ময়াম পুম্নমকপু খুরুমজরিয়।
চহি ১০০গী মমাঙদা হিন্দুস্তান তাইম্স লাইওইখ্রবা বাপুনা হৌদোকপিরম্বনি… মহাক গুজরাতী মচানি, অদুগা চহি ১০০গী মতুংদা ঙসি অদোম্না গুজরাতী অমবু অমুক কৌবিরক্লি। অসিগুম্লবা পুৱারী ওইরবা খোঙচৎ অসিগীদমক হিন্দুস্তান তাইম্সপু অমসুং চহি ১০০গী খোঙচৎ অসিদা শরুক য়াবিদুনা শিংনবা কয়া মায়োক্নবিরকখিবা, অৱাবা কয়া থেংনরকখিবা, অদুগা হৌজিকসু খাঙদুনা লৈবিরিবা… ময়াম পুম্নমক ৱাংনা থাঙ্গৎপদা মতিক চাবা, ইকোক নোন্বদা মতিক চাবা মীওইশিংনি। ঐনা ময়ামগী মফমদা চহি ১০০গী খোঙচৎ অসিদা শরুক য়াবিরিবা পুম্নমক ইকোক নোন্বদা মতিক চারবা ঙাক্তনি, অমদি ঐগী মায়কৈদগী তুংদসু অদোম্না য়াইফবতা ওইরসনু হায়না থৌনিজরি। হৌজিক ঐনা লাকপদা ইমুং মনুংগী মীওইশিংবুদি উনরে, অদুবু ঐনা চহি ১০০গী খোঙচৎ অসিগী নীংথিরবা একজিবিসন অমা য়েংজবগী খুদোংচাবা অমসু ফংখি। ঐনা ময়ামদা হায়জনিংবদি, করিগুম্বা মতম ফংলবদি মফমদুদা মীৎকুপ খরা কাইথোকপিরগা হন্বিখো। মসি চুম্নগী একজিবিসন অমখক নত্তে, মসি এক্সপিরিএন্স অমনি। চহি ১০০গী পুৱারী পুম্বা মীৎমাঙদা হৌখিবগুম্না ফাওই। ঐনা লৈবাক্না নীংতমখিবা অমসুং সংবিধান চৎনবা হৌখিবগী চেফোঙশিং য়েংলকই। অথোইবা, অফাওবা মীওই কয়ানা হিন্দুস্তান তাইম্সকীদমক ইদুনা লাকখি। মার্তিন লুথর কিং, নেতাজী সুভাস বাবু, দোক্তর শঞামা প্রসাদ মুখর্জী, অতল বিহারী বাজপাই, দোক্তর এম.এস. স্বামিনাথন। মখোয়গী খুৎইশিংনা অদোমগী পাউ-চেগী লৈতেং ওইরি। তশেংনমক ঐখোয় অশাঙবা খোঙচৎ অমদা লাক্তুনা মীৎকুপসিদা থুংলরি। নীংতন লান থেংনবদগী হৌরগা নীংতম্লবা মতুংদা মীয়ামগী থাজবা কয়াগী সমুদ্রগী ইথক ইরৈদা তোংদুনা মাঙদা চঙশিল্লকখিবনি। খোঙচৎ অসি মশানা অদুমক অঙকপনা থল্লবা, অমসুং অচৌবা খোঙচৎ অমনি। ঐনা অদোমগী পাউচেদা হাপ্লিবা পাউশিংদা ওক্তোবর ১৯৪৭দা কাস্মির পুনশিনখিবা মতমদা লৈবাক মীয়ামদা লৈখিবা থৌনা অদুমক উবা ফংই। অদুম ওইনমক, মীৎকুপ অদুদা ফিরেপ চেত্তবা ফীভম্না কাস্মিরবু দেকেদ ৭ হিংশানা থল্লবা মফম অমা কমদৌনা ওইহল্লম্বগে হায়বদুসু ঐ খঙবা ঙমখি। ঙসিদি, জম্মু অমসুং কাস্মিরদা রেকোর্দ ওইনা মীখল পাঙথোকপনচিংবা পাউশিং অদোমগী পাউচেদা ফোঙলি, মসি হান্নদগী তাইওন্নবা অমনি। মওং অমদা, মীপুম খুদিংমক্কী মীৎফম, অদোমগী মীৎফম মদুদা তাখি। নাকল অমদনা অসামব দিস্তর্ব এরিয়া লাউথোকপগী পাউ ফোঙলি অদুগা নাকল অমদনা অতল জীনা BJP য়ুম্ফম থোন্বগী পাউ ফোঙলি। ঙসি অসামদা মতম চুপ্পগী ওইবা ইং-তপ্পা পুরকপদা BJP না অচৌবা থৌদাং লৌরিবসি তশেংনা নুংঙাইরবা অমসুং তাঞ্জা চানরুবা অমসুনি।
