“বুদ্ধগী পাউজেল অসি মালেম পুম্বগীনি, বুদ্ধগী ধম্মা অসি মীওইবা খুনাইগীদমক্নি”
“বুদ্ধ সংসার পুম্বগীনি মরমদি বুদ্ধনা ইশাগী মনুংদগী হৌনবা হায়খি। বুদ্ধগী বুদ্ধত্বা অসি লোইনাইদ্রবা ইথৌদাংগী ফাওরকপা ইথিল অমনি”“ঙসিসু বুদ্ধনা ভারতকী কন্সতিত্যুসনগী ইনোৎ অমা ওইরি, বুদ্ধগী ধম্মা ওইরিবা চক্রনা ভারতকী মচু অহুমগা ফিরালদা লৈরি অমসুং ঐখোয়দা থৌনা অমা হাপ্লি”।“লোর্দ বুদ্ধগী পাউজেল ‘অপ্প দীপু ভবা’ অসিনা ভারতপু মরোমদোম লেপচবা ঙম্নবা পুক্নিং থৌগৎলি”নমো বুধ্যায়,
ঙসিগী য়াইফরবা থৌরম অসিদা শরুক য়াবীরিবা উত্তর প্রদেশকী রাজ্যপাল, শ্রীমতি অনন্দিবেন পতেল, মুখ্য মন্ত্রী শ্রীমান য়োগি অদিত্যনাথজী, ঐহাক্কী কেবিনেৎকী মরুপ, শ্রী কিশন সিংহ রেদ্দীজী, শ্রী কিরেন রিজিজুজী, শ্রী জ্যোতিরাদিত্য সিন্ধিয়াজী, শ্রী লঙ্কাদগী কুশিনগর ফাওবা লাকপীরিবা শ্রী লঙ্কা সরকারগী কেবিনেৎ মন্ত্রী, শ্রীমান নমল রাজপক্সা, অতোপ্পা লাইনীংবশিং অমসুং অতোপ্পা মীথুংলেনশিং; ম্যানমার, ভিএতনাম, কম্বোদিয়া, থাইলেন্দ, লাওস, পি.দি.আর., ভুতান অমসুং খা কোরিয়াগী ভারত্তা লৈবা ইকায়খুম্নরবা এম্বেসেদরশিং; শ্রী লঙ্কা, মোঙ্গোলিয়া, জাপান, সিঙ্গাপোর, নেপাল অমসুং লৈবাকশিংগী দিপ্লোমেৎশিং; ভগ্বান বুধগী লাইনীংবা মরুপ অমসুং তুং ইনবশিং!!!
অশ্বিন থাগী পুর্নিমাগী ঙসিগী শেংলবা নুমিৎ, কুশিনগরগী শেংলবা লমদম, অদোমগী হকচাং মনুংদা লৈবীরিবা ভগ্বান বুধগী শাইওন!!! ভগ্বান বুধগী থৌজালদগী ঙসিগী নুমিৎসিদা তোপ-তোপ্পা অমসুং তোঙানবা পুঙফম কয়া অমত্তা ওইনা পুল্লে। ঐহাক্না মফমসিদা লাক্ত্রিঙৈদা কুশিনগর ইন্তর্নেস্নেল এয়রপোর্ত শঙ্গাবগী তাঞ্জা ফংজখি। এয়রপোর্ত অসিগী খুথাংদগী মালেমগী বুধগী লাইনীংবা করোর কয়ানা মফম অসিদা লাকপগী খুদোংচাবা ফংলগনি, মখোয়না খোঙচৎ অসি লায়রগনি। এয়রপোর্ত অসিদা অহানবা ওইনা থুংলখিবা শ্রী লঙ্কাদগী লাকপা ফ্লাইৎ তোংদুনা লাইনীংবা, লাইগুরু, মরুপ কয়ানা কুশিনগরদা থুংলরে। অদোম্না মফমসিদা থুংলবদা ভারত অমসুং শ্রী লঙ্কাগী চহি লিশিং কয়াগী হেরিতেজপু অমুক্কা হন্না মশক তাক্লে।
মরুপশিং,
