নৌনা ইলেক্ত্রিক ফংহল্লবা সেক্সনশিং অমসুং নৌনা শেমগৎপা দেমু/মেমু সেদ মীয়ামদা কৎথোকখ্রে
“অৱাং-নোংপোক্কী অহানবা বন্দে ভারত এক্সপ্রেস অসিনা তুরিজম চাউখৎহনগনি অমসুং চৎথোক-চৎশিন হেনগৎহনগনি”“অনৌবা ভারত অমা শেমগৎনবা হৌখিবা চহি ৯দা মমাঙদা অমুক্তা ওইখিদ্রিবা থবকশিং পায়খৎলে”“ঐখোয়গী সরকারনা লায়রবশিং য়াইফনবা পুক্নিং চঙলে”“ইনফ্রাস্ত্রকচর অসি মীওই খুদিংমক্কীনি অমসুং মসিদা মীচং-মীখাই নাইদে, ইনফ্রাস্ত্রকচর শেমগৎপা অসি খুন্নাইগী অচুম্বা অমসুং অশেংবা সেকুলারিজম্নি”“ইনফ্রাস্ত্রকচর চাউখৎলকপগী খ্বাইদগী কান্নবা ফংলিবশিংদি ভারতকী নোংপোক অমসুং অৱাং-নোংপোক রাজ্যশিংনি”“ভারত রেলৱে অসি য়াম্না য়াংনা থম্মোয়শিং, খুন্নাইশিং অমসুং খুদোংচাবশিং মীয়ামগা শম্নহল্লিবা পাম্বৈ অমা ওইরে”খরুমজরি,
অসামগী গোবর্নর, শ্রী গুলাব চন্দ কতারিয়া জী, মুখ্যমন্ত্রী ভাই হেমন্ত বিস্ব সর্মা জী, কেন্দ্রগী কেবিনেত্তা ঐগা থৌ পুমিন্নরিবা অশ্বিনি ৱৈস্নৱ জী, সর্বানন্দ সোনোৱাল জী, রামেশ্বর তেলী জী, নিশিথ প্রমানিক জী, জোন ৱার্লা জী, অতোপ্পা মন্ত্রীশিং, এম.পি.শিং, এম.এল.এ.শিং অমসুং ঐগী নুংশিজরবা ইচিল-ইনাওশিং,
ঙসি অসাম য়াওনা নোর্থ ইস্ত পুম্বগী ওইনা রেল কেনেক্তিবিতীগীদমক্তা য়াম্না অচৌবা নুমিৎ অমনি। ঙসি নোর্থ ইস্তকী কেনক্তিবিতীগা মরি লৈনবা থবক অহুম অমুক্তদা পাংথোক্লি। অহানবদা, ঙসি নোর্থ ইস্ততা মখোয়গী খ্বাইদগী অহানবা মেদ ইন ইন্দিয়া, ৱন্দে ভারত এক্সপ্রেস ফংখ্রে। মসি ৱেস্ত বেঙ্গালবু শম্নহল্লিবা অহুমশুবা ৱন্দে ভারত এক্সপ্রেসনি। অনিশুবদা, অসাম অমসুং মেঘালয়গী চাউরাক্না কিলোমিতর ১৫০ রোমগী ওইবা ত্রেক্তা মৈগী ওন্থোকপগী থবক লোইশিনখ্রে। অহুমশুবদা, লামদিংদা নৌনা শাবা দেমু-মেমু শেদকীশু ঙসি শঙ্গাখ্রে। ঐহাক্না হায়রিবা প্রোজেক্তশিং অসিগীমদ্তা অসাম, মেঘালয় য়াওনা অপুনবা নোর্থ ইস্ত অমসুং ৱেস্ত বেঙ্গালগী মরুপশিংবু হন্না-হন্না থাগৎপা ফোংদোক্লি।
মরুপশিং,
