‘মিসন স্কুল ওফ এক্সলেন্স’ প্রোগ্রামগী মখাদা লুপা করোর ৪৫০০গী প্রোজেক্ত কয়াগী উরেপ উয়ুং তম্বগা লোয়ননা মীয়ামদসু খুৎশিন্নখি
‘বিদ্যা সমীক্ষা কেন্দ্র ২.০’ অমসুং চাউখৎ থোরাংগী অতোপ্পা প্রোজেক্ত কয়াগী উরেপ উয়ুং তমখি“ঐখোয়গী ওইনদি, লাইরবগী য়ুম হায়বসি মশিংখক নত্তনা ইশাবু ইকায় খুম্নজবগী পাম্বৈ অমনি হায়না লৌই”“ঐখোয়না ত্রাইবেল মফমশিংগী নহাশিংদা খুদোংচাবা ফংহনবগা লোয়ননা মখোয়গী মেরিৎপুসু পুক্নিং থৌগৎপগী পান্দম থম্লি”“অদোমগী ইচানুপা অসিনা অদোমগী হক ফংহন্নবা লাক্লিবনি হায়না ঐহাক্না ছোতাউদয়পুর য়াওনা ত্রাইবেলগী অপুনবা মফমগী ইমা অমসুং ইচে ইচলশিংগী মফমদা হায়জনীংই”ভারত ইমানা য়াইফরে,
ভারত ইমানা য়াইফরে,
ফম্বাক্তা লেংখৎপীরিবা মীয়াম্না য়াবা গুজরাতকী মুখ্য মন্ত্রী, শ্রীমান ভুপেন্দ্র ভাই পতেল, ঐহাক্কী পার্লিয়ামেন্তকী মরুপ অমসুং গুজরাতকী বি.জে.পি.গী প্রসিদেন্ত, শ্রী সি.আর. পাতিল, গুজরাত সরকারগী মন্ত্রীশিং, রাজ্যগী পঞ্চায়তশিংগী মীহুৎ অমসুং মশিং য়াম্না লেংবীরক্লিবা ঐহাক্কী নুংশিরবা ইচিল ইনাওশিং!
ময়াম্বু কমদৌবীরিগে, হৌনা অমুক্তা খুম্বীয়ু, ঐহাক্না ঙসি বোদেলীদা লাক্লিবসি শাংলবা মতমগী মতুংদনি। মমাংদদি, চহি অমদা অনিরক নত্ত্রগা অহুম্লক লাক্লম্বনি, অদুগা মদুগী মমাংদা ঐহাক্না লুপকী কার্য়করতা ওইরিঙৈদদি নুমিৎ খুদিংগী বোদেলীদা লাক্লম্বনি। ঐহাক্না ঙসি, পুঙ খরগী মমাংদা গান্ধীনগরদা পাংথোকপা ভাইব্রেন্ত গুজরাতনা চহি 20 মপুং ফাবগী নুংঙাইবা ফোংদোকপগী থৌরমদা শরুক য়াজখি। চহি 20 হৌখ্রে, অদুগা হৌজিক্না, বোদেলী, ছোতা উদয়পুর, উমরগাম অপুনবদগী অম্বাজী ফাওবগী মপুং ওইবা চাউখৎ থৌরাং, অমসুং চাউখৎ থৌরাংগী অতোপ্পা প্রোজেক্ত কয়াগীদমক্তা লাকপসিদা অদোম ত্রাইবেল ইচিল ইনাওশিংগী মরক্তা তিনবগী খুদোংচাবা অমা ফংজরি। মুখ্য মন্ত্রীজীনা হৌজিক্তসু হায়বীখ্রে, লুপা করোর 5000দগী হেনবা শেনফমগী মরু ওইবা প্রোজেক্ত কয়াগী মনুংদগী প্রোজেক্ত খরগী উরেপ উয়ুং তম্বা অমসুং প্রোজেক্ত খরবুনা মীয়ামদা খুৎশিন্নবগী খুদোংচাবা অমা ঐহাক্না ফংজরে। গুজরাতকী জিলা 22 অমসুং গ্রাম পঞ্চায়ত 