ঙরাংখক্তনি, ঐনা বোরো লমদমগী মীয়ামগী অচৌবা কুমহৈ অমদা শরুক য়ারুবা, অমদি দিল্লীগী মিদিয়ানা থৌরম অদু য়াওহৌদবদা ঐ অঙকপা পোকখি। চহি ৫গী মতুংদা, বোম্ব, নোংমৈ, অমসুং পিস্তোলশিং থাদোক্লম্লগা, হিংশাগী লম্বী থাদোক্লম্লগা, বোরো নহাশিংনা দিল্লীদা বোরোগী নাৎকী কুমহৈ অমা পাঙথোক্লি হায়বা মখোয়না খঙলমদে। মসি পুৱারীগী অচৌবা থৌরম অমনি। ঐ ঙরাং মফমদুদা চৎলুই, ঐনা মদুবু থম্মোয় শেংনা শরুক য়ারুই। বোরো পীস এগ্রীমেন্তনা মরম ওইরগা মীওইশিংদুগী পুন্সি হোংলে। একজিবিসন অদুদা, ঐনা ২৬/১১ মুম্বাই এতেক্তকী পাউশিংসু থেংনখি। মতম অদু ঐখোয়গী মীয়াম্না, য়ুমলোন্নবা লৈবাক্তগী চঙলকপা তেরোরিস্তকী থবক থৌওংশিংনা মরম ওইরগা মশাগী ময়ুমদা লৈবদা ফাওবা শাফবগী ইথিল ফংখিদবা মতম্নি। অদুবু হৌজিক্তি ফীভম অদু হোংলে, হৌজিক্তি তেরোরিস্তশিং ফাওবা মখোয়গী ময়ুমদা লৈবদা খুদোং চাদ্রে।
মরুপশিং,
মাগী চহি ১০০গী খোঙচত্তা, হিন্দুস্তান তাইম্সনা চহি ২৫ মীনায় নাইথাংগী পুন্সি থেংনখ্রে অদুগা চহি ৭৫না নীংতম্বগী মতম্নি। হায়রিবা চহি ১০০সিদা, ভারতকী মরাইবক লেপ্লিবা, ভারতকী মায়কৈ তাক্লিবা শক্তি অদু ভারতকী মীচম মীয়ামগী লৌশিংননি, ভারতকী মীচম মীয়ামগী মপাঙ্গলননি। অখঙ অহৈ কয়ানা মীচম মীয়ামগী মতিক অসিবু খঙবদা অশোয়বা হেক হেক তৌই। বৃতিশনা ভারত থাদোক্লমদাইদা লৈবাক অসি মচেৎ তাখ্রগনি…মাগী তুংলমচৎ অমত্তা লৈতে হায়রম্মি। ইমর্জেন্সী থমজিনখিবা মতমদা, মীওই খরনা মতম চুপ্পা ইমর্জেন্সী লৈরগনি, হৌজিক্তি মীয়ামগী লৈঙাক লৈত্রে হায়না খন্নরম্মি। মীওই খরনা, ইন্সতিত্যুসন খরনা ইমর্জেন্সী থমজিল্লকখিবা কাঙবুদুগী মরুম থুপ্না লৈখি। ফীভম অদুদসু, ভারতকী মীয়াম্না থৌনা ফনা লেপখি, অমসুং ইমর্জেন্সী মরু ফুকপদা মতম য়াম্না লৌখিদে। কোরোনাগী লাংফম লাকপা মতম অদোম নীংশিংবিরমগনি, মালেম অসিনা ভারত অসি মালেম পুম্বগী অচৌবা পোৎলুম অমা ওইরগনি হায়না লৌনরম্মি। অদুবু ভারতকী মীয়াম্না কোরোনাগী মায়োক্তা লান্থেংনদুনা মখোয়গী মথৌনা উৎখি।
মরূপশিং,
অদোম ভারত্তা চহি ১০দা মীখল ৫রক পাঙথোকখিবা ৯০গী মতম নীংশিংবিরমগনি। অসুক চাউখ্রবা লৈবাকসিদা চহি ১০দা মীখল ৫রক পাঙথোকখিবনি, লৈবাক অসি মরা চেত্তবা ফীভমদা লৈরমখি। অখঙ অহৈশিংনা, পাউচেগী অইবশিংনা ভারত অসি মতৌ অসুম্না অদুমক তৌদুনা লৈরগনি, ভারত্তা অসুম্না অদুমক চৎনদুনা লৈরগনি হায়নরম্মি। অদুবু ভারতকী মীয়াম্না অমুক্কা হন্না অদুগুম্বা ৱাখল্লোন অদু অরান্বনি হায়বা উৎখি। ঙসিদি, তম্বা ঙমদবা অমসুং মরা চেত্তবা হায়বসি মালেমগী মফম পুম্বদা উবা ফংলি। মীখল খুদিংগী লৈঙাক হোংবা মালেমগী লৈবাক কয়া লৈ, অদুগা ভারত্তনা মীয়াম্না ঐখোয়গী লৈঙাকপু থংন-থংননা অহুম্লক থাগৎলি।
মরূপশিং,
