কুশিনগরদা চাউখৎ থৌরাংগী প্রোজেক্ত কয়া অমসু শঙ্গাখ্রে অমসুং উরেপ উয়ুংসু তমখ্রে
“তঙাইফদবা খুদোংচাবশিং মরাং কায়না ফংলবা মতম খক্তদা, মংলান চাউনা থম্বগী থৌনা অমসুং মংলানশিং অদুবু ফংনবগী ইথিল পোক্লক্কনি”“উত্তর প্রদেশ দিকেত ৬-৭তা নমশিনবা ওইথোক্লোই। লমদম অসি নিংশিংবা ঙমদ্রবা পুৱারী লৈবা, নিংশিংবা ঙমদ্রবা থৌদাং কয়া লৌখিবা মফম অমনি”“ ‘দবল ইঞ্জিন’ সরকারনা ফিভম অসি দবল স্ত্রেংগা লোয়ননা ফগৎলক্লি”“স্বামিত্বা স্কীম্না উত্তর প্রদেশকী খুঙ্গংগী মফমশিংদা নুঙাই-য়াইফবগী অনৌবা থোঙ হাংদোক্কদৌরি”“পি.এম. কিসান সম্মান নিধিদগী য়ু.পি.গী লৌমীশিংগী বেঙ্ক একাউন্তশিংদা লুপা কোতি ৩৭,০০০ হেন্না হাচিনখি”ভারত ইমানা য়াইফরে!
ভারত ইমানা য়াইফরে!
ভগ্বান বুধনা পরিনির্ভানা ফংখিবা মফম কুশিনগরদা রাউরা সভা শারে। ঐখোয়না ঙসি এয়রপোর্ত শঙ্গাখ্রে, মেদিকেল কোলেজকী উরেপ-উয়ুং তমখ্রে। নোংথক্তা চত্থোক-চৎশিন তৌবা অমসুং লাইয়েংবসু নুংঙাইরগনি। থৌওং অসিগা লোয়ননা রাউরা সভাগী মঙলান ফংলে অমসুং মসিগীদমক্তা মীয়াম্বু অমুক হন্না থাগৎচরি।
উত্তর প্রদেশকী রাজ্যপাল, শ্রীমতি অনন্দিবেন পতেল, য়ু.পি.গী নুংশিরবা অমসুং মথৌদা থৱাই চঙবা মুখ্য মন্ত্রী, শ্রী য়োগি অদিত্যনাথজী, য়ু.পি.গী বি.জে.পি.গী প্রসিদেন্ত, শ্রী স্বতন্ত্র দেবজী, য়ু.পি. সরকারগী মন্ত্রী, শ্রী সুর্য়প্রতাপ সাহিজী, শ্রী সুরেশ কুমার খন্নাজী, শ্রী স্বামি প্রসাদ মৌর্য়জী, দাঃ নিলকন্থ তিৱারীজী, পার্লিয়ামেন্তকী ঐহাক্কী মরুপ, শ্রী বিজয় কুমার দুবেজী, দাঃ রমাপতি রাম ত্রিপাথীজী, অতোপ্পা মীয়ামগী মীহুৎশিং অমসুং তিনবীরিবা মশিং য়াম্লবা ইচিল-ইনাওশিং!!! দিৱালি অমসুং ছথ পুজা কুইরক্ত্রে। মসিদি নুংঙাইবগী মতম্নি। ঙসি অসি মহারিশী বাল্মিকিজীগী মপোক কুমওন্সু ওই। অসিগুম্বা য়াইফরবা নুমিৎসিদা কন্নেক্তিবিতী, হকশেল অমসুং থবক পীবগীদমক্তা করোর কয়া চঙগদবা অনৌবা প্রোজেক্ত কয়া ঐহাক্না কুশিনগরদা শিন্নবদা য়াম্না নুংঙাইবা ফাওই।
ইচিল ইনাওশিং,
মহাঋশী বাল্মিকীনা ঐখোয়দা রামায়নগী খুত্থাংদা প্রভু শ্রীরাম অমসুং ইমা জানকীগা থেংনহনবতা নত্তনা খুন্নাই অমগী অপুনবা পাঙ্গল অমসুং পুন্না হোৎনদুনা পন্থুংফম কয়া য়াম্না ফংমিন্নবা য়াবগে হায়বগী ৱাফম তাকপীরম্বনি। কুশিনগর অসি হায়রিবা ৱাখল্লোন অসিগীদমক্তা য়াম্না শেংলবা লমদম অমনি।
