“Entire nation is grieving the loss of lives after the tragedy in Morbi”
“Today, Banaskanta is writing its own chapter in the history of development”“Every work that enhances the pride of the nation and Gujarat, is the commitment of the double engine government”নমস্কার!
ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
ঙসি অসি সর্দার সাহিবকী মপোক কুমওন্নি। সর্দার সাহেবনা অমর ওইরসনু হায়না অদোম্না অমুক্কা হন্না হায়বীয়ু। বনস্কন্থাগী ঐহাক্কী নুংশিরবা ইচিল ইনাওশিং, ঙসিদি গুজরাতনা অৱাবা মতম মাইয়োক্নরি। লৈবাক মীয়ামসু য়াম্না নুংঙাইনদে। ঙরাং নুমিদাংদা মোর্বীদা এক্সিদেন্ত থোকখি। ঐখোয়গী অঙাং কয়াগা লোয়ননা মীয়াম কয়াগী পুন্সি মাঙখি। অসিগুম্বা অৱাবা মতমসিদা মখোয়গী ইমুংগী অৱাবদা ঐখোয়না শরুক য়ারি। ভুপেন্দ্র ভাই অমসুং মহাক্কী সরকারগী তীম্না পাংফম থোকপা মতেং খুদিংমক পাংলি। মহাক্না ঙরাং নুমিদাং কেবারিয়াদগী মোর্বী তম্না হকথেংননা চৎখি অমসুং তেংবাংবগী থবকশিং লুচিংদুনা শেন্নখি। নুমিদাং পুম্বদা অমসুং ঙসি অয়ুকসু ঐহাক্না মহাক্কা তত্তনা পাউ ফাওনরি। খুদোংথীবা থৌদোক অসি নংলিবা মীওইশিংগী অৱাবা করম্না হন্থহনগদগে হায়বগী মতাংদা তোঙানবা বিয়াভগ, মন্ত্রী অমসুং অতোপ্পা ওথোরিতীশিংনা পুন্না হোৎনমিন্নরি। এন.দি.আর.এফ.কী য়ুনিৎ অমসু ঙরাং মোর্বীদা থুংখ্রে। আর্মী অমসুং এয়রফোর্সকী মীওইশিংসু তেংবাং অমসুং পুন্সি কনবগী থবকশিংদা হৌজিক তেংবাংলি। হৌজিক নংলিবা খুদোংথীবা অসিগা মরী লৈননা সরকারগী মাইকৈদা পায়খৎফম থোকপা থবক অমত্তা চিত্থদনা পাংথোক্লি অমসুং পাংথোক্কনি হায়বগী ঐহাক্না বনস্কন্থা অমসুং গুজরাত লমদমগী মীওই খুদিংদা থাজবা পীরি।
ঙরাং মোর্বীদা থোকখিবা শাথীবা থৌদোক অসিনা ঐহাক্কী ৱাখল য়াম্না ৱাহল্লে। চাউখৎ থৌরাংগী থবকশিং অমসুং বনস্কন্থাগী ঈশিংগী মরু ওইবগী মতাংদা ঐহাক্না নীংথিনা খঙই, অদু ওইরবসু, তাঞ্জা অসিদা থৌরম অসি মফমসিদা মখা তানা পাংথোকখিসিরা নত্ত্রগা তোক্লসিরা হায়না খঞ্জান্নরম্মি। অদুবু, অদোম্না ঐহাকপু নুংশিবা অমসুং ঐহাক্না অদোম্বু নুংশিবা অমদি ইশাগী থৌদাংদা খোঙফম চেৎপা ঐহাক্কী সংস্কারনা ঐহাক্কী পুক্নিং থৌগৎহন্দুনা অদোমগী মরক্তা হৌজিক লাক্লিবসিনি। ঐহাক্না বনস্কন্থা অমসুং অৱাং গুজরাত অপুনবগীদমক্তা লুপা করোর লিশিং ৮গী ঈশিংগী প্রোজেক্ত অমা থৌরম অমখক্তদা পুরক্লবনি। প্রোজেক্তশিং অসিনা ঐখোয়গী বনাসকান্থা, পাতন জিলা অমসুং মহেসানাগী চাউরাকপা জিলা ৬কী লিশিং অমা হেনবা খুঙ্গং অমদি হেক্ত্যার লাখ ২গী লমদা