ঙাকশেল মন্ত্রী শ্রীমান রাজনাথ সিংহ জী, রাজ্য ঙাকশেল মন্ত্রী শ্রীপদ নায়ক জী, লান্মী অহুমক্কী মকোকশিং, অতোপ্পা মকোকথোংবা ওফিসারশিং, কার্গিলগী থৌনা ফরবা লান্মীশিং অমদি মখোয়গী ইমুং মনুগী মীওইশিং, মফম অসিদা তিনবিরিবা শক্নাইরবশিং অমদি ঐহাক্কী নুংশিজরবা ইচিল-ইনাও অমসুং ইচল-ইচেশিং।
কার্গিল বিজয় দিবসকী অসিগুম্লবা থৌরম অসিদা ঙসি লৈবাক অসিগী মীওই খুদিংমক্না থৌনা ফবা অমসুং লৈবাক্কীদমক কত্থোকখিবা পুক্নিং থৌগৎনিঙাই ওইরবা ৱারী অমা লীরি। ঙসিগী থৌরম অসিদা ঐহাক্না থৌনাফরবা মখোয়শিং অদুগী মফমদা ইকায় খুম্নবা উৎচরি, মখোয়না কার্গিলগী চিংদোলদগী মচু অহুমগী ফিরাল লৌথনবা হোৎনখিবা অদু মায়থিবা পীখি। লৈখিদ্রবা অথৌবশিংবু পোকপিখিবা থৌনা ফরবা ইমাশিংবুসু ঐহাক্না খুরুমজরি। কার্গিল য়াওনা জম্মু-কাশ্মিরগী মীওই খুদিংমক্কী তৌবিমল খংবা উৎচরি, মখোয়না লৈবাক্কীদমক মখোয়গী মথৌদাং অদু পাংথোকখি।
মরূপশিং, চহী ২দগী মমাংদা কার্গিলগী চিংদোলশিংদা ইখিবা মায়পাকপগী ৱারী অদুনা ঐখোয়গী জেনরেসনশিংদা ইনোৎ পীদুনা লৈরগনি অমদি ইনোৎ অদুনা হৌখিবা হপ্তা অনি-অহুমদগী লৈবাক অসিগী তোঙান তোঙানবা মফমশিংদা বিজয় দিবসকা মরী লৈনবা থৌরমশিং পাংথোক্নরি। লৈবাক অসিগী মিলিতরী স্তেসনশিংদগী হৌরগা ঙমখৈ লমদমশিং, সমুদ্র মপালগী লমদমশিংদসু মশিং য়াম্লবা থৌরমশিং পাংথোক্লি।
ঙাইহাক্কী মমাদা মফম অসিদসু ঐখোয়গী ইচাশিংগী অদুগুম্লবা থৌনাফবা অদু নৌহৌনা নিংশিংহনখি। অদুগা ঙসিগী লান্থোকখিবা অদুদা দিসিপ্লিন, হোৎনবা কনবা, থৌনা ফবা অমসুং কত্থোকপগী ত্রেদিসন্না থল্লবা মীকুপশিং য়াওখি। করিগুম্বা মতমদা থৌনা ফবা অমসুং শক্তি লৈরবা মতৌ উরগা খুবাক খুবগী মখোলনা নিনখি, অদুগা করিগুম্বা মতমদা ইমা অদু উরুরগা মীপুম খুদিংমক্কী মীৎলুদা পীরাংনা থুমহৎখি।
ইচিল-ইনাও অমসুং ইচল-ইচেশিং, কার্গিলদা মায় পাকখিবা অসি ভারতকী থৌনা ফরবা মচা নুপা-মচা নুপীশিংগী নমহৎপা য়াদ্রবা থৌনা অদুগী মায় পাকপনি; কার্গিলদা মায় পাকখিবা অসি ভারতকী রিজোলুসনশিংগী মায় পাকপনি; কার্গিলদা মায় পাকখিবা অসি ভারতকী তৌবা ঙম্বা অমসুং থিংদুনা থম্বা অদুগী মায় পাকপনি; কার্গিলদা মায় পাকখিবা অসি ভারতকী হৌন লোনচৎ অমসুং দিসিপ্লিনগী মায় পাকপনি; কার্গিলদা মায় পাকখিবা অসি লৈবাক্কী মীপুম খুদিংমক্না আশা তৌরিবা অমসুং লৌরিবা থৌদাং অদুগী মায় পাকপনি।
