ভারত ইমানা য়াইফরে!
ভারত ইমানা য়াইফরে!
মধ্য প্রদেশকী রাজ্যপাল, শ্রীমান মঙ্গু ভাই পতেল, মুখ্য মন্ত্রী, ভাই শিবরাজ সিংহ চৌহান, কেন্দ্র মন্ত্রী মন্দলগী ঐহাক্কী মরুপ, এম.পি. সরকারগী মন্ত্রী, এম.পি., এম.এল.এ., ফম্বাক্তা লেংখৎপীরিবা অতোপ্পা শক্নাইবা মীথুংলেন, অদুগা ঐখোয়বু থৌজাল পীবীনবগীদমক্তা মশিং য়াম্না লেংবীরক্লিবা ইবেম্মা অমসুং ইবুংঙোশিং!
ইমা নর্মদাগী শেংলবা লমদম অসিদা কোক নোঞ্জদুনা, ঐহাক্না ঙসি জবলপুরগী অনৌবা শক্তম অমা উবা ফংজরে। জবলপুরদা থৱাই য়াওবা, মহাকৌশলদা নুংঙাই য়াইফবগী মতৌ উবা ফংলি। সিগুম্বা থৱাই য়াওবা অমসুং হরাও নুংঙাইবগী মতৌনা মহাকৌশলগী ৱাখল্লোন্দা করি ফাওরিবগে হায়বা তাক্লি। মসিগুম্বা নুংঙাইবা কয়াগী মরকসিদা ঙসিদি লৈবাক পুম্বনা রানী দুর্গাবতীজীগী 500শুবা মপোক কুমওন পাংথোক্লি। রানী দুর্গাবতী গৌরব য়াত্রা লোইশিল্লকপদা ঐহাক্না মহাক্কী মপোক কুমওনবু লৈবাক্কী থাক্তা পাংথোকসি হায়বা ৱাফম থমখিবনি। ঐখোয়না মদুগী মতুং ইন্দুনা ঙসি মফমসিদা পুল্লি, অফবা থবক কয়া পাংথোক্নবগীদমক্তা মফমসিদা পুল্লি, ঐখোয়গী অহল লমনশিংগী লমন শিংনবা মফমসিদা পুল্লি। ঐখোয়না ঙৈহাক্কী মমাংদা রানী দুর্গাবতীজীগী নীংশিং খুভমগীদমক্তা ভুমী পুজন পাংথোকখ্রে। খুভম অসি করম্না শাগনি হায়বগী মতাংদা শিবরাজজীনা ঐহাক্কী ইফমদা য়াম্না কুপ্না তাকপীরম্মি, মদুগী মেপসু উৎপীরম্মি। মসি হেক শাবা লোইবদা, হিন্দুস্তানগী মমা, নহা ওইরিবা মচা খুদিংনা লমদম অসিদা শোইদনা লাক্নিংবা ফাওগনি হায়না ঐহাক্না চেৎনা থাজৈ। মসিনা মওং অমগী লমকোয়ফমসু ওইরক্কনি। রানী দুর্গাবতীগী পুন্সিনা ঐখোয়দা মীপুম খুদিংগী য়াইফ য়ুম্বাল লৈহনগদবনি অমসুং ইশাগী পোক্নফম লমদমগীদমক্তা করিগুম্বা খরা পাংথোক্কদবনি হায়না তম্বীরি। ঐহাক্না রানী দুর্গাবতীগী মপোক কুমওন অসিদা ত্রাইবেল খুন্নাই পুম্নমক, মধ্য প্রদেশ, অমসুং লৈবাক মীয়াম করোর 140গী মফমদা য়াইফ পাউজেল পীজরি। করিগুম্বা লৈবাক অমনা রানী দুর্গাবতীগুম্বা মখোয়গী হিরো লৈরবদি, মখোয়সু ঐখোয়না তৌরিবা অসিগুম্না নুংঙাইবনা মথুম মরাং হৌগনি। নিংতম্বা মতুংদা ঐখোয়গী লৈবাক্তসু মসিমক ওইফম থোকপনি, অদুবু ঐখোয়গী অথোইবা মীওইশিংবু কাওথোকপীরে। ঐখোয়গী অথোইবা মীওইশিংগী কত্থোকপা, থৌনা, ইথিল কয়াবু লৈবাক অসিনা কাওথোকপীরে।
ঐহাক্কী ইমুংগী মীওইশিং,
