“সোমনাথ তেম্পল অসিবু করম্বা ফিভমদা থুগাইখিবা অমসুং তেম্পল অসিবু করম্বা ফিভমদা সর্দার পতেলনা হোৎনদুনা অমুক হন্না শাগৎখিবগে, অনিমক অসিনা য়াম্না চাউবা মপাউ অমা পীরি”
“হৌজিক্কী মতম অসিদদি, তুরিস্ত সেন্তরশিং চাউখৎহনবা হায়বসি সরকারগী স্কীমশিংগী শরুক অমা ওইবদা নত্তনা মীয়াম্না মসিদা শরুক য়াননবগী কেমপেন অমনি। লৈবাক অসিগী হেরিতেজ সাইতশিং অমসুং ঐখোয়গী কলচরেল হেরিতেজ চাউখৎহনবা হায়বসি মসিগী য়াম্না চাউবা খুদমনি”লৈবাক অসিনা তুরিজমবু হোলিস্তিক ওইবা মওংদা য়েংলি। লু-নানবা, কুদোংচাবা, মতম অমসুং ৱাখল্লোন হায়রিবা ফেক্তরশিং অসি তুরিজম প্লানিং তৌবদা য়াওরি“ঐখোয়গী ৱাখল্লোন অদু ইন্নোভেতিব অমসুং মোদর্ন ওইবগী মথৌ তাই। অদুম ওইনমক ঐখোয়গী লিরবা হেরিতেজগীদমক্তা ঐখোয়না কয়া য়াম্না চাউথোকচবগে হায়বা অসিসু য়াম্না মরু ওই”জয় সোম্নাথ,
থৌরম অসিদা শরুক য়াবীরিবা গুজরাতকী মুখ্য মন্ত্রী, শ্রী ভুপেন্দর ভাই পতেলজী, রাজ্যগী বি.জে.পি. প্রসিদেন্ত অমসুং ঐহাক্কী মন্ত্রী মন্দলগী মরুপ্লোই শ্রী সি.আর. পাতলিজী, গুজরাত সরকারগী মন্ত্রী, পুর্নেশ মোদী, অর্বিন্দ রায়ানী, দেবভাই মালম, জুনাগরগী এম.পি. রাজেশ চুরাসামা, সোম্নাথ তেম্পলগী অতোপ্পা মেম্বরশিং, অতোপ্পা মীথুংলেনশিং !
ভগবান সোম্নাথকী মতাংদা ঐখোয়গী শাস্ত্রদা অসুম্না হায়বীরম্মি-
ভক্তি প্রদনায় কৃপা অবতির্নম, তমহ সোম্নাথম শর্নম প্রপধে।।
মসিনা হায়বদি, ভগবান সোম্নাথকী থৌজালনা শাফোংলক্লে, থৌজালগী থোঙ কয়া হাংদোক্লে হায়বনি। মতম খরগী মমাংদগী, মফমসিদা চাউখৎ-থৌরাংগী থবক কয়া অমগী মথংদা অমা পাংথোক্তুনা লাক্লিবসি সোম্নাথ দাদামক্কী থৌজালনি। ঐহাক্না সোম্নাথ ত্রস্তকা মরী লৈনরক্লবা তুংদা অসিগুম্বা থৌওং কয়া ওইথোরকপা উবসি ঐহাক্কী লাইবক ফবনি খঞ্জৈ। থা খরগী মমাংদা মফমসিদা একজিবিসন গেল্লরী অমসুং প্রোমেনেদ য়াওনা চাউখৎ থৌরাংগী থবক কয়া শঙ্গাখি। পার্বতী লাইশঙগী উরেপ উয়ুংসু তমখি। অদুগা ঙসিসু, সোম্নাথ সর্কিত হাউস অসিসু শঙ্গারি। ঐহাক্না অসিগুম্লবা নুংঙাইরবা পুঙফম অসিদা গুজরাত সরকার, সোম্নাথ লাইশঙগী ত্রস্তপু থাগৎপা ফোংদোক্লি।
মরুপশিং,