ইথৈ লৌথোংগী খুদোংচাবশিংদা মতেং পাংলগনি। ঐখোয়গী গুজরাত মীয়াম্না খুদোংচাদবা মরক্তা চাউরকপনি। চহি ১০দা চহি ৭ ইকং থোকপগী ফিভম মাইয়োক্নরক্লবনি, শাথীবা য়ুহা হাবগী ফিভম মাইয়োক্নরক্লবনি, অদুবু, গুজরাতকী মীয়ামগী মুৎনাইদ্রবা থৌনা-লিংজেলনা মখোয়দা লৈরিবা রিসোর্স অমা হেক্তনা অৱাবা অমা হেক্তবু মায়োক্নবগী শক্তি পীরি। মখোয়না কৈদৌনুংদা তুমিন্না খক লৈথোক্তে। লেপ্পা লৈতনা হোৎনৈ অমসুং পান্দম ফংনবা হোৎনফম খুদিং হোৎনরি, মসিদা ঐখোয়গী বনাসকন্থানা অহিংবা খুদম ওইরি। চহি ২০-২৫গী মমাংগী ৱারী শারুরবদি, বনাসকন্থা অমসুং অকোয়বা লমদমগী মতমদুদা ওইরম্বা ফিভমগা হৌজিক্কী চাউখৎ থৌরাংগা চাংদম্নবা মতমদা অচৌবা অহোংবা অমা উবা ফংলবনি। ঐখোয় পুন্না অমত্তা ওইনা হোৎনমিন্নরবদি, মশক থোকপা অমসুং চাউরবা মায় পাকপা অমা ফংবসিদি শোইদ্রবনি।
কৎচকী মরুভুমীনা নাকল অমদা অমসুং মফমসিদা ফেব্রুৱারী হেক লোইবগা লৈঙোই উফুল পাইবা হৌরকপনা নাকল অমদা লৈরিবনি। নোং তাবা ঙাইদুনা লৈ, মরকসিদা থেংনরিবা নুংশাগী মৈশাদি খাঙম্মদবা মতৌনি। মৈ, ঈশিংগী অৱাবা কয়ানি, অদুগা নোং খরা তারে হায়রবসু, থা অমা অনি অদুম হৌজিনখিবনি। অৱাং গুজরাত অসিদা ঈশিং ফংলে হায়রবসু, ফ্লোরাইদ য়াওবা ঈশিং ফংই, মদুগুম্বা ঈশিং থক্লুবা মতমদা করি থোকই হায়বদি অদোমসু খঙলবনি। অৱাং গুজরাতকী মীপুম খুদিংগী য়াগী মচুসি হঙ্গাম্পান ওইবনি, অদোম অমুক্তা য়েংশিনবীয়ু। পোকপদগী হঙ্গাম্পান মচুগী য়াগা লোয়নরকপা মানবনি। শরু শয়াং মপাঙ্গল হন্থরকই। নহা ওইনা হনুশনবগী ফিভম্নি। মসিগুম্বা ঈশিং অসিনা লৌমীশিংগী পুন্সিদসু খুদোংচাদবা অমুক পীরিবনি, ফিভম অসি মসিমক্নি। কনাগুম্বা অমনা মফমসিদা লম য়োনগে থোক্লক্লবসু, লৈবীনবা অমুক ফংদে। বোর্ৱেল তৌ-তৌদুনা ঈশিং চিংনবা হোৎনদুনা লাকখিবা মতমশিংনি। মৈ য়ৌরকপা ঙাই-ঙাইদুনা ইহৌ হৌনখিবনি, মোদীগী মীতম শাদুনা মৈ থাদোক্নখিবনি। মতমদুদগী হৌনা মীয়াম্না থাজবা থাদোকখিবদগী ঐখোয়না হৌজিক্কী থবকশিং পায়খৎলিবনি। অদুবু, অদোমগী সেবক ওইদুনা, মরুপ ওইদুনা অদোমগী খুদোংচাদবা কয়া খঙদুনা থম্মোই শেংনা থবক তৌরকপা মতমদা, অরুবা পান্দম ফাওবা ঐখোয়না ফংবা ঙম্লে। চহি ২০গী মমাংদা ঐহাক্না অদোম্বু মুখ্য মন্ত্রী ওইনা সেবা তৌনবা ঐহাক্কী ইফমদা থৌদাং শিন্নখি, মতমদুদগী ঐখোয়না শিংনবশিংগী মরা খঙখ্রে, ঈশিং কনবগী হীরমদা ঐখোয়না অহেনবা মিৎয়েং চঙখি। অদুগা অতোপ্পা ৱাফম অমনা, ঐখোয়না লৈনুংদগী ঈশিং লেপ্তনা চিংথোক্তুনা লৈগদরা নত্ত্রগা বোরর্ৱেলশিংবু হেন্না লুথনা তৌথোক্তুনা লৈগদরা? অদুনা ঐহাক্না ঈশিংগী হীরমদা মায় ওন্সিনখিবনি। পাঙ্গল পুম্নমক থাদখি। নোংগী ঈশিং সমুদ্রদা চেন্থখিদনবা, ঐহাক্না চেক দামগী খুত্থাংদগী পুখ্রিশিংগী লুবগী চাং হেনগৎহনখি, মসি ঐখোয়গী সুজলম সুফলম স্কিম্নি।