ঙসি, লমদমসিদা পুন্না লুপা করোর লিশিং 12 হেনবগী চাউখৎ থৌরাংগী থবকশিংগী উরেপ উয়ুং তম্লি, মীয়ামদা খুৎশিন্নরি। ঈশিং অমসুং গ্যাস পাইপ্লাইন ওইরো, নত্ত্রগা লেন 4গী শোরোক্কী নেতৱর্ক ওইরো, থবকশিং অসি মীওই লাখ কয়াগী পুন্সিদা অহোংবা পুরক্কদবা প্রোজেক্ত ঙাক্তনি। মসিনা লমদমসিগী লৌমীশিংদা অচৌবা মতেং পাংগনি, অনৌবা ফেক্তরী অমসুং কারখানা কয়া লিংখৎহনগনি, ঐখোয়গী নহাশিংদা থবক্কী খুদোংচাবা ফংহনগনি।
ঐহাক্কী ইমুংগী মীওইশিং,
ঐখোয়গী ইচে-ইচলশিংদা মৈখু খুদবা চাকখুম পীবা হায়বসি বি.জে.পি. সরকারগী মিৎয়েংগী মনুংদা অমনি। ইমা অমনা চাক থোংলিবনি হায়দুনা শিং মৈ থাবা, নত্ত্রগা মৈতান্না মৈ থাদুনা চাকখুমদা লৈবা, মৈখু মরক্তা পুং 24 লৈবনা মরম ওইদুনা চুরুপ 400না থাদোকপা মৈখুগী চাং মান্ননা মহাক্কী হকচাংদা চঙই হায়না রিসর্চনা তাক্লি। মসিগুম্বা খুদোংচাদবশিং অসিদগী ঐখোয়গী ইমে, ইচে-ইচলশিংনা মনিং তম্ফম থোক্তবরা? পাঙ্গল থোক্না অমুক্তা হায়বীয়ু, মসি ঐখোয়গী ইমাশিংগী মরমদনি। ঐখোয়গী ইমা, ইচে ইচলশিংনা মৈখু থোক্তবা চাকখুম ফংফম থোকই নত্ত্রগা থোক্তে? থবক অসিবু কংগ্রেসনা মমাংদা তৌফম থোক্তবরা? মখোয়না তৌরমদে, মখোয়না ঐখোয়গী ইমা ইবেল, ইচে ইচলগী হকশেলগী মরমদা করিসু নাচুংবীরমদে।
ইচিল ইনাওশিং,
মসিনা মরম ওইরগা, ঐখোয়না লাইরবা ইমুংগী ইচে ইচল করোর কয়াগী মফমদা খোঙথাং কয়া চত্থদুনা উজ্বালাগী গ্যাস কন্নেক্সন লেম্না পীখি। মমাংদদি, গ্যাস কন্নেক্সন অমা লৌনবগীদমক্তা এম.পি.গী ময়ুমদা তোয়না চৎপগী মথৌ তারম্মি। রক্ষা বনধনগী মতমদা মচুংশিংনা মচলশিংদা খুদোল পীনৈ হায়বসি অদোম্না খঙলবনি। হন্দক্কী রক্ষা বন্ধনগী থৌরমদা ঐখোয়গী সরকারনা ইচেল ইচলশিংগী গ্যাস সিলিন্দরগী মমল হন্থহনখি। উজ্বালাগী বেনেফিশরীশিংনা লুপা 400দা সিলিন্দর ফংখিবনি। নুমিৎ খরনিগী মতুংদা দুর্গা পুজা, নবরাত্রী, দশেরা, দিৱালীগী কুহ্মৈ লাক্লগনি। অদুনা মোদী সরকারনা ঙরাংমক্তদা উজ্বালা গ্যাস সিলিন্দরগী মমলবু লুপা 100 অমুক হোংথহনখ্রে। মসিনা হায়বদি, উজ্বালা বেনেফিশরীশিংগীদমক্তা গ্যাস সিলিন্দরগী মমল অসি হৌখিবা চয়োলদা লুপা 500 হোংথখ্রে হায়বনি। হৌজিক্তি, উজ্বালাগী বেনেফিশরী ওইরিবা ঐহাক্কী লাইরবা ইমা, ইচে ইচলশিংনা শুপ্নগী লুপ্স 600তা গ্যাস সিলিন্দর ফংলগনি। সিলিন্দরগী মহুত্তা, গ্যাস পাইপ্লাইনগী খুত্থাংদা চাকখুমদা গ্যাস য়ৌহন্নবগীদমক্তা বি.জে.পি. সরকারনা খোঙজেল য়াঙনা থবক তৌরি। মরম অদুনা, লমদমসিদসু গ্যাস পাইপ্লাইন তিংলি। মসিনা মধ্য প্রদেশকী ইমুং কয়াদা কান্নবা পীরগনি।
ঐহাক্কী ইমুংগী মীওইশিং,
