“মনিপুরগী পুৱারীগী অকা অকুমগী মতমদা মীয়ামগী নীংহন্নদবা অমসুং অমত্তা ওইবগী মতৌনা মখোয়গী মপাঙ্গল ওইখি”
“মনিপুরনা শান্তি অমসুং বন্ধ-ব্লোকেদতগী নীংতম্বা ফংফম থোকই”“মনিপুরবু লৈবাক্কী স্পোর্তকী পাৱরহাউস অমা ওইহন্নবা সরকারনা খোঙফম চেৎলি”“অৱাং নোংপোকপু এক্ত ইস্ত পোলিসীগী খ্বাইদগী মরু ওইবা মফম ওইহনবগী পান্দম অসিদা মনিপুরগী অচৌবা থৌদাং লৈরি”“রাজ্যসিগী চাউখৎ-থৌরাংগী লম্বীদা লৈরম্বা অপনবা খুদিংমক লৌথোকখ্রে অমসুং মথংগী চহি ২৫ অসিদি মনিপুরগী চাউখৎ-খোঙথাংগী অমৃত কাল ওইরগনি”খুরুমজরী!
নমস্কার
মনিপুরনা রাজ্য অমা ওইরকপগী চহি ৫০ ফারকপগীদমক্তা মনিপুরগী মীয়াম খুদিংবু থাগৎচরি!
মনিপুরনা রাজ্য অমা ওইনা ঙসি য়ৌরিবা থাক অসিগীদমক্তা মীওই কয়ানা কত্থোকখিবনি। ঐহাক্না অসিগুম্বা মীওই খুদিংবু ইকায় খুম্নজরি। মনিপুরনা হৌখিবা চহি ৫০ অসিদা অকা-অকুম কয়া থেংনখি। অসিগুম্বা মতমসিবু মনিপুরগী মীয়াম খুদিংনা অমত্তা ওইনা থেংনখি, শিংনবা খুদিংগা মাইয়োক্নখি। মসি মনিপুরগী অশেংবা পাঙ্গলনি। হৌখিবা চহি ৭ অসিদা ঐহাক্না অদোমগী মরক্তা লাক্তুনা অদোমগী অপাম্বা, অনীঙবগী ফর্স্ত হেন্দ একাউন্ত লৌনবা হোৎনখি। মসিনা মরম ওইদুনা, ঐহাক্না অদোমগী অনীঙবা, অপাম্ববু নীংথিজনা খঙবা ঙমখি অমসুং অদোমগী শিংনবশিংগী ৱারোইশিন পুথোক্নবা অনৌবা পাম্বৈ কয়া পুথোকপা ঙমখিবনি। মনিপুরনা শান্তি অমসুং বন্ধ-ব্লোকেদতগী নীংতম্বা ফংফম থোকই। মনিপুরগী মীয়াম্না মসিবু খ্বাইদগী হেন্না পামদুনা লাক্লি। বিরেন সিংহজীগী লুচিং মখাদা মনিপুরগী মীয়াম্না মসি ফংবসিদা ঐহাক্না য়াম্না নুংঙাইবা ফাওই। মতম শাংনা ঙাইরক্লবা তুংদা ফংলিবনি। মনিপুরনা ঙসিদি অচান-মীরায় খায়বগী থৌওং লৈতনা থাক খুদিংদা য়ৌবা ঙম্লে। ঐহাক্কী ওইনা মসি য়াম্না নুংঙাইবা ৱাফম্নি।
মরুপশিং,
মনিপুরনা চাউখৎ-থৌরাংগীদমক্তা কন্না হোৎনবা উবসিদা ঐহাক্না য়াম্না নুংঙাইবা ফাওই। মফমসিগী নহাশিংগী মতিক মগুন্না মালেমগী ফম্বাক্তা ঙাল্লি। ঙসি ঐখোয়না মনিপুরগী ইচানুপা-ইচানুপীশিংগী হৈথোই-শিংথোইববু শান্ন-খোৎনবগী ফম্বাক্তা উবা মতমদা লৈবাক পুম্বনা চাউথোকচরিবনি। মনিপুরগী নহাশিংগী মতিক-মগুন য়েংলবা মতুংদা রাজ্য অসিবু লৈবাক্কী স্পোর্তকী পাৱরহাউস অমা ওইহন্নবা থৌদাং ঐখোয়না লৌরে। ভারতকী অহানবা স্পোর্ত য়ুনিভর্সিতীসু রাজ্য অসিদা লিংখৎপগী ৱাখল্লোন্সু মসিনি। মসিদি স্পোর্ত এজুকেসন, স্পোর্ত মেনেজমেন্ত অমসুং তেক্নোলোজী খুমাং চাউশিলহন্নবা পায়খৎপা য়াম্না চাউবা থৌওং অমনি। শান্ন-খোৎনবা খক্তা নত্তনা, স্তার্ত-অপ অমসুং ওন্তোপ্রিনর্শিপকী লমদসু মনিপুরগী নহাশিংনা মশক নাইবা থবক পাংথোক্লি। মসিদসু, ইচানুপীশিংনা য়ারিবা থৌদাং অসি য়াম্না থাগৎনীংঙাইনি। মনিপুরদা লৈরিবা হেন্দিক্রাফকী পাঙ্গল অসিবু হেন্না খুমাং চাউশিলহন্নবগীদমক্তা সরকারনা খোঙফম চেৎনা থবক পায়খৎলি।