ময়ামগী মরক্তগী মীওই কয়া অমদি ভারতকী রাজনিতী অমসুং খুজিল থৌরাংশিং মতম শাংনা খোঙ্গুল লীদুনা লাক্লবনি। মমাঙদা, ঐখোয়না ৱাফম অমা হেক হেক তারম্মি – অফবা শেন্মিৎলোন হায়বসি ফত্তবা রাজনিতীনি। অখঙ অহৈশিংনি হায়নবা মীওইশিংনা মসিবু হেক হেক প্রমোত তৌই। অদুবু মমাঙদা লৈঙাক্কী মফমদা তুমিন্না ফমদুনা লৈনবা লম্বী অমা লৈরম্মি। মওং অমদা, মসিনা ফত্তবা লৈঙাক্লোন অমসুং মতিক চাদববু লোৎশিন্নবা পাম্বৈ অমা ওইরকখি। মমাঙদা, লৈঙাক অসি মথঙগী মীখল মায় পাক্নবখক্কীদমক পায়রম্মি। মীখল মায় পাক্নবা ভোত বেঙ্ক অমা শেম্মি অদুগা হায়রিবা ভোত বেঙ্ক অদু পেলহন্নবা স্কীমশিং শেম্মি। অসিগুম্বা মখলগী রাজনিতীনা খ্বায়দগী চাউনা শোকহনখিবসি লৈবাকসিদা থোং মান্নদবগী চাং কা হেন্না হেনগৎলকখি। চাওখৎপগী বোর্দশিং থেৎলম্মি অদুবু চাওখৎপদি উবা ফংলমদে। হায়রিবা থোং মান্নদবা ফীভম, মওং অসিনা লৈঙাক্তা মীয়াম্না লৈরম্বা থাজবা মাঙহল্লম্মি। ঙসি ঐখোয়না থাজবা অদু অমুক পুরক্লে। ঐখোয়না লৈঙাক্কী পান্দম অমা থম্লি। পান্দম অসি ভোত বেঙ্ক রাজনিতীদগী মাইল লিশিং কয়া লাপ্না লৈ। ঐখোয়গী লৈঙাক্কা পান্দমদি য়াম্না পাক চাউই। ঐখোয়না মীয়ামগী খোঙজেল, মীয়াম্না পুরকপা খোঙজেল অমসুং মীয়ামগীদমক খোঙজেল হায়বা লাইৱা অসিগা লোয়ননা মাঙদা চঙশিল্লি। ঐখোয়গী পান্দমদি অনৌবা ভারত অমা, চাওখৎপা ভারত অমা পুরকপনি। ঐখোয়না অচৌবা পান্দমশিং থামদুনা থোক্লকখি, ভারতকী মীয়াম্না ঐখোয়দা মখোয়দা থাজবা উৎপিরকখি। ঙসিগী সোসিএল মীদিয়াগী তাইবংপান অসিদা লান্না পাউ শন্দোকপা, দিসইনফোর্মেসন্না মফম শিন্বা থুংনা শন্দোক্লি। পাউচে, চেনেল কয়ানা শৌ শারি, অসিগুম্বা মতমসিদা, ভারতকী মীয়াম্না ঐখোয়দা, ঐখোয়গী লৈঙাক্তা থাজবা থম্বিরি।
মরূপশিং,
মীয়ামগী থাজবা হেনগৎলকপা মতমদা, লৈবাক্কী চাওখৎ থৌরাংদা তোপ তোপ্পা মশক অমা উবা ফংই। অরিবা চাওখৎপা সিভিলাইজেসনশিংদগী হৌরগা ঙসিগী চাওখৎলবা লৈবাকশিং ফাওবদা মান্নবা ৱাফম অমা উবা ফংই, হায়রিবা মান্নবা ৱাফম অদুদি খুদোংথিবা মায়োক্নবা কিদবগী মচৎ অদুনি। ঐখোয়গী লৈবাক অসি মালেম পুম্বগী লল্লোন ইতিক অমসুং নাৎকী তুংনফম ওইরম্বা মতম অমা লৈরম্মি। নাকল অমরোমদা ঐখোয়গী লল্লোনবা অমসুং পোৎয়োন্বশিংনা খা নোংপোক এসিয়াগা পুন্না থবক তৌমিন্নরম্মি, অদুগা নাকল অমরোমদনা, মখোয়না অরাব, অফ্রিকা, অমসুং রোমন এমপাইয়রগা অচেৎপা মরীসু লৈনরম্মি। মতমদুগী মীয়াম্না খুদোংথিবা মায়োক্নবদা কিরমদে অমদি মরম অদুমক্ননি ভারতকী পোত্থোক অমসুং সর্ভিসশিংনা সমুদ্রগী পনখৈ লান্না য়ৌবা ঙম্লম্লিবা। নীংতম্লবা মতুংদা, ঐখোয়না খুদোংথিবা মায়োক্নবা কিদবগী মচৎ অসি মখা চত্থরমগদবনি। অদুবু