ভারত ইমানা য়াইফরে
অশুক্কী মতিক মশিং য়াম্না লেংবীরক্লিবা ঐগী নুংশিজরবা ইচিল-ইনাও অমসুং ইচল-ইচেশিং।
চহি মরিগী মমাংদা অদোম্না মশিং লাংঙমদনা শৌগৎপীবগা লোইননা ঐবু লৈবাক অসিগী সেবা তৌজনবা তাঞ্জা পীনবীখি। অদোম অশুক্কী য়াম্লবা মশিংদা ঐখোয় পুম্নমকপু থৌজান পীবীনবগীদমক লেংবীরকপা অসি চহি মরি অসিদা ঐখোয়গী সরকারনা লৈবাক অসিবু অচুম্বা লম্বীদা পুবদা মাই পাক্লে হায়বগী খুদমনি। ইচিল ইনাওশা অসুক য়াম্না নুংশিবীবা অসুক য়াম্না মীনুংশি উৎপীবা অসিদি মহাক্কী নোংদম্বনা পেনবীরবতদা ওইথোকই। ঙসি ভারতীয় জনতা পার্তীগী মীৎয়েং মখাদা এন.দি.এ. সরকারগী চহি মরি মপুং ফারকপা অসিদা অদোমগী ননাই মকোক অসিনা অমুক হন্না অদোমগী মাংদা ইকোক নোঞ্জদুনা লৈবাক মচা কোতি ১২৫দা নোল্লুকপা উৎচরি। মরূপশা ঙসি অসি বাঘপৎ নোংচুপ উত্তর প্রদেশ অমসুং দিল্লী এন.সি.আর.দা লৈবশিংগীদমক্তা য়াম্না চাউরবা নুমিৎ অমনি। অচৌবা লম্বীগী প্রোজেক্ত অনি ঙসি মীয়ামদা কৎথোকখ্রে। অমনা দিল্লী-মীরুত এক্সপ্রেসৱেগী ফেজ-I অমসুং অনিশুবনা ইস্তর্ন পেরিফেরেল এক্সপ্রেসৱেনি।
ইস্তর্ন পেরিফেরেল এক্সপ্রেসৱেদা লুপা কোতি ১১ চাদিং তৌখি। অদুম ওইনমক দিল্লী-মীরুত এক্সপ্রেসৱেগী হৌজিক ফাওবগী শরুক্তা চাউরাক্না লুপা কোতি ৮০০ মখাই চাদিং তৌখ্রে। প্রোজেক্ত অপুনবা অসি চাউরাক্না লুপা কোতি ৫০০০ রোমগীনি। ঙসি ঐহাক অনৌবা লম্বী অসি চৎপা ফংজবা অসিদা লেন ১৪গী লম্বী অসি দিল্লী এন.সি.আর.গী মীয়ামগী পুন্সিদা কয়াদা লাইথোকহল্লগদবা হায়বদু ফাওরকই। কদাইদসু অপনবা লৈত্রে। খ্বাইদগী নৌবা তেক্নিক খুদিংমক শিজিন্নবা কোনক্রিৎকা লোইননা অশং-অমানসু য়াওরে।
ইচিল ইনাওশা শুপ্নগী থা ১৮ লোমদা থবক অসি পাংথোকখি। ঙসি লেন ১৪গী কিলোমীতর ৯ শাংবা লম্বী মীয়ামদা শিন্নরে। অদুবু মসিগী কিলোমীতর মাপল অসি কয়াদা মগুন লৈরিবনো। মদু দিল্লীগী পতপরগঞ্জ, ময়ুর বিহার, গাজিয়াবাদ, ইন্দ্রাপুরম, বৈশালী অমসুং নোয়দাগী মীয়াম্না তশেংনা খঙই।
মরূপশা কিলোমীতর ৯গী লম্বী অসিবু শেমখিবা খোংজেল অদুদা মীরুত ফাওবা এক্সপ্রেস অপুনবা অসিগী থবক পাইখৎতুনা অথুবা মতমদা অতোপ্পা ফেজসু মীয়ামদা শিন্নজরগনি। অমসুং মসিনা মপুং ফারকপদা মীরুত্তগী দিল্লী ফাওবগী অশাংবা অসি শুপ্নগী মিনিৎ ৪০-৪৫ ওইরগনি।
মরূপশা দিল্লী এন.সি.আর.দা শুপ্নগী জাম থোকপগী অৱাবা খক্তা নত্তনা নুংশিৎ মোৎশিনবগী অচৌবা অৱাবসু মায়োক্নরি। মদু চহি চহিগী হেন্না তমথিবা শক্তম লৌরক্লি। নুংশিৎ মোৎশিল্লকপগী অতোপ্পা মরম অমদি দিল্লীদা চৎথোক চৎশিন তৌরিবা গাড়ীশিং অমসুং অশাংবা ত্রাফিক জামসুনি। ঐখোয়গী সরকারনা অৱাবা অসিবু লুম্না লৌদুনা দিল্লীগী মাইকৈ মরিদা এক্সপ্রেসৱেনা কাঙ্গোই অমা শেম্ননবা থবক পাইখৎলে। মসি ফেজ অনি থোক্না শাগদবনি। মসিদা ফেজ অমা হায়বদি