মরুপশিং,
অৱাং নোংপোকপু এক্ত ইস্ত পোলিসীগী খ্বাইদগী মরু ওইবা মফম ওইহন্নবা ঐখোয়না হোৎনরিবা অসিদসু মনিপুরগী অচৌবা থৌদাং লৈরি। অহানবা পেসেঞ্জর ত্রেন লাকপগীদমক্তা অদোম্না চহি ৫০ ঙাইদুনা লাক্লি। অসুক য়াম্না শাংলবা মতমগী মতুংদা রেলগী অহানবা ইঞ্জিন্না মনিপুর য়ৌরক্লে অমসুং মসিগী মঙলান অসিবু মঙফাওনবা উবদা মনিপুরগী মীয়াম খুদিংনা দবল ইঞ্জিন সরকার অসিবু ফৈ হায়না হায়রি। অসিগুম্বা তঙাই ফদবা খুদোংচাবা য়ৌরকপদা দিকেদ কয়া চঙখ্রে। অদুবু, ঙসিদি কন্নেক্তিবিতীগী থবকশিং মনিপুরদা খোঙজেল য়াঙনা পায়খৎলি। ঙসিদি, লুপা করোর লিশিং কয়াগী কন্নেক্তিবিতী প্রোজেক্ত কয়া মনিপুরদা খোঙজেল য়াঙনা পায়খৎলি। মসিদা জিরিবাম-তুপুল-ইম্ফাল রেলৱে লাইন য়াওরি। ইম্ফাল এয়রপোর্তনা মালেমগী থাক্তা চনখিবগা লোয়ননা দিল্লী, কোলকতা অমদি বেঙ্গালুরু অমসুং অৱাং নোংপোক্কা লৈনরিবা কন্নেক্তিবিতীসু য়াম্না ফগৎলে। ভারত-ম্যানমার-থাইলেন্দ ত্রাই-লেতরেল হাইৱেগী থবক কন্না চত্থরি। অৱাং নোংপোক্তা করোর লিশিং ৯গী নেচরেল গ্যাস পাইপলাইন তিংলিবা অসিদগীসু মনিপুরনা য়াম্না কান্নবা ফংগনি।
ইচিল ইনাওশিং,
মনিপুরনা চহি ৫০গী খোঙচৎকী মতুংদা মরু ওইবা থাক অমদা থুংলরে। মনিপুরনা চাউখৎ-থৌরাংগী মাইকৈদা খোঙজেল য়াঙনা থাংজিনবা হৌরে। অপনবশিং হৌজিক লোইনা লৌথোকখ্রে। ঐখোয়না হৌজিক্তগীদি তুং হন্দুনা য়েংগদবা নত্ত্রে। ঐখোয়গী লৈবাক্না নীংতম্বগী চহি ১০০ ফারকপা মতমদা মনিপুরনা রাজ্য ওইখিবগী চহি ৭৫ ফাগনি। মরম অদুনা, মসিদি মনিপুরগী ওইনা চাউখৎ-থৌরাংগী অমৃত মতম ওইগনি। মনিপুরগী চাউখৎ-থৌরাংবু মতম শাংনা লেপহন্দুনা লাকখিবা পাঙ্গলশিংনা অমুক্কা হন্না মকোক নোনখৎপা ঐখোয়না ঙমহল্লোইদবনি। হৌজিক্তি, ঐখোয়না লাক্কদৌরিবা দিকেদশিংগী মঙলান অমসুং পান্দম থমদুনা চৎকদবনি। অনৌবা ৱারেপ লেপকদবনি। ঐহাক্না নহারোলশিংদা মাংজিল থানা থোক্লক্নবা হায়জনীংই। অদোমগী য়াইফরবা তুংগী মতম লৈরগনি হায়বগী ঐহাক্না থাজবা থম্মি। চাউখৎ-থৌরাংগী দবল ইঞ্জিনগা লোয়ননা মনিপুরনা তুংলমচৎকীদমক্তা চৎকদবনি। ঐহাক্না মনিপুরগী নুংশিরবা ইচিল ইনাওশিংবু অমুক্কা হন্না থাগৎচরি অমসুং য়াইফ পাউজেল পীজরি।
থাগৎচরি!