লমদমসিদা ঐখোয়না সুজলম সুফলম স্কিম হৌদোকখিবা মতমদা, মতমদুগী কংগ্রেসনা মফমসিদা মতৌ অসুম্না ঈশিং য়ৌরক্কনি হায়বা পুন্সিদা খল্লুদ্রবনি হায়খিবা ঐহাক্না নিংশিংলি। লৌরোক অনিরক থাবা য়াগনি, মসিগুম্বা নুংঙাইবা পুন্সি লাক্কনি হায়বা থাজরুদ্রবনি। কংগ্রেসকী মীওইশিংনা ঐহাক্কী ইফমদা অসুম্না হায়রকখিবনি। ঐখোয়না বাসমো য়োজনা শেমখি, খুঙ্গংশিংদা ঈশিংগী কম্মিতী শেমখি, মসিদসু ঐখোয়না মরু ওইবা থবকশিং নুপীশিংদা শিন্নখি। হোৎনজমন কয়াসিগী মহৈ ওইনা, বানস্কন্থা ওইরো, অৱাং গুজরাত ওইরো, নত্ত্রগা কৎচ ওইরো, ঐখোয়না খৌরাংনা ঙাইরকখিবা ঈশিং ফংবা হৌরকখি, ইথৈ লৌখোংগী থবকশিংদা ঈশিংশিং নীংথিজনা শিজিন্নখি, অদুগা পর দ্রোপ মোর ক্রোপকী মন্ত্রগা লোয়ননা তুরিজম অমসুং অতোপ্পা সেক্তর কয়াদা মশক থোকপা থবক পাংথোকপা ঙমখি। ঐখোয় বনাস দেবী অমসুং মেগা ৱাত ১০০গী অলত্রা মেগা সোলর পাৱর প্লান্তসু লৈরি। ঋশিকেশজীনা হৌজিক্তসু হায়বীখ্রে, য়ুম্থোং খুদিংদা তোতি ঈশিং ফংলকপদগী লাইনা কয়াদগী কনবা ঙম্লে, শরুগী লাইনা কয়াদগী ঙাকথোকপা ঙম্লে। থবকশিং অসিদা বানস্কন্থানা তেংবাংখিবা অসিগীদমক্তা ঐহাক্না ঙসিগী থৌরমগী খুদোংচাবা লৌদুনা ইকোক নোন্দুনা ইকায় খুম্নবা উৎচরি।
ঐহাক্না চহি ১৭-১৮গী মমাংদা মফমসিগী মুখ্য মন্ত্রী ওইরিঙৈদা, লমদমসিগী লুচিংবশিংগা ফম্মিন্নদুনা ৱারী ৱাতাই শান্নখিবশিং ঙসি মফমসিদা লৈরিবা মীয়াম্না শোইদনা নিংশিংলমগনি। মফমসিগী লৌশিংনা পুখ্রিগুম্না ঈশিংনা থন্দুনা লৈরিবা অসি হোংদোক্তুনা, দ্রিপ ইরিগেসন স্কিম ওইনা শিজিন্নসি হায়না ঐহাক্না ৱাহৌদোক থমখিবনি। মখোয়না ঐহাক্কী ৱারোল তারগা ঐহাক্না লৌউবগী মতাংদা করি খঙবজাৎনো খন্নরম্মমিবনি। চা য়োনবা নুপাসিনা লৌউবগী মরমদা করি খঙলদনা হায়নরম্মিবনি। অদুবু, ঐহাক্না মখোয়গী মতুং ইন্নদুনতা লৈখি, মদুদা অহলশিংনা ঐহাক্কী ৱা লৌবীবদা ঐহাক্না য়াম্না নুংঙাইজখি। অদুনা, বানস্কন্থানা হৌজিক্তি দ্রিপ ইরিগেসনগী হীরমদা লৈবাক শিংবা থুংবদা মায় পাক্লে, মমিং লৈরে। অচুম্বগী লম্বীনা কয়া য়াম্না ফবগে হায়বগী মসিনা অহিংবা খুদম্নি। ঐখোয়গী হোৎনজমনশিংবু মালেমগী ইন্সতিত্যুসন কয়ানা মনা পীরক্লে, ঙসিদি সেক্তর অসিনা চাউখৎ থৌরাংগী অনৌবা ৱারী অমা ইরবনি। ঙসিদি, বানস্কন্থাগী হেক্ত্যা লাখ ৪গী লমদা দ্রিপ ইরিগেসনগী থবক পায়খৎলি, মসিনা মরম ওইরগা ঐখোয়গী লমদমসিগী ঈশিংগী থাক হন্থবদগী কনবা ঙম্লে, ঐখোয় ইশানা ইশাগী পুন্সি কল্লে, মসিদা নত্তনা, তুংগী হৌরক্কদৌরিবা অঙাংশিংগী পুন্সি কনবগী য়াইফরবা থবকসু পাংথোকপা ঙম্লে। মরম অদুনা, বানস্কন্থা, পাতন, মেহসানা ওইরো, পুম্নমকপু ইকায় খুম্ননীংই। মতমদুগী রাজস্থানগী মুখ্য মন্ত্রী, হৌজিকসু মহাক্না সি.