ভারত ইমানা য়াইফরে
ভারত ইমানা য়াইফরে
কর্নাতকাগী রাজ্যপাল শ্রী থাৱর্চান্দ গেহলোতজী, মুখ্য মন্ত্রী, শ্রী বাসবরাজ বোম্মাইজী, কেন্দ্র মন্ত্রী মন্দলগী ঐহাক্কী মরুপ, শ্রী ভগ্বন্ত খুবাজী, কর্নাতকা সরকারগী মন্ত্রী অমসুং এম.পি., ঐহাকপু থৌজাল পীবিনবগীদমক্তা লেংবীরক্লিবা মশিং য়াম্লবা ঐহাক্কী নুংশিরবা ইচিল ইনাওশিং!
কর্নাতক দা, এল্লা, সহোদরা সহোদরিয়ারিগে, নন্না বন্দানেগ্রু, ঐহাক্কী মিৎয়েং তাবা মফম খুদিংদা মীয়াম কয়া উবা ফংজরি। হেলিপেদকী অকোয়বদসু মীয়াম্না থল্লে। ঐহাক্কী মাইকৈ অকোয়বদা য়েংবম্মিনি, পন্দালগী ৱাংমদসু মীওই কয়ানা নুংশাদা লেপ্লি। অদোমগী মসিগুম্বা নুংশিবা, থৌজালশিংনা ঐখোয়গী চাউরবা পাঙ্গল ওইরিবনি।
মরুপশিং,
য়াদগিরগী ইনাক খুল্লবা পুৱারী লৈ। রত্তিহালীগী অরিবা লানবন অসিনা ঐখোয়গী মমাংগী মতম, ইপা ইপুশিংগী তৌবা ঙম্বগী খুদম্নি। ঐখোয়গী চৎনবী, সংস্কৃতী, নাৎ অমসুং হেরিতেজকা মরী লৈনবা মফম কয়া অমা লমদমসিদা লৈরি। মফমসিদা সুরাপুর নিংথৌ শাগৈ হৌদোকখিবনি, অমসুং মসিবু শক্নারবা নিংথৌ মহারাজা ভেঙ্কতপ্পা নায়ক্না মহাক্কী স্বরাজ অমসুং লৈঙাকপগী ৱাখল্লোন্না মরম ওইরগা লৈবাক পুম্বগী মফমদা খঙহনখিবনি। ঐখোয়না হেরিতেজ অসিগীদমক্তা চাউথোকচফম থোকই।
ইচিল ইনাওশিং,
ঐহাক্না ঙসি কর্নাতকাদা লাক্লিবসি অদোমগী মফমদা লুপা কয়াগী প্রোজেক্ত খুৎশিন্নবা অমসুং উরেপ উয়ুং তম্বা লাক্লিবনি। মফমসিদা ঙসি ঈশিং অমসুং শোরোক্কা মরী লৈনবা অচৌবা প্রোজেক্ত কয়াগী উরেপ উয়ুং তম্বগা লোয়ননা মীয়ামদসু খুৎশিন্নগনি। নরায়নপুর লেফ বেঙ্ক কেনেল চাউথোকপা অমসুং মোদর্নাইজেসন তৌবদগী য়াদগির, কালবুর্গী অমসুং বিজয়পুর জিলাগী লৌমী লাখ কয়াদা হকথেংননা কান্নবা পীগনি। য়াদগির ভিলেজ মলতি ৱাতর সপ্লাই স্কিমগী মতেংদগী ইমুং লাখ কয়াগী মফমদা অশেংবা থক্নবা ঈশিং ফংহল্লগনি।