সর্কিত হাউসকী অৱাৎপা অমা লৈরম্মি, মসিনা লৈতবদা মপান্দগী লাকপা মীওইশিংবু লৈহন্নবা শিন্নবা মন্দিরগী মীওইশিংদা অৱাবা কয়া ওইরম্মি। নীংতম্বা পথাপ অমা ওইনা সর্কিত হাউস অসিবু শারবা তুংদা, মসিনা মন্দিরদগী লাপ্তবা মফমদা লৈবনা, মন্দিরগী মীওইশিংদা অৱাবা লৈরম্বসু য়াম্না হন্থরে। মখোয়না হৌজিক্তি মদিরগী থবক্তা ৱাখল হেন্না থাদবা ঙম্লগনি। মফমসিদা লৈরিবা মীওইশিংনা সমুদ্র উবা ফংনবা মওংদা শাই হায়না ঐহাক্কী ইফমদা পাউদম্লক্লি। হায়বদি, মসিদা লৈবা মীওইনা মশাগী কাদা তংদু লৈতানা লৈজবা মতমদা সমুদ্রগী ইথক ইরৈসু উবা ফংগনি অমসুং সোম্নাথ লাইশঙ মতোনসু উবা ফংগনি হায়বনি। মতমগী শিংনবা কয়াগা মাইয়োক্নদুনা অতিয়াদা য়ুংনা লেপ্লিবা মতোনবু উগনি। খুদোংচাবশিং হেনগৎলকপদগী দ্যু, গির, দ্বার্কা, বেদ দ্বার্কাদা ওইরবা লমকোয়বা লাকপা খুদিংগী মফম অসিনা খ্বাইদগী মফম চাবা অমসুং ময়াই ওইবা পন্থুংফম ওইরগনি। মসিনা ইনর্জীগী মশক নাইবা মফম অমা ওইরগনি।
মরুপশিং,
ঐখোয়না শিংনবনা থল্লবা সিভিলাইজেসনগী খোঙচত্তা য়েংলুবদা ভারতনা চহি কয়া অমা মীখা পোন্দুনা করম্বা ফিভমদগী লান্দুনা লাকখি হায়বা উবা ঙম্মি। করম্বা ফিভমদা মন্দির অসিবু মাঙ-তাকহনখিবা অমসুং সর্দার বল্লবভাই পতেলনা হোৎনবদগী মন্দির অসিবু নৌনা শেমগৎখিবগী ৱাফম অনিমক অসি ঐখোয়গী চাউরবা পারা অমনি। ঐখোয়না ঙসি নীংতম্বগী অমৃত মহোৎসবকী মতমসিদা মমাংগী থৌদোকশিংদগী তম্বগী ওইনা সোম্নাথকুম্বা থাজবা অমসুং নাৎকী মরু ওইরবা মফম্না খ্বাইদগী চুনবনি।
মরুপশিং,
তোঙান-তোঙানবা রাজ্য, লৈবাক অমসুং মালেমগী কাচিন কোয়া খুদিংদগী সোম্নাথ মন্দিরদা লাই খুরুম্বা চাউরাকপা মীওই করোর অমরোম্না চহি খুদিংগী লাকই। মখোয়শিং অসিনা মসাগী মরমদমদা অমুক হনখিবদা অনৌবা লৌশিং, ৱাখল্লোন পুদুনা হন্নখি। মরম অদুনা, মখোয়গী খোঙচৎনা নুংঙাইরিবমখৈ, মখোয়না অহেনবা লৌশিং তানবা অমসুং কান্নবা ফংবা ওই। লাইনীংবশিংগী মপুং ওইবা অপাম্বদি ঈশ্বরগী মফমদা ৱাখল অমসুং মতম য়ারিবমখৈ পীজবা অসিনি, মখোয়না খোঙচৎ অসিদা শিংনবা অমসুং খুদোংচাদবা থেংনবা পামদে। লাইনীংবশিংগীদমক্তা সরকারনা নুংঙাইনবা কয়া য়াম্না শীনবগে হায়বসিদি সোম্নাথনা খুদম ওইরি। ঙসিদি, মফমসিদা লাইনীংবা মীওইশিংনা