মালেমনা অৱাবগী ইরোল নুংদা লুপলবা মতমদা ভারতনা আশাগী মঙাল পীরি: পি.এম.
ঙসি ভারতনা অমুক্তা ওইখিদ্রিবা খোঙজেলগা লোয়ননা সেক্তর খুদিংমক্তা, লম খুদিংমক্তা থবক তৌরি: পি.এম.ভারত অসি ঙসিদি চাউখৎলক্লিবা লৈবাক অমসুং চাউখৎলক্লিবা শক্তি অনিমক ওইরি: পি.এম.হেন্না ৱাংবা পনখৈশিং ফংবা ঙম্বগী মতিক ময়াই চেনবগা লোয়ননা ভারত অসি মালেমগী খ্বাইদগী চহি নৌরিবা লৈবাকশিংগী মনুংদা অমনি: পি.এম.ভারতনা মীৎয়েং শানবা ৱাখল্লোনগা লোয়ননা হৌজিক মাংদা চংশিল্লি: পি.এম.ভারতকী মীওই করোর 140না ভিকসিৎ ভারতকী ফিরেপতা য়াওশিন্দুনা মখোয় মশানা মসিবু ইনোৎ হাপ্পি: পি.এম.ভারতনা দবল AI পাৱরগী খুদোংচাবা লৈ, অহানবা AI, আর্তিফিসিএল ইন্তেলিজেন্স, অনিশুবা AI, এস্পিরেস্নেল ইন্দিয়া: পি.এম.ভারতনা তেক্নোলোজী দেমোক্রেতাইজ তৌদুনা দিজিতেল পব্লিক ইনফ্রাস্ত্রকচরদা অনৌবা লম্বী অমা মালেমদা উৎখি: পি.এম.ভারতনা কৈসু লৈতনা লায়থোক্নবা লৌবা মরীশিংদা থাজবা থমদে, ঐখোয়গী মরীশিংগী য়ুম্ফমদি থাজবা অমসুং রিলাইএবিলিতীনা ওইরি: পি.এম.ভারতনা দিজিতেল ইন্নোভেসন অমসুং দেমোক্রেতিক ভেল্যুশিং অসি পুন্না লৈবা য়াই উৎখি: পি.এম.এন.দি.তি.ভি ৱার্ল্দ সম্মিৎতা শরুক য়ারিবা শক্নাইরবশিং ঐনা তরাম্না ওকচরি। মীফম অসিদা অদোম্না হিরম কয়া খন্ন-নৈনগনি… তোঙান-তোঙানবা সেক্তরশিংগী মালেমগী লুচিংবশিংশু মখোয়গী ফোঙদোক্নিংবা ৱাফমশিং ফোঙদোক্কনি।
মরুপশিং,
হৌখিবা চহি ৪-৫ অসিদা মান্নবা থিম অমদা তুংদা ওইরক্কদবা ফিবমশিংগী মতাংদা খন্ন-নৈনখি। হন্দক থেংনখিবা কোবিদ লাইচৎ, কোবিদ মতুংগী শেন-থুমগী অৱাবশিং, পোৎ-চৈগী মমল হেনগৎলকপা অমসুং থবক ফংদবা, অইং-অশাগী খল হোংলকপা, হৌজিক চৎথরিবা লানশিং, সপ্লাই চেনশিংদা অপনবা পীরকপা, মীচম মীয়াম শিবা, মালেমগী ওইবা উংখৎনবশিং অসি মালেমগী মীফম খুদিংমক্তা খন্ন-নৈনবা ৱাফম অমা ওইরে।
ঙসি খুদোংচাদবশিং অসিগী মতাংদা খন্নরকপা মতমদা, ভারত্তা করম্বা মখলগী ৱাখল্লোন লৈরি? কয়াদা খেন্নরবা। লৈবাক অসিদা ‘ভারতকী চহিচা’.. ভারত কি সতাবদিগী মরমদা মালেমগী মুক্নরিবা মরক অসিদা খন্নরি। মালেম অসিনা অৱাবনা থল্লবা মতমদা, ভারতনা থাজবগী মঙাল অমা ওইরে, ভারতনা থাজবা শন্দোক্লি। মালেমগী ফিবম অসিনা ঐখোয়দা শোকহন্দবা নত্তে.. মালেমগী ফিবম অসিনা ভারত শোকহল্লবা ফাওবদা, ভারতনা অৱাবশিং মায়োক্নরবশু… লৈবাক অসিদা অফবা ৱাখল্লোন অমা লৈখি, মদু ঐখোয় পুম্নমক্তা ফাওখি। ভারতকী চহিচাগী মরমদা ৱারি শান্নখি।
মরুপশিং,
