ঐহাক্কী কেবিনেতকী মরুপ, দাঃ জিতেন্দ্র সিংহ, পি.কে. মিশ্রাজী, রজীব গোবাজী, শ্রী বি. শ্রিনিভাসন অমসুং মফমসিদা লেংশিনবীদুনা লৈরিবা সিভিল সর্ভিসকী মীওই অমসুং ভর্চুএলগী খুত্থাংদা লৈবাক শিনবা থুংবদগী শরুক য়াবীরিবা নুপী অমসুং নুপাশিংগী মফমদা সিভিল সর্ভিস নুমিৎ অসিদা কর্ময়োগীশিংবু থাগৎচরি অমসুং য়াইফ পাউজেল পীজরি। ঙসি মনা ফংলিবা মরুপশিং, মখোয়গী কাঙবু অমসুং মখোয়গী রাজ্যবুসু ঐহাক্না থাগৎচরি। অদুবু ঐহাক্কী অসিগুম্বা হৈনবী অসি অফবা নত্তে। মরম অদুনা, ঐহাক্না লেম্নদি য়াইফ পাউজেল পীরোই। ঐখোয়না মসিগা লোয়ননা করিগুম্বা খরা মরী লৈনহনবা য়াবা নত্ত্রো? মসি ঐহাক্কী পুক্নিংদা লাকপা ৱাখলনি, অদুবু, অদোম্না মসিবু অদোমগী এদমিনিস্ত্রেতিব সীস্তেমগী খলদা ওনবদি খক তৌবীগনু। ঐখোয়গী সিভিল সর্ভিসকী ত্রেনিংগা মরী লৈনবা ইন্সতিত্যুৎ খুদিংদা ঐখোয়না মসি পাংথোকপা য়াই। ফোরেন মন্ত্রালয় ওইরো, পুলিস বিভাগ ওইরো, মসুরী নত্ত্রগা রেভেন্যু ওইরো, খুদিংমক্কীনি। মরমদি, অসিগুম্বা থৌওংশিং অসি চাইখাইদুনা লৈরি। মখোয়না মশাগী থেংনখিবশিং, মখোয়না রাজ্য অমদগী করি থাজবা থম্মি, করম্না হৌখি, খুদোংচাদবা কয়া য়াম্না থেংনখি, হীরম খুদিং অসিগী মতাংদা মখোয়না চয়োল খুদিংগী ওইনা ভর্চুএলগী খুত্থাংদা ত্রেনীশিং অসিদা পুং অমা মখায়গী প্রজেন্তেস্ন পীবা য়াই। ৱাহং-পাউখুম ওইরো, অসিগুম্বা মনা ফংলবা মীওই অনিগা চয়োল খুদিংগী ৱারী শাবগী থৌরম পাংথোকপা মতমদা লাক্কদৌরিবা চারোন-শুরোন্দা য়াম্না কান্নবা পীগনি। মখোয়দা প্রেক্তিকেল ওইবা এক্সপেরিএন্স অমা তাকপা ঙমগনি। অদুগা মায় পাক্লবা মীওইশিং অসিনা হৌজিক ফংলিবা মায় পাকপগী মরম অসিনসু মখোয়দা থবক অসিগা অদুমক মরী লৈননা লৈনীংনবা ইথিল পীগনি। মসিদা ইনোবেসন তপ্না-তপ্না লাকপা হৌগনি, অহেনবা মতৌ হাপচিল্লক্কনি। অতোপ্পা থবক অমনা, মনা ফংলিবা মরুপ ১৬ অসিবু, ঐখোয়গী লৈবাক্কী মীওইশিংনা ভেদিক ওইবা জিলাশিংদা কৌবা য়াই। স্কিম অমবু হেক্তা খনসি। মখোয়গী মরক্তগী মীওই অমবু মদুগী ইন-চার্জ ওইহনসি। অদুগা থা অহুম, থা তরুক্কী মনুংদা করম্না থাবক পায়খৎপা হৌসিগে, করম্না পায়খৎসিগে হায়বা খন্নসি। লৈবাক শিনবা থুংবগী ওইনা, স্কিম অমা খনবা জিলা ২০ থোক্লক্লে হায়না খল্লসি। হায়রিবা জিলা ২০ অসিগা ভর্চুএল সম্মিত পাংথোক্তুনা মখোয়গা ৱারী শাদুনা করম্বা রাজ্যনা খ্বাইদগী মকোক্তা লৈবগে খন্দোক্তুনা, মদুদা থবক পায়খৎপা হৌবা য়াই। মসিবু ইন্সতিত্যুস্নেলাইজ তৌদুনা, জিলাশিং অদুদা মতৌ করম্না অহোংবা পুরকপা য়াবগে হায়বা ঐখোয়না হোৎনবা য়াই। অদুগা, ৱান স্কিম, ৱান দিস্ত্রিক্ত অসিবু চাংয়েংনবগী থৌওং অমা ওইহনবসু য়াই। অদুগা, চহি অমগী মতুংদা উন্নবা মতমদা, মদুগী মতাংদা ৱারী শাবা য়াই। মদুদা অমুক্কা হন্না মনা পীবগী তঙাই ফদবদি লৈত্রে। অদুবু, স্কিম অসিগীদমক্তা ইং ২০২২দা মনা ফংখিবনি হায়বদি ৱারী শাবীয়ু। মদুনা হৌজিক করি ফিভম য়ৌরে হায়নবা য়াই। অসিগুম্বা থৌওং অসিবু ইন্সতিত্যুসনগী মওংদা ওইহন্নবা ঐখোয়না মসিবু ইন্সতিত্যুস্নেলাইজ তৌবগী তঙাই ফদে হায়না ঐহাক্না খল্লি। মসিগী মরমদি, সরকারগী থৌওংশিং অসি চেদা তাদ্রিবমখৈ, থৌরাং ওইনা অদুমক লৈ অমসুং মখা তানা চত্থবা ঙমদে হায়বসি ঐহাক্না উবা ঙম্মি। করিগুম্বা থৌওং অমবু ইন্সতিত্যুস্নেলাইজ তৌনবগীদমক্তা মদুগী ওইবা ইন্সতিত্যুসন অমা হান্না শাবগী মথৌ তাই। তঙাই ফদবা লৈরবদি, মসিগীদমক্তা পথাপ অমা শেম্বসু য়াই। মদু ওইরবদি, করিগুম্বা অমা পাংথোক্তবা য়াদে হায়না অদুমক খনবা মীওই লৈরক্কনি। মখোয়না মদুগীদমক্তা নুমিৎ ৩৬৫ খন্দুনা লৈগল্লি। মসিদা মীয়াম্না মতেং পাংশিল্লবদি, মখোয়না করিগুম্বা মায় পাকপা খরা ফংই, অদুগা মদুগীদমক্তা মনাসু ফংই। অদুগা অতোপ্পা থবশিংদা অমুক য়েংলুরগদি, মখোয়না ম্নিংদা অদুমক লৈহৌবা য়াওই। অসিগুম্বা অৱাৎপা অসিসু লৈহনবা য়াদে। অফবা ৱাখল্লোনগা লোয়ননা চাংয়েংনবগী ফিভম অমা লৈহনগদবনি। ঐখোয়না মাইকৈ অসিদা খল্লবদি, অহোংবা খরা লাকপদি য়াই। মসিগুম্বা অহোংবা অসি ঐখোয়না পুরকপা য়াই।
মরুপশিং,