কোলেজ কারিবা, ঐখোয়গী নহা ওইরিবা ইচা ইশুশিংগী মফমদা ঐহাক্না থাইনগী ৱারি খরা নীংশিংহন্নীংই। ইং 2014গী ৱারি খরা তমগেকো? অদোমগী চহিসি হৌজিক 20-22 শুরম্লগনি, অদুনা অদোম্না খঙলমদবসু য়াই, মরমদি অদোম মতমদুদা শুপ্নগী চহি 8, 10, 12 অদাইদা লৈরমগনি। মোদী লাক্ত্রিঙৈগী মমাংদা করি ফিভম ওইরম্মি হায়বা খঙলম্লোই। মতমদুদা পানবা কংগ্রেস সরকারগী লুপা করোর লিশিং কয়াগী ৱাথোক্না মতমদুগী হেদলাইন ওইরম্মি। লাইরবগীদমক্তা থাদগদবা শেল পুম্নমক কংগ্রেসকী লুচিংবশিংগী পাক্সিদা চঙলম্মি। হৌজিক্কী নহাশিংদি ওনলাইনগী চারোন শুরোন ওইবনিনা, গুগল তৌরগা অমুক্তা য়েংবীয়ু, 2013-14গী পাউ চেগী হেদলাইন করি ওইবগে, লৈবাক্কী করি ফিভম ওইরম্বগে অমুক্তা য়েংবীয়ু।
অদুনা, ইচিল ইনাওশিং,
ইং 2014গী মতুংদা অদোমগী সেবাগীদমক্তা ঐখোয়দা থৌদাং শিন্নরকখিবা অদুদগী, কংগ্রেস সরকারনা শেম্লম্বা শেঞ্জা থুমজাগী পথাপশিংবু হোংদোক্নবা ঐখোয়না অভিয়ান কয়া চত্থখি, মফমসিদসু শেংদোকপগী খোঙথাং চত্থখি। ঐখোয়না তেক্নোলোজী শিজিন্নদুনা অরানবা মিং চাউরাক্না করোর 11বু সরকারগী ওফিসশিংদগী লৌথোকখি। মশিং অসি নীংসিংবীয়ুকো। মিংশিং অসিদি অমুক্তা ফাওবা পোকখিদ্রিবা মীওইগী মমিংনি। সরকারগী শেল হুরানবা য়ানবা শেমখিবা মিংনি। কংগ্রেসনা অরানবা মিংশিং অসিগী অরানবা চে-চাং কয়া শেমদুনা থম্লম্বনি।
মধ্য প্রদেশ অমসুং ছতিসগরগী অপুনবা মীশিংদগী মসিগী অরানবা মিং মশিংনা হেনবনি। মসিগী অরানবা মিং করোর 11 অসিনা তসেংনা লাইরবা মীওইশিংগী হক মৎপীখিবনি। ঐখোয়না ইং 2014দা সরকারদা লাক্লবা মতুংদা পুম্নমক অসিবু শেংদোকখি। মখোয়না শাওখিবগী মরমদি মখোয়গী শেন্দান লম্বী ঐখোয়না থদৎখিবগীনি। লাইরবগী হকসু মৎহনখিদে, কংগ্রেসকী পাক্সিসু থলহনখিদে, মোদীনা মসি পাংথোকখিবনি। ঐখোয়না জনধন-আধার অমসুং মোবাইলগী ত্রিশক্তি অমা শেমদুনা কংগ্রেসকী শেঞ্জা থুমজাগী পথাপ্পু মরু ফংনা মুত্থৎখিবনি। ঙসিদি, মসিগী ত্রিশক্তিগী মহৈদগী, অরানবা খুত্তা চত্তুনা লৈরম্লবা লুপা করোর লাখ অনি মখায়বু কনখি। ঙসিদি, লাইরবগী শেল পুম্নমক লাইরবগী য়াইফ য়ুম্বালগীদমক্তা শিজিন্নরে। উজ্বালা গ্যাস সিলিন্দরবু শুপ্নগী লুপা 500তা ফংহন্নবা কেন্দ্র সরকারনা লুপা করোর কয়া থাদরি। ইমুং করোর কয়াদা লেম্না রেসন পীনবগীদমক্তা, ঐখোয়না লুপা করোর লাখ 3 থাদখি। লাইরবা ইমুংগী অঙাং অমত্তনা মবুক হাঙলগা তুম্বা চঙহন্দনবা, চাকখুম অমত্তগী মৈ মুৎহন্দনবা ঐখোয়না লুপা করোর লাখ 3 অসি থাদরিবনি। লৈবাক্কী ইমুং চাউরাক্না করোর 5না অয়ুশমান য়োজনাগী মখাদা লেম্না লাইয়েংবা ফংখি। মসিগীদমক্তসু, সরকারনা লুপা করোর লিশিং 70বু অদোমগী অয়ুশমান কার্দকীদমক্তা চাদিং তৌখি। লৌমীশিংনা য়ুরিয়া হোঙনা ফংহনখি, মালেমদা লুপা লিশিং 3দা য়ুরিয়া বেগ অমা ফংলিবা অসিবু মোদীনা শুপ্নগী লুপা 300তা ফংহনখি। মসিগীদমক্তা কেন্দ্র সরকারনা মশাগী শেনগাওদগী লুপা করোর লাখ 8 শিজিন্নখি। পি.