ইস্তর্ন পেরিফেরেল এক্সপ্রেসৱেগী হৌজিক ঙৈহাক্কী মমাংদা মীয়াম্না শিন্নজবগী তাঞ্জা ফংজরে। ইচিল ইনাওশা ঙসি দিল্লীগী মনুংদা য়ৌশিল্লক্লিবা গাড়ীশিং অসিগী মনুংদা হৌজিক চাউরাক্না চাদা ৩০ হন্থরগনি। মখোয় মপানলোমদগী অদুম্মক থৈদোকখ্রগনি। শুপ্নগী অচৌবা গাড়ীশিং অমসুং ত্রকশিং খক্তা নত্তনা লিশিং ৫০দগী হেনবা কারশিংসু দিল্লী শহরগী মনুংদা চংলকপগী মথৌ তাররোই। অসিগুম্বা থৌরাং অমা মসিদা শেমগৎলি। মসিদসু নত্তনা ইস্তর্ন এক্সপ্রেসৱে অসি মশানা এক্সিস কন্ত্রোল রো গ্রীন ফীল্দ এক্সপ্রেসৱে ওইজবা লৈবাক অসিগী অহানবা এক্সপ্রেসৱেনি। লম্বীশিং অসি শুপ্নগী নুমিৎ ৫০০নিদা শেমদুনা লোইশিনখিবনি। মরূপশা ঙসি অদোম পুম্নমক্কী সেবা তৌনবগীদমক্তা শেম শারিবা অচৌবা প্রোজেক্ত অনি অসি মপুং ফানা অনৌবা তেক্নোলোজীনা য়োম্লবনি। ইলেক্ত্রিক্কী মথৌ তাবসু মসিদা সোলর ইনর্জীদগী লৌগনি। হায়বদি মতমসু কনবা, নুংশিৎ মোৎহনবসু হন্থহনবা, শিং (ফুএল)সু হন্থহনবা নোংচুপ য়ু.পি.দগী দিল্লীদা শঙ্গোম, য়েঞ্ছাং-নাপী, হৱাই-চেংৱাই পুরকপসু হৌজিক লাইরগনি।
ইচিল ইনাওশা ইরৈবাকচা কোতি ১২৫গী পুন্সিগী থাক ৱাংখৎহনবদা লৈবাক অসিগী অনৌবা ইনফ্রাস্ত্রকচরগী য়াম্না চাউরবা থৌদাং লৈ অমসুং মসিমক সবকা সাথ সবকা বিকাসকী লম্বীনি। মরমদি ইনফ্রাস্ত্রকচরনা জাৎ-পাৎ, শাগৈ, কাংলুপ, অনেম-অৱাং, লাইর-ইনাক খুনবা পুম্নমক্তা খেন্নবা থমদে। মসিদগী পুম্নমক্কীদমক্তা মান্নবা শরুক অদু পীরি। মরম অসিনা ঐখোয়গী সরকারনা হাইৱে, রেলৱে, এয়রৱে বোতরৱে হাইৱে অমসুং ইলেক্ত্রিক্কা মরি লৈনবা ইনফ্রাস্ত্রকচরদা খ্বাইদগী হেন্না পুক্নীং চংলি। মরূপশা হৌখ্রবা চহি মরিদা লুপা কোতি লাখ অহুমদগী হেন্না ঐখোয়না কিলোমীতর লিশিং ২৮দগী হেনবা অনৌবা হাইৱেশিংদা চাদিং তৌখি। চহি মরিগী মমাং ফাওবদা নোংমদা, ৱাফম অসি অদোম্না পুক্নীং চংনা তাবীয়ু অদুগা ঐগী লৈবাক্কী মীপুম খুদিংমক্না তাবীয়ু, চহি মরি ফাওবদা নোংমদা শুপ্নগী হাইৱে কিলোমীতর ১২ খক শেমলম্মি। ঙসি নোংমদা চাউরাক্না হাইৱে কিলোমীতর ২৭ লোম শেম্লে। চহি অসিগী বজেৎতা ভারত মালা প্রোজেক্তকী মখাদা লুপা কোতি লাখ মঙাগী পান্দম থমখ্রে। মসিগী মখাদা চাউরাক্না হাইৱে কিলোমীতর লিশিং ৩৫ শেম্বগী থবক পাইখৎলি। হাইৱে খক্তা নত্তনা রেলৱেদসু অঙকপা মওংদা থবক পাইখৎলি। রেলগী কনেক্তিবিতী লৈতবা মফমশিংদা খোংজেল য়াংনা রেল নেৎৱর্ক তিংবগী থবক পাইখৎলি। সিঙ্গল লাইনশিং দবলদা ওন্থোকপা, মীতর গেজবু ব্রোদ গেজদা হোংদোকপা, থবকশিং অসি খোংজেল য়াংনা ঐখোয়না পাইখৎলি। ত্রেনশিংগী খোংজেলসু হেনগৎহল্লি। চাউরাক্না মী লৈতবা ক্রোসিং লিশিং মঙা মখাইরোম হৌখিবা চহি মরিরোম অসিদা ঐখোয়না লৌথোকখ্রে। ইচিল ইনাওশা সিবিল এবিএসনবু হোংহনবা অমসুং লৈবাক অসিদা অনৌবা এয়র রুৎ হৌদোক্নবগীদমক্তা ফ্লাইৎকী স্কিম হৌদোক্লে। হৌখিবা চহিদা চাউরাক্না মীওই কোতি তরারোম্না এয়রগী খোংচৎ চৎখি হায়বদি এ.