খুরুমজরি!
গুজরাতকী মুখ্য মন্ত্রী, শ্রী ভুপেন্দ্র ভাই পতেল, চপ মান্নবা কন্সতিত্যুএন্সীদগী ঐহাক্কী সিনিয়র কলিক ওইরিবা, শ্রী সি.আর. পতিল, গুজরাত সরকারগী অতোপ্পা মন্ত্রীশিং, এম.এল.এ.শিং, নিরালী মেমোরিএল মেদিকেল ত্রস্তকী ফাউন্দর অমসুং চিয়রমেন, শ্রী এ.এম. নাইকজী, ত্রস্তী শ্রী ভাই জিগনিশ নাইকজী, মফম অসিদা তিল্লিবা দিগনিতরীশিং, নুপী অমদি নুপাশিং! ঙসি নখোয়না ইংলিশতা হান্না তাখ্রে, মতুংদা গুজরাতি হৌজিকনা হিন্দীদা ওইনা ঙাংলগে।
ঙৱাং অসি অনিল ভাইগী মপোক নুমিৎনি হায়না ঐঙোন্দা তাকপীরি অমসুং মীওই অমনা চহি ৮০ শুরকপা মতম অসি সহস্র চন্দ্রচর্শনগী থৌরম অমনি। থেংলবসু থেংনা ঐহাক্কী মাইকৈদা অনিল ভাইদা য়াইফ মঙ্গোল পীজরি। মহাক্না হকচাং ফনা লৈনবগীদমক য়াইফ-মঙ্গোল পীজরি।
ঙসি নবসারীগী লমদমদগী খা গুজরাতকী অপুনবা লমদমগী মীয়ামগীদমক ইজ ওফ লিবিংগা মরী লৈনবা স্কিম কয়া হৌদোকখি। হলশেলগা মরী লৈনবা মোদর্ন ইনফ্রাস্ত্রকচরগী লমদসু ঙসি ইচিল-ইনাওশিংনা অনৌবা ফেসিলিতীশিং ফংজরে। মীকুপ খরগী মমাংদা ঐহাক্না মফম অসিদগী অনকপা মফম অমদা থৌরম অমদা শরুক য়াখি, মেদিকেল কোলেজকী উরেপ-উয়ুং তমখি অমসুং হৌজিক ঐহাক্না মোদর্ন হেল্থকিয়র কম্প্লেক্স অমসুং মলতি স্পেসিএলিতী হোস্পিতাল শঙ্গানবা খুদোংচাবা অমা ফংজখি।
চহি ৩গী মমাংদা মফম অসিদা ঐহাক্না কেন্সর হোস্পিতাল অমগী উরেপ-উয়ুং তম্বগী খুদোংচাবা অমসু ফংজখি। ঐহাক্না শ্রী এ.এম. নাইকজী, নিরালী ত্রস্ত অমসুং মহাক্কী ইমুং-মনুংগী মীওইশিংদা থমোয় শেংনা থাগৎপা ফোঙদোকচরি। অমসুং প্রোজেক্ত অসি ঐখোয়গা মনুং মতম চাদনা কাইনখ্রবা নিরালীদা ইকাই খুম্নবা উৎপনি।
এ.এম. নাইকজী অমসুং মহাক্কী ইমুং-মনুংনা মায়োক্নখিবা অৱাবা অদু অতোপ্পা ইমুং অমত্তনা ফংদনা লৌখিবা ফিরেপ অদু অপুনবা প্রোজেক্ত অসিদা উবা ফংখি। অমরোমদা অনিল ভাইনা মপাগী লোন শিংখি, মহাক্কী খুঙ্গংগী লোন শিংখৎখি অমসুং মখোয়গী অঙাংশিংগী লোন শিংখৎখি। নবসারী য়াওনা অকোইবদা লৈরিবা জিলাশিংগী মীয়াম্না মোদর্ন হোস্পিতাল অসিদগী চাউনা কান্নবা ফংলগনি।