গুৱাহাতি-জলপাইগুরি ৱন্দে ভারত এক্সপ্রেস ত্রেন, অসাম অমসুং ৱেস্ত বেঙ্গালগী মরক্তা চহি কয়া লিরবা মরিশিং অদুবু অমুক হেন্না চেৎশিনহল্লগনি। মসিনা মফম অসিদা চত্থোক-চৎশিন তৌবদা হেন্না খোংজেল য়াংখৎ্ল্লগনি। মসিনা কোলেজ-য়ুনিভর্সিতীদা তম্লিবা নহা ওইরিবা মরুওশিংদা খুদোংচাহল্লগনি। অমসুং খ্বাইদগী মরু ওইবা ৱাফম অমনা, মসিনা তুরিজম অমসুং লাল্লো-ইতিক্তগী থবক পীবা হেনগৎহল্লগনি
মসিগী ৱন্দে ভারত এক্সপ্রেস অসি ইমা কামখ্যা মন্দির, কাজিরঙ্গা, মানস নেস্নেল পার্ক, পোবিতোরা ৱাইল্দ লাইফ সেঞ্চুরীবু কেনেক্ত তৌরগনি। মসিগা লোইন-লোইননা মেঘালয়গী শিল্লোং, চেরাপুঞ্জী অমসুং অরুনাচল প্রদেশকী তৱাং অমসুং পাসিঘাত ফাওবশু লম কোইবা লাকপশিংগী ফেসিলিতীশিং হেনগৎহল্লগনি।
ইচিল-ইনাওশিং,
হন্দক্কী চয়োল অসিদা, কেন্দ্রদা এন.দি.এ.গী সরকারগী চহি ৯ মপুং ফারে। হৌখিবা চহি ৯দা অনৌবা ভারত অমা শেমগৎনবগীদমক্তা ভারতকীদমক্তা ঙক্নিংঙাই ওইরিবা মাইপাকপা কয়া অমা ফংখি। ঙরাংমক্তদা লৈবাক অসিগী নিংখা তম্বা ভারতকী য়াম্না চাউরবা, মতিক-মবাই লৈরবা অনৌবা পার্লিয়ামেন্ত অমা ফংখ্রে। মসি ভারতকী চহি লিশিং কয়া লিরবা দেমোক্রেসী পুৱারিবু ঐখোয়গী নুংঙাই-য়াইফরবা লোকতন্ত্রগী ওইবা তুংগী পুনশি অদুগা শম্নহনগদৌরিবা পার্লিয়ামেন্তনি।
হৌখিবা চহি ৯ অসিদা মাইপাকপা থবক কয়া অমা পাংথোকখ্রে, হায়রিবা থবকশিং অসি হান্নদি ওইথোক্কনি হায়বা ফাওবা খল্লমদে। ২০১৪গী মমাংগী দেকেদকী পুৱারিদা স্কেমগী রেকোর্দ পুম্বা থুগাইখি। হায়রিবা স্কেমশিং অসিনা লৈবাক অসিগী লাইরবশিংদনা খ্বাইদগী হেন্না শোকহনখি, লৈবাক অসিগী খ্বাইদগী শোত্থরবা মফমশিংদনা হেন্না শোকহন্দুনা চাউখৎ-থৌরাংগী থবক্তা শোত্থদুনা লৈহৌরে।
ঐখোয়গী সরকার অসিনা লাইরবশিংগী য়াইফ-থৌরাংদা খ্বাইদগী হেন্না মিৎয়েং থমখি। লাইরবশিংগী য়ুমদগী হৌরগা নুপীশিংগীদমক্তা তোইলেত ফাওবা, ঈশিংগী পাইপলাইনদগী হৌরগা মৈগী কেনক্সন পীবা ফাওবা, গ্যাস পাইপলাইনদগী হৌরগা এম্স-মেদিকেল কোলেজ ফাওবা, রোদ, রেল, ৱাতরৱেজ, পোর্ত, এয়রপোর্ত, মোবাইল কেনেক্তিবিতী, ঐখোয়না হিরম খুদিংমক্তা অরৈবা শক্তি পুথোক্তুনা থবক তৌখি।