ইচিল ইনাওশিং,
অনৌবা ইন্তর্নেস্নেল এয়রপোর্ত লৈবদগী লাইরবদগী হৌনা মিদ্দল ক্লাসকী মীওই, খুঙ্গংদগী শহর ফাওবা, অপুনবা লমদম অসিগী শক্তম হোংলগনি। মহারাজগঞ্জ অমসুং কুশিনগর ফাওনহনবা লম্বী পাকথোকহনবগা লোয়ননা ইন্তর্নেস্নেল এয়রপোর্ত্তা হেন্না নুংঙাইবা কন্নেক্তিবিতী ফংলগনি, লৌমীশিংনা রামকোলা অমসুং সিস্বা চিনী মিলদা চু য়ৌহনবদা খুদোংচাদবা থেংনররোই। কুশিনগরদা রাজকিয় মেদিকেল কোলেজ লৈবদগী অদোমগী হকচাং লাইয়েংবগী অনৌবা খুদোংচাবা কয়া লৈরগনি। বিহারগী ঙমখৈগী মফমশিংগী মীওইশিংনসু মসিগী কান্নবা ফংগনি। লমদমসিগী দাক্তর ওইনীংবা মীওই কয়াগী নীংজবা থুংলগনি, অদুগা ঐখোয়না অনৌবা এজুকেসন পোলিসী পুথোকখিবদা, নীংতম্বগী চহি ৭৫গী মতুংদা ইমারোলদা মহৈ তম্বা মীওইশিং, লাইরবা ইমুংগী অঙাংশিংসু দাক্তর, ইঞ্জিনিয়র ওইবা ঙমহনগনি হায়না ৱারেপ লৌখিবা অদোম্না খঙবীরম্লগনি। লোলনা মরম ওইরগা মখোয়গী চাউখৎপগী লম্বীদা অয়েৎপা অমতা লৈররোই। অসিগুম্বা ঐখোয়গী হোৎনজমন কয়াগী মহৈ ওইনা পুর্বাঞ্চলদা মেনিঞ্জাইতিস-এন্সেফেলাইতিসকুম্বা পুন্সি মাঙবা য়াবা লাইনা কয়াদগী মীওই লিশিং কয়াগী পুন্সি কনবা ঙমখ্রিবনি।
মরুপশিং,
গন্দক তুরেলগী মনাক্তা লৈবা খুঙ্গং কয়াবু ইচাউ থোকপদগী কন্নবা ফক্লাং চনখৎপা ওইরো, কুশিনগর রাজকিয় মহাবিদ্যালয় হৌদোকপবু ওইরো, শোইনাইরবা ইচিল ইনাওশিংগী মহাবিদ্যালয় ওইরো, লমদম অসিবু অৱাবদগী পুথোক্লক্তুনা খুদোংচাবা কয়াগী মাইকৈদা পুদুনা চৎকনি। হৌখিবা চহি ৬-৭তা খুঙ্গং, লাইরবা, দলিত, তাথী-তাওইবীরবা, শোত্থরবা, ত্রাইবেলগুম্বা খুদোংচাবা ফংদ্রবা কয়াদা খুদোংচাবা কয়া ফংহন্নবা লৈবাক্না স্কিম কয়া চলায়রি, মসিসু হীরম অসিগী মতাংদা য়াম্না মরু ওইবা ৱাফম্নি।
মরুপশিং,
তঙাই ফদবা খুদোংচাবশিং লোইনা ফংলবা মতমদা, অচৌবা মঙলান মঙবা অমসুং মদুবু মঙফাওনহনবগী ইথিলসু মথন্নতা লাক্কনি। ময়ুম লৈজদবা, ঝুগীদা লৈবশিংনা মশাগী পক্কাগী য়ুম ফংলকপা, ময়ুমদা অমাংশঙ লৈরকপা, মৈ, গ্যাস, তোতি ঈশিং লৈরকপা মতমদা লাইরবশিংনা মশাবু ইকায় খুম্নজবা হেনগৎলকই। খুদোংচাবশিং অসি ঙসিদি লাইরবশিংগী নাক্তা খঙজেল থুনা য়ৌরে, লাইরবশিংনসু হৌজিক পাল্লিবা সরকার অসিদি মখোগীদমক্তা খনবা সরকারনি হায়বা তপ্না-তপ্না খঙবা হৌরক্লে। ঙসিদি, কেন্দ্র অমসুং রাজ্য সরকার য়ু.পি.