“This family of 130 crore Indians is all I have, you people are everything in my life and this life too is for you”
“I repeat the resolve that I will do whatever I can, for the welfare of everyone, for the honour of every Indian, for the security of every Indian and for the prosperity of every Indian and a life of happiness and peace for everyone”“Seva, Sushasan aur Gareeb Kalyan have changed the meaning of government for the people”“Government is trying to give a permanent solution to the problems which were earlier assumed to be permanent”“Our government started empowering the poor from day one”“we are working to build a new India not a vote bank”“100% empowerment means ending discrimination and appeasement. 100% empowerment means that every poor gets full benefits of government schemes”“No goal is impossible for capability of New India”ভারত ইমানা য়াইফরে!
ভারত ইমানা য়াইফরে!
হিমাচল প্রদেশকী রাজ্যপাল শ্রীমান রাজেন্দ্র সিংহজী, মফমসিগী মীয়াম্না য়াবা অমসুং থৱাই য়াওবা মুখ্য মন্ত্রী, শ্রীমান জয় রাম থাকুরজী, প্রদেশ অসিগী স্পীকর অমসুং ঐহাক্কী অরিবা মরূপ, শ্রীমান সুরেশজী, কেন্দ্রগী মন্ত্রী মন্দলদা লৈরিবা ঐহাক্কী মরূপ, এম.পি., এম.এল.এ., হিমাচলগী মীয়ামগী মীহুৎ খুদিংমক! ঙসিগী নুমিৎ অসি ঐহাক্কী পুন্সিগী য়াম্না অখন্নবা নুমিৎ ওই অমসুং অসিগুম্বা অখন্নবা নুমিৎ অসিদা ঐহাক্না লাইরৈবাক অসিগী মীয়ামদা কোক নোঞ্জবগী খুদোংচাবা ফংলে, মসিদগী হেন্না নুংঙাইববু পুন্সি অসিদা করি লৈরিবগে? অদুগা, ঐখোয়বু থৌজালবীনবগীদমক্তা মশিং য়াম্না লেংবীরক্লিবা মীয়াম খুদিংবু ঐহাক্না থাগৎচরি।
লৈবাক্কী লৌমী করোর কয়াগী একাউন্ততা পি.এম. সম্মান নিধীগী শেল পীখ্রে, মখোয়না শেল ফংবগা লোয়ননা ঐহাক্না শিম্লা লমদম অসিদগী লৈবাক্কী লৌমী করোর ১০ হেনবগী একাউন্ততা শেল হাপ্পগী খুদোংচাবসু ফংলি। লৌমীশিং অসিনা শিম্লাবু নীংশিংগনি, হিমাচলবু নীংশিংগনি, লাইরৈবাক অসিবু নীংশিংগনি। ঐহাক্না লৌমী খুদিংবু অমুক্কা হন্না থাগৎচরি, য়াইফ থৌজালসু পীজরি।
মরূপশিং,
ঙসিগী থৌরম অসি শিম্লাদা পাংথোক্লি, অদুবু থৌরম অসিদি লৈবাক পুনবগীনি। সরকার পায়রকপগী চহি ৮ মপুং ফারকপা অসিদা করি থৌরম পাংথোকসিগে, মতৌ করম্না পাংথোকসিগে হায়না কন্না খন্ন-নৈনখি। অদুদা, হিমাচলদগীসু ওইরিবা ঐখোয়গী নদ্দাজী, জয় রামজীনা ৱাহৌদোক অমা থম্বীরক্লি, ঐহাক্নসু ৱাফম অসিবু পামজৈ। চহি ৮ অসিগী মনুংদা, কোরোনাগী ইরাংনা মরম ওইরগা মমা-মপা লৈখিদ্রবা অঙাংশিংগী থৌদাং লৌবগী