ঙসি, ভারতনা হিরম খুদিংমক্তা পাংথোক্লিবা থবকশিং অসি মমাঙদা অমুক্তা ওইখিদ্রি। ভারতকী খোঙজেল, ভারতকী পাক-চাউবা অসি মমাঙদা অমুক্তা থোকখিদ্রি। ঐখোয়গী সরকারগী অহুমশুবা তার্ম নুমিৎ ১২৫ মপুংফারে। নুমিৎ ১২৫ দা পাংথোকখিবা থবকশিং ঐনা অদোমগী মফমদা লিগনি। নুমিৎ ১২৫ দা, লায়রবশিংগী য়ুম করোর ৩ শানবা অয়াবা পীরে। নুমিৎ ১২৫ দা, ঐখোয়না লুপা করোর লাখ ৯ হেনবগী ইনফ্রাস্ত্রকচর প্রোজেক অমা থবক পায়খৎপা হৌরে। নুমিৎ ১২৫ দা, ঐখোয়না অনৌবা বন্দেভারত ত্রেন ১৫ লমথাখ্রে, অনৌবা এয়রপোর্ত ৮ শঙ্গাখ্রে। নুমিৎ ১২৫ দা, ঐখোয়না নহারোলশিংগী লুপা করোর লাখ ২গী পেকেজ অমা লাউথোক্লে, ঐখোয়না লৌমীশিংগী বেঙ্ক একাউন্তশিংদা লুপা করোর লিশিং ২১ হকথেংননা পীখ্রে, ঐখোয়না চহি ৭০গী মথক্তা লৈবা অহলশিংদা লুপা লাখ ৫ ফাওবগী লেম্না লায়েংবগী খুদোংচাবা পীখ্রে। ভারত্তা পায়খৎলিবা থবকশিং অসি য়েংউ… নুমিৎ ১২৫ দা য়ুম লাখ ৫ দা রুপতোপ সোলার প্লান্তশিং থম্লে। এক পের মা কে নাম অভিয়ানগী মখাদা উ পাম্বী করোর ৯০ হেন্না থাখ্রে। মসি খক নত্তনা, নুমিৎ ১২৫ দা ঐখোয়না অনৌবা ইন্দস্ত্রিএল নোদ ১২ অয়াবা পীরে। নুমিৎ ১২৫ দা, ঐখোয়গী সেনসেক্স অমসুং নিফতি চাদা ৬ দগী চাদা ৭ ফাওবা ফিবম ফগৎলে। ভারতকী মাইপাকপশিংগী মমিং অসি য়াম্না শাংলে। নুমিৎ ১২৫ দা, ভারতকী মরমদা মালেম্না করি খন্নখিবগে? নুমিৎ ১২৫ দা ভারত্তা মালেমগী করম্বা থৌরমশিং পাংথোকখিবগে? তেলিকোম অমসুং দিজিতেলগী তুংগী খন্ননবা ভারত্তা মালেমগী মীফম পাংথোকখি… ভারত্তা গ্লোবেল ফিনতেক ফেস্তিবেল পাংথোকখি… ভারত্তা গ্লোবেল সেমিকন্দক্তর ইকোসিস্তেমগী মখাদা খন্নখি… ভারত্তা রিন্যুএবল ইনর্জিগী ইন্তরনেসনেল কনফরেন্স অমসুং সিবিল এভিএসনগী তুংগী মতাংদা খন্নবা মীফম পাংথোকখি।
মরুপশিং,
মসি শুপ্নগী থৌরমশিংগী মমিং পরেং অমা নত্তে। মসি ভারত্তা শাগোন্নরিবা থাজবশিংগী মমিং পরেং অমনি। মসিনা ভারতকী মাইকৈ অমসুং মালেমগী থাজবা অনিমক তাক্লি। মখোয় অসি তুংদা মালেমগী তুংলমচৎ মশক তাক্নবা হিরমশিংনি অমসুং হায়রিবা হিরমশিং অসি খন্ন-নৈনবা ঙসি মালেমগী লৈবাকশিং ভারত্তা লাক্লে। ঙসিদি ভারত্তা থবক কয়া পাংথোক্লে… ঐখোয়গী অহুমশুবা তামর্দদা ভারতকী খোঙজেল য়াংখৎলে, রেতিং এজেন্সি কয়ানা ভারতকী গ্রোথ মাঙজৌন্না লাউথোকপা হেনগৎলক্লে। ভারতপু নুংশিজবা মার্ক মোবিয়সগুম্বা অখঙ-অহৈ কাংবু অমা লৈরি… ভারত্তা শেন থাদবগী মতাংদা মখোয়না হরাওবা ফোঙদোক্লিবা অসি য়াম্না মরুওই। ভারতকী সিয়ার মার্কেত্তা মখোয়গী ফন্দশিংগী চাদা ৫০ থাদনবা মখোয়না গ্লোবেল ফন্দশিং হায়বা মতমদা, মসি অচৌবা পাউজেল অমনি।
মরুপশিং,