অদোম মরুপশিংগা অসুম্না ৱারী শাবসিদা ঐহাক্না থবক অসিবু চহি ২০-২২দগী ইশামক্না লেপ্তনা পাংথোক্তুনা লাকপগী মওংদা ফাওরি। মুখ্য মন্ত্রী অমা ওইনা খরা পীক্না তৌরম্মি। প্রধান মন্ত্রী ওইরবা তুংদা, খরা চাউনা অমসুং অচৌবা মীওইশিংগা লোয়ননা পাংথোক্লে। মসিনা মরম ওইরগা, ঐখোয়না অমনা অমগী মফমদগী করিগুম্বা খরা তমজবা ফংখি। ঐখোয়না হৌজিক ৱারী শাবগী থৌওং অসিনা অফবা থৌওং অমা ওইবতা নত্তনা চৎনবী অমসু ওইরে। কোরোনাগী মতমদা অদোমগা ৱারী শাবদা খুদোংচাদবা খরদি থেংনখি, নত্ত্রবদি ঐহাক্না অদোম খুদিংগা উন্ননবা অদুমক শিল্লমগনি। অদোমগী মফমদগী ঐহাক্না ৱারোল কয়া অমা তম্বা ফংলি। ৱাখল হেন্না তানা খঙনবা ঐহাক্না হোৎনরি অমসুং য়ারবদি, ঐহাক্কী ইশাগী পুন্সিদা পান্নবসু হোৎনরি। অদুগা ঐহাক্কী পুন্সিদা শিজিন্নবা য়ারবদি, পথাপকী মনুংদা পুশিন্দুনা শিজিন্নবা য়ানবসু ঐহাক্না হোৎনগনি। অদুগা, অসিগুম্বা থৌওং অসিনা ঐখোয়বু তুংলমচত্তা খোঙদাহল্লিবনি। মীওই খুদিংনা করিগুম্বা অমা তম্বগী খুদোংচাবা অদুমক ফংই। অদুগা কনাগুম্বা অমগী নাক্তা করিগুম্বা অমা পীবা য়াবা অমা অদুমক লৈ অমসুং ঐখোয়না মসিগী ৱাখল্লোন অসিবু মখা তানা পুথরবদি, মীওইবগী ৱাখলনা মদুবু লৌশিন্নবা মহৌশানা অদুমক হোৎনজৈ।
মরুপশিং,
হন্দক্কী চহিগী থৌরম শীন-লাঙখিবা অসিদি হান্নগুম্না চত্থদুনা লাক্লবা থৌওং নত্তে। হন্দক্কী অসিদি অখন্নবনি হায়না ঐহাক্না লৌই। ঐখোয়গী হন্দক্কী থৌরম অসিনা নীংতম্বগী অমৃত মহোৎসবকী মতমদা তাবা অসিনা ঐহাক্না অখন্নবনি হায়না লৌই। ঐখোয়না করিগুম্বা থবক অমা পাংথোকপা য়াবরা? অনৌবা থৱাই হাপ্পা থৌওং খরা লৈবনা মরম ওইরগা ঐখোয়না হায়রিবা অসি পাংথোকফম থোকই হায়না ঐহাক্না খল্লি। অদোম্না জিলা অমদা থবক তৌরি অমসুং চহি ৭৫গী মতমদা জিলাদুগী মকোক ওইদুনা থবক তৌরম্বা মীওই লৈরমগনি। মখোয়গী মরক্তগী খরদি নোংগারম্মগনি, খরদি হিংলমখিগনি। নীংতম্বগী হৌজিক্কী অমৃত মহোৎসবকী মতমসিদা মখোয়বু অমুক্তা কৌসি। চহি ৩০-৪০গী মতুংদা মখোয়বু জিলাদুদা অমুক কৌবসি মখোয়দসু নুংঙাইবা ফাওগনি। থাইনগী মীওই কয়া অমা মখোয়না নীংশিংবগা লোয়ননা উন্নবসু ফংবদা মখোয়দা নত্তনা অদোমসু নুংঙাইবা ফাওগনি। মীওই কয়া অমনা জিলাদুদা চহি ৪০, ৫০গী মমাংদা মপান্দগী লাক্তুনা থবক তৌরম্মিবনি, অদুগা মপান্দগী লাকপা মতমদা মখোয়না অনৌবা শক্তি কয়াগা লোয়নদুনা লাক্লমগনি। অদুগা লৈবাক্কী কেবিনেত সেক্রেতরী অফবা কয়াসু মফমদুদা শোইদনা লৈরম্বা য়াওগনি। মখোয়দা য়াম্না নুংঙাইবা অমা ওইগনি অমসুং ঐখোয়না মাইকৈ অসিদা হোৎনবা য়াবনি। ঐহাক্না ৱাখল অমা খল্লি, মমিংদি কাওখ্রে, গোরবোলেজী নত্ত্রগা দেশমুখ হায়বরা ঐহাক মমিং কাওরে। মহাক অসি কেবিনেত সেক্রেতরী ওইরম্বনি অমসুং থবক্তগী পোত্থারবা মতুংদা মশাগী পুন্সিবু মীয়ামগী সেবাগীদমক্তা মহাক্না কত্থোকখিবনি। মহাক্না ঈ-দান তৌবগা মরী লৈনবা থৌরম অমগীদমক্তা গুজরাত্তা লাকখিবনি, ঐহাক্না মহাক্কা মদুদা উন্নখিবনি। মহাক্না হায়বদা মতম অমদা গুজরাত অসি মুম্বাইগা পুন্না লৈরম্মি। মহারাস্ত্রা অমসুং গুজরাত অসি তোঙান-তোঙানবা ওইদ্রিবা মতম্নি। মহাক বনকন্থাদা দিস্ত্রিক্ত কল্লেক্তর ওইনা লৈ হায়না মহাক্না ঐহাক্কী ইফমদা হায়খিবনি। অদুগা মহারাস্ত্রা ওইরবা মতুংদা মহাক্না মহারাস্ত্রা কেদরদা চৎখিবনি অদুগা মতুংদা ভারত সরকারদা অমুক চৎখিবনি হায়না মহাক্না তমখি। মসি তাবা মতমদা ঐহাক্না মহাক্কা খুদক্তা মরী লৈনখি। মহাক্কী মতমদুদা বনসকন্থ অসি করম্না তৌরম্মি, থবক করম্না তৌরম্মি হায়না ঐহাক্না হংখি। অপীকপ-অপীকপা ৱাফম ওইরবসু, মদুগী থৌদাং য়াম্না চাউবা য়াওই। অদুগা মোনোতোনস ওইবা পুন্সিদা অহোংবা পুরক্নবা পথাপ অমবু থৱাই য়াওহনবগী মথৌ য়াম্না তাই। পথাপ অদু অহিংবা ওইবা তাবনি। পথাপ অদু মতিক লৈবা তাবনি। থাইনগী মীওই থেংনবা মতমদা, মখোয়গী মতমদা পথাপ অসি করম্না শেমখিবনো খঙদোকপা য়াই। মখোয়গী ৱারোলগী মতুং ইন্না ঐখোয়না পথাপ শেমগদবা নত্তে, মদুনা ঐখোয়দা অহোংবা করম্না পুরক্কনি হায়বা তাকপীগদবনি। ঐহাক্না নীংতম্বগী অমৃত মহোৎসবকী মতমদা পাম্বদি, অদোম্না জিলা অদুদা অহানবা ওইনা দিস্ত্রিক্ত কল্লেক্তর ওইখিবা মীওইবু অমুক্তা উন্ননবা অমুক্তা শীনবনি। জিলাদুগী মতাংদা অদোমদা অনৌবা এক্সপেরিএন্স অমা ফংগনি। অদুগা, রাজ্যদুগী চীফ সেক্রেতরী ওইনা থবক পুরম্বা মীওইশিংবসু রাজ্যদুগী মুখ্য মন্ত্রীনা অমুক্কা কৌগদবনি। লৈবাক্কী প্রধান মন্ত্রীনা মমাংদা কেবিনেত সেক্রেতরী ওইরম্বা পুম্নমক কৌগদবনি। লৈবাক্কী নীংতম্বগী অমৃত মহোৎসবকী মতমসিদা ভারতপু তুংলমচত্তা খোঙদানবগীদমক্তা সরদার পতেলনা পীরম্লিবা খুদোল অসিগী তুংলমচত্তা পাউজেল শন্দোকপগী থৌওংশিং ঐখোয়গী সিভিল সর্ভেন্তশিংনা পাংথোকপসু য়াইনা। অদুগা, ঙসি হিংলিবা মখোয়গী মরক্তগী লৈবাকপু ঙসিগী থাক অসিদা য়ৌহন্নবা থৌদাং কয়া পাংলম্বসু য়াই। মখোয়বু নীংশিংদুনা ইকায় খুম্নগদবনি। মসিসু নীংতম্বগী অমৃতকী মতমসিদা সিভিল সর্ভিসপু মপুং ওইনা ইকায় খুম্নবগী থৌওং অমা ওইবা য়াই। মখোয়বু ইকায় খুম্নবা উত্তুনা অনৌবা ৱাখল্লোন অমগা লোয়ননা ঐখোয়না তুংলমচত্তা খোঙদাবা য়াই অমসুং ঐখোয়না মাইকৈ অসিদা হোৎনবা য়াই।