ঐহাক্না ঙরাং খুদোংচাবা ফংজখি। অসিগুম্বা অঙাং লিশিং কয়াবু য়েংশিনবগী থৌদাং সরকারনা পায়রে, দিজিতেলগী খুত্থাংদা ঙরাং মখোয়গী মফমদা শেল খরসু পীখ্রে। চহি ৮গী মনুংদা অসিগুম্বা থবক পাংথোকপদা য়াম্না নুংঙাইবা ফাওই। ঐখোয়না মরী লৈনবা থৌরম অমা হিমাচলদা পাংথোকসি হায়বা ৱাহৌদোক লাকই, মদুদা ঐহাক্না মিৎ উইশিল্লগা অদুম হায়খ্রে। মরমদি, ঐহাক্কী পুন্সিদা হিমাচলগী ফম য়াম্না চাউনা লৈ, অদুগা নুংঙাইবা মতমশিংবু হিয়ামচলদা লেঞ্জবা হায়বসিদগী হেন্না নুংঙাইবা করিমত্তা লৈত্রে। অদুনা, চহি ৮গী মনুংদা অসিগুম্বা অখন্নবা থৌরম অমা ঐহাক্কী কর্মভুমী, দেবভুমী অদুগা পুন্যভুমী ওইরিবা হিমাচলদা পাংথোক্লসি হায়বা ঐহাক্না য়ারিবনি। অদুগা, থৌরম অসিদা ঐহাক্না লাইরৈবাক অসিদগী লৈবাক মীয়ামগী মফমদা ৱা ঙাঙবগী খুদোংচাবা ফংলে, মসিদি হরাওবা হেন্না হেন্না হেনগৎহনবা থৌওং অমা অদুমক ওইরে।
মরূপশিং,
ভারতমচা করোর ১৩০গী সেবারী ওইনা থবক তৌনবা ঐহাক্কী ইফমদা খুদোংচাবা পীরিবা, ভারত মীয়াম্না ঐহাকপু থাজরিবা, অদুগা ঐহাক্না ঙসি করিগুম্বা অমা পাংথোকচবা ঙম্লিবা, চেন্থোক-চেন্সিন তৌবা ঙম্লিবা অসি মোদীনা তৌবনি খনবীগনু। মসিদা লৈবাক মীয়াম করোর ১৩০না নুংশিবীবদগী, থৌজালবীবদগী ওইরিবনি, মখোয়গী মথৌনা অমসুং মপাঙ্গলনা ওইহল্লিবনি। ঐহাক্না ইমুং মনুং ওইনা খন্দুনা অদোম্বু ঐহাক্কী ফমগী থাক্তগী খক য়েংদে, য়েংগে হায়নসু খনবা লৈতে, অদুগা ঙসিসু ঐহাক অসি প্রধান মন্ত্রীনি হায়না হায়বসু লৈতে। চে-চাংদা খুৎয়েক পীবা মতমদা, ঐহাক্কী থৌদাংগী মতুং ইন্না প্রধান মন্ত্রী ওইনা খুৎয়েক পীদবা য়াদবগী ৱাফম্বুদি লৈ। ফাইল নত্ত্রগা চে-চাং হেক লাপখিবদা ঐহাক্না প্রধান মন্ত্রী ওইবা অমুক লেপ্পি, মীওই করোর ১৩০গী মরক্তা লৈবা মীওই অমা অদুমক ওই। অদোমগী ইমুংগী মীওই অমগী মওংদা, প্রধান সেবক অমগী মওংদা ঐহাক্না লৈ, থবক তৌই। অদুগা ইমুংগী মীওই অমগী মথৌগুম্না অদোমগী অপাম-পামদবগা মরী লৈনবা, মীওই করোর ১৩০ লৈবা ইমুং, ঐহাক্কী পুন্সিদি মসিখক্তনি। ঐহাক্কী পুন্সিদা অদোমখক লৈ, ঐহাক্কী পুন্সিসু অদোমখক্কীনি। ঐখোয়গী সরকারগী চহি ৮ মপুং ফারে, অদুনা, ঐহাক্না লাইরৈবাক অসিদগী ঐহাক্কী ৱারেপ, পান্দম অমুক্কা হন্না হায়গনি। পান্দম অসিদি হন্না হন্না হায়গদবনি, কৈদৌনুংদা কাওরোইদবনি, মসি ঐহাক্কী ৱাখলনি, ঙসিসু ওইরি, তুংদসু অদুম ওইখিগনি। ঐহাক্না হিংবগী মরম ওইরিবা পান্দম, মরী অদুমক লৈনগদবা পান্দম, অদোমগা তুং কোইনা চৎমিন্নদুনা লৈগদবগী মরম ওইরিবা পান্দম অসিদি ভারত মচা খুদিংগী তেক্ত কায়দবা, ভারত মচাশিংগী মপাঙ্গল করম্না হেনগৎহনসিগে, মখোয়বু তংদু লৈতানা অমসুং নুংঙাই য়াইফনা করম্না লৈহনগনি, লাইরবা ওইরো, দলিত ওইরো, শোত্থরবা ওইরো, মনুং হঞ্জিনবা অমসুং অশুকপা জংগল মনুংদা লৈবশিং ওইরো, চিংদোন্দা খুন্দা লৈতাদুনা লৈরিবা ইমুংগী মীওই ওইরো, মীওই খুদিংগী য়াইফবা ওইনবা ঐহাক্না তৌবা ঙম্বমখৈ তৌগনি। ৱাখল্লোন অসিগা লোয়ননা ঐহাক্না ঙসি লৈবাক মীয়ামদা ইশাবু কত্থোক্লি।