নীংতম্লবা মতুংগী লৈঙাকশিংনা মতমদুগী মীয়ামদা থৌনা অদু হাপ্লমদে, মদুনা মরম ওইরগা মীরোল কয়ানা মাঙদা খোঙকাপ অমা থাংলগা তুংদা খোঙকাপ অনি মনীং হন্দুনা লৈরম্মি। হৌজিক্তি হৌখিবা চহি ১০সিদা লৈবাকসিদা লাক্লিবা অহোংবশিং অসিনা ভারতকী মীয়ামদা খুদোংথিবা মায়োক্নবা কিদবগী মচৎ অদুদা অনৌবা ইনোৎ অমা হাপ্লরে। ঙসিদি ঐখোয়গী নহাশিংনা হীরম খুদিংদা খুদোংথিবা মায়োক্নবা ঙম্বা মীওইশিং ওইরক্লি। কম্পেনী অমা হৌদোকপা হায়বসি মতম অমদি অচৌবা খুদোংথিবা অমনি হায়না লৌনরম্মি, চহি ১০গী মমাঙদা ঐখোয়না স্তার্তঅপকী মমিং কয়া তানরমদে… ঙসিদি লৈবাকসিগী রেজিস্তর তৌরবা স্তার্তঅপ মশিং লাখ ১.২৫ হেল্লে। শান্ন-খোৎনবা অমসুং মসিবু শিন্ফম অমা ওইনা লৌবদা খুদোংথিবা মায়োক্নরম্বা মতম অমা লৈরম্মি, অদুবু ঙসিদি অপীকপা সহরশিংদগী নহাশিংনা ফাওবা খুদোংথিবা অসি মায়োক্নদুনা মালেমগী ফম্পাক্তা লৈবাক্কী মীংচৎ পুরক্লি। অদোম্না সেল্ফ-হেল্প গ্রুপশিংদা য়াওরিবা নুপীশিংসু খুদম ওইনা লৌবা য়াই, ঙসি লৈবাকসিদা লাখপতী দিদী করোর অমরোম শেমখ্রে। মখোয়না খুঙ্গং খুদিংদা ওন্ত্রপ্রিন্যুর ওইরক্তুনা মখোয় মশাগী ওইবা বিজিনেসশিং চলাইরি। মতম খরগী মমাঙদা ঐনা খুঙ্গংগী নুপী অমগা ৱারী শাননবা তাঞ্জা ফংখি, নুপী অদুনা ঐঙোন্দা মহাক্না কমদৌনা ত্রেক্তর অমা লৈদুনা মহাক্কী ইমুংগী শেন্থোক হেনগৎহনখিবগে হায়বা তম্লকখি। নুপী অমনা খুদোংথিবা মায়োং য়াদুনা মহাক্কী ইমুং মনুং পুম্বগী পুন্সিদা অহোংবা পুরকখি। লৈবাকসিগী লায়রবা অমসুং মিদ্দল ক্লাসকী মীয়াম্না খুদোংথিবা মায়োং য়াবা হৌরকপা মতমদা, তশেংনা অহোংবসু পুরক্কদৌরিবনি। মসিনি ঙসি ভারত্তা ঐখোয়না উবা ফংলিবা
মরূপশিং,
ঙসি, ভারতকী খুন্নাই অসি হান্না থাজনরুদবা মঙলান কয়ানা থল্লে। ঐখোয়না হায়রিবা মঙলানশিং অসিবু ঐখোয়গী খুজিল থৌরাংগী য়ুম্ফম ওইহল্লি। ঐখোয়গী লৈঙাক্না লৈবাক মীয়াম্না তোপ তোপ্পা কোম্বিনেসন লঅমা পীরি… কোম্ব, ্রদুদি ইনভেস্তমেন্ত ইন এমপ্লাইমেন্তকী অমসুং দিভেলপমেন্ত তু দিগ্নিতী হায়বসিনি। ইনভেস্তমেন্ত লাকপা, ইনভেস্তমেন্ত অদুদগী এমপ্লোইমেন্ত পুরকপা, চাওখৎপা পুরকপা অমসুং চাওখৎপা অদুনা ভারতকী মীয়ামগী পুন্সিগী ইকায়খুম্নবা হেনগৎহনগদবা চাওখৎপগী মোদেল অমা পুদুনা ঐখোয়না চৎলি। হৌজিক, খুদম ওইনা, লৈবাকসিদা তোইলেৎ শাবগী খুদম অমা লৈরে। ঐনা অপীকপা ৱাফমশিংগী মতাঙদা হায়রিবসিদি, করিগুম্বা মতমদা ঐখোয়না অপীকপা ৱাফমশিং অসি মমল লৈতবগুম্না লৌই… অদুবু ঐনা ময়ামগী মফমদা খুদম অমা পীদুনা হায়জনিংবদি অসিগুম্বা অপীকপা ৱাফমশিং অসিগী মতিক অসি কয়া য়াম্না কল্লি হায়বসিনি। ঐখোয়গী লৈবাকসিদা, ঐখোয়না