ঙসিগী ভারত অসি চাউখৎলক্লিবা লৈবাক অমা অমসুং শক্তি লৈরক্লিবা লৈবাক অমা ওইরে। ঐখোয় লায়রবগী অৱাবশিংশু খঙলে অমসুং কমদৌনা চাউখৎনবা লম্বী শেমগনি হায়বা খঙলে। ঐখোয়গী সরকারনা য়াংনা থৌশিলশিং শেম্লি, ৱারেপশিং লৌরি, অনৌবা অওনবশিং পুরক্লি। মীয়ামগী থৌরমশিংদা ঐনা মীওই মখল কয়া কয়ারক থেংনখি… মীওই খরনা হায়খি, মোদী জিনা থংন-থংননা অহুমলক সরকার অওনবা পুরক্লে… মহাকআন থবক কয়া পাংথোক্লে…হৌজিকশু মহাক কন্না থবক পায়খৎলি। করিগীদমক অদোম্না মসি পাংথোক্লিবনো, করি দরকার ওইবগীনো? মালেমদা ৫শুবা খ্বাইদগী চাউবা ইকোনোমি ওইরে… মাইপাকপা কয়া লৈরে… পন্দুনা লৈরম্বা ৱারেপ কয়া লৌরে… অওনবা কয়া পুরক্লে… হৌজিক থবক কন্না শুবগী করি মথৌ তারিবগে? অসিগুম্না হায়বা মীওই চা কয়া ঐ উনরে। অদুবু ঐখোয়না মঙলিবা মঙলানশিং, ঐখোয়না লৌরিবা ৱারেপশিং, মসিদা পেন্থোকপা নত্ত্রগা নুংঙাইবা লৈতে। হৌখিবা চহি ১০দা মীওই করোর ২৫ লায়রবা কোকহল্লে। হৌখিবা চহি ১০ দা, তোইলেত করোর ১২ রোম শাখ্রে… মীওই করোর ১৬ গ্যাস কন্নেক্সন ফংলে… মসিনা মতিক চারবরা? হৌখিবা চহি ১০ দা মেদিকেল কলেজ ৩৫০ হেন্না শাখ্রে… এ.আই.আই.এম.এস ১৫ হেন্না শাখ্রে… মসিনা মতিক চারবরা? হৌখিবা চহি ১০ দা, ভারত্তা স্তার্দ-অপ লাখ ১.৫ হেন্না শেমখ্রে… মুদ্রো লোনশিং লৌদুনা নহারোল করোর ৮ মখোয়গী অহানবা থবক হৌখ্রে। ৱাহংদি করি পাম্লিবগে? মসিনা মতিক চাদ্রিবরা, ঐগী পাউখুমদি… মসিনা মতিক চাদ্রি। ঙসি ভারত মালেমদা খ্বাইদগী নহা ওইবা লৈবাকশিংগী মনুংদা অমনি। লৈবাক অসিগী নহারোলশিংগী শক্তিনা ঐখোয় অতিয়া য়ৌনা পুখৎকনি। মসিগীদমক ঐখোয়না পাংথোক্কদবা থবক কয়া লৈরি।
মরুপশিং,
ঙসি ভারতকী ৱাখল্লোন অমসুং থবক তৌবগী মওংদা অহোংবা লাকপা অদোমশু উরম্লগনি। মহৌশানা চৎনবী ওইরি অমসুং মসি মহৌশানি, মসি অরানবনি হায়না ঐনা খন্দে। সরকার খুদিংমক্না হৌখিবা সরকারশিংগী থবকশিং চাংদম্নরি। মমাঙদা করি পাংথোক্লম্বগে, হৌজিক করি পাংথোক্লবগে, মমাঙদা কয়া য়াম্না পাংথোক্লম্বগে, হৌজিক্না কয়া য়াম্না পাংথোক্লবগে। মসিগী মীৎয়েং অসিদগী হৌখিবা সরকারদগী ঐখোয়না হেন্না ফরে হায়না লৌবনি। হৌখিবা চহি ১০-১৫ গা চাংদম্নবদা, হৌজিক অমসুং হৌখিবা মতমগা খেন্নবা লৈগনি। মওং অসিদা ঐখোয়শু থবক পাংথোক্লি। মসি মহৌশানি। ঐখোয় ঙরাং অমসুং ঙসি চাংদম্নবদা নুংঙাইবা মীওইশিং অদু মখা তানা ওইদ্রে। হৌজিক কয়া য়াম্না মাইপাক্লবগে হায়না ওনবা অসি ঐখোয়না করি পাংথোকপা ঙম্লবগে হায়বা অদু খক নত্তে… হৌজিক ঐখোয়গী পান্দমদি ঐখোয়না চৎপা পাম্লিবা মফম অদু য়ৌবনি। মদুগীদমক ঐখোয় থবক পায়খৎলি। হৌজিক ঐখোয় কদাইদা চৎলি, ঐখোয় কয়া য়াম্না