মরূপশিং, লান হায়বসি সরকারনা লান্থেংনবা নত্তে, লান হায়বসিদি লৈবাক পুম্বনা লান্থেংনবনি। সরকারদি লাক্কনি চৎখিগনি অদুবু লৈবাক্কীদমক্তা শিবা চংবা খংদবা মখোয় অদু মতম পুম্নমক্তা অমর ওইদুনা লৈরি। লান্মীশিংনা হৌজিক হৌজিক্কা লোয়ননা লাক্কদৌরিবা জেনরেসনগীদমক্তসু মখোয়গী মপুন্সি কত্থোক্লি। ঐখোয়গী লাক্কদৌরিবা হয়েং অদু শোয়দ ঙামদনবগীদম মখোয়না মশাগী ঙসি কত্থোক্লি। লান্মীনা শিবা অমসুং চংবদা খেৎনবা থমদে, মখোয়গীদমক্তদি থৌদাংনা পুম্নমক্নি।
ইচিল-ইনাও অমসুং ইচল-ইচেশিং, ২০১৪দা ৱাশক লৌরবা মতুং থা খরা লৈরগা কার্গিল চৎনবা খুদোংচাবা অদু ঐহাক্না ফংজখি। চহী ২০গী মমাং লান কন্না শোক্ননরিঙৈ মতম অদুদসু ঐহাক কার্গিলদা চৎখি। য়েক্নবশিংনা অৱাংবা চিংদোন্দা ফমদুনা মখোয়গী মশান্না অদু শান্নরমখি। মাংদা অশিবনা ঙায়দুনা লৈরবসু ঐখোয়গী জৱান খুদিংমক্না মচু অহুমগী ফিরাল পুরদুনা অহানবা মক্তদা ভেল্লি ফাওবা য়ৌবা পামলম্মি। মীচম প্রজা অমা ওইনা ঐহাক্না অদুগুম্লবা মফম অদুদা চৎতুনা লানফমদা লৈরিবা লান্মীশিংবু খুরুমজখি। কার্গিল বিজয়গী মফম অদু ইফমদদি শেংলবা মফম অমগুম ফাওখি।
মরূপশিং, লানফমদা ওইফম থোকপা এৎমোসফিয়ার অদুদি অদুমক লৈরম্মি, লৈবাক্কী মীওই খুদিংমক্না মশাগী লান্মীশিংগীদমক লেপলম্মি, নহাশিংনা ঈ দান তৌনবা পরেং লেংলম্মি, অঙাংশিংনা মখোয়গী শেম্ফু থৌনা ফরবা লান্মীশিংগীদমক কায়থোকখি। মতম অদুদা অতল বিহারি বাজপাইনা লৈবাক মীয়ামদা থাজবা অমা পীখি। মহাক্না হায়খি মদুদি লৈবাক্কীদমক থৱায় থারিবশিং অদুগীদমক ঐখোয়না পুন্সি চুপ্পা য়েংশিনবা ফাওবা ঙমদ্রগদি ইমা লৈবাক্কীদমক্তা ইশাগী থৌদাং অদু পাংথোক্নবা হক অদু খংজবা ঙম্লরোই।
ঐহাক্না নুঙাইবা ফাওই মদুদি অতলজীগী অদুগুম্লবা থাজবা অদু ময়াম পুম্নমক্কী থৌজালদগী হেন্না চেৎশিলহন্নবা ঐখোয়না লেপ্পা লৈতনা হোৎনরি। হৌখিবা চহী মঙাদা লান্মীশিং অমসুং লান্মীশিংগী ইমুং মনুংগী য়াইফনবগা মরী লৈনবা মরুওইবা ৱারেপ কয়া অমা লৌখ্রে। নিং তম্লবা মতুং চহী তরাগী খুজিং কয়াদগী ঙায়রকপা অদুগুম্লবা ৱান রেঙ্ক ৱান পেন্সন চৎনহনবগী থবক অদু ঐখোয়গী সরকারনা মপুং ফাহনখি।