ঙসি ভারত্তা পাইখৎলক্লিব আইনফ্রাস্ত্রকচরগী থবকশিং অসি মালেম শিনবা থুংনা ৱারি শানরি। মরমদি মসিগী ইনফ্রাস্ত্রকচরশিং অসিনা পুনশি মহিংদা লাইহল্লি। মসিগী ইনফ্রাস্ত্রকচরশিং অসিনআ ধবক্কী খুদোংচাবা পীরি। মসিগী ইনফ্রাস্ত্রকচরশিং অসিনা খোংজেল বাংনা চাউখৎলকপগী খুদম্নি। মসিগী ইনফ্রাস্ত্রকচর অসিনা লাইরবা, দলিত, ময়ামদগী শোত্থরবশিং, ত্রাইবশিং, অসিগুম্বা ময়ামদগী তোল্ল-তারবশিং অদুবু এমপাৱর তৌরি। ইনফ্রাস্ত্রকচর মীপুম খুদিংমক্কীনি, মসিদা অৱাং-অনেম, অচান-মীরান অমত্তা খাইদনা চপ মান্নৈ। অমসুং অসিগীদমক্তা ইনফ্রাস্ত্রকচর শেমগৎপা হায়বসিশু অমরোমদা অশেংবা ৱায়েল পীবনি, অশেংবা সেকুলরিজম্নি।
ইচিল-ইনাওশিং,
ইনফ্রাস্ত্রকচর শেমগৎপগী থবক অসিনা খ্বাইদগী হেন্না কান্নহল্লিবা অসি নোংপপোক অমসুং অৱাং-নোংপোক ভারতনি। মমাংদা মখোয়গী মাইপাক্তবশিং অদুবু লোৎশিন্নবগীদমক্তা মীওই খরনা নোর্থ ইস্ততা হান্নদগীশু থবক য়াম্না তৌখি হায়না হায়রি। হায়রিবা মীওইশিং অসিগী অশেংবা অদু নোর্থ ইস্তকী মীয়াম্না য়াম্না ময়েক শেংনা খঙই। হায়রিবা মীওইশিং অসিনা নোর্থ ইস্তকী মীওইশিংবু তঙাইফদনা মথৌতাবা ফেসিলিতীশিংগীদমক্তশু দিকেদ কয়া ঙাইহনখি। মসিগী ঙাক্নিংঙাই লৈত্রবা মরাল অসিনা মরম ওইরগা নোর্থ ইস্তনা অমাংবা কয়া থোকহনখি। খুঙ্গং লিশিং কয়া, ইমুং করোর কয়া অমনা হৌখিবা চহি ৯দা মৈ ফংদদুনা অৱাবা কয়া মায়োক্নখিবশিং অদুগী মনুংদা অয়াম্বনা নোর্থ ইস্ততকী ইমুংশিং ওইখি। তেলিফোন-মোবাইল কেনেক্তিবিতী ফংদদুনা লৈবা মীশিংগী অয়াম্বা শরুক নোর্থ ইস্ততগী ওইখি। অফবা রেল-রোদ-এয়রপোর্ত কেনেক্তিবিতীগী অৱাৎপা লৈবাসিশু নোর্থ ইস্ততগী ওইখি।
ইচিল-ইনাওশিং,
সেবা তৌনিংনা থবক তৌরবদি করম্না অহোংবা পুরকপগে হায়বদু নোর্থ ইস্তকী রেল কেনেক্তিবিতী অসিনা খুদম ওইদুনা তাক্লি। ঐহাক্না স্পীদ, স্কেল অমসুং অপাম্বগী মতাংদা হায়রিবা অদুগীশু মসিনা খুদম্নি। নখোয়না খন্দুনা য়েংউ, লৈবাক অসিদা চহি ১৫০গীশু মমাংদা রেল মুম্বাই মেত্রোপোলিসতা চেনখি। মদুগী মতংউ চহি ৩০গী মতুংদা খখ্তমক অসামদা অহানবা রেল চেনখি।