মরূপশিং,
নীংতম্বগীদমক্তা থৱাই থাখিবা মীওইশিংনা পাম্লম্বা থাক্তুদা ঐখোয়না পুন্না ভারতপু য়ৌহনগনি। ঙসিগী নীংতম্বগী অমৃত মহোৎসব অসিদা ভারতকী তুংগী মতম্না নুংঙাই য়াইফবা ওইগনি থাজবগা লোয়ননা, ভারতকী নহারোলগী পাঙ্গল, নুপীশিংগী পাঙ্গলশিংদা থাজবা থমদুনা ঐহাক্না ঙসি অদোমগী নাক্তা লাক্লিবনি।
মরূপশিং,
ঐখোয়না পুন্সিদা অচৌবা পান্দম অমগীদমক্তা চঙশিনবা মতমদা ঐখোয়না কদাইদগী হৌখি হায়বা য়েংবগী তঙাই ফদবা লৈ। মদুবু নীংশিংলবা তুংদা, ঐখোয়না কদাই ফাওবা লাক্লে, খোঙজেল কয়া য়াঙনা লাক্লে, মায় পাকপা কয়া ফংলে, কয়া য়াম্না চাউখৎপা ঙম্লে হায়বা ঐখোয়না খঙবা ঙম্মি। ঐখোয়না ইং ২০১৪গী মমাংগী মতমশিং নীংশিংলুবা মতমদা, মতমশিং অদু কাঅবা য়াদেকো মরূপশিং, ঙসিগী থৌরমগী মগুন খঙবা ঙম্লিবনি। ঙসিগী ফিভমশিং য়েংলুবা মতমদা ঐখোয়না কয়া য়াম্না শাংনা লাক্লে খঙবা ঙমগনি।
ইং ২০১৪গী মমাংগী মতমগী পাউচেগী হেদলাইনশিংদা হুরান চিন্থী, শেঞ্জা থুমজা, ৱাথোক, মরী মতাশিংগী কান্নবা ঙাক্তা তৌনবগী, খাংঙুথক্তা মাঙখিবা স্কিম কয়াগী ই-পাউনা পীক থল্লম্মি। অদুবু, হৌজিক্তি মতম অদু হোংলে, ঙসিদি সরকারগী স্কিম্না কয়া য়াম্না কান্নবা পীগনি হায়বগী ৱারী ঙাক্তা ঙাইরে। মীওই কয়ানা ঐখোয়না মসিগী কান্নবা ফংলে হায়নরি। খ্বাইদগী অরোইবা য়ুম ফাওবদা খুদোংচাবা ফংহন্নবা ঐখোয়না হোৎনরি। লাইরবশিংগী হক্কী ফংফম থোকপা শেল মখোয়গী একাউন্ততা হকথেংননা য়ৌহনবা, মালেমদা ভারতকী স্তার্ত-অপকী থাক্কী ৱারী কয়া ঙসি শান্নরি। ৱর্ল্দ বেঙ্ক ফাওবনা ভারতনা কারবার তৌবদা লাইহন্নবা হোৎনরিবসিগী ৱারী শারি। হিন্দুস্তানগী অচম্বা মীয়াম্না মরাল লৈবশিংগী মাইয়োক্তা লেপ্পা ঙম্বগী ঐখোয়গী থৌনা, শেঞ্জা থুমজাগী মাইয়োক্তা জিরো তোলরেন্স লৈদুনা তুংলমচত্তা চঙশিনবগী ৱারী শারি।
ইং ২০১৪গী মমাংগী সরকারনা শেঞ্জা থুমজাবু সীস্তেমগী মরু ওইবা শরুক ওইনা লৌখি, মসিগী মাইয়োক্তা চৎপগী মহুত্তা মঙক নোন্থদুনা চৎখি। মতমদুদা, স্কিমশিংনা তঙাই ফদবশিংগী নাক্তা য়ৌদ্রিঙৈদা মতৌ করম্না হুরানখি হায়বা লৈবাক্না উখি। ঙসিদি, জন ধন একাউন্তকী কান্নবশিংগী ৱারী শানরি, জন ধন-আধার অমসুং মোবাইলগী পাঙ্গল অহুমগী ৱারী শানরি। মমাংদা, চাকখুমদা মৈখু মরক্তা হিংবা তারম্মি, হৌজিক্তি উজ্বালা স্কিমগী সিলিন্দর ফংলে। মমাংদা, মপান্দা অমাংবা তৌদবা য়ারমদে, ঙসিদি, য়ুম্থোং খুদিংদা অমাংশঙ লৈবদগী ইকায় খুম্ননা হিংবা ঙম্লে। মমাংদা, লাইয়েংবগী শেল তুংশিনবগী অৱাবা লৈরম্মি, ঙসিদি লাইরবশিংনা অয়ুশমান ভারতকী মতেং ফংলে। ত্রিপল তলাক্কী অকীবা লৈরম্মি, ঙসিদি, ইশাগী হক্কীদমক্তা লান্থেংনবগী পাঙ্গল লৈরে।