লাপ্না চৎকনি, অনৌবা থৌরাং অমগা লোয়ননা অপুনবা সরকারগী মেছিন্নরিশিংগা লোয়ননা ঐ থবক তৌরি। অশানবা মীৎয়েং অমসুং ৱাখল্লোনগা লোয়ননা হৌজিক ভারত মাঙলোমদা চঙশিল্লি। ৱাখল্লোন অসিদা ২০৪৭ ফাওবগী মনুংদা বিকসিত ভারত অমা শেমগৎনবগী পান্দমশু মমি তারে। বিকসিত ভারত অমগী ঐখোয়গী পান্দম ফংনবা ঐখোয় কয়া য়াম্না লাপ্না লাক্লবগে হায়বা হৌজিক ঐখোয় উবা ফংলে। ঐখোয় করি হেন্না পাংথোক্কদবা লৈরিবগে? করম্বা খোঙজেল অমসুং পাক-চাউবদা ঐখোয় থবক তৌগনি? ঙসি ভারতমচা করোর ১৪০ না বিকসিত ভারতকী ৱারেপ থবক ওইনা পাংথোক্নবা শরুক য়ারে। মসি মখোয় মশামক্না মাংজিল থানা থবক পায়খৎলে। মসি মীয়াম শরুক য়াবগী খোঙজং অমা খক নত্তনা, মশানা মশাবু থাজবগী ভারতকী ইহৌ অমনি। অদোম অঙকপা পোক্কনি… বিকসিত ভারতকী ভিজন দোকুমেন্তগী সরকারনা থবক তৌবা হৌরকপা মতমদা, মীওই লাখ কয়ানা মখোয়গী পাউতাকশিং পীরকখি। স্কুলশিং, কলেজশিং অমসুং য়ুনিভর্সতিশিংদা খন্ন-নৈনবশিং পাংথোকখি, সরকার অমসুং খুন্নাইগী লুপশিংনা খন্ন-নৈনবা কয়া পাংথোকখি। মীয়ামদগী ফংলকপা পাউতাকশিংদা য়ুম্ফম ওইদুনা, ভারতনা মথং চহি ২৫ গী পান্দমশিং থমখি। চাউখৎলবা ভারতকী খন্ন-নৈনবা অসি হৌজিক ঐখোয়গী ৱাখল তাবগী শরুক অমা ওইরে। মসি মীয়ামগী থৌনাগী খ্বাইদগী চাউবা খুদমনি হায়না ঐনা খল্লি।
মরুপশিং,
চৎলিবা চহিচা অসি ভারতকী চহিচা ওইনবা য়াম্না মরুওইবা অতোপ্পা খুদোংচাবা অমা ঙসি ভারতকী লৈরে। হৌজিক এ.আইগী যুগনি হায়বা অদোম খঙলে। মালেমগী হৌজিক অমসুং তুংলমচৎ অসি এ.আইগা মরী লৈনরে। অদুবু ভারতকী ওইনা এ.আই অনিগী খুদোংচাবা ফংলে। মালেমগী ওইনা এ.আই অমা খক লৈরি অদুগা মোদীনা কমদৌনা এ.আই অনি পল্লিবনো হায়বা ৱাহং অমা অদোম হংলমগনি। ঐখোয়গী এ.আই লৈরি, অতোপ্পা এ.আই অদুদি এস্পিরেসনেল ইন্দিয়ানি। এস্পিরেসনেল ইন্দিয়া অমসুং আর্তিফিসিএল ইন্তিলিজেন্সকী শক্তি পুনশিনবা মতমদা, চাউখৎপগী খোঙজেল য়াংখৎলগনি।
মরুপশিং,
ঐখোয়গী ওইনা, এ.আই অসি তেক্নোলোজি অমা খক নত্তে, মসি ভারতকী নহারোলশিংগী খুদোংচাবশিংগী অনৌবা থোং অমনি। চৎলিবা চহি অসিদা ভারতনা ইন্দিয়া এ.আই মিসন হৌদোক্লে। অনা-লায়েং, লাইরিক-লাইশু, স্তার্দ-অপশিং য়াওনা হিরম খুদিংমক্তা ভারতনা এ.আই শীজিন্নরে। মালেমদা হেন্না ফবা এ.আইগী থবকশিং ফংহন্নবা ঐখোয়না থবকশু পায়খৎলে। ক্বাদ লেবেলদা ভারতনা থবক কয়াশু হৌদোক্লে। অনিশুবা এ.আই হায়বদি এস্পিরেসনেল ইন্দিয়াগী মতাংদশু ভারতনা হকচিন্না থবকশিং পায়খৎলে। ভারতকী মিদল ক্লাস… ভারতকী মীচম মীয়াম…মখোয় হিংবদা লাইহনবা… মখোয় পুন্সিগী মগুন হেনগৎহনবা… ভারতকী অপীকপা ওন্ত্রেপ্রেন্যুয়রশিং…এম.এস.এম.ইশিং…ভারতকী নহারোলশিং… ভারতকী নুপীশিং… মীওই খুদিংমক্কী অনিংবশিং থুংহন্নবা ঐখোয়না হোৎনরি।