গী মফম খুদিংদা চাউখৎপা পুরক্নবা পুকচেল শেংনা হোৎনরি। দবল ইঞ্জিনগী সরকারনা শরুক অনিগী মপাঙ্গল শিজিন্নদুনা ফিভম কয়া ফগৎহল্লি। ইং ২০১৭কী মমাংদা লৈরম্বা সরকারনা, অদোমগী খুদোংচাদবশিং অমসুং লাইরবশিংগী শিংনবশিংগীদমক্তা করিশু তৌবীরমদে। কেন্দ্র সরকারনা পীবা কান্নবশিংসি মখোয়না উত্তর প্রদেশকী মীয়ামদা য়ৌহনবা পাম্লমদে। মরম অদুনা, মমাংগী সরকারগী মতমদা, লাইরবগা মরী লৈনবা, ইনফ্রাস্ত্রকচরগা মরী লৈনবা প্রোজেক্ত খুদিংনা য়ু.পি.দা য়ৌবদা থেংথখ্রিবনি, অদুমক থেংথদুনা লৈরকখ্রিবনি। রাম মনোহর লোহিয়াজীনা হায়বীরম্মি - কর্মগা মীনুংশি অমসুং থম্মোইগা মরী লৈনহল্লু। অদুবু মমাংগী সরকার চলায়রম্বশিংদি, লাইরবগী অৱাবা উবীরমদে, মখোয়দি কর্মগা ৱাথোক অমসুং অরানবা-থৌওং কয়াগা মরী লৈনদুনা লেনখি। মখোয়গুম্বা মীওইশিংদি খুন্নাইগী থবক তৌবা নত্তে, মশাগী ইমুংগী থবক তৌবনি হায়বসি য়ু.পি.গী মীয়াম্না নীংথিনা খঙলবনি। মখোয়না মশাগী ইমুংগী কান্নবতা তৌখি, খুন্নাই অমসুং উত্তর প্রদেশতি মখোয়না কাওখ্রবনি।
মরুপশিং,
লৈবাক্কী চাউরবা রাজ্য, মীশিং য়াম্না লৈরিবা রাজ্য ওইজরবসু, উত্তর প্রদেশ অসি মতম অমদা লৈবাক্কী অচৌবা স্কিম কয়া পায়খৎপদা খ্বাইদগী চাউবা অপনবা থেংনবা মফম অমনি হায়না খন্নরম্মি। অদুবু ঙসিদি, লৈবাক্কী অচৌবা মিসন খুদিংগী মাই-পাকপদা উত্তর প্রদেশনা চাউরবা থৌদাং য়াদুনা লৈরক্লি। হায়রিবা মতৌ অসি হৌখিবা চহিশিংদা, স্বচ্ছ ভারত অভিয়ান্দগী হৌরগা কোরোনাগা মাইয়োক্তা চত্থবা খোঙথাং খুদিংদসু লৈবাক্না উদুনা লাক্লে। লৈবাক্কী মনুংদা ভেক্সিন য়াম্না কাপ্পগী মতাংদা নুংতিগী তাবা পাউশিংদা তোয়না তাবা ফংলিবা রাজ্যগী মিংদি উত্তর প্রদেশনি। লৈবাক্না তি.বি.গী মাইয়োক্তা থেংনখিবা লান্দসু য়ু.পি.না মথৌ নীংথিনা পাংথোক্নবা হোৎনদুনা লাক্লি। ঐখোয়না মেলন্যুত্রিসনগী মাইয়োক্তা মথংগী তাঙ্কক্তা চঙশিন্নবা হোৎনরিবা অসিদসু য়ু.পি.গী থৌদাং য়াম্না মরু ওইগনি।
মরুপশিং,
য়ু.পি.দা কর্মায়োগীগী সরকার লাকপদা ইমা, ইচে-ইচলশিংনা খ্বাইদগী কান্নবা ফংলিবনি। নৌনা শাখ্রিবা য়ুমশিংগী মপু ওইবগী রেজিস্ত্রেসন অয়াম্বশিং অসি নুপীশিংগী মিংদনি। অমাংশঙ শারে, পক্কা য়ুম শারে, খুদোংচাবগা লোয়ননা মশাবু ইকায় খুম্নজবসু ঙম্লে, উজ্বালাগী গ্যাস কন্নেক্সন ফংবনা মৈখুদগী নীংতম্বা ফংলে, ঈশিংগীদমক্তা থাপ্না চত্ত্রবসু য়ারে, য়ুমদা তোতি য়ৌহন্নবা খোঙথাং চত্থরি। শুপ্নগী চহি ২গী মনুংদা, উত্তর প্রদেশকী ইমুং লাখ ২৭তা থক্নবা অশেঙবা ঈশিং ফংখ্রবনি।