এম. ওইরি, মহাক্না ঐহাক্কী ইফমদা চিথী ইদুনা সুজলম সুফলম স্কিমগী মতাংদা য়ানীংদবা ফোংদোক্লকখিবনি। অদোম্না থবক অসি পাংথোকপদা মহাক্না মতম খরগী মমাংদা মহাক্কী লমদমসু লাকপীনবা হায়রকখ্রবনি। ভাই, বানস্কন্থাদি ঈশিংগী শিংনবা মাইয়োক্নরি, অদুনা অদোম্না য়ানীংদবা অদুমক য়ানীংদনা লৈবীয়ু, ঐহাক্তি স্কিম অসি পাংথোক্কনি হায়না মতমদুদা ঐহাক্না হায়খিবনি। অদুগা ঐহাক্না থবক অসিসু পায়খৎখি। চহি ১৯-২০সিদা সুজলম সুফলম য়োজনাগী মখাদা কিলোমীতর কয়াগী রিচার্জ কেনেল শাখ্রে, লৈনুংগী ঈশিংগী থাকসু হেনগৎলকখি, ঈশিং কনবগী থবকসু লৈবনিনা ঐখোয়না পাইপ্লাইন শিজিন্নখি। পুখ্রি থলহন্নবা পাইপতগী ঈশিং পুখি। অদুগা হৌজিক্তি, খুঙ্গং ১০০০ হেনবগী পুখ্রি থলহন্নবা পাইপ্লাইন অনিসু শেম্লগনি। ঐখোয়গী মুক্তেস্বর দাম, কর্মাবা পুখ্রি অনিমক অসিবু পাইপ্লাইন্না অনিসিনা শম্নদুনা ঈশিং পীরগনি মরুপশিং। অৱাংবা মফমশিংদসু ঈশিংগী তঙাই ফদবা লৈ, মফমদুদসু ঐখোয়না মৈনা চলায়বা পম্প শিজিন্নদুনা ঈশিং চিংখৎলগনি অমসুং মফমশিং অসিগী মীপুম খুদিংদা ঈশিং য়ৌহল্লগনি মরুপশিং। কাংগ্রিজ, দিওধর তেহসিলগী মীয়ামগী শিংনবশিংসু লোইশিল্লগনি। ঐখোয়গী বাও, সুমিশ্রী খুঙ্গং অমসুং তেহসিল অসি অৱাংবা মফম ঙাক্তনি, মফমশিংদা কেনেল নেতৱর্ক য়ৌবদা ৱাগনি। সুই খুঙ্গংগী খুদোংচাদবশিংসু ঐখোয়না লোইশিল্লগনি, অমসুং ইমা নর্মদাগী মরু ওইবা ঈশিংগী কেনেল অমসুং দিস্ত্রিব্যুসন কেনেলগী নেতৱর্কসু শেম্লগনি, মসিনা মরম ওইরগা, সুই খুঙ্গংগী তেহসিল য়াওনা খুঙ্গং দজন কয়াসু ঈশিংনা থল্লগনি। ঐখোয়গী কাথ্রা, দন্তেৱারা পাইপ্লাইন, বাতন অমসুং বানস্কন্থাগী তেহসিল ৬সু কান্নবা য়াম্না ফংগনি।
মুক্তেস্বর দাম অমসুং কর্মাবা পুখ্রিদা ইমা নর্মদাগী ঈশিং লাক্কদৌরিবা মতমশিংদা য়ৌরগনি। মসিনা মরম ওইরগা, বানস্কন্থা, বর্গাম, খেরালু, পাতন, সিধপুর, মেহসানাগী মফমশিংদা ঈশিংগী খুদোংচাদবা হন্থনবদা য়াম্না তেংবাংলগনি। ঈশিংগী মরু ওইবসি করিনো হায়বা ঐহাক্কী গুজরাতকী মীওইনা নীংথিনা খঙই। ঐখোয়গী গুজরাত অমসুং রাজস্থানগী মীওইশিংনা মসি খঙই। ঐখোয়গী লমদমসিদদি, ঈশিং পীথকপা মতমদা অফবা থবক পাংথোক্লে হায়না খন্নৈ। মীয়ামগীদমক্তা ঈশিংগী চফু থম্বীবা