খুরুমজরি ইচিল ইনাওশিং,
ঙসি অসি গুজরাৎকী হকশেলগী থৌরাংগীদমক্তা মরুওইবা নুমিৎ অমনি। ঐনা ভুপেন্দ্র ভাইবু, মন্দ্রী মন্দলগী মেম্বর পুম্নমকপু, ফম্পাকথক্তা লেঙশিনবিরিবা এম.পি.শিংবু, এম.এল.এ.শিংবু, কোর্পোরেসনগী মীওইশিংবু ঙসিগী মরুওইখ্রবা থৌরমসি মখা চত্থবিবগীদমক অমদি খোঙজেল য়াঙনা পায়খৎপিবগীদমক য়াইফ-পাউজেল পীজরি অমদি থাগৎচরি। মালেমগী খ্বাইদগী ফবা মেদিকেল তেক্নোলোজী, ফবদগী ফরবা ফেসিলিতীশিং অমদি মেদিকেল ইনফ্রাস্ত্রকচরশিং হৌজিক্তি ঐখোয়গী অহমদবাদতা অমদি গুজরাত্তা হেন্না ফংলগনি, অমদি খুন্নাই অসিগী মীচম মীয়ামদা কান্নরগনি। লনাই লায়েংশঙদা চৎপা ঙমদবশিংগীদমক লৈঙাক্কী লায়েংশঙ অসিনা, লৈঙাক্কী কাঙবু অসিনা পুং ২৪ চুপ্না থৌগল তৌনবগীদমক শেম শাদুনা লৈরবনি ইচিল ইনাওশিং। চহি অহুম, অহুম মখায়গী মমাঙদা ঐনা মফমসিদা লাক্তুনা ফবুং ১২০০ লৈবা মেতর্নেল এন্দ চাইল্দ হেল্থ অমদি সুপর-স্পিসিএল্তী সর্ভিস হৌদোক্নবগী খুদোংচাবা ফংখি। ঙসি তেনখ্রবা মতমসিদা মেদিসিতী কেম্পস অসি মচু মমেন থোক্না ঐখোয়গী মাঙদা শেম শাদুনা লৈরে। মসিগা লোয়ননা, ইন্সতিত্যুৎ ওফ কিদ্নী দিজীজেজ অমদি য়ু.এন. মেহতা ইন্সতিত্যুৎ ওফ কার্দিওলোজীনা মসিগী মতিং অমদি থৌগলবু হেনগৎহল্লি। গুজরাৎ কেন্সর রিইর্চ ইন্সতিত্যুৎকী অনৌবা বিল্দিংগা লোয়ননা অপগ্রেদ তৌরবা বোন মেরো ত্রান্সপ্লান্তনচিংবা ফেসিলিতীশিং ফংলে। সাইবর-নাইফকুম্বা মতমগা চুনরবা তেক্নিক লৈবা লৈঙাক্কী অহানবা লায়েংশঙ ওইরমগনি। চাওখৎপগী খোঙজেল গুজরাৎকুম্না য়াঙলবদি, থবক অমদি খুদোংচাবা য়াম্না থোরক্তুনা মশিং থীবদা অৱাবা ওই। হান্নগী মতৌগুম, লৈবাকসিদা অহানবা কয়া গুজরাৎনা তৌরি। ঐনা ময়াম পুম্নমকপু অমদি গুজরাৎ মচা পুম্নমকপু হায়রিবা খুদোংচাবশিং অসিগীদমক্তা নুংঙাইবা ফোঙদোকচরি। অখন্ননা থৌরাংশিং অসি কন্না হোৎনদুনা মায় পাকহল্লিবা ভুপেন্দ্র ভাই পতেল অমসুং মহাক্কী লৈঙাকপু মপুং ফানা থাগৎচরি।
মরূপশিং,