মরুপশিং,
উত্তর প্রদেশকী খুঙ্গংগী মফমশিংদা য়াইফ-য়ুম্বালগী অনৌবা থোঙ হাংদোক্কদবা অনৌবা য়োজনা অমগসু কেন্দ্র সরকারনা হৌদোক্লে। য়োজনা অসিগী মমিংদি পি.এম. স্বমিত্ব য়োজনা কৌই। মসিগী মখাদা খুঙ্গংগী য়ুম খুদিংগী মপু ওইবগী চে-চাং পীবগী থবক হৌখ্রবনি। খুঙ্গং খুদিংগী লম, লন-থুম্বু দ্রোন শিজিন্নদুনা মদুগী পাক-চাউবা ওল্লগনি। ইশাগী লন-থুমগী চে-চাং পায়রববনিনা, অতোপ্পনা কাংলোন লান্না মপুনি হায়না মরৈ য়েৎপা য়াররোই, বেঙ্কতগী তেংবাং ফংবদা য়াম্না লাইরগনি। ইশাগী য়ুম, লমনা গেরেন্তী ওইদুনা মশাগী কারবার হৌদোক্নিংবা য়ু.পি.গী নহাশিংনা স্বামিত্ব য়োজনাদগী মতেং য়াম্না ফংলগনি।
ইচিল ইনাওশিং,
মমাংগী চহি মরি মখায়দগী য়ু.পি.দা আইনগী কাংলোন্দা য়াম্না মরু ওইবা পীদুনা লাক্লি। ইং ২০১৭কী মমাংগী সরকারগী চৎনবীদি মাফিয়াশিংদা অয়াবা পীথোক্তুনা ইফোং-ফোংনা হুরানবনি। ঙসিদি, য়োগিজীগী লুচিং মখাদা মফমসিগী মাফিয়াশিংনা নীদুনা চত্তুনা লৈরে অমসুং খ্বাইদগী অৱাবা চৈথেংসু মখোয়না নঙলে। লাইরবা, দলিত, তাথী-তাওইবীরবা, শোত্থরবশিংগী লমদা মীতবাগী মিৎয়েং য়েংবা লমগী মাফায়াশিংবু লোইশিন্নবা য়োগীজী অমসুং মহাক্কী তিম্না কন্না হোৎনরি।
মরুপশিং,
আইন্না লম অমা চলায়বা মতমদা, লান্না তৌবা মীওইশিংদা অকিবা ফাওই, চাউখৎপগী খোংজেল থুগৎলি অমসুং কান্নবশিংনা লাইরবা, দলিত, তাথী-তাওইবীরবা, শোত্থরবশিংগী মফমদা য়ৌই। অনৌবা শোরোক, অনৌবা রেল লম্বী, অনৌবা মেদিকেল কোলেজ, মৈ-ঈশিংগী ইনফ্রাস্ত্রকচরসু য়াম্না থুনা চাউখৎপা ঙম্মি। হায়রিবশিং অসি য়োগীজীগী লুচিং মখাদা মহাক্কী তিম খুদিংনা উত্তর প্রদেশকী লমদমশিংদা খোংথাদুনা মীয়ামদা উৎলি। হৌজিক্তি, য়ু.পি.গী ইন্দস্ত্রীগী চাউখৎপগী ফিভম অসি শহর অনিখক্তদা লৈবা ওইদ্রে, পুর্বাঞ্চলগী জিলাশিংদা য়ৌবা হৌরে।
মরুপশিং,
লৈবাক অসিদা প্রধান মন্ত্রী খ্বাইদগী য়াম্না পুথোকখিবা লমদম অমনি হায়না উত্তর প্রদেশকী মতাংদা মতম পুম্বদা হায়নবা ৱাফম অমা লৈ। মসিদি য়ু.পি.গী চাউথোকচনীংঙাইনি, অদুবু হীরম অসিখক্তনা য়ু.পি.গী শক্তাক ওইবদি য়ারোই। য়ু.পি.