লৈননবা ফরবা খুদোংচাবা লৈরে, লম্বী শোরোক অমসুং ত্রান্সপোর্তকী খুদোংচাবসু হান্নদগী হেন্না ফগৎলে। মফমসিগী সমুদ্র মপালদা মীয়ামগী খোঙ লম্বী অমা শঙ্গাখ্রে, পার্কিং তৌবগী খুদোংচাবা শেম শাখ্রে, তুরিস্ত ফেসিলিতেসন সেন্তর শাখ্রে, লু-নান্না থম্নবগীদমক্তা ফত্ত-হৌদি মেনেজমেন্ত তৌবগী মতমগা চুনবা খুদোংচাবসু থমখ্রে। নীংথিজরবা লাইনীংবশিংগী প্লাজা অমসুং কমপ্লেক্স অমা শানবা হৌদোকখিবগী ফিভমসু খন্ন-নৈনবগী অরোইবা থাক্তা লৈরে। হৌজিক্তসু ঐখোয়গী পুর্নেশ ভাইনা মসিগী মতাংদা পনখিবদু ঐখোয়না খঙলে। ইমা অম্বাজী মন্দিরদসু অসিগুম্বা মওংগী চাউখৎ-থৌরাং অমসুং লাইনীংবশিংগী খুদোং চানবা থবক পায়খৎনবা হৌজিক কন্না খন্নরি। দ্বার্কাধিশ মন্দির, রুমকমনি মন্দির অমসুং গোমতিঘাৎ য়াওনা ঐখোয়না অসিগুম্বা মখলগী চাউখৎ-থৌরাংগী থবক কয়া অমা হান্ননা লোইশিনখ্রবনি। মসিনা লাইনীংবশিংদা খুদোংচাবসু পীরি অমসুং গুজরাতকী সংস্কৃতীগী শক্তাকসু হান্নদগী হেন্না কনখৎহল্লি।
ঐহাক্না অসিগুম্বা চাউখৎ-থৌরাংগী মরক্তা গুজরাতকী ধর্মা অমসুং খুন্নাইগী লুপশিংগী মফমদা ঙসিগী য়াইফরবা পুঙফম অসিদা য়াইফ পাউজেল পীবগা লোয়ননা থাগৎপসু ফোংদোক্নীংই। অদোম্না ইশা-ইশাগী থাক্তা চাউখৎপগী অমসুং মীয়ামগী সেবা তৌদুনা লাক্লিবা অসিবু ঐহাক্কী মিৎয়েংদা মীওই খুদিংনা পুন্না হোৎনমিন্নবগী নীংথিরবা খুদম অমা ওইনা উজৈ। সোম্নাথ মন্দির ত্রস্তনা কোরোনাগী মনুংদা লাইনীংবশিংগী খনখিবা, খুন্নাইগীদমক্তা থৌদাং লৌবা অসিদা ভগবান শিবগী ৱাখল্লোন্না ময়েক শেংনা উবা ফংজখি।
মরুপশিং,
লমকোয়বনা শেন্মিৎলোন ফগৎহনবদা অচৌবা থৌদাং লৌবা ময়েক শেংনা উবা ফংবা লৈবাক্কী মতাংদা ঐখোয়না কয়ারক হন্না তাখ্রে, উখ্রে। মালেমগী লৈবাকশিংগী মশক থোকপা পাঙ্গল অমমমগা মান্ননা ঐখোয়গী লৈবাক্তদি রাজ্য খুদিং, মফম খুদিংদা লৈ। ওইথোকপা য়াবা হীরম কয়া মশিং থীঙমদনা লৈরি। অদোম্না রাজ্য অমা হেক্তগী মমিং লৌবীয়ু, খ্বাইদগী অহানবদা করি খল্লি? গুজরাতকী মিং পনবদা সোম্নাথ, দ্বারকা, স্তেচ্যু ওফ য়ুনিতী, ধোলাবিরা, কচচ ওফ রান, অসিগুম্বা নীংথিরবা অমসুং তোঙাল্লবা মফম কয়া অমা ৱাখল্লোন্দা লাকই। য়ু.পি.