মরূপশিং,
ইং ২০১৪গী মমাংদা, লৈবাক্কী ঙাক-শেলগী মতাংদা ৱারম্মি। ঙসিদি, সর্জিকেল স্ত্রাইক, এয়র স্ত্রাইক্কীদমক্তা চাউথোকচরে, ঐখোয়গী ঙমখৈনা হান্নদগী হেন্না তেক্ত-কায়দবা ওইরে। লৈবাক্কী অৱাং নোংপোক লমদম্না মমাংদা অচান মীরাই নাইবা, খল নাইদবা চাউখৎ-থৌরাংনা ৱাহল্লম্মি। ঙসিদি, লমদম অসি থম্মোগসু নক্নরে, মতমগা চুনবা ইনফ্রাস্ত্রকচরসু ফংলে। সেবা, অফবা লৈঙাক অমসুং লাইরবগী য়াইফ য়ুম্বালগীদমক্তা শেম্বা ঐখোয়গী স্কিমশিংনা মীয়াম্না সরকারদা য়েংবা মিৎয়েং হোংহল্লে। সরকারনা পুম্নমক্কী মপুনি খল্লম্বা মতমদু হৌখ্রে, সরকারদি মীয়ামগী তেংবাংবা লৈবনি। হৌজিক্তি, সরকারনা অদোমগী পুন্সিদা অয়েৎপা পীবগী মহুত্তা অদোমগী পুন্সিবু য়াইফবা ওইনবগীদমক্তা থবক পাংথোক্লি। হৌখিবা চহিশিংদা, ঐখোয়না চাউখৎ-থৌরাংগী রাজনিতীবু লৈবাক্কী মরু ওইবা শক্তাক ওইহল্লে। অসিগুম্বা চাউখৎপা পামদুনা মীয়াম্না সরকার শেম্লি, দবল ইঞ্জিনগী সরকার খল্লি।
মরূপশিং,
সরকার অমা লাক্কনি, অমুক চৎখিগনি অদুবু সীস্তেমদি মান্ননা অদুমক লৈ হায়না মীয়াম্না হায়নবা ঐখোয়না তাই। ঐখোয়গী সরকারনা সীস্তেম অসিবু লাইরবগী হেন্না নুংঙাইবা ওইহন্নবা লেপ্তনা অহোংবা পুরক্লি। পি.এম. অৱস য়োজনা, স্কোলর্শিপ পীবা, পেন্সনগী স্কিম কয়াদা শেঞ্জা থুমজা তৌবগী থৌওংবু তেক্নোলোজীগী মতেংনা য়াম্না হন্থহনখি। পর্মানেন্ত ওইরে খল্লম্বা শিংনবা কয়াগী ঐখোয়না পর্মানেন্ত ওইবা ৱারোইশিন পুরক্না লেপ্তনা হোৎনরি। সেবা তৌবা, অফবা লৈঙাক লৈবা অমসুং লাইরবগী য়াইফবনা পান্দম ওইরকপগী অফবা খুদম অমদি দাইরেক্ত বেনেফিত ত্রান্সফর স্কিম্নি। ঐহাক্না হৌজিক্তসু হায়খ্রে, দি.বি.তি.গী পাম্বৈদগী করোর ১০ হেনবা লাইরবশিংগী ইমুংগী বেঙ্ক একাউন্তশিংদা লুপা করোর ১২ হেনবগী শেনফম হকথেংননা পীখ্রে। মসিদি ঐখোয়গী অপীকপা লৌমীশিংগী তেংবাং অমসুং মখোয়গী পুন্সিবু ইকায় খুম্নবা ওইহন্নবা থৌওংনি। ঐখোয়না মমাংগী চহি ৮ অসিদা লৈবাক মীয়ামগী বেঙ্ক একাউন্তশিংদা লুপা করোর লাখ ২২গী শেনফম দি.বি.তি.গী খুত্থাংদগী হকথেংননা য়ৌহনখি। অদুগা, পৈশা ১০০ থাবা মতমদা পৈশা ৮৫না মফম মরাং খঙদবদু হৌজিক লৈত্রে। অথাবা শেনফম অদুমক বেনিফিশরীশিংগী মফমদা চপ চানা অমসুং কাংলোন চুম্না ফংলে।
মরূপশিং,