বু দিকেদ ৬-৭ খক্তদা অকক্ননা থম্বদি য়ারোই। ঐখোয়গী লমদম অসিদি পুৱারী অমসুং কত্থোকপদা মমিং লৈবনি। লমদম অসিদা ধর্ম লৈবা রাম অমসুং ভগ্বান শ্রী কৃষ্ণ শাফোঙখিবনি। জেন ধর্মগী তীর্থঙ্কর ২৪দগী ১৮ উত্তর প্রদেশ্তগী থোকখিবনি। অদোম্না ময়ায়গী য়ুগতা য়েংলবদি, তুলসিদাস অমসুং কবিরদাসকুম্বা শক্নাইবা মীওইনা মফমসিদা পোকখিবা উগনি। সন্ত রবিদাসকুম্বা খুন্নাই শেমদোকপা মীওইবু পোকখিবগী মিংচৎসু উত্তর প্রদেশনা ফংলিবনি। অদোম্না মফম অমদা হেক্তা চৎলুবা মতমদা, মফমদুগী চাউখৎপা অমসুং তুংলমচৎ অসি উত্তর প্রদেশ য়াওদনা মপুং ফাবা ওইরোই হায়বা খঙগনি। উত্তর প্রদেশ অসি মফম খুদিংদা লাইনীংফম অমসুং ইনর্জী লৈবা লমদম্নি। ভেদ অমসুং পুরান ইবগী থবকশিং মফমসিদগী হৌখ্রিবনি। মফম অসিগী অৱধতা অয়োধ্যাগুম্বা লাইনীংফম লৈরিবনি। পুর্বঞ্চলদা শিব নীংবশিংগী শেংলবা কাশী লৈরি, বাবা গোরখনাথকী গোরখপুর লৈরি, মহাঋশী ভ্ররীগুগী বলিয়া মফম লৈরি। বুন্দেলখন্দদা চিত্রকুগুম্লবা শেংলবা মফম লৈরি। মসিদা নত্তনা তীর্থরাজ প্রয়াগসু উত্তর প্রদেশতা লৈরি। মসিদি লোইবা নাইররোই। অদোম্না কাশীদা লাকপা মতমদা ভগ্বান বুধনা অহানবা পাউজেল পীখিবা মফম সার্নাথ চত্তনা মফমসিগী খোঙচৎ মপুং ফারোই। ঐখোয়না কুশিনগরগী মরমদদি হৌজিক লৈদুনা খঙলে। মালেম শিনবা থুংবগী বুধ নীংবা মীওইশিংনা মফমসিদা লাকই। ঙসিদি মফমসিদা অহানবা ইন্তর্নেস্নেল ফ্লাইৎ তোংলগা লাক্লে। তোঙানবা মফমশিংদগী মীওই কয়ানা কুশিনগরদা লাকপদা শ্রৱস্তী, কোশাম্বী অমসুং সঙ্কিসাগুম্বা লাইগী মফমশিংদসু চৎকনি। মসিগী ক্রেদিৎসু য়ু.পি.গী শরুক খরদগী অদুম ওইগনি। শ্রৱস্তী অসি জেন তীরথঙ্কর শমভাবনাথজীগী পোকফম্নি। মতৌ অসুম্না, অয়োধ্যাদা ভগ্বান ঋশবদেভ অমসুং কাশীদা পাশ্বররনাথ অমসুং সুপাশ্বররনাথ কুম্বা তীরথঙ্করশিংগী পোকফম ওইরিবনি। মসিনা তাকপদি, লমদম অসিগী মফম খুদিংমক অসিগুম্বা শক্নাইবা অমমমগী পোকফম ওই হায়বনি। মসিদা নত্তনা, ঐখোয়গী চাউথোকচনীংঙাই ওইরবা শিখ গুরুগী চৎনবীগসু উত্তর প্রদেশকা অরুবা মরী লৈনৈ। অগ্রাগী ‘গুরু কা তাল’ গুরুদ্বারা অসি ঙসিসু গুরু তেগবহাদুরজীগী মতিক মগুন অমসুং ঔরঙ্গজেবকা শিংনখিবগী মহাক্কী মথৌনাগী শাখি ওইদুনা লৈরিঃ।
মরুপশিং,
ঐহাক্না উত্তর প্রদেশকী মতিক অমসুং লৈবাক অমসুং মালেমদা মসিগী তোঙানবা শক্তম অমা শেম্বগী ৱারী শাবা মতমদা নুংঙাইতবা মীওই খরা লৈ হায়বা ঐহাকসু খঙই। অদুবু অচুম্বা হায়বদা করিগুম্বা নুংঙাইতবা ফাওরবদি, মখোয়গুম্বগীদমক্তা গোস্বামী তুলসিদাসনা অসুম্না হায়বীরম্লবনি-