বুধ ধর্মগী পাউজেলবু শ্রী লঙ্কাদা ইহান হান্না পুদুনা চৎখিবসি ভারতকী নিংথৌরেল অশোকাগী মচানুপা মহেন্দ্র অমসুং মচানুপী সংঘমিত্রাননি হায়বসি ঐখোয়না পুম্নমক্না খঙনরবনি। ঙসিগী নুমিৎসিমক্তদা ‘অর্হাৎ মহেন্দ্র’না হল্লক্তুনা মপাবুংদা বুধগী পাউজেলবু শ্রী লঙ্কানা থৱাই তানা লৌহৌই হায়দুনা তমখিবনি হায়না থাজনরি। পাউজেল অসিনা বুধগী ৱারোলশিংদি মালেম শিনবা থুংবগীনি, বুধগী ধম্মা অসিদি মীওইবা খুন্নাইগীনি হায়বা থাজববু হেন্না চেৎশিনহল্লি। মরম অদুনা, ঙসিগী নুমিৎ অসিদি লৈবাক খুদিংগা চহি লিশিং কয়াদগী লৈনরক্লবা সংস্কৃতীগী চৎনবীবু অনৌবা পাঙ্গল হাপ্পগী নুমিৎনি। ভগ্বান বুধগী মহাপরিনির্ভানা ফংখিবা মফম অসিদা ঐখোয়না পুন্না লৈমিন্নবা ফংবা অসিদা ঐহাক্না অদোম্বুসু থাগৎপা ফোংদোকচরি। ঐহাক্না শ্রী লঙ্কা অমসুং অতোপ্পা লৈবাকশিংদগী লেংবীরক্লিবা মীথুংলেন খুদিংবু তরাম্না ওকচরি। ঐখোয় খুদিংদা য়াইফ-থৌজাল পীবীনবগীদমক্তা লৈবীরিবা ইকায় খুম্নরবা মহা শংঘগী মফমদসু কোক নোঞ্জরি। অদোম্না ঐখোয়দা ভগ্বান বুধগী রেলিক কয়া উবা ফংজবগী খুদোংচাবা ফংহনবীরি। কুশিনগরদা হৌজিক পাংথোক্লিবা থৌরম লোইরবা তুংদা অদোমগা ঐহাক্কা ঐহাক্কী কন্সতিত্বেন্সী ওইরিবা ভরানসীদা অমুক চৎমিন্নগনি। অদোমগী শেংলবা খুয়াখানা লমদম অদুদা খোঙদাবা ফংবদা মফমদুবুসু নুংঙাই য়াইফবনা থলহনগনি।
মরুপশিং,
ঐহাক্না ঙসি ইন্তর্নেস্নেল বুধিস্ত কনফেদেরেসনগী মীওই খুদিংদা থাগৎপা ফোংদোক্লি। অদোম্না মতমগা চান্নবা মওংদা ভগ্বান বুধগী পাউতাকপু লান্থোকপীরিবা অসি তসেংনা থাগৎনীংঙাইনি। ঙসিগী থৌরম অসিদা ঐহাক্কী অরিবা মরুপ শ্রী শক্তি সিনহাজীবুসু নীংশিংলি। ইন্তর্নেস্নেল বুধিস্ত কনফেদেরেসনগী দি.জি. ওইনা থৌপুবীরম্বা শক্তি সিনহানা নুমিৎ খরনিগী মমাংদা ঐখোয়বু থাদোক্তুনা চৎপীখ্রে। মহাক্না ভগ্বান বুধবু থাজবা, নীংজবনা ঐখোয়গী খুদিংদা ইথিল পীবীরি।
মরুপশিং,
ঙসি অসি অতোপ্পা মরু ওইবা পুঙফম অমসু ওই- ভগ্বান বুধগী তুশিতানা স্বরগদগী পৃথীবিদা অমুক হল্লকপা নুমিৎ। মরম অদুনা ঙসিগী অশ্বিম পুর্নিমা অসিদা ঐখোয়গী বুধিস্ত লাইনীংবশিংনা মখোয়গী থা অহুমগী ‘বর্শৱাস’ (নোংজু-থা) লোইশিল্লি। ঙসিগী নোংজুথা লোইবা নুমিৎসিদা, ঐহাক্না শংঘ লাইনীংবশিংদা ‘চীৱার দান” পীবগী তাঞ্জাসু ফংজরে। ভগ্বান বুধনা হীরম অসিবু খঙবীরম্বা অসি তসেংনা অঙকপনি। মসিদগী চৎনবী কইয়া অমা হৌখ্রবনি। নোংজুথাগী মতমদা ঐখোয়গী নাক্তা হৌরিবা পাম্বীশিংনা অনৌবা পুন্সি হৌই। অহিংবা জিবশিংদা হিংশা তৌদবা অমসুং পাম্বীদা ফাওবা ঈশ্বর উবা ফংই হায়বীরিবা ভগ্বান বুধগী পাউতাক অসি ঙসিসু অদুমক হিংলি অমসুং লানীংবা খরদি ৱাখল্লোন অসিগী মখাদা হিংলি।