সুরত-চেন্নৈ কন্নেক্তিবিতী কোরিদোরগী শরুক অমা কর্নাতকাদা য়াওরি, মসিগী থবকসু ঙসিদগী হৌরগনি। মসিনা য়াদগির, রাইচুর অমসুং কালবুর্গী য়াওনা লমদমসিগী মফমশিংদা পুন্সি মহিং হেন্না নুংঙাইহনগনি, অদুগা মফমসিগী কারবার অমসুং থবক্কী খুদোংচাবা চাউনা লৈরগনি। চাউখৎ থৌরাংগী মসিগুম্বা প্রোজেক্তশিং অসিগীদমক্তা ঐহাক্না কর্নাতকাগী মীয়াম খুদিংবু থাগৎচরি। ঐহাক্না বোম্মাইজী অমসুং মহাক্কী তীম্বু থাগৎচরি। অৱাং কর্নাতকাদা চাউখৎ থৌরাংগী পায়খৎলিবা থবকশিং অসি তসেংনা থাগৎনিংঙাইনি।
ইচিল ইনাওশিং,
ভারতনা নিংতম্বগী চহি ৭৫ মপুং ফারে। লৈবাক্না মথংগী চহি ২৫গী ৱারেপ কয়া মঙফাওনহন্নবগীদমক্তা চঙশিল্লিবনি। মসিগী চহি ২৫ অসিদি লৈবাক্কী মীপুম খুদিংগী অমৃত কালনি, রাজ্য পুম্নমক্কী অমৃত কালনি। ঐখোয়না মসিগী অমৃত কাল অসিদা চাউখৎপা ভারত অমা শেমগদবনি। মীওই, ইমুং অমসুং রাজ্যশিংনা কেম্পেন অসিগা মরী লৈনরকপা মতমদা মসিনা ওইথোক্কনি। লবুক্তা লৈরিবা লৌমীগী পুন্সি নুংঙাইরকপা অমসুং ওন্তোপ্রিনরশিংগী পুন্সি নুংঙাইরকপা মতমদা ভারতনা চাউখৎপা ঙমগনি। অফবা লৌরোক লৈরবা অমসুং ফেক্তরী আউপুত হেনগৎলকপা মতমদা ভারতনা চাউখৎকনি।
অদুগা মরুপশিং,
ঐখোয়না মমাংগী নেগেতিব এক্সপেরিএন্স অমসুং ফত্তবা পোলিসী কয়াদগী তম্বা, মখোয়বু অমুক হন্না থোকহন্দবা মতমদা হায়রিবশিং অসি ওইথোক্কনি। ঐখোয়গী মাঙদা য়াদগির, অৱাং কর্নাতকাগী খুদম লৈরে। লমদমসিগী তৌবা ঙম্বগী মতিক অসি কনাদগীসু তাদবনি। মমাংগী সরকারনা য়াদগির অমসুং মসিগুম্বা জিলা খরবু শোত্থরবনি হায়না লাউথোক্তুনা মশাগী থবক কোম্নবা হোৎনখি। লমদমসিনা শোত্থরিবসি করি মরমগীনো, মসিবু মতৌ করম্না লোইশিনগনি, মসিগীদমক্তা সরকারনা খন্নবা মতম ফাওবা কাইথোকখিদে, থবক পাংথোকপা হায়বদুদি য়াম্না লাপখ্রে।
শোরোক, মৈ অমসুং ঈশিংগী মতাংদা ইনভেস্ত তৌবগী মতমদা মখোয়না ভোত বেঙ্ক পোলিতিক্স শান্নরগা লৈথোকখি। মসিগী খুন্নাই, লাইনীং চৎপা মীওইশিংগী ভোত অসি শোইদনা ফংলগদবা ভোত করম্না ওইহনগনি হায়বগী মখা পোন্না স্কিম অমসুং প্রোগ্রামশিং শেমখি। মসিগী খ্বাইদগী চাউবা চৈথেং কর্নাতকানা ফংখি, মসিগী লমদমসিনা থেংনখি, অদোম ইচিল ইনাওশিংনা থেংনখি।
মরুপশিং,