ঙসিদি, স্কিম অসিগী মতেংদগী লুপা করোর লাখ ২.২৫গী লিকেজ লৈত্রে। শেনফম অসি মমাংগী মতমদা মিদ্দলমেনশিংগী মনাক্তা চৎলম্বনি। দি.বি.তি.না মরম ওইরগা, সরকারগী স্কিমশিংগী অরানবা খুদোংচাবা লৌরম্বা শাশিন্নবা মমিং করোর ৯ হেন্না ককথৎখ্রে। অরানবা মিংদা য়াম্লবা শেনফম অসি মীওই খরনা হীরম খুদিংদগী লৌরম্মিবনি, অদোমসু অমুক্তা খন্থদুনা য়েংবীয়ু। মসিবু লৈবাক্কী লাইরবগী মফমদা অরানবা তৌবা নত্তবরা? তুংগীদমক্তা অফবা তৌরক্কনি হায়বগী থাজবা থম্লিবা অঙাংশিংগী মফমদা অরানবা তৌবা নত্তবরা? মসি পাপ নত্তবরা? করিগুম্বা কোরোনাগী মতমদা অরানবা মিং করোর ৯ লৈরম্লবদি, সরকারনা লাইরবশিংদা পীরিবা কান্নবশিং অসি মখোয়গী মফমদা য়ৌবা ঙম্লমগদরা হায়বা অমুক্তা খনবীয়ু।
মরূপশিং,
লাইরবশিংনা নুংতিগী থেংনরিবা অৱাবশিং হন্থরকপা মতমদা মখোয়গী মপাঙ্গল লৈরক্কনি। লাইরবগী খয়াত্তগী করম্না থোকসিগে হায়না অনৌবা পাঙ্গলগা লোয়ননা হোৎনবা ঙম্লক্কনি। ৱাখল্লোন অসিগা লোয়ননা, ঐখোয়না অহানবা নুমিত্তগী লাইরবশিংগী পাঙ্গল হাপ্নবা হোৎনদুনা লাক্লিবনি। মখোয়গী পুন্সিদা থেংনবা অৱাবা অমমম ওইনা হন্থহন্নবা লেপ্তনা হোৎনরি। ঙসিদি, লৈবাক্কী লাইরবা করোর ৩গী নাক্তা মশাগী পক্কা য়ুম লৈরে, লাইরবা করোর ৫০ হেনবগী মফমদা লুপা লাখ ৫ ফাওবা লেম্না লাইয়েংবগী খুদোংচাবা লৈরে। লৈবাক্কী লাইরবা করোর ২৫গী নাক্তা লুপা লাখ ২-২গী এক্সিদেন্ত অমসুং তর্ম ইন্স্যুরেন্স লৈরে। লৈবাক্কী লাইরবা চাউরাকপা করোর ৪৫গী জন ধন বেঙ্ক একাউন্ত হাংলে। সরকারগী স্কিমগী কান্নবা ফংদবা ইমুং অমত্তা লৈবাক অসিদা ঙসি লৈরম্লোই হায়না ঐহাক্না চাউথোক্না হায়বা ঙম্মি। ঐখোয়না মনুং হঞ্জিনবা অমসুং অথাপ্পা মফমদা চত্তুনা ভেক্সিন কাপ্পি, কোরোনাগী মনুংদা থবক পাংথোকখিবা মতৌগীদমক্তা ঐহাক্না জয় রামজীবু থাগৎচনীংই। লমদম অসিনা তুরিজমগী মফম ওইবনা, তুরিজমদা অকায়বা লৈহন্দনবা খোঙজেল য়াঙনা ভেক্সিন কাপখি। হিন্দুস্তানগী মনুংদা ভেক্সিন কাপ্পগী থবক য়াম্না ঙন্না লোইশিনখিবগী মরক্তা জয় রামজীগী সরকারসু মনুং চল্লিবনি। ঐখোয়না খুঙ্গংগী ইমুং করোর ৬তা তোতি ঈশিংসু য়ৌহনখি।
মরূপশিং,
ঐখোয়না মুদ্রা লোন করোর ৩৫ পীদুনা খুঙ্গং অমসুং অপীকপা শহরগী নহারোলশিংদা মশানা থবক পীজবগী খুদোংচাবা পীরি। মুদ্রা লোনগী মতেংদগী কনা অমনা তেক্সি থৌরি, ফুরিত তুবগী দুয়াকন হাংলি, নুপীমচা কয়ানা মশানা পামজবা কারবার তৌনরি। থেলা ইন্দুনা শেল তানবা মীওইশিংসু খ্বাইদগী অহানবা ওইনা বেঙ্কতগী তেংবাং ফংলি। মশাগী শেন্থোক হেনগৎহনবগী পাম্বৈ ফংলে। অদুগা প্রধান মন্ত্রী মুদ্রা য়োজনাগী মখাদা বেঙ্কতগী লোন ফংবশিংগী মরক্তা ৭০%না ঐখোয়গী নুপী ওন্তোপ্রিনরশিংনা ওইবসিদা ঐহাক্না নুংঙাইবা ফাওই।
মরূপশিং,