তোইলেৎ শানবা মিসন অমা পায়খৎখি, লৈবাকসিগী য়াম্লবা মীয়ামগী, মসি খুদোংচাবা পীবখক্তা নত্তনা সিক্যুরিতী অমতুং দিগ্নিতীগী পাম্বৈ অমসুনি। স্কীম অসিগী মতাঙদা খন্নরকপা মতমদা, তোইলেৎ করোর কয়া শারে হায়না হেক হেক হায়নৈ… ফৈ, মখোয়দু শাগদবনি। অদুবু হায়রিবা তোইলেৎশিং অসি চেক, য়োৎ, সিমেন্ত, মদুদা থবক শুরিবা মীওইশিংদুনা শাবনি। হায়রিবা পোৎলমশিং অসি দুকান অমদগীদি লাক্কদৌরিবনি, ইন্দস্ত্রী অমনদি শাগদৌরিবনি। ত্রান্সপোর্তর অমা নৎত্রগা অমনা মসি কনাগুম্বা অমগী য়ুমদা থিল্লক্কদৌরিবনি। মসিনা তাক্লিবদি শেন্মিৎলোনসু ফগৎলে, থবক ময়াম অমসু পীরে। তোইলেৎশিং শারকপা মতমদা, মীয়ামগী পুন্সিদা হেন্না নুংঙাইহল্লি। মীয়ামগী মফমদা মশানা মশাবু ইকায়খুম্নজবগী ৱাখল্লোন অমা পুরকই। অদুগা অমুকসু, মসিনা চাওখৎ থৌরাং খুমাঙ চাওশিনহল্লি। মসিনা তাক্লিবদি ইমপ্লোইমেন্ত থ্রু ইনভেস্তমেন্ত, দিগ্রিতী থ্রু দিভেলপমেন্তকী লাইৱা অসিনা মায় পাকপা অসি লৈমায়দসু উবা ফংলি হায়বনি।
মরূপশিং,
অতোপ্পা খুদম অমনা LPG গ্যাস সিলিন্দরনি। মমাঙদা, কনাগুম্বা অমনা ময়ুমদা গ্যাস লৈরবদি, লৈকায়দুগী মীয়াম্না ইমুং অদু অচৌবা মীওই অমনি হায়না লৌনরম্মি, মহাকপু অৱাংবা থাক্কী মীওইনি লৌনরম্মি, মরমদি মহাক্কী গ্যাস স্তোব অমা লৈবগী। গ্যাস কন্নেক্সন লৈতবা মীওইশিংনা মখোয়গী চীঞ্জাকসু গ্যাস স্তোবতা থোংবা ফংলবদি খন্নরম্মি। ফীভমদু কমদৌরম্বগে হায়ববু গ্যাস কন্নেক্সন অমা লৌনবগীদমক MP শিংনা, পার্লিয়ামেন্তকী মেম্বরশিংনা চে ইনরম্মি, অমদি ঐনা হায়রিবসি ২১শুবা চহিচাগী মতমগী ৱাফম্নি। ঐনা ১৮শুবা চহিচাগী ৱা হায়বা নত্তে। ২০১৪গী মমাঙদা, লৈঙাক্না মরৈ য়েৎনদুনা লৈরম্মি, মখোয়না তৌবা হায়ববু মরৈ য়েৎনবনি। য়েৎনরিবা ৱাফমদুনা চহিদা সিলিন্দর ৬ পীগদ্রা নৎত্রগা ৯ পীগদ্রা হায়বসিনি… হীরমসিদা মরৈ য়েৎনরম্মি। সিলিন্দর কয়াম পীগদগে হায়না য়েৎনবগী মহুত্তা, ঐখোয়না য়ুমথোঙ খুদিংদা গ্যাস স্তোব কন্নেক্সন পীনবা থৌরাং পায়খৎখি। নীংতম্লবা মতুং চহি ৭০দা পীখিবা গ্যাস কন্নেক্সন মশিংদগী ঐখোয়না হৌখিবা চহি ১০সিদা পীখিবা মশিংনা হেল্লি। ২০১৪দা, লৈবাকসিদা গ্যাস কন্নেক্সন করোর ১৪ লৈরম্মি, ঙসিদি করোর ৩০ হেন্না লৈরে। চহি ১০সিদা, কঞ্জ্যুমর মশিং ফনা য়াম্না হেনগৎলে, অদুবু অদোম্না গ্যাস ফংদবগী ৱা তাখিবরা? তাদে, ৱাফমসি হিন্দুস্তান তাইম্সতা মতম অমদা ফোঙখিবা ঐ খঙহৌদে… মদু থোকত্রবদি কমদৌনা ফোঙগদৌরি। মসি থোকখিদে মরমদি ঐখোয়না মসিদা ঙাক্লৌ পীগদবা ইনফ্রাস্ত্রকচর শেমগৎখি, মসিদা শেল থাদখি। ঐখোয়না তোঙান তোঙানবা মফমশিংদা বোত্লিং প্লান্ত লিংখৎখি, দিস্ত্রিব্যুসন সেন্তরশিং শেমখি। বোত্লিংদগী হৌরগা সিলিন্দর য়েন্থোকপা ফাওবদা মফম খুদিংদা এমপ্লোইমেন্ত পীখি।
