“নেস্নেল গেম্সনা মীয়ামদগী থোইদোক হেন্দোক্লবা ভারতকী শান্ন-খোৎনবগী মতিক-মপাঙ্গলগী নুংঙাইবা ফোংদোক্লি”
“ভারতকী কাচিন কোয়া খুদিংদা তেলেন্ত লৈ। অদুনা, ইং 2014গী মতুংদা ঐখোয়না শান্ন-খোৎনবগী চৎনবী খুমাং চাউশিলহন্নবা লৈবাক্কী থাক্তা খোঙফম চেৎনা থবক পায়খৎপা হৌখি”“গোৱাগী মশেল মঙালগা চাংদম্ননীংঙাই অমত্তা লৈত্রে”“শান্ন-খোৎনবগী মালেমদা উবা ফংখিবা ভারতকী হন্দক্কী মায় পাকপশিংনা নহা ওইবা শান্নরোই খুদিংগী ইথিল ওইরি”“খেলো ইন্দিয়াগী খুত্থাংদগী তেলেন্ত থীদোকপা, TOPSকী মতেংদগী মখোয়বু ওলিম্পিক্সকী পোদিয়ম ফাওবা য়ৌহন্নবগীদমক্তা মখোয়বু শেমগৎপীবা অমসুং ত্রেনিং পীবা অমসুং মতিক-মপাঙ্গল হেনগৎহনবা হায়বসি ঐখোয়গী মায় পাকপগী থৌরাংনি”“ভারতনা হীরম কয়াদা খুমাং চাউশিল্লি, অদুগা ঙসিদি, মমাংদা তৌরমদবা মওংদা বেঞ্চমার্ক কয়া শেম্লি”“ভারতকী স্পীদ অমসুং স্কেলগা মান্নবা হোৎবসি য়াম্না ৱারগনি”“ইন্দিয়াগী নহাগী পাঙ্গলবু চাউখৎপা ভারত অমগী নহাগী পাঙ্গল ওইহনবা ঙম্বা পাম্বৈ অদুদি মাই ভারতনি”“ভারতনা ইং 2030দা য়ুথ ওলিম্পিক্স অমসুং ইং 2036তা ওলিম্পিক্স শীন্নবা শেম শেবা লোইরে। ঐখোয়গী ওলিম্পিক্স য়ুম্বু ওইবগীভারত মাতাকী জয়,
ভারত মাতাকী জয়,
ভারত মাতাকী জয়,
গোৱাগী রাজ্যপাল শ্রী পি এস শ্রীধারন পিল্লাইজী, মমিং লৈরবা অমসুং নহা ওইরিবা, ইনর্জেতিক মুখ্য মন্ত্রী প্রমোদ সাৱন্তজী, স্পোর্তস মন্ত্রী অনুরাগ থাকুর, কেন্দ্রগী মন্ত্রী-মন্দলগী মরুপশিং, অতোপ্পা মীয়ামগী মীহুৎশিং, ইন্দিয়ন ওলিম্পিক এসোসিএসনগী প্রসিদেন্ত, পি.তি. উশা, শান্নরোয়, সপ্পোর্তিং স্তাফ পুম্নমক, অতোপ্পা ওফিসিএলশিং অমসং লৈবাক্কী কাচিন কোয়া খুদিংদগী লাক্লিবা নহা ওইরিবা মরুপশিং, ভারতকী স্পোর্তসকী মহাকুম্ভগী অচৌবা খোঙচৎ অসি ঙসিদি গোৱা য়ৌরক্লে। মফম খুদিংমক্তা মচু, ইথকশিং, হরাও-তয়াম্বনা থল্লি। পুম্নমকপু 37শুবা নেস্নেল গেম্সকীদমক য়াইফ-মঙ্গোল পীজরি, হন্না-হন্না নুংঙাইবা ফোঙদোকচরি।
মরুপশিং,