গী মিং পনবদনা অয়োধ্যা, মথুরা, কাশী, প্রয়াগ, কুশিনগর, বিন্ধ্যাঞ্চলগুম্বা মিং কয়া অমা মথন্নতা অদুমক নীংশিংলকই। মীচম মীওই অমনা হায়রিবা মফমশিং অসিদা অমুক্তা ওইরবসু চৎপা পাম্নৈ। উত্তরাখন্দ অসিদি লাইগী লৈবাক্নি। বদ্রিনাথজী, কেদারনাথজী, মফম অসিদা লৈবা ঙাক্তনি। হিমাচল প্রদেশকী ৱারী শারবদি ইমা জ্বালাদেবীসু মফমসিদা লৈবনি, ইমা নয়নাদেবীসু মফমসিদা লৈবনি, লাই ময়াম অমসুং মহৌশাগী নীংথিরবা মফম্না থল্লিবনি। মতৌ অসুম্না, রামেশ্বরম চৎনবা তমিল নাদু, পুরী চৎনবা ওরিশা, তিরুপতী বালাজী চৎনবা আন্ধ্র প্রদেশ, সিদধি বিনায়ক চৎনবা মহারাস্ত্রা, শব্রিমালা চৎনবা কেরলাগী মিং লাকপনি। অদোম্না রাজ্য অমা হেক্তগী মিং লৌবা মতমদা লাইনীংফম অমসুং লমকোয়ফম মমিং কয়া অমা মথন্নতা নীংশিংলক্কনি। অসিগুম্বা মফমশিংনা ঐখোয়গী লৈবাক্কী এক ভারত, স্রেস্থ ভারতকী অপুনবগী শক্তমগী ইথিল তাক্লি। মসিগুম্বা মফমশিংদা চৎপনা লৈবাক্কী অপুনবা শক্তমগী ৱাখল্লোন হেনগৎহল্লি। ঙসিদি, লৈবাক অসিনা মফমশিং অসিবু লৈবাকপু নুংঙাই য়াইফনা লৈহন্নবা পাম্বৈ অমা ওইনসু য়েংলি। মখোয়না চাউখৎলক্তুনা ঐখোয়গী হেন্না চাউবা মফম চাউখৎহনবদা হেন্না থুগৎহনগনি।
মরুপশিং,
মমাংগী চহি ৭ অসিদা সরকারনা লৈবাক্কী তুরিজমগী মতিকপু হেন্না চাউখৎহন্নবা লেপ্তনা থবক কয়া পায়খত্তুনা লাক্লি। লমকোয়বগী মফমশিং চাউখৎহনবসি সরকারগী স্কিমগী শরুক অমা ওইবতা নত্তনা মসিদি মীয়াম পুম্বনা শরুক য়ামিন্নগদবা খোঙথাং অমা ওইরবনি। লৈবাক্কী হেরিতেজকী মফমশিং, ঐখোয়গী নাৎকী হেরিতেজশিংবু চাউখৎহনবসিনা মসিগী চুনবা খুদম্নি। থৌৱা শাবীদনা হেন্না লৈরম্বা হেরিতেজকী মফমশিংদু হৌজিক্তি মীয়াম পুন্না হোৎনদুনা শেমজিন শাজিল্লে, চাউখৎহল্লে। প্রাইভেত সেক্তরনসু মসিদা তেংবাংনবগীদমক্তা মাংজিল থানা থোরক্লি। ইনক্রেদিবল ইন্দিয়া অমসুং দেখো অপনা দেশ খোঙথাংনা ঙসিদি লৈবাক্কী শিংথান্নীংঙাই ওইরবা মতৌশিংবু মালেমগী মাঙদা থম্লি, তুরিজম্বু খুমাং চাউশিনহল্লি।
