রাজ্য অসিদা বেনিফিসিয়রী করোর ৫রোমনা পি.এম.জি.কে.এ.ৱাই.গী কান্নবা ফংলি
ঈশিং-ঈচাউ থোক্লিবা অমসুং নোং চুরিবা মতম অসিদা ভারত সরকার অমসুং লৈবাক পুম্বনা মধ্য প্রদেশকীদমক লেপ্লি: পি.এম.কোরোনাগী খুদোংথিবা অসি লাকশিন্নবা লালোং য়াৎপদা ভারতনা লায়রবশিংদা মরু ওইবা মীৎয়েং থমখি: পি.এম.প্রজা করোর ৮০ হেনবনা লেম্না রাসন ফংবতা নত্তনা লায়রবা ইমুং-মনুং করোর ৮ হেনবনা লেম্না চাকথোং গ্যাস ফংখিনুপী করোর ২০ হেনবগী জন-ধন একাউন্তশিংদা হকথেংননা লুপা করোর লিশিং ৩০ ত্রান্সফর তৌখিশিন্মীশিং অমসুং লৌমীশিংগী একাউন্তশিংদা লুপা করোর লিশিং কয়া ত্রান্সফর তৌখি, হংচিৎনা মথংগী ইনস্তোমেন্ত পীগনি‘দবল-ইঞ্জিন ওইবা সরকারশিং’দা রাজ্য সরকারশিংনা কেন্দ্র সরকারগী স্কীমশিংদা মতেং পাংখি অমসুং ফগৎহনখি অমসুং মখোয়গী শক্তি হেনগৎহনখি: পি.এম.শ্রী শিবরাজ সিংহ চৌহানগী লুচিং মখাদা, মধ্য প্রদেশতা বিমারুগী রাজ্য ওইনা মতম শাংনা লৈরকপা অদু কোকহনবা ঙমখি: পি.এম.খুরুমজরি!
মধ্য প্রদেশকী রাজ্যপাল ওইরিবা অমসুং ঐহাক্কী মমাংঙৈগী মরূপ শ্রী মঙ্গুভাই পতেল অসি আদিৱাসিশিংগী য়াইফ-থৌরাংগীদমক, আদিৱাসিগী খুন্নাই অসি চাউখৎনবগীদমক্তা মহাক্কী পুন্সিবু কত্থোকখিবা অদুগুম্বা মীওই অমনি। অসিগুম্বা মধ্য প্রদেশকী রাজ্যপাল ওইরিবা শ্রী মঙ্গুভাই, মুখ্য মন্ত্রী শ্রী শিবরাজ সিংহ, রাজ্য সরকারগী অতৈ মন্ত্রী পুম্নমক, এম.পি.শিং, এম.এল.এ.শিং অমসুং মধ্য প্রদেশকী তোঙান-তোঙানবা শরুকশিংদা লৈরিবা ইচিল-ইনাও পুম্নমক খুরুমজরি!
প্রধান মন্ত্রী গরীব কল্যান অন্ন য়োজনাগী মখাদা চেং-হৱাই য়েন্থোকপগী থবক তৌরিবা অসিগীদমক ময়াম পুম্নমক্তা নুংঙাইবা ফোঙদোকচরি। ঙসি স্কীম অসিগী মখাদা পুন্না বেনিফিসিয়রী করোর ৫রোমদা কান্নবা ফংহন্নবা মধ্য প্রদেশতা অচৌবা কেম্পেন অমা চত্থরি। স্কীম অসি অনৌবা নত্তে, চহি অমা মখাইগী মমাংদা কোরোনা হৌরকপা মতম অদুদগী হৌদুনা লৈবাক অসিগী লায়রবা মীওই করোর ৮০ হেনবদা মখোয়গী ময়ুমশিংদা লেম্না রাসন ফংহনদুনা লাক্লি। অদুবু ঐহাক্না লায়রবশিং অদুগী মরক্তা চৎতুনা মখোয়গা ৱারী শানবগী খুদোংচাবা ফংখিদে। ঙসি মধ্য প্রদেশ সরকারনা নখোয় পুম্নমক উনবগী খুদোংচাবা অমা ঐঙোন্দা পীবীরে। ঙসি