ঙসিগী হকশেলগী মরী লৈনবা থৌরম অসিদা, ঐনা গুজরাৎকী অচৌবা খোঙচৎ অমগী ৱারী তম্নিংই। খোঙচৎ অদুদি, মখল মখলগী লায়নাশিংদগী কোক্লকপগী ৱারীনি। লায়েংশঙদা তৌবা থৌরম্নি, মোদীনা মখল মখলগী লায়নাশিং হায়রিবসিবু করিনোনে হায়না অদোম্না খনবিরম্বা য়াই। করম করম্বা লায়নানো হায়বদু ঐ হায়জগে, ঐ দোক্তরদি নত্তে অদুবু মখোয়শিংদু ঐনা লায়েংবা তাখি। চহি ২০-২৫গী মমাঙদা গুজরাৎকী ফীভম লায়না কয়ানা য়োৎহ্লিং থাংদুনা লৈরম্মী। লায়না অমা হায়রগদি হকশেলগী লমদা শোত্থহৌবনি। অনিসুবা লায়নানা মহৈ মশিংগী লমদা শোত্থবনি। অহুমসুবা লায়নানা মৈ ৱাৎপগী লায়নানা। মরিশুবা লায়নানা ঈশিং তাঙবনি। মঙাশুবা লায়নানা মায়কৈ শিনবা থুংনা শন্দোকখ্রিবা ফত্তবা লৈঙাক্নি। তরুকশুবা লায়নানা লো অমসুং ওর্দরগী ফীভম ফত্তবনি। হায়রিবা লায়নাশিংদুগী মরূদা লৈরিবা লায়নানা ভোৎ বেঙ্ককী রাজনিতীনি। মফমসিদা তিনবিরিবা অহলশিং, গুজরাৎ অহল্লোন কাঙবুশিংদি হায়রিবা ৱাফমশিং অসি মরীক চূম্না নীংশিংলমগনি। ফীভম অসিনি চহি ২০-২৫ মমাঙগী গুজরাত্তা ওইরম্লিবা। অফবা মহৈ মশিং তম্নবগীদমক গুজরাৎকী নহাশিংনা মপান্দা চৎনরম্মী। অফবা লায়েং ফংনবগীদমক মীয়াম্না কোয়চেন চেন্নরম্মী। মীয়াম্না মৈ লাকপা ঙাইরম্মী। শেঞ্জা থুমজা অমদি ৱাচৎ ৱানোমগী মওং মতৌশিং নুমিৎ খুদিংগী থেংনবা তারম্মী। অদুবু ঙসিদি গুজরাৎ হায়রিবা লায়নাশিং অদুদগী নান্থোরক্তুনা মমাঙ থানা চৎলি। অদুনা মীয়ামবু লায়নাদগী ঙাকথোকপগুম স্তেত অসিবু লায়নাশিং অদুদগী ঙাকথোক্নবা থৌরাং ঐখোয়না তৌরি। ঐখোয়না অসিগুম্বশিং অসিদগী নান্থোক্নবা হোৎনবা য়াবা হোৎনদুনা লাক্লি। ঙসিদি হাইতেক লায়েংশঙগী ৱা ঙাঙনরকপদা গুজরাৎকী মমিং খ্বাইদগী মকোক্তা লৈরে। ঐনা মফমসিদা মুখ্যমন্ত্রী ওইরিঙৈ, ঐ সিভিল হোস্পিতালদা কয়ারক হন্না লাকখি, অদুগা মধ্য প্রদেশকী মফম খরা, রাজস্থানগী মফম খরদগী য়াম্লবা মীয়ামশিং অৱাবা কোক্নবগীদমক সিভিল হোস্পিতালদা লাকপা পাম্নরম্মী।
মরূপশিং,
ঙসি মহৈ মশিংগী লূপকী ৱাফম, য়ুনিভর্সিতীগী ৱাফম পুখৎনরকপদা গুজরাৎকা লম্বা তৌবা ঙম্বা অমত্তা লৈত্রে। গুজরাৎকী ঈশিংগী ফীভম, মৈগী ফীভম, লো এন্দ ওর্দরগী ফীভম হৌজিক্তি পুম্নমক ফরে। ঙসিদি সবকা সাথ, সবকা বিকাস, সবকা বিস্বাস অমসুং সবকা প্রয়াসকী লৈঙাক্না লেপ্পা লৈতনা গুজরাৎকী থৌগলগীদমক থবক তৌরি।
মরূপশিং,