এম. কিসান সম্মান নিধীগী মখাদা, লুপা করোর লাখ 2.5 অসিবু লৌমীশিংগী বেঙ্ক একাউন্ততা হকথেংননা হাপখিবনি। লাইরবা ইমুংদা পক্কা য়ুম পীনবা ঐখোয়গী সরকারনা লুপা করোর লাখ 4 শিজিন্নখি। ইন্দোরদা মতমগা চুনবা তেক্নিক শিজিন্নদুনা শারিবা মথোল য়াম্বা পক্কা য়ুম 1000 অসিবু লাইরবশিংদা পীবগী থবকসু মোদীনা পাংথোকখিবনি।
ঐহাক্কী ইমুংগী মীওইশিং,
শেলশিং অসি অমত্তা ওইনা পুনশিল্লবদি, পুল্লপ্না কয়া ওইগনি, জিরো কয়া য়াম্না য়াওগনি, অদোম খঙবা ঙম্বরা? কংগ্রেসকী মীওইশিংনা মসিগী হিসাব তৌবা কৈদৌনুংদা ঙম্লরোইদবনি। অদুগা, ইং 2014গী মমাংদদি, মসিগী জিরোশিং অসি ৱাথোক্কী শেল তাখৎপদা শিজিন্নরম্মিবনি। কংগ্রেসকী প্রধান মন্ত্রী অমনসু হায়খ্রবনি, দিল্লীদগী লুপা অমা থাদরকপা মতমদা লাইরবদা পৈশা 15 ফংই, অরেম্বা পৈশা 85তি মৎখ্রে। ঐহাক্না শেনফম কয়া অমা হায়খ্রিবা অসিবু কংগ্রেসকী মতমদা থাদবা ওইরম্লবদি, শেল কয়া য়াম্না হুরাল্লমগনি, অদোম অমুক্তা খন্থবীয়ু। ঙসি অশুক য়াম্লবা শেনফম অসি বি.জে.পি. সরকারনা লাইরবগীদমক্তা থাদরিবনি।
ঐহাক্কী ইমুংগী মীওইশিং,
হৌজিক্কী মতম অসিদি ঐহাক্কী মধ্য প্রদেশকী ওইনা য়াম্না মরু ওইবা পুঙফম্নি। ঐহাক্না ঙসি ইমা নর্মদাগী তোর্বান্দা লেপ্তুনা হায়জরি, মধ্য প্রদেশকী নহাশিংগী মফমদা হায়জরি, ইমা নর্মদাবু নীংশিংদুনা হায়জরি। মধ্য প্রদেশকী চাউখৎ থৌরাংগী খোঙথাং অসিদা অপনবা অমা হেক লাকপদা ঐখোয়না চহি 20-25গী চাউখৎ থৌরাংগী খুদোংচাবা মাঙগনি, মসি অমুক হন্না লাক্লরোইদবনি , অদুনা ঐখোয়না খোঙজেল অসিদা অপনবা অমত্তা লাকহনবা য়াবা নত্তে। মসিগী চহি 25 অসি অদোমগী ওইনা য়াম্না মরু ওইবনি। রাজ্যসিগী চহি 25তগী তাবা মীওইশিংনদি, অনৌবা অমসুং চাউখৎপা মধ্য প্রদেশ অমা উরমগনি। মথংগী চহি 25 অসিদা হৌরক্কদৌরিবা চারোন শুরোনশিংনা চাউখৎপা অমসুং নুংঙাই য়াইফবা মধ্য প্রদেশ অমা মমাংদা উহনবা ফংবা হায়বসি অদোমগী থৌদাং ওইরবনি। অদুনা ঙসিদি, অদোম্না হোৎনবা কনবগী মথৌ তাই। অচুম্বা ভারেপ লৌবা তাই। হৌখিবা চহিদা বি.জে.