ঐহাক্না অরাপ্পা মফমদা লৈরিবা ঐহাক্কী লায়রবা ইচিল-ইনাওশিং উবা ফংজরে অমসুং মখোয়গী থৌজালশিং ফংজরে অমসুং মসিনা মরম ওইরগা ঐহাক্না লায়রবশিংগীদমক্তা করিগুম্বা অমা নত্ত্রগা অমদি তৌবা ঙমজরি। নখোয়গী থৌজালশিং অদুদগী ঐহাক্না থৌনা ফংজরি মরম অসিনা প্রোগ্রাম অসি চহি অমা মখাই চত্থবা ঙমজরিবনি. অদুবু ঙসি ঐহাক্না নখোয় পুম্নমক উনা ফংজরে। হৌজিক ঐহাক্না খুদোংথিবা অসিগী মতাংদা মধ্য প্রদেশকী ইচিল-ইনাও খরাগা ৱারী শারম্বনি। সরকার অসিদগী লেম্না চেং-হৱাই পীবা অসিনা ইমুং খুদিংমক্তা চাউনা মতেং ওইরি।মখোয়গী ৱাহৈশিংদা অপেনবা পোকবগী মমি তাই, মখোয়দা থাজবা উবা ফংই। অদুম ওইনমক য়াম্না নুংঙাইত্রিবদি ঙসি মধ্য প্রদেশকী জিলা কয়াদা ঈশিং-ঈচাউ অমসুং নোং চুংবগী অৱাবা ফীভম মায়োক্নরি।ঐহাক্কী মরূপ কয়াগী পুন্সি অমসুং হিংনবগী পাম্বৈশিং অনিমক্তা শোকহল্লি। অৱাবা তারিবা পুংফম অসিদা ভারত সরকার অমসুং লৈবাক মীয়াম্না মধ্য প্রদেশকীদমক লেপ্লি। শিবরাজজী অমসুং মহাক্কী কাংলুপনা মশামক্না মফমশিংদা চৎলি অমসুং রিলিফ অমসুং রেসক্যুগী থবক খোঙজেল য়াংনা পাইখৎলি। এন.আর.দি.এফ. ওইরসু, সেন্ত্রেল ফোর্স নত্ত্রগা ঐখোয়গী এয়র ফোর্স পর্সনেল ওইরবসু রাজ্য সরকারনা ফীভম অসি লাকশিন্নবা হোৎনবদা মথৌ তাবা মতেং পুম্নমক ফংহল্লি।
ইচিল-ইনাওশিং,
খুদোংথিবা অমা হেক্তা ওইরবসু মদুগী চৈথেং শিনবা থুংবদা, অরাপ্পদা য়ৌই। কোরোনাগী মওংদা মীওইবা জাতি পুম্বগী মথক্তা চহি চামা অসিগী খ্বাইদগী চাউবা খুদোথিবা নংখি। মমাংগী চহি হৌরকপা মতমদা মালেমগী লৈবাক অমত্তনা অসিগুম্বা অৱাবা অসি থেংনগনি খংদ্রিঙৈ মতমদা, মমাংগী চহিগী অঙনবা শরুক্তা কোরোনা শন্দোকপা হৌরকপা তমদা, মালেম পুম্বগী মীৎয়েং অসি খুদক্তা হেল্থ ফেসিলিতীশিংদা থমখি। মীপুম খুদিংমক চংদুনা মখোয়গী মেদিকেল ফেসিলিতীশিং মপাঙ্গল কনখৎহন্নবা হোৎনখি। অদুবু ঐখোয়গী মীশিং য়াম্না য়াম্বা ভারত অসিগী ওইনদি মালেম পুম্বগা য়েংনবদা শীংনবা অসি হেন্না চাউখি মরমদি ঐখোয়গী মীশিং অসি অদুক্কী মতিক য়াম্মি। ঐখোয়না কোরোনা ঙাকথোক্নবা অমসুং লায়েংনবা মেদিকেল ইনফ্রাস্ত্রকচর শেম-শাবা তাখি অমসুং খুদোংথিবা অসিদগী থোরকপা অতৈ অৱাবশিং অসিসু কোকহনবা হোৎনবা