মরুপশিং,
এস্পিরেসনেল ইন্দিয়াগী খুদম অমদি… লম্বী-থোংগী ভারত্তা পায়খৎলিবা অঙকপা থবক অসিনি। য়াংনা লম্বী-থোং শেমগৎনবা অমসুং মীওই কাংলুপ খুদিংমক লম্বী-থোং লৈহন্নবা ঐখোয়না অকনবা মীৎয়েং চঙলে। মসি চাউখৎপা পাম্লিবা খুন্নাই অমগী খ্বাইদগী মরুওইবনি। মসি ভারতকী ওইনা য়াম্না মরুওইবনি। অচৌবা লৈবাক অমদা, অসিগুম্বা মখল কয়াগী লম্মিৎ-তুমিৎ লৈবা লৈবাক অমদা, ভারতকী মতিং ফুদোক্নবা অফবা লম্বী-থোং লৈহনবা অসি দরকার য়াম্না ওই। মরম অদুনা ঐখোয়না মথক্তা চৎথোক-চৎশিন্দা মীৎয়েং থম্লে। সেন্দল তোংবা মীওইশিং ফ্লাইত্তা চৎহনবা ঐনা পাম্মী হায়না ঐনা ফোঙদোকখিবা অদু ঐ নিংশিংলি। মদু কমদৌনা ভারত্তা পাংথোকপা ঙমগনি হায়না ৱাহং কয়া হংনরকখি। অদুবু ঐখোয়না মাঙলোমদা চৎখৎখি অমসুং ফ্লাইত প্লান তৌবা হৌখি। ঙসিদি উরান চহি ৮ মপুংফারে। উরানগী মখাদা ঐখোয়না য়ুম্বী অনিদা থবক তৌরি। তয়ার-২, তয়ার-৩ সহরশিংদা এয়রপোর্তশিংগী নেতৱার্ক অমা শেমগৎলে। অনিশুবদা, মথক্ত পাইবা অসি মমল হোংদোকহল্লে, মীওই খুদিংমক চৎপা ঙমহল্লে। উরান য়োজনাগী মখাদা ফ্লাইত লাখ ৩ পাংথোকখ্রে, মসিগী মনুংদা মীচম মীয়াম করোর ১.৫০ রোম চৎথোক-চৎশিন তৌখি। ঙসিদি রুত ৬০০ হেন্না পাইরে অমসুং মখোয় অয়াম্বা অপীকপা সহরশিংগা শম্নরে। ২০১৪ দা লৈবাক অসিদা এয়রপোর্ত ৭০ রোম লৈরমখি। ঙসিদি লৈবাক অসিদা এয়রপোর্ত ১৫০ হেন্না লৈরে। কমদৌনা খুন্নাইগী অনিংবা অপাম্বশিং ফংহনবগে হায়বা উরান য়োজননা উৎলে।
মরুপশিং,
ঐ নহারোলশিংগা মরী লৈনবা খুদম খর পীগে। মালেম শীনবা থুংনা চাউখৎনবা শাফু অমা ওইনবা ভারতকী নহারোলশিং শেমগৎনবা ঐখোয়না থবক পায়খৎলে। ঐখোয়না লাইরিক-লাইশু, স্কিল হেনগৎহনবা, রিছার্স অমসুং থবক ফংনবা অকনবা মীৎয়েং চঙলে। হৌখিবা চহি ১০ অসিদা ঐখোয়না পায়খৎখিবা থবকশিংগী মহৈ চাবা হৌরে। নুমিৎ খরনিগী মমাংদা তাইমস হয়র ইজুকেসন রেঙ্কিং থোক্লকপদা, রিছার্স ক্বালিতি খ্বাইদগী য়াম্না ফগৎপা মালেমগী লৈবাক ভারতনা ওইরে। হৌখিবা চহি ৮-৯ দা, রেঙ্কিংদা য়াওবা ভারতকী য়ুনিভর্সিতিশিং ৩০ দগী ১০০ দা হেনগৎলে। হৌখিবা চহি ১০দা ক্বিউ.এস ৱার্ল্দ য়ুনিভর্সিতি রেঙ্কিংদা ভারতনা য়াওবা চাদা ৩০০ হেল্লে। ঙসিদি পেতেন্তশিং অমসুং ত্রেদমার্কশিংগী মশিং খ্বাইদগী ৱাংলে। ঙসিদি ভারত মালেমদা মরুওইবা রিছার্স অমসুং দিবলপমেন্তগী মফম অমা ওইরে। মমাঙদা অমুক্তা ওইখিদ্রিবা খোঙজেল অমদা ভারত্তা স্তার্দ-অপ ইকোসিস্তেমশিং পাকথোক-চাউথোক্লে।