মরূপশিং,
ঐনা খুদম কয়া অমা পীবা ঙম্মি। মোবাইল ফোনগী খুদমসু লৈরি… রুপে কার্দকী খুদমসু লৈরি… মমাঙদা, দেবিত কার্দ অমা লৈবদা মীয়ামদা চাউথোকচবা পোক্নরম্মি, মখোয়না মীনা উনবা হায়দুনা মদুবু মীয়াম মাঙদা পুথোক্নরম্মি। অদুগা লায়রবশিংনা কার্দ অদুবু য়েংলগা খন্নরম্মি… ঐসু অসিগুম্বা অমা ঐগী পোকেত্তা য়াওরবদি হায়না। অদুবু রুপে কার্দ লাকপদগী ঙসিদি লৈবাকসিগী লায়রবশিং ফাওবা মখোয়গী ফুরিৎখাউদা ক্রেদিত-দেবিত কার্দ অমমম য়াওনরে। হৌজিক মীৎকুপ অদুদা, মখোয়না থোং মান্নবগী ইথিল অমা ফাওরি, মখোয়গী ইকায়খুম্নবা হেনগৎহল্লি। ঙসি, খ্বায়দগী লায়রবা মীওইশিংনা ফাওবা ওনলাইন ত্রাঞ্জেক্সন তৌরি। অতাঙবা কার অমদগী কুমথরক্লগা অচৌবা সোপ্পিং মোল অমদা চঙলিবদুদগী লম্বীগী চিদাইদা ফম্লিবা মীচম অমা ফাওবদা লৈবাকসিগী মীপুম খুদিংমক্না চপ মান্নবা UPI শীজিন্নরি। মসিসু ইনভেস্তমেন্ত তু এমপ্লোইমেন্ত, দিভেলপমেন্ত তু দিগ্রিতীগী অথোইবা খুদম অমনি।
মরূপশিং,
ঙসি লৈরিবা ভারতকী গ্রোথ ত্রেজেক্তরী অসি মমুৎ তানা খঙনবগীমক, ঐখোয়গী লৈঙাক্কী অতোপ্পা লম্বী অমদসু য়েঙবা মরু ওই। লম্বী অদুদি – মীয়ামগীদমক শেল য়াম্না চাদিং তৌবা হায়বসিনি, অদুবু অতোপ্পা লম্বী অমগসু লৈরি – মীয়ামগীদমক শেল য়াম্না তুংশিনবা হায়বসিনি। মসি ঐখোয়না করম্না তৌরিবনো খঙবদা অদোম নুংঙাইগনি। ২০১৪দা, ঐখোয়গী কেন্দ্রগী বজেৎ অসি লুপা করোর লাখ ১৬ লোম্নি। ঙসিদি বজেৎ অসি লুপা করোর লাখ ৪৮ য়ৌরে। ২০১৩-১৪দা, ঐখোয়না কেপিতেল এক্সপেন্দিচরদা লুপা করোর লাখ ২.২৫ রোম চাদিং তৌরম্মি। অদুবু ঙসিগী কেপিতেল এক্সপেন্দিচর অসি লুপা করোর লাখ ১১ য়ৌরে। ঙসিদি, হায়রিবা লুপা করোর লাখ ১১ অসি অনৌবা লায়েংশঙ, অনৌবা স্কুল, লম্বী, রেলৱে, রিছর্চ ফেসিলিতীশিং অমসুং অসিগুম্বা মখলগী মীয়ামগী ইনফ্রাস্ত্রকচর শেমগৎপদা শীজিন্নরি। মীয়ামগী চাদিং হেনগৎহনবগা লোয়ননা, ঐখোয়না মীয়ামগী শেলসু তুংশিল্লি। ঐনা ময়ামগী মাঙদা ফিগর খরা পুথোকচগে অমদি হায়রিবা ফিগরশিং অসি তারবা মতুংদা, অদোম্না মসিসু ওইথোকপা য়াবরানে হায়না শোয়দনা খনগনি হায়না ঐনা থাজৈ।
হৌজিক, দাইরেক্ত বেনিফিত ত্রান্সথর, DBT… DBT না মরম ওইরগা ফন্দ য়ুরম্বা লেপখ্রে অমদি লৈবাক অসিনা লুপা করোর লাখ ২.৫ মাঙলমগদবদগী কন্বা ঙম্লে। অয়ুস্মান ভারত য়োজনাগী মখাদা লেম্না লায়েংবনা লায়রবশিংগী লুপা করোর লাখ ১.