অমসুং অচৌবা শেবা হায়বা অসি ঐহাক্না খনবদা লৈবাক পুম্বগীদমক হোস্পিতাল অসি হায়ৱেগা য়াম্না নকনৈ হায়বগী পাউজেল পীরি হায়বা অসিনি। অমসুং হায়ৱেদা থোকপা এক্সিদেন্তশিংদা অহানবগী গোল্দন আৱর অসি পুন্সিগী মরু ওইবা গোল্দন পেরিয়দ অমনি। হোস্পিতাল অসিনা মফম অসিদা লৈরবসু ঐখোয়না মীওই কয়ানা মফম অসিদা লাকপা, এক্সিদেন্ত য়াম্না থোকপদি ঐখোয়না পামদে, অদুবু করিগুম্বা থোকপা তারবদি মনাক নকপদা পুন্সি কন্নবা ফেসিলিতীশিং লৈরি। হোস্পিতাল অসিগী দোক্তর, মেদিকেল স্তাফ পুম্নমক্তা ঐহাক্না য়াইফ মঙ্গোল পীজরি।
মরুপশিং,
লায়রবশিংগী মপাঙ্গল হাপ্নবা, লায়রবশিংগী অৱাবা কোকহন্নবা হেল্থ সর্ভিসেস মোদর্নাইজ তৌবা, মীপুম খুদিংদা এক্সেসিবল ওইহনবা অসি চপ মান্ননা মরু ওই। হৌখিবা চহি ৮ অসিদা ঐখোয়না লৈবাক অসিগী হেল্থ সেক্তর ফগৎহন্নবা হোলিস্তিক এপ্রোচ অমদা মীৎয়েং থমদুনা লাকখি। ঐখোয়না ত্রীৎমেন্ত ফেসিলিতীশিং মোদর্নাইজ তৌনবা, ন্যুত্রিসন হেনগৎহন্নবা, অফবা পুন্সি মহিং হিংনবা অমরোমদা অনাবা লৈতবা হকচাং ওইহনবগা মরী লৈনবা বিহেবিয়রেল সবজেক্তশিং অসি ফগৎহনবা, সরকারগী মরু ওইবা থৌদাংশিং ওইরিবা অসিদা ঐখোয়না মরু ওইবা মীৎয়েং থমদুনা লাকখি।
ঐখোয়না লায়রবা অমদি মিদল ক্লাসশিংবু লাইনা-তিন্নাদগী ঙাকথোক্নবা পান্দম থম্মি, লাইনা নারবসু ঐখোয়না মদুদা তৌবা চাদিং হন্থহন্নবা পান্দম থম্মি। ঙসি ঐখোয়না অঙাংশিং অমদি মমাশিংগী হকশেল ফনা থম্নবা খোঙথাংশিং পাইখৎপা ময়েক শেংনা উবা ফংলি। ঙসি, গুজরাতকী হেল্থকিয়র ইনফ্রাস্ত্রকচর অমসুং হেল্থকিয়র ইন্দিকেতরশিং হেনগৎলকপা অসিনা নিতি আয়োগকী সস্তেনেবল দিবেলপমেন্ত গোল ইন্দেক্সতা গুজরাতনা মকোক্তা লৈরি।
মরুপশিং,
ঐহাক্না গুজরাতকী মুখ্য মন্ত্রী ওইরিঙৈ মতমদা রাজ্য অসিগী লায়রবা খুদিংমক্তা ফংহনখিবা হেল্থ সর্ভিসেস অসি হৌজিক্তি লৈবাক পুম্বগী লায়রবশিংনা শিজিন্নবা ফংলে। মতম অদুদা ঐখোয়না মশা-মউ ফবা গুজরাত, উজ্জ্বালা গুজরাতকীদমক রোদমেপ অমা শেমখি। মুখ্যমন্ত্রী অমৃতম য়োজনা, তেন্না মওংদা মা য়োজনা হায়নসু খঙনবা অসিনা মতম অদুদা অরুবা অনাবা নাবা লায়রবা লাখ ২ ফাওবদা লেম্না লায়েংবগী খুদোংচাবা ফংহনখি।
