“মথং চহি ২৫ দা বিকসিত ভারতকী খোঙচত্তা পাউ-চেশিংগী থৌদাং য়াম্না মরুওই”
“মখোয়গী তৌবা ঙম্বশিংদা থাজবা থম্লবা লৈবাক অমগী নাগরিকশিং অনৌবা মাইপাকপগী অনৌবা থাকশিং য়ৌবা হৌরবনি। মসি ঙসিগী ভারত্তা থোক্লে”“আই.এন.এসনা ভারতকী খোৎচৎকী অকা-অকুম থেংনবা খক নত্তনা মসিগা লোয়ননা হিংমিন্নরি অমসুং মসি মীয়ামদা পাউদম্লি”“লৈবাক অমগী মালেমদা তারিবা মমি অদুনা হকথেংননা লৈবাক অমগী শেন্মিৎলোন্দা শোকহল্লি। ভারতকী পাউ-চেশিং মালেমগী মফমশিংদা য়ৌবা হেনগৎহনগদবনি”মহারাস্ত্রাগী রাজ্যপাল শ্রী রমেস বাইস জি, মহারাস্ত্রাগী চীফ মিনিস্তর শ্রী একনাথ সিন্দে জি, মহারাস্ত্রাগী দিপুতি চীফ মিনিস্তরশিং শ্রী দিবেন্দ্র ফদনাবিস জি অমসুং শ্রী অজিত দাদা পৱার জি অমসুং ইন্দিয়ান ন্যুজপেপর সোসাইতিগী প্রসিদেন্ত শ্রী রাকেস শর্মা জি, শক্নাইরবশিং, ইবুংঙোশিং অমসুং ইবেম্মাশিং !
অহানবদা, ঐনা ইন্দিয়ান ন্যুজপেপর সোসাইতিগী মেম্বরশিং থাগৎপা ফোঙদোকচরি। ঙসি, ময়াম পুম্নমক মুম্বাইদা মতমগা চুনরবা অমসুং অচৌবা বিল্দিং অমা লৈরে। অনৌবা মফম অসিদা নুংঙাইনা থবক তৌনবা মফম অমা ফংবা অসিনা ভারতকী গনতন্ত্র মখা তানা মপাঙ্গল কনখৎহল্লগনি হায়বগী থাজনা ঐনা থাজৈ। ইন্দিয়ান ন্যুজপেপর সোসাইতি অসি নিংতম্বা ফংদ্রিঙৈ মমাংদা শেমখিবনি। ময়াম পুম্নমক্না ভারতকী খোৎচৎকী অকা-অকুম থেংনবা খক নত্তনা মসিগা লোয়ননা হিংমিন্নরি অমসুং মসি মীয়ামদা পাউদম্লি। মরম অদুনা অদোম্না কন্না হোৎনবদগী ইন্দিয়ান ন্যুজপেপর সোসাইতি লুপ অমা ওইরে। লুপ অমা ওইনা ইন্দিয়ান ন্যুজপেপর সোসাইতিগী থবক লৈবাক অসিনা কান্নবা হেন্না কান্নবা ফংলগনি।
মরুপশিং,
লৈবাক অমগী ফিবমশিংদা মেদিয়া অসি তুমিন্না য়েংদুনা লৈবা ভাবক অমা নত্তে। মসিনা লৈবাক্কী অহোংবশিং পুরকপদা মেদিয়ানা মরুওইবা থৌদাং অমা লৌরি। লাক্লিবা চহি ২৫দা লৈবাক অসিগী খোঙচৎ অসি য়াম্না মরুওইবা ফিবম অমদা ভারত লৈরি। মথং চহি ২৫ দা বিকসিত ভারতকী খোঙচত্তা পাউ-চেশিং অমসুং মেগাজিনশিংগী থৌদাং য়াম্না মরুওই। মেদিয়ানা লৈবাক অসিগী মীয়াম ৱাখল তাহল্লি। মীয়ামগী হকশিং অমসুং তৌবা ঙম্বশিংগী মরমদা খঙহনবদা মেদিয়ানা মরুওইবা থৌদাং অমা লৌরি।