ঐখোয়গী সরকারগী মিৎয়েংদি ভোত বেঙ্ক নত্তে, ঐখোয়দি চাউখৎ থৌরাংদা মিৎয়েং চঙবনি। অদোম্না ইং ২০১৪দা ঐহাক্কী ইফমদা থৌজাল পীবিখি, চাউরবা থৌদাং শিন্নবিখি। জিলা অমখক্না করিগুম্বা চাউখৎপগী পেরামীতরদা মনিঙদা লৈহৌবা মতমদা, লৈবাক অসিনা কৈদৌনুংদা চাউখৎপা ঙম্লোই হায়বা ঐ খঙই।
মরম অদুনা, শোত্থরবনি হায়না মমাংগী সরকারনা লাউথোক্লম্বা জিলা খুদিংবু ঐখোয়না চাউখৎপগী থাজবা পীখি। ঐখোয়গী সরকারনা য়াদগির য়াওনা লৈবাক্কী খুঙ্গং ১০০গী এস্পিরেস্নেল দিস্ত্রিক্তকী প্রোগ্রাম হৌদোক্লিবনি।
ঐখোয়না জিলাশিংগী লৈঙাকপগী থৌওংদা অহেনবা মিৎয়েং চঙখি। চাউখৎপগী পেরামীতর খুদিংদা থবক পাংথোকপা হৌখি। মসিগী কান্নবসি য়াদগির য়াওনা জিলা খুদিংনা ফংলি। ঙসিদি য়েংবীয়ু, য়াদগিরগী অঙাং ১০০% মক তীকা কাপ্লে। মেলনৌরিশ ওইবা অঙাং মশিংসু মশক থোক্না হন্থরে, জিলাসিগী খুঙ্গং পুম্নমক শোরোকশিংনা শম্নহল্লে অমসুং গ্রাম পঞ্চায়তশিংদসু দিজিতেল সর্ভিস পীনবা কম্মন সর্ভিস সেন্তর লৈরে। এজুকেসন, হেল্থ নত্ত্রগা কন্নেক্তিবিতী ওইরো, য়াদগিরনা এস্পিরেস্নেল দিস্ত্রিক্ত প্রোগ্রামগী থবক খ্বাইদগী নিংথিনা পাংথোকপা মকোক থোংবা ১০গী মনুং চল্লি। মীয়ামগী মীহুত অমসুং জিলাগী লৈঙাক্লোইশিংবু মসিগুম্বা মশক থোকপা মায় পাকপগীদমক্তা থাগৎপা ফোংদোক্লি। য়াদগির জিলাদা ঙসিদি অনৌবা ইন্দস্ত্রী লাক্লগনি। কেন্দ্র সরকারনা মফমসিদা ফার্মা পার্ক শাবগী অয়াবা পীরবনি।
ইচিল ইনাওশিং,
২১শুবা চহি-চাগী ভারতনা চাউখৎপগীদমক্তা য়াম্না মরু ওইবা ৱাফম অমদি ৱাতর সেক্যুরিতীনি। ভারতপু চাউখৎহনগে হায়রবদি ঙমখৈ, সমুদ্র তোর্বান অমসুং ইন্তর্নেল সেক্যুরিতীগী মতাংদা পাংথোকপগুম্না, ৱাতর সেক্যুরিতীগী মতাংদা থেংনবা শিংনবা খুদিংবু মান্ননা মিৎয়েং চঙদুনা লোইশিনবা তাবনি।
দবল ইঞ্জিন সরকারনা ইকায় খুম্নবা অমসুং মপাঙ্গল হেনগৎহনবগী ৱাখল্লোনগা লোয়ননা থবক তৌরি। অদোম্না ঐহাক্কী ইফমদা ইং ২০১৪দা থৌদাং শিন্নখি, মতমদুদা ইরিগেসনগী প্রোজেক্ত ৯৯ লৈরম্মি অমসুং মখোয় পুম্নমক দিকেদ কয়াদগী পন্দুনা লাকখিবনি। মখোয়শিং অসিগী মনুংদগী চাউরাকপা স্কিম ৫০দি ঙসি লোইশিল্লে। ঐখোয়না মমাংগী প্রোজেক্তশিংদসু থবক তৌখি, ঐখোয়গী নাক্তা লৈরম্বা মমাংগী খুদোংচাবশিংবু হেন্না চাউখৎহনবা হায়বসিদসু ঐখোয়না মিৎয়েং চঙলি।