তাখি। কোরোনা ঙাকথোক্নবা মালেমগী অকোইবদা থবক লেপখি, চত্থোক-চৎশিন তৌবদা অথিংবা থমখি। খোঙথাং অসিনা মরম ওইরগা ভারত্তা খুদোংচাদবা কয়া অমা থোরকখি। খুদোংথিবা অসি নংলবসু ঐখোয়না পুন্না থবক তৌমিন্নখি। ঐহাক্না মীওই করোর কয়াদা লেম্না রাসন ফংহনদুনা কনাগুম্বা অমত্তা চরা হেনদনবা হোৎনখি। মরূপ কয়ানা থবক্কীদমক খুঙ্গংদগী শহরদা চৎখি মখোয়গীদমক ঐখোয়না চান্না থক্নবা অমসুং লৈফম চাফম শিনখি অমসুং মখোয়না মখোয়গী খুঙ্গংশিংদা হনবা মতমদা থবক তৌনবগীসু শিল-লাংখি।ভারতকী মফম খুদিংমক্তা খুদোংচাদবশিং অসি ঐখোয়না মায়োক্নবা তাখি, মসিনা মালেমগী অতৈ মফমশিংগা য়েংনবদা ভারতকী ওইনা লাঞ্জং অসি অমসুং শীংনবা অসি হেন্না চাউখি।
অদুবু মরূপশিং,
শীংনবনা ফনা চাউরবসু লৈবাক অমনা পুন্না অমত্তা ওইনা মায়োক্নরবা মতমদা লম্বীশিং থোরক্কনি, সমস্যা অদু কোকহনবা ঙমগনি। কোরোনানা থোকহনবা খুদোংথিবা অসি লাকশিন্নবা ভারতনা লালোং য়াৎপদা লায়রবশিংদা মরু ওইবা মীৎয়েং থমখি। প্রধান মন্ত্রী গরীব কল্যান অন্ন য়োজনা নত্ত্রগা প্রধান মন্ত্রী গরীব কল্যান রোজগার য়োজনা ওইরবসু অহৌবা নুমিৎতগী লায়রবশিং অমসুং শিন্মীশিংগী চান্না থক্নবা অমসুং থবক পীবদা মীৎয়েং থমখি। হায়রিবা মতম অসিদা ইরৈবাকচা করোর ৮০ হেনবদা লেম্না রাসন পীখি। গেহু, চেং অমসুং হৱাই খক্তা নত্তনা লোকদাউন মনুংদা লায়রবা ইমুং করোর ৮ হেনবদা লেম্না চাকথোং গ্যাসসু ফংহনখি। মীওই করোর ৮০দা চেং-হৱাই অদুগা মীওই করোর ৮দা গ্যাস পীখি। মসিদা নত্তনা ইচে-ইচল করোর ২০ হেনবগী জন ধন বেঙ্ক একাউন্তশিংদা হকথেংননা লুপা করোর লিশিং ৩০ ত্রান্সফর তৌখি। লৌমীশিং অমসুং শিন্মীশিংগী বেঙ্ক একাউন্তশিংদা লুপা করোর লিশিং কয়াসু দিপোজিৎ তৌখি। নুমিৎ নিনিগী মতুং, ওগস্ত ৯দা লৌমীগী ইমুং করোর ১০-১১রোমদা মখোয়গী বেঙ্ক একাউন্তশিংদা হকথেংননা লুপা করোর লিশিং কয়া ত্রান্সফর তৌগদৌরি।
মরূপশিং,