ভারত্তা দিজিতেল ত্রান্সসেক্সনশিং মাইপাকপা অসি কমদৌনা মীয়াম্না অচৌবা মাইপাকপা পুরকপা ঙম্বগে হায়বগী খুদম অমনি। অচৌবা লৈবাকশিংনা ভারতকী দিজিতেল পব্লিক ইনফ্রাস্ত্রকচরদা থৱায় য়াওরে। হায়রিবা থবকশিং অসি মাইপাকপদা মেদিয়াগা লোয়ননা চৎমিন্নরি। অদোমশু উরে মদুদি লৈবাক অসিগী মীয়ামগী তৌবা ঙম্বশিংদা থাজবা থম্লবা লৈবাক অমগী নাগরিকশিং অনৌবা মাইপাকপগী অনৌবা থাকশিং য়ৌবা হৌরবনি। মসি ঙসিগী ভারত্তা থোক্লে। অদোমদা ঐনা অপীকপা খুদম অমা পীগনি। দিজিতেল ত্রান্সসেক্সনশিং ভারতকী মীয়ামদা য়ৌবা ঙম্লোই হায়না মতম অমদা লুচিংবা খরনা ফোঙনা হায়বা মতম অমা লৈরমখি। অনৌবা তেক্নোলোজিগা মরী লৈনবা থবকশিং লৈবাক অসিদা পাংথোকপা ঙম্লোই হায়না মীওইশিং অসিনা খনখি। অদুবু ভারতকী মীয়ামগী লৌশিং অমসুং তৌবা ঙম্বা মালেম্না উরে। ঙসিদি ভারতনা মালেমদা দিজিতেল ত্রান্সসেক্সনশিংগী অচৌবা রেকোর্দ কয়া থুগায়রে। ঙসিদি, ভারতকী য়ু.পি.আই, অনৌবা দিজিতেল পব্লিক ইনফ্রাস্ত্রকচরশিংনা মরম ওইদুনা, মীয়াম হিংবদা লাইবা হেনগৎহল্লক্লে, মসি মীয়াম্না অতোপ্পা মফম অমদগী মফম অমদা লাইনা শেন থাদোক-থাজিন তৌবা ঙমহল্লে। ঙসিদি, ঐখোয়গী লৈবাক্কী মীয়াম মালেম শীনবা থুংনা লৈরে, মরুওইনা গল্ফ লৈবাকশিংদা লৈরিবা মীওইশিংনা খ্বাইদগী য়াম্বা শেনফমশিং থারক্লি অমসুং শেন থাবদা মখোয়না হান্না তিংখিবা শেনফম অদু য়াম্না হন্থরে অমসুং মসিগী অচৌবা মরমদি দিজিতেলগী অওনবা অমা লাকপা অসিনি। অচৌবা লৈবাকশিংনা ঐখোয়গী তেক্নোলোজি অমসুং ঐখোয়না থবক ওইনা পায়খৎলিবা অসিগী নমুনা খঙনবা অমসুং তম্নবা হোৎনরি। মসিগী অচৌবা মাইপাকপা অসি সরকার খক্তগী নত্তে। মসিগী মাইপাকপা অসিদা মেদিয়াগী মীওইশিংশু শরুক য়ারি অমসুং মসিগীদমক অদোম থাগৎপা ফোঙদোকচরি।
মরুপশিং,
মরুওইবা ৱাফমশিং খন্ন-নৈনবদা মেদিয়ানা লৌফম থোকপা থৌদাং লৌরি। অদুবু মেদিয়াগী মাইকৈ অসি সরকারগী থৌশিলশিংগী মাইকৈগী মখা পোল্লি। লোয়ননা মেদিয়ানা মথৌ পাংথোকপদা সরকারগী থৌশিলশিংদা ইথিল পীরি। অদোম খঙলে, সরকারনা মতম পুম্নমক্তা থবক খুদিংমক্কী অফবা অমসুং ফত্তবা খল্লি। অদুবু মখোয়না মতম পুম্নমক্তা ভোৎ মশিং থিবগী হৈনবী লৈরি। মসিগী ৱাখল্লোন অসি ঐখোয়না হোংদোক্কদবনি। ঐখোয়গী লৈবাক্তা চহি ১০গী