মরুপশিং,
অমৃত কাল হায়বসিদি মমাংগী মতমগী হরাওবা ফোংদোকপা নত্ত্রগা থাগৎপা খক্তা নত্তে। ঐখোয়না চহি ৭০দগী ৭৫দা, ৬০দগী ৭০ ফাওবসি চাং নাইনা পাংথোকপগুম চৎলমগনি হায়না ঐহাক্না খল্লি। চহি ৭৫দগী ১০০ ফাওবগী খোঙচৎ অসিনা চাং নাইনা পাংথোকপা থৌওং অমখক ওইবা য়ারোই । হৌজিক্কী অমৃতকী মতম অসি অহোংবা পুরকপা মতম অমা ওইহনগদবনি। মসিগী চহি ২৫গী মতমসিদি য়ুনিৎ অমগুম্না য়েংগদবনি। মচেৎ ওইনা য়েংগদবসু নত্তে, ১০০দা ওইগদবা ভারত হায়বা মিৎয়েং য়েংগদবনি। মসিদা ভারতকী করি থাক ওইগনি য়েংগদবা নত্তে, ঐহাক্কী জিলা অসিনা চহি ২৫গী মতুংদা করি ফিভমদা লৈগনি হায়বা য়েংগদবনি। ঐহাক্না জিলা অসিবু মথংগী চহি ২৫দা করম্বা ফিভমদা লৈহনবা পাম্মি হায়বসি খন্দুনা য়ারবদি, ইশাগী ওফিস্তা চেদা ইদুনা থেৎহন্নীংই। মসিনা অদোমদা অনৌবা ইথিল অমা পীগনি। অমুক্তা য়েংবীয়ু। মলতিপ্লাইয়র এক্তিবিতী কয়াগা লোয়ননা ঐখোয়না জিলা অসিবু অৱাংবা থাক্তা পুখৎকদবনি অদুগা কেন্দ্র সরকারসু ইশাগীনি খনগদবনি। ভারতনা কদাইদা য়ৌগনি, রাজ্যনা কদাইদা য়ৌগনি, ঐখোয়না চহি ৭৫সিদা পান্দমশিং অসি পুদুনা লাক্লিবনি। ১০০দা ওইগদবা ভারত, জিলাশিংবু ঐখোয়না চহি ২৫দা কদাই ফাওবদা পুখৎকনি। ভারত্তা ঐহাক্কী জিলানা খ্বাইদগী অথোইবা ওইহনগনি। ঐহাক্কী জিলানা শোত্থবা হীরম অমত্তা লৈহল্লোই। খুদোংচাদবা অমসুং অরুবা কয়া ওইরবসু, ঐহাক্না শোইদনা পাংথোক্কনি। মসিগী অপাম্বা, ইথিল, ৱারেপ অমসুং মসিবু মঙফাওনহন্নবগীদমক্তা ঐখোয়না মতম পুম্বদা হোৎনদুনা চৎলবদি, সিভিল সর্ভিস অসি ঐখোয় ময়ামগী অনৌবা ইথিল অমা ওইরগনি।
মরুপশিং,
ভারতমচা খুদিংনা অদোমদা থাজবা অমগা লোয়ননা য়েংলিবা অসিবু অদোম্না মনিং থুংহন্নবগীদমক্তা অমসুং মদুদা অৱাৎপা অমত্তা লৈহন্দনবা অদোম্না সর্দার বল্লবভাই পতেলজীনা ঐখোয়দা পীবিরম্বা ইথিল, তাকপীরম্বা ৱাফম অমসুং অখন্নবা ৱারেপ অমগীদমক্তা ঐখোয়বু পুক্নিং থৌগৎপরীমবা অদু ঐখোয়না অমুক্কা হন্না পাংথোকপা তাবনি। ঐখোয়না ইশাবু মদুগী মতিক চানবা শেমগৎপা তাবনি অমসুং মসিগা লোয়ননা ঐখোয়গী খোঙথাং থাংবা হৌবা তাবনি। ঐখোয় অসি গনতন্ত্রগী পথাপ অমদা হিংলিবনি অমসুং ঐখোয়গী মাঙদা পান্দম অহুম ময়েক শেংনা থমগদবনি। মসিদা ঐখোয়না য়াশিন্নবা অমত্তা পুরকপা য়াদে অমসুং পান্দম অসিসু অহুমদগী হেনবা য়াদে হায়বসু তঙাই ফদে। অহানবা পান্দম, ঐখোয়না লৈবাক্কী পথাপ চলায়বদা চাদিং কয়া তৌই। ঐখোয়না ফংলিবা থাক অমসুং ইকায় খুম্নবা অসি কনাগীদমক্তনো? মসি করিগীদমক্তনো? হোৎনরিবা অসি করি ৱাফম লৈবগীনো? অদুনা, ঐহাক্না হায়জনীংবদি, ঐখোয়গী অহানবা পান্দম অসিদি লৈবাক্কী মীচম মীয়ামগী পুন্সিদা অহোংবা লাকহনবনি। মখোয়গী পুন্সি অসি লায়গদবনি অমসুং মখোয়না অসুম্না নুংঙাইনা লৈরে হায়বসু মশানা খঙজগদবনি। লৈবাক্কী মীচম মীয়ামগী পুন্সি মহিং নুংঙাইহন্নবগীদমক্তা সরকারনা পীরিবা তেংবাংশিং ফংনবা হোৎনবদা মখোয়দা অৱাবা নংহল্লোইদবনি। মখোয়না হায়রিবশিং অসি মপুং ফানা ফংহনগদবনি। পান্দম অসি ঐখোয়গী মাঙদা মতম পুম্বদা লৈগদবনি। লৈবাক্কী মীচম মীয়ামগী মঙলানবু ৱারেপ্তা ওন্থোকহন্নবা ঐখোয়না হোৎনগদবনি। মখোয়গী মঙলানবু ৱারেপ ওইনা ওন্থোকপগী খোঙচৎ মপুং ফানবা অফবা অকোয়বগী ফিভম অমা লৈহনবা হায়বসিনা পথাপকী থৌদাংনি। অমসুং মসিগী লুচিং অসি ঐখোয় খুদিংগী নাক্তা লৈরি। অদুগা মখোয়গী ৱারেপশিংবু মপুং ফানা মঙফাওনবগী খোঙচৎ অসিদা মখোয়গী মঙলান অসি পন্দুনা লৈহন্দনবা ঐখোয়না হোৎনগদবনি। তঙাই ফদবা মিৎকুপ খুদিংদা ঐখোয়না মখোয়গী মরুপ অমা ওইনা মখুৎ শমদুনা তাকপী তম্বীদুনা পুবীগদবনি। পুন্সি মহিং লাইহন্নবগীদমক্তা তৌফম থোকপা খুদিংমক ঐখোয়না পাংথোক্কদবনি। ঐহাক্না অনিশুবা পান্দমগী মতাংদা হায়বা মতমদা গ্লোবেলাইজেসন হায়বা ৱাহৈ অসি পঞ্জনীংই। ঐখোয়না ৱাহৈ অসি মমাংগী দিকেদ কয়াদগী তাদুনা লাক্লে। ভারতনা মসিগী মতাংদা করিগুম্বা মতাংদা লাপ্না য়েংলম্বসু য়াই। হৌজিক্তি, ফিভম অসি হোংলে। ঙসিদি, ভারতকী মফম হোংলক্লে অমসুং লৈবাক অসিদা ঐখোয়না করিগুম্বা অমা পাংথোকপা মতমদা মালেমগী হীরম কয়াগা মরী লৈনহন্দুনা পাংথোকপা হায়বসি মতমগী অপাম্বা ওইরে। ভারতনা মালেমগী খ্বাইদগী মকোক থোংবা মফমদা করম্না য়ৌগনি? ঐখোয়না মালেমগী থাক্তা থোক্লিবা থৌওংশিংবু খঙনবা হোৎনদ্রবদি, ঐখোয়গী পাংথোকফম থোকপা অমসুং মিৎয়েং চঙফম থোকপশিং খঙবদা ৱানা থোক্কনি। ঐখোয়না চৎকদৌরিবা অসি কদাইদনো, করম্বা মকোক থোংবা মফমদা য়ৌগদৌরিবনো, ঐখোয়গী মিৎয়েং কদাইদা লৈগদৌরিবনো, ঐখোয়না করম্বা হীরমদা মীথোই মীহেনগদৌরিবনো, ময়াম অসি ঐখোয়না