কর্নাতকাদা মসিগুম্বা অতোপ্পা প্রোজেক্ত কয়া অমদা থবক তৌরি। তুরেল শম্নহন্দুনা অকংবা মফমশিংদা ঈশিং পীরি। নরায়নপুর লেফ বেঙ্ক কেনেল সীস্তেম্বু পাকথোক চাউথোকহন্দুনা মোদর্নাইজ তৌরিবসিসু মসিগুম্বা পোলিসীগা মরী লৈনবা খোঙথাংনি। হৌজিক শেম্লিবা অনৌবা পথাপ, অনৌবা তেক্নিক শিজিন্নরিবা, মসিদগী কম্মান্দ এরিয়াগী লম হেক্ত্যার লাখ ৪.৫গী ঈথৈ-লৌখোঙ পীবা ঙমগনি। হৌজিক্তি, কেনেলগী খ্বাইদগী অকোনবা মফমদসু চপ চাবা মতমগী ওইনা ঈশিং ফংলগনি।
মরুপশিং,
ঙসি লৈবাকসিদা পর দ্রোপ মোর দ্রোপ, মাইক্রো ইরিগেসন্দা অহেনবা মিৎয়েং চঙলি। মমাংগী চহি ৭-৮দা হেক্ত্যার লাখ ৭০ হেনবগী লম্বু মাইক্রো-ইরিগেসনগী মখাদা পুরকপা ঙমখি। কর্নাতকাদসু মসিগা মরী লৈননা থবক য়াম্না নিংথিজনা পায়খৎলি। ঙসিগী প্রোজেক্তশিং অসিনা কর্নাতকাগী হেক্ত্যার লাখ ৫গী লমশিংদা কান্নবা পীগনি।
দবল ইঞ্জিন সরকারনা গ্রাউন্দ ৱাতর তেবল হেনগৎহন্নবা থবক কয়া অমা স্কেল চাউনা পায়খৎলি। অতল গ্রাউন্দ ৱাতর স্কিম ওইরো, অমৃত সরোবরগী মখাদা জিলা খুদিংদা পাৎ ৭৫ তৌবগী স্কিম ওইরো, নত্ত্রগা কর্নাতকা সরকারগী মশাগী চলায়জবা স্কিম অসিনসু ঈশিংগী লেভেল লেঙদনা লৈহনবদা য়াম্না তেংবাংগনি।
ইচিল ইনাওশিং,
দবল ইঞ্জিন সরকারনা মতৌ করম্না থবক তৌই, মসিগী অফবা খুদমদি জল জীবন মিসন্দগী উবা ফংগনি। চহি ৩ মখায়গী মমাংদা মিসন অসি হৌদোকখিবনি। মতমদুদা, অপুনবা ইমুং করোর ১৮গী মনুংদা শুপ্নগী ইমুং করোর ৩ খক্তদা তোতি ঈশিং পুশিল্লি। মশিং অসি নিংশিংবীয়ুকো, ঐখোয়গী সরকার লাকপদগী ঙসিদি খুঙ্গংগী ইমুং করোর ১১গী ময়ুমদা তোতি ঈশিং পুশিল্লে। মসিনা হায়বদি, ঐখোয়গী সরকারনা লৈবাক্কী ইমুং অনৌবা করোর ৮দা তোতি ঈশিং য়ৌহনখি হায়বনি। মখোয়শিং অসিগী মনুংদগী, ইমুং লাখ ৩৫দি কর্নাতকাদগীনি।