স্কিম অসিদগী ফংখিবা লৌশিং অদুনা আয়ুশ্মান ভারত য়োজনা অসি শেম্বা ঙমহনখি, মসিনা লায়রবশিংদা লুপা লাখ ৫ ফাওবগী লেম্না লায়েং ফংবা ঙমহনখি, ঐহাক্না প্রধান মন্ত্রী ওইনা থবক তৌনবগী খুদোংচাবা ফংজবা মতমদা ঐহাক্না ইরৈবাকচাশিংদা য়োজনা অসি ফংহনখি। স্কিম অসিগী মখাদা গুজরাতকী লায়রবা অনবা মীওই লাখ ৪০ হেনবনা লেম্না লায়েং ফংখি। মখোয়শিংগী মরক্তা অয়াম্বনা ঐখোয়গী ইমা অমদি ইচে-ইচল, দলিত, শোত্থরবা অমসুং ঐখোয়গী ত্রাইবেলগী খুন্নাইগী মরুপশিংনা ওইখি, মসিনা মরম ওইদুনা লায়রবশিংনা লুপা করোর লিশিং ৭ তুশিনজবা ঙমখি। আয়ুশ্মান ভারত য়োজনাগী মখাদা হৌখিবা চহি ৭ অসিদা হেল্থ এন্দ ৱেলনেস সেন্তর লিশিং কয়া গুজরাত্তা মথৌ তৌরি।
মরুপশিং,
হৌখিবা চহি ২০ অসিদা গুজরাতকী হেল্থ সেক্তরনা অনৌবা মাইলস্তন কয়া য়ৌবা ঙমখি। হৌখিবা চহি কুন অসিদা গুজরাত্তা অমুক্তা তৌখিদ্রিবা মওংদা হেল্থ ইনফ্রাস্ত্রকচরগী থবক পাইখৎখি, সহরদগী খুঙ্গংগী মফমশিংদা থাক খুদিংমক্তা থবক পাইখৎখি। খুঙ্গংগী মফমশিংদা হেল্থ সেন্তর লিশিং কয়া শাখি, ফর্স্ত এদ সেন্তরশিং শাখি। সহরগী মফমশিংদা দীন দয়াল ওশধালয় ৬০০রোম শাখি।
গুজরাতকী সরকারগী হোস্পিতালশিংদা কেন্সরগুম্বা লাইনাশিং লায়েংনবা এদভান্স ওইবা খুৎলাইশিং লৈরে। গুজরাত কেন্সে রিসর্চ ইন্সতিত্যুতকী কেপাসিতী অসি ৪৫০দগী ১০০দা হেনগৎখ্রে। অহমদাবাদ নত্তনা ভাবনগর, জামনগর, রাজকোৎ অমসুং নদোদরা অসিনচিংবা সহর কয়াদা কেন্সরগী লায়েংনবা ফেসিলিতীশিং উবা ফংলি।
অহমদাবাদকী কীদনী ইন্সতিত্যুত অসি মতমগা চুনবা ওইহন্দুনা চাউথোকহনখি। অমসুং অথুবদা মসিগী বেদ মশিং শরুক অনি ওইরগনি। ঙসি গুজরাত্তা দাইলাইসিস সেন্তরনা অনাবশিংদা মখোয়গী ময়ুমশিংগী অনকপদা দাইলাইসিসকী খুদোংচাবশিং ফংহল্লি।
ভারত সরকারগী মহুৎ শিন্দুনা, লৈবাক পুম্বগী দাইলাইসিসকী ইনফ্রাস্ত্রকচর শেমগৎ-শাগৎনবা, অনাবশিংদা মখোয়গী ময়ুমশিংগী মনাক্তা খুদোংচাবা অসি ফংহন্নবা, কেম্পেন অসি খোঙজেল য়াংনা চংশিল্লি, মমাংদগী শরুক কয়া থোক্না হেনগৎলকখি। অসুম্না ঙসিদি কীদনী নাবা মীওইশিংদা দাইলাইসিস সেন্তরশিং ফংহল্লি।