ঙসি অহমদবাদতা হাইতেক মেদিসিতী অমসুং হকশেলগা মরী লৈনবা থৌগলনা গুজরাৎপু শকখঙনবগী চাং অনৌবা পন্দোল অমা লোমহল্লে। মসি শুপ্নতগী থৌগলগী লূপ অমখক নত্তে, মসি গুজরাৎকী মীয়ামগী মতিংগী খুদম অমসিনি। মেদিসিতী অসিদা গুজরাৎকী মীয়াম্না অফবা হকশেল ফংলগনি, অমদি মালেমগী মকোক থোংবা মেদিকেল ফেসিলিতীশিং হৌজিক্তি ঐখোয়গী স্তেত্তা লেপ্পা লৈতনা হেনগৎলক্লিবসিদা চাউথোকচবসু পোক্কনি। মেদিকেল তুরিজমগী লমদা গুজরাৎনা হোৎনরিবা অসিদসু অনৌবা পন্দোল অমা ওইরগনি।
মরূপশিং,
হকচাঙ ফনবগীদমক ৱাখল ফবা মথৌ তাই হায়বা ঐখোয়না তোয়না তানরে। ৱাফম অসি লৈঙাক্তসু চপ চানা থোক্লি। করিগুম্বা লৈঙাক্কী পুক্নিং শেংদ্রবদি, থৌওং লুদ্রবদি মখোয়গী পুক্নিংদা মীয়ামগী য়াইফনবা খনবা ঙমদে, অদু ওইরবদি স্তেত অদুগী হকশেলসু হন্থরকই। গুজরাৎকী মীয়াম্না চহি ২০-২২গী মমাঙদা অৱাবা অসি থেংনদুনা লাকখ্রে, অদুগা অৱা অনা কোক্নবগীদমক ঐখোয়গী দোক্তরশিংগী মনাক্ত চৎপা মতমদা অয়াম্বা মতমদা দোক্তরশিংনা পাউতাক অহুমখক পীরক্কনি। তোঙান তোঙানবা পাম্বৈ অহুম তাক্লক্কনি। অহানবদা হিদাক্না ফগনি হায়রক্কনি। অদুদগী মসিদি হিদাকখক্তনা ফহনবগী তাঙ্কক হেন্দোকখ্রে খন্দুনা তঙাই ফদনা সর্জরী তৌদ্রবদি অতৈ পাম্বৈ লৈত্রে হায়রক্কনি। হিদাক ওইরবসু সর্জরী ওইরবসু ইমুং মনুংগী মীওইশিংদা ৱাখল তাহল্লক্কনি। ঐদি ঐগী ইথৌ তৌরগা লোইরে য়েংশিনবদি ইমুং মনুংনা তৌগদবনি হায়রক্কনি। অদোম অনাবসিবু নীংথিনা য়েংশিনবিয়ু হায়দুনা অদোমদা পাউতাক পীরক্কনি।
মরূপশিং,
ঐনা হায়রিবা ৱাফম অসি অতোপ্পা লোন্দা অমদা হায়রগনা, গুজরাৎকী হকশেলগী ফীভম ফগৎহন্নবগীদমক ঐখোয়গী লৈঙাক্না লায়েংবগী পাম্বৈ অহুমসি শীজিন্নখি। অদোম্না অনাবশিংদা হায়রিবদুগুম ঐনা স্তেতগী ফীভম ফগৎনবগীদমক থবক তৌখি। দোক্তরনা পীরিবা পাউতাক সর্জরী – হায়বদি লৈঙাক্কী হান্নগী ফীভমদা থৌনা লৈনা পাঙ্গল ফুদোক্তুনা অহোংবা পুরকপা, ৱাচৎ-ৱানোম, খঙনৈ-চান্নবা অমদি শেঞ্জা থুমজাদা থাঙ থাদুনা ঐনা সর্জরী তৌখি। অনিশুবদা, হিদাক – হায়বদি অনৌবা ফীভমশিং চৎনহন্নবগীদমক চৎন-পথাপ শেমদোক্নবা হোৎনবা, অনৌবা থৌরাং য়োকখৎপা, হ্যুমেন রিসোর্স