য়াদগির অমসুং রাইচুরদা ইমুং অমদা ঈশিং ফংবগী চাংনা কর্নাতকা অমসুং লৈবাক্কী অপুনবা চাংদগী হেনবসিদা ঐহাক্না নুংঙাইবা ফাওই। য়ুম্থোং খুদিংদা তোতি ঈশিং ফংবদা লৈবাক্কী ইমা অমসুং ইচে ইচলশিংদগী মোদীগী মফমদা য়াইফ পাউজেল লাকপা হৌই। ঙসি উরেপ উয়ুং তম্লিবা প্রোজেক্তশিং অসিগী মতেংদগী য়াদগিরগী য়ুম্থোং খুদিংদা ঈশিং ফংহনবা হায়বা পান্দম ফংহনবদু খোঙজেল য়াঙখৎহল্লগনি।
ঐহাক্না জল জীবন মিসনগী কান্নবা অমসু মীয়ামগী মাঙদা থম্বা পাম্মি। ভারতকী জল জীবন মিসন্না মরম ওইরগা চহি খুদিংগী অঙাং লাখ ১.২৫ হেনবগী পুন্সি কনবা ঙম্লে হায়না স্তদী অমনা উৎখ্রে। অদোমসু অমুক্তা খন্থবীয়ু, অঙাং লাখ অমগা মখায়বু শিবগী খয়াত্তগী কনবসিদি লাইনা ফাওবা থৌজালগনি। অমোৎপা ঈশিংনা অঙাংশিংদা খুদোংথীবা কয়া থোকহল্লম্মি অদুগা ঐখোয়গী সরকারনা অদোমগী অঙাংশিংবু কল্লিবনি।
ইচিল ইনাওশিং,
হর ঘর জল অভিয়ান্না দবল ইঞ্জিন সরকারগী দবল বেনেফিত ওইবগী খুদম অমসু ওইরি। দবল ইঞ্জিন হায়বদি দবল য়াইফ য়ুম্বাল, চাউখৎপগী খোঙজেল দবল। কর্নাতকানা মসিদগী কান্নবা কয়া য়াম্না ফংলি হায়বসিদি অদোম্না খঙনরবনি। কেন্দ্র সরকারনা লৌমীশিংদা কিসান সম্মান নিধীগী মখাদা লুপা ৬০০০ পী, অদুবু কর্নাতকা সরকারনা লুপা ৪০০০ অমুক হাপচিন্দুনা মখোয়দা দবল কান্নবা ফংহল্লি। য়াদগিরগী লৌমী চাউরাকপা লাখ ১.২৫না পি.এম. কিসান নিধীদগী চাউরাকপা লুপা করোর ২৫০ ফংনখ্রবনি।
মরুপশিং,
কেন্দ্রনা সরকারনা ন্যু এজুকেসন পোলিসী হৌদোকখি। মসিদসু কর্নাতকা সরকারনা বিদ্যা নিধী স্কিমগী খুত্থাংদা লাইরবা মহৈরোইশিংবু তেংবাংলি। কেন্দ্রনা লাইচৎ অমসুং অতোপ্পা খুদোংচাদবা কয়া লাক্লবসু চাউখৎ থৌরাংগী থৌওং লেপহন্দনবা হোৎনদুনা লাক্লি, মসিদসু, কর্নাতকানা মসিগী খুদোংচাবা লৌদুনা রাজ্যসিদা ইনভেস্তরশিংগী পুক্নিং চিংশিন্নবা হোৎনরি। কেন্দ্রনা মুদ্রা স্কিমগী মখাদা ফিশা-লোন্সা তৌরিবা মীওইশিংবু তেংবাংনবা হোৎনরিবা অসিদা, কর্নাতকা সরকারনা মখা তাবা তেংবাং পীদুনা থৌওংশিংবু হেন্না খুমাং চাউশিনহল্লি। অদুদি দবল ইঞ্জিন অসি দবল বেনেফিত ওইরেকো।
মরুপশিং,