মরুপশিং,
গুজরাত্তা ঐহাক্কী মতমদা, ঐখোয়গী সরকারনা অঙাং অমদি নুপীশিংগী হকশেল অমসুং ন্যুত্রিসন্দা মরু ওইবা মীৎয়েং চংখি। পব্লিক-প্রাইবেৎ পার্তনরশিপ লৈহন্দুনা চিরঞ্জীবী য়োজনাগী মখাদা ইন্সতিত্যুস্নেল দেলিভরী ফংহনখি, ঐখোয়না ইন্সতিত্যুস্নেল দেলিবরী পাকথোক চাউথোকহনখি অমসুং গুজরাত্তা মসিগী য়াম্না অফবা ফলশিং ফংবা ঙমহনখি।
ঙসি ফাওবদা মীরোনবী নুপী লাখ ১৪না স্কিম অসিগী মখাদা চিরঞ্জীবী য়োজনাগী কান্নবা ফংবা ঙমখ্রে। ঐখোয় গুজরাতকী মচানি অদুনা হেন্না থবক তৌবা পাম্বা মীওইশিংনি, ৱাখল্লোন অসি অদুমক লেংদনা লৈরি। ঐহাক্না মফম অসিদা লৈরিঙৈদা ঐখোয়না ১০৮গী সর্ভিস হৌদোকখি। অদুবু মতম খরগী মতুংদা ১০৮গী সর্ভিস অসি, গারীশিং অসি মল্লে মসি লৌথোকখো হায়না হায়নরকখি। ঐহাক্না মদু তৌগনু হায়খি গারীশিং অসি ১০৮ সর্ভিসকীদমক্তনি মসি পর্ফেক্ত ওইবা তাই, থবক থুনা পাঙথোকপা ঙম্নবা শক্তি লৈবা তাই হায়খি।
অদুবু মসি অরিবা গারীশিং ওইবনা মখোয় অসিসু খুদক্তা লৌথোকপগী মহুৎ মখোয়বু শেমজিনখি, ঐখোয়না দিজাইন পুম্বা শেমদোক্নবা ৱারেপ লৌখি। সাইরেনগী মখোল অসি খোইথুম্নহনখি। অমসুং মমা অমসু দেলিভরী তৌরবা মতুংদা য়ুমদা পুরক্নবা লায়রবা মীওই অমনা ওতো-রোক্সো নেকপা তাই। সমস্যাশিওং অসি কোকহন্নবা অরিবা ১০৮ অসি নীংথিজরবা অমদা ওন্থোকখি।
খিলখিলাহত স্কিমগা লোয়ননা ঐখোয়না নৌনা পোকপদা ঙাইরিবা অঙাংশিংগী হকচাং অসি য়ুমদা য়েংশিনহনবা ঙমখি। মসিনা মরু ওইনা ত্রাইবেলগী ইমুং-মনুংশিংদা মখোয়গী য়ুমদা নুংঙাইবা পুরক্তুনা অঙাং অমদি মমাশিংগী পুন্সি কনবদা চাউনা মতেং পাংখি।
মরুপশিং,
কেন্দ্রদা থৌ পুবা মতমদা, “চিরঞ্জীবী” অমসুং “খিলখিলাহত”কী ৱাখল্লোন অসি মিসন ইন্দ্রধনুশ অমসুং মাতৃবন্দনা য়োজনাগী মখাদা লৈবাক শিনবা থুংবদা চাউথোকহনখি। হৌখিবা চহিদা গুজরাতকী ইচে-ইচল লাখ ৩ হেন্না প্রধান মন্ত্রী মাতৃবন্দা য়োজনাগী মখাদা কোনশিনবা ঙমখি। লুপা করোর কয়া ইচে-ইচলশিংগী একাউন্তদা হকথেংননা চংহনখি, অসুম্না মখোয়না মীরোল্লিঙৈ মতমদা অফবা চীঞ্জাক চাবা ফংহনখি। গুজরাত্তা অঙাং লাখ কয়া মিসন ইন্দ্রধনুশকী মখাদা তীকা থাদোকপা ঙমহনখি।