মমাঙদা বেঙ্কশিং নেসনেলাইজ তৌখিবা অদু অদোম নিংশিংলমগনি। অদুবু অশেংবদি, মদুগী মতুংদা ২০১৪ ফাওবা, লৈবাক অসিগী লায়রবা মীওই করোর ৪০-৫০ বেঙ্ক একাউন্ত অমা ফাওবা হাংলমখিদে। নেসনেলাইজ তৌবদা ৱাফম কয়া ফোঙদোকখি অমসুং ২০১৪দা করি উবা ফংলে, লৈবাক অসিগী অপুনবা মীশিংগী তঙ্খায় অমা বেঙ্কগা শম্নখিদে। মসি ঐখোয়গী লৈবাক্কী অরুবা ৱাফম অমা ওইদবরা? অদুবু, ঐখোয়না জন ধন য়োজনা অসি ইহৌ অমা ওইনা পায়খৎলে। ঐখোয়না চাউরাক্না মীওই করোর ৫০ রোম বেঙ্কগী থবকশিংগা শম্নহল্লে। হায়রিবা প্রোজেক অসিনা দিজিতেল ইন্দিয়াদা চাউনা মতেং পাংলে অমসুং শেঞ্জা-থুমজা লাকশিনবা থবকশিংদা মতেং পাংলে। করিগুম্বা ঐখোয়না শ্বাছতা অভিয়ান, স্তার্দঅপ ইন্দিয়া, স্তেন্দঅপ ইন্দিয়া অসি রাজনিতিগী খুদোংচাবা লৌনবা ওইনা য়েংলবদি কমদৌগনি। শ্বাছ ভারত নত্ত্রগা স্তার্দঅপ ইন্দিয়া অসি ভোৎ ফংনবা রাজনিতিনা ইথিল পীবা নত্তে। অদুবু, হোংলক্লিবা ভারত অসিদা, লৈবাক অসিগী মেদিয়ানা মখোয় লৈবাক অসিগী পায়খৎপা থোকপা থবকশিংগী শরুক অমা ওইহল্লে। ২০১৪গী মমাঙদা স্তার্দঅপ হায়রিবা ৱাহৈ অসি খঙলমদে, মেদিয়ানা খন্নবদগী ঙসিদি য়ুমথোং খুদিং খঙলে।
মরুপশিং,
অদোম কুইরবা, হৈথোই-শিংথোইরবা মেদিয়াগী মীওই ঙাক্তনি। অদোমগী ৱারেপশিংনা লৈবাক অসিগী মেদিয়াগী মাইকৈ তাক্কনি। মরম অদুনা ঙসিগী থৌরম অসিদা, ঐনা অদোমগী মফমদা করিগুম্বা খর হায়জরি।
মরুপশিং,
করিগুম্বা সরকারনা থৌরম অমা হৌদোকপদা, মসি হেক্তা দরকার লৈতনা সরকারগী থৌরম অমা ওইরোই। করিগুম্বা সরকারনা অনৌবা ৱাখল্লোন অমা পায়খৎনবা তকশিনবা মতমদা, অনৌবা ৱাখল্লোন অদু সরকারগী হেক্তা ওইরোই। অজাদি কা অমৃত মহোৎসব অমসুং হর ঘর তিরঙ্গ অসি সরকারনা হৌদোকপা থবক্নি অদুবু মসি লৈবাক শীনবা থুংনা পাংথোক্লি। মসি চপ মান্ননা, ঙসি সরকারনা মহৌশাগী অকোয়বগী ফিবমদা অকনবা মীৎয়ং থম্লে। মহৌশাগী অকোয়বগী ফিবম ঙাক-শেন্নবা সরকারনা পায়খৎলিবা থবকশিং অসি রাজনিতিগী ৱাফম অমা ওইবগী মহুত্তা মীওইবগী য়াইফনবা থবক অমনি। হৌজিক ‘ইমাগী মিংদা উ পাম্বী অমা’ খোঙজং হৌদোক্লে। হন্দক হৌদোকখিবা ‘ইমাগী মিংদা উ পাম্বী অমা’ খোঙজং অসি মালেম শীনবা থুংনা খন্নরে। ঐ হন্দক জি-৭ মীফম শরুক য়াখি