গোৱা অসি লৈবাক অসিদা স্পোর্তস স্তার কয়া পীখিবা অদুগুম্বা লমদম অমনি। লৈরক খুদিংমক্তা ফুতবোল পামজবা অসি উবা ফংই। অমসুং লৈবাক অসিগী খ্বাইদগী অরিবা ফুতবোল ক্লব খরা গোৱাদা লৈ। স্পোর্তস নুংশিজবা গোৱাদা নেস্নেল গেম্স পাঙথোকপা অসিমক্না অনৌবা শক্তিনা থলহনখি।
ঐগী ইমুং-মনুংশিং,
নেস্নেল গেম্স অসি ভারতকী স্পোর্তসনা অমগী মথংদা অমা অনৌবা পনখৈশিং য়ৌবা ঙম্বা মতমদা পাঙথোক্লি। চহি 70 অসিদা পাঙথোকলমদবা অদু ঐখোয়না এসিয়ন গেম্স অমসুং হৌজিক চত্থরিবা এসিয়ন পেরা গেম্সতা উবা ফংলি। মসিদা ভারতকী শান্নরোয়শিংনা মেদল 70 হেন্না লৌদুনা হৌজিক ফাওবগী রেকোর্দ পুম্নমক থুগাইখি। মমাংদা ৱর্ল্দ য়ুনিভর্সিতী গেম্স পাঙথোকখি মসিদা ভারতনা অনৌবা পুৱারৌ অমসু থম্বা ঙমখি। মাইপাকপশিং অসিনা মফম অসিদা লাক্লিবা শান্নরোয় খুদিংমক্কী অচৌবা ইথিল ওইখি। নেস্নেল গেম্স অসি অমরোমদা নখোয়গীদমক, নহারোলগীদমক, শান্নরোয়শিংগীদমক শক্তি লৈরবা লোঞ্চপেদ অমনি। নখোয়গী মাংদা লৈরিবা খুদোংচাবশিং অসি য়েংলগা নখোয়না অঙম্বা থাক্তা হোৎনবা তাই। নখোয়না হোৎনগদ্রা? শোইদনা তৌগদ্রা? নখোয়না অরিবা রেকোর্দশিং থুগাইগদ্রা? নখোয়দা ঐহাক্না য়াইফ-মঙ্গোল পীজরি।
ঐগী নহা ওইরিবা মরুপশিং,
ভারতকী খুঙ্গং অমসুং লৈরক খুদিংমক্তা তেলেন্তকী অৱাৎপা অমত্তা লৈতে। ঐখোয়গী পুৱারীনা শাখি ওইখি মদুদি লাইররিঙৈদা ফাওবা ভারতনা চেম্পিয়নশিং পুথোকখি। ঐখোয়গী ইচল পি.তি. উশাজী অসি ফম্পাক অসিদা ঐখোয়গা লোয়ননা ফম্মি। অদুবু লৈবাক অসিগী প্রজা খুদিংমক্না করিগুম্বা অৱাৎপা অমদি মতম চুপ্পদা ফাওদুনা লাকখি। ঐখোয় অসি অচৌবা লৈবাক অমনি অমসুং ইন্তর্নেস্নেল স্পোর্তস ইভেন্তশিংদা মেদল তেল্লীদা ঐখোয়না শোত্থনা লৈখি। মরম অসিনা 2014গী মতুংদা ঐখোয়না জাতিগী ফিরেপকা লোয়ননা লৈবাক অসিগী অৱাবা কোকহন্নবা থবক পাইখৎখি। ঐখোয়না স্পোর্তস ইনফ্রাস্ত্রকচরদা অহোংবশিং পুরকখি, ঐখোয়না সেলেক্সন প্রোসেসশিংদা অহোংবা পুরকখি, ঐখোয়না মসিবু হেন্না ত্রান্সপরেন্ত ওইহনখি। ঐখোয়না শান্নরোয়শিংদা শেলগী তেংবাং ফংহল্লিবা স্কিমশিংদা অহোংবশিং পুরকখি। ঐখোয়না শান্নরোয়শিংদা ত্রেনিং পীরিবা স্কিমশিংদা অহোংবশিং পুরকখি। ঐখোয়না খুন্নাইদা লৈরিবা ৱাখল্লোনদা অহোংবা অমা পুরকখি, অরিবা ৱাখল্লোন, অরিবা এপ্রোচনা মরম ওইরগা ঐখোয়গী স্পোর্তস ইনফ্রাস্ত্রকচরদা অপনবা ওইরম্বশিং অদু মথং-মথং লৌথোকখি। সরকারনা তেলেন্ত পুথোকপদগী হৌরগা মখোয়বু লমজিংবীদুনা ওলিম্পিক পোদিয়ম য়ৌহন্নবা রোদমেপ শেমখি। ঐখোয়না মসিগী ফলশিং লৈবাক অসিদা ঙসিদি উবা ফংলি।
