Releases commemorative stamp in honor of Late Shri Arvind Bhai Mafatlal
“Coming to Chitrakoot is a matter of immense happiness for me”“Glory and importance of Chitrakoot remains eternal by the work of saints”“Our nation is the land of several greats, who transcend their individual selves and remain committed to the greater good”“Sacrifice is the most effective way to conserve one’s success or wealth”“As I came to know Arvind Bhai’s work and personality I developed an emotional connection for his mission”“Today, the country is undertaking holistic initiatives for the betterment of tribal communities”জয় গুরুদেব! মধ্য প্রদেশকী রাজ্যপাল শ্রীমান মঙ্গুভাই পতেল, মুখ্য মন্ত্রী ভাই শিবরাজজী, জগদগুরু সেবাসংঘ ত্রস্তকী মেম্বর পুম্নমক, ইবেম্মা অমসুং ইবুংঙোশিং!
চিত্রকুতকী শেংলবা লমদম অসিদা লাকচবগী খুদোংচাবা অমসু ঐহাক্না ঙসি ফংজরে। মসিদি য়াম্না তোঙানবা মফম্নি, সন্তশিংনা মসিগী মতাংদা অসুম্না হায়রম্লিবনিঃ চিত্রকুত সব দিন বস্ত, প্রভু সিয় লখন সমেত।। মসিনা হায়বদি, চিত্রকুত্তা প্রভু শ্রীরাম, ইমা সিতা অমসুং লহ্মমনজীগা লোয়ননা মতম শাংনা লৈরম্লিবনি। ঐহাক্না মফমসিদা হৌজিক লাক্ত্রিঙৈদা শ্রী রঘুবির মন্দির অমসুং শ্রীরাম জানকী মন্দিরদা লাই খুরুম্বগী খুদোংচাবা ফংজখি, অমসুং ঐহাক্না কামদগিরী চাংশাংবুসু হেলিকোপ্তরদগী অদুম খুরুমজখ্রে। ঐহাক্কী চান্নরবা রনছোর্দাসজী অমসুং অর্বিন্দ ভাইগী মোংফমদা ইকায় খুম্নবা উৎপা চৎচরুবনি। প্রভু শ্রীরাম জানকীগী দর্শন তৌজবা, সন্তশিংগা উন্নবা, অমসুং সংস্কৃত য়ুনিভর্সিতীগী মহৈরোইশিংনা বেদ মন্ত্রশিংবু ঈশৈ ওইনা শকপা, মসিগুম্বা এক্সপেরিএন্সশিং অসিদি ৱাহৈনা ফোংদোকপদা ৱানা থোক্লে। মীওইবা খুন্নাইবু তেংবাংবগী য়াইফরবা থবকশিংদা ঐহাকপুসু শরুক অমা ওইহনবীবগীদমক্তা শ্রী সদগুরু সেবা সংঘগী মফমদা ঐহাক্না শোত্থরবা, নাথৈবীরবা, লাইরবা অমসুং ত্রাইবেলশিংগী মহুৎ শিন্দুনা ইকায় খুম্নবা উৎচরি। জানকীকুন্দ চিকিতসালয়গী অনৌবা ৱিং অমা ঙসি মীয়ামদা খুৎশিন্নরিবা অসিনা অনাবা লাখ কয়াদা অনৌবা পুন্সি অমা পীরগনি হায়বগী ঐহাক্না থাজবা থমজরি। লাক্কদৌরিবা মতমশিংদা, সদগুরু মেদিসিতীদা লাইরবগী মতেংশিং হেন্না নীংথিজনা পাংবা ঙম্লগনি। ঙসিগী থৌরম অসিদা, ভারত সরকারনা অর্বিন্দ ভাইবু নীংশিংবা ওইনা অখন্নবা স্তাম্প অমসু ফোঙলে। পুঙফম অসিমক ঐখোয় পুম্নমক্কী চাউথোকচনীংঙাই ওইবা পুঙফম্নি, ঐহাক্না পুম্নমকপু মসিগীদমক্তা থাগৎচরি।
