাঙ্গল হাপখি। অদুবু হী অসিদা তোংমিন্নরিবা মীওই খুদিংমক্না হী অসি তেক্তা কাইদনবা য়েংশিনমিন্নবা মথৌ তাই হায়বসু খঙবা তাই। করিগুম্বা ঐখোয়না অমত্তা ওইনা লেপ্পা মতম অদুদা ঐখোয়না মাংদা চংশিনবা ঙমগনি, মতম অদুদা লৈবাক অসিগী পান্দমশিং অদু থুংহনবা ঙমগনি।
মরুপশিং,
সরদার পতেলনা মতম চুপ্পদা ভারতবু মপাঙ্গল কনবা, অমত্তা ওইবা, চেকশিনবা, নোলুকপা অমসুং চাউখৎপা ওইহনবা পাম্লমখি। মহাক্না মতম চুপ্পদা লৈবাক্কী য়াইফনবা হান্না খনখি। ঙসি, মহাক্না পীরম্বা ইথিলগী মখাদা ভারতনা মপালগী অমদি মনুংগী ওইবা মখল পুম্নমক্কী শিংনবশিং মপুং ফানা মায়োক্নবা ঙমহল্লি। হৌখিবা চহি তরেৎ অসিদা লৈবাক অসিনা দিকেদ কয়া শুরবা অরিবা আইনশিং মুত্থৎলি অমসুং রাস্ত্রিয়া এক্তাগী ৱাখল্লোন অসিবু থৌগৎনবা অনৌবা পনখৈ তম্না পুরি। জম্মু কাশ্মির, অৱাং-নোংপোক নত্ত্রগা হিমালয়গী মনুং হঞ্জিনবা মফমদা লৈবা খুঙ্গং অমা ওইরবসু ঙসি পুম্নমক অসি চাউখৎ লম্বেলদা পুরক্লি। মতমগা চুনবা ইনফ্রাস্ত্রকচর শাবনা লৈবাক অসিদা লৈরম্বা লমিৎ-তুমিৎ অমদুং নাৎকী খেন্নবা অদু কোকহল্লি। করিগুম্বা লৈবাক অসিগী মীয়াম্না মফম অমদগী অমদা চৎত্রিঙৈ মমাংদা চামরক খনবা মথৌ তারবদি কমদৌগনি? লৈবাক অসিগী কাচিন-কোয়া খুদিংদা লায়না য়ৌবা য়ারবা মতমদা মীয়ামগী থমোয়দা লৈরম্বা খেন্নবশিং অদু মাংহনগনি অমসুং লৈবাক অসিগী অমত্তা ওইবগী ৱাখল্লোন অদু চেৎশিনহনগনি। ঙসি, ‘এক ভারত- শ্রেস্থ ভারত’কী ৱাখল্লোন চেৎশিনহল্লি, খুন্নাই, শেন্মীৎলোন অমসুং সংবিধানগী ওইবা ইন্তিগ্রেসন চত্থরি। লৈবাক অসিগী ফিরেপ অমদি ঈশিং, নোংথক, কংফাল অমসুং শুন্দ্রংগী মতিক ময়াই অমুক্তা ওইখিদ্রিবা মওংদা পুথোক্লি অমসুং লৈবাক অসিনা আত্মনির্ভাত্তগী অনৌবা পান্দম ফংনবা লম্বীদা চংশিনবা হৌখ্রে।
অমসুং মরুপশিং,
অসিগুম্বা মতমশিং অসিদা ঐখোয়না সরদার সাহেবমা হায়রম্বা ৱাহৈশিং অদু নীংশিংবা মথৌ তাই। মহাক্না হায়খি:
''অমত্তা ওইবা ৱাখল্লোনগা লোয়ননা ঐখোয়না লৈবাক অসি অনৌবা পন্দোল লোমহনবা ঙমগনি অমরোমদা অমত্তা ওইবগী ৱাখল্লোন লৈত্রবদি অনৌবা খুদোংথিবশিং মায়োক্নহনগনি।''
অমত্তা ওইবগী ৱাখল্লোন লৈত্রবদি অনৌবা খুদোংথিবশিং মায়োক্নগনি, মীপুম খুদিংমক্না পুন্না হোৎনরবা মতমদা লৈবাক অদুবু অনৌবা পনখৈ তম্না পুগনি। নীংতম্বা ভারত অমা ওইহন্নবা মীপুম খুদিংমক্না হোৎনরম্বশিং অদুদগী নীংতম্বগী অমৃতকাল অসিদা হোৎনরিবা অসিনা হেল্লগনি। নীংতম্বগী অমৃতকাল অসি অমুক্তা ওইখিদ্রিবা মওংদা চাউখৎ-থৌরাংগী খোঙজেল য়াংখৎপনি, অরুবা পান্দমশিং ফংবা ঙম্বনি। অমৃতকাল অসি সরদার সাহেবনা মঙজরম্বা ভারতকী মঙলান অদু মঙফাওনহনবনি।