মরুপশিং,
মমাং সরকারদা স্পোর্তসকী বজেৎকী মতাংদা তৌনীংদবা অমা য়াওরমখি। মীয়াম্না খনখি মদুদি – গেম হায়বা অসিদি গেমনি, মসি করিবু ওইরুনি? মসিদা করিগী চাদিং তৌগনি! ঐখোয়গী সরকারনা ৱাখল্লোন অসিদা অহোংবা পুরকখি। ঐখোয়না স্পোর্তসকী বজেৎ হেনগৎহনখি। চহি অসিদা কেন্দ্রগী স্পোর্তস বজেৎ চহি 9গী মমাংদগী শরুক 3 হেনগৎহনখি। খেলো ইন্দিয়াদগী হৌরগা তোপ্স স্কিম ফাওবা সরকারনা লৈবাক অসিদা শান্নরোয়শিং য়োকখৎনবা অনৌবা ইকোসিস্তেম অমা শেমখি। স্কিমশিং অসিগী মখাদা নখোয়গুম্বা তেলেন্ত লৈরবা শান্নরোয়শিং অসি স্কুল, কোলেজ, য়ুনিভর্সিতীগী থাক্তগী লৈবাক শিনবা থুংবদগী মশক খঙদোকখি। সরকারনা মখোয়গী ত্রেনিং, চীঞ্জাক, মখোয়গী চাদিংশিংদা চাউনা শেল থাদরি। তোপ্স হায়বগী ৱাহন্থোক্তি তার্গেৎ ওলিম্পিক পোদিয়ম স্কিম হায়বনি, মসিগী মখাদা লৈবাক্কী মকোক থোংবা শান্নরোয়শিংদা মালেমগী খ্বাইদগী ফবা ত্রেনিং ফংহল্লি। খেলো ইন্দিয়া স্কিমগী মখাদা লৈবাক্কী নহারোল লিশিং 3 হৌজিক ত্রেনিং তৌরি। অসিগুম্বা শান্নরোয়শিংগী অচৌবা তেলেন্ত পুল অমা শেম শারি। অমসুং মসিগী মনুংদগী শান্নরোয় খুদিংমক্তা চহি খুদিংগী লুপা লাখ 6 হেনবগী স্কোলরশিপ পীরি। খেলো ইন্দিয়া কেম্পেনদগী থোরকপা নহা ওইরিবা শান্নরোয় 125 রোমনা এসিয়ন গেম্সতা শরুক য়াখি। অরিবা সিস্তেমদো ওইরম্লবদি তেলেন্ত অসি মশক খঙবীরমলোই। তেলেন্ত লৈরবা শান্নরোয়শিং অসিনা মেদল 36 লৌরকখি। খেলো ইন্দিয়ানা শান্নরোয়শিং মশক খঙদোকখি, তোপ্সকী খুত্থাংদা মখোয়বু মখোঙ শোম্বীখি অমসুং মখোয়দা ত্রেনিং পীদুনা ওলিম্পিক পোদিয়ন ফিনিশকীদমক শেম শাখি। মসি ঐখোয়গী রোদমেপনি।
ঐগী নহা ওইরিবা মরুপশিং,
