ফমফমলাংদা লেংশিনবীরিবা জম্মু-কশ্মীরগী রাজ্যপাল শ্রীমান এন. এন. বোহরাজী, মুখ্য মন্ত্রী মহবুবা মুফতী জী, মন্ত্রী মন্দলদা ঐহাক্কী খোংলোয় শ্রীমান নিতীন গদকরীজী, দাক্তর জিতেন্দ্র সিংহজী, আর. কে. সিংহজী, জম্মু-কশ্মীরগী উপ- মুখ্য মন্ত্রী শ্রীমান কবিন্দ্র গুপ্তজী, রাজ্যগী পাৱর মিনিস্তর শ্রী সুনিল কুমার শর্মজী, বিধান সভাগী দিপুতী স্পিকর শ্রী নজীর অহমদ খানজী, পার্লিয়ামেন্তরিয়ান অমদি লৈবাক্কী শক্নাইরবা লুচীংবা দাক্তক ফারুখ অব্দুল্লাজী, পার্লিয়ামেন্তরিয়ান শ্রীমান মুজ্জফর হুসৈন বৈগজী, অমদি মফম অসিদা তিনবীরিবা শক্নাইরবা পুম্নমক অমসুং জম্মু-কশ্মীরগী ঐহাক্কী নুংশিজরবা ইচল-ইচে অমদি ইচিল-ইনাওশিং।
জম্মু-কশ্মীরদা অমুক হন্না লাক্তুনা ময়াম পুম্নমক্কা উনবগী তাঞ্জা অদু ঐহাক্না ফংজরে। হৌখিবা চহি মরি অসিদা মফম অসিদা ঐহাক্না লাকখিদবা চহি অমত্তা য়াওখিদে। শ্রীনগরদা ইচাউ থোকখিবা মতুংদা দিৱালী লাকখি, ঐহাক্না মফম অসিদা অৱা অনা তারবশিংগী মরক্তা দিৱালী পাংথোকখি। মদুদসু নত্তনা ঙমখৈদা মথৌ তৌরিবা জৱানশিংগা লোয়ননা দিৱালী পাংথোক্নবা তাঞ্জা অদু ঐহাক্না ফংজখি অমদি ঙসি রমজানগী শেংলবা থা হৌরকপা মতম অসিদসু ময়ামলক্তা শরুক য়াজরি। চৎলিবা থা অসিনা পৈগম্বর মোহম্মদ সাহেবকী শিক্ষা অমসুং মহাক্কী পাউজেল অদু নৌহৌনা নিংশীংজবগী তাঞ্জা অদু পীরি।
রমজানগী অসিগুম্লবা য়াইফরবা থা অসিদা মফম অসিদা ঐখোয়না অচৌবা মংলান অমা মপুং ফাহন্নবা অমত্তা ওইনা পুল্লরিবা অসিদা নুংঙাইবা ফাওই। ঙসি কিষনগঙ্গা হাইদ্রো ইলেক্ত্রিক প্রোজেক্ত মীয়ামদা খুৎশিন্নবগী তাঞ্জা অদু ঐহাক্না ফংজরে। খুদোং চাদবা কয়া মায়োক্নরবা মতুং প্রোজেক্ত অসি জম্মু-কশ্মীরগী দিবেলপমেন্তকী খোংচৎতা অনৌবা মায়কৈ অমা হাপচিন্নবগীদমক থৌরাং তৌরে। তাঞ্জা অসিদা ঐহাক্না ময়াম পুম্নমকপু য়াইফ-পাউজেল পীজরি। মসিনা রাজ্য অসিদা লেম পানা মৈ ফংহল্লগনি।
ইচল-ইচে অমদি ইচিল-ইনাওশিং, প্রোজেক্ত অসি ইঞ্জিনীয়ারিংগী মপা লৈত্রবা খুদম্নি। মসিবু মপুং ফানা শেমগৎপা লোইশিন্নবা মীওই কয়ানা তপস্যা তৌখি। কিষনগঙ্গাগী ঈশিংবু চিং তৌখায়দুনা তনেলগী খুত্থাংদা বান্দিপোরাগী বোনার কেনেলদা য়ৌহল্লি। প্রোজেক্ত অসিগা মরি লৈনরিবা শিন্মী খুদিংমক, ওফিসিয়েল খুদিংমক, ইঞ্জিনীয়ার খুদিংমকপু থোইদোক হেন্দোক্না থাগৎনীংঙাইনি।
হৌজিক মফম অসিদা শ্রীনগর রিং রোদ শেম্নবা উরেপ উয়ুং তম্বগী তাঞ্জা অমা ঐহাক্না ফংজখি। কিলোমীতর নিফুনিথোই শাংবা লম্বী অসিদা লুপা কোতি চামঙা হেন্না চাদিং তৌগনি। রিং রোদ অসিনা শ্রীনগরগী শহর মনুংদা গারী চিনবগী খুদোং চাদবা অদু ফনা য়াম্না হন্থহল্লগনি।