সি. ত্রেন্দা রেলৱেগী এয়রকন্দিশন কম্পার্তমেন্তা তোংখিবা মীয়াম অদুদগী হেনবা মীয়াম্না এরোপ্লেন তোংখি মসি ঐ হিন্দুস্তানগী চহি মরিগী ৱারী তমজরিবনি। শেন্দল তোংবা মীসু এরোপ্লেন্দা চৎপা, মংলান অসি পুদুনা থবক তৌরি। লৈবাক অসিদা ঈশিংগী শক্তিবসু মপুং ফানা শিজিন্ননবা কন্না হোৎনরি। লৈবাক অসিদা চাম্মদগী হেনবা অনৌবা ৱাতর বেজ শেমগৎলি। মফম অসিদা য়ু.পি.দসু গঙ্গাজীদসু জহাজ চৎপা হৌরে। গঙ্গাজীগী খুৎথাংদগী য়ু.পি.না হকথেংননা সমুদ্রগা শম্নরে। অথুবা মতমদা পোৎ পুবা জহাজশিংনা য়ু.পি.দা শাবা পোৎ-চৈশিং অচৌ অচৌবা হিথাংফমশিংদা য়ৌহনবা ঙম্লগনি। গঙ্গাজীগুম্না য়মুনাজীগীসু অনৌবা স্কিম অমা পাইখৎলি।
মরূপশা ত্রান্সপোর্তকী খুদোংচাবা অসি লিংখৎপনা মফম মফম খুদিংদা অনৌবা ইন্দস্ত্রীশিংগী খুদোংচাবসু শেমগৎলি। ৱাখল্লোন অসিগা লোইননা চহি অসিদা বজেৎতা উত্তর প্রদেশতা ইন্দস্ত্রিয়েল কোরিদোর শেমগৎনবসু লাওথোকখ্রে। কোরিদোর অসিগী পাক চাউবা অসি আগ্রা, অলীগর, লখনৌ, কানপুর, ঝান্সী অমসুং চিত্রকুৎ ফাওবা শন্দোক্কনি। কোরিদোর অসি মথন্তনা চাউরাক্না মীওই লাখ অনি মখাইগীদমক্তা থবক ফংবগী খুদোংচাবা পীরগনি।
মরূপশা ন্যু ইন্দিয়াগী অনৌবা থৌরাং পুম্নমক লৈবাক্কী নহারোল, ময়াই ওইবা থাক্তা লৈবা মীওইশিংগী অনীংবা অপাম্বশিংগী মতুং ইন্না পাইখৎলি। লৈবাক্কী খু্ঙ্গং পুম্নমক্তা ইন্তর্নেৎকা শম্নহ্ন্নবগীদমক ভারত নেৎ য়োজনাগী মখাদা খোংজেল য়াংনা থবক পাইখৎলি। ঐখোয়গী সরকারগী খোংজেল অসি অদোম্না, কংগ্রেস সরকারনা তৌরম্বশিং অদুগা চাংদম্নবীরগা খঙবীবা য়াগনি। কংগ্রেসকী য়ু.পি.এ. সরকারনা মখোয়গী চহি মরিদা পঞ্চায়ৎ ৫৯ চাউরাক্না ৬০ রোম খক্তদা ওপ্তিকেল ফাইবর তিংবা ঙমখি। ঐখোয়না লাখ অমদগী হেনবা পঞ্চায়ৎশিংদা ওপ্তিকেল ফাইবর তিংখ্রে। থবক করম্না তৌই। ঐগী লৈবাক্না নীংথিজনা খঙলে। মেক ইন ইন্দিয়াগী থোংদা লৈবাক অসিদা মেন্যুফেকচরিংগী পোৎথোকশিংদা ইনোৎ পীরি। মসিনা মরম ওইদুনা চহি মরিগী মমাংদা লৈবাক অসিদা শুপ্নগী মোবাইল ফোন শাবা ফেক্তরী অনিখক্তমক লৈরম্মি। অদোম লামদুনা য়েংবীয়ু ঙসি কয়াম্না লৈরবগে হায়বদু। অদোম্না মসি খঙবদা নুংঙাইবা পোকপীগনি মদুদি মখোয়গী মতম অদুদা ফেক্তরী অনিখক্না মোবাইল ফোন শারম্মি। ঙসি ফেক্তরী ১২০না মোবাইল ফোন শারি। অমসুং মদুগী মনুংদা কয়া মরুমদি মফম অসিদা এন.সি.আর.মক্তদা লৈরি। মসিদগী নহা কয়া মরুম্না থবক ফংলি। খরদি মফম অসিদা য়াওবীরম্বসু য়াই।