মীওইশিংবু খুঙ্গং পুম্বনা সেবা তৌবা মীওইনি খন্নৈ। কনাগুম্বনা উখাদা ঈশিং চফু থম্বীবা অদুগা কনা অমনা নত্ত্রগা অমনা নুংতিগী ঈশিং হাপচিন্নবা মতমদা মসিগুম্বা ঈশিংগী চফু থম্বীরিবা মীওইশিংবু খুঙ্গংগী মীওইশিংনা মহাক্তি সেবাগী ৱাখল্লোন চেনবনি হায়নৈ। ঐখোয়না রুদ্রধামগী ৱারী তারে, অদুগা ঈশিংগী মতাংদা ৱারী শাবা মতমদা মসিগী মতাংদা খন্ন-নৈনৈ। লাপ্না চৎপগী করিবু মথৌ তারিবগে, ঐখোয়গী লাখা বঞ্জারাবু কনানা কাওগনি। অদুনা ঈশিংগী থবক পাংথোকপা মতম খুদিংদা, কনা অমত্তনা লাখা বঞ্জারাগী মীওইগী মশক উবা ফংলোই, খুঙ্গংনসু খঙলোই। মখোয়গী মমিং খক্তমক তাবনি, অদু ওইরবসু, মখোয়না ঈশিংগী স্তেপ অপীকপা অমা শারম্বদগী চহি কয়াগী মতুং ফাওবদা মখোয়বু কনানসু কাওদ্রিবনি। ঈশিং পীবা মীওইবু য়াম্না ফনা খন্নৈ। হায়রিবা লাখা বঞ্জারানা ঙসি মীখল লেপ্লবদি, মালেমগী পাঙ্গল অমত্তনা মখোয়বু মায়থীবা পীবা ঙম্লোই হায়না ঐহাক্তি থাজৈ। ঈশিং পুরকপা মীওইনা অমৃত পুরকই হায়রিবনি, মসিনি ঈশিংগী মপাঙ্গল। অমৃত পুরকপা মীওইদুনা খুন্নাই পুম্ববু চাংদম্নীংঙাই লৈতনা মায় পাকপা ওইহল্লি। ঈশিং অমসুং ঈশিংগী পাঙ্গলনা মথৌ তসেংনা পাংথোকপগুম্মি।
ইচিল ইনাওশিং,
ঈশিংনা মরম ওইরগা লৌউ-শিংউ অমসুং এনিমেল হসবেন্দরীগী অনৌবা ওইথোকপা য়াবশিং লৈরে। উহৈ অমসুং মনা-মশিংগা মরী লৈনবা ফুদ প্রোসেসিং তৌবগী থবকসু মশিং য়াম্না হেনগৎলে। ঐহাক্না মতম খরগী মমাংদা অদোমগী বনাস দাইরীদা লাক্লম্মি, মফমদুদা অলু প্রোসেসিং তৌবগী থবক য়াম্না পাক চাউনা হৌখ্রে। সরকারনা হৌজিক্তি ফুদ প্রোসেসিংদা চাউনা মতেং পাংলি। ফুদ প্রোসেসিংগী মনুং চল্লিবা সখি মন্দল, কিসান উদ্যোগ সঙ্ঘ, অমদি ভেল্যু এদিসন তৌবগী হীরমদা ঐখোয়না নীংথিনা তেংবাংলি। কোল্দ স্তোরেজ শাবা নত্ত্রগা ফুদ প্রোসেসিং প্লান্ত লিংখৎপা ওইরো, ভারত সরকারনা পীকপদগী পীকপা লুপশিংদা তেংবাংদুনা মখোয়গী পাঙ্গল হেনগৎহল্লি। দাইরীগী খুত্থাংদা পীক্না শা-শন লোইবশিংগী শরুক য়াবগী চাং হেনগৎলক্লিবা অসিগুম্বা উহৈ অমসুং মনা-মশিং থাবা লৌমীশিংগী মপাঙ্গল হেনগৎহনবদসু ঐখোয়না তেংবাংলি। কফোই জুসকী ফেক্তরীশিংদসু লৌমীশিংগী হোৎনজমনগী শরুক য়াওরি। সখি মন্দলনা থবক তৌবা মতমদা মখোয়না কান্নবসু ফংলি। অচারশিং, মুরব্বা অমসুং চৎনীশিংগী প্রদক্ত কয়া য়ুম-য়ুমশিংদা শান্নরি, মখোয়শিংসিবু লেবেলিং তৌদুনা কৈথেলদা য়োনবা হৌরে। ইন্দস্ত্রী অমা ওইনা চাউখৎপা ঙম্নবা খুঙ্গংগী নুপীশিংগী লুপশিংদা সরকারনা লোন পীরিবা অসিগী শেনফমসু শরুক অনি হেনগৎহনখ্রে। ইচে-ইচলশিংনা থবক তৌদুনা মখুত্তা শেল লাকপা মতমদা মখোয়না থবক তৌবগী চাংসু শরুক অনি হেনগৎলক্কনি। মসিদা নত্তনা, ঐখোয়গী ত্রাইবেল মফমশিংদসু ঐখোয়না বন ধন কেন্দ্র হাংদোক্তুনা উমংগী পোত্থোকশিংগা মরী লৈননা ইচেল ইচলশিংদা থবক পীদুনা মখয়গী শেন্থোক লৈহল্লি। মখোয়গী পোত্থোকশিং অফবা মমল ফংহল্লি।