নিংতম্বা ফংলবা মতুংগী চহি কয়া অসিদা ফাওবা, করিগুম্বা মীওই অমা, কাঙলুপ নত্ত্রগা লমদম অমনা শোত্থদুনা লৈরবদি, রাজ্য সরকারনা মখোয়গী মফমদা অহেনবা মিৎয়েং চঙলি। শোত্থবশিংদা অহেনবা মিৎয়েং চঙবা, খুদোংচাবা পীবা হায়বসিনা ঐখোয়গী সরকারগী থবক তৌবগী মওংনি, মন্ত্রনি। ঐখোয়গী লৈবাক্কী অপীকপা লৌমী করোর কয়া অমবু নুংঙাই য়াইফবগী খুদোংচাবা কয়া দিকেদ কয়াদগী ফংহন্দনা লাকখি অমসুং মমাংগী সরকারনা মখোয়গীদমক্তা করিমত্তা হোৎনরমদে।
ঙসিদি, লৈবাক্কী লৌউ-শিংউগী পোলিসীদা অপীকপা লৌমীশিংদা খ্বাইদগী অহেনবা মিৎয়েং য়েংলি। লৌমীশিংবু মেছিন্না তেংবাংবা, দ্রোনগুম্বা মোদর্ন তেক্নোলোজীগী মাইকৈদা পুশিনবা, নেনো য়ুরিয়াগুম্বা কেমিকেল ফর্তিলাইজর পীবা, নেচরেল ফার্মিং তৌনবা পুক্নিং থৌগৎপা, কিসান ক্রেদিত কার্দ পীবা, এনিমেল হসবেন্দরী, ঙা অমদি খোই য়োকপদা পুক্নিং থৌগৎপগুম্বা তেংবাং কয়া অমা ঐখোয়না পীরি।
ইচিল ইনাওশিং,
ঐহাক্না ঙসি য়াদগিরদা লৈরবনিনা, কর্নাতকাগী শুবা-নোম্বা কনবা লৌমীশিংগী মফমদা থাগৎ ৱাহৈ খরা ফোংদোকচনিংই। লমদমসিদি হৱাইগী তেঙ্কোৎনি। মফমসিগী হৱাই লৈবাক্কী মফম খুদিংদা য়ৌই। হৌখিবা চহি ৭-৮দা ঐখোয়না মীরমদা হৱাইগীদমক্তা তাংজবা হন্থহনবা ঙম্লিবসিদা ঐখোয়গী কর্নাতকাগী লৌমীশিংগী অচৌবা থৌদাং য়াওরি। কেন্দ্র সরকারনসু চহি ৮গী মনুংসিদা হৱাইগী চাং শরুক ৮০ হেন্না লৌমীশিংদগী এম.এস.পি.দা লৈখি। হৱাই থাবা লৌমীশিংনা মমাংগী চহি ৮দা লুপা করোর লিশিং ৬০ ফংখ্রে অমসুং ইং ২০১৪গা চাংদম্নবদা মখোয়না করোর চাম্মা খরতমক ফংখিবনি।
লৈবাক অসিনা হৌজিক চাবা য়াবা থাউ মীরমগী মখা পোন্দনবা অচৌবা খোঙজং চঙশিল্লি। কর্নাতকাগী লৌমীশিংনা মসিগী কান্নবা শোইদনা লৌফম থোকই। ঙসিদি, বাইওফুএল, ইথানোল পুথোকপা অমসুং শিজিন্নবগী মতাংদা লৈবাক অসিদা পাক চাউনা থবক পায়খৎলি। পেত্রোলদা ইথানোল য়ানবগী পান্দমসু সরকারনা হৌজিক হেনগৎখ্রে। মসিদসু, কর্নাতকাগী চু লৌমীশিংনা কান্নবা য়াম্না ফংগনি।
মরুপশিং,