ফগৎহনবা, ইনফ্রাস্ত্রকচর ফগৎহনবা, থিজিন হুমজিন্বা, ইনোভেসন তৌবা, অনৌবা লায়েংশঙ শাবা অসিনচিংবা থবকশিংনি। অদুগা অহুমশুবা ৱাফম, য়েংশিনবা নৎত্রগা শেন্নবিবা হায়বসিনা গুজরাৎকী হকশেল ফগৎহন্নবা খ্বাইদগী মরুওইবা শরুক্নি। ঐখোয়না য়েংশিনবা হায়বদি ফীভম খঙনা থবক তৌখি। ঐখোয়না মীয়াম মরক্তা চৎখি, মখোয়গী অৱাবা তাথোক তাশিন তৌখি। অসিদসু নত্তনা ঐনা ঙসি হায়জনিংবা ৱাফম অমদি, গুজরাৎ মীওইবখক্কী নত্তনা শা-উচেকশিংগীসু হেল্থ কেম্প পাঙথোকপা লৈবাক অসিগী অহানবা স্তেতনি। ঐনা ঐখোয়গীদদি শাশিংগী দেন্তেল ত্রীতমেন্ত চত্থৈ, শাশিংগী মীৎ লায়েংবগী থবক চত্থৈ হায়বদা মপান লৈবাক্কী মীওইশিংনা অঙকপা পোক্নখি।
ইচিল ইনাওশিং,
ঐখোয়না হোৎনখিবশিং অদু মীয়ামগা খুৎশম্নরগা, মীয়াম্না শরুক য়ারগা হোৎনখিবনি। অদুগা কোরোনাগী লাংফম মতমদা ঐনা জি-২০ সম্মিত্তা ৱা ঙাঙখি। মতমদুদা মালেমগী তমথিরবা ফীভমদু য়েংলগা ঐনা পুকচেল শেংনা হায়খি – ঐখোয়না ৱন আর্থ ৱন হেল্থ হায়রিবা মিসন অসিদা থবক পায়খৎত্রিবমখৈ লায়রবা, অৱাবা তারবশিংগী মতেং কনানসু পাংনিংলোই। অদুগা ঐখোয়না মালেমগী মফম খরদা কোরোনাগী ভেক্সিনগী দোজ মরি মঙা কাপ্নখিবা, অদুগা অতোপ্পা মফম খরদনা লায়রবশিং ভেক্সিন দোজ অমা ফাওবা কাপচবা ঙমদবা কয়া ঐখোয়না উখি। মতমদুদা ঐ য়াম্না নুংঙাইখিদে মরূপশিং। মতমদুদা ভারতনা থৌনা অমগা লোয়ননা মালেমগী মফম শিনবা থুংনা ভেক্সিন য়ৌহন্নবা থৌরাং পায়খৎখি। মরমদি মালেমসিদা কনাবুসু শিহন্নিংখিদে। ফীভম ফগৎলক্লবা মতমদা গুজরাৎকী হকশেলগী হীরমসু ফগৎলকখিবা ঐখোয়না উরে। লৈবাকসিদা গুজরাৎপু খুদম ওইনা পীনবা হৌনরক্লবনি।
মরূপশিং,
পুক্নিং লুপ্তুনা পুম্নমক শুপচিন্দুনা হোৎনরকপা মতমদা মদুগী মহৈসু চাওই। ৱাফম অসি গুজরাৎকী মায় পাকপগী লাইৱানি। ঙসিদি গুজরাত্তা লায়েংশঙসু লৈরে, দোক্তরসু লৈরে অদুগা নহাশিংনা দোক্তর ওইননবগী মঙলানসু মঙফাওনহন্নবা খুদোংচাবা লৈরে। চহি ২০-২২গী মমাঙদা ঐখোয়গী চাউখ্রবা স্তেত অসিদা শুপ্নতগী মেদিকেল কলেজ ৯খক লৈরম্মী। শুপ্নতগী মেদিকেল কলেজ ৯। মেদিকেল কলেজ মশিং য়ামদ্রিঙৈ মতমদুদা অহোঙবা অমদি অফবা লায়েংগী