হিমাচলগী ওইনা ইমুং অমদা লান্মী ওইদবা ইমুং কয়া লৈরম্লোই হায়না ঐহাক্না খল্লি। লমদম অসিদি অথৌবশিংগী লমদম্নি। মফমসিগী অথৌবী মমাশিংনা অথৌবা মচাশিংবু মতম্বাক্তা চাউনবা য়োক্লিবনি। অদুগা অসিগুম্বা অথৌবশিং অসিনা লৈবাক্কী ঙাক-শেনবগীদমক্তা মশাগী মতম খুদিং কত্থোক্লিবনি।
মরূপশিং,
লমদমসিদি লান্মীশিংগী মফম্নি। লান্মীগী ইমুংগী লমদম্নি। মমাংগী সরকারনা মখোয়গী মফমদা করম্না তৌরম্মি হায়বসি লমদমসিগী মীয়াম্না কৈদৌনুংদা কাওরোই। ৱান রেঙ্ক, ৱান পেন্সনগী মিংদা মখোয়দা করম্না নম্থাক তৌবীখি হায়বা কাওরোই। ঐহাক্না হান্না লান্মী ওইরম্বা লদাখকী মীওই অমগা ৱারী শারম্বনি। মহাক্না মশাগী পুন্সি আর্মীদা লেনখি, ঐখোয় লাক্লবা তুংদা মহাক্না পক্কা য়ুম ফংখি। মহাক্না থবক্তগী পোত্থাবা চহি ৩০-৪০ শুরে। লান্মীগী ইমুংনা ঐখোয়না হোৎনরিবা নীংথিনা খঙই। দিকেদ মরি হেন্না ঙাইদুনা লাক্লবা ৱান রেঙ্ক ৱান পেন্সন স্কিম চৎনহনখিবা অসি ঐখোয়গী সরকারনি। লান্মী ওইরম্বশিংদা মখোয়গী এরিয়রগী শেল পীথোকখ্রে। মসিগী খ্বাইদগী য়াম্না কান্নবা ফংবসি হিমাচলগী ইমুং অয়াম্বনি।
মরূপশিং,
লৈবাকসিদা মতম কয়াদগী ভোতবেঙ্ককী রাজনিতী তৌদুনা লাক্লি। মসিনা লৈবাক্কী মফমদা অকায়বা য়াম্না পীখি। ঐখোয়দি অসিগুম্বা রাজনিতী তৌদে, অনৌবা ভারত শেম্বগী থবক ওইনা পাংথোকই। লৈবাক চাউখৎপা, মরোমদোম লেপচবা ঙম্নবা হোৎনবাগী মতাংদা লাকপদা ঐখোয়না ভোতবেঙ্ক উদে, লৈবাক মীয়াম করোর ১৩০গী য়াইফ য়ুম্বাল উই। মরম অদুনা ঐখোয়না সবকা সাথ, সবকা বিকাস, সবকা বিশ্বাস, অমসুং সবকা প্রয়াসকী ৱাখল্লোনগা লোয়ননা তুংলমচত্তা খোঙদারি। অচান মীরাই নাইদনা সরকারগী স্কিম খুদিংগী কান্নবা মীপুম খুদিংদা ফংহনবা হায়বসি ঐখোয়গী পান্দম্নি। জয় রামজীগী লুচিং মখাদা হিমাচল প্রদেশতা মাইকৈ অসিদা থবক পায়খৎলি খঙবদা ঐহাক্না নুংঙাইবা ফাওই। হর ঘর জলগী মতাংদা হিমাচলনা য়ুম ৯০% কোনবা ঙমখ্রে। কিস্নোর, লাহোল, স্পিতি, চম্বা, হমিরপুরগুম্বা জিলাশিংদদি ১০০% কোনবা ঙমখ্রবনি।
মরূপশিং,
ভারতমা মালেমগী মাংদা কোক নোন্দনা, কোক থাংগত্তুনা ৱারী শাগনি হায়না ঐহাক্না ইং ২০১৪গী মমাংদা অদোমগী নাক্তা লাকপদা হায়খিবদু ঙসিসু নীংশিংলি। ঙসিদি, ভারতনা উপাই লৈতবদগী মরুপ ওইবগী খুৎ থাংদোক্তে, তেংবাংগে হায়বগী ৱাখল্লোন্দা খুৎ থাংদোকই। ঐখোয়না কোরোনাগী মতমদা লৈবাক ১৫০ হেনবদা হিদাক লাংথক অমসুং ভেক্সিন পীখি। মসিদা হিমাচলগী ফার্মা হবনা অচৌবা শরুক য়াখি। ঐখোয়গী মতি লৈ, থবক ওইনা পাংথোকপসু ঙম্মি হায়না ভারতনা উত্তুনা তাকখ্রে। ভারত্তা লাইরবা মশিং হন্থরক্লি, মীয়ামগী খুদোংচাবা হেনগৎলক্লে হায়না মালেমগী লুপ্না খঙবা হৌরে। মরম অদুনা, ঐখোয়না ঐখোয়গী মীয়ামগী তঙাই ফদবা ফংহনবতা নত্তনা মীয়ামগী অনৌবা অপাম্বা লীরক্লিবশিংসু