হন্দক্না সরকার হেক শেম্বগা অহানবা ৱারেপ ওইনা থৱায় থাখ্রবা অথৌবশিংগী অঙাংশিংগী স্কোলরশিপ হেঙ্গৎহন্নবা ৱারেপ লৌখি। মসিদসু নত্তনা নেস্নেল ৱার মেমোরিয়েলনসু ঙসি ঐখোয়গী অথৌবশিংগী ৱারীশিংনা লৈবাক অসিবু পু্ক্নিং থৌগৎপীরি। চহী তরাগী খুজিং কয়াদগী মদুসু ঙায়দুনা লৈরকখিবনি, অসিগুম্লবা মতম শাংনা ঙায়রকপা অসি লোয়শিন্নবা লাইবকফবা অদু ময়াম পুম্নমক্না ঐখোয়দা পীনবিরি।
ইচিল-ইনাও অমসুং ইচল-ইচেশিং, হৌরকপদগী পাকিস্তান্না কাশ্মিরদা লৌনম তৌদুনা চংশিল্লক্নবা হোৎনদুনা লাক্লি। ১৯৪৮দা, ১৯৬৫দা, ১৯৭১দা মখোয়না মসি তৌখি। অদুবু ১৯৯৯দা মখোয়না হোৎনরকখিবা অদু অরেম্বা তাহনখি। মতম অদুদা অতলজীনা হায়খি, ‘য়ুমলোন্নবা লৈবাক্না খল্লিবা অসি কার্গিলগী ৱাফমদা ভারতনা অথিংবা পীরক্কনি, য়ানিংদবা ফোংদোক্কনি অমদি ফিভম অদুনা মালেম অসিদা অকিবা পুরক্লগনি। য়ান্নবা পুরক্নবা মীওই খরা থোক্লক্কনি অদুগা অনৌবা লৈই অমা চিংবদা মখোয় মায় পাক্লগনি হায়বসিনি। অদুবু ঐখোয়না পাউখুম পীরক্কনি, অকনবা পাউখুম পীরক্কনি হায়বসি মখোয়না থাজখিদে।’
মরূপশিং, কপ-লাওবগী মহুৎ মতিকচাবা পাউখুম পীবগী অসিগুম্লবা স্ত্রেতেজিক ওইবা অহোংবা অসিনা য়েক্নবগী মফমদা খুদোংচাদবা মায়োক্নখি। মসিগী মমাংদা অতলজীগী সরকারনা য়ুম্লোন্নবশিংগা শান্তি ওইনা লৈনবা ৱাফম থমখিবা অদুনা মরম ওইরগা মালেমনা য়েংলম্বা মীৎয়েংদা অহোংবা পুরকপা হৌখি। মমাংদা ঐখোয়গী য়ুম্লোন্নবগী মথোং হুক্তবা মতৌশিংদা উশিন্নদনা লৈরম্বা লৈবাকশিং অদুসু ঐখোয়বু খংবা হৌরক্লম্মি।
ইচিল-ইনাও অমসুং ইচল-ইচেশিং, ভারতকী পুৱারীনা সাক্ষিনি মদুদি ভারতনা কৈদৌনুংদা লান্দাখিদ্রি। মীওইবা জাতিগী কান্ননবা শান্তি লৈনা থবক তৌবা অসি ঐখোয়গী চৎন লোনচৎতা য়াওরি। ঐখোয়গী লৈবাক অসিনা চৎন লোনচৎ অদু ইন্দুনা চৎলি। ভারত্তা ঐখোয়গী লান্মীগী শক্তম অসি লৈবাক অসিবু ঙাক শেনবগী ওইরবসু মালেম পুম্বদা মীওইবা জাতি অমসুং শান্তিবু ঙাক্তুনা থম্বসু ওইরি।
ঐহাক্না ইজরেলদা চৎপা মতমদা মফম অদুগী লুচিংবশিংনা ইফমদা ফোতো য়েংহনবিরকই মদুদা ভারতকী লান্মীশিংনা হাইফাবু মনিং তমহনখি। ঐহাক্না ফ্রান্সতা চৎলুবা মতমদা মফম অদুগী মেমোরিয়েলনা মালেমগী লাঞ্জাওগী মতমদা ভারত মচাশিংগী কত্থোকখিবগী রারী অদু লীরি।