শিল্লি-লাংলিবশিং অসিগা লোইননা ভারতনা মেদ ইন ইন্দিয়া ভেক্সিনদা মপুং ফানা মীৎয়েং থম্লি।মসিনা মরম ওইরগা ঙসি ভারতকী মশাগী ভেক্সিন লৈরিবনি। ভেক্সিন অসি কান্নবা ফংই লোইননা খুদোংথিনীংঙাই ওইদে। শুপ্নগী ঙরাংতা ভারতনা ভেক্সিন দোজ করোর ৫০ কাপখিবগী য়াম্না মরু ওইবা তাঙ্কক অমা লানখ্রে। ভারতনা চয়োল অমদা কাপ্লিবা ভেক্সিনগী মশিং অসিনা অতৈ লৈবাক কয়াগী অপুনবা মীশিংদগী হেল্লি। মসি অনৌবা ভারত অমগী, মরোমদোম লেপচবা ঙম্বা ভারতকী অনৌবা মতিক-ময়াইনি। করিগুম্বা মতমদা মালেমগী অতৈ লৈবাকশিংদগী ঐখোয়না শোত্থহৌবা য়াওই। ঙসি ঐখোয়না মালেমদগী খোঙফম কয়া মাংদা চৎখৎনা লৈরি। লাক্কদৌরিবা মতমশিংদা ঐখোয়না তীকা থাদোকপগী খোঙজেল অসি য়াংখৎহনবা মথৌ তাই।
মরূপশিং,
কোরোনানা ওইহল্লিবা ফীভম অসিদা ভারতনা অমত্তা ওইনা থেংনরিবা হীরমশিংগী মশিং অসিনা ঐখোয়গী লৈবাক্কী মপাঙ্গল উৎলি। ঙসি অতৈ রাজ্যশিংদা থবক তৌরিবা শিন্মীশিংগী খুদোংচানবা ৱন নেসন, ৱন রাসন কার্দকী খুদোংচাবা ফংহল্লি। অচৌবা শহরশিংদা ফিয়র রেন্তকী স্কীমশিং হৌদোক্তুনা শিন্মীশিং স্লমশিংদা লৈহনদনবা হোৎনরি। লম্বীদা ভেন্দর হাংবা অমসুং থেলদা পোৎ য়োনবা ঐখোয়গী ইচিল-ইনাওশিং, ঐখোয়গী মরূপশিংনা মখোয়গী বিজিনেস অমুক হন্না হৌনবা মখোয়দা পি.এম. স্বনিধিগী মখাদা বেঙ্কশিংদগী শেন্থং লৌবা য়াহল্লি। শেল চংদবা অমসুং অরায়বা লোনশিং ফংহল্লি। ঐখোয়গী কনস্ত্রক্সন সেক্তর, ঐখোয়গী ইনফ্রাস্ত্রকচর সেক্তর অসিনা থবক চাউনা পীরি। মরম অসিনা লৈবাক শিনবা থুংবদা ইনফ্রাস্ত্রকচর প্রোজেক্তশিং মখা চত্থনবা থবক পাইখৎলি।
মরূপশিং,
মালেমশিনবা থুংবদা হিংনবগী লম্বীগী অৱাবা মায়োকনরিঙৈ অসিদা ভারত্তা য়ারিবা মখৈ শোকহনদনবা হোৎনরি। মসিগীদমক মমাংগী চহিদা খোঙথাং কয়া লৌখৎখ্রে অমসুং হৌজিকসু লেপ্তনা লৌখৎলি। অপীক-অপীকপা মাইক্রো ইন্দস্ত্রীশিংদা লুপা করোর লাখ কয়া কয়া পীথদুনা মখোয়গী থবক মখা চত্থহল্লি। সরকারনা লৌউ-শিংউ অমসুং মসিগা মরী লৈনবা থবক-থৌরমশিংসু মখা চত্থনবা য়েংশিনখি। হীরম অসিদা মধ্য প্রদেশনা শীংথানীংঙাই ওইবা থবক অমা তৌখ্রে। মধ্য প্রদেশতা লৈরিবা লৌমীশিংনা রেকোর্দ ওইনা পোত্থোক পুথোক্লি, সরকারনা রেকোর্দ ওইনা পোত্থোকশিং এম.এস.পি.দা লৈখি। হন্দক্তি এম.পি.দা গেহু লৈশিন্নবা লৈবাক অসিগী ওইনা প্রোক্যুর্মেন্ত সেন্তর মশিং খ্বাইদগী য়াম্না হাংদোকখি হায়না ঐঙোন্দা খঙহল্লকখি। মধ্য প্রদেশনা লৌমী লাখ ১৭ হেনবদগী গেহু লৈশিনখি অমসুং মখোয়দা হকথেংননা লুপা করোর লিশিং ২৫ ত্রান্সফর তৌখি।