ইচিল ইনাওশা ঐখোয়না নুপীশিং ইকাই খুম্নবা অমসুং মপাঙ্গল হেনগৎহনবগী ৱাফম অসিদা মরু ওইনা মীয়েং চংলি। স্বচ্ছ ভারত অভিয়ানগী মখাদা ঐনা লৈবাক অসিদা অমাং শঙ কোতি ৭পু ওইরো, নত্রগা উজ্জ্বলা য়োজনাগী মখাদা পীখিবা গ্যাস কনেক্সন কোতি মরিবু ওইরো, মখোয়না নুপীশিংগী পুন্সিবু লাইথোকহনবদা য়াম্না চাউবা সেবা তৌরি। মুদ্রা য়োজনাগী মখাদা তৌখিবা পীথোক-পীশিন চাউরাক্না কোতি ১৩গী মনুংদা, চাদা ৭৫দগী হেন্না নুপী ইন্ত্রপ্রিনরশিংনা ফংখ্রে। কনানা খল্লুবা ঙম্বগে, হিন্দুস্তান্দা মুদ্রা য়োজনাগী লোন কোতি ১৩গী মনুংদা লোন লৌবা চাদা ৭৫দি ঐগী লৈবাক অসিগী ইচা নুপী, ইচলশিং, ইমাশিংনি হায়বা। হৌখ্রবা চহি মরিদা ঐখোয়না ইচুনপীশিংবু ইকাই খুম্নখি। লোইননা মখোয়গী মপাঙ্গল কলহনখি। মরূপশা নুপীশিংগা লোইননা দলিৎশিং অমসুং শোৎথহৌরবশিংবু মপাঙ্গল কলহনবা অমসুং মখোয়গী ইকাই খুম্নবগীদমক্তা হৌখিবা চহি মরিদা ঐখোয়না মরু ওইবা খোংথাং কয়া অমগী মথংদা অমা পাইখৎখি। মদু মশা মথন্তা থবক পীজবীববু ওইরো নত্রগা খুন্নাইগী ঙাক-শেলগীবু ওইরো ঙসি স্কিম কয়া মাইকৈ অসোমদা থবক তৌরি। মুদ্রা য়োজনাগী থোংদা পীখিবা লোনশিং অদুগী মনুংদা তঙ্খাই হেন্না দলিৎ অমসুং শোত্থহৌরবা কাংলুপশিংনা ফংখি। স্তেন্দঅপ ইন্দিয়াগী থোংদসু দলিৎ নুপীশিংনা ইন্ত্রপ্রিনরগী অনৌবা স্কিম অমগী কান্নবা ফংলে। মসি ঐখোয়গী সরকারগীদমক্তা লাইবক ফবা ৱাফম্নি মদুদি ঐখোয়না বাবাসাহেব আম্বেদকরজীগী মরি লৈনবা মফম মঙা তীর্থ মফম ওইনা শেমগৎলে। মরূপশা ঐনা অদোমদা থেংনরকপা মতুং ইন্না হায়জবা ঙম্মি মদুদি মপুক্নীংদা মশাগী ওইজবা লৈরবা মখোয় শুপ্নগী লৌনম্বা পীরাং শিন্থবগী রাজনীতি তৌবশিংনি। মখোয় মশাগী কান্নবা য়েংদুনা রাজনীতি তৌদুনা লাক্লি। অদুবু তশেংনা দলিৎ, অশোন-অনা, নমথবীরবা, শোৎথহৌরবশিংগী মীচংদা খল্লগদি মখোয়গী মীয়ামগী কান্ননবা রাজনীতি তৌবশিংনি। দলিৎ অমসুং শোৎথহৌরবা ইচিল ইনাওশিংগীদমক্তা তাঞ্জা পুথোকপগা লোইননা মখোয়গী ঙাক-শেল অমসুং অচুম্বা ৱায়েলগীদমক্তসু হৌখিবা চহি মরিদা ৱারেপ কয়া লৌখি।
দলিৎশিংদা ত্রাইবেলশিংদা মীওই-মীনৈ চৎথবগী কাংলোনশিংবু ঐখোয়না অমুক্কা হেন্না চেৎসিলহল্লে। দলিৎশিংদা চৎথবা মীওৎ-মীনৈগী লিস্তপু তোঙান তোঙানবা মরালশিংদা হেনগৎন্দুনা ঐখোয়না ৪৭ ফাওবা শাংদোকহনখ্রে। দলিৎশিংদা চৎথবা মীওৎ-মীনৈগী মতাংদা চৎথবা ৱায়েলশিং থুনা পাইখৎনবা অখন্নবা কোর্ত শেমখ্রে।
ইচিল ইনাওশা সরকারনা শোৎথহৌরবা কাংলুপশিংগী সব-কেতাগোরাইজেসনগীদমক্তা কমিশন অমা শেম্নবা ৱারেপ লৌরে। ও.বি.সি. কাংলুপশিংদা শাথিনা শোৎথরবশিং অদু সরকার অমসুং মহৈ-মশিং তম্ফমশিংদা অকক্নবা মফম অমদা থমদুনা রিজর্বেসনগী অহেনবা কান্নবা ফংহনবা সরকারনা পাম্মি। মরম অসিনা ও.বি.সি. কাংলুপ্তা সব কেতাগোরী শেম্ননবা ঐখোয়না কমিশনসু শেমলে। মরূপশা সরকারনা ও.বি.সি. কমিশনবু কন্সতিত্যুস্নেলগী ওইবা থাক পীবসু পামখি। লোইননা ও.বি.সি. খুন্নাইগী অপাম্বা অসি হৌখিবা চহি কুন কুন মঙাদগী লৈরক্লবনি। অদুবু য়ু.