মরুপশিং,
কনাগুম্বা মীওই অমনা মহাক্কী পুন্সিদা পাংথোক্লম্বা অফবা থবক খুদিংমক মীয়াম্না থাগৎনৈ। মহাক্কী মতমগী মীওইশিংনসু অদুম থাগৎনৈ। অদুবু, পাংথোক্লম্লিবা থবক অদুনা খ্বাইদগী তোপ-তোপ্পা ওইরবদি, মদুনা মহাক্কী পুন্সিগী মতুংদসু মখা তানা পাকথোক চাউথোকই। অর্বিন্দ ভাইগী ইমুং মনুংনা মহাক্না ধর্মগীদমক্তা মতেং পাংলম্বগী থৌওংবু মপাঙ্গল হেন্না লৈহনবসিদা ঐহাক্না নুংঙাইবা ফাওই। মরু ওইনা, সেবাশিং অসিবু অনৌবা পাঙ্গল হাপ্পীরিবা ভাই ‘বিশদ, বহেন ‘রুপল’বু মসিগুম্বা থবক অসিগীদমক্তা মহাক্কী ইমুং মনুংগা লোয়ননা থাগৎচরি। অর্বিন্দ ভাইদি ইন্দস্ত্রীগী মালেমগী মীওইনি। মুম্বাই নত্ত্রগা গুজরাত ওইরো, ইন্দস্ত্রীএল কোর্পোরেত মালেমদা মহাক্কী মমিং, তেলেন্ত য়াম্না লৈরিবনি, অদুগা মহাক্না পাম্লবদি, চহি চাম্ম মপুং ফাবগী থৌরম অসি মুম্বাইদা য়াম্না চাউনা শিল্লমবা য়াবনি। অদুবু অর্বিন্দ ভাইনা মফমসিদা নোঙ্গাখিবা ওইবনা মহাকপু ইকায় খুম্নবা ওইনা জগদগুরুজীনা মফমসি খল্লিবনি।
ঐহাক্কী ইমুংগী মীওইশিং,
সন্তশিংগা পুনবা মতমদা মখোয়গী মওং মতৌবু উজবদা মখোয়সু সন্ত ওইহনবা ঙম্মি হায়না সন্তশিংগা থোইদোকপা মগুনগী মতাংদা হায়নবা অমা লৈ। অর্বিন্দ ভাইগী পুন্সি অসি ৱাফমসিগী খ্বাইদগী চুনবা খুদম্নি। অর্বিন্দজী ফিজোলদগী মান্দ্রবসু, মহাক্তি য়াম্না চম্বা পুন্সি মহিং অমা হিংলম্মি। মহাক অসি য়েংবদা মীচম ওইনা উজরবসু মহাক্কী নুংদদি সন্ত অমগুম্বনি। বিহারদা য়াম্না চাউবা ইকং থোকখিবা মতম অদুদা নুংশিরবা রনছোর্দাসকা অর্বিন্দ ভাইগা থেংনখি। সন্তকী ৱাখল্লোন চেনবা, সেবাগীদমক্তা কত্থোকপা মখোয়না পুনবদগী অচৌবা মায় পাকপা কয়া ফংখ্রে হায়বসিদি ঐখোয়গী মাঙদা লোইনা লৈরবনি।
ঙসি ঐখোয়না অর্বিন্দ ভাইগী চাম্মা শুবা মপোক কুমওন পাংথোক্লি, অদুনা মহাক্না পীরম্লিবা ইথিলশিংবু ঐখোয়গী নুংদা চেলহনবা হায়বসি তৌফম থোকপা থৌওং অমা ওইরে। মহাক্না লৌখিবা থৌদাং খুদিংদা মশাগী চাম্মদা চাম্মা পীদুনা লোইশিনখিবনি। মহাক্না অশুক য়াম্না চাউরবা ইন্দস্ত্রীগী শাগৈ অমা লিংখৎলম্লিবনি। মফতলাল গ্রুপ্পু অনৌবা অৱাংবা থাক্তা পুখৎখি। লৈবাক্কী খ্বাইদগী অহানবা পেত্রোকেমিকেল কমপ্লেক্স হৌদোকখিবা মীওই অদু অর্বিন্দ ভাই মশামক্নি। ঙসিগী লৈবাক্কী শেন্মিৎলোন অমসুং মীচম মীয়ামগী পুন্সিদা মশক থোকপা থৌদাং য়াগদবা কম্পেনী কয়াগী ফম্বাক্তা মহাক্কী মিৎয়েং, ৱাখল্লোন অমসুং হোৎনবা কনবগী মমি তারি। মসি খক্তা নত্তনা, লৌউ-শিংউগী সেক্তরদা পাংথোক্লম্বা