মালেমসিদা অনৌবা খুদোংচাবা অমা লৈরক্লি। মসিনা কর্নাতকাগী লৌমী, মরু ওইনা অপীকপা লৌমীশিংদা কান্নবা য়াম্না পীগনি। ভারতনা হায়জবগী মতুং ইন্না য়ুনাইতেদ নেসন্সনা হন্দক্কী চহিবু মালেমগী মিল্লেতকী চহি হায়না লাউথোকখিবনি। জোৱার অমসুং রাগিগুম্বা অপৌবা সিরিএল অসি কর্নাতকাদা মরাং কায়না পুথোকই। মসিগুম্বা মচি লৈবা হৱাই-চেংৱাই পুথোকপা হেনগৎহন্দুনা মালেম পুম্বদা খঙহন্নবা দবল ইঞ্জিন সরকার অসিনা খোঙফম চেৎলি। কর্নাতকাগী লৌমীশিংনা মতাং অসিদসু মশাগী থৌদাং নিংথিজনা য়াগনি হায়বা ঐহাক্না থাজৈ।
ইচিল ইনাওশিং,
অৱাং কর্নাতকাগী শিংনবা অমবু ঐখোয়না সরকারনা লোইশিন্নবা কন্না হোৎনরি। শিংনবা অসিদি কন্নেক্তিবিতীনি। লৌউবা ওইরো, ইন্দস্ত্রী ওইরো, নত্ত্রগা লমকোয়বা ওইরো, কন্নেক্তিবিতী অসি পুম্নমক্কী য়াম্না মরু ওইবনি। লৈবাক্না হৌজিক্তি কন্নেক্তিবিতীগা মরী লৈনবা ইনফ্রাস্ত্রকচরশিংদা অহেনবা মিৎয়েং চঙলি, দবল ইঞ্জিন সরকার লৈবনা মরম ওইরগা কর্নাতকানা মসিদসু কান্নবা য়াম্না ফংলি। অৱাং কর্নাতকাগী চাউরবা শরুক অমনা সুরত-চেন্নৈ ইকোনোমিক কোরিদোরগী কান্নবা য়াম্না ফংগদৌরি। লৈবাক্কী অচৌবা হিথাংফমগী শহর অনিগা কন্নেক্ত ওইবদগী মসিগী অপুনবা লমদম অসিদা ইন্দস্ত্রীগী খুদোংচাবা কয়া অমা ফংগনি। লৈবাক মীয়াম্না অৱাং কর্নাতকাগী লমকোয়ফম অমসুং লাই নীংফমশিংদা চৎপদা মসিনা য়াম্না নুংঙাইহল্লগনি অমসুং মসিনা নহাশিংগী থবক কয়া অমসু পীগনি। দবল-ইঞ্জিন সরকারনা ইনফ্রাস্ত্রকচর অমসুং রিফোর্মদা মিৎয়েং চঙবদগী কর্নতকাবু ইনভেস্তরশিংগী অপাম্বা মফম ওইহল্লবনি। মালেম্না ভারত্তা ইনভেস্ত তৌনিংবগী মতৌ হেনগৎলক্লিবা অসিনা মরম ওইরগা হায়রিবা মতৌসু হেন্না হেনগৎলক্কনি।
মসিগুম্বা মালেমগী থৱাই য়াওবা মতৌসিদগী অৱাং কর্নাতকাসু কান্নবা য়াম্না ফংগনি হায়না ঐহাক্না থাজৈ। লমদমসি চাউখৎপনা মীয়াম খুদিংদা নুংঙাই য়াইফবা ওইহনবা হায়বা অপাম্বা অসিগা লোয়ননা ঐহাক্না ঙসি মশিং য়াম্না লেংবীরক্তুনা ঐখোয়গী ইফমদা থৌজাল পীবিবগীদমক্তা ঐহাক্না অদোম পুম্নমকপু থাগৎচরি। অদুগা ঙসিগী চাউখৎ থৌরাংগী প্রোজেক্ত কয়া অসিগীদমক্তসু অদোম্বু অমুক হন্না থাগৎচরি।
ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
হন্না হন্না থাগৎচরি!!!