লৌমী ইচিল ইনাও কয়ানা ঐহাক্কী ইফমদা চিথী কয়া ইরকই। ঐখোয়গী অৱাং গুজরাতকী লৌমী হায়রগদি লম বিধা অনি নত্ত্রগা অনি মখায় খক্ত লৈবশিংবু খঙনৈ, মখোয়দি বেঙ্কতগী লোনসু লৌদে, অদুনা পি.এম. সম্মান নিধীদগী চহিদা লুপা লিশিং ২-২ ফংবদুনা মখোয়গী লৌউবদা য়াম্না মতেং পাংলি। হায়রিবা থবকসিদা শেঞ্জা থুমজা তৌবগী থৌওংসু অমত্তা লৈতে। দিল্লীদগী বত্তন অমা নম্বগা লৌমীশিংগী মফমদা শেল য়ৌরকপনি। ঐখোয়না লৌমী মরুপশিংগীদমক্তা থবক অমা পায়খৎলে। ঐখোয়গী লৌমীশিংনা হারগী কান্নবা ফংনবগীদমক্তা ঐখোয়না মশক থোকপা থবক অমা হৌদোক্লে। য়ুরিয়া নত্ত্রগা অতোপ্পা হার কয়াগী তোঙানবা মমিং লৈনরিবা অমসুং মমল ৱাংবদগী লৌমীশিংনা থেংনরিবা চমম্নবা কয়াদগী কোক্লগনি অমসুং পুম্নমকশিং ‘ভারত’ হায়বা মমিং অমখক লৈরগনি। ‘ভারত’ মমিং হায়বদি, নম্থাক তৌবা অমসুং মরক্তা শেল চাবা য়াররোই হায়বনি। লৈবাক অসিনা মীরমদগী য়ুরিয়া পুশিল্লক্লিবা অসিদা বেগ অমদা লুপা ২০০০ হেন্না পী। কোরোনা অমসুং লান লৈবনা মরম ওইরগা বোরা অমদা লুপা লিশিং ২ হেন্না পীদুনা মীরমদগী লৈরিবা য়ুরিয়া অসিদা লৌমীশিংনা অৱাবা থেংনহন্দনবা ঐখোয়না শুপ্নগী লুপা ২৬০দা ফংহল্লি। লুপা লিশিং ২গী বোরাবু লুপা ২৬০ পীরিবনি, মসি করিগীনো হায়বদা, ঐখোয়গী লৌমীশিংগী পোত্থোক হন্থখ্রগনি হায়বগী ঐখোয়না অৱাবা লৈবগীনি।
বনাস দাইরীনা গুজরাত খক নত্তনা য়ু.পি., রাজস্থান, হরিয়ানা অমসুং ঝার্খন্দ ফাওবা শন্দোক্লিবসিদা ঐহাক্না নুংঙাইবা ফাওই। বনাস দাইরীনা ঙসিদি শনগী শজিকসু পুথোক্লে। শঙ্গোম খক্তা নত্তনা শঙ্গোমগী তোঙানবা পোত্থোক কয়াগী অচৌবা কৈথেল অমসু শেম্লে। ঐখোয়গী সরকারনা দাইরী, এনিমেল হসবেন্দরীগী মপাঙ্গল হাপ্নবা থবক কয়া পায়খৎলি। শা-শনশিংবু ইকায় খুম্নবা নত্ত্রগা মখোয়শিংবু নীংথিনা শেন্নবীনবা ঐখোয়না মতম পুম্বদা খন্দুনা লাক্লি। শনগী শঙ্গোম খক্তগী শেল তানগনি হায়বা হৌজিক লৈত্রে, শন্থীদগীসু শেন তানবা ঙমহন্নবা, শঙ্গোম থোক্লিবা শনশিংবু থাদোক্তনবগীদমক্তা সরকারনা গোবর্ধন য়োজনাগী থবক হৌদোক্লে। ঐখোয়গী মফমসিগী রাজ্যপালনা হীরম অসিগী মতাংদা এৱিয়র্নেস শন্দোকপীরি অমসুং লৌমীশিংদা নেচরেল ফার্মিংগী পুক্নিং থৌগৎলি। য়ুরিয়া অমসুং কেমিকেল য়াওদনা লৌউনবা হোৎনবদগী ঐখোয়গী শা-শন অমসুং মখোয়গী শন্থীসু হৌজিক কান্নরে। ঐখোয়গী বানস্কন্থাদদি শন্থীদগী বাইওগ্যাস, বাইও সি.