মরুপশিং,
ভারত্তা লাক্লিবা অহোংবশিং অসি মালেম্না থাজবা থম্নবগী য়ুম্ফম অমা ওইরে। ঙসিদি, হিরম কয়াদা মালেমগী তুংগী ফিবম শেম্নবা ভারতনা মাঙজিল থারে। ভারত অসি অৱাবা তারকপা মতমদা মরুপ অমনি হায়না মালেমগী লৈবাকশিংনা খল্লে। তঙাইফদবা হিদাক-লাংথকশিং, তঙাইফদবা তিকাশিংগী ঐখোয়গী লৈরিবা থৌনা অসিনা ঐখোয়না দোল্লার করোর কয়া তানবা ঙমগনি। মসিনা ভারতকী ওইনা কান্নবা ফংগনি অদুবু মীওইবা খুন্নাইগী মাঙজবা ওইগনি। অৱাবা তারকপা মতমদা ঐখোয়না মালেম শীনবা থুংবগী লৈবাকশিংদা হিদাক-লাংথকশিং, তিকা কয়া ফংহনখ্রে। অৱাবা মতমদা ভারতনা মালেমগী মতেং পাংবা ঙম্বা অসিদা ঐ অপেনবা ফাওই।
মরুপশিং,
খুদোংচাবা ফংনবা মতেং পাংবগী মরী অদু ভারতনা শেমগৎতে, ঐখোয়গী মরীদি থাজবা অমসুং অফবা থবক তৌবদা য়ুম্ফম ওইবনি। মালেম্নশু মসি খঙই। লৈবাক অমগী চাউখৎপনা মালেমদা হরাওবা পুরকপা লৈবাক অমা ভারতনা ওইরি। ভারতকী মাইপাকপদা, মালেম্না অফবনি হায়না খল্লি। হৌজিক চন্দ্রয়ানগী থৌদোক য়েংসি,মালেম শীনবা থুংনা মসি কুহ্মৈ অমগুম হরাওবা ফোঙদোকখি। মরমদি ভারতকী চাউখৎপা অসিনা মালেম শীনবা থুংনা কান্নবা ফংগনি। মমাংঙৈদগী হৌনা মালেমগী চাউখৎনবা ভারতনা অকনবা শক্তি অমা ওইরকই হায়বা ঐখোয় খুদিংমক্না খঙলে। কমদৌনা চহিচা কয়া ভারতকী অনৌবা ৱাখলশিং, অনৌবা থবকশিং, ভারতকী পোৎথোকশিংনা মালেমদা অকনবা ইথিল পীরম্বগে। মতমগী অহোংবা লাকখি অমসুং ভারত মতম শাংনা মীনাই ওইখি অমসুং ঐখোয় মনিং হনখি। মালেমগী ওইনা উদ্যোগকী অওনবা লাকপা মতম অদু ফাওবা ভারত মীনাই অমা ওইখি। মীনাই ওইখিবা অদুনা মরম ওইদুনা ঐখোয়না উদ্যোগকী অওনবা লাকপগী খুদোংচাবশিং লৌবা ঙমখিদে। হৌজিক ইন্দস্ত্রি ৪.০গী যুগনি। ভারত মখা তানা মীনাই ওইদ্রে, ঐখোয় নিংতম্বা চহি ৭৫ মপুংফারে। মরম অদুনা হৌজিক ঐখোয় থৌরাং তৌদুনা লৈরে।
মরুপশিং,
ইন্দস্ত্রি ৪.০গী দরকার ওইবা ইনফ্রাস্ত্রকচর অমসুং দরকার ওইবা স্কিলশিং লৈহন্নবা ভারতনা য়াংনা থবক তৌরি। হৌখিবা চহি ১০দা ঐনা মালেমগী মফম কয়াগা শম্নবগী খুদোংচাবা ফংলে। ঐ মালেম শীনবা থুংনা জি-২০ অমসুং জি-৭ মীফমশিং শরুক য়াখ্রে। নুমিৎ ১০ গী মমাংদা,ঐন অসিয়ান সমিৎ শরুক য়ানবা লাওসতা চৎখি, মীফম খুদিংমক্তা ভারতকী দিজিতেল পব্লিক ইনফ্রাস্ত্রকচরগী মরমদা ৱাফম কয়া খন্নখিবা অদু খঙবদা অদোম হরাওগনি। ঙসিগী মালেম্না ভারতকী দিজিতেল পব্লিক ইনফ্রাস্ত্রকচরগী মতাংদা য়েংলি। মফম অসিদা ঐখোয়গী মরুপ ভারতপু নুংশিজবা পাউল রোমর লৈরে। ঐনা মমাঙদা মহাক্কা লোয়ননা অনৌবা ৱাখল্লোন কয়া খন্নবগী খুদোংচাবা ফংখ্রে। ঐনা মহাক অমেরিকাদশু উনখ্রে। ঐখোয় উনবা অদুদা, পাউলনা ভারতকী দিজিতেল পব্লিক ইনফ্রাস্ত্রকচর, আধার অমসুং দিজিলোক্করগুম্বা অনৌবা থবকশিং থাগৎপা ফোঙদোকখি। অচৌবা মীফমশিংদা, কমদৌনা ভারতনা দিজিতেল পব্লিক ইনফ্রাস্ত্রকচরগুম্বা অফবা থবক অমা পায়খৎলিবনো হায়না মীয়াম অঙকপা পোক্নখি।