লৈবাক অমা হেক্তগী স্পোর্তস সেক্তর চাউখৎপা অসি লৈবাক অদুগী ইকনোমী খুমাং চাউশিনবগা হকথেংননা মরী লৈনৈ। নেগেতিবিতী, নীংবা কাইবনা থল্লবা মতমদা মসিনা পুন্সিগী লম খুদিংদা অকাইবা পী। ভারতকী মাইপাক্লবা স্পোর্তস স্তোরী অসি ভারতকী অতোপ্পা সক্সেস স্তোরীগা খেন্নবা লৈতে। ঙসি ভারতনা সেক্তর খুদিংমক্তা খুমাং চাউশিল্লি অমসুং অনৌবা রেকোর্দশিং থম্মি। ঙসিদি ভারতকী স্পীদ অমসুং স্কেলগা লম্বা তৌনবদা অৱাবা ওইরে। হৌখিবা নুমিৎ 30 অসিদা তৌখিবা থবক অমসুং মাইপাকশিংদগী ভারতনা করম্না খুমাং চাউশিল্লি হায়বগী মরমদা অদোম্না খঙলগনি।
মরুপশিং,
ঐহাক্না নখোয়গী মতম য়াম্না লৌজরোই। য়েংবীয়ু ঐখোয়গী অফবা তুংলমচৎকীদমক করম্না শেম শারিবা। ঐগী নহারোলশিং মুন্না তাবীয়ু, ঐহাক্না নুমিৎ 30 খক্তদা তৌখিবা থবক্কী মরমদা হায়জগে। হৌখিবা নুমিৎ 30-35দা করি তৌখিবা অমসুং স্পীদ অমসুং স্কেল অসিদা করিগুম্বা লৈবাক অসিনা মাংদা চংশিনবা তারবদি মোদীনা নখোয়গী অফবা তুংলমচৎকী গরেন্তী অদু শুকশোই শোইদনা ফংগনি হায়না ফাওগনি।
হৌখিবা নুমিৎ 30-35দা,
- নারী শক্তি বন্দন অধিনিয়মগী লো শেমখি।
- গগনয়ানগা মরী লৈনবা য়াম্না চাউবা তেস্ত অমা মাইপাক্না তৌখিবা ঙমখি।
- ভারতকী মশাগী অহানবা রিজনেল রেপিদ রেল, নমো ভারত চেনহনখি।
- বেঙ্গলুরু মেত্রো সর্ভিস পাকথোক- চাউথোকহনখি।
- জম্মু-কশ্মীরদা অহানবা বিস্তাদোম ত্রেন সর্ভিস চেনবা হৌহনখি।
- নুমিৎ 30 অসিদা দিল্লী-বদোদরা এক্সপ্রেসৱে শঙ্গাখি।
- ভারত্তা G-20 লৈবাকশংগী MPশিংগী অমসুং স্পীকরশিংগী কনফরেন্স পাঙথোকখি।
- ভারত্তা গ্লোবেল মেরিতাইম সম্মিৎ পাঙথোকখি, মসিদা লুপা করোর লাখ 6কী য়ান্ন-ৱারোল অমা খুৎয়েক পীনখি।
- ইজরেলদা পন্দুনা লৈরিবা ভারত মচাশিং পুরক্নবা ওপরেসন অজয় হৌখি।
- চহি 40গী মতুংদা ভারত অমসুং শ্রী লঙ্কাগী মরক্তা ফেরী সর্ভিস হৌখি।
- য়ুরোপপু তুংওইননা থনমলগা ভারতনা 5G য়ুজর বেজকী হীরমদা মালেমগী মকোক থংবা লৈবাক 3গী মনুং চনবা ঙমখি।
- এপলগী মতুংদা গুগলনসু মেদ ইন ইন্দিয়া স্মার্তফোন শানবা লাউথোকখি।
- ঐখোয়গী লৈবাক্না চেং অমসুং হৈরা অমদি মনা-মশিং পুথোকপদা অনৌবা রেকোর্দ থম্বা থমখি।
মরুপশিং,
মসিদি শুপ্নগী হাফতাইম খক্তা ঙাইরি, ঐহাক্না মশিং থীগদবা য়াম্না ৱাৎলি। ঙসি অসিমক ঐহাক্না চহি 50 পন্দুনা লৈরুরবা মহারাস্ত্রগী নলৱন্দে দামগী ভুমি পুজন পাঙথোকখি।