ইচিল-ইনাওশিং,
দবল ইঞ্জিন ওইবা সরকারগী খ্বাইদগী অচৌবা কান্নবা অসি কেন্দ্র সরকারগী স্কীমশিং অসি রাজ্য সরকারনা মখা তানা ফগৎহল্লি অমসুং মসিগী শক্তি হেনগৎহল্লি। স্কিল দিবেলপমেন্ত, হেল্থ ইনফ্রাস্ত্রকচর, দিজিতেল ইনফ্রা, রেল-রোদ কনেক্তিবিতী ওইরবসু মধ্য প্রদেশতা থবক পুম্নমক খোঙজেল য়াংনা পাইখৎলি। শিবরাজজীগী লুচিং মখাদা মধ্য প্রদেশপু মতম শাংনা বিমারু রাজ্যনি হায়না খঙনরম্বা অদু কোকহনবা ঙমখ্রে। মসি নৎলমদবা তারবদি এম.পি.গী লম্বী-থোংগী হান্না ওইরম্বা ফীভম অদু ঐহাক্না হৌজিকসু নীংশিংলি। মফম অসিদা মতম অদুদা অচৌ-অচৌবা স্কেমশিংগী পাউতনা থল্লমখি। ঙসি এম.পি.গী শহরশিংদা লুনানবা অমসুং চাউখৎ-থৌরাংগী অনৌবা পেরাদিমশিং শেমলি।
ইচিল-ইনাওশিং,
ঙসি সরকারগী স্কীমশিং হেক হৌদোকপগা খোঙজেল য়াংনা ইমপ্লিমেন্ত তৌরিবা অসি সরকারনা মথৌ তৌবগী মওংদা করিগুম্বা অহোংবা অমা লাকপননি। মমাংগী সরকারগী সিস্তেমদা অশোইবা অমা লৈরমখি। মহাক মশানা লায়রবশিংগী মরমদা ৱাহংশিং হংজৈ অমসুং মশানা পাউখুমশিং পীজৈ। কান্নবা অসি য়ৌহল্লিবা মীওইশিং অদুগী মমাংদা করিসু খনবীরমদে। লায়রবশিংনা করিগীদমক লম্বী-থোং মথৌ তারিবনো, মহাক্না অহানবদা মথৌ তারিবা অসি চেং-চাক্নি হায়না মীওই খরনা খল্লম্মি। মীওই খরনা অমুক হায় লায়রবনা চাকথোং গ্যাস করিগী মথৌ তারিবনো, মহাক্না শীংনা চাক থোংবা য়াইনা। থমজিন্নবা শেল লৈতবা মীওইশিংদা বেঙ্ক একাউন্তগী কান্নবা অসি করিনো হায়না ৱাখল্লোন ফোঙদোক্নরকখি। নখোয়না বেঙ্ক একাউন্তদা হায়রিবা করিগীনো? লায়রবশিংদা লোন পীরগা মখোয়না করম্না মদু শিংগৎলক্কনি? হায়না ৱাহংশিংসু লাকখি। দেকেদ কয়া ৱাহংশিং অসিনা লায়রবশিংবু খুদোংচাবা অসি ফংহনদনা লাকখি। মসিনা থবক তৌদনবা অচৌবা মরম অমা ওইদুনা লাকখি। লম্বী-থোংনা লায়রবদা য়ৌখিদে, লায়রবনা চাকথোং গ্যাস ফংখিদে, লায়রবনা মৈ ফংখিদে, লায়রবগী পক্কাগী য়ুম শাবীখিদে, লায়রবগী বেঙ্ক একাউন্ত হাংহনদে, লায়রবদা ঈশিংসু য়ৌহনখিদে। পুম্নমক অসিগী মরমদা দেকেদ কয়া লায়রবশিংদা খুদোংচাবশিং অসি ফংহনদনা লাকখি অমসুং লায়রবশিংনা নোংমগী মথৌ তাবশিংগীদমক নুমিৎ চুপ্পা ৱানা হোৎনদুনা লাকখি, ঐখোয়না মসি করি হায়না হায়বা য়াই? নোংমদা