7500তগী হেনবগী মফমদা ৱাই-ফাই য়ৌহনবগী থবক ঙসি হৌরে, ঐখোয়না ই-গ্রাম, বিশ্ব গ্রাম হৌদোকখি, মসিগী ই-গ্রাম অসিদি বিশ্ব গ্রামগী খুদম অমনি। মসিনা মরম ওইরগা, খুঙ্গংদা লৈবা মীয়ামগী মফমদা মোবাইল, ইন্তর্নেত হায়বসি অনৌবা অমা ওইহন্দ্রে, খুঙ্গংগী ইমা-ইবেল, ইচে-ইচলশিংনা মখোয়শিং অসি শিজিন্নবা হৈরে, মপান্দা থবক তৌদুনা লৈবা মচানুপাগা ভিদিও কোল তৌদুনা ৱারি শেয়ার। খুঙ্গংগী মফমসিদা লৈরিবা অহল-লমন, ইচিল ইনাওশিংনা অহোঙবা মমলদা অয়াঙবা ইন্তর্নেত দেতা ফংলে। মসিগুম্বা নীংথিরবা খুদোল অসিগীদমক্তা ঐহাক্না পুম্নমক্কী মফমদা ইকায় খুম্নজবগা লোয়ননা য়াইফ পাউজেলসু পীজরি।
ঐহাক্কী ইমুংগী নুংশিরবা মীওইশিং,
ঐহাক্না ছোতা উদয়পুর, নত্ত্রগা বোদেলীগী অকোয়বদা চৎচরে, মফমসিগী মীয়াম্না ঐখোয়গী ছোতা উদয়পুর জিলা অসিদি মোদী সাহেবনা পীবিবনি হায়নৈ, হায়নৈকো মসিগী মরমদি, ঐহাক্না মফমসিদা লৈরিঙৈ মতমদা ছোতা উদয়পুরদগী বরোদা চৎপগী লম্বীসি য়াম্না শাংলম্মি, মসিনা খুদোংচাদবা অমসুং অৱাবা কয়া নংহল্লি হায়বা ঐহাক খঙই। অদুনা, ঐহাক্কী সরকার অসিবু অদোমগী শুমাংদা পুরকখিবনি। নরেন্দ্র ভাইনা অচৌবা স্কিম, প্রোজেক্ত কয়াবু উমরগামদগী অম্বাজীগী ত্রাইবেলনা খুন্দাবা মফমশিংদা হৌদোকখিবনি হায়বসি ঙসিসু মীয়াম্না নীংশিংনরি। অদুবু ঐহাক্না মুখ্য মন্ত্রী ওইদ্রিঙৈগী মমাংদগী মফমসিগী লৈহাও, খুঙ্গং, ত্রাইবেল ইমুংশিংগা নক্নবা মরী লৈনদুনা লাকখিবনি। মরী অসি ঐহাক্না মুখ্য মন্ত্রী নত্ত্রগা প্রধান মন্ত্রী ওইরবা মতুংদা শাগৎখিবা নত্তে। মদুগী মমাংদগী লৈরক্লবনি। ঐহাক্না শুপ্নগী কার্য়করতা ওইরিঙৈদা ছোতা উদয়পুরদা নুমিৎ খুদিংগী বস্তা লাকখি অদুগা লেলে দাদাগী ঝোপ্রিদা চৎলি। লেলে দাদাগা থবক তৌমিন্নখিবা মীওই কয়া অমা ঙসিগী মিতিন মরক্তা য়াওরমগনি। দহোরদগী উমরগামগী মফম খুদিংমক ঐহাক্না উখ্রে, লিমদি ওইরো, সন্তরাম্পুর ওইরো, ঝলোর, দহোর, গোধ্রা, হালোল, কালোল অসি ঐহাক্কী লম্বী ওইরম্বনি। বস্তা লাক্লগা মীপুম খুদিংগা উন্নরগা অদুম হনখিবনি। অদুগা করিগুম্বা হাংলম্বা থোক্লবদি, কায়াভরোহানেশ্বরদা চৎলি, ভোলেনাথকী খুয়াখাদা