মরুপশিং,
সরদার সাহেবনা ঐখোয়গী লৈবাক অসি হকচাং অমা ওইনা উরমখি, অহিংবা পোৎশক অমা ওইনা উরমখি। মরম অসিনা মহাক্কী ‘এক ভারত’কী ৱাহন্থোক অসি মীপুম খুদিংমক্না চপ মান্নবা খুদোংচাবশিং ফংবা, চপ মান্নবা মঙলান মঙজনবগী হক লৈবা অদুবুনি। ঙসিদগী দিকেদ কয়াগী মমাংদা, মতম অদুদসু মখোয়গী ইহৌগী মপাঙ্গল অদু নুপা অমদি নুপী, থাক খুদিংমক্কী, কাংলুপ খুদিংমক্কী অপুনবা শক্তিনা ওইরমখি। ঙসি এক ভারতকী মতাংদা হায়বা মতমদা এক ভারতকী শক্লোন অসি করি ওইবা তাবগে? – নুপীশিংদা খুদোংচাবা অমদগী হেন্না ফংহনবা অদুগুম্বা ভারত অমা ওইবা অসিনি! ‘এক ভারত’ অসি নুপীশিং, দলিতশিং, শোত্থরবা, ত্রাইবেল অমসুং চীংদা তারিবশিংবু চপ মান্নবা খুদোংচাবশিং ফংহনবা ভারত অমা শেম্বনি। খেন্নবা লৈতনা মীপুম খুদিংদা য়ুম, মৈ অমসুং ঈশিং ফংহবনি অমসুং চপ মান্নবা হকশিং ফংহনবনি!
মসিনি ঙসি লৈবাক অসিনা তৌরিবা অসি। মাইকৈ অসিদা অনৌবা পান্দমশিং থম্লি। অমসুং পুম্নমক অসি ঙম্লিবা অসিগী মরমদি ঙসি লৈবাক অসিগী ফিরেপ খুদিংমক ‘সবকা প্রয়াস’কা মরী লৈনহল্লি।
মরুপশিং,
ঐখোয়না লৈবাক অসিনা কোরোনাগী মায়োক্তা পুন্না লান্থেংনবগী ফল উবা ফংখ্রে। অনৌবা কোবিদ হোস্পিতালশিংদগী ভেন্তিলেতরশিং ফাওবা, তঙাই ফদবা হীদাক-লাংথকশিং পুথোকপদগী ভেক্সিন দোজ করোর ১০০গী পন্দুপ হেনবা ফাওবা, পুম্নমক অসি ভারত মচা খুদিংমক্না, সরকার খুদিংমক্না অমসুং ইন্দস্ত্রী খুদিংমক্না হোৎনবনা ওইথোকহনবনি। ঐখোয়না হৌজিক ‘সবকা প্রয়াস’ অসি চাউখৎপগী খোঙজেল য়াংখৎনবা অমসুং আত্মনির্ভর ভারত অমা ওইহন্নবা য়ুম্ফম ওইগদবনি। হন্দক্তা সরকারগী বিভাগশিংগী অপুনবা শক্তিবু অমত্তা ওইবা ফম্পাক্তা পি.এম. গতিশক্তি নেস্নেল মাস্তর প্লানগী মওংদা পুথোকখি। চহি কয়া অসিদা পাইখৎখিবা তোঙান-তোঙানবা রিফোর্মশিংগী অপুনবা ফলা ভারতপু অফবা ইনভেস্তমেন্ত দেস্তিনেসন অমা ওইহনখি।
ইচিল-ইনাওশিং,