পি.এ.দা ফমখিবা সরকারনা মসিবু থৌওইবীখিদে। ঐখোয়না মখোয়গীদমক্তা কাংলোন পুরক্লে। পার্লিয়ামেন্তা ও.বি.সি. কমিশন অসিবু সংবিধানগী হক ফংনবা মরু ওইবা কাংলোন শেম্লে। অদুবু কংগ্রেস পার্তীগী মীয়াম্না মসি পামখিদে। মখোয়গা চুংশিন্নবা দলশিংনা মসি পামখিদে। মরম অসিনা মখোয়না অপনবা পীখি। লোইননা কাংলোন অসি হৌজিক ফাওবা পন্দুনা লৈরি। অদুবু ও.বি.সি. খুন্নাইদা থাজবা পীজরি। লৌখৎলিবা খোংথাং অসি মোদীনা মপুং শোইদনা ফাহনগনি। ইচিল ইনাওশা অচুম্বদি মসিনি লাইরবশিংগীদমক্তা, দলিৎশিং, শোৎথরবশিং, ত্রাইবেলশিংগীদমক্তা তৌবা থবক খুদিংমক কংগ্রেস অমসুং মখোয়গা চৎমিন্নবা দলশিংনা মসিদা অপনবা পীদুনতা লাক্লি, মখোয়না লৈবাক অসিগী চাউখৎপবু ফাগী ওইনা লৌই। স্বচ্ছ ভারতকীদমক তৌখিবা থবকশিং মখোয়না ফাগী ওইনা লৌই, লাইরবী নুপীশিংগীদমক্তা শেমখিবা অমাং শঙশিং মখোয়না ফাগী ওইনা লৌই। ঐখোয়গী সরকারনা লাইরবী নুপীশিংদা লেম্না গ্যাস কনেক্সন পীবা মতমদসু মখোয়না ফাগী ওইনা লৌখি। লাইরবশিংগীদমক্তা বেঙ্ক একাউন্ত হাংবদসু লাইরবগী মায়োক্তা লৈবশিং অসিনা মসিবু করেম্নবীখি। চারোল শুরোলদগী চুপ্লি পাইবগী হৈনবী লৈরবা মীওইশিং অসিনা লাইরবশিংগীদমক্তা তৌরিবা থবকশিং অসিবু ফাগী ওইনা লৌই। মন্ত্রীমনদলগী চে-চাংশিংবু শেগাইদুনা লংথোকপা মখোয়না, সংসদতা পাস তৌরবা ময়াম্না য়ানদুনা পাস তৌরবা কাংলোনগী ইকাই খুম্নববু চুম্মি হায়না লৌদে।
ঙসি লৈবাক অসিগী মীয়াম্না উরি মদুদি মখোয় মশাগী য়াফনবগীদমক্তা সুপ্রিম কোর্তকী য়াথং ফাওবদা ইফোং ফোংনা মীনম্বা ঙাংবসু ঙম্মি। মখোয়গী মীনম্বা ঙাংবা অদুনা লৈবাক অসিদা করম্বা মখলগী তংদু-লৈতাদবা ওইহল্লকপা য়াবগে হায়বদু ফাওবা মখোয় খন্দে। দলিৎশিংদা চৎথবা মীওৎ-মীনৈগী মতাংগা মরি লৈনবা কাংলোনবু ওইরো নত্রগা রিজর্বেসনগী ৱাফম্বু ওইরো, মীনম্বা ঙাংবা, তোকঙা শন্দোক্তুনা মীয়াম্বু লমহাংনহন্নবা শারৌ শিন্নরি। ঐনা তারি মদুদি হৌজিক মখোয়না অনৌবা মীনম্বা অমা শেমলক্লে। লোইননা মদু লমদম অসিগী মীয়ামদসু য়ৌরক্লম্লগনি। মখোয়না মীনম্বা শন্দোক্লি। মদু লৌমীশিংগী মরক্তা য়ৌররি। শন্দোক্লিবা মীনম্বা অদুদি লৌমীনা লৌফম অদু শান্দোকপদা মদুগী চাদা ১৮ জি.এস.তি. লৌগনি। মীখলদা মাইথিরবশিং রাজনীতি তৌবদা ঙমখৈ খরদি থম্বীয়ু। অসুক য়াম্বা মীনম্বা … ঐগী লৈবাক্কী লৌমীবু লম্মাংনহনবীরি। অদোম্না খঙবীদ্রে অদোম্না কয়াদা চাউরবা পাপ তৌরিবগে হায়বসে। ঐনা ঐগী লৌমী ইচিল ইনাওশিংদা হায়জনীংবদি অসিগুম্বা তোকঙা অমত্তদা পুক্নীং চংবীগনু, মীনম্বা শন্দোক্লিবা মখোয়গী মথক্তা ৱাকৎপীয়ু। লোইননা ঐনা অদোমদা ৱাশকচরি মদুদি অসিগুম্বা মীনম্বগী মশান্না শান্নরিবশিং অসিগী মথক্তা কাংলোন্না শোইদনা থবক লৌখৎকনি।