পি. সরকারনা মধ্য প্রদেশপু লৌ-শিংউগী পোত্থোক এক্সপোর্ত তৌবগী মকোক থোংবা থাক্তা থম্বীখি। ইন্দস্ত্রীগী চাউখৎ থৌরাংগী মতাংদসু মধ্য প্রদেশনা নম্বর ৱান ওইবা হায়বসিসু য়াম্না তঙাই ফবনি। মমাংগী চহিশিংদা ভারতকী দিফেন্স মেন্যুফেকচর অমসুং এক্সপোর্তকী চাংদা শরুক য়াম্না হেনগৎখি। মসিদা জবলপুরগী অচৌবা থৌদাং য়াওরি। দিফেন্স মেন্যুফেকচরগা মরী লৈনবা পোত্থোক শাবা ফেক্তরী মরি ঐখোয়গী জবলপুরদা লৈ। ঙসিদি, কেন্দ্র সরকারনা ঐখোয়গী লান্মীশিংদা ভারত্তা শাবা খুৎলায় শিজিন্নহল্লি। ভারতকী দিফেন্স প্রদক্তশিংগী দিমান্দ অসি মালেমদা য়াম্না লৈরে। মসিনা মধ্য প্রদেশ্তা কান্নবা য়াম্না পীগনি, মসিনা মফমসিগী থবক পীবগী অচৌবা পাম্বৈ অমসু ওইরিবনি।
ঐহাক্কী ইমুংগী মীওইশিং,
ঙসিদি ভারতনা মশাবু থাজবগী চাংনা য়াম্না ৱাংবা থাক্তা লৈরিবনি। শান্নবগী লম্পাক্তগী হৌরগা লবুক ফাওবদা ভারতকী মিংচৎ লৈরবনি। হৌজিক এসিয়ন গেম্স পাংথোক্লিবা অসি অদোম উরেকো, মসিদা ভারতনা ফজরবা পরফোর্মেন্স কয়া উৎলি। হৌজিক অসি ভারতকী মতম্নি হায়বসি ঐখোয়গী নহা খুদিংনা খল্লবনি। নহাশিংনা মসিগুম্বা খুদোংচাবা ফংলকপা মতমদা, ভারতকী চাউখৎহন্নীংবগী ৱাখল্লোনসু অৱাংবা থাক্তা লৈরকই। ঐখোয়না G20গুম্বা অচৌবা থৌরম নীংথিজনা পাংথোকপা ঙমখ্রিবা অদুসু মসিগুম্বা থাজবগী থাক ৱাংবা অসিননি। লৈবাক অমত্তনা য়ৌবা ঙমদবা মফমদা ঐখোয়গী চন্দ্রয়ান্না য়ৌবা ঙমখ্রিবনি। লোকেলগীদমক্তা ভোকেল ওইবগী মন্ত্রনা মফম খুদিংদা নিল্লিবনি। নাকল অমদনা লৈবাক অসিনা চন্দ্রয়ান্দা য়ৌরি, অদুগা অতোপ্পা নাকল অমদনা ওক্তোবর 2গী নুমিত্তা দিল্লীগী খাদী ভন্দারদা লুপা করোর 2.5 হেনবগী খাদীগী পোত্থোক য়োনখি, মসি লৈবাক্কী পাঙ্গলনি। স্বদেশীগী মসিগুম্বা ৱাখল্লোন, লৈবাকপু মাঙজিল থানা পুবগী ৱাখল্লোন অসি মাইকৈ মরিদা হেনগৎলক্লি। মসিগী চুক্লি পায়রিবসি ঐখোয়গী নহাশিংনি, লৈবাক্কী মচানুপা, মচানুপীশিংনি। মসিনা মরম ওইবনা, ভারতকী নহাশিংনা স্তার্তঅপকী মালেমদা মশক থোকপা থবক পাংথোক্লিবনি। অদুগা, হন্দক্কী অক্তোবর 1দা লৈবাক স্বচ্ছতা অভিয়ান পাংথোকখি, মসিদা লাখ 9 হেনবা মফমদা লম-তু শেংদোকপগী থবক পাংথোকখি। মফম লাখ 9। খোঙথাং অসিদা শরুক য়ানবগীদমক্তা লৈবাক মীয়াম করোর 9 হেনবনা ময়ুমদগী থোক্নরকখি, খুত্তা শুমচিৎ পায়দুনা লৈবাকপু শেংদোকখি, লম্বী শোরোক, পার্কশিং শেংদোকখি। অদুগা, মধ্য প্রদেশকী মীয়াম্নদি ফজবা থৌওং অমা পাংথোকখ্রেনা। স্বচ্ছতাগী মতাংদা মধ্য প্রদেশনা খ্বাইদগী মকোক ওইরে। মসিগী ইথিল অসিমক ঐখোয়না খুমাং চাউশিলহনবা তাই। অদুগা লাক্কদৌরিবা চহি 5 অসিদসু, ঐখোয়না মধ্য প্রদেশপু য়ারিবমখৈ হীরম খুদিংদা মকোক থোংবা ওইহনবা তাবনি।