মরূপশিং, ঐখোয়গী অথৌবশিং, ঐখোয়গী থৌনা ফরবা লান্মীশিং ত্রেদিস্নেল ওইবা লানফমদা থোইদোক হেন্দোকই। অদুবু ঙসিদি মালেম পুম্বদা চৎনরিবা অসিদদি লানগী মওং মতৌদা অহোংবা লাক্লে। ঙসিদি মালেম অসি প্রোক্সি ৱারগী চৈথেং ফংলি, মদুদা তেরোরিজম অসি মীওইবা জাতি পুম্বগী য়াম্না চাওনা শিংনবা অমা ওইরে। লানফমদা মায়থিরবশিং অদুনা মখোয়গী রাজনিতীগী পান্দম অদু ফংনবা প্রোক্সি ৱার চত্থরি অমদি তেরোরিজমদা পুক্নিং থৌগৎলি।
ঙসিদি মতমগী মতুং ইন্না মীওইবা জাতিদা থাজবা থম্লিবা শক্তি পুম্নমক্না সেক্যুরিতী ফোর্সশিংগা লেপমিন্নরবা মতমদা তেরোরিজমবু মতিক চানা মায়োক্ননবা ঙমগনি।
ইচিল-ইনাও অমসুং ইচল-ইচেশিং, ঙসিগী লানফমশিং অসিদি শুন্দ্রং ফাওবা য়ৌখ্রে অমদি সাইবর ৱার্লদসু লান্থেংনরি। মরম অদুনা লান্মীবু মতমগী থাক্তা পুখৎপা অসি ঐখোয়গী তৌদবা য়াদবনি। মোদর্নাইজেসন অসি ঐখোয়গী লান্মীগী শক্তম ওইহনগদবনি। ঈশিং ওইগেরা, কংফাল ওইগেরা, নোংথক ওইগেরা, ঐখোয়গী লান্মীশিং মশা মশাগী লমশিংদা খ্বাইদগী ৱাংবা থাক অদু ফংহন্দুনা মতমগা চান্নহনবা, অসিনি ঐখোয়না হোৎনরিবা।
নেস্নেল সেক্যুরিতী ৱাফম লাকপা মতমদা, ভারতনা প্রেসর অমত্তদা নোঞ্জরোই নত্রগা করিগুম্বা মখল অমত্তদা অৱাৎপা লৈরোই। মদুনা অরিহন্তকী খুত্থাংদা ভারতকী ন্যুক্লিয়ার ত্রেইদ লিংখৎপা ওইগেরা মত্রগা এন্তি-সেতেলাইত চাংয়েং ওইগেরা, তুংগী ঙাকশেলগী দরকার ওইবশিং, ইশাগী রিশোর্সশিং ঙাক্তুনা থম্নবা প্রেসরগী খল্লুবা তৌদনা ঐখোয়না খোংথাংশিং লৌখৎলি অমদি লৌখৎখিগনি।
অনৌবা থাক্কী রাইফলশিংদগী হৌরগা তেঙ্ক, তোপ অমসুং ফাইতর জেৎ ফাওবা, ঐখোয়না ভারত্তা খোংজেল য়াংনা শারি। দিফেন্সদা মেক ইন ইন্দিয়াগীদমক প্রাইবেৎ সেক্তরনা চাওনা শরুক য়ানবা অমদি মীরমদগী শেল থাদরক্নবসু ঐখোয়না খুমাং চাওশিন্না হোৎনরি। দরকারগী মতুং ইন্না মতমগা চুন্নবা খুৎলায়শিং মীরমদগী পুশিল্লক্লি।
লাক্কদৌরিবা মতমশিংদা ঐখোয়গী লান্মীশিং অসি মালেমগী খ্বাইদগী নৌবা খুৎলায়শিং ফংলগনি। অদুবু মরূপশিং, লান্মীবুমপাঙ্গল কলহন্নবগীদমক্তা মোদর্নাইজেসনগা লোয়ননা ৱাফম অমসু মরু ওই। মদুদি শরুক য়াবনি। মখল অমা হেক্তগী য়ুনিফোর্ম ওইরবসু, মদুগী মচু অদু অমা হাক্তা ওইরবসু, কনাগুম্বা অমা হেক্তনা শেৎলবসু, পান্দমদি অমখক্তনি; পুক্নিংদি অমখক্তনি। ঐখোয়গী লৈবাক্কী ফিরালদা তোঙান তোঙানবা মচু অহুম লৈরি, অদুবু মদুগী মচু অহুম অদু পুলপ পুন্সিনবা মতমদা ওইরক্লিবা ফিরাল অদুনা শিবা চংবগী ইহুল অদু পীরি।