মরূপশা, ঐখোয়গী সরকারনা গ্রামোদয়দগী ভারত উদয়গী ৱাখল্লোন্দা থবক তৌরি। হৌজিক ঐখোয়না গ্রামোদয়গী মতাংদা পল্লকপদা মসিগী সেন্তর পোইন্ত অসি (মরূ) ঐগী লৈবাক্কী অন্নদাতা, ঐগী লৌমীনি। ঐগী খু্ঙ্গংগী অপীকপা খুৎহৈবনি, ঐগী খুঙ্গংগী লৌবুক্কী থবকশুবা খুদিংমক্নি। চহি অসিগী বজেৎতা খুঙ্গং অমসুং লৌবুক্কা মরি লৈনবা ইনফ্রাস্ত্রকচর চেৎশিলহন্নবগীদমক লুপা কোতি লাখ ১৪ কাইথোক্লে।
মসিদা নত্তনা য়ুরিয়াদা নীম চাদা ১০০ তোৎপা, প্রধান মন্ত্রী সিঞ্চাই পরিয়োজনা, প্রধান মন্ত্রী ফসল বীমা য়োজনাগী অকোইবদা পাক-চাউনসু লৌমীশিংদা গরেন্তী অমা পীরি কান্নবা ফংহল্লি। লৌমীশিংদা অচংবা শেনফমগী শরুক অমা মখাই মতেং পাংনবসু ঐখোয়গী সরকারনা ৱারেপ লৌরে। অমসুং ঐখোয়গী মুখ্য মন্ত্রী অনিবুসু থাগৎপা ফোংদোকচরি মদুদি মখোয়না এম.এ.এস.ই.গী অনৌবা কাংলোনশিংগী মখাদা লৈবা অঙম্বা পোৎলমশিং অদু লৈননবা স্কিম শেম্লি অমসুং মমাংগী রেকোর্দ পুম্নমক থুগাইখ্রে। লৌমীদা কৎথোক্লবা ঐখোয়গী সরকার অনিমকপু মুখ্য মন্ত্রী অনিমকপু থাগৎপা ফোংদোকচরি।
লৌবুক্তগী থোরক্লগা কৈথেলদা য়ৌদ্রিঙৈগী মমাংদা লৌমীশিংগী পোৎথোক মাং-তাক্তনবগীদমক্তা লুপা কোতি লিশিং ৬ ইনভেস্ত তৌবা প্রধান মন্ত্রী কিসান সম্পদা য়োজনাদা থবক পাইখৎলি। স্কিম অসি নোংচুপ য়ু.পি.গী আলু পুথোক্লিবা লৌমীশিংদা খ্বাইদগী মশিং য়াম্না মতেং ফংহনবা ঙমগনি। বজেৎ অসিদা লাওথোকখিবা ওপরেসন গ্রীন অদুসু অনৌবা সপ্লাই চেনগী থৌরাংগা শম্নরি। মসি উহৈ, লৈ-শু অমসুং য়েঞ্ছাং-নাপী পুথোক্লিবা মফম অসিগী লৌমীশিংগীদমক্তা য়াম্না কান্নবা ওইরগনি।
ইচিল-ইনাওশা, ওর্গানিক ফার্মিং, হয়িংখোই য়োকপা, সোলর ফার্ম, অসিগুম্বা অনৌবা তেক্নোলোজীগী ওপ্সন ময়াম অমা হেনগৎহল্লি। লৌউ-শিংউবগী সব-সেক্তর পুম্নমক অসিদা থবক তৌরিবা লৌমীশিংবু লোন ফংবদা হেন্না লাইথোকহন্নবগীদমক্তা পাক শন্না স্কিমশিং শেম্লি।
মফম অসিগী চু থাবা লৌমীশিংগীদমক্তসু ঐখোয়গী সরকারনা লেপ্তনা থবক পাইখৎলি। হৌখিবা চহি মক্তদা ঐখোয়না চুগী মমলদা চাউরাক্না চাদা ১১ হেনগৎহনখ্রে। মসিদগী চুগী লৌমী কোতি ৫ রোমনা হকথেংননা কান্নবা ফংখ্রে। ইথেনোলগা মরি লৈনবা পোলিসীদা চাউনা অহোংবা পুরক্তুনা হৌজিক পেত্রোলদা ইথেনোলগী চাদা ১০ ব্লেন্দিং তৌবদসু অয়াবা পীখ্রে। চুগী লৌমীশিংনা চীনিগী মীলশিংদগী পোৎকী মমল ফংবদা থেংথদনবা মসিগা মরি লৈনবা অচৌবা ৱারেপ অমা হন্দক্তা লৌখ্রে। সরকারনা লেপখ্রে মদুদি চু ক্বিন্তন অমদা লুপা ৫.৫০গী শেলগী তেংবাং চীনিগী মীলশিংদা সরকারনা পীরগনি। অদুবু, মসি চীনি মীলশিংগী মপুগী মখুত্তা লৈরোই। মসিদসু অসিগুম্বা মখলগী গেম য়াওরম্মি হায়বসি ঐখোয়না খঙই মরম অদুনা ঐখোয়না লেপ্লে মদুদি শেনফম অসি চীনি মীলশিংদা পীবগী মহুত্তা চুগী লৌমীশিংগী একাউন্তা চুমদ্রিং থমজিনখিগনি। মসিদগী চুগী লৌমীশিংগী পৈশা চীনিগী মীলশিংদা পন্দুনা লৈররোই। ঐনা মফম অসিগী চুগী লৌমীশিংবু মিকুপ-নাহুম শিংহঞ্জনীংই মদুদি সরকারনা মখোয়গী অৱাবশিংগী মাইকৈদা মিৎয়েং চংলি অমসুং য়াম্না অচেৎপা মওংদা চুগী লৌমীশিংগী অৱাবশিং কোকহন্নবা ঐখোয়না ফোংদোকচরি।
ইচিল ইনাওশা খুঙ্গংশিংগী চাউখৎ-থৌরাংশিংগা লোইননা ঐখোয়না ঐখোয়গী শহরশিংবুসু ২১শুবা চহিচাগী মতুং ইন্না শেমগৎ-শাগৎলি। স্মার্ত সিতী মিশন, অমৃত য়োজনাগী থোংদা শহরগী ইনফ্রাস্ত্রকচরশিংবু চেৎশিলহল্লি। শহরশিংদা লৈরিবা লাইরবা-ময়াই ওইবা থাক্কী মীওইশিংনা মখোয়গী ময়ুম ফংজনবা ঐখোয়না অকনবা মওংদা হোৎনরি, কংগ্রেসকী সরকারশিংগা য়েংনরুবদা শরুক কয়ামরুম হেন্না ঐখোয়না থবকসু তৌরি। ২০০৪দগী হৌরগা ২০১৪গী চহি ১০ অসিদা পুন্না য়ুম লাখ ১৩ শহরশিংদা শাননবা অয়াবা পীখ্রে, হৌখিবা চহি মরিরোমদা ঐখোয়না য়ুম লাখ ৪৬তা অয়াবা পীখ্রে। চাউরাক্না লাখ য়াঙ্খৈ য়ৌখ্রে। কংগ্রেসনা চহি ১০দা তৌবদগী হায়বদি শরুক অহুম লোমদগী হেন্না ঐখোয়না তৌরে। কংগ্রেসনা চহি ১০দা য়ুম লাখ ৫ মখাইগী শোশিং মীয়ামদা শিন্নখি। অদুম ওইনমক ঐখোয়গী সরকারনা শুপ্নগী চহি ৪গী মনুংদা লাখ ৮দগী হেনবা শহরগী কান্নবা ফংলবশিংদা লৈননবগীদমক য়ুমগী শো পীখ্রে।
ইচিল ইনাওশা মী মশিং হেনগৎপগী শিংনবা অসিগা মায়োক্ননবগীদমক্তসু শহরগী থৌরাংশিং পাইখৎলি। ইমুং অমগী চহি ৩৮গী লৈঙাক্তা করম্না শহরশিংগী মথোং-মরম খঙদবা থৌরাংশিং পাইখৎলম্বগে, থৌরাং শেমদনা অসুম্মক চৎথরম্মি, মসি লৈবাক অসিনা সমস্যাশিং অসিগী মরু অদু কদাইদগীনো হায়বসি তশেং তশেংনা উরি।
মরূপশা, গঙ্গা শেংদোকপদা লৈবাক অসিদা হান্নদগীসু ৱা চাউনা চাউনা ঙাংনদুনা লাক্লি। অদুবু সরকার অসি ৱাতমক ঙাংদে মদু থবক্তসু ওন্থোক্লি। মসি ঐখোয়গী থবক তৌবগী মচৎ অদুনি, মসিমক ঐখোয়গী লন্নি। হৈশিংনা তানখিবা পৈশা খুদিংমক মীয়ামদা চাদিং তৌবা অসিগীদমক কন্না য়েংশিল্লি। মরম অসিনা সীৱেজ ত্রিৎমেন্ত প্লান্ত হেক শেম্লকপদা মদু ফজনা চৎথবা য়ানবসু ঐখোয়না য়েংশিল্লি মরমদি মসিমসু কংগ্রেসকী থবক তৌগী মচৎ ওইদুনা লাক্লি মদুদি হেক শেমখিবা প্লান্ত খুদিংমক মখোয়গী মপাঙ্গলগী মতুং ইন্না থবকসু তৌদে নত্রগা কুইনসু খক চৎপা ঙমদে। গঙ্গাজীগা মরি লৈনবা মরু ওইবা প্রোজেক্তশিংদগীসু কংগ্রেসকী মচৎ অসি লৌথোক্নবা থবক পাইখৎলি।
মরূপশা, হৌজিক হেক শেম্বা প্লান্ত মখৈ, চহি ১৫গী মতুংদসু মথৌ তারক্কদবশিং অদুদা মীৎয়ং থমদুনা শেম্লি। হায়বদি ঐখোয়গী থৌদাং অসি শুপ্নগী সীৱেজ ত্রীৎমেন্ত প্লান্ত শেম্বা খক্তদা নত্তে মখোয়বু চলাইবদসুনি।