ফংহনবা তাবনি। ২১শুবা চহি-চাগী মতিক লৈবা ভারতকীদমক্তা, লাক্কদৌরিবা চারোন-শুরোনগী অফবা তুংগী মতমগীদমক্তা ইশাবু কত্থোকপা তাবনি। শক্তাক্তা অৱাৎপা লৈবা নত্তবা, মতমগা চুনবা ভারত অমগী শক্তাক শেম্বা তাবনি। লোকেল মেন্যুফেকচররশিংনা লোকেলগী অপাম্বা পীবতা নত্তনা মালেমগী কৈথেলদা ঐখোয়গী পোত্থোক য়োনবা ঙম্বা ভারত অমা শেম্বা তাবনি। আত্মানির্ভর ওইবা, ভোকেল ফোর লোকেল ওইবা অমসুং ইশাগী পোত্থোক্তা চাউথোকচবা ভারত অমা ঐখোয়না শেম্মিন্নবা তাবনি।
হিমাচলগী হোস্পিতাল, মফমসিগী বাস্তু কলাদি হান্নদগী মমিং লৈরে। চম্বাগী ধাতুগী থবক, সোলনগী উচান, আর্ত, কাংগ্রাগী মিনিএচর পেন্তিংগীদমক্তা মীয়াম কয়া ইয়েংবা লাক্নৈ, মদুদা ঙাওনৈ। অসিগুম্বা পোত্থোকশিংনা লৈবাক্কী কাচিন কোয়া, মালেমগী কৈথেলদা য়ৌহন্নবা ঐখোয়না কন্না হোৎনরি।
হিমাচলগী মশাগী পোত্থোক্কী মশেক মঙালনা কাশিগী বাবা বিশ্বানাথ মন্দির ফাওবা য়ৌরে। ঐখোয়গী ইমা, ইচে-ইচলশিংনা কুল্লুদা শাবা পুহবু কাশিগী বিশ্বানাথ মন্দিরগী পুজারী অমসুং মসিবু ঙাক-শেনবগী থৌমীশিংনা নিংথমথাদা য়াম্না কান্ননা শিজিন্নরি। বনারসকী এম.পি. অমা ওইনা ঐহাক্না অসিগুম্বা খুদোলগীদমক্তা হিমাচল প্রদেশকী মীয়ামদা থাগৎপা ফোংদোকলি।
মরূপশিং,
ঐখোয়না মমাংগী চহি ৮গী হোৎনজমনগী মহৈ য়াল্লে। মসিনা ঐখোয়দা থাজবা য়াম্না লৈহল্লে। ঐখোয় ভারত মচাশিংগী মতিক্কী মাঙদা ওইথোক্লোইদবা করিমত্তা লৈতে। ঙসিদি, ভারত অসি মালেমগী খ্বাইদগী খোঙজেল থুনা চাউখৎলিবা শেন্মিৎলোন ওইরি। মীরমদা এক্সপোর্ত তৌবগী লমদসু রেকোর্দ থমখ্রে। চহি ৮গী মমাংদা ঐখোয় অসি স্তার্ত-অপকী মতাংদা করিসু ওইরমদে, ঙসিদি, মালেমগী খ্বাইদগী অহুমশুবা চাউবা স্তার্ত-অপ ইকোসীস্তেম ঐখোয়না ওইরে। ঐখোয়গী নহারোলশিংনা লুপা করোর লিশিং কয়াগী কম্পেনী কয়া চয়োল খুদিংগী পুথোকপা ঙম্লি। লাক্কদৌরিবা চহি ২৫গী ৱারেপ কয়া মঙফাওনহন্নবগীদমক্তা ঐখোয়না অনৌবা শেন্মিৎলোন অমসুং ইনফ্রাস্ত্রকচর কয়া খোঙজেল য়াঙনা শেম্লি। ঐখোয়না হন্দক্কী বজেত্তা পর্বতমালা স্কিম লাউথোকখ্রে, মসিনা হিমাচলগুম্বা চিংগী লমদমগী কন্নেক্তিবিতী হেন্না ফগৎহনগনি। মসিদা নত্তনা, ঐখোয়না ভাইব্রেন্ত বোর্দর ভিলেজকী স্কিমগী ৱাহৌদোকসু বজেত্তা হাপখি। মসিনা মরম ওইরগা, ঙমখৌদা লৈবা খুঙ্গংশিং ভাইব্রেন্ত ওইরগনি, লমকোয়বশিংগী পন্থুংফম ওইরগনি, থবক থৌরমশিংগী ময়োল ওইরগনি। ঙমখৈদা লৈবা খুঙ্গংগী চাউখৎ-থৌরাংগীদমক্তা ঐখোয়না অখন্নবা স্কিম শেম্লিবনি। মসিনা হিমাচলদা মশক থোকপা কান্নবা পীগনি।
মরূপশিং,