চঙজৈ। মালসর, পোরগাম, পোর, নারেশ্বরদা তোয়না চৎলম্মি। কর্নাথীদা তোয়না চৎলম্মি, সাওলিদসু চৎলম্মি। সাওলিদা পাংথোকপা এজুকেসনগী থবকশিংগী ওইনদি, মতমদুদা স্বামীজী অমা লৈরম্মি, মহাক্কী নাক্তা চত্তুনা সতসং তৌবগী খুদোংচাবা কয়া ফংজখি। অদুগা ভাদর্বাগী চাউখৎ থৌরাংগী খোঙচৎকা মতম শাংনা মরী লৈনবগী তাঞ্জাসু ফংজখি। মসিনা হায়বদি, চাউখৎ থৌরাংশিং অসিগা ঐহাক্না নক্নবা মরী লৈখি হায়বনি, খুঙ্গংদা অহিং কয়া লেকখিবনি। সাইকল, খোঙ, বস তোংদুনা চত্তুনা মীওই কয়াগা উন্নখিবনি। মীওই অয়াম্বদি থাইনগী মরুপ ঙাক্তনি।
ঙসিদি, ঐহাক্না শ্রী সি.আর. পাতিল, অমসুং ভুপেন্দ্রভাইবু থম্মোই শেংনা ইকায় খুম্নজবা পাম্মি। ঐহাক্না মফমসিদা জীপ তোংদুনা লাকপদা থাইনগী মরুপ কয়াগা উন্নবগী তাঞ্জা ফংজখি, থাইনগী মতমশিং নীংশিংলকখি। অদুনা, ঐহাক্না সরকারগী শরুক ওইরকখিবদা, লমদমসিগী চাউখৎ থৌরাংগী থবক তৌফম থোকই হায়না ঐনা খনখি। অদুনা ঐনা ত্রাইবেলশিংগী চাউখৎ থৌরাংগী স্কিম কয়া পুথোকখি অমসুং মসিনা কান্নবা কয়াসু হৌজিক্তি পীরে। ঐহাক্না ইং 2001-2002দা মখুৎ পায়দুনা স্কুলদা থীনবীখিবা অঙাংশিংগা ঙসি উন্নবগী তাঞ্জাসু ফংজরে। মখোয়গী মরক্তগী কয়া অমদি দাক্তর, ওজা ওইনখ্রে। থম্মোই শেংনা পাংথোকখিবা থবক খুদিংগী নীংথিরবা মহৈ ফংই হায়বা ঙসিসু ঐহাক্না উরে। অঙাংশিং অসিনা ঙসি মায় পাকপা উবদা ঐঙোন্দা য়াম্না নুংঙাইবা ফাওই।
ঐহাক্কী ইমুংশিং,
অফবা স্কুম কয়া শেয়ার, লম্বী শোরোক ফগৎলে, য়ুম নুংঙাইবা ফংলে, ঈশিং মাইশিং মরাং কায়না ফংলে, পুম্নমক অসিনা মীচম মীয়ামগী পুন্সি মহিংদা অওনবা কয়া পুরক্লে, পুম্নমক অসিনা মখোয়গী ৱাখল খনবগী মতিক্তসু য়াম্না ফগৎহল্লে, অমসুং লাইরবশিংগী য়াইফ য়ুম্বালদা ঐখোয়না মতম্পুম্বদা অহেনবা মিৎয়েং থমদুনা লাক্লিবনি। লাইরবশিংনা থেংনবা শিংনবশিং ঐহাক তসেংনা খঙই। মদুগী ৱারোইশিন পুরক্নবা ঐহাক্না লান কয়া থেংনদুনা লাকখি। অতেনবা মতমগী মনুংদা ঙসিদি য়ুম করোর 4 হেনববু লাইরবশিংগী মখুত্তা খুৎশিন্নবা ঙম্বদা ঐহাক্না নুংঙাইবা ফাওজৈ। মমাংগী সরকারদি লাইরবগী য়ুম শাবা খুদিংগী অমা শেয়ার, অনি শেয়ার