সরকারগা লোয়ননা খুন্নাইগী গতিশক্তিসু হাপচিল্লবদি খ্বাইদগী অচৌবা ফিরেপশিং থুংহনবা ওইথোক্তবা তৌরোই। অমসুং, মরম অসিনা ঙসি ঐখোয়না তৌবা করিগুম্বা থবক খুদিংমক্তা ঐখোয়না মসিনা ঐখোয়গী লৈবাক অসিগী অপুনবগী ওইবা পান্দমশিংদা করি অকাইবা থোকহল্লকপা য়াবগে খন্থবা মথৌ তাই। মহৈরোয়শিংনা সেক্তরগী অখন্নবা ইন্নোভেসনশিং খনবা ঙম্বা মখোয়না তমগদবা স্ত্রীম খনবদা নত্ত্রা তমলিঙৈ মতমদা , শোপ্পিং তৌবদা, মীয়াম্না মখোয়গী লনাইগী অপাম্বশিংগা লোয়ননা আত্মনির্ভরগী পান্দম অসি ঙাক্নবা হোৎনবা তাই। মসিগা চপ মান্ননা ইন্দস্ত্রী অমসুং লৌমীশিং, কোওপরেতিব ইন্সতিত্যুসনশিংনা মখোয়গী অপাম্বশিং তৌবা মতমদা মখোয়গী ৱাখলদা লৈবাক অসি আত্মনির্ভর ভারত ওইহন্নবা নত্ত্রগা মসিগী মায়োক্তরা হায়বা খঙবা তাই। ভারতকী ইন্দস্ত্রীনা মপালগী রো মেতরিএলশিং নত্ত্রগা কম্পোনেন্তশিংদা মীপাল তাংলিবা অসিগী মতাংদসু থবক লৌখৎনবা পান্দম থম্বা য়াই। ঐখোয়গী লৌমীশিংনা লৈবাক অসিগী মথৌ তাবশিং অদুগী মতুং ইন্না অনৌবা পাম্বৈ শীজিন্নদুনা অমদি অনৌবা মহৈ-মরোং থাদুনা আত্মনির্ভর ভারত ওইহন্নবা মখোয়না শরুক য়াবা হেনগৎহনবসু য়াউ। ঐখোয়গী কোওপরেতিব ইন্সতিত্যুসনশিংনসধ লৈবাক অসিগী অপীকপা লৌমীশিং মপাঙ্গল হাপকনি। ঐখোয়না অপীকপা লৌমীশিংদা হেন্না মীৎয়েং চংলিবা মখৈ অফবা পুরক্কনি; ঐখোয়না অরাপ্পা মফমশিংদা লৈবা খুঙ্গংশিংদা অনৌবা থাজবা পোকহন্নবা হোৎনবা তাই। অমসুং ঐখোয়না মাইকৈ অসিদা ফিরেপ অমা লৌনবা মাংদা চংশিনবা তাই।
মরুপশিং,
ৱাফমশিং অসি ইচম-চম্না উরম্বা য়াই অদুবু মখোয়গী ফল অসিদা মমাংদা অমুক্তা পুরকখিদ্রিবা ওইগনি। চহি কয়া অসিদা ঐখোয়না লুনানবা অসিগুম্বা অপীকপা হীরমশিংদা মীয়াম্না শরুক য়াদুনা করম্না লৈবাক অসিবু থৌনা হাপখি হায়বা ঐখোয়না উবা ফংখ্রে। প্রজা অমা ওইনা ঐখোয়না ‘এক ভারত’কী ৱাখল্লোনগা লোয়ননা মাংদা চংশিনবা মতমদা ঐখোয়না মাইপাকপা ঙম্মি অমসুং ভারতপু মীথোই-মীহেনবা ঙমহল্লি। অদোম্না মতম চুপ্পদা খ্বাইদগী পীকপা থবকসু মরু ওই করিগুম্বা মদুগী নুংগী ওইবা ৱাখল্লোন অদু য়াইফনবা ওইরবদি হায়বা অসি নীংশিংবা তাই। লৈবাক অমগী শেবা তৌবা ফাওবা নুংঙাইবা অসি ৱাহৈশিংনা ফোঙদোকপা ঙম্লোই। ঐখোয়গী থৌদাং য়াদুনা ঐখোয়না লৈবাক অসিগী অমত্তা ওইনবা হোৎনরিবা খুদিংমক সরদার পতেলজীদা উৎপা তশেংবা ইকাই খুম্নবা অমনি। য়াইফ পাউজেল অসিগী লোয়ননা ঐখোয়না মাংদা চংশিল্লসি, ঐখোয়গী মাইপাকপশিংদগী লৌবা ইথিল অদুনা লৈবাক অসিগী অমত্তা ওইবা অমসুং মাইপাক্নবগী অনৌবা পনখৈ তম্না পুরসি, ময়াম পুম্নমক্তা রাস্ত্রিয়া এক্তা দিৱস নুমিৎনা লাকপদা হন্না-হন্না নুংঙাইবা ফোঙদোকচরি।
থাগৎচরি!