দিমান্দসু য়াম্লমদে। অদুবু ঙসিদি মেদিকেল কলেজ ৩৬না সর্ভিসশিং পীরি। চহি ২০গী মমাঙদা গুজরাৎকী লৈঙাক্কী লায়েংশঙশিংদা চাউরাক্না ফমুং লিশিং ১৫রোম লৈরম্মী। হৌজিক্তি মফমসিদা লৈঙাক্কী লায়েংশঙদা লৈবা ফমুং মশিং লিশিং ৬০ য়ৌরে। মমাঙদা গুজরাত্তা অন্দর গ্রেজুএৎ অমসুং পোস্ত গ্রেজুএৎ মেদিকেলগী অপুনবা সীত মশিং ২২০০খক ওইরম্মী। হৌজিক্তি গুজরাত্তা ঐখোয়গী নহাশিংগীদমক্তা মেদিকেল সীত লিশিং নিপান চামঙা লৈরে। মসিদা তমদুনা থোক্লকপা দোক্তরশিংনা গুজরাৎকী কাচিন কোয়া শিনবা থুংনা হকশেলগী থৌগল তৌদুনা মপাঙ্গল কনখৎহল্লি। ঙসিদি সব-সেন্তর, সি.ঐচ.সি., পি.ঐচ.সি. অমসুং ৱেলনেস সেন্তর লিশিং কয়াগী অচৌবা নেৎৱর্ক অমা গুজরাত্তা মপুং ফানা মথৌ তৌদুনা লৈরে।
অদুগা মরূপশিং,
ঐনা ময়ামদা হায়জনিংবদি, গুজরাৎনা তম্বিখিবশিং দিল্লীদা য়ৌরবা মতুংদা ঐঙোন্দা য়াম্না কান্নখি। হকশেলগী মঙলান অসি পুদুনা ঐনা কেন্দ্রদসু থবক তৌবা হৌখি। হৌখিবা চহি নিপানসিদা ঐখোয়না লৈবাক্কী তোঙান তোঙানবা মফমশিংদা অতৌবা এইমস ২২ লিংখৎখ্রে। মসিগী কান্নবা গুজরাৎনা ফংলি। রাজকোত্তা গুজরাৎকী অহানবা এইমস লৈরে। গুজরাত্তা হেল্থ সেক্তরদা পায়খৎলিবা থবক্কুম, মালেম পুম্বদা গুজরাৎনা মেদিকেল রিছর্চ, ফার্মা রিছর্চ অমসুং বাইও-তেক রিছর্চকী লমদা ফিরাল হাইনা হুম্না পাইগদবা মতম কুইদ্রে। দবল ইঞ্জিন লৈঙাক্কী মীৎয়েঙ হীরম অসিদা চাউনা থম্লি।
মরূপশিং,
চৎন-পথাপকা ইহুলগা পুনশিল্লকপা মতমদা চৎন-পথাপ্না থৌগলগী অথোইবা পাম্বৈ ওইরকই। অদুবু, ইহুল লৈতবা মফমদুদা চৎন-পথাপসু ওইজবা থিবা অমদি শেঞ্জা থুমজাগী শুম্না চাখিগনি। মরম অসিননি ঐনা হৌরকপদা পুক্নিং ইহুলগী ৱাফম পনখিবা, অদুগা ফত্তবা লৈঙাক্কী হান্নগী ফীভমসু নীংশিংখিবা। হৌজিক্তি ফীভম হোংলে। অসিগুম্বা পুক্নিং ইহুল লৈবা অমদি লৌথুপ লৌকোয় লৈতবা ফীভমসিগী মহৈনা অহমদবাদতা মেদিসিতী লিংখৎলকপনি, কেন্সর ইন্সতিত্যুৎ মতমগা চুননবা শেমগৎলকপনি। মসিগা লোয়ননা খুঙ্গঙগী অনাবশিংনা কেমোথেরাপীগীদমক কোয়চেন চেন্নদনবা গুজরাৎকী দিস্ত্রিক্ত খুদিংদা দে কেয়র কেমোথেরাপীগী খুদোংচাবা লৈহল্লে। হৌজিক্তি অদোম গুজরাৎকী মফম অমা