ঙসিদি, ঐখোয়না মালেমগী খ্বাইদগী চাউবা দিজিতেল ইনফ্রাস্ত্রকচর শেম্বদা মিৎয়েং চঙলি। লৈবাক্কী হকশেলগী সেবাশিংবু মতমগা চুনহন্নবা থবক পায়খৎলি। অয়ুশমান ভারত হেল্থ ইনফ্রাস্ত্রকচর মিসনগী মখাদা জিলা অমসুং ব্লোক্কী থাক্তা ক্রিতিকেল হেল্থকেয়রগী খুদোংচাবা শেম্লি। জিলা খুদিংদা মেদিকেল কোলেজ অমা লৈহন্নবা থবক পায়খৎলি। মসিদা নত্তনা, লাইরবা মমাগী মচাশিংগী দাক্তর ওইবগী মঙলান মঙফাওহনবা য়ারে। মমাংগী মতমদা, স্কুল তম্বদা ইংলিশ মিদিয়মদা তম্লক্ত্রবা ওইরবদি, দাক্তর তম্বা য়ারোই হায়না খন্নরম্মি। অদুবু, মেদিকেল অমসুং ইঞ্জিনিয়রিংবু মমালোন্দা তমহনবা য়াহন্নবা ঐখোয়না ৱারেপ লৌরে, মসিনা মরম ওইরগা লাইরবা অঙাংশিংনা দাক্তর, ইঞ্জিনিয়র ওইবা য়ারগনি অমসুং ইংলিশ লোলগী মখা পোনবগী মথৌসু তাররোই।
মরূপশিং,
লৈবাক অসিদা এমসকুম্বা অফবা ইন্সতিত্যুতপু লৈবাক্কী মফম খুদিংদা লৈহল্লে। বিলাসপুরদা শারিবা এমস অসিসু মসিগী খুদম অমনি। হৌজক্তি, হিমাচলগী মীয়াম্না চন্দিগর নত্ত্রগা দিল্লীদা চৎপগী মথৌ তাররোই।
মরূপশিং,
হোৎনরিবশিং অসিনা হিমাচলগী চাউখৎ-থৌরাংগী খোঙজেল য়াঙখৎহনবগী থৌদাং লৌগনি। শেন্মিৎলোন্না মপাঙ্গল লৈরবা, রোদ কন্নেক্তিবিতী, ইন্তর্নেত কন্নেক্তিবিতী, হকশেল সেবাশিংনা ফগৎলকপা মতমদা তুরিজম্বুসু হেন্না ফগৎহনগনি। ভারতনা মরমদম অসিদা দ্রোন শারিবা, দ্রোন শিজিন্নবগী থৌওং হেনগৎলক্লিবা, মসিনা অথাপ্পা মফম, জংগলগী মফমশিংদা দ্রোন সেবাগী কান্নবা য়াম্না ফংলগনি।
ইচিল ইনাওশিং,
মমাংগী চহি ৮ অসিদা নীংতম্বগী চহি ১০০ মপুং ফাবগী মতম, হায়বদি ইং ২০৪৭কী অকনবা ফম্বাক অমা শেমখ্রে। অমৃতকাল অসিদা ঐখোয়গী পান্দম ফংবগী মন্ত্রা অমখক লৈ – সবকা প্রয়াস। মীয়াম পুনমিন্নসি, হোৎনমিন্নসি অমসুং পুন্না তুংলমচত্তা খোঙদামিন্নসি – ৱাখল্লোন অসিগা লোয়ননা ঐখোয়না থবক তৌবা তাবনি। চহি কয়া, চারোন-শুরোন কয়াগী মতুংদা ঐখোয়না হৌজিক্কী খুদোংচাবা অসি ফংলিবনি, ঐখোয়গী চারোন শুরোন্না ফংলিবনি। মরম অদুনা, লাকপীরো, ৱারেপ লৌরসি, ঐখোয়না পুম্নমক্না “ঐখোয় পুম্নমক্না হোৎনমিন্নবা” হায়বা থৌওং অসিদা ইশাগী থৌদাং হেনগৎহল্লসি, শরুক য়াবগী চাং হেনগৎহল্লসি।
থাজবা অসিগা লোয়ননা, ঙসি হিমাচলনা থৌজাল পীবিরি অমসুং লৈবাক্কী ব্লোক খুদিংগী মীয়াম্না ঙসি থৌরম অসিগা মরী লৈনরি। ঙসিদি, ভারত মচা করোর কয়ানা শিম্লাগা পুল্লি। অদুগা ঐহাক্না শিম্লাগী লমদমদগী ভারত মচা করোরশিং অসিগা ৱারী শারি। ঐহাক্না অদোম করোরবু য়াইফ পাউজেল পীজরি অমসুং অদোম্না লেপ্তনা থৌজানবীয়ু, ঐখোয়না অদোমগীদমক্তা অহিং নুংথিল নাইদনা থবক তৌজগনি। ৱাখল্লোন অসিবু মখা তানা পুথরদুনা, অদোমগী থৌজালগীদমক্তা ঐহাক্না পুম্নমকপু থম্মোই শেংনা থাগৎচরি।
ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
অমুক্কসু হন্না-হন্না থাগৎচরি!