মদুগা লোয়ননা জম্মু-কশ্মীর মীয়ামগী পুন্সিদা অহোংবা পুরক্নবগীদমক রাজ্য অসিগী রিজন অহুম- কশ্মীর, জম্মু অমসুং লদাখপু চাং মান্ননা চাউখৎহনবা মথৌ তাই। মদুগী ৱাখল্লোন অদুগা লোইননা চহি অনি মখায়গী মমাংদা লুপা কোতি লিশিং ৮০গী পেকেজ লাওথোকখি। তেনখ্রবা মতম অসিগী মনুংদা চাউরাক্না লুপা কোতি লিশিং হুমফু হুমদোইগী প্রোজেক্তা অয়াবা পীখিবা অমদি লুপা কোতি লিশিং ২০ হেন্না চাদিং তৌখিবা অসিদা ঐহাক অপেনবা ফাওই। শেনফম অসিনা জম্মু-কশ্মীরদা আই আই তি শেমগৎ শাগৎপগী থবক, আই আই এম শেমগৎ শাগৎপগী থবক, এম্স অনি শেমগৎ শাগৎপগী থবক, প্রাইমারী হেল্থ সেন্তরদগী হৌরগা দিস্ত্রিক হোস্পিতালশিংবু মোর্দনাইজ তৌবগী থবক চত্থরি।
অনৌবা নেস্নেল হাইৱে, ওলৱেদর রোদ, অনৌবা তনেলশিং, পাৱর ত্রান্সমিসন অমদি দিস্ত্রিব্যুসন লাইন, পাৎ অমসুং তুরেল কনবগী থবক, লৌমীশিংগীদমক স্কিমশিং, কোল্দ স্তোরেজ, ৱেয়রহাউজিং, নহাশিংবু থবক পীনবা থৌরম অসিগুম্বা অনৌবা ইনিসিয়েতিব কয়া পুদুনা চৎলি।
মরূপশিং, জম্মু-কশ্মীরদা তুরেল কয়া লৈরি, মফম অসিদা হাইদ্রো পাৱর মরাং কাইনা ফংবা ঙমগনি। মসিনা লমদম অসি খক্তগী নত্তনা লৈবাক অসিগীদমক মৈ পুথোকপা ঙমগনি। ৱাখল্লোন অসিগা লোয়ননা হৌখিবা চহি মরিদগী মফম অসিদা ঐখোয়না তোঙান তোঙানবা প্রোজেক্তশিংদা থবক চত্থরি। কিস্তবারদা লুপা কোতি ৮০০০ হেন্না থাদদুনা শেমগৎকদৌরিবা হাইদ্রো পাৱর প্লান্ত অসি অথুবা মতমদা থবক হৌরগনি।
জম্মু-কশ্মীরগী ইমুং খুদিংদা অয়েৎ অপন য়াওদনা মৈ ফংহন্নবগীদমক লেপ্পা লৈতনা হোৎনরি। স্মার্ত গ্রিদ অমদি স্মার্ত মিতরগুম্বা এদভান্স তেক্নোলোজী শিজিন্নরি। স্ত্রীত লাইৎশিং মোর্দনাইজ তৌবগী থবক চত্থরি। জম্মু-কশ্মীরগী খুঙ্গংশিংদগী হৌরগা শহরশিং ফাওবা মৈ ঙালহন্নবগীদমক রাজ্যগী পাৱর দিস্ত্রীব্যুসন সিস্তেম ফগৎহন্নবা চাউরাক্না লুপা কোতি লিশিং ৪ চাদিং তৌরে।
মরূপশিং, খুঙ্গং অমসুং য়ুমথোং খুদিংদা মৈ ফংহনবা অদু খক্তা নত্তে। মৈ ফংলবা ইমুংশিং অদুদা মৈগী বিলনা পোৎলুম ওইদনবা খোংথাংসু লৌখৎলি। উজালা স্কিমগী মখাদা জম্মু-কশ্মীরদসু এল ই দি বল্ব লাখ ৭৮ হেন্না য়েন্থোকখ্রে। মদুনা মফম অসিগী মীয়াম্বু মৈগী বিলদা চহি খুদিংগী চাউরাক্না লুপা কোতি ৪০০ হেন্না কনবা ঙমহল্লে। হৌজিক্তি সৌভাগ্য স্কিমগী খুত্থাংদা মৈ ফংদ্রিবা জম্মু-কশ্মীরগী ইমুং খুদিংদা লেম্না মৈগী কনেক্সন ফংহনবগী থবক চত্থরি।