হায়না মশিং থীরম্মি। ঐখোয়দদি মসি শুপ্নগী মশিং নত্তে, ঐখোয়গী মফমদদি মসি মশাবু ইকায় খুম্নবগী পাম্বৈ অমনি হায়না লৌই। য়ূমশিং অসি শাবদা দিজাইন তৌবগী থৌদাং ঐখোয়দি বেনেফিশরীশিংদা খুৎশিন্নৈ, মখোয়গী তঙাই ফদবগী মতুং ইন্না, কদাইদা শঙ্গোন থমগনি, য়েন কদাইদা লোইগনি, মশানা পুম্নমক লেপচহল্লি। ঐখোয়না মখোয়গী একাউন্ততা শেল হাপকনি, মখোয়না অদুম শাজখিগনি। অদুগা, মরু ওইবা ৱাফম অমনা, ঐখোয়না য়ুমগী নুপীশিংবু য়ুমগী য়ুম্বুরেম্বী ওইহল্লি। মসিদগী লৈবাক অসিদা ঙসিদি লাখপতি দিদি কয়া য়াম্না লৈরে। ঐহাক্কী মিংদা য়ুম অমা ফাওবা লৈত্রি, অদুবু ঐহাক্কী লৈবাক্কী নুপী লাখ কয়াগী মমিংদা য়ুম কয়া অমদি ঐহাক্না পীখ্রে।
মরুপশিং,
গুজরাত্তা ঈশিংগী ফিভম কমদৌরম্মি হায়বসি মফমসিগী খুঙ্গংগী মীওইশিংনা ফজনা খঙনরবনি। ঐহাক্কী ত্রাইবেল মরুপশিংনা হায়বী, লৈনুংদগী ঈশিংবু মথক্তা করম্না চেলহনগনি, ঐখোয়দি চিংদা লৈবনিনা ঈশিং মথক্তা পুখৎপদা শিংনবা য়াম্না থেংনৈ হায়বা ৱাফম থম্মি। ঐখোয়না শিংনবা অসিবু মাইয়োক্নদুনা ঈশিং চিংখৎখি অমসুং য়ুম্থোং খুদিংদা ঈশিং য়ৌহন্নবা হোৎনখি। মমাংদা হেন্দ পম্প থম্লম্মি, থা অহুমদা পম্প য়ারক্লরোই, মদু শেম্বদা চহি অহুম অমুক চঙগনি, মসিগুম্বা ফিভমসি ঐহাক্না উদুনা লাক্লবনি। অদুগা ঈশিংদুনা অমুক মোৎপদা লাইনা কয়া অমুক শন্দোক্লকই, মসিনা অঙাংশিংগী চাউখৎ থৌরাংদসু অয়েৎপা কয়া পীরম্মি। ঙসিদি, গুজরাতকী য়ুম্থোং খুদিংদা তোতি ঈশিং মায় পাক্না ঐখোয়না য়ৌহল্লে, অসুম্না অদোমগীদমক্তা থবক কয়া তৌদুনা লাকপদা মমল নাইদ্রবা পরা কয়া তমখি। লৌশিং কয়া অসিনা ঐহাকপু দিল্লীদা অমুক মতেং পাংই। অদুনা, অদোমদি ঐহাক্কী ওজানি। অদোমগী নাক্তা লৈদুনা ঐহাক্না অৱাবা নুংঙাইবা কয়া থেংনখি, শিংনবা কয়াগী ৱারোইশিন পুরকখি।
ঐখোয়না চহি মরিগী মমাংদা জল জীবন মিসন হৌদোকখি। ঈশিংগীদমক্তা কিলোমীতর অহুম মরি চৎপা তারম্বা ইমা, ইচে ইচলশিংগী ময়ুমদা ঈশিং য়ৌরে, মখোয়গী চাকখুমদা হকথেংননা ঈশিং য়ৌরে। পুম্নমক অসি ঐহাক্কী ছোতা উদয়পুর, কবন্তকী ইমা ইবেলশিংনা থৌজানবীবদগী ওইথোক্লিবনি। কবন্ত অসি মতম