১০ কন্বা ঙম্লে। জন ঔসধী কেন্দ্রশিংদা চাদা ৮০ দিস্কাউন্ত পীদুনা হিদাক ফংহন্বনা মীয়াম্না হিদাক লৈবদা চৎকদবা লুপা করোর লিশিং ৩০গী শেন্ফম তিংহন্দবা ঙম্লে। স্তেন্ত অমসুং খুউ ইমপ্লান্তকী মমল শেন্নদুনা থম্বদা লুপা করোর লিশিং কয়া তিংহন্দবা ঙম্লে। উজালা স্কীমগী মখাদা, মীয়াম্না LED বল্বশিং শীজিন্নদুনা মৈগী বিল থিবদা লুপা করোর লিশিং ২০ তিংহন্দবা ঙম্লে। স্বচ্ছ ভারত অভিয়ান, স্বচ্ছ ভারত মিসন্না মরম ওইরগা লায়না কয়া হন্থহল্লে অমসুং মসিনা খুঙ্গংগী ইমুং খুদিংদা লুপা লিশিং ৫০ রোমগী চাদিং হন্থহল্লে। মশাগী তোইলেৎ লৈজবা ইমুংশিংনা ফাওবা লুপা লিশিং ৭০গী চাদিং হন্থহল্লি হায়না UNICEF না হায়রি।
মরূপশিং,
WHO না অহান্বা ওইনা মশাগী য়ুমদা তোতিগী ঈশিং ফংবা মীওই করোর ১২গী স্তদী অমা পাঙথোকখ। হৌজিক্তি অরুবা ঈশিং ফংদুনা, অসিগুম্বা ইমুংশিংনা চহি খুদিংগী লুপা লিশিং ৮০রোমগী চাদিং হন্থহন্বা ঙম্লে।
মরূপশিং,
চহি ১০গী মমাঙদা, ভারত্তা অসিগুম্না চাউনা অহোংবা লাক্কনি হায়না কনামত্তনা থাজনরমদে। ভারতকী মায় পাকপনা ঐখোয়বু মঙলান হেন্না চাউনা মঙনবা অমসুং মদুবু মঙফাওনহন্নবা পুক্নিং থৌগৎলি। ঙসিদি, থাজবা অমা লৈরে, চহিচা অসি ভারতকী চহিচা ওইগনি হায়বগী ৱাখল্লোন অমা ফাওহল্লে। অদুবু মসি তৌনবগীদমক অমসুং হেন্না খোঙজেল য়াঙনা থবক পায়খৎনবগীদমক, ঐখোয়না কন্না হোৎনবা তাই। ঐখোয়না মায়কৈ অসিদসু খোঙজেল য়াঙনা থবক পায়খৎলি। ঐখোয়না হীরম খুদিংদা খোঙজেল য়াঙনা থবক পায়খত্তুনা মাঙদা চঙশিন্বা তাই। খুন্নাই পুম্বনা ঐখোয়না খ্বায়দগী ফবদুদগী হন্থবা অমত্তদা য়াশিনবা ঙম্লোই হায়বগী ৱাখল্লোন চেন্বা তাই। ঐখোয়না ভারতকী স্তেন্দর্দপু মালেমগী থাক্নি হায়নবা মীৎকুপ্তু য়ৌনবা হোৎনবা তাই। মালেমদা ভারতকী পোত্থোকশিংগী মালেমগী থাক্কী পোত্থোক্নি হায়নবা পোত্থোকশিং ঐখোয়না পুথোকপা তাই। ভারতকী ইনফ্রাস্ত্রকচরনা মালেমগী থাক ওইরক্নবা ঐখোয়না শেমগৎ শাগৎপদা হোৎনবা তাই। মহৈ মশিংগী লমদা ঐখোয়না পায়খৎলিবা থবক্না মালেমগী থাক ওইরক্নবা হোৎনবা তাই। ঐখোয়না এন্তরতেনমেন্তকী লমদসু ঐখোয়গী ফিল্মনা মালেমগী থাক ওইহন্নবা হোৎনবা তাই। অদুগা হিন্দুস্তান তাইম্সনা মসি পুরকপদা, মীয়ামগী পুক্নিংদা ৱাখল্লোন অসি লৈহন্নবা অচৌবা থৌদাং অমা লৌনিংঙাই লৈ। অদোমগী চহি ১০০গী এক্সপিরিএন্স অসিনা চাওখৎপা ভারত অমগী মায়কৈদা চঙশিল্লিবা খোঙচত্তা য়াম্না কান্নরক্কনি।
মরূপশিং,
ঐখোয়না চাওখৎপগী খোঙজেল অসি কায়হন্দনা চৎপা ঙমগনি হায়না ঐনা থাজৈ। অথুবা মতমদা ঐখোয়না মালেমগী অহুমশুবা খ্বায়দগী চাউবা শেন্মিৎলোন ওইরক্লগনি। অদুগা ভারতনা মাগী নীংতম্বগী চহি চাম্মা ফারকপগী কুমওন থৌরম পাঙথোকপা মতমদা, ভারতকী নীংতম্বা চহি ১০০ ফারকপা মতমদা, অদোম্না চহি ১২৫ শুরগনি; অমসুং হিন্দুস্তান তাইম্সনা মসি চাওখৎপা ভারতকী অথোইবা পাউচে অমনি হায়না ইবা ঙম্লগনি। অদোম্না খোঙচৎ অসিবু হকথেংননা উরিবা অমসু ওইরগনি। অদুবু ঐনা ময়ামগী মরক্তা তিল্লরবনিনা, ঐনা ময়ামদা থবক খরগী মরমদা হায়জনিংই, অমদি মসিনা অদোমগী থৌদাং ওইগদৌরিবনি, ভারতিয় জী।