লায়রবা হায়বা ৱাহৈ অসি মচিলদগী ১০০রক তাবা ফংই, লায়রবগী মতাংদা ঈশৈ শকই। অদুবু মখোয়না উৎলিবা শাজৎ অদুদি ঐখোয়গী মফম অসিদা হিপোক্রেসী হায়না খঙনৈ। মখোয়না খুদোংচাবা অমত্তা ফংহনদনা শিন্দা খক্তা মীনুংশি উৎলি। অদুবু ঐখোয়দি পুম্নমক অদু থেংনরক্লে, নখোয়গুম্বা মীওই কয়াগা মরক্তা হৌরকখি, নখোয়গী নুংঙাইবা অৱাবা অসি মুন্না খংই, মরম অসিনা ঐখোয়না নখোয়গুম্বা মীওইশিংগীদমক থবক তৌরিবনি। ঐখোয়না সিস্তেমনা পীবা চৈথেং খাংদুনা লাকখি! মরম অসিনা হৌখিবা চহিশিংদা লায়রবশিংদা মপাঙ্গল হাপ্নবা অমসুং মখোয়দা শক্তি পীনবা হোৎনদুনা লাকখি। ঙসি খুঙ্গং-খুঙ্গংদা লম্বী শেম্লে, অনৌবা থবক্কী খুদোংচাবা ফংহকে, লৌমীশিংনা কৈথেল য়ৌবা ঙম্লে, লায়রবশিংনা অনা-অয়েক য়াওরকপা মতমদা মতম চানা হোস্পিতাল য়ৌবা ঙমজরে। লৈবাক অসিদা লৈরিবা লায়রবশিংগী জন ধন একাউন্তশিং হাংবনা লায়রবশিংনা বেঙ্কিং সিস্তেমগা শম্নবা ঙম্লে। ঙসি দলালি চাবা মীওইশিং য়াওদনা কান্নবশিং হকথেংননা ফংবা ঙমজরে, মহাক্না লোনশিং লায়না ফংলে। পক্কাগী য়ুম, মৈ, ঈশিং, গ্যাস অমসুং তোইলেৎনা লায়রবশিংদা ইকাই খুম্নবা অমসুং থাজবা পোকহল্লে। মখোয়বু ইকাইবা অমসুং অৱাবা নংবদগী কোকহনবীরে। মসিগা মান্ননা ঙসি মুদ্রা লোনগী খুত্থাংদা মশানা মশাবু থবক পীজবা মীওই করোর কয়া লৈবতা নত্তনা মখোয়না অতৈদসু থবক পীবা ঙম্লে।
মরূপশিং,
লায়রবশিংনা দিজিতেল ইন্দিয়া, অহোংবা দেতা, ইন্তর্নেৎকী মরমদা খনদে হায়না হায়রম্বা মীওইশিং য়েংঙু ঙসি মখোয়না দিজিতেল ইন্দিয়াগী শক্তি অদু উবা ফংলে।
ইচিল-ইনাওশিং,
লৈবাক অসিদা খুঙ্গংশিং, লাবরবশিং, আদিৱাসিশিং শক্তি পীনবা অতোপ্পা অচৌবা কেম্পেন অমসু হৌদোকখ্রে। কেম্পেন অসিনা হেন্দিক্রাফ, হেন্দলুম, ঐখোয়গী ফী শাবগী খুৎশা হৈবা অসিবু থৌগৎকনি। কেম্পেন অসি লোকেলগীদমক ভোকেল ওইনবনি। ৱাখল্লোন অসিগা লোইননা ঙসি লৈবাক অসিনা নেস্নেল হেন্দলুম দে পালন তৌরি অমসুং ঐখোয়না নীংতমখিবগী চহি ৭৫ শুরকপগী পালন তৌরিবা, ঐখোয়না আজাদী কা অমৃত মহোৎসব পালন তৌরিবা মতম অসিদা ওগস্ত ৭কী মরু ওইবা অসি হেন্না হেনহল্লি। নুমিৎ অসিদা, ১৯০৫কী ওগস্ত ৭তা স্বদিশি ইহৌ হৌখি। পুৱারী ওইরবা নুমিৎ অসিদগী ইথিল লৌদুনা ওগস্ত ৭ অসি হেন্দলুমদা দেদিকেত তৌখি। মসিনা ঐখোয়গী খুঙ্গংদা , আদিৱাসিগী লমশিংদা লৈরিবা নীংথিরবা ক্রাফমেন, নীংথিরবা আর্তিস্ত অসিবু ইকাই খুম্নবা উৎনবা অমসুং মখোয়গী প্রদক্তশিংগী প্লেৎফোর্ম পীনবা নুমিৎ অমনি।