মহাক্কী থবকশিংসু মীয়াম্না থাগৎনরি। ভারতিয় এগ্রো-ইন্দস্ত্রীজ ফাউন্দেসনগী প্রসিদেন্ত ওইনা মহাক্না পাংথোক্লম্বা থবকশিং ঙসিসু মীয়াম্না নীংশিংনরি। ভারতকী তেক্সতাইলগুম্বা ত্রেদিস্নেল ইন্দস্ত্রীশিংগী অফবা মতম অমুক হন্না লাকহনবদা মহাক্কী চাউরবা খুৎ য়াওখ্রিবনি। লৈবাক্কী চাউর-চাউরবা বেঙ্ক অমসুং লুপশিংবুসু মহাক্না লমজিংবীখি। মহাক্কী থবক অমসুং মওং-মতৌশিংনা ইন্দস্ত্রীগী মালেমখক্তা নত্তনা খুন্নাইদসু তোঙান-তোঙানবা খুদম কয়া থম্লমখি। লৈবাক অমসুং মালেমগী লেমজনীংঙাই ওইরবা অমসুং মকোক থোংলবা এৱার্দ কয়াসু অর্বিন্দ ভাইনা ফংলমখ্রে। দি লাইওন্স হ্যুমেনিতেরিয়ন এৱার্দ, সিতিজন ওফ বোম্বে এৱার্দ, সর জহাঙ্গির গান্ধী গোল্দ মেদল ফোর ইন্দস্ত্রীএল পিস, মসিগুম্বা এৱার্দ কয়া অসি অর্বিন্দ ভাইগী কত্থোকপশিংগী খুদমশিংনি।
ঐহাক্কী ইমুংগী মীওইশিং,
ঐখোয়গী লমদমসিদা হায়নবা অমা লৈ – উপার্জিরতানা বিত্তানা ত্যাগ এব হি রক্ষনম।। হায়বদি, ঐখোয়গী মায় পাকপা, ঐখোয়না তানবা লনশিং অসি ঐখোয়না কত্থোকখিবশিংগী মহৈনি। অর্বিন্দ ভাইনা ৱাখল্লোন অসিবু মশাগী মিসন ওইহন্দুনা খ্বাইদগী থোইদোক হেন্দোকপা থবক পাংথোকখি। ঙসিদি, অদোমগী গ্রুপকী খুত্থাংদগী শ্রী সদগুরু সেবা ত্রস্ত, মফতলাল ফাউন্দেসন, রঘুবীর মন্দির ত্রস্ত, শ্রী রামদাস হনুমাঞ্জী ত্রস্তকুম্বা লুপ কয়া অমনা থবক তৌরি। জে.জে. গ্রুপ ওফ হোস্পিতাল, ব্লাইন্দ পীপল এসোসিএসন, চারুতর আরোগ্যা মন্দলগুম্বা লুপশিংনা সেবাগী চৎনবীবু তুংলমচত্তা পুদুনা চৎলি। অদোমসু অমুক্তা য়েংবীয়ু, রঘুবীর মন্দির অন্নখেত্রদা মীওই লাখ কয়াগী চাক শিনবা, মফমসিদা লৈরিবা সন্ত লাখ কয়া অসিগী থাগী রাসন কিত পীনবা শিনবা, গুরুকুলদা তম্লিবা মহৈরোই লিশিং কয়াগী এজুকেসন পীবা, জনকীকুন্দ হোস্পিতালদা অনাবা লাখ কয়া লাইয়েংবা, মসি অরাইবা থবক নত্তে। থৌওং অসিমক ভারতকী থৱাইগী পাঙ্গলগী খুদম্নি। মসুং মসিমক্না মশাগী খন্দনা মীয়ামগী থবক তৌনবা শক্তি পীরি, সেবাবু সাধনানী খন্দুনা মায় পাকপগী তোপ-তোপ্পা রিচুএল পাংথোকপা ঙমহল্লি। অদোমগী ত্রস্তনা খুঙ্গংগী নুপীশিংদা খুঙ্গংগী ইন্দস্ত্রীশিংগা মরী লৈনবা ত্রেনিং পীরি। নুপীনা লুচিংদুনা চাউখৎপগী পান্দম ফংনহন্নবা লৈবাক্না হোৎনরিবা অসিদা খোঙজেল হাপ্পদা তেংবাংলি।
মরুপশিং,