অমসুং ঐনা ৱাফম অসি পুখৎখি, মীওই খুদিংমক মখোয়গী মমা নুংশিবা মরমনা মখোয়গী মরক্তা ৱাফম অসি অঙকপা অমা ওইখি। মসিনা অচৌবা অহোংবা অমা পুরক্কনি হায়না খল্লি। করিগুম্বা লৈবাক অসিগী মেদিয়া হাওস মশিং য়াম্না মসিদা শরুক য়ারবদি, তুংগী মীরোলশিংগী য়াম্না কান্নবা ওইগনি। তুংগী মীরোলশিংগীদমক অফবা তুংলমচৎ অমা থম্লম্নবা মেদিয়া হাওসশিং পুন্না থবক তৌমিন্নগদবনি। অসিগুম্বা থবকশিং লৈবাক্কী থবক অমা ওইনা চাউখৎহন্নবা ঐনা মেদিয়া হাওসশিংদা হায়জরি। মসি সরকারগী থবক নত্তে, মসি লৈবাক্কী থবক অমনি। চৎলিবা চহি অসিদা ঐখোয়গী সংবিধান চহি ৭৫ মপুংফারকপগী থৌরমশিং পাংথোক্লি। মীয়াম মশাগী থৌদাং খঙহনবা অমসুং সংবিধানগী মরমদা ৱাখল তাহনবদা মেদিয়ানা মরুওইবা থৌদাং অমা লৌগনি।
মরুপশিং,
তুরিজমগা মরী লৈনবা হিরম অমা লৈরে। সরকারগী থৌশিলশিং খক্তনা তুরিজম চাউখৎলকপা নত্তে। লৈবাক অসি ইকায়খুম্নবগা লোয়ননা লৈবাক অসি মশক তাকপা অমসুং য়োনবা মতমদা লৈবাক অসিদা তুরিজম চাউখৎলকই। লৈবাক অসিদা তুরিজম চাউখৎহন্নবা লম্বীশিং মেদিয়াগী মীওইশিংনা থিবা য়াই। খুদম ওইনা, মহারাস্ত্রাগী পাউ-চে খুদিংমক্না সেপ্তেম্বর থা অসিদা ঐখোয়গী মাইকৈদগী বেঙ্গলগী তুরিজম য়োকখৎলসি হায়না ৱারেপ লৌবা য়াই। মতম অদুদা মহারাস্ত্রাগী মীয়াম্না বেঙ্গলগী বেঙ্গল ঙাক্ত উরগনি, করম্বা মতমদা বেঙ্গলদা চৎকনি হায়না মেদিয়ানা মীয়ামদা তাক্লগনি অমসুং বেঙ্গলগী তুরিজম চাউখৎলগনি। খুদম ওইনা, থা অহুমগী মতুংদা, অদোমনা তামিল নাদুগী মরমদা মীৎয়েং চঙনবা পুন্না মীৎয়েং চঙবা য়াই। করিগুম্বা মহারাস্ত্রাগী মীয়াম লমকোয়বা চৎনিংলবদি, মখোয় তামিল নাদুদা চৎকনি। মসিনা লৈবাক অসিদা তুরিজম চাউখৎহনগনি। হায়রিবা রাজ্যশিং অদুনা মহারাস্ত্রাগী কেম্পেনশিং পাংথোকপা মতমদা, মদুনা মহারাস্ত্রাগী ওইনা কান্নবা ফংগনি। মসিনা রাজ্যশিংগী মরক্তা অমনা অমবু পাম্নবা হেনগৎহনগনি অমসুং অদোম্না থবক অসিদগী কান্নবা ফংগনি অমসুং হায়রিবা থবক অসি অহেনবা থবক অমতা পাংথোক্তনা তৌবা ঙমগনি।
মরুপশিং,