জহা সুমআতী, তহ সম্পতি নানা।
জহা কুমতি তহ বিপতি নিদানা।।
অফবা ইন্তেলেক্ত লৈবা মতমদা, নুংঙাইবগী ফিভম মতম পুম্বদা লৈগনি। ইন্তেলেক্ত খক্তা ল্পীবা মতমদা নুংঙাইতবগী মমি অদুমক তারগা লৈগনি। ঐখোয়দি লাইরবগী তেংবাংবগীদমক্তা খল্লগা মাংজিল থাবনি। কোরোনা মতমদা লেম্না রাসন য়েনবগী মালেমগী খ্বাইদগী চাউবা স্কিম চলায়খি। মসিদগী য়ু.পি.গী চাউরাকপা বেনিফিশরী করোর ১৫না কান্নবা ফংখি। হৌজিক মালেমগী খ্বাইদগী চাউবা তীবা থাবগী খোঙজং চতথরি, মীওই খুদিংদা লেম্না তীকা কাপ্লি, তীকা কাপ্পগী দোজ করোর ১০০ য়ৌনবা কন্না হোৎনরি। উত্তর প্রদেশতা হৌজিক ফাওবদা করোর ১২ হেনবগী দোজ কাপখ্রে।
ইচিল ইনাওশিং,
দবল ইঞ্জিন সরকারনা মফমসিগী লৌমীশিংদগী পোত্থোক লৈবদা অনৌবা রেকোর্দ থম্লি। পোত্থোকশিং লৈবগীদমক্তা য়ু.পি.গী লৌমীশিংগী বেঙ্ক একাউন্ততা চাউরাকপা লুপা করোর ৮০,০০০ য়ৌহনখ্রে। পি.এম. কিসান সম্মান নিধীগী মখাদা য়ূ.পি.গী লৌমীশিংগী বেঙ্ক একাউন্ততা লুপা করোর ৩৭,০০০ হেনবগী শেনফম হাপখ্রবনি। মসিদা নত্তনা অপিকপা লৌমীশিংনা কান্নবা কয়াসু ফংলি। মখোয়দা কান্নবা ফংহন্নবা থবক কয়া অমসু পায়খৎলি।
ইচিল ইনাওশিং,
লাক্কদৌরিবা মতম অসি য়ু.পি.গী মঙলান কয়া মঙফাওনহনবগী মতম্নি। নীংতম্বগী অমৃত মতম অসিদি ঐখোয় পুন্সিন্নবগী মতম্নি। হৌজিক ঐখোয়না মফমসিগী ওইনা থা ৫গী স্কিম শেমদগবা নত্তে, মথংগী চহি ২৫গী স্কিম শেমগদবনি। কুশিনগর, পুর্বঞ্চলগী থৌজালদগী অমসুং উত্তর প্রদেশকী থৌজালদগী অমসুং অদোম খুদিংগী হোৎনজমন্দগী ঐখোয়গী অনীংবশিং অসি ওইথোক্কদৌরিবনি। ঐহাক্না অদোম্বু ঙসি পীরিবা খুদোংচাবশিং অসিগীদমক্তা অমুক্কা হন্না থাগৎচরি। দিৱালী অমসুং ছথ পুজাগী য়াইজ-পাউজেল পীজরি। অদুগা, অদোমগী মফমদা করিগুম্বা অমা হায়জনীংই। ভোকেল ফোর লোকেল অসি ঐখোয়না কাওরোইদবনি। লোকেলগী পোত্থোক লৈগে খনগদবনি, ঐখোয়গী অনকপদা লৈরিবা ইচিল-ইনাওশিংনা শেম-শারিবা পোৎশিং লৈদুনা দিৱালী পাংথোকপা মতমদা মখোয়বুসু নুংঙাইহনবা ওইনা তোঙানবা হরাওবগী পুঙফম অমা শেম্বা য়াগনি। মসিনা মখোয়গী মপাঙ্গলসু হাপকনি, অনৌবা ইনর্জী লৈহনগনি। মসিনা হায়বদি, হরাও-কুমহৈদা য়ারিবমখৈ লোকেলগী পোত্থোক লৈগদবনি। ৱাফম অসিগা লোয়ননা ঐহাক্কী ৱারোল লোইশিঞ্জগে। পুম্নমকপু থাগৎচরি।
ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