স্বদেশ দর্শন য়োজনাগী মখাদা, হীরম খরদা য়ুম্ফম ওইবা তুরিস্ত সর্কিত ১৫সু লৈবাক অসিদা হৌজিক শেমগৎলি। মসিগী সর্কিতশিং অসিনা লৈবাক্কী তোঙান-তোঙানবা শরুকশিংবু অমত্তা ওইনা পুন্সিন্নহনবতা নত্তনা তুরিজমগী অনৌবা শক্তাক অমা পীদুনা চত্থোক-চৎশিন তৌবদা হেন্না লায়থোকহল্লি। রামায়ন সর্কিতকী খুত্থাংদা ভগবান রামগা মরী লৈনবা অমসুং মহাক্কী মমিং পনবা মফম খুদিংদা অমগী মথংদা অমদা চৎপা য়াগনি। মসিগীদমক্তা রেলৱেনা অখন্নবা রেল অমসু হৌদোকখ্রে অমসুং মসিবু মীয়াম্না য়াম্না পাম্নরি হায়না ঐহাক্কী ইফমদসু পাউদম্বীরক্লি।
হয়েংদগী হৌনা কাশীদা কোয়নবগীদমক্তা অখন্নবা ত্রেন অমসু দিল্লীদগী চেনবা হৌরগনি। বুধ সর্কিতনা লৈবাক অমসুং মীরমদগী লাকপা লমকোয়বশিংনা বুধগী মফম খুদিংদা চৎপদা অরায়বা অমা ওইহল্লি। মীরমদগী লাকপা লমকোয়বশিংগীদমক্তসু বিজাগী কাঙলোন য়াম্না লায়থোকহনখ্রে, মসিগী কান্নবা অসিসু লৈবাক অসিনা ফংলগনি। হৌজিক, কোবিদনা মরম ওইরগা খুদোংচাদবা খরদি লৈরি, অদুবু ইরাং অসি হেক লোইখিবা মতমদা লমকোয়বগী মশিংনা অঙকপা ফংনা হেনগৎলক্কনি হায়বগী ঐহাক্না থাজৈ। সরকারনা তীকা কাপ্পগী খোঙজং চলায়রিবা অসিদসু হীরম অসিগী মতাংদা নীংথিনা খন্নদুনা তুরিস্ত স্তেৎসশিংদা অহানবা ওইনা মিৎয়েং চঙদুনা ভেক্সিন কাপ্নবা শীন-লাঙখ্রবনি। গোৱা, উত্তরাখন্দগুম্বা রাজ্যশিংনা হীরম অসিগী মতাংদা খোঙজেল য়াঙনা থবক পায়খৎখি।
মরুপশিং,
ঙসিদি, লৈবাক অসিনা তুরিজম্বু হীরম খুদিং মনুং চনবা থৌওং অমা ওইনা উরি। হৌজিক্কী মতমসিদা তুরিজম ফগৎহন্নবা ৱাফম মরিগী মথৌ তাই। অহানবনা লু-নানবনি- অহানবা ওইনা ঐখোয়গী তুরিজম মফম, লাইনীংফমশিং অসি হাইজিনিক ওইরমদে। ঙসিদি, স্বচছ ভারত অভিয়ানগী মখাদগী শক্তম অসি হোংহল্লে। লু-নানবা হেনগৎলকপগা লোয়ননা লমকোয়বা লাকপসু হেনগৎলক্লি। অনিশুবা থৌওংনা খুদোংচাবা ফংহনবনি। অদুবু খুদোংচাবশিং অসি লমকোয়ফম খক্তগী মনুংদা ফংহনদৌবা নত্তে। চত্থোক চৎশিন তৌবগী, ইন্তর্নেতকী, নীংথিনা ই-পাউ পীবগী, মেদিকেলগী, হীরম খুদিংগী খুদোংচাবা ফংহনগদবনি। অদুগা হীরম অসিগী মতাংদসু লৈবাক অসিনা শরুক মরি হেনবা থবক পায়খৎলি।
মরুপশিং,