মরুপশিং,
ইন্তরনেতকী যুগতা অহানবা থবক তৌবগী খুদোংচাবা ভারতনা ফংখিদে। মসিগী খুদোংচাবা ফংখিবা লৈবাকশিংদা, প্রাইভেত প্লেতফোর্মশিং, প্রাইভেত ইন্নোবেসনশিংনা দিজিতেলগী থবকশিং লুচিংখি। মসিনা মালেমদা অনৌবা অওনবা অমা পুরকখি। অদুবু মসিগী কান্নবা অসি খর খক্তা ওইখি। অনৌবা মোদেল অমা ভারতনা মালেমদা উৎপা মতমদা, তেক্নোলোজি অসি মীওই খুদিংমক শীজিন্নবা ফংনবা দিজিতেল পব্লিক ইনফ্রাস্ত্রকচরগী অনৌবা লম্বী অমা ভারতনা মালেমদা উৎখি। ঙসিদি ভারত সরকারনা প্লেতফোর্ম অমা শেম্লে অমসুং মসিদা অনৌবা মিল্লিয়ন কয়া পাংথোক্লে। ঐখোয়গী জন ধন আধার অমসুং মোবাইল জাম অসি য়াংনা অমসুং মরক্তা অপনবা য়াওদনা খুদোংচাবশিং ফংহন্নবা অফবা সিস্তেম অমা ওইরে। ঐখোয়গী য়ু.পি.আই য়েংউ… মসি ভারত্তা ফিনতেক্কী অনৌবা থবক অমা পাকথোক-চাউথোকপনি। য়ু.পি.আইনা মরম ওইদুনা, নুমিৎ খুদিংগী দিজিতেল ত্রান্সসেক্সন মিল্লিয়ন ৫০০ হেন্না পাংথোক্লে। মসিদা কোর্পোরেত অমতনা মতেং পাংদে, মসি ঐখোয়গী অপীকপা দুকান মপুশিং, লম্বী নাকলগী পোৎ-চৈ য়োনবশিংনা ওইহনবনি। ঐখোয়গী পি.এম মোবিলিতি প্লেতফোর্ম অসি অতোপ্পা খুদম অমনি। ইনফ্রাস্ত্রকচর শেমগৎপদা ই-পাউ ফাওনদবা কোকহন্নবা ঐখোয়না পি.এম গাতিশক্তি পায়খৎলে। ঙসিদি মসিনা ঐখোয়গী লোজিসতিক্সকী থবকশিংদা অওনবা পুরকপদা মতেং পাংলে। অসিগুম্বা থবক অসি ঐখোয়গী ও.এন.দি.সি প্লেতফোর্মনি। মসিনা অনৌবা থবক ওইদুনা ওনলাইন্দা পোৎ-চৈ য়োনবগী থবক হেন্না অরোন-অথুপ লৈহন্দ্রে। ভারতনা মশক তাক্লিবা তেক্নোলোজি অসি মীওই কাংলুপ খুদিংমক কোনশিনবা, অরোন-অথুপ লৈতবা অমসুং শক্তি পীবা খুৎলায় অমনি, লাকশিন্নবা অমসুং তোখায় তানবা খুৎলায় নত্তে।
মরুপশিং,
২১শুবা চহিচা অসি মীওইবগী পুৱারিদা খ্বাইদগী মরুওইবা মতমনি। ঙসিগী মতম অসিগী খ্বাইদগী দরকার ওইবা অসি…তংদু-লৈতাবা, তুংকোইনা চৎনবা য়াবা থবক অমসুং পাম্বৈশিংনি… মখোয় অসি মীওইবা খুন্নাইগী অফবা তুংলমচৎ অমগী খ্বাইদগী মরুওইবা ফিবমশিংনি। মসি পাংথোক্নবা ঙসি ভারতনা হোৎনরি। মসিদা ভারতকী মীয়াম্না অমতা ওইনা শৌগৎলে। চহি ৬০ অসিদা অহানবা ওইনা, লৈবাক অসিগী মীয়াম্না অহুমলকশুবা ওইনা থংন-থংননা সরকার অমা শেমগৎনবা মখোয়গী অনিংবা অপাম্বা পীরে। মসিগী পাউজেল অসি তংদু-লৈতানা লৈনবনি। হন্দক হরিয়ানাদা মীখল পাংথোকখ্রে। হায়রিবা মীখল অসিদশু, ভারতকী মীয়াম্না তংদু-লৈতানা লৈনবা ৱাখল্লোন অসিদা অহেনবা থৌনা হাপ্লে।