ঐহাক্কী ইমুংগী মীওইশিং,
রাজনীতি দল অমনা মশাগীতা খল্লকপা মতমদা, মখোয়গী ফিভম করি ওই হায়বা ঐখোয়না খঙবা ঙম্মি। ভারতকী চাউখৎ খোঙথাংগী মতাংদা মালেম্না ঙসি ৱারি শানরি। অদুবু, মশাগী চৌক্রি নত্তনা পুম্নমক মাঙখ্রবা রাজনীতি দল অসিনা মসিবু উবা ঙমদ্রি। মখোয় অসে অদুক্কী মতিক তাখ্রে, বি.জে.পি.বু চৈবদগী হেন্দোক্তনা ভারতপু চৈবা হৌরক্লবনি। মালেম পুম্বনা দিজিতেল ইন্দিয়াগী খোঙথাংবু থাগৎনরি। দিজিতেল ইন্দিয়াগীদমক্তা ঐখোয়বু করেম কথাইনখিবদু অদোমসু অমুক্তা নীংশিংবীয়ু। ভারতনা কোরোনাগী মতমদা মালেমগী খ্বাইদগী ফবা ভেক্সিন শাখি। মীওইশিং অসিনা ঐখোয়গী ভেক্সিন অসিগী মতাংদসু ৱাহং হংখিবনি। ‘ভেক্সিন ৱার’ কৌবা অনৌবা ফিল্ম অমা থোক্লক্লে হায়না ঐহাক্কী ইফমদা হৌজিক্তা তম্লকই, মালেম্বু মিৎকপ থোকহনগদবা ফিল্ম অসি ঐখোয়গী লৈবাক্তা পুথোক্লিবনি। ঐখোয়গী লৈবাক্কী সাইন্তিস্তশিংনা মতৌ করম্না হোৎনখিবগে, লৈবাক্কী মীওই কয়াগী পুন্সি করম্না কনবীখিবগে হায়বগী মতাংদা নম্বা ফিল্ম অমনি, ভেক্সিন ৱার।
ইচিল ইনাওশিং,
ভারতকী লান্মীনা হায়বা ৱাফম, মখোয়না পাংথোকপা ওপরেসন্দসু মখোয়না ৱাহং হংলি। লৈবাক্কী য়েক্নবা, তেরোরিস্তশিংগী ৱাফম্বু মখোয়না চুম্মি খল্লিবনি। ঐখোয়গী লান্মীগী ৱানা চুম্মি খন্দবনি। নিংতম্বগী চহি 75 মপুং ফারকপগীদমক্তা লৈবাক্না অমৃত মহোৎসব পাংথোক্লিবসি অদোমসু খঙলে। মসিদি বি.জে.পি.গী থৌরম নত্তে, মসিদি লৈবাক্কী থৌরম্নি। নিংতম্বা হায়বসি হিন্দুস্তান মচা খুদিংগী নুংঙাইবা ফোংদোকপগী থৌরম্নি। অদুবু, মীওইশিং অসিনা নিংতম্বগী অমৃত কালবুসু করেম কথাইনরি। ঐখোয়না তুংগী চারোন শুরোনগীদমক্তা লৈবাক্কী কাচিন কোয়া খুদিংদা অমৃত সরোবর শেমগৎলি, ঈশিং য়োকশিনবগী অচৌবা খোঙথাং পায়খৎলি। অদুবু, মসিগুম্বা থবকশিং অসিদসু মখোয়দি নুংঙাইতবা ফাওরি।
ঐহাক্কী ইমুংগী মীওইশিং,
নিংতম্লবা মতুংগী দিকেদ কয়াদা লৈবাক্কী সরকার পায়খিবা দল অদুনা ত্রাইবেল খুন্নাইবু কৈদৌনুংদা ইকায় খুম্নরমদে। নিংতম্বদগী হৌরগা কলচরগী হেরিতেজগী মগুন ঙাকপা ফাওবগী হীরমদা ত্রাইবেল খুন্নাইনা অচৌবা থৌদাং য়াদুনা লাক্লি। গোন্দ খুন্নাই অসি মালেমগী খ্বাইদগী চাউবা ত্রাইবেল খুন্নাইগী মনুংদা অমনি। ঐহাক্না মতাং অসিদা অদোমগী মফমদা ৱাহং অমা হংজবা পামজৈ। মতম কুইনা শক্তি পায়রম্বা মখোয়না ত্রাইবেল খুন্নাইগী থৌদাংশিংবু লৈবাক্কী থাক্তা করিগীদমক্তা মশক খঙবীরমদ্রিবনো? মসিগীদমক্তা লৈবাক অসিনা করিগীদমক্তা বি.জে.পি.