শকখঙদুনা, নীংথিনা খঙলবা মতুংদা মখা তানা খোঙদাগদবনি। ঐখোয়গী স্কিম, ঐখোয়গী লৈঙাক্কী মওং অসি ৱারেপ অসিগী মতুং ইন্না শেমগদবনি। হোৎনরিবশিং অসিদা অনৌবা থৌওং য়াওহনবা, মতমগা চুনহনবা হায়বসিসু ঐখোয়না হোৎনগদবনি। ঐখোয়না মমাংগী চহি-চাগী পথাপ শিজিন্নদুনা ঙসিগী শিংনবশিংগা ঐখোয়না মাইয়োক্নবা ঙম্লোই। ঐখোয়গী কাঙলোন, চৎনবী কয়া শেমদোকপদা মমাংগী মতমদা চহি ৩০-৪০ চংলম্বা য়াই, অদুবু, হৌজিক্তি ঐখোয়না তুংদা-মাঙদা য়েংদুনা মতমগী মতুং ইন্না চৎকদবনি। মসি ঐহাক্কী ৱাখল্লোন্নি। ঐহাক্না অহুমশুবা পান্দম ওইনা হায়গদৌরিবা অসিদি ঐহাক্না মতম কয়াদগী হঞ্জিন-হঞ্জিন্না হায়দুনা লাক্লবা ৱাফম অমনি। সিবিল সর্ভিসকী খ্বাইদগী চাউবা মথৌ অসিদি ঐখোয়গী পান্দম্বু কৈদৌনুংদা মাঙহন্দবনি। মখোয়না পথাপ অমগী মনুংদা লৈরবসু, ফম অমা পায়রবসু, পথাপ অদুদা ঐখোয়গী খ্বাইদগী চাউরবা থৌদাং লৈরি। মদুদি, লৈবাক্কী অপুনবা অমসুং অমত্তগী ওইবগী মতৌনি। মসিদা ঐখোয়না য়াশিন্নবা অমত্তা পুরকপা য়াদে। ঐখোয়না লোকেলগী থাক্তা ৱারেপ লৌবা তারবা। ৱারেপ অদুনা মীয়ামগী য়াম্না কান্নবা কয়া ওইরবসু, মীয়াম্না থাগৎনগদবা ৱারেপ ওইরবসু, পুক্নিং শুমহৎপা মতৌ কয়া চেল্লবসু, ঐখোয়না করিগুম্বা অমদি খন্থবা চুম্মি। ঐহাক্না ঐহাক্কী পীক্লবা খুঙ্গং অসিদা পায়খৎকে খল্লিবা থবক অসিনা লৈবাক্কী অমত্তা ওইবগী মতৌদা অয়েৎপা পীবরা পীদবরা হায়না অমুক্তংদি খন্থগদবনি। ঐহাক্না নুংশিনদবা পুরকপা য়াবগী থবক্তি হৌদোকপা নত্তেকো হায়বা খন্থগদবনি। ঙসিদি নুংঙাইরম্বা য়াই। পুক্নিং লুপ্লম্বা য়াই। অদুবু ঐখোয়না শ্রেয়স তৌগদবনি। মহাত্মা গান্ধীনা শ্রেয় অমসুং প্রেয়গী ৱারোল মতম পুম্বদা থম্লম্মি। ঐখোয়না মসিদা খনথগদবনি। ফত্তবা ৱাখল্লোন খুদিংমক থাদোক্তুনা, ঐখোয়না ঐখোয়গী ৱারেপ্না লৈবাকপু অমত্তা ওইনা থম্বগী ইথিলগা মরী লৈনহনগদবনি হায়বসি ঐখোয়না খঙগদবনি। মহাক্না অকায়বা থোকহন্দে হায়বখক্তনা য়াদে। ঐখোয়না অমত্তা ওইবগী ৱাখল্লোনবু মতম পুম্বদা শৌগৎকদবনি। থৌওং অসি চারোন-শুরোন খুদিংগী পাংথোক্কদবনি। ঐহাক্না মসি হান্নসু হায়খ্রে, হৌজিকসু হায়রি অমসুং তুংদসু অদুমক হায়খিগনি। ঐখোয়না ভারতনা হান্না হায়বা ৱাখল্লোন অমা মতম পুম্বদা লৈগদবনি। লৈবাক্না হান্না, ঐহাক্কী লৈবাক্না খ্বাইদগী হেল্লি খনগদবনি। ঐখোয়না কদাইদা য়ৌবা পাম্মি? গনতন্ত্রা অমগী লৈঙাকপগী পথাপ অসিবু রাজনিতীগী তোঙানবা ৱাখল্লোন কয়ানা চুমহনবা য়াই। মসি গনতন্ত্রদা তঙাই ফদবা অমসু ওই। অদুবু ঐখোয়গী লৈঙাকপগী ৱাখল্লোনগী ময়োলদা লৈবাক্কী অমত্তা ওইবা অমসুং অপুনবা শক্তমবু ঙাক শেনবগী থৌওংদি লেপ্তনা চত্থগদবনি।
মরুপশিং,
ঐখোয়না জিলাগী থাক্তা, রাজ্যগী থাক্তা নত্ত্রগা লৈবাক্কী থাক্তা পায়খৎলি। মসিগী সর্ক্যুলর থোক্কদরা? নেস্নেল এজুকেসন পোলিসী অসিদগী করম-করম্বা হীরম অসি ঐহাক্কী জিলাগীদমক্তা পায়খৎকদবনো য়েংগদরা? মসিদগী করম্বা হীরম চৎনহনগদবনো খনগদরা? ওলিম্পিক্সকী মতুংদা ভারত্তা শান্ন-খোৎনবগী মতাংদা পুক্নিং য়াম্না হেন্না চঙনরক্লি। মসিগীদমক্তসু, জিলাগী থাক্তা ইন্সতিত্যুস্নেলাইজ তৌদুনা ঐহাক্কী জিলাদগী শান্নরোই পুথোকপগী থৌওংদা কনানা লুচিংগনি? শান্ন-খোৎনবগী বিভাগ খক্তনা তৌগদরা নত্ত্রগা অপুনবা তীম্না হোৎনদুনা তৌগদরা? অদুগা হৌজিক ঐহাক্না দিজিতেল ইন্দিয়াগী ৱারী শারি, অদুগা ঐহাক্কী জিলাদসু তীম শেমদুনা দিজিতেল ইন্দিয়াগা মরী লৈনবা থবক পায়খৎপা য়াগদরা খল্লিবনি। মীয়াম্বু লমজিংনবা ঙসি করিগুম্বা অমা তৌদবা য়াদে হায়বা করিসু লৈতে। ঙসি কোফী তেবল বুক অনি ফোঙলিবা অসিসু ঐখোয়না কাওগদবা নত্তে। মসিগী কোফী তেবল বুক অসি হার্দকোপী নত্তে। ই-কোপীনি। ঐহাকসু ঐহাক্কী জিলাদগী মসিগুম্বা ই-কোপীগী শিংনবশিংদগী মপান থোক্লকপা ঙমগদরা? নত্ত্রবদি, অথা-থাবা লাইরিক নমগনি অদুগা তুংদা মদুবু লৈবীনবা কনামত্তা লৈরোই। ঙসি, ঐখোয়না ই-কোপী পুথোকপা উবসিদা মীয়াম্না মতৌ তম্নদুনা ই-কোপী পুথোকপগী হৈনবী লৈরক্কনি। মসিনা হায়বদি, অসিবু থৌওংবু শন্দোকপগী থৌদাং অসি ঐখোয়গীনি হায়বা হায়নদ্রগসু য়াহনসি। ঐহাক্না হায়নীংবগী ৱাহন্থোক্তি, জিলাবু লমজিংনবা পথাপ লৈতবা য়াদে হায়বসি মরু ওইবা নত্তে, পোৎলম খুদিংমক ফংদুনা লৈরি। জিলা অমগী মীয়াম্না অমত্তা ওইনা থোক্লক্তুনা লেপ্লরবদি, অপাম্বা শোইদনা ফংগনি অমসুং মখা তারকপা ওইনা, অতোপ্পা থৌওংশিংদসু অফবা শাফু শোইদনা ফংগনি।
মরুপশিং,