য়েংবিয়ু, ঐখোয়না অথোইবা অইবশিংগী থবকশিংদা PhDs পায়বা মী লৈরে। PhDs অসি তোঙান তোঙানবা রিছর্চশিংদা তৌনরি। শাসি জী, কনাগুম্বনা হিন্দুস্তান তাইম্সকী চহি ১০০গী খোঙচত্তা PhD তৌবা য়াবরা? মসি অচৌবা সর্ভিস অমা ওইদুনা, লৈবাকসিগী জর্নেলিজমগী খোঙচৎকী মরমদা ফজরবা ৱাফম খর থোরক্কনি, অমসুং পাউচে অসিনা মতম অনিমক, মীনায় নাইথাংগী লোয়ননা নীংতম্বগী মতম অনিমক উদুনা লাক্লবনি। মসিনা অৱাৎ অপান থল্লবা মতম অমসুং মরাং কায়না লৈরবা মতম অনিমক থেংনরক্লবনি। মসি অচৌবা সর্ভিস অমা ওইগনি হায়না ঐনা খল্লি। অদুগা বির্লা ইমুং অসি মীয়ামগী মতেঙ পাংবদা থাজবা থমদুনা লাক্লবা ইমুং অমনি। ভারতপু মালেমগী থাক্তা মাগী চপ চাবা শক্তম পীগদবা রিছর্চ ৱর্কশিং তৌনবা ভারতকী মনুং অমসুং মপানগী য়ুনিভর্সিতী খরদা হিন্দুস্তান তাইম্স চেয়র অমা করিগীদমক থম্লোইদৌরিবনো। পাউচে অমা পুথোকপা হায়বসিমক অদোম্না তৌরিবদুগুম্না অচৌবা থবক অমনি। অদুবু অদোমগী নাক্তা অচৌবা কেপিতেল অমা লৈরি, অদোম্না চহি ১০০সিদা তাল্লক্লিবা ইকায়খুম্নবা অমসুং থাজবা অসি তুংগী মীরোলশিংগীদমক হিন্দুস্তান তাইম্সকী মীৎয়েঙগী ৱাংমদা চত্তুনা কান্নবা মওংদা শীজিন্নবসু য়াগনি খল্লি। অদোম্না চহি ১০০গী সেমিনারদা লোইশিল্লোই, হেন্না মাঙদা চঙশিনগনি হায়না ঐনা চপ চানা থাজৈ। অনিশুবদা, ঐনা উখিবা একজিবিসন অসি তশেংনা পুক্নিং পেন্নিংঙাই ওই। অদোম্না মসিগী দিজিতেল ভর্জন অমা অফবা কম্মেনতরীগা লোয়ননা পুথোক্তুনা লৈবাকসিগী স্কুল মহৈরোয়শিংগী মফমদা য়ৌহন্বিবা য়াবরা। মসিনা ভারত্তা হীরম অসিদা, কমদৌনা ভারতনা মাগী চাওখৎ খোঙচত্তা অকা অকুম কয়া থেংনখিবগে, ভারতনা করম্বা ফীভম থেংনদুনা লাকখিবগে হায়না তাক্তুনা য়াম্না মরুওইবা থৌওং অমা ওইগনি। অদোম্না ফনা নীংথিনা হোৎনরি, অমদি মসিগী দিগিতেল ভর্জন অমা শেমদুনা অদোম্না লৈবাকসিগী স্কুল খুদিংদা য়ৌবা ঙমগনি অমদি মসিনা অঙাংশিংগী অচৌবা পুক্নিং চিংশিনফম অমা ওইবা ঙমগনি হায়না ঐনা থাজৈ।
মরূপশিং,
চহি ১০ হায়বসি অচৌবা ৱাফম অমনি। হন্দক মরকসি ঐ হীরম খরদা য়াম্না চিল্লি। অদুবু থৌরম অসিদা ঐনা খুত্তগী নান্থোকহন্নিংদবা, ঐ ইশা লাক্তুনা শরুক য়াজনিংবা থৌরম অমনি। মরমদি চহি ১০০গী খোঙচৎ হায়বসি মশানা অচৌবা মায় পাকপা অমনি। মরম অসিননি ঐনা অদোমবু অমদি অদোমগী কলিগ পুম্নমকপু থম্মোয়নুংদগী নুংঙাইবা ফোঙদোকচরিবা। ময়ামবু থাগৎচরি!