ঐখোয়গী মেদিয়া মালেমগী লৈবাকশিংদা ফংবা হেনগৎহন্নবা ঐনা অদোমগী মফমদা হায়জরি। মালেম অসিদা ঐখোয়না য়ৌদবা মফম অমতা লৈহন্দনা ঐখোয়না খনগদবনি। মেদিয়াগা মরী লৈনবা ৱাফম লাকপদা, ঐখোয় মীওই করোর ১৪০ লৈবা লৈবাক অমনি। অসিগুম্বা অচৌবা লৈবাক অমদা, খুদোংচাবা অমশুং ওইথোকপা য়াবা কয়া লৈরি অমসুং অতেনবা মতমগী মনুংদা ভারত মালেমদা ৩শুবা খ্বাইদগী চাউবা ইকোনোমি ওইবা ঐখোয় উবা ফংলগনি। করিগুম্বা অদোম্না ভারতকী মাইপাকপশিং মালেমগী মফম খুদিং য়ৌহনবদা থৌদাং লৌরবদি, মসি থবক ওইনা পাংথোকপদা অদোম্না মতেং পাংগনি। মপান লৈবাকশিংদা তারিবা লৈবাক অমগী মমি অসিনা লৈবাক অদুগী শেন-থুম অমসুং চাউখৎপদা হকথেংননা অপনবা পীরি হায়বা অদোম নিংথিনা খঙলে। ঙসি অদোম্না মপান লৈবাকশিংদা লৈরিবা ভারতমচাশিংগী ফিবম ফগৎলকপা, ইকায়খুম্নবা হেনগৎলকপা উরে। মালেমদা ভারতনা লৌরিবা থৌদাং হেনগৎলক্লে। মালেমগী চাউখৎপদা ভারতনা হেন্না মতেং পাংবা ঙম্লে। হিরম অসিদা ঐখোয়গী মেদিয়ানা হেন্না থবক তৌবা মতমদা লৈবাক অসিনা কান্নবা হেন্না ফংগনি অমসুং মরম অদুনা অদোমগী পাউ-চেশিং অমসুং মেগাজিনশিং য়ু.এনগী লোলশিং ফোঙবা ঐনা পাম্মী। য়ু.এনগী লোল খুদিংমক্তা ভারতকী পাউ-চেশিং ফোঙবা হেনগৎহনগদবনি। অদোমগী পাউ-চেশিংগী ৱেবসাইতশিং, মাইক্রোসাইতশিং নত্ত্রগা সোসিএল মেদিয়া একাউন্তশিং হায়রিবা লোলশিং অদুদা ফোঙগদবনি। হৌজিক অসিগুম্বা থবকশিংদা এ.আইনা লাইনা পাংথোকপা ঙমগনি।
মরুপশিং,
ঐনা অদোমদা পাউতাক কয়া পীরে। অদোমগী পাউ-চেশিং অমসুং মেগাজিনশিংগী অকক্নবা মফম লৈ হায়বা ঐ খঙই। হৌজিক পাউ-চে খুদিংমক অমসুং মেগাজিন খুদিংমক দিজিতেলদা ফোঙলে। মসিনা মফম লৈতবা নত্ত্রগা য়েন্থোকপগী খুদোংচাদবা খুদিংমক কোকহনবা ঙমগনি। হায়রিবা পাউতাকশিং অসি অদোম্না খন্নগনি হায়না খল্লি অমসুং অনৌবা চাংয়েংশিং পাংথোক্লো অমসুং গনতন্ত্র মপাঙ্গল কনখৎহল্লসি। করিগুম্বা অদোমগী ইদিসনগী লমায় অনি ফাওবা মালেমগী য়ু.এনগী লোলশিংদা ফোঙলবদি, মালেমগী মফম অয়াম্বনা মদু উগনি অমসুং পাগনি। এম্বেসিশিংনা মদু উগনি অমসুং অদোমগী দিজিতেল ইদিসনশিং অদুনা ভারতকী পাউজেল শন্দোকপদা অচৌবা হৌরকফম অমা ওইগনি। অদোম্না কন্না থবক শুরিবমখৈ, লৈবাক অসি হেন্না চাউখৎকনি। মসিগী থাজবা অসিগা লোয়ননা, ময়াম পুম্নমক থাগৎচরি। ঐনা অদোমগা উনবগী খুদোংচাবশু ফংলে। ময়াম পুম্নমক ঐনা য়াইফ-পাউজেল পীজরি। থাগৎচরি।