মরুপশিং,
অইং-অশাগী খল হোংলকপগী অৱাবা অসি ঙসিদি অপুনবা মীওইবা খুন্নাইগী অৱাবা ওইরে। হিরম অসিদশু মাঙজিল থানবা ভারতনা হোৎনরি। মালেমগী অইং-অশাগী খল হোংলকপদা ঐখোয়না মতেং পাংলিবা অসি মমিংতগীনি। অদুবু ঐখোয়গী চাউখৎপগী থবকশিংদা ভারতনা মৈখু থাংদবা ইনর্জি শীজিন্নরে। ঙসিদি ঐখোয়গী চাউখৎ-থৌরাংগী থৌরাং তৌবদা তুংকোইনা চৎনবা য়াবা থবকশিং অসিনা ময়াইদা থম্লে। ঐখোয়গী প্রধান মন্ত্রী সুর্যাঘর মুফতি বিজলি য়োজনা য়েংসি… লৌবুকশিংদা সোলার পম্পশিং খিল্লিবা স্কিমদা য়েংসি… মসি ঐখোয়গী ই.ভিগী অওনবা ওইবা য়াই নত্ত্রগা ইথানোল য়ানশিনবগী থবক ওইবা য়াই… মসি পাক-চাউনা নুংশিত্তগী মৈ পুথোক্নবা ফার্মশিং ওইবা য়াই, নত্ত্রগা এল.ই.দি লাইত থানবগী ইহৌ ওইবা য়াই… সোলার পৱার এয়রপোর্তশিং নত্ত্রগা বাইওগ্যাস প্লান্তশিংদা মীৎয়েং চঙবা ওইবা য়াই… অদোম্না ঐখোয়গী থৌরম অমা, স্কিম অমা হেক্ত য়েংবা য়াই। গ্রিন ফ্যুচর অমসুং গ্রিন জোবশিংগী মাইকৈদা ঐখোয়না পায়খৎলিবা অকনবা থবক অমা অদোম্না উগনি।
মরুপশিং,
তংদু-লৈতাবা অমসুং তুংকোইনা চৎনবা য়াবা থবকশিংগা লোয়ননা, ভারতনা ঙসিদি পাম্বৈশিং পুথোক্নবশু মীৎয়েং চঙলে। হৌখিবা চহি ১০দা, মালেমগী খুদোংচাদবশিং কোকহন্নবা দরকার ওইবা পাম্বৈশিং পুথোক্নবা ভারতনা থবক পায়খৎলে। ইন্তরনেসনেল সোলার এল্লাইন্স… কোলিএসন ফোর দিজাস্তর রিসিলিয়েন্ত ইনফ্রাস্ত্রকচর… ইন্দিয়া মিদল ইস্ত ইকোনোমিক কোরিদোর… গ্লোবেল বাইওফ্যুএল এল্লাইন্স… য়োগ… অয়ুর্বেদা… মিসন লাইফ… মিসন মিল্লেতস… থবক পুম্নমক অসি মালেমগী খুদোংচাদবশিং কোকহন্নবা পাম্বৈশিং পীনবা ভারতনা পায়খৎপনি।
মরুপশিং,
ভারতকী শক্তি হেনগৎলকপা অসিনা ভারতকী হেন্না অফবা ওইরকপদা ঐ হরাওই। ভারতনা হেন্না চাউখৎলিবমখৈ মালেম্না হেন্না কান্নবা ফংগনি। মীওই খুদিংমক্কী লৌশিংদগী নুংঙাই-য়াইফবা চহিচা অমা, মীওই খুদিংমক্কী অনৌবা থবকশিংদগী নুংঙাই-য়াইফবা চহিচা অমা, লায়রবা লৈতবা চহিচা অমা, মীওই খুদিংমক চাউখৎনবা খুদোংচাবশিং ফংবা চহিচা অমা, ভারতকী থবকশিংনা মালেমগী তংদু-লৈতাবা পুরকপা অমসুং শান্তি হেনগৎলকপা চহিচা অমা ওইরসনু। মসিগী ৱাখল্লোন অসিগা লোয়ননা, থৌরম অসি শরুক য়ানবা খুদোংচাবা পীবগীদমক ঐনা অমুক হন্না এন.দি.তি.ভি থাগৎপা ফোঙদোকচরি। মাইপাকপা সম্মিৎ অমা ওইনবা ঐনা অমুক হন্না মীয়ামগী মফমদা য়াইফ-পাউজেল পীজরি।
অদোম ঙমখৈ লৈতনা থাগৎপা ফোঙদোকচরি।
