“ভারতকী লেবর ফোর্সনা অমৃত কালদা চাউখৎপা জাতি অমা ওইহন্নবা ভারতকী মঙলানশিং অমসুং অনীংবশিং থুংহন্নবা অচৌবা থৌদাং অমা লৌখি”
“ভারতপু খ্বাইদগী খুমাং য়াংনা চাউশিল্লিবা লৈবাকশিংগী মরক্তা অমা অমুক হন্না ওইবা ঙমহনখিবগী মনা ঐখোয়গী শিন্মীশিংদা পীফম থোকই”“হৌখিবা চহি নিপান অসিদা সরকারনা মীখা পোল্লিঙৈ মতমদা লৈরম্বা অমসুং মীখা পোনবগী ৱাখল্লোনগী মমি তাবা আইনশিং মুত্থৎনবা থৌরাংসু পাইখৎখি”“অমৃত কালদা লেবর মন্ত্রালয়না ইং কুমজা ২০৪৭কী মাগী বিজন শেম-শারি”“তুংলমচৎকীদমক ফ্লেক্সিবল ৱার্কপ্লেসশিং, ৱার্ক-ফ্রোম-হোম ইকোসিস্তেম অমা অমসুং ফ্লেক্সিবল ৱার্ক আৱরশিং মথৌ তাই”“ঐখোয়না ফ্লেক্সিবল ৱার্কপ্লেসশিংগুম্বা সিস্তেমশিং অসি নুপীগী লেবর ফোর্সনা শরুক য়ানবগীদমক খুদোংচাবশিং ওইনা শীজিন্নবা য়াগনি”“বিল্দিং অমসুং কন্সত্রক্সন ৱার্করশিংগীদমক ‘সেস’ মপুং ফানা শীজিন্নবা মথৌ তাই। লুপা করোর ৩৮,০০০ হেন্না রাজ্যশিংনা শীজিন্নদনা লৈরি”খুরুমজরি,
চান্দিগরগী এদমিনিস্ত্রেতর শ্রী বনৱারী লাল পুরোহিদজী, কেন্দ্রগী মন্ত্রী মন্দলগী ঐহাক্কী মরুপ শ্রী ভুপেন্দ্র য়াদবজী, শ্রী রামেশ্বর তেলীজী, রাজ্য পুম্নমক্কী ইকাই খুম্নরবা লেবর মন্ত্রীশিং, লেবর সেক্রেতরীশিং, অতোপ্পা দিগনিতরীশিং, নু্পী অমদি নুপাশিং ঐহাক্না অহানবদা ভগৱান তিরুপতি বালাজীগী খুয়া খাদা খুরুমজরি। ময়াম্না তিনবীরিবা শেংলবা লমদম অসিদা ভারতকী শিন্মী অমসুং পাঙ্গল অদু উবা ফংলি। কনফরেন্স অসিদগী ফংলকপা লৌশিং অদুনা লৈবাক অসিগী লেবর ফোর্স মপাঙ্গল কনখৎহনগনি হায়না ঐহাক্না থাজৈ। ঐহাক্না ময়াম পুম্নমক মরু ওইনা লেবর মন্ত্রালয়বু থৌরম অসি শিনবীবগীদমক থাগৎপা ফোঙদোকচরি।
মরুপশিং,
হন্দক্কী ওগস্ত ১৫দা লৈবাক অসিনা নীংতম্লকপা চহি ৭৫ মপুং ফাখ্রে অমসুং নীংতম্বা ফংবগী অমৃত কালগী মাইকৈদা চংশিল্লক্লি। ভারতকী লেবর ফোর্সনা অমৃত কালদা চাউখৎপা জাতি অমা ওইহন্নবা ভারতকী মঙলানশিং অমসুং অনীংবশিং থুংহন্নবা অচৌবা থৌদাং অমা লৌখি। ৱাখল্লোন অসিগা লোয়ননা লৈবাক অসিনা ওর্গনাইজ অমসুং অনওর্গনাইজ সেক্তরগী শিন্মী করোর কয়াগীদমক লেপ্পা লৈতনা থবক পাইখৎলি।