মরুপশিং,
হৌখিবা চহি অসিদা গুজরাত্তা দোক্তর অমসুং পেরামেদিক্সকী এজুকেসন অমসুং ত্রেনিংগীদমক ফেসিলিতীশিং হেনগৎহনখি। এম্সগুম্বা অচৌবা ইন্সতিত্যুত রাজকোত্তা লিংখৎখি। ঙসি মেদিকেল কোলেজশিংগী মশিং অসি ৩০ হেল্লে। মমাংদা রাজ্য অসিদা এম.বি.বি.এস.কী সীৎশিং অসি ১১০০দগী ৫৭০০দা হেনগৎলকখি অমসুং পি.জি. সীৎশিং অসি ৮০০দগী ২০০০দগী হেন্না হেনগৎলকখি। চপ মান্ননা নর্সিং অমসুং ফিজিওথেরাপীগুম্বা অতোপ্পা মেদিকেল সর্ভিসশিংগীদমক ক্বালিফাইদ তৌরবা মীওইশিংগী মশিং শরুক কয়া হেনগৎলকখি।
মরুপশিং,
গুজরাতকী মীয়ামগীদমক হকশেল অমসুং শেবা হায়বা অসি পুন্সিগী পান্দমশিংনি। শেবা তৌবনা লৈবাক অসিগী মপাঙ্গল ওইহনখিবা বাপুগুম্বা অথোইবা মীওইশিংনা ঐখোয়দা ইথিল পীখি। গুজরাতকী ৱাখল্লোন অসি ইনর্জীনা থল্লি। মফম অসিদা খ্বাইদগী মাইপাকপা মীওইনা ফাওবা শেবাগী থবক খরগা মরী লৈনৈ। গুজরাতকী শেবাগী ৱাখল্লোন অসিনা অমনা অমগা লোয়ননা মতেং পাংনদুনা মাগী কেপাবিলিতী হেনগৎলক্লি। ঙসি ঐখোয়না ফংলিবা অসিদগী হেন্না ফংবা ঙম্নবা ঐখোয়না চংশিনবা তাই।
অচেৎপা ফিরেপ অসিগা লোয়ননা হকশেল ওইরবসু, এজুকেসনবু ওইরবসু নত্ত্রগা ইনফ্রাস্ত্রকচর ওইরবসু ঐখোয়না ভারতপু মোদর্নাইজ তৌনবা লেপ্পা লৈতনা চংশিল্লি অমসুং মসি সবকা সাথ, সবকা বিকাস, সবকা বিশ্বাস আমসুং সবকা প্রয়াসকী মরু ওইবা হীরমশিংনি। মসিদা মীয়াম্না শরুক য়াবা হেনগৎলক্লিবা মখৈ লৈবাক অসিগী কেপাসিতী শরুক কয়া থোক্না হেনগৎলক্কনি, মসিগী ফলশিং অসি থুনা ফংবা ঙমগনি অমসুং ঐখোয়না অফবা ফলশিং ফংবা ঙমগনি।
অনিল ভাই, মহাক্কী ইমুং-মনুংনা ঐখোয়গী ফিরেপ ওইরিবা, পব্লিক-প্রাইবেৎ পার্তনরশিপকী ফিরেপ, খুন্নাইগী মীপুম খুদিংমক কন্নেক্ত তৌবগী ফিরেপ অসি থুংহন্নবা লৌখৎলিবা খোঙথাং অসিদা মখোয়গী ত্রস্তকী খুত্থাংদা মীপুম খুদিংমক্তা চাউনা মতেং পাংলি। মহাক্কী ইমুং-মনুংদা ঐহাক্না য়াইফ-মঙ্গোল পীজরি।
হন্না-হন্না থাগৎচরি!