মীনাই নাইথাং ওইবগী মতম অদুদশু অসাম ওইগেরা, ত্রিপুরা ওইগেরা, ৱেস্ত বেঙ্গাল ওইগেরা, লম খুদিংমক্তা রেলনা শমহনখ্রে। তৌইগুম্বশুং মতম অদুদা চৎলম্বা লিচৎ অদু মীয়ামগী য়াইফনবগীদমক্তা ওইখিদে। মতম অদুদা ব্রিতিশশিংগী পান্দমদি লমদম অসিগী রিসোর্সশিংবু লুত তৌবনি। লমদম অসিগী মহৌশাগী ওইবা লনথুমশিংবু লুত তৌবা। নিংখা তম্লবামতুং নোরথ ইস্ততা লৈরিবা ফিভম অদু হোংলম্লগদবনি, রেলৱেবু পাকশন্না শন্দোক্লম্লগদবনি। অদুবু নোর্থ ইস্তকী রাজ্য অয়াম্বা রেলনা শম্বগী থবক অসি ২০১৪গী মতুংদা তৌবা তাখি।
ইচিল-ইনাওশিং,
নখোয়গী ননাই অসিনা নোর্থ ইস্তকী ময়ামগী পুনশি মহিংগী সেন্সিতিবিতী অমসুং ফেসিলিতীশিং অদুবু খ্বাইদগী হেন্না মরু ওইনা লৌখি। লৈবাক অসিদা লাক্লিবা অহোংবা অসি হৌখিবা চহি ৯দনা খ্বাইদগী হেনখি, হায়রিবা অসি মরু ওইনা নোর্থ ইস্ততনা খ্বাইদগী হেন্না অহোংবা লাকপা থেংনখি। হৌখিবা চহি ৯দা হান্নগা চাংদম্নবদা নোর্থ ইস্ততা রেলৱে চাউখৎহন্নবা বজেতশু শরুক য়াম্না হেন্না হেনগৎখি। ২০১৪গী মমাংদা নোর্থ ইস্তকীদমক্তা রেলৱেগী বজেত অসি চাউরাক্না করোর লিশিং অনি মখাই মুক ওইরম্মি। হন্দক্তি নোর্থ ইস্তকী রেল বজেত অসি করোর লিশিং ১০ হেনখ্রে। হায়বদি চাউরাক্না শরুক ৪ থোক্না হেনগৎলকখ্রে। হৌজিক মনিপুর, মিজোরাম, নাগালেন্দ, মেঘালয় অমসুং সিক্কিমগী রাজধানিশিংবু লৈবাক অসিগী অতোপ্পা মফমশিংগা শমজিন্নহন্নবগী থবকশু খোংজলে য়াংনা পাইখৎলি। য়াম্না য়াংনা নোর্থ ইস্তকী রাজধানি পুম্বা ব্রোদগেজ নেতৱার্কনা শম্নহল্লগনি। হায়রিবা প্রোজেক্তশিং অসিদা করোর লাখ অমা থাথরগনি। মসিনা নোর্থ ইস্তকী কনেক্তিবিতীগীদমক্তা বি.জে.পি. সরকার অসিনা কয়াম খোংফম চেৎনা লেপ্লি হায়বদু তাক্লি।
ইচিল-ইনাওশিং,