মরুপশিং,
ধম্মানা তাকপীরম্মি – য়থাপী রুচির পুপফম, ৱন্নতা সুগন্ধক। এৱং সুভাসিতা ৱাচা, স্ফলাহোতি কুব্বতে।
হায়রিবসিগী ৱাহন্থোক্তি, অফবা ৱাঙাং অমসুং ৱাখল্লোনশিংবু অদুক্কী মতিক নীংথিনা ফোংদোক্লবদি মদুগী মহৈসু ফজবা লৈনা নুংশিবা মনম চেনবগুম্না মান্ননা ফংগনি। অফব থবক ওইরবসু, মওং চাদনা পাংথোক্লবদি, লৈনম চেনদবা ফজবা লৈগুম্বগা মান্নগনি। মালেমদা বুধিজমগী ৱাখল্লোনশিংগী অশেংবা ৱাহন্থোক হন্দোকপা মতম খুদিংদা খ্বাইদগী লুবা হীরমশিংগী ৱাহন্থোকসু অদুমক হন্দোকপা ঙম্মি। ভগ্বান বুধগী নুংগী ৱাখল্লোন্দি – ইশাগী থৌদাংবু নীংথিজনা খঙজবনি। হায়বদি, ঐখোয়গী অনকপদা থোক্লিবা থৌদোক ৱাথোক খুদিংমক্তা ইশাগা মরী লৈনহন্দুনা য়েংবনি, মসিগী থৌদাংসু ইশানা লৌগদবনি। ঐখোয়দা অকোয়বদা থোক্লিবশিংবু ঐখোয়না অফবা ৱাখল্লোন্দা য়েংলবদি, অনৌবা অমা পুথোকপগী খোঙজেলসু থুগৎহনগনি। ঙসি মালেম্না অকোয়বা ঙাক-শেনবা, ক্লাইমেৎ চেঞ্জকী ৱাফম খন্নবা মতমদা মরী লৈনবা ৱাহং কয়া অমসু থোক্লকই। অদুবু, ঐখোয়না বুধগী পাউতাকপু লৌরবদি, ‘কনাগীদমক্তা পাংথোক্কদবনো’ হায়বগী মহুত্তা ‘করি পাংথোক্কদবনো’ হায়বগী লম্বী মথন্নতা অচুম লাকচগনি।
মরুপশিং,
চহি লিশিং কয়াগী মমাংদা ভগ্বান বুধনা মালেম অসিদা হিংলম্বা মতমদা, মহাক্কী ৱাখল্লোনবু মালেমগী মীওই করোর কয়াদা য়ৌহনবা ঙম্বা পাম্বৈ অমত্তা লৈরম্বা নত্তে, অদুবু মালেমগী মীওই মিলিয়ন কয়াদা মহাক্কী পাউজেল য়ৌখি অমসুং মখোয়গী নুংগী ৱাখল্লোনগী মনুং চঙবসু ঙমখি। ঐহাক্না তোঙান-তোঙানবা লৈবাকশিংগী বুধ ধর্মগা মরী লৈনবা লাইশঙ কয়াদা হায়রিবা থৌওংশিং অসি উবা ফংজৈ। ঐহাক্না কেন্দীদগী ক্যোতো ফাওবা, হানোইদগী ইবনতোতা ফাওবা, ভগ্বান বুধনা মহাক্কী ৱাখল্লোন, রেলিক, পাউতাকশিংগী খুত্থাংদা মফম খুদিংদা লৈবা থেংনজৈ। ঐহাক্না কেন্দীগী শ্রী দলাদা মোলাগাৱা লাই খুরুম্বা চৎপা, সিঙ্গাপোরদা লৈবা মহাক্কী দন্ত-অৱশেসতা চৎপা ফংজখিবসি ঐহাক্কী লাইবক ফবনি অমসুং ঐহাক্না কয়োতোগী কিনকা-কুজীদা চৎপগী খুদোংচাবসু ফংজরে। মতৌ অসুম্না, ঐহাক্না খা-নোংপোক এসিয়াগী মফমশিংগী থৌজাল ফংবগী খুদোংচাবসু ফংদুনা লাক্লি। তোঙান-তোঙানবা লৈবাক, তোঙান-তোঙানবা অকোয়বগী ফিভম লৈজরবসু, মীওইবগী থৱাইনুংদা য়াওরিবা বুধনা পুম্নমকপু অমত্তা ওইনা পুন্দুনা থম্লি। ভারতনা