বু ঙাইদুনা লৈরম্মিবনো? মতমদুদি পোক্ত্রিবা, ঐখোয়গী হৌজিক্কী নহাশিংগী চারোন শুরোন্না ৱাফম অসি খঙফম থোকই। মখোয়না পোক্ত্রিঙৈদা, ঐখোয়গী অতল বিহারী বাজপায়গী সরকারনা ত্রাইবেলশিংগী তোঙানবা মন্ত্রালয় অমা শেম্লমখিবনি। মসিগীদমক্তা তোঙানবা বজেৎ কায়থোক্লম্মিবনি। হৌখিবা চহি 9সিদা বজেৎ অসিবু শরুক য়াম্না হেনগৎহনবগী থবক মোদী সরকারনা পাংথোকখি। লৈবাক্কী মফমদা অহানবা ত্রাইবেল নুপী রাস্ত্রপতি পীবগী লাইবক ফবসু বি.জে.পি.না ফংজরে। ভগ্বান বির্সা মুন্দাগী মপোক কুমওনবু জঞ্জাতিয় নুমিৎ হায়না ঐখোয়না লাউথোকখি। লৈবাক্কী মতমগা চুনবা রেলৱে স্তেসন অমগী মিংসু ঐখোয়না রানী কমলাপতীগী মিং লৌদুনা থোনখি। পতালপানী স্তেসনবু হৌজিক্তি জননায়ক তান্ত্যাভিল হায়না খঙনরে। অদুগা ঙসি, গোন্দ খুন্নাইগী ইথিল ওইরিবী, রানী দুর্গাবতীজীগী মিংথোনবা নীংথিরবা মেমোরিএল শাবগী ৱাফমসু লাউথোক্লে। ম্যুজিয়ম অসিদা গোন্দগী সংস্কৃতী, গোন্দগী পুৱারী অমসুং কলা উৎকনি। তুংদা হৌরক্কদৌরিবা চারোন শুরোনশিংনা গোন্দশিংগী মরমদা পুম্নমক খঙবা হায়বসি ঐখোয়গী পান্দম্নি, মসিগীদমক্তা ঐখোয়না লেপ্তনা হোৎনরি। ঐহাক্না মালেমগী লুচিংবশিংগা উন্নবদা গোন্দগী লাইয়েক খুদোল তম্লিবনি। মখোয়না মসিগুম্বা গোন্দগী নীংথিরবা চৎনবীবু থাগৎপা মতমদা, ঐহাক্সু য়াম্না চাউথোকচরিবনি।
মরুপশিং,
নিংতম্বা ফংলবা মতুংগী দিকেদ কয়াদা সরকার পায়রম্বা দলসিনা শুপ্নগী থবক অমা পাংথোক্লম্মি। মখোয়না ইমুং-মনুং, শাগৈ নাতৈ চাউখৎহনবা নত্তনা অতোপ্পা থবক অমত্তা পাংথোক্লমদে। লৈবাক্কী নিংতম্বা অসি শুপ্নগী ইমুং অমখক্না ফংহনখিবা নত্তে। মখোয় খক্তনা লৈবাক চাউখৎহনবা নত্তে। পুম্নমকপু ইকায় খুম্নবা, পুম্নমক্কী খনবা অসিদি ঐখোয়গী বি.জে.পি. সরকারনি। মহাও য়াওনা দাক্তর বাবাসাহেব অম্বেদকরগা মরী লৈনবা মালেমগী মফমশিংবু পঞ্চতীর্থ ওইহনখিবা অসিদি ঐখোয়গী বি.জে.পি. সরকারনি। চয়োল খরগী মমাংদা, সাগরদা লৈবা সন্ত রবিদাসজীগী মেমোরিএল অমগী ভুমী পুজন তৌবগী ঐহাক্না খুদোংচাবা ফংজখি। মসিনা, খুন্নাইনা নুংশি চানবা অমসুং হেরিতেজগী মতাংদা বি.জে.পি.না খোঙফম চেৎপগী মতৌবু উৎলি।
মরুপশিং,
শাগৈ-নাতৈগীদমক্তা খনবা অমসুং শেঞ্জা থুমজাবু য়োকখৎপা দলশিংনা ত্রাইবেল খুন্নাইগী খুদোংচাবশিং মৎপীখি। ইং 2014গী মমাংদা, উমংগী পোত্থোক শুপ্নগী 8-10 খক্তদা MSP পীরম্মি। উমংগী অতোপ্পা পোত্থোকশিংবুনা অহোঙবা মমলদা লৈরম্মি, মসিদা ত্রাইবেল খুন্নাইদা করিমত্তা ফংহনখিদে। ঐখোয়না মসিবু হোংদোকখি অমসুং ঙসিদি, উমংগী পোত্থোক 90 হেনববু MSPগী মখাদা পুরকখ্রে।