ভারতকী নীংথিরবা সংস্কৃতীগী মশক থোকপা মগুন অমা লৈ। ঐহাক্না ৱাফম অসি চাউরবা থৌদাং অমগা লোয়ননা হায়রিবনি। ঐখোয়গী লৈবাক অসি রাজ্যগী পথাপশিংনা শেম্বনি। ঐখোয়গী লৈবাক অসি নিংথৌগী সিংহাসন্দগী চলাইবা নত্তে। মসিনা লৈবাক শেম্বসু নত্তে। ঐখোয়গী লৈবাক্কী ওইনা চহি লিশিং কয়াদগী হৌনা চৎনরক্লবা নাৎ অমা লৈজরি। মীচম মীয়ামগী পাঙ্গলবু মাংদা পুখত্তুনা চৎপা হায়বসিনা ঐখোয়গী চৎনবী ওইদুয়া লাক্লি। অদুগা, ঙসি ঐখোয়না ফংলিবা মায় পাকপা খুদিংমক মীয়াম পুন্না হোৎনমিন্নবনা মরম ওইরগনি। মীয়াম পুন্দুনা হোৎনমিন্নবনা মরম ওইরগা লৈবাক অসিনা ঙসি লৈরিবা থাক অসিদা য়ৌরিবনি। চারোন-শুরোন মথং-মথংগী কত্থোকপা কয়াদগী মতমগী মতুং ইন্না লৈবা তঙাই ফদবশিং পীদুনা লাক্লি, অনৌবা অহোংববু য়াজদুনা অমসুং চৎনদ্রবা চৎনবীবু হুন্দোক্লমদুনা অহিংবা খুন্নাই অমগুম্না ঐখোয়না হৌজিক হিংলিবনি।ঐখোয়দি মিৎ-না উইশিল্লগা চৎনবীদা থাজবা মীওইশিংনি। মতমগা চান্ননা হোংবা মীওইনি।
মরূপশিং,
করিগুমবা ঐখোয় লৈরমদ্রবদি মখোয় মাঙদা চঙশিনবা ঙম্লমবসু য়াই, অদু ওইরবদি ঐখোয়সু করিগুমবদা লাপ্না লৈরগা, খুবাক খুদুনা পুক্নিং থৌগৎলগা মালেমদা অহোংবা পুরকপা ঙম্লমগনি হায়না খল্লমবসু য়াই। ঙসি ঐখোয় স্তার্ত-অপকী লমদা চাউথোকচবা ঙম্লে, ২০২২গী অহানবা ক্বার্তর হন্দক্তা লোইরক্কদৌরে, ২০২২গী অহানবা ক্বার্তরগী থা অহুমগী মতমসিদা ঐগী লৈবাকসিগী নহাশিংনা স্তার্ত-অপকী তাইবংদা য়ুনিকোর্ন ১৪গী মফম কনখিবা অসি অচৌবা মায় পাকপা অমনি মরূপশিং। শুপ্নতগী থা অহুমগী মনুংদা য়ুনিকোর্ন ১৪ থোরকপসিনা ইরৈবাকসিগী নহাশিংনা অদুগুমবা অৱাংবা থাক্তা য়ৌবা ঙম্লিবনি। মসিদা ঐখোয়গী করি থৌদাং করি লৈ? তিয়র-২ ময়োল্লম অমগী কাচিন অমদা থবক তৌরমবা ঐখোয়গী দিস্ত্রিক্তকী নহা অমা করিগুমবদসু ঐখোয়না করিমত্তা খঙহৌদনা পাউ-চেদা য়াওরক্লবা মতমদা মহাক্তি মসিগী থাকসি য়ৌরম্লবোইরে হায়না খনবসু য়াওই। মসিনা তাকপদি লৈঙাক্লোনগী মথক্তা খুন্নাইগী ওইবা থৌদাং চাউনা য়াওরি হায়বসিনি। ঐ মহাক্কীদমক অফবা ইথিল ওইদবরা? ঐনা মহাকপু পুক্নিং থৌগৎখিবরা নৎত্রগা থৌগৎখিদবরা? ঐনা মহাপু শকখঙখিবরা নৎত্রগা শকখঙখিদবরা। করিগুমবদসু নহাক্না তৌরিবদুদি ফরে অদুবু হান্না ফংখিদ্রিদি করিগীনো হায়না হংবা য়াওবরা? লৈঙাক্কী মনাক্তা করিগীদমক লাকখিদ্রিবনো? লাক্ত্রবদি অদোমগী মতমসু মাঙহনদ্রিবনি, অদুবু অদোমদা কান্নবা য়াম্না পীরি, অদোম্না মহাকপু থাগৎপিয়ু।
মরূপশিং,
ঐনা পোৎশক অনিখক পনখি, অদুবু অসিগুম্বা পোৎশক কয়ামরুম লৈরি, লৌউ-শিংউগী লমদসু ঐখোয়গী লৈবাকসিগী লৌমীশিংনা মতমগী অওনবা মায়কৈদা চঙশিনবা ঐনা উবা ফংই। মখোয়গী মশিং য়াম্লমদবদি য়াই। ঐগী ওইবা মীৎয়েঙদদি, ঐগী মীৎয়েঙদদি মহাক মফম অমদা পন্দুনা লৈরবরা হায়বসিনি?
অদুবু মরূপশিং,
ঐখোয়না হায়রিবা থবকশিং অসি তৌরবদি চাউনা অহোংবা পুরক্কনি হায়না ঐনা খল্লি। ৱাফম অমসু ঐ হায়বা পাম্মি, শান্নবখক্তনা অয়ামবা মীওইশিংগী ৱাখল্লোনগী শরুক ওইরক্লি। য়ারেনা মরুপ, ঐখোয়বু কয়াম কুইনা লৈখিদোইনো, দিস্ত্রিক্ত অমদা চহি অনি অহুম লৈশিল্লক্লগা অমুক চৎখিগনি। মদুদগী করি ওইরকপা হায়বদুদি ঐনা কনাদসু মরাল শিদে, অদুবু থাজবা য়াবা ফীভম অমা ফংবা মতমদা পুন্সিগী সিক্যুরিতী মপুং ফানা ফংই। করিগুমবদসু অথোই অহেন তান্নবগী মমল অমত্তা লৈতে। হৌজিক্তি পুম্নমক লৈরে, অনৌবা শিংনবা কদাইদা থেংনগনি, পুন্সিদি অসুম চৎখিগনি, অঙাঙশিংসু চাউরক্কনি, মফম অমা নৎত্রগা অমদা তাঞ্জা ফংবা মশানা তাবনি, ঐখোয় করি তৌগনি? ফীভমসিদা মশানা মশাবু মীরায়রকই। ফীভমদুদি তোকখ্রো, ইশাগীদমক্তসু মীরায়রকই। মসি পুন্সি হিংবগী মওং নত্তে মরূপশিং, ইশানা ইশাবু মীরায়রোইদবনি। পুন্সিবু নুংঙাইনা মহাউ লৌদুনা হিংগদবনি অমদি করিগুম্বা খরা তৌরম্নবা মীকুপ খুদিং খন্দুনা লৈগদবনি। মদুতদা পুন্সি হিংবগী মহাউ ফংগনি। হৌখ্রবা মতমদা ঐনা করি ফংখ্রে? হৌখ্রবা মতমদা ঐনা করি পীখ্রে? অসিগুম্বা ৱাফমসি নৈনবগী হৈনবী লৈত্রগদি পুন্সি অসি তপ্না তপ্না ইশানা ইশাবু পেঞ্জরক্তবগী ফীভম লাক্কনি অমদি পুন্সি হিংবগী মহাও লৈরক্লোই মরূপশিং। ঐনা হেক হেক হায়বা ৱাফম অমদি সিতার খোংবা অমগা তাইপিস্ত অমগগী খেন্নবা উরবরা? কম্প্যুতর ওপরেতর অমনা খুৎশাশিং লেং ওত্তুনা লৈ অদুগা চহি ৪৫-৫০ শুরকপা মতমদা থেংনবদা য়াম্না ৱানা মথক্তা য়েংখৎলক্কনি। অমুক অনিরক্তি মহাক তাদবসু য়াই। য়াম্না চীং লেম্না হায়বিয়ু, সাহব করি তৌরে হায়না। মহাক তঙ্খায় শিরবা পুন্সি অমদা হিংলিবনি, পুন্সিনা পোৎলুম ওইরবনি, থবক্তি খুৎশাশিংনা তৌরিবনি। তাইপরাইতরদা খুৎশাশিং নমদুনা লৈগনি অদুগা নাকল অমদনা সিতার খোংবা অমসু খুৎশানা লেং ওত্তুনা শান্নবনি অদুবু মহাক্না চহি ৮০ শুরকপা মতমদা থেংনবদা মায়থোঙদা ৱাখল নীংথিনা খনবগী মমি