হেক্তদা লৈবা মতমদা অদোমগী য়ুম নক্না, অদোমগী দিস্ত্রিক্ত অদুমক্তদা কেমোথেরাপীনচিংবা মরুওইবা লায়েংগী খুদোংচাবা ফংলগনি। মতৌ অসুম্না ভুপেন্দ্র ভাইগী লৈঙাক্না দাইলাইসিসনচিংবা তঙাই ফদবা হকশেলগী সর্ভিসশিংসু তালুকাগী থাক্তা ফংহল্লি। অনাবনা মথৌ তৌরগদি মখোয়গী ময়ুমদা চত্তুনা খুদোংচাবা ফংহন্নবগীদমক গুজরাৎনা দাইলাইসিস ভেনগী থৌরাংসু হৌদোক্লে। ঙসিদি মফমসিদা মথোল ৮গী অহিং য়ারেকফমসু মীয়ামদা কত্থোক্লে। দাইলাইসিসকী মতাঙদদি, ভারত পুম্বদা ফীভম য়াম্না চারমদে। দাইলাইসিস চত্থরিবা মীওইশিংগীদমক্তদি অকক্নবা মতমদা দাইলাইসিস তৌবা মথৌ তাই। মতমদুদা ঐনা মালেমগী অচৌ অচৌবা হেল্থ সেক্তরদা থবক তৌরিবা মীওইশিংগা ৱারী শানখি। ভারতকী দিস্ত্রিক্ত খুদিংদা দাইলাইসিস সেন্তর লৈহনবা পাম্মী হায়না ঐনা হায়খি। অদুগা গুজরাত্তা তহসিলগী থাক ফাওবদা থবক পায়খৎপা মতমদা ঐনা লৈবাক্কী দিস্ত্রিক্তশিংদা দাইলাইসিসকী খুদোংচাবা য়ৌহন্নবা অচৌবা থৌরাং পায়খৎখি, অমদি মশিং য়াম্না থবক পায়খৎলি।
মরূপশিং,
অনাবগী ইমুং মনুংনা খুদোংচাদবা কয়া থেংনরিবা মতমদুদা অহেনবা খুদোংচাদবা ফীভম মায়োক্নহন্দনবগীদমক গুজরাৎ লৈঙাক্না নুংনাংখি। মসিমক ঙসি লৈবাকসিগী থবক থৌরাং পায়খৎপগী মওং মতৌ ওইরি। মসিমক ঙসি লৈবাকসিগী মরুওইবা মীৎয়েঙ চঙফম ওইরি।
মরূপশিং,
লৈঙাক্না মিনুংশিগা লোয়ননা থবক তৌরকপা মতমদা মদুগা খ্বাইদগী চাউনা কান্নবসি শোত্থহৌরবা কাঙবুনা ফংগদৌরিবনি, লায়রবশিংনা ফংগদৌরিবনি, মিদ্দল ক্লাস কাঙবুনা ফংগদৌরিবনি, ইমা ইচে ইচলশিংনা ফংলি। মমাঙদা গুজরাত্তা মমা শিবগী চাং, অঙাং শিবগী চাং য়াম্না নুংনাংনিংঙাই হীরম অমা ওইরম্বা ঐখোয়না উখ্রে, অদুবু লৈঙাকশিংনা মদুবু লাইবক্না তম্বনি হায়না হুন্দোক্লম্মী। মসি ঐখোয়গী ইমা, ইচে-ইচলশিংগী ৱাফম্নি খন্না ঐখোয়না ফিরেপ লৌখি। মসিগী অৱাবা কনাগুম্বা অমত্তগী লাইবক্তা তাইনফম থোক্তে হায়না লেপখি। হৌখিবা চহি ২০সিদা ঐখোয়না মসিগীদমক লেপ্পা নাইদনা অচুম্বা চৎন-কাঙলোনশিং শেমদুনা চৎনহল্লি। ঙসিদি গুজরাৎকী মমা শিবগী চাং অমসুং অঙাং শিবগী চাং য়াম্না হন্থরে। মমাশিংগী পুন্সিসু কল্লে, নৌনা পোকপা