- হৌখিবা নুমিৎ 30 অসিদা তেলঙ্গানাদা লুপা করোর লিশিং 6কী সুপর থর্মেল পাৱর প্রোজেক্ত শঙ্গাখি।
- ছত্তিসগরগী বস্তরদা লুপা করোর লিশিং 24 রোমগী মোদর্ন স্তীল প্লান্ত অমা শঙ্গাখি।
- রাজস্থানদা মেহসানা-ভতিন্দা-গুরদাসপুর গ্যাস পাইপলাইনগী সেক্সন অমা শঙ্গাখি।
- জোধপুরদা অনৌবা এয়রপোর্ত তর্মিনেল বিল্দিং অমসুং IIT কেম্পস উরেপ-উয়ুং তমখি অমসুং শঙ্গাখি।
- হৌখিবা নুমিৎ 30দা মহারাস্ত্রদা স্কিল দিবেলপমেন্ত কেন্দ্র 500 হেন্না লোঞ্চ তৌখি।
- নুমিৎ খরনিগী মমাংদা গুজরাতকী ধোরদোনা বেস্ত তুরিজম ভিলেজকী মনা ফংখি।
- জবলপুরদা বীরাঙ্গনা রানী দুর্গাবতী স্মারক্কী ভুমি পুজন পাঙথোকখি।
- য়াইঙং থাবা লৌমীশিংগীমদক তর্মরিক বোর্দ শেমখি।
- তেলঙ্গানানা সেন্ত্রেল ত্রাইবেল য়ুনিভর্সিতীগী অয়াবা ফংখি।
- মধ্য প্রদেশতা লায়রবা ইমুং লাখ 2.25না পি.এম. আৱাস য়োজনাগী মখাদা য়ুমশিং ফংজখি।
- হৌখিবা নুমিৎ 30 অসিদা পি.এম. স্বনিধি য়োজনাগী বেনিফিসরীশিংগী মশিং লাখ 50 য়ৌখি।
- আয়ুশ্মান ভারত য়োজনাগী মখাদা কার্দ করোর 26 শাবগী মাইলস্তন য়ৌবা ঙমখি।
- এস্পিরেস্নেল দিস্ত্রিক্তকী মতুংদা লৈবাক অসিদা এস্পিরেস্নেল ব্লোকশিংগী দিবেলপমেন্তগী কেম্পেন অমা হৌখি।
- গান্ধী জয়ন্তিদা দিল্লীদা খাদীগী দুকান অমা খক্তদা লুপা করোর 1.5গী সেল তৌখি।
অমসুং মরুপশিং,
হৌখিবা নুমিৎ 30 অসিদা স্পোর্তসকী লমদা কয়া অমসু তৌবা ঙমখি।
- ভারতনা এসিয়ন গেম্সতা মেদল 100দগী হেন্না লৌখি।
- চহি 40গী মতুংদা ভারত্তা ইন্তর্নেস্নেল ওলিম্পিক কম্মিতিগী সেসন পাঙথোকখি।
- উত্তরাখন্দদা হোকী এস্ত্রো-তর্ফ অমসুং বেলোদ্রোম স্তেদিয়ম শাখি।
- বারানসীদা অনৌবা ক্রিকেৎ স্তেদিয়ম শাবগী থবক হৌখি।
- গ্বালিয়রদা অতল বিহারী বাজপৈয়ী দিব্যাঙ্গ স্পোর্ত সেন্তর শারগনি।
- অমসুং নেস্নেল গেম্স অসি গোৱাদা পাঙথোক্কদৌরি।
শুপ্নগী নুমিৎ 30দা অসুক শাংখ্রবা থবকশিং অসি পাঙথোকপা ঙমখিবা হায়বা অসি য়েংবীয়ু। নখোয়না ঐহাক্না শম্লপ্পা অমা হায়বনি ঙসি লৈবাক্কী সেক্তর খুদিংদা, লৈবাক্কী শরুক খুদিংদা অমুক্তা থেংনখিদ্রিবা খোঙজেলদা থবক পাইখৎকলি, মীপুম খুদিংমক্না চাউখৎপা ভারত অমা ওইহন্নবা থবক তৌরি।