ঙসি ঐখোয়না থবক শুবগী স্কেল অমসুং স্পীদ অসি মমাংদা অমুক্তা তৌখিদ্রিবা মতৌনি। হৌজিক্তি নোর্থ ইস্ততা হান্নগা চাংদম্নবদা, শরুক অহুম থোক্না হেন্না খোংজেল য়াংনআ অনৌবা রেলৱে লাইনশিং শেমগৎলক্লি। হৌজিক্তি নোর্থ ইস্ততা হান্নগা চাংদম্নবদা, শরুক ৯ থোক্না হেন্না য়াংনা রেল লাইন অনি থোকপগী চাং হেনগৎলক্লি। হৌখিবা চহি ৯দা নোর্থ ইস্তকী রেল নেতৱার্ক্তা মৈগী ওন্থোকপা হৌখি অমসুং হৌজিক্তি চাদা চামা ওইহন্নবগী তার্গেত অদু য়ৌনবা খোংজেল য়াংনা চংশিল্লি।
মরুপশিং,
অসিগুম্বা স্পীদ অমসুং স্কেলনা মরম ওইরগা, ঙসি নোর্থ ইস্তকী মফ কবাদা অহানবা ওইনা রেলসেৱা য়ৌহল্লরে। নাগালেন্দদা চাহি ১০০গী মতুংদা হৌজিক মখোয়গী অনিশু রেলৱে স্তেশন লৈখ্রে। হান্না নেরো গেজতা অতপ্পা রেল চেল্লম্বা অদু হৌজিক্তি সেমি-হাইস্পীদ ৱন্দে-ভারত অমসুং তেজস এক্সপ্রেসগুম্বা ত্রেনশিং চেনবা হৌরে। ঙসি নোর্থ ইস্তকী তুরিজম চাউখৎহন্নবা রেলৱে ৱিস্তাদোম কোচনশু নৌনা মীয়ামগী পুক্নিং চিংশিন্নবগী মচাক অমা ওইরক্লি।
ইচিল-ইনাওশিং,
খোংজেল য়াংনা ভারতকী রেলনা ঙসি থমোই কয়া পুনশিনহনবা , খুনাইবু পুনশিনহনবা অমসুং মীশিংবু খুদোংচাবশিং ফংহন্নবগী পাম্বৈ অমা ওইরক্লি। নখোয়না য়েংউ, গুৱাহাতি রেলৱে স্তেশনদা ভারতকী অহানবা ত্রান্সজেন্দর তী-স্তোল হাংদোকখ্রে। মসি খুনাই অসিদগী অফবা লমচৎ-শাজৎ উৎপীবা পাম্লিবা মরুপশিংবু ময়ামগা মান্নবা পুনশি মহিং অমা পীনবা হোৎনবা অমনি। অসুম্না ‘ৱান স্তেশন ৱান প্রোদক্ত’ মসিগী স্কীম অসিগী মনুং চন্না নোর্থ ইস্তকী রেলৱে স্তেশনশিংদা স্তোলশিং শেমখ্রে। মসিনা ভোকেল ফোর লোকেলবু মপাঙ্গল হাপ্লিবনি। মসিনা ঐখোয়গী লমদম অসিগী আর্তিসানশিং, আর্তিস্তশিং, ক্রাফসমেনশিংগীদমক্তা অনৌবা মার্কেত অমা ফংহল্লে। নোর্থ ইস্তকী স্তেশনশিংদা ৱাই-ফাইগী খুদোংচাবা পীখ্রে। সেন্সিতিবিতী অমসুং স্পীদকা পুনশিন্নবা অসি খক্তনা নোর্থ ইস্ততা চাউখৎ-থৌরাংগী লম্বিদা খোংজেল য়াংখৎলক্কনি।
অমুক্কশু হন্না, নখোয় ময়াম্বু ৱন্দে ভারত অমসুং অতৈ অতোপ্পা প্রোজেক্তশিংগীমদক্তা হন্না-হন্না থাগৎপা ফোংদোক্লি, হন্ন-হন্না য়াইফ-পাউজেল পীজরি।
হন্না-হন্না থাগৎচরি!