প্রধান মন্ত্রী শ্রম-য়োগী মানধন য়োজনা, প্রধান মন্ত্রী সুরক্ষা বীমা য়োজনা, প্রধান মন্ত্রী জীবন জ্যোরি বীমা য়োজনা অসিগুম্বা খোঙথাং কয়ানা শিন্মীশিংদা সেক্যুরিতী কবর মখল অমা ফংহল্লিবা। অসিগুম্বা স্কিমশিং অসিনা মরম ওইরগা অনওর্গনাইজ সেক্তরদা লৈরিবা শিন্মীশিংগী ৱাখল্লোন্দা লৈবাক অসিনা মখোয়না শুরিবা থবক অসি হন্থবা লৈতনা ইকাই খুম্নরি হায়বা ইথিল অমা ফাওহল্লি। ঐখোয়না কেন্দ্র অমসুং রাজ্যগী অসিগুম্বা খোঙথাং পুম্নমক পুনশিন্নদুনা য়াম্না চেকশিনবগা লোয়ননা শিন্মীশিংদা মখোয়গী ফংফম থোকপা কান্নবা অদু ফংহন্নবা হোৎনগদবনি।
মরুপশিং,
কোরোনাগী মতমদসু ঐখোয়গী শেন্মীৎলোন্দা লৈবাক্কী অসিগুম্বা খোঙথাংশিংনা পীখিবা কান্নবা অদু উবা ফংখি। মসিনা মরম ওইদুনা ‘ইমর্জেন্সী ক্রেদিত গরেন্তী স্কিম’না অপীকপা ইন্দস্ত্রী লাখ কয়াগী মতেং পাংখি। স্তদী অমগী মতুং ইন্না স্কিমনা লাইচৎ মনুংদা থবক করোর ১.৫ মাংহনদবা ঙমখি। কোরোনাগী মতম অসিদা ই.পি.এফ.ও.না কর্মচারীশিংদা চাউনা মতেং পাংখি, কর্মচারীশিংদা এদভান্স ওইনা লুপা করোর লিশিং কয়া পীখি। অমসুং মরুপশিং ঙসি লৈবাক অসিনা মাগী শিন্মীশিংবু মখোয়না অৱাবা তাবা মতমদা মতেং পাংখিবা অদুগুম্না শিন্মীশিংনা লাইচৎ অসিদগী রিকবর তৌনবা মখোয়গী অঙম্বা পাঙ্গল পুথোকখিবা ঐখোয়না উবা ফংখি। ঙসি ভারতনা মালেমগী খ্বাইদগী খুমাং য়াংনা চাউশিল্লিবা ইকনোমী অমুক হন্না ওইবা ঙমখি, মসিগী মনা ঐখোয়গী শিন্মীশিংদা পীফম থোকই।
মরুপশিং,
লৈবাক্কী শিন্মী খুদিংমকপু সোসিএল সেক্যুরিতী ফংহন্নবা করম্না থবক পাইখৎবগে হায়বগী খুদম ‘ই-শ্রম পোর্তেল’ অসি অমনি। পোর্তেল অসি অনওর্গনাইজ সেক্তরদা লৈরিবা শিন্মীশিংগীদমক আধারগা লিঙ্ক তৌবা নেস্নেল দেতাবেজ অমা শেম্নবা মমাং চহিদা লোঞ্চ তৌখি। শুপ্নগী চহি অমা খক্তদা মফম ৪০০দগী শিন্মী করোর ২৮না পোর্তেল অসিদা রেজিস্তর তৌখি অসিদা ঐহাক্না নুংঙাইবা ফাওই। মরু ওইনা কনস্ত্রক্সন ৱার্করশিং, মাইগ্রেন্ত শিন্মীশিং অমসুং দোমেস্তিক ৱার্করশিংনা মসিগী কান্নবা ফংখি। মীওইশিং অসিনা হৌজিক য়ুনিভর্সেল একাউন্ত নম্বরগুম্বা ফেসিলিতীশিংগী কান্নবসু ফংলি। শিন্মীশিংগী মরক্তা থবক্কী খুদোংচাবশিং হেনগৎহন্নবগীদমক ‘ই-শ্রম পোর্তেল’ অসি নেস্নেল কেরিয়র সর্ভিস, অসীম পোর্তেল অমসুং উধ্যম পোর্তেলগসু লিঙ্ক তৌহনখি।