মরুপশিং,
মমাংগী মতমশিংদা, ঐখোয়গী ত্রাইবেল লৌমী, অপীকপা লৌমীশিংগী কোদো-কুতকীগুম্বা অপৌবা হৱাই চেংৱাইবু মরু ওইনা লৌরমদে। মালেমগী অচৌবা লুচিংবা কয়ানা দিল্লীদা G20গীদমক্তা লাকখিবা অদোম উরে। ঐখোয়না মখোয়গী মফমদা কোদো-কুতকীনা শেম-শাবা চাক হেঞ্জাং পীজখি। বি.জে.পি. সরকারনা কোদো-কুতকীবু শ্রী অন্নাগী মওংদা মালেম অমসুং লৈবাক্কী কৈথেলদা য়ৌহনবা পাম্মি। ঐখোয়গী ত্রাইবেল লৌমী, অপীকপা লৌমীশিংদা খ্বাইদগী চাউবা কান্নবা ফংহনবা হায়বসি ঐখোয়গী পান্দম্নি।
ঐহাক্কী ইমুংগী মীওইশিং,
বি.জে.পি.গী দবল ইঞ্জিন সরকারগী প্রাইওরিতীদি শোত্থরবশিংদা অহানবা মিৎয়েং চঙবনি। থক্নবা অফবা ঈশিংবু তোতি পাইপকী খুত্থাংদা য়ৌহনবা, লাইরবশিংগী হকশেল অমসুং নুপীশিংদা খুদোংচাবা ফংহনবা হায়বসি য়াম্না মরু অই। ঙসিমকসু, চাউরাকপা খুঙ্গং 1600তা ঈশিং পীবগী থৌরাং য়াৎলি। নুপীশিংগী হকশেলদা লৈবাক্না খ্বাইদগী অহানবা মিৎয়েং চঙফম থোকই। অদুবু, হীরম অসিবু মতম শাংবদগী মীরায়দুনা লাক্লি। নারি শক্তি বন্দন অধিনিয়মগী খুত্থাংদা লোকসভা, বিধানসভাদা নুপীশিংবু মশাগী হক ফংহনবগী থবক ঐখোয়গী বি.জে.পি. সরকারনা পাংথোকখি।
মরুপশিং,
খুঙ্গংগী খুন্নাই-শেন্মিৎলোনগী পথাপ্তা ঐখোয়গী বিশ্বকর্মা মরুপশিংগী অচৌবা থৌদাং লৈ। মখোয়গী মপাঙ্গল হাপ্পা হায়বসিসু অহেনবা মিৎয়েং চঙফম থোকই। অদুবু, মখোয়গীদমক্তা লুপা করোর লিশিগ 13গী পি.এম. বিশ্বকর্মা য়োজনা অসি ঐখোয়গী সরকার লাক্লবা মতুংদতা হৌদোকখি।
ঐহাক্কী ইমুংগী মীওইশিং,
বি.জে.পি. সরকার অসিদি লাইরবশিংগী সরকারনি। মীওই খরনা শেঞ্জা থুমজা অমসুং শাগৈ নাতৈ য়োকখৎপগী থৌওং মখা চত্থহন্নবা মখল কয়াগী তাৎ তৌরি। অদুবু, মধ্য প্রদেশনা চাউখৎ থৌরাংগী হীরমদা মকোক থোংগনি হায়বসিদি মোদীগী গেরেন্তীনি। মহাকৌশলনা মোদীগী বি.জে.পি. সরকারগী ৱারেপ অসিগী মপাঙ্গল হেনগৎহনগনি অমসুং মধ্য প্রদেশপু মপাঙ্গল লৈহনগনি হায়বসি ঐহাক্না থাজৈ। ঐহাক্না থৌনা লৈরবী মহারানী দুর্গাবতীজীগী মফমদা অমুক্কা হন্না ইকায় খুম্নবা উৎচরি। ঐখোয়বু থৌজালবীনবগীদমক্তা মশিং য়াম্না লেংবীরকপগীদমক্তা ঐহাক্না খ্বাই পুম্নমকপু থাগৎচরি। ঐহাক্না রানী দুর্গাবতী হায়জগে, অদোম্না অমর ওইরসনু হায়না খুম্বীরকউ। খোল্লাও অসি মধ্য প্রদেশ্তা নিলহল্লসি।
রানী দুর্গাবতীনা – অমর ওইরসনু।
রানী দুর্গাবতীনা – অমর ওইরসনু।
রানী দুর্গাবতীনা – অমর ওইরসনু।
ভারত ইমানা য়াইফরে।
ভারত ইমানা য়াইফরে।
ভারত ইমানা য়াইফরে।
পুম্নমকপু থাগৎচরি।