এন.জি. পুথোকপগী চাউরবা স্কিমশিংদা থবক পায়খৎপা হৌরে, মসিনা গারি চেলহনবা খক্ত নত্তনা মৈসু পুথোক্লে। ফোরেন এক্সচেঞ্জ হেন্না কনবা ঙম্নবগীদমক্তা ঐখোয়না প্লান্ত লিশিং কয়া লিংখৎলে। ঐখোয়গী দাইরী, শন্থী, মসিদগী পুথোক্লিবা গ্যাসকী পোত্থোকশিংনা ঐখোয়গী শেন্মিৎলোন চাউখৎহনবা অমসুং মীচম মীয়ামগী পুন্সি মহিং নুংঙাইহনবদা য়াম্না তেংবাংলি। মসিদা নত্তনা, লৌমীশিংদা ওর্গানিক হার ফংহন্নবা খন্নরি। মসিগী মরমদি, কেমিকেল তোইনা শিজিন্নবদগী ইমা লৈবাক অসিবু মাঙহনবা পামদবগীনি। ঐখোয়গী লৌমীশিংসু ইমা লৈবাক্কীদমক্তা খনবা হৌরক্লবনি। পোত্থোক য়ামজদ্রবসু, ইমা লৈবাক্তা কেমিকেলদি হাপ্লরোই খল্লবনি। মরম অদুনা, মখোয়গী মফমদা ওর্গানিক হার ফংহনবগী তঙাই ফদবা চাউনা লৈরে। মরম অদুনা, গোবর্ধনগী খুত্থাংদা গোবর ফেক্তরী লিংখত্তুনা মখোয়গী মফমদা ওর্গানিক হার ফংহনবগী মাইকৈদা ঐখোয়না চঙশিল্লি।
ইচিল ইনাওশিং,
খুদোংচাদবা কয়া দিকেদ কয়াদগী মাইয়োক্নদুনা লাক্লিবা লমদমসিনা লৈবাক্কী ঙাক-শেলগী সুরক্স কবচ ওইরি। ঐহাক্না ভিদিও কনফরেন্সিংগী খুত্থাংদা দীসাদা থৌরম অমা পাংথোকপগী খুদোংচাবা ফংজখি। দীসাদা এয়রফোর্সকী অচৌবা মফম অমা শেমগৎলি। মদুগী উরেপ উয়ুং তমখ্রে। লুপা করোর লিশিং কয়াগী ইনভেস্তমেন্ত লাক্লগনি, মফমসিনা সেক্যুরিতীগী মরু ওইবা অচৌবা মফম অমা ওইবতা নত্তনা অনৌবা থবক কয়া অমসু পীরগনি। নরাবেত্তা সীমা-দর্শন তৌবগী থবক হৌরে। ঙমখৈগী খুঙ্গং অমদা চাউখৎ থৌরাংগী থবক পাংথোকপগী খুদম হিন্দুস্তান্না য়েংনীংলবদি নরাবেত্তা লাক্তুনা য়েংবা য়াগনি। ঐখোয়না অথাপ্পা খুঙ্গংশিংদা এন.সি.সি.গী ফেস্লিতী য়ৌহল্লে। ঙমখৈ লৈবা খুঙ্গংশিংগীদমক্তা ভারত সরকারনা অখন্নবা বজেত শেম্লি।
ঙমখৈগী খুঙ্গং খুদিংগী চাউখৎ থৌরাংদা দবল ইঞ্জিন সরকারনা অহেনবা মিৎয়েং চঙদুনা থবক তৌরি। মরম অদুনা, ঐখোয়গী বজেত্তা ভাইব্রেন্ত বোর্দর ভিলেজকী ৱারোল লাউথোকখ্রিবনি অমসুং খুঙ্গংশিংবু মসিগা মরী লৈনহনখ্রবনি। বানস্কন্থাগী মফম অয়াম্বনা থৌরাং অসিদগী কান্নবা ফংগনি। ৱাফম অমগা হায়জগে। ঐহাক্না মতম খরগী মমাংদা ভুজতা লাক্লম্মি। ভুজকী য়াহা হাবদা মীওই কয়া লৈখিদবা অদুগীদমক্তা ঐখোয়না কৎচকী ভুজিয়া দুঙ্গরীদা নীংশিং খুভম অমা শারে। গুজরাত অপুনবগী মীওই লাখ লিশিং ১৩ লৈখিদবনি। মদুদা বানস্কন্থা অমসুং পাতনগী মীওই কয়াসু য়াওখি। মখোয়গী মমিংশিং নীংশিং খুভম অসিদা য়াওরি। মখোয় মখোয়গী মমিংদা উ-চারা অমমম থাখ্রে, মালেমগী