কনফরেন্স অসিদা শরুক য়ারিবা পুম্নমক্তা ঐহাক্না হায়জনীংবদি নেস্নেল পোর্তেলশিংগা ইন্তিগ্রেৎ তৌবগা লোয়ননা স্তেৎ পোর্তেলশিংবু ইন্তিগ্রেৎ তৌসি। মসিনা লৈবাক অসিগী শিন্মী পুম্নমক্কীদমক অনৌবা খুদোংচাবশিং ফংহনগনি, রাজ্য পুম্নমক্না লৈবাক অসিগী লেবর ফোর্সকী কান্নবা হেন্না ফংলগনি।
মরুপশিং,
ব্রিতিশকী মতমদগী লৈরক্লবা ঐখোয়গী লৈবাক্তা লেবর লো কয়া য়াম্না লৈরম্বগে হায়বা য়াম্না মুন্না খঙলবা ৱাফমনি। হৌখিবা চহি নিপান অসিদা সরকারনা মীখা পোনবগী ৱাখল্লোনগী মমি তাহল্লিবা মীখা পোল্লিঙৈ মতমদা লৈরম্বা আইনশিং মুত্থৎনবা থৌরাংসু পাইখৎখি। লৈবাক অসিনা হৌজিক অসিগুম্বা লেবর লোশিং অসি হোংদোক্লি, রিফোর্ম তৌরি অমসুং লায়থোকহল্লি। ৱাখল্লোন অসিগা লোয়ননা লেবর লো ২৯ অসি অচম্বা লেবর কোদ ৪দা ওন্থোকখি। মসিনা মিনিমম ৱেজেস, জোব সেক্যুরিতী, সোসিএল সেক্যুরিতী অমসুং হেল্থ সেক্যুরিতীগী থিংদা শিন্মীশিংবু শক্তী পীবা ঙম্লগনি। ইন্তর-স্তেৎ মাইগ্রেন্ত লেবর হায়বগী ৱাহন্থোক অসিসু অনৌবা লেবর কোদশিংদা ফগৎহনখি। ঐখোয়গী মাইগ্রেন্ত লেবর ইচিল-ইনাওশিংনা ‘ৱান নেসন, ৱান রাসন কার্দ’ অসিগুম্বা স্কিমদগী চাউনা কান্নবা ফংলি।
মরুপশিং,
ঐখোয়না ৱাফম অমগা নীংশিংবা মথৌ তাই। মালেম অসি লেপ্পা লৈতনা হোংলক্লি। করিগুম্বা ঐখোয়না ইশাবু থুনমক শেম-শাজহৌদ্রবদি শোত্থহৌবা য়াবগী অকিবা লৈ। ভারত অসি অহানবা, অনিশুবা অমসুং অহুমশুবা ইন্দস্ত্রিএল রিভোল্যুনশিংদা শোত্থনা লৈহৌখি। হৌজিক মরিশুবা ইন্দস্ত্রিএল রিভোল্যুসনগী মতম অসিদা ভারতনা ৱারেপ থুনা লৌদুনা অমদি মখোয়বু খোঙজেল য়াংনা থবক ওইনা ওন্থোক্তুনা মরিশুবা ইন্দস্ত্রিএল রিভোল্যুসনগী কান্নবা মপুং ফানা লৌবগী মথৌ তাই। মতমগা অহোংবগা লোয়ননা থবক্কী মওং মতৌশিংদসু অহোংবা উবা ফংলি।
ঙসি মালেম অসিনা দিজিতেল ইরাদা চংলক্লি, মালেম পুম্বগী ফীভমদা অহোংবা লাক্লি। ঙসি গিগ অমসুং প্লেৎফোর্ম ইকনোমীগী মওংদা থবক্কী অনৌবা দাইমেন্সনশিং ঐখোয়না উবা ফংলি। ওনলাইন শোপ্পিং, ওনলাইন হেল্থ সর্ভিসেস, ওনলাইন তেক্সি অমসুং ফুদ দেলিবরী ওইরবসু মসি ঙসিগী অর্বান লাইফকী শরুক অমা ওইরক্লি। নহারোল কয়ানা সর্ভিসশিং অসি চল্লাইরি, অনৌবা মার্কেৎ অসি চল্লাইরি। অনৌবা ওইথোকপা য়াবশিং অসিগী ঐখোয়গী অচুম্বা পোলিসী অমসুং অচুম্বা খোঙথাংশিংনা লম অসিদা ভারতপু গ্লোবেল লীদর অমা ওইহন্নবা হোৎনবদা মতেং পাংলগনি।
মরুপশিং,