অঙাংশিংসু চাউখৎপগী তাইবংপানসিদা শাফবা ফীভম অমদা খোঙ থাংজিল্লক্লি। ‘বেতী বচাও, বেতী পরাও’না মরম ওইরগা নুপামচাশিংগা চাংদম্নবদা নুপীমচাশিংগী মশিং হেনগৎলক্লে। হায়রিবা মায় পাকপশিংসিগী মরুমদা গুজরাৎ লৈঙাক্কী ‘চিরঞ্জীবী’ অমসুং ‘খিলখিলাহৎ’নচিংবা য়োজনাশিংগী মহৈননি। গুজরাৎকী মায় পাকপা, হোৎনজমল অসি ঙসিদি লৈবাক পুম্বদা ‘মিসন ইন্দ্রধনুস’ অমসুং ‘মাত্রুবন্দনা’নচিংবা স্কীমশিংগী খুত্থাঙদা পুথোক্লি।
মরূপশিং,
ঙসিদি লৈবাকসিগী লায়রবা খুদিংদা লেম্না লায়েংবা ফংহন্নবগীদমক অয়ুস্মান ভারতনচিংবা স্কীমশিং ফংহল্লি। গুজরাত্তা ‘আয়ুস্মান ভারত’ অমসুং ‘মুখ্যমন্ত্রী অমৃতম’ স্কীমনা অমত্তা ওইনা লায়রবশিংগী অৱাবা পোৎলুম হন্থহল্লি। মসি দবল-ইঞ্জিন লৈঙাক্কী থৌনানি।
মরূপশিং,
মহৈ মশিং অমসুং হকশেল হায়রিবা হীরম অনি অসি হৌজিক মতমখক্তা নত্তনা তুংলমচৎকী মায়কৈসু তাক্লিবা হীরমশিংনি। খুদম ওইনা হায়রগদি, ২০১৯দা সিভিল হোস্পিতালদা বেদ ১২০০খক লৈরম্মী। চহি অমগী মতুংদা মালেমগী লাইচৎ লাকপদা লায়েংশঙ অসিনা অচৌবা সেন্তর ওইনা লেপখি। হায়রিবা হকশেলগী ইনফ্রাস্ত্রকচর অসিনা মীওই কয়াগী পুন্সি কনখি। মতৌ অসুম্না ২০১৯দা অহমদবাদকী এ.এম.সি.গী এস.ভি.পি. হোস্পিতাল হৌদোকখি। হায়রিবা লায়েংশঙ অসিনা মালেমগী লাইচৎ থেংননবদে অচৌবা শক্লোন লৌখি। করিগুম্বা গুজরাত্তা হৌখিবা চহি ২০সিদা মতমগা চুনবা মেদিকেল ইনফ্রাস্ত্রকচর শেমগৎ শাগৎলমদ্রগদি মালেমগী লাইচৎ থেংনবদা ঐখোয় কয়াম ৱারমগনি হায়বদু খন্থবিয়ু। ঐখোয় গুজরাৎকী হৌজিক্কী ফীভমসু ফগৎহনগদবনি, অদুগা তুংলমচৎসু শাফনা লৈহনগদবনি। চাওখৎপগী খোঙজেল অসিবু গুজরাৎনা হেন্না খোঙজেল হাপচিনগনি, অমদি থাক ৱাংনা কাখৎহল্লক্কনি অ্রমদি অদোমগী থৌজাল লেপ্পা নাইদনা ফংদুনা মদুগী থৌনাগা লোয়ননা অমদি অহেনবা পাঙ্গলগা লোয়ননা অদোমগী থৌগল মখা তৌখিগনি হায়না ঐনা থাজৈ। ঐনা ময়াম পুম্নমক্কী মশা মউ ফনা লৈনবগীদমক থৌনিজরি। অদোম লায়না চেন্দবা, অদোমগী ইমুং মনুং লায়না চেন্দবা ওইবিয়ু হায়না ঐগী গুজরাৎকী ইচিল ইনাওশিংগী মফমদা য়াইফ-পাউজেল পীজরদুনা ঐগী ৱারোল তেনশিঞ্জরগে। হন্না হন্না থাগৎচরি।