মীপুম খুদিংনা লাক্তুনা মীয়ামসিগী অরোই খুভম য়েংবা য়াগনি। ঐহাক্না বানস্কন্থা অমসুং পাতনগী মীওইশিংদা হায়জনীংবদি, থৌদোক অসিদা নুংশি চান্নবা লৈখিদবা য়াওবা ইমুংশিংনা মফম অসিদা শোইদনা অমুক্তা চৎপীয়ু। লৈ কৎপীয়ু। মসিগুম্বা থবকশিংনা লৈবাক্কী মমিং হেন্না ফগৎহল্লি, মীচম মীয়ামগী থাজবা হেনগৎহল্লি, মসিগীদমক্তা দবল ইঞ্জিন সরকারনা থবক তৌরি।
সবকা সাথ, সবকা বিকাস, সবকা বিশ্বাস, সবকা প্রয়াস হায়বা ঐখোয়গী খোল্লাও অমা লৈ। লাইরবা, মশিং য়ামদবা, মী লৈজদবা নত্ত্রগা ত্রাইবেল ওইরো, পুম্নমক্কী চাউখৎ থৌরাংগীদমক্তা ঐখোয়না হোৎনবা তাবনি। গুজরাতনা হৌবদগী হৌনা মন্ত্রা অসিগা লোয়নদুনা লাক্লি। ভারতকী চাউখৎহন্নবগীদমক্তা গুজরাত চাউখৎহনবা। ঐখোয়না দিভেলপ রাজ্য ওইনা তুংলমচত্তা চঙশিনবা তাবনি। ঐখোয়না মসিমক পাংথোক্লি। ঐখোয়না ঙরাং বদোদরাদা এয়রক্রাফ মেন্যুফেকচরিং প্লান্ত লিংখৎপগী থবক হৌদোকপা অদোম্না উরে। মতম অমদা, মফমসিদা সাইকল ফাওবা শারমদবনি। ঙসিদি, প্লেন শারে, মসি নুংঙাইবা ৱাফম নত্তবরা? চাউথোকচনীংঙাইনি। অদোমগী অঙাংশিংগী কান্নবা য়াম্না লৈরবনি। অদুনা চাউখৎপগী খোঙজেল লেপহনবা য়াদে। অদুবু মীওই খরগী মতৌ অমা লৈ। ঐহাক্না পাউ-চেদদি পাদ্রি অদুবু তাবদি তারে। পাউ চে অনিদা কংগ্রেসকী এদভর্তাইজ থোকই, সর্দার বল্লাব ভাই পতেলগী মপোক কুমওন্নি, মখোয়না সর্দার সাহেবকী মতাংদা ৱাফম অমা ফাওবা পন্দে। মসি লাইবক থীবনি। সর্দার সাহেবনা নেহরু সাহেবকী কেবিনেত্তা গৃহ মন্ত্রী ওইনা থৌ পুরম্মিবনি। মহাক অসি কংগ্রেস পার্তীগী শক্নাইবা লুচিংবা ওইরম্মিবনি। অদুবু, মহাক্কী মপোক কুমওন মতমদা পাউচেদা এদভর্তাইজ হাপ্পদা মহাক্কী মরমদা করিগুম্বা অমা ফাওবা পন্দে, ফোতো অমা ফাওবা য়াওদে। মসিগী মথক্তা, অদোম্না লৈবাক্কী মীপুম খুদিং অমত্তা ওইহনগনি হায়রি। মসিদি সর্দার সাহেবকী মফমদা থওই উইশিত্তবনি। কংগ্রেস পার্তীনা সর্দার সাহেবকী মফমদা করি নুংঙাইতবা লৈবগে? সর্দার সাহেবপু উইশিত্তবগী মতৌদি গুজরাতনা কৈদৌনুংদা য়াবা ঙম্লোই, মরুপশিং। মখোয়দি করিমত্তা খন্দে। মখোয়না সর্দার সাহেবতা নুংঙাইতবা লৈবগী মসিগুম্বা থবক পাংথোক্লিবনি।
ইচিল ইনাওশিং,
ঐখোয়না সর্দার সাহেবকী লমজিং লমতাক অমসুং থৌজালদগী গুজরাতপু তুংলমচত্তা পুগদবনি। গুজরাতনা থৱাই য়াওনা অমসুং খোঙফম চেৎনা ঐখোয়গী তুংগী চারোন শুরোনগী মপাঙ্গলগীদমক্তা চঙশিল্লসি। ঐখোয়না মসিগুম্বা গুজরাত অমা শেমগদবনি। ঐহাক্কা লোয়ননা অমুক্তা লাওমিন্নসি –
ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
হন্না হন্না থাগৎচরি।