মরূপশিং, লান্মীবু মপাঙ্গল কলহনবগা লোয়ননা ঐখোয়না ঙমখৈদা খুন্দারিবা খুঙ্গংশিংবুসু লৈবাক্কী ঙাকশেল মসুং চাওখৎ-থৌরাংদা শরুক য়াহল্লি। অতোপ্পা লৈবাকশিংগা থংনরিবা ঙমখৈ ওইগেরা নত্রগা সমুদ্র মপান্দা খুন্দারিবা খুঙ্গং ওইগেরা, ইনফ্রাস্ত্রকচরবু হেন্না ফগৎহনবগী থবক চত্থরি।
ফিভম অসিদা অহোংবা পুরক্নবগীদমক হৌখিবা চহী মঙাদা বোর্দর এরিয়া দিবেলপমেন্ত প্রোগ্রাম মপাঙ্গল কনখৎহল্লে। লৈবাক্কী রাজ্য ১৭তা লুপা কোতি লিশিং মরি মখায় হেনবা শেনফমগী তেংবাং থবক অসিগীদমক পীখ্রে।
ইচিল-ইনাও অমসুং ইচল-ইচেশিং, ১৯৪৭তা অখন্নবা লোন অমখক ঙাংবা খক্তমক নিংতম্বা ফংখিব্রা নত্রগা লম্বী অমখক্তদা চৎপা মীওইশিং খক্তমক নিংতম্বা ফংখিব্রা? জাতি অমত্তগী মীওইশিং নিংতম্বা ফংখিব্রা? মদু নত্তে, ভারত পুম্বা নিংতম্বা ফংখি। মদু নত্তে, ভারত পুম্বাগী ইখিবনি।
ঐখোয়না সংবিধান ইবা মতমদা লোন, লম্বী নত্রগা জাতি অমখক্তগী মীওইশিংগী ইখিব্রা? অদুগা চহী ২০গী মমাংদা ঐখোয়গী থৌনা ফরবা লান্মী ৫০০ হেনবনা কার্গিলগী উন্না কুপলবা চীংশিংদা থৱায় কৎখিবা অদু কনাগীদমক্তা কৎখিবনো। বীর চক্র ফংখিবা তামিলনাদুদা লৈবা বিহার রেজিমেন্তকী মেজর সর্বন হীরো ওফ বতালিক্না কনাগীদমক্তা থৱায়না পোন্থা পীখি? বীর চক্র ফংখিবা দিল্লিদা লৈবা রাজপুত রাইফল্সকী কেপ্তেন হনিফ উদ্দিন্না কনাগীদমক্তা কত্থোকখিবনো? অমদি পরম বির চক্র ফংখিবা, হিমাচল প্রদেশকী মপারী, জম্মু এন্দ কাশ্মির রাইফল্সকী কেপ্তেন বিক্রম বত্রানা থম্মোয় অসিনা অহেনবা পাম্লি হায়খিবা মতম অদুদা মহাক্কী থম্মোয়না পামখিবা অদু কনাগীদমক্তনো? মশাগীদমক্তা নত্তে, করিগুম্বা লোন, ধর্ম নত্রগা জাতি অমগী নত্তে, ভারত পুম্বগীনি, ইমা ভারতকীদমক্তনি।
লাকপীরো, কত্থোকখিবা অসি লেম্না মাংহল্লোয় হায়না ঐখোয় পুন্না ৱারেপ লৌরসি। ঐখোয়না মখোয়দগী ইন্সপাইরেসন লৌরসি অমদি মখোয়গী মংলানগী ভারত অদু শেমগৎনবগীদমক ঐখোয়সু ঐখোয়গী পুন্সিগী অহেনবা থৌদাং লৌরসি।
ঙসি অসিগুম্লবা কার্গিলদা মায় পাকপগী থৌরম অসিদা ঐখোয়না অথৌবশিংদগী থৌগৎদুনা, অদুগুম্লবা থৌনা ফরবা ইমাশিংদগী থৌগৎদুনা, লৈবাক্কীদমক ইশাগী থৌদাং অদু ইশানা ইশাদা কত্থোক্লসি। ৱাখল্লোন অসিগা লোয়ননা অথৌবশিং অদুবু খুরুমজদুনা ময়াম পুম্নমক্না ঐহাক্কা লোয়ননা হায়মিন্নরশি-
ভারত ইমানা – য়াইফরে
ভারত ইমানা – য়াইফরে
ভারত ইমানা – য়াইফরে
ভারত ইমানা – য়াইফরে
হন্না-হন্না থাগৎচরি।