মরুপশিং,
ঐগী লৈবাক্কী নহারোল, ঐগী ভারতকী নহারোল অসিনা তৌরিবা থবকশিং অসিগী য়ুম্বীনি। ঙসি ভারতকী নহারোলদা অমুক্তা উখিদ্রিবা থাজবনা থল্লি। ভারতকী নহারোলগী থাজবগা মরী লৈনবা অচৌবা থবক অমা হন্দক্তা পাঙথোকখি। মেরা য়ুব ভারত, নখোয়না মফম খুদিংমক্তা মসিগী বোর্দশিং উবা ফংলি, মাই য়ুব ভারত হায়বদি MY ভারত কৌবা অনৌবা প্লেৎফোর্ম অমা অয়াবা পীখ্রে। মসিনা খুঙ্গং অমসুং সরকারগী মীয়াম কন্নেক্ত তৌনবা ৱান স্তোপ সেন্তর ওইরগনি, হায়য়দি লৈবাক্কী নহারোল খুদিংমক্তা মশা-মশা লোয়ননা সরকারগা কন্নেক্ত তৌবা ঙম্লগনি। অসুম তৌদুনা মখোয়গী অনীংবা অপাম্বশিং থুংহনবা ঙমগনি, মখোয়দা জাতি শেমগৎপগী খুদোংচাবশিং হেন্না পীরগনি। মসিনা ভারতকী য়ুব শক্তি অসিবু বিক্ষিৎ ভারত ওইহন্নবা শক্তি ওইহন্নবা পাম্বৈ ওইরগনি। নুমিৎ খরনিগী মতুং ওক্তোবর 31, য়ুনিতী দে অসিদা ঐআক্না MY ভারত কেম্পেন হৌদোক্কনি। অমসুং ওক্তোবর 31 অসি সরদার ভল্লভভাই পতেলগী মপোক নুমিৎনি হায়বা মীপুম খুদিংমক্না খঙই। ঐখোয়না লৈবাক শিনবা থুংবদা অচৌবা প্রোগ্রাম রন ফোর য়ুনিতী পাঙথোক্কনি। ময়াম্না কেম্পেন অসিদা শোইদনা শরুক য়াবীয়ু।
মরুপশিং,
ঙসি ভারতকী ফিরেপ অমসুং খোঙথাংশিং অনিমক য়াম্না চাউরে অমসুং ভারতকী অনীংবা অপাম্বশিং ৱাংবা হায়বা অসি মহৌশানি। মরম অসিদা IOC সেসন মনুংদা ঐহাক্না ভারত মচা করোর 140গী অপাম্বশিং মাংদা থমখি। ঐহাক্না ওলিম্পিক্সকী সুপ্রিম কম্মিতিদা ভারতনা 2030দা য়ুথ ওলিম্পিক্স অমসুং 2036দা ওলিম্পিক্স পাঙথোক্নবা শেম শাদুনা লৈরে ফোঙদোকখি।
মরুপশিং,
ওলিম্পিক্স পাঙথোকপগী ঐখোয়গী অনীংবা অসি ৱাখল শাগৎপা খক্তা নত্তে মসিগী নুংদা অচৌবা মরম খরা লৈ। 