লৈবাক অসিগী লেবর মন্ত্রালয়না অমৃত কালদা ইং কুমজা ২০৪৭কী মাগী বিজন অদুগীদমক শেম-শারি। তুংলমচৎতা ফ্লেক্সিবল ৱার্কপ্লেসশিং, ৱার্ক-ফ্রোম-হোম ইকোসিস্তেম অমা অমসুং ফ্লেক্সিবল ৱার্ক আৱরশিং মথৌ তাই। ঐখোয়না ফ্লেক্সিবল ৱার্কপ্লেসশিংগুম্বা সিস্তেমশিং অসি নুপীগী লেবর ফোর্সনা শরুক য়ানবগীদমক খুদোংচাবশিং ওইনা শীজিন্নবা য়াগনি।
হন্দক্কী ওগস্ত ১৫দা লাল কিলাগী লানবন্দগী জাতিদা ৱা ঙাংখিবা ঐহাক্না জাতিগী নারী শক্তি মপুং ফানা শরুক য়ানবা অপাম্বা ফোঙদোকখি । নুপীগী শক্তি অসি চুম্না শীজিন্নদুনা ভারতনা মাগী পান্দমশিং থুংনা ফংবা ঙমগনি। লৈবাক অসিদা নৌনা থোরক্লিবা সেক্তরশিংদা নুপীশিংনা করি তৌবা য়াবগে হায়বগী মাইকৈদা খন্নবা মথৌ তাই।
মরুপশিং,
২১শুবা চহিচাদা ভারতকী মাইপাকপা হায়বা অসি মসি করম্না শীজিন্নবগে হায়বগী মখা পোনগনি। ঐখোয়না ক্বালিতী য়াম্না লৈবা স্কিল ৱার্কফোর্স অমা শেমদুনা মালেমগী খুদোংচাবশিংগী কান্নবা লৌগদবনি। ভারতনা মালেমগী লৈবাক কয়াগা মাইগ্রেসন অমসুং মোবিলিতী পার্তনরশিপ এগ্রীমেন্তশিং খুৎয়েক পীনরি। লৈবাক অসিগী রাজ্য পুম্নমক্না খুদোংচাবশিং অসিগী কান্নবা লৌহৌনবা ঐখোয়গী খোঙথাংশিং হেনগৎহনবা তাই, অমনা অমদগী তমশিনবা তাই।
মরুপশিং,
ঙসি ঐখোয়না অসিগুম্বা অচৌবা থৌরম অমদা পুল্লিবা তানফম অসিদা ঐহাক্না রাজ্য পুম্নমক্তা অমসুং নখোয় পুম্নমক্তা ৱাফম অমা হায়জনীংই। ঐখোয়গী বিল্দিং অমসুং কনস্ত্রক্সন ৱার্করশিংনা ঐখোয়গী ৱার্কফোর্সকী মরু ওইবা শরুক অমনি হায়বা ৱাফম অসি মীপুম খুদিংমক্তা খঙহল্লে মখোয়গীদমক শেমখিবা ‘সেস’ অসিগী কান্নবা মপুং ফানা লৌবা তঙাই ফদে।
সেস অসিগী মনুংদা লুপা করোর ৩৮,০০০রোমদি রাজ্যশিংনা শীজিন্নদনা লৈরি হায়না ঐঙোন্দা খঙহল্লক্লি। ঐখোয় খুদিংমক্তা ই.এস.আই.সি.না আয়ুশ্মান ভারত স্কিমগা লোয়ননা করম্না শিন্মী কয়া-কয়াদা করম্না কান্নবা পীবগে হায়বা অসি খঙনবা হোৎনবীয়ু।
মীপুম খুদিংমক্তা ঐখোয়গী অপুনবা খোঙথাংশিংনা লৈবাক অসিগী অশেংবা মতিক-ময়াই পুথোকপদা মরু ওইবা থৌদাং লৌগনি হায়না ঐহাক্না থাজবা থম্মি। থাজবা অসিগা লোয়ননা ঐহাক্না ময়ামবু থাগৎচরি! অমসুং নুমিৎ নিনিগী খন্ন-নৈনবা অসিনা লৈবাক অসিগী লেবর ফোর্সবু অনৌবা ফিরেপ, অনৌবা থৌনাগা লোয়ননা মপাঙ্গল কনখৎহনগনি হায়না ঐহাক্না থাজৈ।
হন্না-হন্না থাগৎচরি!