ইচিল-ইনাওশিং,
ঙসি লৈবাক অসিনা আজাদী কা অমৃত মহোৎসব পালন তৌবা অসিদা হেন্দলুমগী নুমিৎ অসি হেন্না মরু ওইবা হেনগৎলি। ঐখোয় পুম্নমক্না ঐখোয়গী তরেং, ঐখোয়গী খাদিনা ঐখোয়গী নীংতম খোঙজংদা চাউনা শরুক তমখি হায়বা খংই। চহি খরা অসিদা লৈবাক অসিনা খাদিদা চাউনা ইকাই খুম্নবা উৎলি। মতম অমদা মিরাইবীরুরবা খাদি অসি ঙসিদা অনৌবা ব্রান্দ অমা ওইররে। ঐখোয়না নীংতমখিবগী চহি ১০০ শুরকপগী অনৌবা মাইকৈদা চংশিল্লি, ঐখোয়না নীংতমখিবা অদুদা খাদিনা লৌখিবা থৌদাং অদু মপাঙ্গল কনখৎহনবা তাই। মরোমদোম লেপচবা ভারত অমগীদমক ঐখোয়না লোকেলগীদমক ভোকেল ওইবা তাই। মধ্য প্রদেশধা খাদিদগী হৌরগা মুগা ফাওবগী হেন্দিক্রাফকী নীংথিজরবা নাৎ অমা লৈ। ঐহাক্না নখোয় পুম্নমক্তা, লৈবাক পুম্বদা লাক্কদৌরিবা হরাও-কুহ্মৈ অসিদা শোইদনা হেন্দিক্রাফকী লোকেল প্রদক্তশিং লৈবীনবা, ঐখোয়গী হেন্দিক্রাফ শৌগৎপীনবা হায়জরি।
অমসুং মরূপশিং,
হরাও-কুহ্মৈগী নুংঙাইবা ফোঙদোক্লিঙৈ মনুংদা ঐখোয়না কোরোনাবু কাউথোকপা তৌরোইদবনি। ঐখোয়না কোরোনাগী অহুমশুবা ৱেব লাকহনদনবা হোৎনবা তাই। মসিগীদমক ঐখোয়না পুন্না হোৎনমিন্নবা তাই। মাস্ক উপা, ভেক্সিন কাপ্পা, গজ ২গী অরাপ্পা থম্বা অসি য়াম্না মরু ওই। ঐখোয়না মশা-মউ ফবা ভারত অমা ওইহন্নবা ৱাশক লৌরসি, ঐখোয়না চাউখৎপা ভারত অমা ওইহন্নবা ৱাশক লৌরসি। অমুক হন্না ময়ামদা ঐহাক্না য়াইফ-পাউজেল পীজরি। অমসুং ঙসি মধ্য প্রদেশ পুম্বদা লেম্না রাসন য়েনবা দুকান লিশিং ২৫ হেনবনা প্রজা কয়া তিলহল্লি, মখোয়দা ঐহাক্না ইকোক নোন্না খুরুমজরি অমসুং মীওইবা জাতি, মালেম পুম্বনা খুদোংথিবা অসি মায়োক্নরি, কোরোনানা মীপুম খুদিংমকপু ৱাহল্লি। ঐখোয় পুন্না হোৎনদুনা লাইনা অসি মাইথিবা পীবা ঙমগনি হায়না ঐহাক্না থাজবা পীরি। ঐখোয়না মীপুম খুদিংমকপু কনগনি, ঐখোয় পুন্না কনমিন্নসি, কাংলোন পুম্নমক ঙাক্না চৎতুনা ঐখোয়না শোইদনা মাইপাক্কনি। ঐহাক্না ময়ামদা য়াইফ-পাউজেল পীজরি। থাগৎচরি!