অমদা য়াম্না শোত্থরম্বদু ঐহাক নীংশিংলি। কবন্তকী মীওই খরা ঐহাক্ক উন্নবা ঙসি লাকখি, মখোয়গী মফমদা স্কিল দিভেলপমেন্তকী ত্রেনিং চত্থবরা ঐহাক্না হংই। ঐখোয়গী থবকশিংদা মখোয়না ঙকখি। ঐখোয়না হোৎনবদগী মফমসিদা রিজনেল ৱাতর সপ্লাইগী থবক লোইশিল্লে, অদুগা মীওই লিশিং 50, য়ুম্থোং লিশিং 50দা ঈশিং ফংবগী থবক পাংথোক্লে।
মরুপশিং,
এজুকেসনগী লমদা অনৌবা থৌওং শিজিন্নবা হায়বসি গুজরাতনা পাক চাউনা পাংথোক্তুনা লাক্লি, ঙসি পায়খৎলিবা প্রোজেক্তশিং অসিদসু মসিগী মাইকৈদা অচৌবা খোঙথাং পায়খৎলি, মসিগীদমক্তা ঐহাক্না ভুপেন্দ্র ভাই অমসুং মহাক্কী তীম্বু থাগৎচরি। মিসন স্কুল ওফ এক্সেলেন্স অমসুং বিদ্যা সমীক্ষানা মখোয়গী অনিশুবা ফেজকী মতুং ইন্না, স্কুল কারিবশিংগী মফমদা মশক থোক্না তেংবাংগনি। ঐহাক্না হৌজিক ৱর্ল্দ বেঙ্ককী চেয়রমেনগা উন্নখি। চেয়রমেন মশামক্না ভারতকী জিলা খুদিংদা বিদ্যা সমীক্ষা কেন্দ্রশিং লিংখৎলু অমসুং মসিগুম্বা অফবা থবক অসিগীদমক্তা ৱর্ল্দ বেঙ্কনা তেংবাংনবা শেম শাদুনা লৈ হায়না পাউদমখি। মসিগুম্বা খোঙথাং অসিনা তেলেন্ত লৈবা অমসুং রিসোর্স ৱাৎপা মহৈরোইশিংদা মশক থোক্না তেংবাংগনি। ঐখোয়না ত্রাইবেল মফমশিংগী নহাশিংদা খুদোংচাবা ফংহনবগা লোয়ননা মখোয়গী মেরিৎপুসু পুক্নিং থৌগৎপগী পান্দম থম্লি।
ঐখোয়গী সরকারনা একুজেসন অমসুং স্কিল দিভেলপমেন্ততা মমাংগী দিকেদ অনিদগী মিৎয়েং চঙদুনা লাক্লি। হৌখিবা দিকেদ অনিসিগী মমাংদা স্কুল অমসুং কোলেজশিংদা ওজা অমসুং এজুকেসনগী অতোপ্পা খুদোংচাবা কয়া ৱাত্তুনা লাকখিবনা মহৈরোই মশিং য়াম্বনা স্কুলদগী তোকখিবনি। ঐহাক্না গুজরাতকী মুখ্য মন্ত্রী ওইনা ৱাশক লৌখিবা মতমদা রাজ্যসিগী ত্রাইবেলনা খুন্দাবা মফমশিংগী স্কুলশিংদা সাইন্সকী স্কুলশিং লৈখিদবা অদু তসেংনা লাইবক থীবনি। সরকারনা ফিভম অসিদা য়াম্না চাঊনা অওনবা পুরক্লে, হৌখিবা দিকেদ অনিদা ওজা লাখ 2 হেন্না লৌখ্রে অমসুং ক্লাসরুম লাখ 1.25 হেন্না শাখ্রে। হৌখিবা দিকেদ অনিসিদা ত্রাইবেলগী মফমশিংদা সাইন্স, কম্মর্স অমসুং আর্ত ইন্সতিত্যুসনশিংগী নেতৱর্ক অমা থোক্লকখিবগী মতৌ উখি। সরকারনা ত্রাইবেল মফমশিংদা ক্লাসরুম 25,000 অমসুং অনৌবা মেদিকেল কোলেজ 5 শাখ্রে, অমসুং মসিগী খুদমদি গোবিন্দ গুরু য়ুনিভর্সিতী অমসুং বির্সা মুন্দা য়ুনিভর্সিতীনি। লমদমশিং অসিদা স্কিল দিভেলপমেন্ত ইন্সতিত্যুসন কয়া অমসু লৈরক্লে।