2036 ফাওবদা হায়বদি হৌজিক্তগী চহি 13গী মতুংদা ভারতনা মালেমগী মাংজিল থারিবা ইকনোমিক পাৱরশিংগী মনুংদা অমা ওইরগনি। মতম অদুদা ভারত মচা খুদিংমক্কী ইনকম অসি ঙসি ওইরিবা অসিদগী শরুক কয়া হেল্লগনি। মতম অদুদা ভারত্তা মিদল ক্লাস য়াম্না লৈরগনি। স্পোর্তসতগী স্পেস ফাওবা ভারতকী তিরঙ্গানা চাউথোক্না পাইরি। ওলিম্পিক্স পাঙথোকপা হায়বা অসিদা কন্নেক্তিবিতী অমসুং মোদর্ন ইনফ্রাস্ত্রকচর চংই। ঙসি ভারতনা মোদর্ন ইনফ্রাদা লুপা করোর লাখ 100 হেন্না চাংদিং তৌনবা শেম শারি। মসিনা ওলিম্পিক্স পাঙথোকপা হায়বা অসি ঐখোয়গীদমক্তসু অরাইবা ওইরগনি।
মরুপশিং,
ঐখোয়গী নেস্নেল গেম্স অসি ৱান ইন্দিয়া, বেস্ত ইন্দিয়াগী খুদমসু ওইরি। মসি ভারতকী রাজ্য খুদিংমক্না মাগী তৌবা ঙম্বা উৎথোক্নবা অচৌবা ফম্পাক অমনি। হন্দক্তি গোৱানা খুদোংচাবা অসি ফংলি। গোৱা সরকার অমসুং গোৱা মীয়াম্না অসুম্না শেম-শাবা অসি য়াম্না শীংথানীংঙাই ওই। মফম অসিদা শেমগৎলিবা স্পোর্তস ইনফ্রাস্ত্রকচর অসি তুংদা লাক্কদবা দিকেদ কয়াদা গোৱাগী নহারোলদা কান্নবা পীরগনি। ভারতনা মফম অসিদগী অনৌবা শান্নরোয় কয়া ফংলি। মসিনা মফম অসিদা নেস্নেল অমসুং ইন্তর্নেস্নেল স্পোর্তস ইভেন্ত হেন্না পাঙথোকপা ঙমহল্লগনি। হৌখিবা চহি খরা অসিদা কন্নেক্তিবিতীগা মরী লৈনবা ইনফ্রাস্ত্রকচর গোৱাদা শাখি। নেস্নেল গেম্সনা গোৱাগী তুরিজম অমসুং ইকনোমীদগী চাউনা কান্নবা ফংলগনি।
মরুপশিং,
গোৱা অসি ফেস্তিবেলগীদমক খঙনৈ। গোৱা ইন্তর্নেস্নেল ফিল্ম ফেস্তিবেল অসি মালেম শিনবা থুংবনা হৌজিক ঙাংনরি। ঐখোয়গী সরকারনা গোৱা অসি ইন্তর্নেস্নেল কনফরেন্সশিং, মীফমশিং অমসুং সম্মিৎশিংগী মরু ওইবা সেন্তরসু ওইহল্লি। 2016দা ঐখোয়না গোৱাদা BRICS কনফরেন্স পাঙথোখখি। গোৱাদা G-20গা মরী লৈনবা মরু ওইবা মীফম কয়া পাঙথোকখি। মালেমগী তুরিজমগী সস্তেনেবল গ্রোথ, তুরিজমগী গোৱা রোদমেপ অসি G-20 লৈবাকশিংনা অমত্তা ওইনা য়ান্নখিবদা ঐহাক্না নুংঙাইবা পোকই। মসি গোৱা খক্তগী নত্তনা ভারতকী তুরিজমগীদমক চাউথোকচনীংঙাই ওইবা ৱাফমনি।
মরুপশিং,
লম অমা হেক্তা ওইরবসু, শীংনবা অমা হেক্তা ওইরবসু ঐখোয়না ফীভম খুদিংমক্তা ঐখোয়গি অঙম্বা থাক্তা হোৎনগনি। ঐখোয়না খুদোংচাবা মাংহল্লোই। মসিগী ৱাফম অসিগা লোয়ননা ঐহাক্না 37শুবা নেস্নেল গেম্স হৌরে হায়না লাউথোক্লি। শান্নরোয় পুম্নমক্তা ঐহাক্না য়াইফ-মঙ্গোল পীজরি। গোৱা শেম শাদুনা লৈরে! হন্না-হন্না থাগৎচরি।