মরূপশিং, তুরিজম অসি জম্মু-কশ্মীরগী দিবেলপমেন্তা খ্বাইদগী চাউবা পাম্বৈ অমনি হায়বা চহি কয়াগী মমংদগী ঐখোয়না উদুনা লাক্লে। শেল য়াম্না পুথোক্তনা থবক য়াম্না পীবা ঙম্বা সেক্তর অসিনা জম্মু-কশ্মীরগী লাইবক লেপ্লি। অদুবু হৌজিক্তি সেক্তর অসি থাইনগী অরিবা মওং মতৌ অদুদা মায় পাকপা ঙমদ্রে। ঙসিগী লমকোয়বশিংনা অনৌবা খুদোংচাবশিং পাম্লি। মখায়না মফম অমদগী অতোপ্পা মফম অমদা চৎনবগীদমক পুং কয়া ঙায়দুনা লৈবা পামদে, মখোয়না লম্বীদা পন্থদুনা লৈবা পাম্দে, মখোয়না মতম পুম্নমক্তা ইলেক্ত্রেসিতী পাম্মী। মখোয় লু নানবা পাম্মী, মখোয়না অফবা এয়র সর্বিস পাম্মি।
তুরিজমগীদমক মথৌ তাবা মোর্দন ইকোসিস্তেম অদু পুক্নিংদা থমদুনা ঐখোয়গী সরকার অসিনা তোঙান তোঙানবা স্কিমশিদা থবক পায়খৎলি। ইকোসিস্তেম অসি চেৎলিবা মখৈ জম্মু-কশ্মীরদা লমকোইবা মীগী মশিং হেঙ্গৎলক্কনি, মদুদসু নত্তনা জম্মু-কশ্মীরগী নহাশিংবু থবক ফংজনবা অনৌবা খুদোংচাবাসু ফংলগনি।
মরূপশিং, চাউরাক্না লুপা কোতি লিশিং ২ চংনা দিবেলপমেন্ত ওথোরিতিজ ১২, তুরিজম সর্ক্যুৎ ৩, তুরিস্ত ভিলেজ ৫০ শেমগৎ শাগৎপগী থবক চত্থরগনি। অদুবু মমাংদা ঐহাক্না হান্ননা হায়খিবা অদুনি, তুরিজমগা লোয়ননা মদুগী ইকোসিস্তেম পুম্নমক চেৎনা থম্বা মথৌ তাই।
ইকোসিস্তেম অসিগী খ্বাইদগী চাউবা য়ুমফমদি কনেক্তিবিতীনি। মদুনা মরম ওইরগা জম্মু-কশ্মীরদা কনেক্তিবিতীগীদমক অৱাংবা থাক্তা কন্না হোৎনরি। চাউরাক্না রাজ্য অসিদা পীরিবা পেকেজকী তঙ্খাই অমদি রোদ সেক্তরদা চাদিং তৌরি।
মফম অসিদা লাক্ত্রিঙৈ মমাংদা ঐহাক্না লৈবাক অসিগী খ্বাইদগী শাংবা জোজিলা তনেল শেম্বগী থবক হৌদোকখি। তনেল অসিনা জম্মু-কশ্মীর দিবেলপমেন্তকী অনৌবা ৱারী অমা ইরগনি। কনেক্তিবিতী হেঙ্গৎপনা অদোমগী খুদোংচাদবশিং অদু হন্থহল্লগনি।
শ্রীনগরদা শেমগদৌরিবা রিং রোদ ওইগেরা, শ্রীনগর-শোপিয়া-কাজীগুন্দ নেস্নেল হাইৱে ওইগেরা নত্রগা চেনানী-সুধমহাদেব-গোহা রোদ ওইগেরা, মসি শেম্বা লোইরবা মতম অদুদা ময়াম পুম্নমক্কী মতমসু য়াম্না চংলরোই অমসুং অদোমগী রিসোর্সশিং মাংবগী চাংসু হন্থরগনি। উন তারকপা মতমদা লম্বী ফাওনদবা মফমশিং অদুসু শম্নহল্লে, মখোয়গীদমক হেলিকোপ্তর সর্বিস ফংহল্লে। শ্রীনগর অমসুং জম্মু শহরবু স্মার্ত সিতী ওইহন্নবা থবকসু চংশিল্লি।
শহরশিংদা থক্নবা ঈশিং ফংহনবা অমদি সীৱেজকী ফিভম ফগৎহন্নবা অমৃত য়োজনাগী মখাদা চাউরাক্না লুপা কোতি চামঙা কায়থোক্কদৌরি। অনৌবা খুদোংচাবশিং ফংলগনি, অনৌবা লম্বীশিং লৈরগনি, অদু ওইবা তারগদি অদোমগী পুন্সিদসু খোদোংচাবা কয়া ফংলগনি।