তাগনি। মপুং ফাবা পুন্সিগী মমি তাগনি, মঙলান্দা হিংবা পুন্সিগী মমি তারমগনি মরূপশিং, খুৎশাশিং লেঙ ওত্তুনা অনিমক্না শান্নরিবনি, অদুবু অমনা চৎন-চৎনা শিরবনি, অমনা চৎন-চৎনা হিংলিবনি। হায়রিবা অহোংবা অসি পুন্সিগী নুংদগী হিংনবা ঐখোয়না হোৎনরবা মতমদা পুন্সিদা অহোংবা লাক্কদৌরিবনি মরূপশিং। মরম অসিনা ঐনা হায়জনিংবদি ঐগী স্ত্রীমদা লৈবাক্কী কাচিন কোয়া শিনবা থুংবদগী মীওই লাখ কয়ানা ঐগী খোঙলোয় ওইরি, মখোয়গী পুন্সিদা ৱাখল তাবগী মতৌ লৈগদবনি, মতিং লৈগদবনি, করিগুম্বা খরা তৌরম্নবগী ইথিল লৈগদবনি, মদুতদা পুন্সি হিংবগী মহাও ফংগদৌরিবনি মরূপশিং। করিগুমবদা কনাগুম্বনা ঐঙোন্দা চোকথদবরা হায়না হংই। মসিনসু ওইরমবা য়াই ঐনা চোকথবা ফাওদ্রিবা। ঐনা মীৎকুপ খুদিং হিংবা পাম্মি। মীৎকুপ খুদিং হিংদুনা অতৈসু হিংহন্নবগীদমক হিংবা পাম্মি।
মরূপশিং,
মসিগী মহৈ করি ওইগনি? মসিগী মহৈদি ঐনা মফম অমদা হেক্তা চৎলুবদা মফমদুদা লৈরম্লিবা ফীভমদুদা চঙশিল্লি। হীরমসিদদি অদোমসু ইশাবু ফীভমদুদা লুপশিনবদা হৈ-শিংলবা ঙাক্তনি। কনাগুম্বনদি মসি অফবনি হায়না খল্লমবসু য়াই অদুবু ঐগীদমক্তদি মসি পুন্সি হিংবগী মচৎ নত্তে মরূপশিং, মথৌ তাবা মফমদা ঙাক্লৌ পীবা, মথৌ তাবগী মতুং ইন্না ঙাক্লৌ ওইদুনা অওনবা পুরক্নবগী খোঙথাঙ লৌখৎপসু মরুওই। ঐখোয়না নীংলকপগা লৈঙাক্লোন্দা অহোংবা পুরকপসি ঐখোয়গী লীচৎ ওইরবরা? অপীক-অপীকপা ৱাফমশিংগীদমক কম্মিসন শেমবা মথৌ তারি। চাদিং হন্থহল্লু, কম্মিসন শেম্মু। লৈঙাক্লোন্দা অহোংবা পুরকউ, কম্মিনসন শেম্মু। থা ৬কী, থা ১২গী রিপোর্ত লাক্কনি, অদুদগী রিপোর্ত য়েংনবগী কম্মিতী অমা অমুক শেমগনি। কম্মিতী অদুনা থবক পায়খৎনবগীদমক অতোপ্পা কম্মিসন অমা অমুক শেমগনি। হৌজিক ঐখোয়না তৌরিবসিদি লৈঙাক্লোন্দা অহোংবা পুরকপনি, মতমগী মতুং ইন্না অহোংবা পুরকপা মথৌ তাই। মতম অমদা লান তৌবদা শামু শীজিন্নরম্মি, শামু তোংবশিংনা শামু হুন্দোক্লম্লগা শগোল তোংখি অদুগা ঙসিদি শগোল শামু চৎনদ্রে, অতোপ্পা অমা মথৌ তারে। অসিগুম্বা অহোংবা অসি পুরকপা লায় অদুবু লানগী শাফুনা ঐখোয় অহোংবা পুরকপা মথৌ তাহল্লি। ঐখোয়বু লৈবাক্কী মাঙলান অমসুং পান্দমশিংনা ইথিল পীরি, ঐখোয়না লৈবাক্কী মঙলান অমসুং পান্দম মমুৎ তানা খঙদ্রিবফাওবা ঐখোয়না লৈঙাক্লোন্দা অহোংবা পুরকপা ঙম্লোই। লৈঙাক্লোন্দা অহোংবা পুরকপা হায়বসি কাঙলোন অমগী মখাদা পুরক্কদবনি, কাঙলোন্দি লায়হনগদবনি অমদি শীজিন্নবা য়াবা ফীভম ওইহনগদবনি। চাংয়েং অদু মায় পাক্ত্রবদি মদুবু থাদোক্লম্নবগী থৌনা লৈগদবনি। ঐনা তৌখিবা অরানবদু য়াজদুনা অনৌবা লম্বী অমদা চৎপগী থৌনা লৈগদবনি। মদুতদা অহোংবা লাক্কদবনি। অদোমসু য়েংবিয়ু আইন চা কয়া লৈরম্মি, লৈবাক মীয়ামগী পোৎলুম ওইদুনা লৈরম্মি। ঐবু অহানবা ওইনা ২০১৩দা প্রধান মন্ত্রী ফম পায়বা য়াবা মীওই অমগী শক্লোন্দা ঐগী পার্তীনা লাউথোকখি অমদি ঐনা ৱা ঙাঙবা মতমদা দিল্লীদা বিজিনেস কম্ম্যুনিতী অমনা ঐবু কৌরকখি, ২০১৪গী মীখল থা ৪-৬ ৱাৎলিবা মতম্নি। মখোয়না ঐঙোন্দা করি তৌগদগে হায়না হংখি। ঐনা নুমিৎ খুদিংগী আইন অমমম মুত্থৎকনি, অনৌবা আইন শেম্লোই হায়না হায়খি। মখোয় ঙকখি অদুগা ঐনা অহানবা চহি ৫দা আইন ১৫০০ মুত্থৎখি। মরূপশিং হায়বিয়ু, অসিগুম্বা আইনশিং পুদুনা ঐখোয় করিগী হিংগদৌরিবনো? অদুগা ঐ ঙসিসু… ঐগী ৱাখল্লোন্দা কান্নদবদা তাদুনা লৈবা আইন কয়ামরুম লৈরি হায়না ঐনা খল্লি। অদোমসু থৌরাং খরা য়াত্তুনা মখোয়শিংদু মুত্থৎপিয়ু। লৈবাকসিবু অসিগুম্বা লাংসিগী মপান্দা পুথোরকউ। অসিগুম্বা কম্প্লাইএন্সশিংসিনা মীয়ামদগী করি করিনো ময়াম অমা তান্দুনা লৈরি। ঐঙোন্দা কেবিনেত সেক্রেতরীনা হায়, অতৈদি লৈবাকসিগী মথৌনি, অদোম হীরমসিদা থৌদাং লৌবিয়ু, কম্প্লাইএন্স ময়ামসিদগী লৈবাকসিবু মনীং তমহনবিয়ু, মীয়ামবু মনীং তমহনবিয়ু। নীংতমবা চহি ৭৫ শুরবসি ফাওবা মীয়ামবু লাং অসিদা থুদুনা করিগী লৈহনগদৌরি। লোয়শঙ অমদা মীওই ৬ ফম্লমগনি, মখোয় খুদিংদা ঈ-পাউ লৈরমগনি, অদুবু মখোয় তোঙান্না তাল্লক্কনি, থংনবদুদগী লৌনিংদে। অসিগুম্বা ময়াম অমা মীয়ামদগী হঞ্জিন হঞ্জিন তান্দুনা লাক্লি। হৌজিক তেক্নোলোজীগী মতম্নি, ঐখোয় অসিগুম্বা ফীভম অমা করিগীদমক্তা শেম্লোইদৌরিবনো, ঐখোয় কম্প্লাইএন্সতগী, পোৎলুমশিংসিদগী লৈবাকসি করিগী মনীং তমহল্লোইদৌরিবনো?। ঐদি ঙক্লিবনি। হৌজিক ঐখোয়গী কেবিনেত সেক্রেতরীনা ৱাফম অমা পুখৎলকই, মদুদি ৱাফম খুদিংদা জেল চঙবগী অকিবা মীয়ামদা লৈরি, ঐনা আইন অমা থেংনৈ মদুদি ফেক্তরী অমগী তোইলেৎ থা ৬ খুদিংগী শুনু হাইদ্রবদি অদোম জেল য়ৌবা য়াই। হৌজিক হায়বিয়ু, ঐখোয় করমবা মখলগী লৈবাক