মখা তারকপা ওইনা, হীরম অসিগী অহুমশুবা ৱাফমদি মতম্নি। হৌজিক্কী মতমসিদি ত্বেন্তী-ত্বেন্তীগী মতম্নি। মীয়াম্না য়ামদবা মতমদা মফম য়াম্না চৎনীংই। ঙসি লৈবাকসিদা হাইৱে, এক্সপ্রেসৱে শারিবা, মতমগা চুনবা ত্রেন চেল্লিবা অমসুং এয়রপোর্ত অনৌবা কয়া লৈরক্লিবা অসিনা মতাংসিদা য়াম্না কান্নবা পীরি। উরান স্কিম্না মরম ওইরগা এয়রফেয়রসু য়াম্না হন্থরে। মসিনা হায়বদি, লমকোয়বশিংগী মতম য়াম্না মাংদ্রিবমখৈ মখোয়গী শেল চৎপা হন্থরি অমসুং তুরিজমসু হেনগৎলক্লি। ঐখোয়না গুজরাত্তা য়েংলবসু, ইমা অম্বাজী খুরুম্বা চৎপগী বনসকন্থাদা রোপৱে লৈরে, ইমা কালিকা খুরুম্বগী পবাগর লৈরে, গিরনারগীসু রোপৱে লৈরে অমসুং সতপুরাদা পুন্না রোপৱে মরি লৈরে। অসিগুম্বা রোপৱেশিং হৌখিবা মতমদগী লমকোয়বশিংগী খুদোংচাবদা শরুক অনি হেনগৎলে অমসুং লমকোয়বগী মশিংসু হেনগৎলকপগী ফিভম উবা ফংলে। হৌজিক্কী ওইনদি, কোরোনানা মরম ওইদুনা, থবক থৌরম কয়া লেপ্লি। অদুবু, মসিগুম্বা তুরদা চৎলুরবা স্কুলগী মহৈরোইশিংনা পুৱারী ওইরবা মফমশিং অসিদগী য়াম্না তম্বা ফংজৈ। লৈবাক শিনবা থুংবদা অসিগুম্বা খুদোংচাবশিং লৈরকপা মতমদা মহৈরোইশিংনা খঙবা তম্বদা য়াম্না লায়রগনি অমসুং মখোয়গা লৈবাক্কী হেরিতেজকা মরী লৈনবসু হেনগনি।
মরুপশিং,
তুরিজম হেনগৎহন্নবা মরিশুবা অমসুং খ্বাইদগী মরু ওইবা ৱাফমদি – ঐখোয়গী ৱাখল্লোন অসিনি। ঐখোয়গী ৱাখল্লোন্না অনৌবা থৌওং খনবা অমসুং মতমগা চুনননা খনবগী য়াম্না মথৌ তাই। মসিগা লোয়ননা, ঐখোয়না ইশাগী অরিবা মতমগী হেরিতেজকীদমক্তা কয়া য়াম্না চাউথোকচবগে হায়বসু মরু ওই। ঐখোয়না চাউথোকচবনা মরম ওইদুনা ভারত্তগী হুরান্দুনা পুখ্রবা মীতমশিং, মমল নাইদ্রবা পোৎলমশিংবু মালেমগী মফম খুদিংদা অমুক্কা হন্না পুরক্লিবনি। ঐখোয়গীদমক্তা ঐখোয়গী ইপা-ইপুশিংনা অসুক য়াম্না থম্বীরম্লি। অদুবু, ঐখোয়গী নাৎকী, ধর্মগী সংস্কৃতীগী শক্তাক্কী মতাংদা ৱা ঙাংবদা অপনবা ফাওবা মতম অমসু লৈরম্মি। নীংতম্বগী মতুংদা দিল্লীদা লৈবা অখন্নবা ইমুং খরতমক্কী ওইনা কান্নবা ফংখি। অদুবু ঙসিদি লৈবাক অসিনা অদুগুম্লবা ৱাখল্লোনবু তুংদা থনমদুনা চাউথোকচনীংঙাই ওইবা অনৌবা মফম পুথোক্লি। দিল্লীদা বাবা সাহেব মেমোরিএল শঙ্গাখিবসি ঐখোয়গী সরকারননি। রামেশ্বরমদা এ.পি.জে. অবদুল কলাম মেমোরিএল শাহনখিবসু ঐখোয়গী সরকার অসিননি। মতৌ অসুম্না, নেতাজী সুভাসচন্দ্র বোস অমসুং শ্যামজী কৃষ্ণ বর্মাগুম্বা শক্নাইরবা মীওইশিংগা মরী লৈনবা মফমশিংদা মিৎয়েং চঙলি। ঐখোয়গী ত্রাইবেল খুন্নাইগী নীংথিরবা পুৱারীবু মীয়াম মাঙদা পুথোক্নবগীদমক্তা লৈবাক শিনবা থুংবদা ত্রাইবেল ম্যুজিয়ম শাবা হৌরে। ঙসিদি, কেবারিয়াদা লৈরিবা স্তেচ্যু ওফ য়ুনিতীনা লৈবাক পুম্বগী চাউথোকচনীংঙাই ওইহল্লি। কোরোনাগী ইরাং হৌদ্রিঙৈদা, য়ামদবা মতমগী মনুংদা লাখ ৪৫ হেনবা মীয়াম্না স্তেচ্যু ওফ য়ুনিতী য়েংবা চৎনখ্রবনি। কোরোনাগী ইরাং লৈরবা ফাওবদা, হৌজিক ফাওবগী ওইনা অপুনবা মীওই লাখ ৭৫ হেনবা মীয়াম্না স্তেচ্যু ওফ য়ুনিতী য়েংবা লাক্নখি। মসিদি ঐখোয়গী নৌনা শাবা মফমশিংগী মগুন্নি। লাক্কদৌরিবা মতমশিংদসু, অসিগুম্বা হোৎনরিবা অসিনা ঐখোয়গী তুরিজমগী অনৌবা শক্তাক অমা পীগনি।
মরুপশিং,
ঐহাক্না ভোকেল ফোর লোকেলগী ৱা ঙাংবা মতমদা, মীওই খরনা মোদীগী ভোকেল ফোর লোকেল অসিদি দিৱালীগী মতমদা মফম কদাইদগী থাউমৈ লৈগনি হায়বগী মতাংদা খক্তনি হায়না খল্লি। অসিগুম্বা অপিকপা ৱাখল্লোন্দা হিংগনু। ঐহাক্না ভোকেল ফোর লোকেল হায়বা মতমদা তুরিজমসু মসিগী মনুং চল্লিবনি। ঐহাক্না মতম পুম্বদা হায়নীংবদি, ইমুং অমগী অঙাং অমনা মীরমদা কোয়বা পাম্মি, দুবাই চৎকনি, সিঙ্গাপুর চৎকনি হায়বগী অপাম্বা লৈ। অদুবু, মীরমদা চৎপগী থৌরাং য়াত্ত্রিঙৈ মমাঙদা ইমুং মনুংদা য়ানবা অমা পুরকউ, মসিগী মমাংদা ভারতকী মমিং লৈরবা মফম ১৫-২০দা হান্না চৎকনি হায়না খনবীয়ু। অহানবদা ভারত হান্না য়েংগনি, মদুগী মতুংদা মীরমদা চত্তুনা কোয়রুগনি।
মরুপশিং,
ভোকেল ফোর লোকেলবু পুন্সিগী হীরম খুদিংগী মনুং চলহনগদবনি। লৈবাকপু নুংঙাই য়াইফহনগে নত্ত্রগা লৈবাক্কী নহাশিংগী অনৌবা খুদোংচাবা লৈহনগে হায়রবদি, ঐখোয়না মসিগী ল্মবীসিদা চৎপা তাবনি। হৌজিক্কী মতমগা চুনরিবমখৈ ইশাগী অরিবা চৎনবীগসু মরী লৈনবা ভারত অমা শেম্নবা ঐখোয়না হৌজিক্কী অমৃত মহোৎসবকী মতমসিদা ৱারেপ লৌরি। ঐখোয়গী লাইনীংফম, লমকোয়ফম্না অসিগুম্বা অনৌবা ভারত্তা তোঙানবা মচু শঙবদা মতেং পাংগনি। মসিনা ঐখোয়গী চাউখৎ-থৌরাং অমসুং হেরিতেজ অনিমক্কী খুদম ওইগনি। সোম্নাথ দাদাগী থৌজালদগী লৈবাক্কী চাউখৎ-থৌরাংগী খোঙজেল অসি লেপ্তনা অদুমক চত্থগনি হায়বগী ঐহাক্না থাজৈ।
ঐহাক্না অনৌবা সর্কিত হাউসকীদমক্তা মীয়াম্বু অমুক্কা হন্না থাগৎচরি।
জয় সোম্নাথ!