বুধগী পাউতাকশিংদা য়ুম্ফম ওইদুনা চাউখৎপগী খোঙজং চঙশিল্লি, মসিগী ইথিলবু শিজিন্নরি। ঐখোয়না লৌশিং, পাউতাক, অফাওবা মীওইশিংগী ৱাখল্লোনবু ফাজিন্দুনা নত্ত্রগা লোৎশিন্দুনা থম্বগী অপাম্বা কৈদৌনুংদা লৈরক্তে। মখোয়বু ঐখোয়গীদমক্তা শিজিন্ননবা ফাজিন্দুনা থম্বা অসি ঐখোয়গী ৱাখল্লোন কৈদৌনুংদা ওইরক্তে। ঐখোয়না তমজরকপা, খঙজরকপা খুদিংমক মীওইবা খুন্নাইগী কান্ননবা কত্থোক্তুনা লাক্লি। মরম অদুনা অহিংশা, থৌজাল লৈবা, মীনুংশি ফাওবগুম্বা মীওইবগী মগুনশিং অসি ঙসি ফাওবদা ভারতকী মথানুংদা য়াওদুনা লৈরি। বুধনা ভারতকী সংবিধান্দা ঙসিসু ইথিল পীরি, বুধগী ধম্মক-চক্রনা ভারতকী মচু অহুমগী ফিরালদা তোংদুনা ঐখোয়বু লমজিংলি। ভারতকী পার্লিয়ামেন্ততা চৎপা মতমদা, ঙসিসু মসিগী মন্ত্রসিদা ঐখোয়গী মিৎইয়েংফম অদুমক তারি – ‘ধর্ম চক্র প্রৱর্তনায়’
মরুপশিং,
ঐখোয়না ঙসি ভারতকী নীংতম্বগী অমৃত মহোৎসব পাংথোক্লি। মতম অসিগী মনুংদা, ঐখোয়না তুংলমচৎকীদমক্তা, মীওইবা খুন্নাইগী য়াইফনবগীদমক্তা ৱারেপ কয়া লৌরি। ঐখোয়গী অসিগুম্লবা অমৃত ৱারেপশিংদা মখাগী অসুম্না তাকপা ভগ্বান বুধগী নুং ওইবা পাউতাক য়াওরিঃ
অপ্পামাদো অমৎপন্দ,
পমাদো মচছুনি পন্দ।
অপ্পমাতা না মীয়ন্তি,
য়ে পমত্তা তথা মতা।
মসিনা তাকপদি, চেকশিন্দবী মতৌ পাংথোক্তবা অসি অমৃতনি, চেকশিন্দবা অসিনা অশিবনি। মরম অদুনা, ভারতনা অনৌবা থৌনা শক্তিগা লোয়ননা তুংলমচৎকীদমক্তা খোঙশানলি, মালেম পুনববু পুদুনা মাংজিল থানা চৎমিন্নরি। ভগ্বান বুধনা হায়বীরম্মি- “অপ্পা দিপো ভবা”।
মসিনা হায়বদি, হায়বদি, ইশাগী মৈঙাল অদুমক ওইবীয়ু। মীওই অমনা মশাগী মঙাল লৈজবা মতমদা, মহাক্না মালেম্বুসু মঙাল পীবি। মসিনা ভারতনা মরোমদোম লেপচবা ঙম্বগী য়ুম্ফম ওইগনি। ঐখোয়না মালেমগী লৈবাক খুদিংবু চাউখৎপদা তেংবাংবা ঙম্বগী পাঙ্গল লৈনবা মসিনা ঐখোয়গী ইথিল পীগনি। ঐহাক্কী অসিগুম্লবা ৱাখল্লোনগা লোয়ননা ঙসিদি ভারতনা ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’ হায়বা মন্ত্রগা লোয়ননা তুংলমচৎকীদমক্তা চঙশিল্লি। ভগ্বান বুধগী অসিগুম্লবা ৱাখল্লোন্দা চত্তুনা ঐখোয় পুন্না তেংবাংমিন্নদুনা মীওইবা খুন্নাইগী য়াইফনবা লম্বী য়াৎকনি হায়বগী ঐহাক্না থাজবা থম্মি।
থাজবা অসিগা লোয়ননা, ঐহাক্না খ্বাই পুম্নমকপু অমুক্কা হন্না থাগৎচরি।
নুংঙাই য়াইফবা ওইরসি।
নমো বুধ্যায়।।