ঙসিদি, সদগুরু আই হোস্পিতালনা লৈবাক অমসুং মালেমগী মিৎকী অফবা হোস্পিতালশিংগী মনুংদা মশাগী ফম অমা কনবা ঙমখ্রে তাবদা অদোম্না নুংঙাইবা ফাওগনি। হোস্পিতাল অসি শুপ্নগী ফমুং 12 থাদুনা মতম অমদা হৌদোকখিবনি। ঙসিদি, চহি অমদা অনাবা লাইওং লাখ 15 মুক মফমসিদা লাইয়েংলি। সদগুরু আই হোস্পিতালগী মরমদা ঐহাক্না খরা হেন্না খঙলিবসি মসিগী কান্নবা অসি ঐহাক্কী কাশীগী মীওইনসু ফংবননি। অদোম্না কাশীদা চলাইরিবা ‘হেলদি ভিজন, প্রোস্পরস কাশী কেম্পেন” অসিনা অহল কয়াদা তেংবাংলি। হোস্পিতাল অসিগী খুত্থাংদগী ঙসি ফাওবদা বনারস অমসুং মনাক নকপগী মীওই লাখ তরুক মখাইগী য়ুম্থোং খুদিং চত্তুনা স্ক্রীনিং তৌখ্রে! স্ক্রীনিং তৌরবা মতুংদা, অনাবা লিশিং 90বু কেম্পতা চৎনবা রিফর তৌখ্রে। লাইরবা মশিং য়াম্বগী সর্জরীশিংসু তৌখ্রে। কেম্পেন অসিগী বেনিফিশরীশিংগা ঐহাক্কা মতম খরগী মমাংদা কাশীদা উন্নবগী খুদোংচাবা ফংখি। ঐহাক অমসুং ঐহাক্কী কাশীগী মীয়ামগী মীহুৎ অমা ওইনা, ত্রস্ত অমসুং সদগুরু আই হোস্পিতাল অমসুং দাক্তর অমদি মরী লৈনবা মীপুম খুদিংবু ঐহাক্না ঙসি অদোমগী নাক্তা লাক্লিবসিদা য়াম্না অখন্না থাগৎপা ফোংদোকচরি।
ঐহাক্কী ইমুংগী মীওইশিং,
রিসোর্স কয়া লৈদুনা সেবা তৌবা অসি তঙাই ফদে, অদুবু খোঙফম চেৎপা হায়বসিনি প্রাইওরিতী ওইগদবনি। অর্বিন্দ ভাইগী অখন্নবা মতৌদি মহাক লুরবা তাঞ্জাদা ফাওবা মশামক্না লৈমায়দা তাদুনা থবক তৌখিবা অসিনি। রাজকোত, অহমেদবাদ, গুজরাতকী কাচিন কোয়া খুদিংদা ঐহাক্না মহাক্কী থবক উজরে। ঐহাক ঙসিসু নীংশিংলি, ঐহাক্কী চহি পংয়াম য়ামদ্রিবা মতম্নি। সদগুরুজীগী দর্শন তৌজবা ফংবগী খুদোংচাবদি ঐহাক ফংজহৌদ্রে, অদুবু অর্বিন্দ ভাইগদি ঐহাক্কা মরী লৈজৈ। ঐহাক্না অর্বিন্দ ভাইগা অহানবা ওইনা করম্না উন্নখি খঙবরা? গুজরাতকী সাবর্কন্থা জিলাগী ত্রাইবেল তাবা মফম, ভিলোরা খুঙ্গংদনি। ইকঙ থোকপা অমসুং চাবা তাঙবগী অকনবা চৈথেং অমা মাইয়োক্নবা মতম্নি, ঐখোয়গী দাক্তর অমা লৈরম্মি, মনিকার কৌই, মহাক্কা অর্বিন্দ ভাইগা য়াম্না লুনা খঙনবনি। ঐহাকসু চাক-তাঙবগী অৱাবা নংলবা ইচিল ইনাওশিংগী সেবাগীদমক্তা লৈজবনি। মফম অদু য়াম্না কা হেন্না শাখ্রবজাৎনি। অর্বিন্দ ভাই মশামক লাকই, নুমিৎ চুপ্পা অমা লৈরম্মি, থবক য়াওরম্মি অদুগা থবক হেন্না কনশিনবগী মতাংদা লাকপদা মহাক্না মরু ওইবা থৌদাং লৌখি। মহাক্কী থবক তৌবগী মওং ঐহাক ইমৎমক্না উজহৌখি। ঐখোয়গী গুজরাতকী ত্রাইবেল মফম, দাহোরগী ত্রাইবেলশিংগী য়াইফ য়ুম্বালগীদমক্তা মহাক্না তৌরম্বা থবকশিং ঙসিসু নীংশিংনরি। অদোম্না ৱারী অসি তাবদা অঙকপা ফাওগনি। ঐখোয়গী গুজরাত অমসুং অতোপ্পা মফমশিংদা লৌ-উফম অসি লৌবুক হায়নৈকো। অদুবু, দাহোরগী মীয়ামদি মদুবু ফুলৱারী হায়না কৌই। মরমদি, মফমদুগী লৌমীশিংদা লৌউ-উবগী অনৌবা থৌওং অমা