ইচল-ইচে অমসুং ইচিল-ইনাওশিং, খুঙ্গং অমসুং শহরশিংবু স্মার্ত ওইহন্নবা ৱাফম পল্লকপা মতমদা লু নানবা অসি মদুগী তঙায় ফদ্রবা শরুক অমা ওইরকই। জম্মু-কশ্মীরগী মীয়াম্নসু কেম্পেন অসি মপুং ফানা চত্থবদা ঐহাক নুংঙাইবা ফাওই।
মরূপশিং, য়াম্না লুরিবা ৱাফম অমদা পি দি পি-বি জে পিগী চুংশিন্নবা সরকার অমসুং কেন্দ্র সরকারনা পুন্না থবক তৌমিন্নরি। ঙমখৈ ৱাংমগী ফিভম অদুদা তৌফম খঙদদুনা মফম অসিদা লাক্লিবা মীওইশিং, মফম অদুগী খুদোংচাদবশিং অদুনা মরম ওইদুনা ময়ুম থাদোক্লবা মখোয়শিং অদু নৌনা খুন্দা লৈতাহন্নবা চাউরাক্না লুপা কোতি লিশিং অহুম চাদিং তৌরি।
ইচল-ইচে অমসুং ইচিল-ইনাওশিং, জম্মু-কশ্মীরগী নহাশিংবু মহৈ মশিং অমদি থবক্কী খুদোং চাবা পীনবা মরুওইবা খোংথাং কয়া পায়খৎলি। রাজ্য সরকারগা লোয়ননা অনৌবা স্কিম কয়া অমা চত্থরি। হিমায়ৎ স্কিমগী মখাদা মফম অসিগী নহা লাখ অমবু ত্রেন্দ তৌনবা প্রোজেক্তা থবক চত্থরি। অঙাং লিশিং ১৬ হেনবনা প্রধান মন্ত্রী স্পিসিয়েল স্কোলর্শিপ স্কিমগী কান্নবা ফংলি। মখোয়বু লৈবাক অসিগী অফবা কোলেজশিং অমসুং য়ুনিবর্সিতীশিংদা অৱাংবা থাক্কী মহৈ মশিংগী খুদোং চাবা পীরি।
মফম অসিগী নহাশিংনা লৈবাক্কী অমদি মীরৈবাক্কী সেক্যুরিতীদা কান্নবা পীবা ঙম্নবা অনৌবা খুদোংচাবশিং পীরি। জম্মু-কশ্মীর পুলিসপু হেন্না মপাঙ্গল কনখৎহন্নবা ইন্দিয়ন রিজর্ব বতালিয়ন ৫ লিংখৎপদা অয়াবা পীখ্রে।
মরূপশিং, শক্তি কয়া অমনা জম্মু-কশ্মীর অসি চাউখৎহনবা, মফম অসিগী মীয়াম তংদু লৈতানা লৈহনবা পাম্দে, অদুবু মরূপশিং, ঐখোয়না অসিগুম্লবা মীরমগী শক্তিশিং অসি পাউখুম পীদুনা মাংলোমদা লেপ্তনা চংশিবা তাই।
মফম অসিদা লৈরিবা মুফতিজীনা লুচিংবা পি দি পি-বি জে পিগী চুংশিন্নবা সরকার অমদি কেন্দ্রগী এন দি এ সরকারনা মীরমগী ফত্তবা ৱা লৌদুনা মশামক্কী শেংলবা লমদম অসিদা খুৎ থারিবা অদুগুম্লবা লান্না চৎখ্রবা নহাশিং অদুবু মহৌশাগী ফিভমদা হনজিলহন্নবা লেপ্পা লৈতনা হোৎনরি।
ইচল-ইচে অমসুং ইচিল-ইনাওশিং, ঐহাক্না অমুক হন্না হায়রিবা অসিনি, হৌখিবা চহিদা ঐহাক্না গুরেজদা জৱানশিংগা লোয়ননা দিৱালী পাংথোকখি, চহি অসিদনা রমজানগী তাঞ্জা অসিদা ময়ামগী মরক্তা শরুক য়ারি।
ন্যু ইন্দিয়াগা লোয়ননা ন্যু জম্মু-কশ্মীরনা হোংলক্লিবা ভারতকী দিবেলপমেন্তকী ৱারীবু হেন্না চেৎশিলহল্লগনি হায়বা ঐহাক্না থাজবা থম্লি। ৱাখল্লোন অসিগা লোয়ননা সেথা-সেথা শুক্রিয়া, অজ দীয়ু ইজাজৎ, খুদাই থই নব খোশৎ খুশহাল
থাগৎচরি।