ঐহাক্কী নুংশিরবা ইমুং,
দিকেদ কয়াগী মতুংদা হৌজিক লৈবাক অসিদা নেস্নেল এজুকেসন পোলিসী চৎনরে, চহি 30 পন্দুনা লৈরুরবা থবক অসিবু ঐখোয়না লোইশিনখি অমসুং লোকেল লোলদা মহৈ তম্বীবা হায়বসিদা ঐখোয়না অহেনবা মিৎয়েং চঙলি। অঙাংশিংনা মমালোলদা মহৈ তম্লকপা মতমদা মখোয়না অতোপ্পা লোল খঙনবা হোৎনবগী চাং হন্থরগনি, অদুগা মশাগী পরাবু হেন্না খঙনবা মতম থাদবা য়ারগনি। পি.এম. শ্রী স্কুল অমসুং এক্লাব্যা রেসিদেন্সিএল স্কুল লিশিং 14 লৈবাক শিনবা থুংবদা শানবা ঐখোয়না খোঙথাং পায়খৎলি। হৌখিবা চহি 9সিদা এক্লাব্যা মোদেল রেসিদেন্সিএল স্কুলনা ত্রাইবেল লমদমশিংদা চাউনা মতেং পাংখি। মখোয়গী পুন্সিদা অহোংবা পুরক্নবগীদমক্তা ঐখোয়না কেন্দ্র অসিমক হৌদোকখিবনি। SC/STগী মহৈরোইশিংদা স্কোলার্শিপ পীবগী হীরমদসু ঐখোয়না খুমাং য়াম্না চাউশিল্লে। ত্রাইবেল মফমশিংগী অপীকপা খুঙ্গংশিংদা লৈরিবা নহাশিংবু স্তার্তঅপকী মালেমগী শরুক য়াহনবা হায়বসিদা ঐখোয়না মিৎয়েং চঙলি। চহি নৌরিঙৈদগী হৌনা সাইন্সকী মাইকৈদা পুক্নিং চীংশিন্নবা ঐখোয়না অথাপ্পা মফমশিংদা লৈবা স্কুলশিংদা অতল তিঙ্করিং লেব হাংদোকখি। মসিগী পান্দমদি, মখোয়না মপুং মরৈ ফারকপা মতমদা সাইন্স অমসুং তেক্নোলোজীগী সেক্তরদা অচৌবা পাঙ্গল অমা পীবা ঙমহন্নবনি।
ঐহাক্কী ইমুং,
মালেম্না অসি য়াম্না হোংলে। সর্তিফিকেতকী মরু ওইবা হেনগৎলকপগুম্না স্কিলগী মরু ওইবসু য়াম্না হেনগৎলক্লি, অদোমগী করি স্কিল লৈ, স্কিল দিভেলপমেন্ত তৌবশিংনা গ্রাউন্দ লেভেলদা করি থবক পাংথোকই হায়বা ৱাফম কয়া য়েংলুবদগী স্কিল দিভেলপমেন্তকী মরু ওইবা য়াম্না হেনগৎলক্লি। কৌশল বিকাস য়োজনানা নহা কয়াদা কান্নবা পীরি। নহা অমনা স্কিল অমা হেক তমখিবগা, মশাবু থবক পীজনবা মুদ্র য়োজনাগী মতেং লৌদুনা গেরেন্তী য়াওদনা লোন ফংনরি। লোন ফংলবা মতুংদা মদুগী গেরেন্তী কনা পীবগে? মোদীনা পীরিবনি। নহাশিংনা মশাখক্তদা থবক পীজবতা নত্তনা অতোপ্পা মীওই মরি মঙাদসু থবক পীবা ঙমগদৌরিবনি। বনবন্ধু কলয়ান য়োজনাগী মখাদা স্কিল ত্রেনিংগী থবক চত্থরি। গুজরাতকী ত্রাইবেল মফম 50 হেনবদা ঙসি আই.