সদগুরু ত্রস্তকী খুত্থাংদগী তম্বীখিবনি, লৈ থাহনখিবনি, অদুনা ফুলৱারি হায়না খঙনরম্বনি। ঙসিদি, মখোয়না পুথোকপা লৈশিং মুম্বাই য়ৌরে। মসিদসু, অর্বিন্দ ভাইগী হোৎনজমনগী থৌদাং য়াম্না য়াওখি। মহাক্কী মফমদা সেবাগী মতাংদা তোঙানবা থৱাই য়াওবগী মতৌ অমা লৈবা ঐহাক্না উখি। করিগুম্বা কনাগুম্বা অমনা মহাক্কা থবক তৌমিন্নবগী অপাম্বা ফোংদোকপা মতমদা, মহাক্না নশা হান্না লাকও, থবক হান্না য়েংলখো হায়না মহাক্না খুমগনি। প্রোজেক্ত অসিনা শিংনবা কয়া লৈহনগদবা ওইরবসু, লাকপা তাবনি। মদুগী মতুংদা থবক করম্বা তৌগদগে খনগদবনি, মদুগী মমাংদা খনগদবা নত্তে। মসিনা মহাক্কী পাউখুম্নি। ঐহাক্না মহাক্কী পুন্সি অমসুং থবক্কী মরমদা হেন্না খঙলিবমখৈ, ঐহাক্না মহাক্কী মিসনবু হেন্না লুনা খনবা হৌরকই। মরম অদুনা, ঐহাক্না ইশাবু মহাক্কী মসিগুম্বা তেংবাংবগী কেম্পেন অসিগী মনা পীবা অমসুং, মওং অমদা, অদোমগী খোঙলোই অমা ওইনা উরিবনি।
ঐহাক্কী ইমুংগী মীওইশিং,
চিত্রকুত লমদম অসি ঐখোয়গী নানাজী দেশমুখকী থবক তৌফমসু ওইরিবনি। অর্বিন্দ ভাইগুম্না, মহাক্না ত্রাইবেল খুন্নাইগী সেবা তৌখিবশিংসু ঙসি ঐখোয়গী ইথিল ওইরি। ঙসিদি, ৱাখল্লোনশিং অসিগী তুং ইন্দুনা, লৈবাক অসিনা ত্রাইবেল খুন্নাইগীদমক্তা অসুক য়াম্না পাক চাউবা থবক অসি অহানবা ওইনা হোৎনবা হৌরকইবনি। ভগ্বান বির্সা মুন্দাগী মপোক নুমিৎপু লৈবাক্না জঞ্জাতিয় গৌরব দিবস হায়না পাংথোকপা হৌরে। ত্রাইবেল খুন্নাইনা কত্থোকখিবা, থৌদাং য়াখিবা অমসুং মখোয়গী হেরিতেজপু মীয়ামদা খঙহন্নবগীদমক্তা লৈবাক্কী মফম খুদিংদা ত্রাইবেল ম্যুজিয়ম শেয়ার। ত্রাইবেল অঙাংশিংনা নীংথিনা মহৈ তমদুনা লৈবাক্কী চাউখৎ থৌরাংদা শরুক য়াবা ঙমহন্নবগীদমক্তা রেসিদেন্সিএল স্কুল কয়া হাংদোকখ্রে। ফোরেস্ত ৱেল্থ এক্তকুম্বা পোলিসী শেম্বগী ৱারেপ লৌখিবা অসিনা ত্রাইবেল খুন্নাইগী হক ঙাক শেনবগী পাম্বৈ ওইরি। ঐখোয়না মসিগুম্না হোৎনরিবশিং অসিগা ত্রাইবেলশিংবু মশাগী মীওই খন্দুনা কোনশিনখিবা শ্রী রামগী থৌজালগসু মরী লৈনরি। থৌজাল অসিনা নুংশি চানবা অমসুং চাউখৎপা ভারত অমগী মঙলান য়ৌনবা চৎপগী খোঙচৎ অসিদা ঐখোয়বু লমজিংবীগনি। ঙসিগী চহি চাম্মা মপুং ফাবগী য়াইফরবা থৌরম অসিদা, ঐহাক্না অর্বিন্দ ভাইগী মফমদা ইমুক্কা হন্না ইকায় খুম্নবা উৎচরি। মহাক্কী থবক অমসুং পুন্সিনা ঐখোয়দা লেপ্তনা ইথিল পীবিবা ওইসনু, সদগুরুনা ঐখোয়বু লেপ্তনা থৌজানবীবা ওইসনু হায়বা য়াইফ পাউজেলগা লোয়ননা, ঐহাক্না পুম্নমক্কী মফমদগী কায়ন য়াথং নিজরি। পুম্নমকপু থাগৎচরি। জয় সিয়ারাম!!!