পাম্বগে? হৌজিক অসিগুম্বা ৱাফম ময়ামসিদগী নীংতমবা পাম্মি। হৌজিক্তি মসি অপনবা লৈতবা থৌওং ওইহনগদবনি, সর্কুলর থোকপগী মথৌ তাহল্লোইদবনি। করিগুম্বা অদোমগী ৱাখলদা স্তেত লৈঙাক্কী থৌদাংনি খল্লগদি স্তেত লৈঙাক্তা হায়বিয়ু, ভারত লৈঙাক্কী থৌদাংনি খল্লগনা মখোয়দা হায়বিয়ু। চিংনবা লৈবিগনু ইচিল ইনাওশিং। মীয়ামবু অসিগুম্বা পোৎলুম অসিদগী নীং তমবা ফংহল্লিমখৈ ঐখোয়গী মীয়াম নুংঙাইনা লৈগদৌরিবনি। মথৌনা লৈনা নুংঙাই য়াইফরক্কদৌরিবনি। ঐগী ৱাখলদা খঙজবদি, অচৌবা উগী মখাদা ফনা ফজবা লৈ থারবসু উজাউদুগী মরুমদা লৈদু ফুগায়না শাৎপা ঙম্লোই হায়বসিনি। হায়রিবা পাম্বীদু করিগুম্বা অহাংবা মফমদা হুন্দোক্লম্লবদি মখোয় মথৌনা অমগা লোয়ননা চাউখৎলকপা পামগনি, মখোয়বু পোৎলুম অসিগী মপান্দা পুথোকপিগদবনি।
মরূপশিং,
লৈরম্লিবা ফীভম অদুদা চুশিন্ননবা চৎলু, য়ান-য়ানবা চৎলু, মতম লেনখিনবা হোৎনৌ হায়বসি হেক হেক তোয়না উবা ৱাফম অমনি। হৌখিবা চহি ৭০সিদা মসিগী মতাঙদা নৈনরবদি অদোম ৱাফম অমা শোয়দনা উবা ফংগনি। করিগুমবা লাংফম অমা লাকপদা, মহৌশাগী লাংফম অমা লাকপদা অখন্নবা মওংগী শাফু অমা থোরকই অমদি ঐখোয়না অহোংবা পুরকই, কোরোনা লাকপদা মালেম পুমবগী অহোংবা ঐখোয়না ইশাগী কান্নগদবা মওংদা পুরকখি। অদুবু মদু অফবা ফীভম ওইবরা? অচৌবা শাফু অমা লাক্লবা মতমদা ঐখোয় অহোংবা পুরকখিবনি, মসিবু হৌনরিবরা? ঐখোয় ইশাবু করিগী খুৎলায় মতিক চানা পায়গদুনা লাংফমগী মতমদা লম্বী থিখি… ঐখোয় খুদোংচাদবনা থল্লবা মতম অমা লৈরম্মি, মদুনা মরম ওইরগা ঐখোয়গী চৎন-কাঙলোন কয়া শেমখিবা, ময়ামদুগী মরক্তা কমদৌনা হিংগদগে হায়বদু থোরকখি। অদুগা হৌজিক খুদোংচাদবা ফীভমদুদগী মপান্দা থোরক্লবদা আইনসু খুদোংচাদবা ময়ামদুদগী মপান্দা পুথোকপিরকউ, মরাং কায়বা ফীভম পুরক্নবগীদমক ঐখোয় ৱাখল খনবা মথৌ তাই। করিগুম্বা ঐখোয় মরাং কায়বা ফীভম পুরক্নবা ৱাখল খন্দ্রগদি, করিগুমবা লৌউ-শিংউগী লমদা খুমাঙ চাউশিল্লম্লগদি, করিগুমবা ফুদ প্রোসেসিংগী ফীভম হান্ননা শেম্লম্লগদি ঙসি লৌমীশিংদা পোৎলুম ওইরিবা ময়ামসি লৈরমদবসু য়াই। মসিনা মরম ওইরগা লাংফম মরক্তা লম্বী থিনবগী থৌওংদি লৈঙাক অসিনা তমহৌরে, অদুবু মতম পুমবগী ওইবা ফীভম শেমগৎনবগীদমক ঐখোয়দা লৈরিবা খুদোংচাদবশিং কমদৌনা কোকহনগনি, মদুগী পাম্বৈ কমদৌনা পুথোক্কনি হায়বা ৱাফমসি মীত্তা উবা মথৌ তাই। মতৌ অসুম্না ঐখোয়না শিংনবশিংগী তুংদা পাম্বৈ লৈতনা ইন্নদুনা লৈবসি অফবা নত্তে। ঐখোয় শিংনবশিং থেংনবা তাই, তেক্নোলোজীনা মালেমদা অহোংবা পুরক্লিবসিদা লৈঙাক্লোন্দা লাক্কদবা শিংনবশিংসু ঐখোয় খঙবা মথৌ তাই। ঐখোয় ইশানা ইশাবু মদুগীদমক শেম শাবা তাই। মরম অসিনা ঐনা পামবদি লৈঙাক্লোন্দা অহোংবা পুরকপসি ঐখোয়গী থৌদাং ওইহনগদবনি হায়বসিনি। লেপ্পা নাইদনা হোৎনবা তাই অমদি ঐখোয় থবক্তগী পোত্থারবা মতুংদা ঐগী মতমদা ঐনা লৈঙাক্লোন্দা করি করি অহোংবা পুরক্লম্লবগে হায়বা ৱাখলসি খনবা মথৌ তাই। লাক্কদৌরিবা চহি ২৫-৩০ ফাওবদা লৈবাক্কী কান্নগদবা ফীভম অমা শেমগৎপা মথৌ তাই। অসিগুম্বা অহোংবশিং অসি পুরক্লবদি অফবা মায়কৈদা অওনবা লাক্কনি।
মরূপশিং,
হৌখিবা চহি ৮সিদা লৈবাকসিদা অচৌবা থবক কয়া পায়খৎখ্রে। মখোয়শিংদুগী মরক্তা কয়া অমদি নুংগী ওইবা লোনচত্তা অহোংবা পুরকপা থৌরাং ওইখি। মদু অরুবা থবক্নি অমদি রাজনেতাশিংদি মসিদা খুৎ থানবগী থৌনা লৈতে। অদুবু ঐদি রাজনিতিদগী য়াম্না লাপ্না লৈ মরূপশিং, মীয়ামগী লৈঙাক্তা ফীভম অমা লৈ, অদুবু ঐ লৈঙাকপগী ফীভমদা লাকপা মথৌ তাখি, মদুনা তোঙানবা ৱাফম অমনি। ঐগী ৱাখল্লোন্দি রাজনিতীগী ৱাখল্লোন নত্তে। ঐগী মীয়ামগী থৌশিলগা লোয়নদুনা লৈবা মীওই অমনি। মীচম মীয়ামগী পুন্সিগা লোয়নদুনা লৈবা মীওই অমনি।
মরূপশিং,
লমচৎ শাজত্তা অহোংবা পুরক্নবগী ঐনা হোৎনরিবা, খুন্নাইগী তঙাই ফদবা ৱাফমশিংদা অওনবা পুরক্নবগী হোৎনরিবা অসি মীচম মীয়ামগী পুন্সিদা অহোংবা পুরক্নবগী ঐগী মঙলান-পান্দমগী শরুক অমনি অদুগা ঐনা খুন্নাইগী ৱাফম হৌদোরকপদা, লৈঙাক চুপ্লি পায়রিবা মীওইশিংসু তোঙান্না থমবা নত্তে, মখোয় অতোপ্পা গ্রহদগী লাকপা নত্তে, মখোয়সু খুন্নাইসিগী শরুক্নি। পুরকপা পাম্লিবা অওনবগী ৱাফম পুথোরকপদা, করিগুম্বদা ওফিসর অমনা লুহোংবগী কার্দ থিল্লকপদা ঐগী লোনচৎ অদু থাদোকপা ঙমদে অমদি ঐগী ইনাক্তা লাকপদা অতাঙবা কার্দ পুরক্কনু য়াম্না হোঙবা কার্দ পুরকউ হেক হেক হায়। অদুবু মদুদা প্লাস্তিক্কী মনুং মপান ফাওনা উবা মখুম পানবা উবদা অদোম হৌজিকসু সিঙ্গল য়ুজ প্লাস্তিক শীজিন্নরিবরা হায়না হেক হেক হংই। মতমদুদা মখোয় ইকায়বা ফাওই। ঐনা হায়নিংলিবদি, ঐখোয়না সিঙ্গল য়ুজ প্লাস্তিক শীজিন্নদনবা হায়রগা ঐনা লৈরিবা, ঐনা থবক তৌরিবা মফমসিদা, ঐগী পুন্সিদা অওনবা পুরক্লিবরা হায়বা ৱাহংসিনি। ঐনা অপীক-অপীকপা ৱাফমশিংদা খুৎ থারিবসিগী মরমদি ঐখোয়না অচৌবা ৱাফমশিংদা উংদুনা লৈরিঙৈদা অসিগুম্বা অপীক-অপীকপা ৱাফমশিংবু নাথৈদুনা হেক হেক থম্লম্মি। অসুম্না অপীক-অপীকপা ৱাফমশিং নাথৈদুনা লাকপনা মখা থাবা মীওইশিংগী মফমদসু ফক্লাং অমা খারকই মরূপশিং, ঐদি অদুগুম্বা ফক্লাংশিং অদু থুগাইবা পাম্মি। লু-নানবগী থৌরাংসিদা নুমিৎ ১৫ খুদিংগী দিপার্তমেন্তা করি তৌরিবগে, লু-নানবগী থবক পায়খৎলিবরা হায়না হেক হেক য়েংনবা ঐনা হোৎনৈ। চহি অনি, অহুম, মঙা হৌখ্রে, হৌজিক্তি ঐখোয়গী দিপার্তমেন্ততা অদুগুম্বা ফীভমদু মশানা লৈজফম থোক্তবরা? করিগুম্বা অদুগুম্বা ফীভমদু থমবা ঙমদ্রগদি লৈবাক্কী মীচম মীয়ামদা মখোয়না মখোয়না থাজবা থম্লিবদু কা হেনমল্লোইদরা। মরম অসিনা ঐনা হায়নিংবদি মরূপশিং ঐখোয়না অসিগুম্বা ফীভম অসি য়াজগদবনি। হৌজিক ঐখোয়না দিজিতেল ইন্দিয়াগী ৱারী শানসি, ফিনতেক অমগী মরমদা নৈনসি, ভারতনা ফিনতেক্তা পুরক্লিবা খোঙজেল, দিজিতেল পেমেন্তকী লমদা লৌখৎলিবা খোঙথাঙ অসিনা, হৌজিক্তি কাসিদগী নহা অমনা মনা ফংবদা ঐখোয়গী ওফিসরনা খুবাক খুনিংবা ফাওরি, মরমদি মহাক দিজিতেল পেমেন্তকী থবক অমা তৌরি অমদি ঐখোয়না মদুবু ফোতো ওইনা উবদা নুংঙাইবা ফাওই। অদুবু ঐগী বাবুদি দিজিতেল পেমেন্ত তৌদে, করিগুম্বা ঐগী সিস্তেমসিদা লৈবা মীওইনা থবক অদু তৌদ্রবদি ঐনা মসিবু মীয়ামগী ইহৌ ওইহনবদা অপনবা পীরিবনি। সিভিল সর্ভিস দেদা অসিগুম্বা ৱারী শাফম থোকপরা নৎত্রগা থোক্তবরা হায়বসিদা নৈনবা য়াই, অদোমদি নুমিৎ নিনি ফম্মিন্নগদৌরিবনি অদুনা ঐগী মরমদা ঙাঙনবা য়াবা ঙাঙনগদৌরিবনি হায়বা ঐ খঙই। অদুম ওইনমক মরূপশিং, ঐখোয়না অফবনি খনবা, খুন্নাইদা তৌহন্নিংবা থবকশিং অদু ঐখোয় ইশাদগী হৌনবা ঐখোয়না হোৎনফম থোকই হায়না ঐনা হায়নিংই। করিগুম্বা ঐখোয়না হায়রিবা ৱাফমশিং অসিদা হোৎনরবদি ঐখোয়না য়াম্না চাউনা অওনবা পুরকপা ঙমগনি, ঐখোয় হোৎনসি। হৌজিক অমুক জি.ই.এম. পোর্তেলগী মতাঙদা ঐখোয়গী দিপার্তমেন্তপু জি.ই.এম. পোর্তেলদা ১০০% কমদৌনা পুশিনগদগে হায়বসিদা হঞ্জিন-হঞ্জিন সর্কুলর থোকখিগদ্রা? মপাঙ্গল কনবা থৌরাং অমা শেম্লে মরূপশিং, ঐখোয়গী য়ু.পি.আই. মালেম্না থাগৎনরক্লি। ঐগী মোবাইল ফোন্দা য়ু.পি.আই.গী খুদোংচাবা লৈরবরা? ঐ য়ু.পি.আই.গী হৈনবী লৈরবরা? ঐগী ইমুংগী মীশিংদসু হৈনবী অসি লৈরবরা? ঐখোয়গী খুত্তা য়াম্না মপাঙ্গল কল্লবা খুৎলায় অমা লৈরে, অদুবু ঐনা য়ু.পি.আই. শীজিন্নদনা গুগলদি মপান্দগীনি হায়রগদি মরূপশিং, করিগুমবা ঐখোয়গী পুক্নিংদা য়ু.পি.আই.গী থাজবা লৈরবদি ঐখোয়গী য়ু.পি.আই.সু গুগলদগী হেন্না খুমাঙ চাওশিনবা ঙমগনি, অদুগুম্বা পাঙ্গল অদু ফংবা ঙমগনি। ফিনতেক্কী তাইবংদা মফম কনবা ঙমগনি। তেক্নোলোজীগীদমক্তা ফুল প্রুফ ফংবা ঙম্লে, ৱর্ল্দ বেঙ্কনা মসিবু থাগৎলি। মসি ঐখোয়গী সিস্তেমগী শরুক করিগী ওইহল্লোইদৌরিবনো। তুংদা শোত্থহৌরবদি তৌরক্কনি। ঐখোয়গী য়ুনিফোর্ম ফোর্স ময়ামসিদা মখোয়গী কেন্তিন্দা কম্পলসরী ওইহনখিবা ঐনা উরে। মখোয়দা দিজিতেল পেমেন্ত খক্তা লৌরি। অদুবু ঙসিসু ঐখোয়গী সেক্রেতরিএত্তা লৈরিবা কেন্তিন্দদি থৌরাং অসি লৈতে। অসিগুম্বা অহোংবা অসি ঐখোয় পুরকপা ঙম্লোইদরা? ৱাফমসি করিসু লৈতবা ওইনা উরমবদি য়াই অদুবু মরূপশিং করিগুমবা ঐখোয়না হোৎনরগদি অচৌবা থবক কয়াসু পায়খৎপা ঙমগনি অমদি ঐখোয়না খ্বাইগী মমৈদা লৈরিবা মীওইদু ফাওবা থৌরাং কয়াগী কান্নবা ফংহন্নবা লেপ্পা লৈতনা মপুং ফাবা অপনবা লৈতবা মেকানিজম অমা পুরক্নবা হোৎনফম থোকই অমদি ঐখোয়না মেকানিজম অসিবু হেক য়াম্না শীজিন্নরিমখৈ লৈবাকসিগী খ্বাইদগী মমৈদা লৈরিবা মীওইদু ফাওবা মপাঙ্গল হাপ্নবা ঐখোয়গী মিসন অদুবু মওং মরিল নাইনা মপুং ফাহনবা ঙমগনি হায়না ঐনা খল্লি।
মরূপশিং,
ঐনা অদোমগী মতম য়াম্না লৌরে, হীরম কয়াদা ঐনা অদোমগা ৱারী শানরে। অদুবু ঐনা পামবদি ঐখোয়না হায়রিবা ৱাফমশিং অসি মাঙদা পুখৎপদুনি। সিভিল সর্ভিস দে অসি ঐখোয়গী নুংদা অনৌবা থৌনা অমা থোরক্নবগী তাঞ্জা অমা ওইহনফম থোকই। অনৌবা থৌরাং য়াৎনবগী তাঞ্জা ওইহনফম থোকই। অনৌবা থৌনা অমসুং থাজবগা লোয়ননা ঐখোয়গী ইরক্তা অনৌবা মীওই কয়া য়াওরক্লিবশিংসিবু খুৎ পায়দুনা তাকপি-তম্বিয়ু। মখোয়বুসু সিস্তেম অসিগী শরুক ওইহন্নবগীদমক থাজবনা থলহনবিয়ু। ঐখোয় ইশামক মহাউ লৈবা পুন্সি অমমম হিংদুনা ঐখোয়গী খোঙলোয়শিংবু মাঙদা পুখৎমিন্নসি। হায়রিবা থাজবা অসিগা লোয়ননা ঐনা ময়াম পুম্নমক্কী মফমদা য়াইপ-পাউজেল পীজরি। হন্না হন্না থাগৎচরি!