তি.আই. অমসুং স্কিল দিভেলপমেন্তকী অচৌবা কেন্দ্র কয়া লৈরে। ঙসিদি, ত্রাইবেলশিংগী লমদমদা বন সম্পদা কেন্দ্র লৈরে, মসিনা মরম ওইরগা ত্রাইবেল ইচিল ইনাও লাখ 11 হেনবনা বন ধন কেন্দ্রদগী মহৈ তম্লি, শেল তানবা ঙম্লি অমসুং মশাগী পুন্সিদা চাউখৎ থৌরাং পুরক্লি। ঙসিদি, ত্রাইবেল ইচিল ইনাওশিংগী স্কিলগী ওইবা মশাগী কৈথেল লৈজরে। মখোয়গী পোত্থোক য়োন্নবা অখন্নবা দুকান হাংবগী থবক পায়খৎলি।
মরুপশিং,
ঐখোয়না স্কিল দিভেলপমেন্তপু গ্রাউন্দ লেভেলদা কয়া য়াম্না মরু ওইবা পীখি হায়বগী ময়েক শেংবা খুদমদি অদোম্না উরম্লগনি। বিশ্বকর্মা জয়নতী, সেপ্তেম্বর 17দা প্রধান মন্ত্রী বিশ্বকর্মা য়োজনা হৌদোকখি। ঐখোয়গী খুঙ্গংগী পুন্সি মহিংদা মীওই খরগী সেবা য়াওদনা মপুং ফাদে হায়বসি ঐখোয় পুম্নমক্না খঙনরবনি। হায়রিবা মীওই অদুদি শম ককপা, ফুরিৎ তুবা, ফি শুবা, চফু শাবা, য়োৎ শুবা, সনা শাবা, উ শুবা, লৈ পরেং শেম্বা, খোঙউপ শেম্বা, চেক শুবা মীওইশিংনি। মখোয়না স্কিম অসিগী মখাদা শেন্দোই নেম্বা লোন কয়া ফংলগনি, অমসুং মরী লৈনবা অমসুং মতমগা চুনবা খুৎলায় অমদি ত্রেনিংসু ফংগনি। হোৎনরিবশিং অসিদি হায়রিবা মহৈ অমসুং চৎনবীবু হিংহন্দুনা থম্নবগীদমক্তনি। মখোয়না ফংলিবা লোনশিং অসিগী গেরেন্তী অমত্তা লৌরোই, গেরেন্তীগী মথৌসু তাদে। মসিগী গেরেন্তীদি ঐখোয়গী সরকারনা লৌরবনি।
ঐহাক্কী ইমুংগী মীওইশিং,
দলিত, শোত্থরবা কাঙলুপ অমসুং ত্রাইবেল অমদি অতোপ্পা মীওইকয়াবু মতম শাংবদগী নাথৈদুনা লাকপীরি। অদুবু ঙসিদি, মখোয়গী থাজবা হেনগৎহন্নবা সরকারনা স্কিম পুদুনা লাক্লি। নিংতম্বা ফংবগী দিকেদ কয়াগী মতুংদা ত্রাইবেলশিংগী মশক নাইবা মায় পাকপশিংবু ইকায় খুম্নবগী মতম ফংজরে। মসিগী খুদম অমদি হৌজিক্না জন জাতীয় গৌরব দিবস হায়না পাংথোক্লিবা ভগ্বান বির্সা মুন্দাগী মপোক কুমওন অসিনি। হৌজিক্কী সরকার অসিনা ত্রাইবেল খুন্নাইগী বজেৎপু মমাংগী মতমগা চাংদম্নবদা শরুক 5 হেনগৎলে। নুমিৎ খরনিগী মমাংদা লৈবাক অসিদা মশক থোকপা চাউখৎ থৌরাং অমসু লৈখ্রে। ভারতকী অনৌবা পার্লিয়ামেন্তকী অহানবা সেসন হৌখ্রে, মসিদা অহানবা ওইনা পাস তৌখিবা আইনা ওইনা নারিশক্তি বন্দন আইন ওইরে। মীয়ামগী থৌজালদগী ঐখোয়না থৌওং অসিবু মায় পাক্না পাংথোকপা ঙমখবনি। মমাংদা ফম পায়রম্বা মীওইশিংগী মফমদা অমুক্তা হংবীয়ু, শাংখ্রবা মতমসিদা অদোম্না নুপীশিংগী হক্কী মতাংদা করি পাংথোকপীরম্বগে? মসিগী পাউখুম ঐহাক পীজগে। ত্রাইবেল ইমা-ইবেল অমসুং ইচে-ইচলশিংনা অপীক-অপীকপা খুদোংচাবা ফাওবদা ফংদনা লাকখিবনি। মখোয়না দিকেদ কয়াদগী মশাগী হক ফংদনা লাক্লবনি। অদুবু অদোমগী হক খুদিংমক ফংহন্নবা অদোমগী নচানুপা লৈরি। ঐখোয়না মসিগীদমক্তা পায়খৎফম থোকপা থবক খুদিংমক অমমম ওইনা পায়খৎলি। অদোম ইচেল ইচকশিংনা লোক সভা অমসুং বিধান সভাগী শরুক ওইবগী লম্বী হাংদোক্লবনি। ঐখোয়গী সংবিধান্না হায়বগী মখা পোন্না, ST/SCগী খুন্নাইগা লোয়ননা মখোয়গী ইচে ইচলশিংদসু খুদোংচাবা অসি ফংহন্নবা কাঙলোন শেম্লবনি। অনৌবা আইন অসিদা ST/SCগী খুন্নাইগী ইচে ইচলশিংগী ফম খাক্লবনি। মসিগুম্বা আইন অসিবু লৈবাক্কী অহানবা নুপী ত্রাইবেল রাস্ত্রপতি, শ্রীমতি দ্রৌপদি মুর্মুনা অয়াবা পীবা হায়বসিসু তান য়াম্না চান্নবা থৌদোক অমসু ওইরিবনি। ঙসি ঐহাক্না ছোতা উদয়পুরগী ত্রাইবেল লমদমসিদা অদোমগা উন্নরি, মসিগীদমক্তা মশিং য়াম্না লেংবীরক্লিবা ইচে ইচলশিংবু ঐহাক্না ইকায় খুম্নজরি। নিংতম্বগী অমৃতকালগী অহৌবা অসিনা অসুক য়াম্না নীংথিজবসি য়াম্না নুংঙাইজৈ, ঐখোয়গী মঙলানশিং মঙফাওনহনবদা অদোম ইমা, ইচে ইচলশিংনা ঐখোয়গী ইফমদা পাঙ্গল হাপকদৌরিবনি, অদুগা অনৌবা প্রোজেক্ত কয়া অসিনা মফম অসিবু ঐখোয়না শোইদনা চাউখৎহল্লগনি, অমসুং ঙসিগী থৌরম অসিবু মায় পাকহন্নবা অদোম্না মশিং য়াম্না থোকপীরকপগীদমক্তা ঐহাক্না পুম্নমকপু অমুক্কা হন্না থাগৎচরি। ইশাগী পাঙ্গল লোয়না পুথোক্তুনা ঐহাক্কা অমুক্তা লাওমিন্নসি, ইমা ভারতনা য়াইফরে, ইমা ভারতনা য়াইফরে, ইমা ভারতনা য়াইফরে। ঐখোয়গী বোদেলীগী খোল্লাও অসিবু উমরগামদগী অম্বাজী ফাওবা নিলহল্লসি।
ভারত ইমানা য়াইফরে।
থাগৎচরি।