ইচিল ইনাওশা, মখোয়না চহি ৭০ ফাওবা লৈবাক অসিদা লোইননা, লৈবাক অসিগী লাইরবশিংদা, ময়াই ওইবা কাংলুপশিংদা, লৌমীশিংদা, নহারোলশিংদা লৌনমখি, মখোয়বু মীনম্বীখি, মখোয় হৌজিক এন.দি.এ. সরকারদা মীয়াম্না থাজবা থম্বা অসি উবদা অদুক্কী মতিক ঙাওচৎনরি। মখোয়না ৱারি মদুদি চহি মরিগী মতুংদা অসুক শাখ্রবা অসিদা অসুক্কী মতিক য়ামখ্রবা মীয়ামগী ইহৌ অসি উবদা মখোয় তুম্বা য়াদ্রি।
লৈবাক অসিগী ইলেক্সন কমিশন্দা, ই.ভি.এম.বু করম্না মখোয়না চীংনা মীৎয়েংনা য়েংখিবা, মসিসু লৈবাক অসিনা ময়েক শেংনা খঙই। লৈবাক অসিগী রিজর্ব বেঙ্কপু, মসিগী কাংলোনশিংদা মখোয়না ৱাহং হংলি। থাজবদা খুদোংথিবা পোকহন্নীংঙাই ওইবা পাপ মখোয়না তৌরি হায়বসিসু ঐখোয়না উরি। লৈবাক্কী এজেন্সীশিংনা মখোয়বু য়েংশিল্লি, মসিনা মখোয়বুসু ৱায়েলশঙদা শোইদনা কৌখৎকনি।
ইচিল ইনাওশা, ইমুং অমবু পুজা তৌবশিংনা কৈদৌঙৈদসু লোক্তন্ত্রগী পুজা তৌবা ওইথোক্লোই। মখোয়না সর্জিকেল স্ত্রাইক তৌখিবা লৈবাক অসিগী লান্মীগী থৌনাবুসু থৌওইদ্রি। মালেমগী এজেনসীশিংনা ভারতপু থাগৎলকপা মতমদা মখোয়দসু চৈ পাইদুনা চেনশিল্লি। মখোয়গী মতমদা চাউখৎ-থৌরাংগী দেতা পীখিবা লৈবাক অসিগী এজেন্সীশিংনা অনৌবা সরকারনা খোংজেল য়াংনা থবক পাইখৎলি হায়বগী দেতা পীরকপা মতমদা মখোয়দসু থাজদবগী ৱাহং হংলি। মীরমদগী লাকপা কনাগুম্বা মীথুংলেন্না সরকার অসিবু থাগৎপীরকপা মতমদা মখোয়দসু নিন্দা তৌবীরি।
মরূপশা, লৈবাক অসিগী মীয়ামগী থাজবা মখোয়দগী মাংখ্রবদা, মখোয় অদুক্কী মতিক ঙাউচৎনরি, মখোয়না ৱাবগী মরম অদোমসু খঙবীরি ঐসু খঙই। মোদীগী মায়োক্তা লৈবদগী, লৈবাক্কী মায়োক্তা লেপলক্কনি হায়বসি ঐ ফাওবদি থাজখিদবনি। অদুবু মহাক্কী মফমদা অদোমগী থাজবা লৈরিবা, অদোমগী থৌজাল লৈরিবা, লৈবাক অসিগী মীওই কোতি ১২৫না থাজবা থম্লিবা, মহাক অদুদা মখোয়না কয়ারক হন্না লান্দাদুনসু কৈদৌনুংদা খক নীংহন্নদে, খক লেপ্তে, খক চোকথদে।
মরূপশা, ঐগী ইরৈবাকচাশিং অদোম্না পোৎশক খুদিংমক থিদোক্তুনা য়েংবীয়ু অশোমদনা হৌজিক কনা কনা লৈরিবা অদুগা শোমদনা কনা কনা লৈরিবা। অশোমদা লৈরিবা মখোয়গীদি মখোয়গী ইমুং অদুমক মখোয়গী লৈবাক্নি, ঐগীদমক্তদি ঐগী লৈবাক অসিমক ঐগী ইমুংনি। লৈবাক অসিগী মীওই কোতি ১২৫ মক ঐগী ইমুংগী মীহুৎশিংনি। তান্সিন্নবগীদমক ঐগী ইফমদা শুপ্নগী অদোমগী আশীর্বাদ খক লৈ, অদোমগী মীনুংশি অদোমগী থাজবা। তৌননবগীদমক ঐগী ইফমদা শুপ্নগী মীওই কোতি ১২৫গী সেবা খক্তমক লৈ। অদোম পুম্নমক্কী মতেংদগী, মীওই কোতি ১২৫না লেং মান্ননা চৎমিন্নবদগী অমত্তা ওইবা ভারত অথোইবা ভারতকী ঐখোয়গী ৱাশক অদু হেন্না চেৎশিলহল্লগনি। অদোম মশিং য়াম্না মফম অসিদা লেংবীরক্লি, মসিগীদমক্তা ঐনা অদোম্বু হন্না হন্না থাগৎপা ফোংদোকচরি। লোইননা ঙসি, কৎথোকচরিবা লম্বী অসিগী মগুন অসি শুপ্নগী লমদম অসোমগীদমক্তা নত্তনা ২১শুবা চহি চাগী হিন্দুস্তান্না করম্না ওইবা য়াবগে হায়বদুগী খুদম অমনি মসি। মসি অদোমগী য়ুমগী হেক নাকলদা লৈরবনি।
হন্না হন্না থাগৎচরি।
